Gbalashihilɛ Ni He Baa Sɛɛnamɔ Kɛha Akpekpei Abɔ Ni Yɔɔ Wala Mli Bianɛ
“Yehowa wɔ-Nyɔŋmɔ, Ofe lɛ, eje shishi eeye nɔ akɛ maŋtsɛ . . . Nyɛhaa wɔkɛ anunyam ahaa Lɛ, ejaakɛ Toobi lɛ yookpeemɔ Lɛ eshɛ ni eŋa lɛ esaa ehe.”—KPOJIEMƆ 19:6, 7, New World Translation.
1. Mɛɛ be mli abaaje shishi ala gbalɛ lala ni yɔɔ Kpojiemɔ 19:6-8 lɛ, ni mɛni hewɔ?
NƐKƐ miishɛɛ wiemɔi nɛɛ feɔ gbalɛ kunimyeli lala ko fa. Mɛɛ be abaaje elamɔ shishi? Yɛ be mli ni akpata Yehowa jamɔ lɛ blema henyɛlɔ—“Babilon kpeteŋkpele” lɛ, okadi “ajwamaŋ kpeteŋkpele” ni damɔ shi kɛha apasa jamɔi fɛɛ lɛ hiɛ. Esa akɛ akojo lɛ yɛ gbɛ ni etsɔ nɔ emale Nyɔŋmɔ he lɛ hewɔ. Kwɛ bɔ ni elaka adesai kɛtsɔ ehe ni ekɛwo adesai amaŋkwramɔŋ saji amli, ehiɛjoomɔ kɛ heloo gbɛfaŋ nibii asɛɛdii, kɛ bɔ ni enyɛɔ Yehowa anɔkwa jalɔi ni egbe amɛ lɛ hewɔ!—Kpojiemɔ 17:1-6; 18:23, 24; 19:1, 2; Yakobo 4:4.
2. (a) Mɛɛ gbɛ nɔ Yehowa baatsɔ ni ekɛ Babilon kpeteŋkpele lɛ hiɛkpatamɔ aba yɛ? (b) Ni amɛaajie Yehowa yi moŋ lɛ, mɛni mɛi ni kpataa apasa jamɔ hiɛ lɛ baafee?
2 Etsɛŋ ni Yehowa Nyɔŋmɔ kɛbaawo jeŋ maŋkwramɔŋ hiɛnyiɛlɔi lɛ atsui mli koni amɛkpata ehiɛ. (Kpojiemɔ 17:12, 16, 17) Shi mɛi ni kpataa apasa jamɔ hiɛ lɛ fataŋ kunimyeli lala kpeteŋkpele ni alaa nɛɛ he. Shi moŋ, yɛ Satan, ni ji Gog lɛ kudɔmɔ shishi lɛ, amɛbaatutua mɛi ni diɔ anɔkwa jamɔ sɛɛ lɛ, ni hiɔ shi yɛ toiŋjɔlɛ mli ni tsiɔ amɛhe kɛjɛɔ je nɛŋ nɔ fɔŋ feemɔ he lɛ.—Yesaia 2:2-4; Ezekiel 38:2, 8-12; Yohane 17:14; Yakobo 1:27.
3. Mɛɛ yiŋtoi ahewɔ ni Yehowa tsuji ni ji adesai lɛ kɛ amɛhe baawo ŋwɛi lala lɛ lamɔ mli lɛ?
3 Nɛkɛ tutuamɔ ni tsɔɔ Nyɔŋmɔ ni abuuu ni maŋkwramɔŋ nɔyelɔi lɛ kɛbaaba lɛ baatee Harmagedon ta lɛ shi, ni enɛ ji nɔ ni kɛ jeŋmaji ni teɔ shi woɔ jamɔ lɛ fɛɛ anaagbee baaba. Yɛ no sɛɛ lɛ, abaajie hewalɛ fɔŋ ni Satan kɛ edaimonioi lɛ naa yɛ mɛi anɔ lɛ fɛɛ kɛjɛ shikpɔŋ lɛ nɔ. (Kpojiemɔ 16:14, 16; 19:11-21; 20:1, 2) Akɛni shidaa eyimɔ tsuii amli obɔbɔ hewɔ lɛ, adesai fɛɛ ni jeɔ mli lɛ baafata ŋwɛi lala nɛɛ he: “Haleluya! Ejaakɛ Nuŋtsɔ [Yehowa], wɔnyɔŋmɔ Ofe lɛ miiye maŋtsɛ.” (Kpojiemɔ 19:6) Yɛ anɔkwale mli lɛ, saji ni tamɔ nɛkɛ ni hosoɔ je lɛ baakadi be hee ko shishijee. No mli lɛ Yehowa ebu jeŋ muu fɛɛ maŋtsɛ ni eji lɛ bem ni ejie mɛi ni teɔ shi woɔ enɔyeli lɛ yɛ shikpɔŋ lɛ nɔ lɛ fɛɛ kɛtee. Be eshɛ enaagbee agbɛnɛ akɛ ŋwɛi yookpeemɔ lɛ aaaba nɔ. Taakɛ gbalɛ lala lɛ yaa nɔ lɛ: “Nyɛhaa wɔmii ashɛa ni wɔmli afilia wɔ ni wɔwoa [Yehowa] ehiɛ nyam! Ejaakɛ Toobi lɛ yookpeemɔ lɛ eshɛ, ni eŋa lɛ esaa ehe eto.”—Kpojiemɔ 19:7, 8.
4. (a) Toobi lɛ kɛ “eŋa” lɛ feɔ namɛi ahe mfoniri? (b) Mɛɛ saji abiɔ yɛ biɛ, ni te wɔɔfee tɛŋŋ ni wɔnine ashɛ hetoi lɛ anɔ?
4 Toobi lɛ jeee mɔ ko mɔ ko akɛ Yesu Kristo ni awo ehiɛ nyam lɛ, ni “eŋa” lɛ ji esɛɛnyiɛlɔi anɔkwafoi 144,000 ni afɔ amɛ mu lɛ ayibɔ lɛ fɛɛ ni agbɛnɛ amɛkɛ lɛ efee ekome yɛ ŋwɛi lɛ. Nɛkɛ ŋwɛi gbalashihilɛ mli hefatalɔi nɛɛ fɛɛ feɔ Nyɔŋmɔ Maŋtsɛyeli lɛ mlibii lɛ fɛɛ ayibɔ lɛ, Maŋtsɛyeli ni baahole adesai anɔ, kɛ gbohii ni atee amɛ shi lɛ hu, kɛya adesa emuuyeli mli lɛ. (Kpojiemɔ 5:8-10; 14:1-4; 20:4, 12, 13; 21:3-5, 9, 10; 22:1-3) Ani saji ni baaya nɔ ni kɛ nakai yookpeemɔ ni jɔɔmɔ yɔɔ mli lɛ baaba lɛ baaye omanye? Te ooofee tɛŋŋ ona nakai yookpeemɔ lɛ he sɛɛ? Bɔni afee ni ona nakai sanebimɔi lɛ ahetoo lɛ, nyɛhaa wɔpɛia saji ni kɔɔ Isak gbalashihilɛ loo yookpeemɔ lɛ he taakɛ aŋma afɔ shi yɛ 1 Mose yitso 24 lɛ mli wɔkwɛa.
Ayemforo ni Ajɛ Ŋwɛi Ahala lɛ Aha Isak
5, 6. Mɛni hewɔ Abraham ma nɔ mi veveeve akɛ Isak kɛ Kanaannyo akabote gbalashihilɛ mli lɛ, ni enɛ ji gbɛtsɔɔmɔ kpakpa kɛha namɛi ŋmɛnɛ? (1 Korintobii 7:39)
5 Sane lɛ jeɔ shishi ni Abraham kɛ famɔ miiha mɔ ni kwɛɔ eshiabii lɛ anɔ lɛ, ni eka shi faŋŋ akɛ lɛ ji Eliezer lɛ. (1 Mose 15:2; 24:2) Abraham kɛɛ: “Ni maha oka Yehowa, . . . kita akɛ owɛŋ Kanaanbii ni miyɔɔ amɛteŋ nɛɛ abiyei lɛ eko ohaŋ mibi lɛ; shi moŋ oootee mishikpɔŋ lɛ nɔ kɛ miweku lɛ mli oyawɛ yoo obaha mibi Isak.”—1 Mose 24:3, 4.
6 Mɛni hewɔ Abraham maa nɔ mi veveeve akɛ ebinuu lɛ kɛ Kanaannyo akabote gbalashihilɛ mli lɛ? Ejaakɛ Kanaanbii lɛ jɛ Kanaan, mɔ ni Noa lomɔ lɛ lɛ mli. (1 Mose 9:25) Agbɛnɛ, ale Kanaanbii lɛ akɛ amɛbɛ jeŋba, ni nɔ ni fe fɛɛ lɛ, amɛjaaa Yehowa. (1 Mose 13:13; 3 Mose 18:3, 17-28) No hewɔ lɛ shishinumɔ yɛ he akɛ Abraham miisumɔ ni ebinuu lɛ kɛ mɔ ko ni jɛ lɛ diɛŋtsɛ eweku mli, Shem seshibii lɛ ateŋ mɔ ko, ni nine eshɛ Noa jɔɔmɔ ni jɛ ŋwɛi lɛ nɔ lɛ ateŋ mɔ ko abote gbalashihilɛ mli. (1 Mose 9:26) Mɛɛ gbɛtsɔɔmɔ kpakpa enɛ ji kɛha Kristofoi ni sumɔɔ ni amɛbote gbalashihilɛ mli ŋmɛnɛ lɛ.—5 Mose 7:3, 4.
7. Mɛɛ gbɛ nɔ Abraham tsɔ esaa Eliezer kɛha nitsumɔ ni tamɔ nɛkɛ yɛ?
7 No hewɔ lɛ Eliezer je egbɛfaa ni baahe lɛ fe shitoi 500 ni kɛ lɛ yaa Mesopotamia lɛ shishi. Etee ni esaa ehe jogbaŋŋ, kɛ tejii nyɔŋma ni tere nikeenii. (1 Mose 24:10) Kɛfata he lɛ, ebaanyɛ ejwɛŋ enuŋtsɔ lɛ wiemɔi ni woɔ hemɔkɛyeli hewalɛ nɛɛ ahe: “Yehowa, ŋwɛi Nyɔŋmɔ lɛ, . . . lɛ eeetsu ebɔfo kɛnyiɛ ohiɛ ni oyawɛ yoo kɛjɛ jɛi obaha mibi lɛ.”—1 Mose 24:7.
8, 9. (a) Mɛni ba beni Eliezer yashɛ Nahor maŋ lɛ mli lɛ? (b) Mɛɛ kaa abaatsɔ nɔ ni akɛhala ayemforo ni sa lɛ?
8 Yɛ naagbee lɛ, ebashɛ Nahor maŋ lɛ mli yɛ Mesopotamia kooyigbɛ. Eliezer ha yoomai ni etɔ amɛ lɛ bumɔ shi koni amɛjɔɔ amɛhe yɛ maŋ lɛ sɛɛ nu bu ko he. No mli lɛ be eshɛ ni yei yaa faaŋ—hegbɛ kpakpa diɛŋtsɛ, koni Eliezer atao yoo ni sa! Shi mɛɛ yoo nɛkɛ esa akɛ efee? Mɔ ni he yɔɔ fɛo fe fɛɛ? Dabi. Titri lɛ, Eliezer miisumɔ yoo ni hiɛ Nyɔŋmɔ gbeyeishemɔ sui. Enɛ jeɔ kpo yɛ heshibaa sɔlemɔ ni hemɔkɛyeli yɔɔ mli ni ejaje lɛ mli: “Yehowa, minuŋtsɔ Abraham Nyɔŋmɔ! Miikpao fai ni oha mihe aba nii ŋmɛnɛ gbi nɛɛ, ni omli ahi yɛ minuŋtsɔ Abraham nɔ. Naa, midamɔ nu bu nɛɛ he, ni maŋ lɛ bii lɛ abiyei miije kpo miiba nuyɛɛ: Ni ha aba mli akɛ, obalayoo mɔ ni makɛɛ lɛ akɛ: Miikpao fai, too ogbe lɛ kɛba shi, ni manu nu lɛ eko, ni eeekɛɛ akɛ: Nuu, ni maha oyoomai lɛ hu eko amɛnu lɛ, ha lɛ nɔŋŋ etsɔ mɔ ni ojie oha otsulɔ Isak, ni no maŋɔ lɛ akɛ omli ehi yɛ minuŋtsɔ nɔ.”—1 Mose 24:11-14.
9 Enɛ ji kaa kpakpa diɛŋtsɛ. Taakɛ The New Encyclopaedia Britannica lɛ tsɔɔ lɛ, yooma ni kumai yeɔ lɛ waa lɛ baanyɛ anu ‘nu galɔŋ 25 yɛ minitii 10 pɛ mli.’ Ekolɛ kumai yeee Abraham yoomai lɛ babaoo nakai, shi ŋwanejee ko bɛ he akɛ yei ni yɔɔ nakai be lɛ mli lɛ le nu falɛ ni kooloo lɛ nuɔ. Eka shi faŋŋ akɛ ebaahe yoo ni yɔɔ mlihilɛ ni jeee pɛsɛmkunyatsɛ ni tsuɔ nii waa ni baatuu ehe aha akɛ ebaayɛ nu eha gbɔ nɛɛ yoomai nyɔŋma ni etɔ amɛ lɛ.
10, 11. (a) Mɛɛ naakpɛɛ gbɛ nɔ atsɔ aha Eliezer sɔlemɔ lɛ hetoo yɛ? (b) Mɛɛ gbɛ nɔ Rebeka tsɔ ejie sui ni asumɔɔ lɛ kpo yɛ? (d) Te Eliezer fee enii yɛ enɛ he eha tɛŋŋ?
10 Eliezer naa enyɔɔɔ shi yɛ esɔlemɔ lɛ mli pɛ kɛkɛ ni aha hetoo, taakɛ nɔ ni aŋma lɛ kɛɔ lɛ: “Kɛkɛ lɛ naa, Rebeka, . . . je kpo ba, . . . ni kɛ ona obalayoo lɛ, ehe yɛ fɛo naakpa, obalayoo foro ni, ni nuu ko nuu ko leko lɛ; ni ekpeleke shi kɛtee bu lɛ mli, ni eyawo egbɛ lɛ obɔ, ni eje kpo eba. Ni tsulɔ lɛ sha foi ekɛ lɛ yakpe ni ekɛɛ: Miikpao fai ni oha manu ogbe lɛ mli nu lɛ fioo! Ni ekɛɛ: Nuu, minuŋtsɔ! Ní ehe fee oya ni eto egbɛ lɛ ehiɛ edɛŋ ni eha enu. Ni beni eha enu egbe naa lɛ, ekɛɛ: Mayɛ eko maha oyoomai lɛ hu kɛyashi beyinɔ ni amɛaanu amɛgbe naa. Ni ehe fee oya ni etsɔ egbɛ lɛ mli nu lɛ ewo nunumɔ nɔ lɛ mli, ni esha foi etee bu lɛŋ ekoŋŋ eyayɛ nu lɛ eha eyoomai lɛ fɛɛ.”—1 Mose 24:15-20.
11 Eliezer ‘naa kpɛ ehe’ yɛ be mli ni enaa esɔlemɔ lɛ hetoo ni yɔɔ naakpɛɛ nɛɛ. Beni obalayoo foro ni sa yijiemɔ lɛ egbe naa lɛ, ewo lɛ nyɔmɔ kɛ shika gugɔŋ ga kɛ nineshi gai enyɔ ni ebi lɛ akɛ: “Namɔ bi jio?” Beni ena akɛ eji Abraham nabiyoo lɛ, Eliezer ma eyi shi ni eja Yehowa, akɛ: “Ajie Yehowa, minuŋtsɔ Abraham Nyɔŋmɔ lɛ yi, akɛ ehako emlihilɛ kɛ enɔkwayeli sɛɛ afo yɛ minuŋtsɔ nɔ; ni mi hu, Yehowa ebatsɔɔ mi minuŋtsɔ nyɛmimɛi awe gbɛ!”—1 Mose 24:21-27.
12. Mɛɛ gbɛ nɔ atsɔ akɛ gbala nii lɛ ba yɛ Rebeka shia yɛ?
12 Kɛkɛ ni Rebeka kɛ miishɛɛ sha foi kɛtee shia ni eyagba eweku lɛ. Yɛ sɛɛ mli lɛ, beni Rebeka tsɛ kɛ enyɛminuu lɛ nu Eliezer gbɛfaa lɛ yiŋtoo kɛjɛ lɛ diɛŋtsɛ enaa kɛ bɔ ni Yehowa ha esɔlemɔ lɛ hetoo lɛ, amɛkpɛlɛ nɔ ni shishashaomɔ ko bɛ mli akɛ esa akɛ Rebeka afee Isak ŋa. “Ni eba mli akɛ, beni Abraham tsulɔ lɛ nu amɛwiemɔi lɛ, eho ebu shi ni eja Yehowa. Ni tsulɔ lɛ jie jwiɛtɛi nibii kɛ shika nibii kɛ mamai kɛba, ni ekɛbaha Rebeka; ni esaa eha enyɛminuu lɛ kɛ enyɛ hu nibii ni jara wa.”—1 Mose 24:52, 53.
Bɔni Ayemforo lɛ kɛ Esɛɛbii lɛ Here nɔ Amɛha
13. Mɛɛ gbɛ nɔ atsɔ ama nɔ ni Yehowa ehala lɛ nɔ mi akɛ no ji nɔ ni ja lɛ?
13 Te Rebeka bu hegbɛ ni ji ŋwɛi ni ajɛ ahala lɛ akɛ Isak ayemforo lɛ eha tɛŋŋ? Enɔ jetsɛremɔ lɛ, nɔ ko ba ni jie bɔ ni enuɔ he diɛŋtsɛ yɛ mligbɛ lɛ kpo. Akɛni etsu egbɛfaa lɛ yiŋtoo lɛ he nii egbe naa hewɔ lɛ, Eliezer miisumɔ ni eku esɛɛ ni eya enuŋtsɔ lɛ ŋɔɔ ni shishashaomɔ ko bɛ mli. Shi Rebeka weku lɛ miisumɔ ni ayemforo lɛ kɛ amɛ ahi shi kɛ hooo lɛ gbii nyɔŋma. No hewɔ lɛ akɛfɔ Rebeka hiɛ koni ekpɛ eyiŋ kɛ esaa ehe akɛ ebaashi amrɔ nɔŋŋ. Eha hetoo akɛ: “Matee.” Kpɛlɛmɔ ni ekpɛlɛ akɛ ebaashi eweku lɛ amrɔ nɔŋŋ ni efa gbɛ kɛya shikpɔŋ ko ni yɔɔ shɔŋŋ nɔ bɔni afee ni ekɛ nuu ko ni ekɛ lɛ ekpɛko da ayabote gbalashihilɛ mli lɛ ji hemɔkɛyeli kpojiemɔ ni ekaaa yɛ Nyɔŋmɔ gbɛtsɔɔmɔ shishi. Ema nɔ mi akɛ lɛ ji yoo ni sa ni ahala lɛ lɛ.—1 Mose 24:54-58.
14. (a) Namɛi fata Rebeka he? (b) Mɛɛ gbɛfaa nɛkɛ ka amɛhiɛ?
14 Mɛi komɛi fata Rebeka he yɛ egbɛfaa lɛ mli. Taakɛ nɔ ni aŋma lɛ tsɔɔ mli lɛ: “Ni Rebeka te shi kɛ ebalayei lɛ, ni amɛho amɛtara yoomai lɛ anɔ kɛnyiɛ nuu lɛ sɛɛ.” (1 Mose 24:61) No hewɔ lɛ yoomai ni ato amɛ srɛnɛɛ je gbɛfaa ni oshara yɔɔ mli ni baahe fe shitoi 500 kɛtsɔ gbɔi ashikpɔŋkuku mli lɛ shishi. Wolo ni ji The Living World of Animals lɛ kɛɛ akɛ: “Kɛ hooo lɛ kooloi jatsuterelɔi nyiɛɔ aaafee shitoi 2.5 yɛ ŋmɛlɛtswaa kome mli.” Kɛji akɛ Abraham yoomai lɛ nyiɛ nakai yɛ ŋmɛlɛtswai kpaanyɔ mli gbi kome lɛ, ebaahe nɔ ni fe gbii 25 dani amɛbaashɛ he ni amɛyaa yɛ Negeb lɛ.
15. (a) Mɛɛ nɔkwɛmɔ nɔ kpakpa ko wɔnaa yɛ Eliezer, Rebeka kɛ ebalayei lɛ ahe? (b) Sane nɛɛ feɔ mɛni he mfoniri?
15 Eliezer, Rebeka kɛ ebalayei lɛ kɛ amɛhiɛ fɔ Yehowa gbɛtsɔɔmɔ nɔ kwraa, ni eji nɔkwɛmɔ nɔ kpakpa kɛha Kristofoi ŋmɛnɛ! (Abɛi 3:5, 6) Kɛfata he lɛ, sane lɛ ji gbalɛ mfoniri ni woɔ mɔ hemɔkɛyeli hewalɛ. Taakɛ wɔna lɛ, Abraham feɔ Yehowa Nyɔŋmɔ, mɔ ni kɛ esuɔmɔ Bi, Isak Kpeteŋkpele lɛ ha koni adesai eshafeelɔi ana naanɔ wala lɛ he mfoniri. (Yohane 3:16) Hesaamɔ kɛmiiha Isak yookpeemɔ loo gbalashihilɛ lɛ ba yɛ sɛɛ mli beni eje gbele yɛ afɔleshaa latɛ lɛ nɔ lɛ mli lɛ sɛɛ. Eji gbalɛ mfoniri kɛha hesaamɔ kɛha ŋwɛi yookpeemɔ ni je shishi kɛ hiɛdɔɔ beni atee Yesu shi kɛjɛ gbohii ateŋ lɛ sɛɛ lɛ.
Isak kpeteŋkpele lɛ Yookpeemɔ Lɛ
16. (a) Abraham tsulɔ lɛ feɔ Nyɔŋmɔ mumɔ krɔŋkrɔŋ lɛ he mfoniri yɛ gbɛ ni sa jogbaŋŋ nɔ yɛ mɛɛ gbɛ nɔ? (b) Mɛɛ sane abaanyɛ abi yɛ mumɔ lɛ kɛ ayemforo lɛ he?
16 Eliezer gbɛi lɛ shishi ji “Mi-Nyɔŋmɔ lɛ Ji Yelikɛbualɔ.” Efee Abraham kpeteŋkpele lɛ, Yehowa Nyɔŋmɔ, mumɔ krɔŋkrɔŋ lɛ ni E-tsu kɛtee shikpɔŋ ko ni yɔɔ shɔŋŋ nɔ, wɔshikpɔŋ nɛɛ, koni ebahala ayemforo ni sa eha Isak kpeteŋkpele, Yesu Kristo lɛ he mfoniri ni sa yɛ egbɛi lɛ kɛ nifeemɔ fɛɛ mli. (Yohane 14:26; 15:26) Ayemforo kuu lɛ ji “asafo lɛ,” ni Yesu kaselɔi ni akɛ mumɔ krɔŋkrɔŋ lɛ efɔ amɛ akɛ Nyɔŋmɔ mumɔŋ bii lɛ feɔ lɛ. (Efesobii 5:25-27; Romabii 8:15-17) Taakɛ bɔ ni Rebeka nine shɛ nikeenii ni jara wawai anɔ lɛ, nakai nɔŋŋ hu Kristofoi asafo lɛ mli shishijee bii lɛ anine shɛ naakpɛɛ nikeenii anɔ yɛ Pentekoste afi 33 Ŋ.B. koni amɛkɛye amɛ ŋwɛi tsɛmɔ lɛ he odase. (Bɔfoi lɛ Asaji 2:1-4) Amɛjɛ amɛsuɔmɔ mli amɛkpoo je lɛ kɛ heloo naa weku mli wekukpai fɛɛ bɔni afee ni yɛ naagbee lɛ amɛkɛ amɛ ŋwɛi Ayemforo Wu lɛ afee ekome taakɛ Rebeka fee lɛ. Esa akɛ ayemforo kuu lɛ mlibii aŋkroaŋkroi ni atsɛ amɛ lɛ abu amɛmumɔŋ obalayoo foro shihilɛ lɛ lɛ he aahu kɛyashi gbele mli, yɛ be mli ni amɛfaa gbɛ kɛtsɔɔ Satan jeŋ ni oshara yɔɔ mli ni lakaa mɔ nɛɛ mli lɛ. (Yohane 15: 18, 19; 2 Korintobii 11:3; Yakobo 4:4) Akɛni mumɔ krɔŋkrɔŋ eyimɔ amɛ obɔbɔ hewɔ lɛ, ayemforo kuu lɛ mlibii lɛ kɛ anɔkwayeli fɔɔ nine amɛtsɛɔ mɛi krokomɛi koni amɛbahe Yehowa gbɛjianɔtoo kɛha yiwalaheremɔ lɛ eko. (Kpojiemɔ 22:17) Ani onyiɛɔ enɔkwɛmɔ nɔ lɛ sɛɛ kɛtsɔɔ mumɔ lɛ gbɛtsɔɔmɔ ni ohereɔ nɔ lɛ nɔ?
17. (a) Yoomai nyɔŋma lɛ feɔ mɛni he mfoniri? (b) Mɛni esa akɛ efee wɔsubaŋ yɛ Biblia lɛ kɛ woji ni ayemforo kuu lɛ damɔ Biblia lɛ nɔ amɛŋmala lɛ he? (Bɔfoi lɛ Asaji 17:11)
17 Ayemforo kuu lɛ buɔ nɔ ni yoomai nyɔŋma lɛ feɔ he mfoniri lɛ waa. Akɛ yibɔ ni ji nyɔŋma lɛ tsuɔ nii yɛ Biblia mli akɛdamɔɔ shi ahaa emuuyeli yɛ shikpɔŋ nɔ nibii ahe. Abaanyɛ akɛ yoomai nyɔŋma lɛ ato Nyɔŋmɔ Wiemɔ lɛ ni yeɔ emuu kwraa lɛ he, nɔ ni ayemforo kuu lɛ tsɔɔ nɔ amɛnine shɛɔ mumɔŋ niyenii kɛ mumɔŋ nikeenii anɔ lɛ. (Yohane 17:17; Efesobii 1: 13, 14; 1 Yohane 2:5) Yɛ be mli ni ewieɔ bɔ ni Rebeka ha yoomai lɛ nu lɛ he lɛ, November 1, 1948 The Watchtower lɛ kɛ sane nɛɛ to ayemforo kuu lɛ he: “Amɛkɛ suɔmɔ susuɔ Nyɔŋmɔ Wiemɔ lɛ ni woɔ eyibii lɛ babaoo kɛhaa amɛ lɛ he. Amɛnyaa e-Wiemɔ ni aŋma lɛ he, amɛkɛhaa mɛi ni amɛhaa efeɔ ehee kɛtsɔɔ ehe nitsumɔ nɔ ni amɛkɛ anɔkwayeli tsɔɔ akɛ amɛsumɔɔ emli sane lɛ kɛ eyiŋtoi lɛ, amɛtaoɔ akɛ amɛaahe amɛye.” Akɛ enɛ he nɔkwɛmɔ nɔ lɛ, ayemforo kuu lɛ mli shwɛɛnii lɛ ejɛ suɔmɔ mli amɛha gbɔmɛi akpekpei abɔ anine eshɛ New World Translation of the Holy Scriptures Biblia lɛ ehee nɔ. Kɛji akɛ shishitsɔɔmɔ kpakpa nɛɛ yɛ owiemɔ mli aloo ebɛ mli hu lɛ, ani otsɔɔ hiɛsɔɔ kɛtsɔɔ Biblia lɛ mli kwɛmɔ daa kɛ Biblia kasemɔ he woji ni ayemforo kuu lɛ kɛhaa lɛ nɔ?—2 Timoteo 3:16.
Toobi lɛ Yookpeemɔ lɛ Miibɛŋkɛ
18. Mɛni hewɔ Rebeka obalayei lɛ feɔ ayemforo kuu lɛ ni yɔɔ ŋmɛnɛ lɛ hefatalɔi lɛ ahe mfoniri yɛ gbɛ ni sa nɔ lɛ?
18 “Asafo babaoo ko” ni abaanyɛ akɛ amɛ ato Rebeka “obalayei” lɛ ahe lɛ kɛ amɛhe ebɔ ayemforo kuu lɛ mli shwɛɛnii lɛ ahe yɛ Satan je lɛ naagbee gbii nɛɛ amli. Taakɛ eji yɛ Rebeka gbɛfaŋ lɛ, mɛnɛɛmɛi ayi fa kwraa fe ayemforo kuu lɛ mlibii lɛ ayifalɛ ni yeɔ emuu ni ji 144,000 lɛ. Amɛji Yesu Kristo “asafo babaoo” lɛ ni ji “toi krokomɛi” lɛ. (Kpojiemɔ 7:4, 9; Yohane 10:16) Akɛ anɔkwafoi ni sɔmɔɔ ayemforo lɛ, esa akɛ amɛtsi amɛhe kwraa kɛjɛ Satan yiwalɛ je lɛ ni aaawo amɛhe muji lɛ he. Esa akɛ amɛ hu amɛkpɛlɛ Yehowa mumɔ lɛ kɛ e-Wiemɔ lɛ hiɛnyiɛmɔ ni ayemforo kuu lɛ tsɔɔ shishi amɛhaa amɛ lɛ nɔ. Shi amɛnyɔmɔwoo lɛ yɛ sɔrɔto. Kɛji akɛ amɛŋmɛ amɛtsui shi ni amɛkɛ anɔkwayeli fi Kristo ayemforo lɛ sɛɛ lɛ, amɛbaaje Satan je lɛ naagbee lɛ mli ni amɛna hegbɛ ni yɔɔ naakpɛɛ ni ji shihilɛ kɛmiiya naanɔ yɛ shikpɔŋ nɔ paradeiso lɛ mli.—Kpojiemɔ 21:3, 4.
19. Mɛni ba beni Rebeka kɛ ebalayei lɛ yashɛ gbɛfaa lɛ naagbee lɛ?
19 Ani Rebeka kɛ “ebalayei” lɛ anine shɛ oti ni ma amɛhiɛ lɛ nɔ yɛ omanyeyeli mli? Hɛɛ. Taakɛ Biblia lɛ bɔɔ amaniɛ lɛ: “Ni gbɛkɛnaashi lɛ Isak eje kpo etee eyiŋshwiemɔ yɛ ŋa lɛ nɔ; ni ehole ehiŋmɛii anɔ, ni ekwɛ, ni naa, yoomai miiba. Ni Rebeka hu hole ehiŋmɛii anɔ, ni beni ena Isak lɛ, ejɛ yooma lɛ nɔ eyi shi.” Beni Eliezer etsɔɔ enitsumɔ ni eye omanye lɛ mli lɛ, Isak kpɛlɛ Rebeka nɔ akɛ eŋa “ni esumɔ lɛ.”—1 Mose 24:63-67.
20. Isak yookpeemɔ lɛ feɔ mɛɛ be ni sa mlifilimɔ he mfoniri?
20 Nakai nɔŋŋ hu Yehowa yiŋtoo ni kɔɔ Kristo ayemforo lɛ he lɛ hu nyɛŋ afee efolo. (Yesaia 55:11) Etsɛŋ, beni akojo Babilon kpeteŋkpele lɛ ni akpata ehiɛ lɛ sɛɛ lɛ, ayemforo kuu lɛ mli shwɛɛnii lɛ ateŋ naagbee mɔ lɛ baagbe egbɛfaa lɛ naa. Kɛkɛ lɛ be eshɛ ni amɛkɛ amɛnanemɛi ni sɔmɔ amɛ lɛ baagbala mli ni amɛkɛ Isak kpeteŋkpele lɛ ayafee ekome yɛ ŋwɛi yɛ yookpeemɔ mli. Mɛɛ jeŋ muu fɛɛ mlifilimɔ kpeteŋkpele be po enɛ aaaji nɛkɛ!—Kpojiemɔ 19:6-8.
21. Yɛ be mli ni ŋwɛi yookpeemɔ lɛ naagbee bɛŋkɛɔ lɛ, mɛni esa akɛ ana ni wɔ fɛɛ wɔmiifee?
21 Ni kɛlɛ, akpekpei abɔ miina jɔɔmɔ kɛmiiha amɛ diɛŋtsɛ amɛhe kɛmiitsɔ ayemforo kuu lɛ mli shwɛɛnii lɛ ni amɛyifalɛ nɔ gboɔ lɛ asɔɔmɔ nitsumɔ lɛ nɔ. Dani amɛ fɛɛ amɛaagbe amɛshikpɔŋ nɔ sɔɔmɔ lɛ naa yɛ gbele mli lɛ, jeŋ apasa jamɔ maŋtsɛyeli ni tamɔ ajwamaŋ lɛ hiɛkpatamɔ lɛ baaba ni ebaakadi “amanehulu babaoo . . . ni anako nɔ da kɛjɛ je lɛŋ shishijee mli kɛbashi ŋmɛnɛŋmɛnɛ, ni asaŋ anaŋ enɔ gbi ko gbi ko dɔŋŋ” lɛ shishijee. Be ni eshwɛ lɛ faaa. Kɛ oosumɔ ni oje mli lɛ, belɛ kwɛ bɔ ni ehe hiaa akɛ ooona ŋwɛi famɔ ni atsuɔ he nii nɛɛ mli gbɛfaŋnɔ! (Mateo 24:14, 21; Marko 13:10; Luka 21:15; Yohane 13:34) Famɔi ni tamɔ nɛkɛ kɔɔ wɔ jaramɔ bei nɛɛ ahe titri. No hewɔ lɛ, kɛ oji ayemforo kuu lɛ mli shwɛɛnii lɛ ateŋ mɔ ko aloo oji “asafo babaoo” ni sɔmɔɔ amɛ lɛ ateŋ mɔ ko hu lɛ, yaa nɔ obo Yehowa toi ni okɛwo ehiɛ nyam kɛ bo hu onaanɔ miishɛɛ namɔ. Kwɛ nyam ni enɛ aaaji akɛ asafo babaoo lɛ, ni abu amɛ akɛ Nyɔŋmɔ shieŋtsɛmɛi loo enanemɛi momo lɛ, aaaya nɔ ahi shi beni Yehowa ‘feɔ nii fɛɛ ehee’ ni naanɔ sɛɛnamɔi hoɔ kɛyahaa akpekpei abɔ ni yɔɔ shikpɔŋ nɔ paradeiso lɛ mli lɛ!—Kpojiemɔ 21:5; 22:1, 2, 17.
Ani Okaiɔ?
◻ Mɛɛ miishɛɛ nibii loo saji etsɛŋ ni fɛɛ baaba?
◻ Mɛni maa nɔ aduatsɔ akɛ ŋwɛi yookpeemɔ Iɛ baaye omanye kɛmɔ shi?
◻ Abaanyɛ akɛ Eliezer kɛ yoomai nyɔŋma Iɛ ato mɛni he?
◻ Namɛi ŋmɛnɛ amɛtamɔ Rebeka kɛ ebalayei ni sɔmɔ lɛ Iɛ?
◻ Mɛni wɔkaseɔ kɛjɛɔ saji ni je shishi kɛyashi be mli ni Isak bote gbalashihilɛ mli lɛ mli?