Sanebimɔi ni Jɛ Kanelɔi Adɛŋ

Ani eji tɔmɔ akɛ Yakob aaakwa efee ehe tamɔ Esau taakɛ abɔ he amaniɛ yɛ 1 Mose 27:18, 19 lɛ?

Ekolɛ ole amaniɛbɔɔ nɛɛ. Beni Isak gbɔ lɛ ekɛɛ Esau ni eyamĩ milɛloo ebaha lɛ, ni ekɛɛ kɛfata he akɛ: “Ni maye, beni afee ni misusuma ajɔɔ bo, dani magbo.” Akɛni Rebeka nu nɔ ni ewu wie lɛ hewɔ lɛ, ehoo niyenii kɛ ŋɔɔmɔ ni ekɛɛ Yakob akɛ: ‘okɛ niyenii lɛ ayaha otsɛ, ni eye, beni afee ni ejɔɔ bo, dani egbo.’ No sɛɛ lɛ, Rebeka ŋɔ Esau atade ewo Yakob ni eŋɔ toobii ahe woji ewo Yakob niji kɛ ekuɛ ni eha Yakob kɛ niyenii kɛ ŋɔɔmɔ lɛ yaha etsɛ. Isak bi lɛ akɛ “Bo namɔŋ, mibi?” Yakob to he akɛ: “Mi, Esau, okromɔbi lɛŋ.” Isak he lɛ eye ni eŋɔ jɔɔmɔ lɛ eha lɛ.—1 Mose 27:1-29.

Biblia lɛ ewieee nɔ hewɔ ni Rebeka kɛ Yakob fee amɛnii yɛ nakai gbɛ nɔ lɛ he, shi etsɔɔ mli akɛ nifeemɔ lɛ ba trukaa. Esa akɛ wɔkadi akɛ akɛni Nyɔŋmɔ Wiemɔ lɛ ewieee eshiii Rebeka kɛ Yakob nifeemɔ lɛ ni etsɔɔɔ hu akɛ amɛnifeemɔ lɛ ja hewɔ lɛ, amɛnifeemɔ lɛ jeee nɔkwɛmɔnɔ kɛha malemɔ kɛ mɔ shishiumɔ. Shi kɛlɛ Biblia lɛ haa wɔleɔ nɔ ni tee nɔ lɛ he sane.

Klɛŋklɛŋ lɛ Biblia lɛ feɔ lɛ faŋŋ akɛ Yakob ji mɔ ni sa akɛ enine shɛɔ etsɛ dɛŋ jɔɔmɔ lɛ nɔ shi jeee Esau. Esau etsɔ hiɛ momo ehɔ̃ɔ ekromɔbi gbɛnaa lɛ eha Yakob yɛ mla naa, ejaakɛ ehiɛ esɔɔɔ nakai gbɛnaa lɛ, ni ehɔ̃ɔ ekromɔbi gbɛnaa lɛ ehé niyenii ni eye. Esau “gbe ekromɔbi gbɛnaa lɛ he guɔ.” (1 Mose 25:29-34) No hewɔ lɛ Yakob tee etsɛ lɛ ŋɔɔ koni enine ashɛ nɔ ni ji egbɛnaa lɛ nɔ.

Nɔ ni ji enyɔ lɛ, Isak tsakeee eyiŋkpɛɛ lɛ beni ená ele akɛ Yakob ji mɔ ni eŋɔ jɔɔmɔ lɛ kɛha lɛ. Eeenyɛ efee akɛ ekai nɔ ni Yehowa kɛɛ Rebeka dani afɔ haaji lɛ akɛ: “Ni onukpa lɛ aaasɔmɔ gbekɛ lɛ.” (1 Mose 25:23) Nɔ ni sa kadimɔ hu ji akɛ beni Yakob shiɔ kɛyaa Haran lɛ, Isak jɔɔ lɛ babaoo efata nɔ ni etsɔ hiɛ lɛ he.—1 Mose 28:1-4.

Naagbee kwraa lɛ, esa akɛ wɔkai akɛ Yehowa le nɔ ni tee nɔ lɛ fɛɛ ni asaŋ eyɛ he miishɛɛ. Jɔɔmɔ ni Isak jɔɔ Yakob lɛ kɛ shi ní Nyɔŋmɔ wo Abraham lɛ yɛ tsakpaa. (1 Mose 12:2, 3) Eji Nyɔŋmɔ sumɔɔɔ ni Yakob nine ashɛ jɔɔmɔ lɛ nɔ kulɛ, ebaatsi naa yɛ gbɛ ko nɔ. Yɛ no najiaŋ lɛ Yehowa ma nɔ mi eha Yakob ekɛɛ: “Ni . . . oseshi mli aaajɛ ajɔɔ shikpɔŋ lɛ nɔ akutsei fɛɛ.”—1 Mose 28:10-15.