Sanegbaa​—Efe wiemɔ folo kɛkɛ

FEEMƆ shisheralɔi akuu ko ni miikwɛ shikpɔŋ fɛfɛo ko shikamɔ he mfoniri yɛ ojwɛŋmɔ mli okwɛ. Eyɛ mli akɛ kuu muu lɛ fɛɛ miikwɛ nɔ koome lɛ nɔŋŋ moŋ, shi mɔ fɛɛ mɔ naa lɛ yɛ gbɛ sɔrɔto nɔ. Mɛni hewɔ? Ejaakɛ esoro he ni aŋkroaŋkroi fɛɛ damɔ ni amɛkwɛɔ nii lɛ. Mɛi enyɔ ko bɛ ni amɛdamɔ he koome lɛ nɔŋŋ amɛmiikwɛ. Ni kɛfata he lɛ, jeee mɔ fɛɛ mɔ kwɛɔ he koome yɛ nakai shikpɔŋ lɛ shikamɔ mli. Mɔ fɛɛ mɔ naa nɔ kroko ni yɔɔ fɛɔ waa ni enaa no he miishɛɛ titri.

Nakai nɔŋŋ eji anɔkwale yɛ gbalashihilɛ mli hu. Kɛji mɛi nyɛɔ amɛkɛ amɛhe hiɔ shi jogbaŋŋ po lɛ, mɛi enyɔ ko bɛ ni hiɛ jwɛŋmɔ kome yɛ saji fɛɛ he. Esoro wu kɛ ŋa yɛ saji otii tamɔ bɔ ni amɛnuɔ nii ahe amɛhaa, amɛgbekɛbiiashi niiashikpamɔi, kɛ hewalɛ ni amɛweku ena yɛ amɛnɔ lɛ mli. Amɛsusumɔi amli sɔrɔto-feemɔ ni jɛɔ mli baa lɛ baanyɛ afee béi ni mli wa jɛɛhe. Bɔfo Paulo wie yɛ faŋŋ mli akɛ: “Mɛi ni boteɔ gbalashihilɛ mli lɛ baana piŋmɔ kɛ awerɛho.”​—1 Korintobii 7:​28, The New English Bible.

Nɔ ni fata sanegbaa he ji mɔdɛŋbɔɔ ni akɛaafee nɛkɛ sɔrɔto-feemɔi nɛɛ ekome ni etsɔ heloo kome shihilɛ. Enɛ biɔ ni atao be ni akɛgba sane. (Kwɛmɔ akrabatsa lɛ yɛ baafa 7.) Shi nibii babaoo fata he lolo.

Sanesɛɛkɔmɔ ni Akɛaatsu Nii

Biblia abɛbua ko kɛɔ akɛ: “Nilelɔ tsui haa edaa jieɔ sanesɛɛkɔmɔ kpo, ni ekɛ nitsɔɔmɔ ni tsɔɔ mɔ yiŋ fataa enaabu he.” (Abɛi 16:​23, New World Translation) Hebri wiemɔ ni atsɔɔ shishi yɛ biɛ akɛ ‘ajie sanesɛɛkɔmɔ kpo’ lɛ tsɔɔ hiɛshikamɔ ni aaana, ni akɛŋmɛ saji akwɛ jogbaŋŋ yɛ jwɛŋmɔ mli. No hewɔ lɛ, nɔ titri ni sanegbaa ni mɔɔ shi jogbaŋŋ lɛ damɔ nɔ ji tsui lɛ, jeee naabu. Esa akɛ sanegbalɔ kpakpa lɛ afee babaoo fe wielɔ kɛkɛ ni eeeji; esa akɛ efee sane toibolɔ ni nuɔ nii ahe. (Yakobo 1:19) Esa akɛ eyoo henumɔi kɛ saji ni yɔɔ ehefatalɔ lɛ nifeemɔi asɛɛ hu.​—Abɛi 20:⁠5.

Yɛ mɛɛ gbɛ nɔ? Bei komɛi lɛ abaanyɛ afee enɛ kɛtsɔ saji komɛi ni ba dani bei ko te shi lɛ hesusumɔ nɔ. Ani ohefatalɔ lɛ yɛ henumɔ loo gbɔmɔtsoŋ nɔnyɛɛ ko ni mli wa shishi? Ani hela ko hewɔ ni ohefatalɔ lɛ feɔ enii nakai lɛ? Biblia lɛ kɛɔ akɛ: “Kwɛ miishɛɛ ni eji akɛ aaana wiemɔ ni sa kɛha be ni sa jogbaŋŋ!” (Abɛi 15: 23, Today’s English Version) No hewɔ lɛ nibii ni ha ebalɛ nakai lɛ ahesusumɔ baaye abua bo ni otsu he nii yɛ gbɛ ni ja nɔ.​—Abɛi 25:⁠11.

Shi, bei pii lɛ, nɔ ni kɛ bei baa lɛ shishifa yɛ saji krokomɛi ni fataaa amrɔ shihilɛ ni yɔɔ lɛ he lɛ mli.

Nibii ni Eho lɛ Ashishinumɔ

Gbekɛbiiashi niiashikpamɔi nyɛɔ ekudɔɔ wɔsusumɔi waa yɛ wɔdalɛ beaŋ. Akɛni gbalashihilɛ mli hefatalɔi jɛ wekui sɔrɔtoi amli hewɔ lɛ, anyɛŋ ajo susumɔi ni kpaaa gbee naa foi.

Sane ko ni ba ni aŋma yɛ Biblia lɛ mli lɛ feɔ enɛ he mfoniri. Beni akɛ kpaŋmɔ adeka lɛ ku sɛɛ kɛtee Yerusalem lɛ, David jie miishɛɛ ni ena yɛ he lɛ kpo yɛ faŋŋ mli. Shi eŋa, Mikal hu? Biblia lɛ gbaa wɔ akɛ: “Mikal, Saul biyoo lɛ, yabu samfɛlɛ naa, ni ena maŋtsɛ David miihulu ni eejo yɛ Yehowa hiɛ, ni egbe ehe guɔ yɛ etsui mli.”​—2 Samuel 6:​14-16.

Mikal jie etsɛ Saul ni jeee jalɔ lɛ hemɔkɛyeli ni ebɛ lɛ kpo. Biblia mli saji ahe wielɔi G. F. Keil kɛ F. Delitzsch tsɔɔ akɛ enɛ hewɔ ni awie Mikal he yɛ kuku 16 lɛ mli akɛ “Saul biyoo” fe ni aaatsɛ lɛ David ŋa Iɛ. Bɔ fɛɛ bɔ ni eji lɛ, naataamɔ ni te shi yɛ amɛteŋ lɛ haa efeɔ faŋŋ akɛ David kɛ Mikal susumɔi kpaaa gbee yɛ nɛkɛ nifeemɔ ni ha ana miishɛɛ nɛɛ he.​—2 Samuel 6:​20-23.

Nɛkɛ nɔkwɛmɔ nɔ nɛɛ feɔ he mfoniri akɛ hewalɛi ni yɔɔ nigii, ni jɛ tsɔsemɔ ni ana lɛ mli lɛ baanyɛ aha wu loo ŋa akwɛ saji yɛ gbɛ ni yɔɔ sɔrɔto kwraa nɔ. Enɛ feɔ anɔkwale, kɛ mɛi enyɔ lɛ efee ekome po kɛmiisɔmɔ Yehowa. Akɛ nɔkwɛmɔ nɔ lɛ, ŋa ni ahaaa lɛ henumɔŋ sɛɛfimɔ bɔ ni sa beni eji gbekɛ lɛ baajie hiamɔ titri ko kpo yɛ nɔkpɛlɛmɔ kɛ hewalɛwoo ni esumɔɔ akɛ ena lɛ gbɛfaŋ. Ekolɛ enɛ baaha ewu ahao. Ekolɛ ebaawie akɛ: “Manyɛ makɛɛ lɛ shii abɔ sɔŋŋ akɛ miisumɔ lɛ, shi kɛlɛ, no kɛkɛ faŋ haŋ lɛ!”

Yɛ enɛ mli lɛ, nɔ ni fata sanegbaa he hu ji ni “mɔ fɛɛ mɔ akafo enɔ mli, shi efo enaanyo nɔ mli.” (Filipibii 2:⁠4) Kɛji sanegbaa baahi shi lɛ, esa akɛ wu lɛ asusu eŋa lɛ he yɛ bɔ ni yoo lɛ niiashikpamɔi ni ena tsutsu lɛ ji lɛ naa, shi jeee yɛ lɛ nuu lɛ nɔ naa. Ni eji anɔkwale akɛ, esa akɛ enɛ atsirɛ ŋa lɛ hu ni efee nakai nɔŋŋ eha ewu.​—1 Korintobii 10:⁠24.

Kɛji Fitemɔ ko Ba yɛ Tsutsu Be Mli

Mɔ hesusumɔ he miihia waa, titri lɛ kɛji ato hefatalɔ lɛ kaabonaa loo afite lɛ yɛ bɔlɛnamɔ mli beni eji gbekɛ​—dɔlɛ sane ji akɛ, eji naagba ko ni miiya hiɛ waa ŋmɛnɛ. Akɛ nɔkwɛmɔ nɔ lɛ, ekolɛ ŋa lɛ baana akɛ yɛ amɛteŋ bɔlɛnamɔ beaŋ lɛ, enyɛɛɛ ena sɔrɔto ni yɔɔ amrɔ be lɛ kɛ tsutsu be ni eho lɛ mli, kɛ sɔrɔto ni yɔɔ ehefatalɔ lɛ kɛ mɔ ni tutua lɛ lɛ teŋ, aloo bɔlɛnamɔ mli miishɛɛ kɛ bɔlɛnamɔ mli fitemɔ teŋ. Enɛ baanyɛ ekɛ nijiaŋwujee aba, titri lɛ kɛji wu lɛ hu susuuu sane ni jaraa waa nɛɛ he yɛ bɔ ni ŋa lɛ nuɔ he ehaa lɛ naa.​—1 Petro 3:⁠8.

Eyɛ mli akɛ onyɛŋ otsake be ni eho lɛ, aloo osaa nibii ni ejɛ mli eba lɛ jogbaŋŋ kɛmɔ shi moŋ, shi obaanyɛ ofee babaoo ni okɛshɛje hefatalɔ ni ehao lɛ mii. (Abɛi 20:⁠5) Yɛ mɛɛ gbɛ nɔ? Petro ŋma akɛ: “Nyɛ wumɛi lɛ, esa akɛ nyɛbɔ mɔdɛŋ ni nyɛnu nyɛŋamɛi ni nyɛkɛyɔɔ lɛ ashishi.” (1 Petro 3:​7, Phillips) Tsutsu shihilɛ ni ohefatalɔ lɛ ehi mli lɛ shishinumɔ he miihia waa yɛ sanegbaa mli. Kɛ ojieee musuŋtsɔlɛ henumɔ kpo lɛ, no lɛ sɛɛnamɔ ko baŋ owiemɔi ahe.

Yesu “musuŋ tsɔ lɛ” beni ekɛ mɛi ni he yeɔ lɛ kpe lɛ, eyɛ mli akɛ lɛ diɛŋtsɛ enáko amɛhelai lɛ amli niiashikpamɔ da. (Mateo 14:14) Nakai nɔŋŋ hu, ekolɛ bo diɛŋtsɛ okɛ kpoomɔ ni akpoo oŋa aloo fitemɔ ni afite lɛ lɛ eko ekpeko da, shi yɛ nɔ najiaŋ ni ooobu ejaramɔ shihilɛ lɛ akɛ nɔ ko bibioo lɛ, ha etsutsu shihilɛ lɛ akã ojwɛŋmɔ nɔ, ni okɛ sɛɛfimɔ aha lɛ. (Abɛi 18:13) Paulo ŋma akɛ: “Shi wɔ mɛi ni wɔyɔɔ hewalɛ lɛ, esa akɛ wɔkpeɔ mɛi ni bɛ hewalɛ lɛ kɛ amɛgbɔjɔmɔi lɛ, ni wɔhe akasa wɔ diɛŋtsɛ wɔhiɛ.”​—Romabii 15:⁠1.

Mlifu Edũ Lɛ

Gbalashihilɛ tamɔ nɔ ko ni jara wa waa. Kɛ akɛ gbalafitemɔ fite lɛ lɛ, anyɛŋ atsɔɔ bɔ ni awui ni eyeɔ lɛ da ha. (Abɛi 6:32) Lɛlɛŋ, kɛ hefatalɔ ni yeɔ bem lɛ kpɛ eyiŋ akɛ ekɛbaake lɛ, no lɛ abaanyɛ atsara ekukuji lɛ ekoŋŋ kɛtsɔ amɛteŋ tsamɔ nɔ. Shi egbalamɔ lɛ yɛ lolo, ni kɛ naataamɔ ko te shi lɛ, eeenyɛ ebalɛ akɛ aaaku sɛɛ akwɛ nakai gbalamɔ lɛ ekoŋŋ ni akɛ tsutsu be ni eho lɛ atsu nii akɛ dɛŋdade.

Akɛ mlifu fɔɔ anɔkwa ni hefatalɔ kome yeee lɛ nɔheremɔ. Shi kɛ okɛ sane lɛ eke ohefatalɔ lɛ, kwɛmɔ jogbaŋŋ ni okaha mlifu ni aaahi omli daa lɛ fite ekpakpa ni onyɛ otsu kɛtsɔ eshaifaa nifeemɔ nɔ lɛ. Kɛji mlifu lɛ tee nɔ eda yɛ omli jio, ojie lɛ kpo yɛ gbɛ ni etsɔɔɔ mɔbɔnalɛ nɔ jio, mlifu ni yaa nɔ daa lɛ yeɔ gbalashihilɛ mli hefatalɔi enyɔ lɛ fɛɛ awui. Mɛni hewɔ? Datrɛfonyo ko wo ŋaa akɛ: “Kɛ ohefatalɔ lɛ efee nɔ ko ni eha omli efu lɛ, akɛni osusuɔ ehe lolo lɛ hewɔ ni omli efu lɛ lɛ. No hewɔ lɛ, kɛ ogbala ohe shi kɛjɛ ehe aloo obɔ mɔdɛŋ akɛ ooogbala etoi ni okɛtɔ ohe owele lɛ, no lɛ jeee ohefatalɔ lɛ kɛkɛ awui oyeɔ, shi ookpata bo diɛŋtsɛ ohiɛ hu. Ni oyaa nɔ okumɔɔ wekukpaa ni kulɛ otaoɔ ni ehi shi akɛ ekome lɛ babaoo ofataa he.”

Hɛɛ, onyɛŋ osaa saji ni kɛ mlifu eba yɛ ogbalashihilɛ lɛ mli lɛ yɛ be mli ni omlifu lɛ bako shi. No hewɔ lɛ, okɛ ohefatalɔ lɛ asusu ohenumɔi ahe, beni ohenumɔi amli woko la. Tsɔɔmɔ lɛ nɔ hewɔ ni nibii dɔɔ bo lɛ, nɔ ni he hiaa bo koni osaa ona hekɛnɔfɔɔ ekoŋŋ, kɛ nɔ ni obaafee ni okɛbaa nyɛteŋ wekukpaa lɛ yi. Okɛ tsutsu be ni eho lɛ akatsu nii kɔkɔɔkɔ akɛ dɛŋdade ni okɛna hewalɛ yɛ naataamɔ ko mli.

Sui ni Kaa Mɔ he Fiteɔ Sanegbaa

Gbalashihilɛ yajeɔ nɔnyɛɛ ni mli wa shishi kɛ hefatalɔ kome kɛ dãa loo tsofai tsuɔ nii yɛ gbɛ fɔŋ nɔ. Hefatalɔ ni kɛ nakai nii lɛ eko tsuuu nii lɛ shihilɛ bafeɔ tamɔ Abigail nɔ lɛ pɛpɛɛpɛ, taakɛ abɔ he amaniɛ yɛ Biblia lɛ mli lɛ. Beni ewu Nabal “etɔ daa kpɔtɔɔ” lɛ, no mli lɛ Abigail kɛ deŋmegbomɔ miibɔ mɔdɛŋ ni ekɛtsake nibii ni baajɛ esubaŋ ni nilee bɛ mli lɛ mli aba lɛ. (1 Samuel 25:​18-31, 36) Bei pii lɛ, gbalashihilɛ ni hefatalɔ kome yɛ jaramɔ shihilɛ mli yɛ su ko ni enyɛɛɛ ekpa hewɔ, ni mɔ kroko lɛ hu eyaje shihilɛ ni ji mɔdɛŋ ni ebɔɔ ni etsake mɔ ni ena su fɔŋ ni enyɛɛɛ ekpa nɛɛ subaŋ lɛ bafeɔ tamɔ Nabal kɛ Abigail shia lɛ pɛpɛɛpɛ.a

Shishinumɔ yɛ he akɛ, anuɔ heyeli he waa kɛji mɔ ni su fɔŋ nɛɛ yɔɔ ehe lɛ bɔi kpamɔ. Shi eshishijee pɛ nɛ. Feemɔ ahum ni naa wa ni miifite nii waa yɛ maŋ bibioo ko mli lɛ he mfoniri okwɛ. Shiai miikumɔ, tsei miifamɔ, tɛlifon kpaa miigbeegbee shikpɔŋ. Kɛ ahum lɛ sɛɛ fo lɛ, anaa miishɛɛ waa diɛŋtsɛ. Shi agbɛnɛ nitsumɔ kpele he baahia ni akɛsaa nɛkɛ nibii nɛɛ. Nakai nɔŋŋ eji kɛji hefatalɔ lɛ bɔi esu lɛ kpamɔ. Esa akɛ asaa atswa wekukpaa ni efite lɛ ama shi ekoŋŋ. Esa akɛ asaa ato hekɛnɔfɔɔ kɛ anɔkwayeli ama shi ekoŋŋ. Ehe baahia hu ni asaa sanegbaa gbɛi hu. Yɛ mɔ ni kpaa su fɔŋ nɛɛ gbɛfaŋ lɛ, nɛkɛ etswaa-kɛ-shimaa fiofio ekoŋŋ nɛɛ fata “gbɔmɔ hee” ni Biblia lɛ biɔ ni Kristofoi awo loo amɛna lɛ he. Esa akɛ “jwɛŋmɔ mumɔ lɛ” afata nɛkɛ gbɔmɔtso hee nɛɛ he.​—Efesobii 4:​22-24.

Biblia mli nikasemɔ ye ebua Leonard kɛ Elaine ni amɛkpa tsofai kɛ nitsumɔ, shi kɛlɛ, hewalɛ ni kanyaa amɛjwɛŋmɔ lɛ heko shi jogbaŋŋ kɛmɔko shi.b Etsɛɛɛ kɛkɛ ni sui krokomɛi ni eka amɛhe baje kpo. Elaine wie akɛ: “Wɔkɛ afii 20 sɔŋŋ ka akɛ wɔkɛ Biblia shishitoo mlai aaatsu nii koni wɔna gbalashihilɛ mli miishɛɛ, shi be fɛɛ be nɛɛ, wɔnine shɛɛɛ nɔ. Sui ni eka wɔhe lɛ shishifa etee shɔŋŋ. Wɔnyɛɛɛ wɔkase nii loo wɔsɔle ni amɛje wɔhe.”

Leonard kɛ Elaine tao ŋaawoo koni amɛkɛnu nɔ ni eha sui nɛɛ eka amɛhe lɛ shishi. Saji ni je kpo yɛ ebe naa, ni jɛ “tsulɔ anɔkwafo kɛ nilelɔ” lɛ dɛŋ, ni kɔɔ gbekɛbii afitemɔ, daatɔɔ, kɛ bulɛ ni aaajie kpo atsɔɔ yei he lɛ efee yelikɛbuamɔ nɔ krɛdɛɛ ko.c (Mateo 24:​45-47) Elaine kɛɛ: “Aye abua wɔ ni wɔsaa nɔ ni fite lɛ ni wɔsaa wɔteŋ shihilɛ jogbaŋŋ ekoŋŋ.”

Naagbai Asaamɔ

Rebeka nu hejaramɔ ni naa wa waa he yɛ ebinuu Esau ŋamɛi lɛ ahewɔ. Akɛni eeshe gbeyei akɛ ekolɛ ebinuu kroko, ni ji Yakob baanyiɛ Esau nɔkwɛmɔ nɔ lɛ sɛɛ hewɔ lɛ, Rebeka jie enijiaŋwujee lɛ kpo beni ekɛɛ ewu Isak akɛ: “Mijeŋ hilɛ eje mitsine yɛ Het biyei lɛ ahewɔ. Kɛji Yakob wɛ Het biyei ni tamɔ mɛnɛɛmɛi ni ji shikpɔŋ nɛɛ nɔ biyei lɛ eko lɛ, te mahi jeŋ makɛɛ tɛŋŋ?”​—1 Mose 27:⁠46.

Kadimɔ akɛ eyɛ mli akɛ Rebeka kɛ ekaa wie ehenumɔi ahe moŋ, shi etutuaaa Isak diɛŋtsɛ. Ekɛɛɛ akɛ, “Fɛɛ jɛ bo!” aloo, “Kulɛ esa akɛ onyɛ otsu shihilɛ nɛɛ he nii jogbaŋŋ fe nɛkɛ!” Shi moŋ, Rebeka kɛ gbɛi najiaŋdamɔlɔ “mi” tsu nii ni ekɛtsɔɔ bɔ ni naagba lɛ esa ehe eha. Nɛkɛ gbɛ ni ekɛtsu nii nɛɛ tee Isak henumɔ shi, jeee ni ekɛtsi ehiɛgbele naa. Akɛni enuuu he akɛ aatutua lɛ diɛŋtsɛ hewɔ lɛ, etamɔ nɔ ni Isak tsu Rebeka faikpamɔi lɛ ahe nii amrɔ nɔŋŋ.​—1 Mose 28:​1, 2.

Wumɛi kɛ ŋamɛi baanyɛ akase nii kɛjɛ Rebeka nɔkwɛmɔ nɔ lɛ mli. Kɛ naataamɔ ko te shi lɛ, nyɛtutuaa naagba lɛ moŋ, shi jeee nyɛhe. Taakɛ Rebeka fee lɛ, jiemɔ enijiaŋwujee lɛ kpo yɛ bɔ ni esaa ohe ehaa lɛ shishinumɔ naa. “Minijiaŋ eje wui waa ejaakɛ. . . ” aloo, “Misusuɔ akɛ onuuu mi shishi ejaakɛ. . . ”hi kwraa fe ni oookɛɛ akɛ “oha minijiaŋ eje wui!” aloo Bo lɛ onuko mi shishi da!

Efe Tsuishiŋmɛɛ ni Aaana Kɛkɛ

Klɛŋklɛŋ adesai enyɔ, Adam kɛ Hawa gbalashihilɛ lɛ hi shi afii ohai babaoo ni amɛna weku ni ji bihii kɛ biyei. (1 Mose 5:3-5) Shi enɛ etsɔɔɔ akɛ amɛgbalashihilɛ lɛ sa kasemɔ. Mra mli kɛtsɔ hiɛ lɛ, heyeli mumɔ ni amɛna kɛ bulɛ ni amɛjieee kpo amɛtsɔɔɔ Bɔlɔ lɛ jalɛ mlai le fite amɛ heloo-kome tsakpaa lɛ kwraa.

Nakai nɔŋŋ hu, ekolɛ gbalashihilɛ ko etsɛ waa ŋmɛnɛ, shi kɛlɛ ekolɛ nibii ni he hiaa kɛha sanegbaa lɛ eko kwraa bɛ mli. Ekolɛ esa akɛ ajie susumɔi ni akɛfiɔ mɔ nɔ waa, kɛ sui komɛi ni esaaa lɛ akadimɔ nii kwraa kɛjɛ jɛmɛ. (Okɛto 2 Korintobii 10:​4, 5 he.) Tsɔsemɔ nifeemɔ ni yaa nɔ daa nɛ. Shi mɔdɛŋbɔɔ lɛ he baaba sɛɛnamɔ waa kɛ̃. Yehowa Nyɔŋmɔ yɛ gbalashihilɛ gbɛjianɔtoo lɛ he miishɛɛ waa, ejaakɛ lɛ ji e-Bɔlɔ. (Maleaki 2:​14-16; Hebribii 13:⁠4) No hewɔ lɛ, kɛ wɔtsu wɔgbɛfaŋnɔ lɛ, wɔbaanyɛ wɔna hekɛnɔfɔɔ akɛ ebaana wɔmɔdɛŋbɔi lɛ, ni ebaaha wɔ nilee kɛ hewalɛ ni he hiaa wɔ ni wɔkɛsaa fitemɔ ni ekolɛ eba wɔgbalashihilɛ mli sanegbaa mli lɛ.​—Okɛto Lala 25: 4, 5; 119:34 he

[Shishigbɛ niŋmai]

[Akrabatsa ni yɔɔ baafa 6]

“Jwɛi lɛ naa be babaoo!”

Abi wu kɛ ŋa ko ni miina gbalashihilɛ mli naagbai ni amɛka amɛhiɛ amɛtsɔɔ be falɛ ni amɛkɛtsuɔ nii amɛkɛjieɔ jwɛi amshwieɔ daa otsi. Amɛhetoo ji aaafeee minitii 35 daa otsi, aloo minitii 5 daa gbi. Kɛkɛ ni asaa abi amɛ bei abɔ ni amɛyeɔ amɛkɛgbaa sane hu.Wu lɛ naa kpɛ ehe amrɔ nɔŋŋ. Kɛkɛ ni ewie akɛ: “Jwɛi lɛ naa bei babaoo! Kɛkɛ ni ekɛfata he akɛ: Kɛji wɔsusuɔ akɛ minitii enumɔ fa bɔ ni wɔɔnyɛ wɔkɛbaa gbalashihilɛ lɛ yi lɛ, no lɛ wɔmiilaka wɔhe. Ni eka shi faŋŋ akɛ ejeee be ni fa bɔ ni sa hu ni wɔkɛaaha gbalashihilɛ lɛ asɔ.

[Akrabatsa ni yɔɔ baafa 7]

Nyɛtoa Nifeemɔ Gbɛi Ahe Gbɛjianɔ

◻ Nyɛsusua saji ahe ekomekome (1 Korintobii 14:​33, 40)

◻ Nyɛjiea henumɔi akpo; nyɛkafolɔa nyɛhe naa(1 Mose 27:⁠46)

◻ Nyɛkagbalaa nyɛhe mãi (Efesobii 5:​28, 29)

◻ Nyɛkawoa nyɛhe gbɛi (Abɛi 26: 20)

◻ Nyɛbɔa mɔdɛŋ ni nyɛsaa nyɛteŋ, jeee ni mɔnɛ aaaye mɔnɛ nɔ kunim (1 Mose 13:​8, 9)

[Mfoniri yɛ bafa 4]

Kɛ naataamɔ ko te shi lɛ, nyɛtutuaa naagba lɛ moŋ, shi jeee nyɛhe

[Mfoniri ni yɔɔ baafa 8]

Jiemɔ ohenumɔi akpo; kaafolɔ mɔ kroko lɛ naa