Mɛni Baa Susuma lɛ Nɔ yɛ Gbele Mli?

“Tsɔɔmɔ ni atsɔɔ akɛ adesa susuma lɛ gbooo, ni ebaaya nɔ ehi shi yɛ gbɔmɔ gbele kɛ egbɔmɔtso lɛ fitemɔ sɛɛ lɛ ji Kristojamɔ mli jeŋ nilee kɛ Nyɔŋmɔ jamɔ he nikasemɔ koŋtɛi lɛ ateŋ ekome.”—“NEW CATHOLIC ENCYCLOPEDIA.”

1. Mɛni New Catholic Encyclopedia lɛ kpɛlɛɔ nɔ yɛ susuma ni hiɔ shi yɛ gbele sɛɛ lɛ gbɛfaŋ?

SHI, nɛkɛ wolo nɛɛ nɔŋŋ kpɛlɛɔ nɔ akɛ “anaaa jwɛŋmɔ ni ahiɛ akɛ susuma lɛ hiɔ wala mli yɛ gbele sɛɛ lɛ yɛ Biblia lɛ mli oya.” Belɛ, mɛni Biblia lɛ tsɔɔ diɛŋtsɛ yɛ nɔ ni baa susuma lɛ nɔ yɛ gbele mli lɛ he?

Gbohii lɛ Leee nɔ Ko

2, 3. Mɛɛ shihilɛ mli gbohii lɛ yɔɔ, ni mɛɛ ŋmalɛi jieɔ enɛ kpo?

² Atsɔɔ shihilɛ ni gbohii lɛ yɔɔ mli lɛ mli faŋŋ yɛ Jajelɔ 9:5, 10, he ni wɔkaneɔ yɛ akɛ: “Gbohii lɛ leee nɔ ko . . . Nitsumɔ ko bɛ, yiŋtoo ko bɛ, nilee loo sɛɛyoomɔ ko bɛ gbonyo bu lɛ mli.” (Moffatt) No hewɔ lɛ, gbele tsɔɔ shihilɛ mli ni abɛ dɔŋŋ. Lalatsɛ lɛ ŋma akɛ kɛ́ gbɔmɔ gbo lɛ, “ekuɔ esɛɛ kɛyaa esũ lɛ mli ekoŋŋ; nakai gbi lɛ nɔŋŋ eyiŋtoi lɛ laajeɔ.”—Lala 146:4.

³ No hewɔ lɛ gbohii lɛ leee nɔ ko nɔ ko, amɛnyɛɛɛ nɔ ko amɛfee. Beni ejajeɔ fɔbuu kojomɔ eshwieɔ Adam nɔ lɛ, Nyɔŋmɔ wie akɛ: “Sũ jio, ni sũ mli oooku osɛɛ kɛaatee!” (1 Mose 3:19) Dani Nyɔŋmɔ baashɔ̃ lɛ kɛjɛ shikpɔŋ sũ mli ní eha lɛ wala lɛ, no mli lɛ Adam bɛ shihilɛ mli. Beni egbo lɛ, Adam ku esɛɛ kɛtee nakai shihilɛ lɛ mli. Etoigbalamɔ ji gbele—jeee jiemɔ kɛmiiya shihilɛ kroko mli.

Susuma lɛ Baanyɛ Agbo

4, 5. Okɛ nɔkwɛmɔnii ni jɛ Biblia lɛ mli, ni tsɔɔ akɛ susuma lɛ baanyɛ agbo lɛ ahã.

⁴ Beni Adam gbo lɛ, mɛni ba esusuma lɛ nɔ? Ojogbaŋŋ, kaimɔ akɛ yɛ Biblia lɛ mli lɛ, bei pii lɛ wiemɔ “susuma” lɛ kɔɔ gbɔmɔ lɛ he. No hewɔ lɛ, kɛ́ wɔwie akɛ Adam gbo lɛ, belɛ wɔmiitsɔɔ akɛ susuma ni atsɛɔ lɛ Adam lɛ gbo. Ekolɛ enɛ baafee nɔ ko ni yɔɔ sɔrɔto kɛha mɔ ko ni heɔ susuma ni gbooo lɛ eyeɔ. Shi kɛlɛ, Biblia lɛ jajeɔ akɛ: “Susuma ni feɔ esha lɛ, lɛ nɔŋŋ eeegbo!” (Ezekiel 18:4) Mose Wolo ni Ji Etɛ 21:1 (NW) wieɔ “susuma ni egbo” (“gbonyo,” Jerusalem Bible) he. Ni akɛɛ Nazirbii lɛ akɛ amɛkabɛŋkɛ “susuma ko ni egbo” (“gbonyo,” Lamsa).—4 Mose 6:6, NW.

⁵ Wɔnaa susuma lɛ he wiemɔ ko ni tamɔ nakai yɛ 1 Maŋtsɛmɛi 19:4 (NW). Elia ni ehao waa lɛ “bɔi bimɔ akɛ aha esusuma agbó.” Nakai nɔŋŋ hu Yona “tee nɔ ebi ní aha esusuma agbó, ni ewie shii abɔ akɛ: ‘Faŋ nɔ ni migbo moŋ fe nɔ ni mihiɛ kã nɛɛ.’” (Yona 4:8, NW) Ni Yesu kɛ wiemɔ kuku ni ji ‘agbe susuma,’ ní The Bible in Basic English tsɔɔ shishi akɛ “agbe mɔ” lɛ tsu nii. (Marko 3:4) No hewɔ lɛ susuma lɛ gbele miitsɔɔ gbɔmɔ lɛ gbele.

“Heɔ Emli Aje” kɛ ‘Kpale Kɛba’

6. Mɛni Biblia lɛ tsɔɔ beni ekɛɔ akɛ Rahel susuma “heɔ emli aje” lɛ?

⁶ Shi Rahel gbele ni yɔɔ awerɛho ni ba beni efɔɔ ebinuu ni ji enyɔ lɛ hu? Wɔkaneɔ yɛ 1 Mose 35:18 lɛ akɛ: “Beni esusuma heɔ emli aje ni ebu enaa lɛ, ewo lɛ gbɛi akɛ Benoni; shi etsɛ wo lɛ Benyamin.” Ani ŋmalɛ kuku nɛɛ miitsɔɔ akɛ Rahel yɛ mligbɛ bɔɔnɔ ko ni je emli yɛ egbele beaŋ? Dabi kwraa. Kaimɔ akɛ, wiemɔ “susuma” lɛ baanyɛ atsɔɔ wala ni mɔ ko yɔɔ lɛ hu. No hewɔ lɛ, yɛ sane nɛɛ mli lɛ, Rahel “susuma” miitsɔɔ ‘ewala’ kɛkɛ. No hewɔ ni Biblia shishitsɔɔmɔi krokomɛi tsɔɔ wiemɔ kuku ni ji “esusuma heɔ emli aje” lɛ shishi akɛ “ewala nɔ gbɔɔ fiofio kɛyaa” (Knox), “emuɔ enaagbee mumɔ” (Jerusalem Bible), kɛ “ewala je emli etee” (Bible in Basic English) lɛ. Nɔ ko bɛ ni tsɔɔ akɛ Rahel fã ko ni yɔɔ teemɔŋ hi shi yɛ egbele sɛɛ.

7. Yoo okulafo lɛ binuu ni atee lɛ shi lɛ susuma “kpale ba emli ekoŋŋ” yɛ mɛɛ gbɛ nɔ?

⁷ Enɛ tamɔ nɔ ni ba yɛ yoo okulafo ko binuu ko shitee ni aŋma afɔ̃ shi yɛ 1 Maŋtsɛmɛi yitso 17 lɛ mli lɛ. Wɔkaneɔ yɛ kuku 22 lɛ akɛ beni Elia sɔleɔ yɛ gbekɛ nuu lɛ nɔ lɛ, “Yehowa bo Elia gbee toi, ni gbekɛ lɛ susuma kpale ba emli ekoŋŋ, ni ehiɛ tsɛ̃.” Shikome ekoŋŋ lɛ, wiemɔ “susuma” lɛ miitsɔɔ “wala.” Enɛ hewɔ lɛ, New American Standard Bible lɛ kaneɔ akɛ: “Gbekɛ lɛ wala ku sɛɛ ba emli ekoŋŋ ni ehiɛ tsɛ̃.” Hɛɛ, wala ji nɔ ni ku sɛɛ ba gbekɛ lɛ mli ekoŋŋ lɛ, shi jeee okadi nɔ ko kɛkɛ. Enɛ kɛ nɔ ni Elia kɛɛ gbekɛ nuu lɛ nyɛ lɛ kpãa gbee akɛ: “Kwɛ, obi lɛ [gbɔmɔ muu lɛ fɛɛ] yi ená wala.”—1 Maŋtsɛmɛi 17:23.

“Shihilɛ ni Kã Teŋ” He Yiŋkɔshikɔshifeemɔ Lɛ

8. Mɛni mɛi ni tsɛɔ amɛhe Kristofoi lɛ ateŋ mɛi pii heɔ yeɔ akɛ ebaaba yɛ gbohiiashitee lɛ mli?

⁸ Mɛi ni tsɛɔ amɛhe Kristofoi lɛ ateŋ mɛi pii heɔ yeɔ akɛ wɔsɛɛ be mli gbohiiashitee ko baaba, ni gbɔmɔtsei lɛ kɛ susumai ni gbooo lɛ baafee ekome yɛ nakai beaŋ. No sɛɛ lɛ, akɛ mɛi ni atee amɛ shi lɛ baawo shihilɛ ni amɛbaahi mli yɛ naagbee lɛ mli—ni ji nyɔmɔwoo kɛha mɛi ni hi shihilɛ kpakpa mli lɛ, loo toigbalamɔ kɛha mɛi fɔji lɛ.

9. Mɛni ji nɔ ni wiemɔ “shihilɛ ni kã teŋ” lɛ tsɔɔ, ni mɛni mɛi komɛi kɛɔ akɛ ebaa susuma lɛ nɔ yɛ be nɛɛ mli?

⁹ Nɛkɛ susumɔ nɛɛ tamɔ nɔ ni yɔɔ mlɛo. Shi mɛi ni kpɛlɛɔ susuma ni gbooo mli hemɔkɛyeli lɛ nɔ lɛ náa naagba kɛji amɛmiitsɔɔ nɔ ni baa susuma lɛ nɔ, yɛ be ni kã gbele be lɛ kɛ gbohiiashitee be lɛ teŋ lɛ mli. Yɛ anɔkwale mli lɛ, nɛkɛ “shihilɛ ni kã teŋ,” taakɛ afɔɔ lɛ tsɛmɔ nɛɛ, etée yiŋsusumɔi foji ashi afii ohai babaoo. Mɛi komɛi kɛɔ akɛ susuma lɛ yaa hetsuumɔhe yɛ nɛkɛ be nɛɛ mli, he ni abaanyɛ atsuu ehe kɛjɛ eshai ni akɛkeɔ lɛ amli koni efee mɔ ni sa kɛha ŋwɛiyaa lɛ.a

10. Mɛni hewɔ hemɔkɛyeli ni ayɔɔ akɛ susumai yamɛɔ yɛ hetsuumɔhe yɛ gbele sɛɛ lɛ damɔɔɔ ŋmalɛ nɔ lɛ, ni Lazaro niiashikpamɔ lɛ maa enɛ nɔ mi yɛ mɛɛ gbɛ nɔ?

¹⁰ Shi kɛlɛ, taakɛ wɔna lɛ, susuma lɛ ji gbɔmɔ lɛ kɛkɛ. Kɛ́ gbɔmɔ lɛ gbo lɛ, susuma lɛ egbo. No hewɔ lɛ, gbele sɛɛ shihilɛ ko bɛ ni anuɔ nii ahe yɛ mli. Lɛɛlɛŋ, beni Lazaro gbo lɛ, Yesu Kristo ekɛɛɛ akɛ eyɛ hetsuumɔhe, Limbo, loo ‘shihilɛ kroko ni kã teŋ’ mli. Shi moŋ, Yesu kɛɛ kɛkɛ akɛ: “Lazaro ewɔ.” (Yohane 11:11, New English Bible) Eyɛ faŋŋ akɛ, Yesu, mɔ ni le anɔkwale ni kɔɔ nɔ ni baa susuma lɛ nɔ yɛ gbele mli lɛ he lɛ hé eye akɛ Lazaro leee nɔ ko nɔ ko, ebɛ shihilɛ mli.

Mɛni Ji Mumɔ Lɛ?

11. Mɛni hewɔ wiemɔ “mumɔ” lɛ nyɛŋ atsɔɔ gbɔmɔ lɛ fã ko ni agbala ekɛ gbɔmɔtso lɛ mli, ni hiɔ shi yɛ gbele sɛɛ lɛ?

¹¹ Biblia lɛ kɛɔ akɛ kɛ́ gbɔmɔ gbo, ní “emumɔ je emli lɛ, ekuɔ esɛɛ kɛyaa esũ lɛ mli ekoŋŋ.” (Lala 146:4) Ani enɛ tsɔɔ akɛ mumɔ ni agbala ekɛ gbɔmɔtso lɛ mli lɛ jeɔ kpo diɛŋtsɛ ni eyahiɔ shi yɛ gbɔmɔ gbele sɛɛ? Enyɛŋ eba lɛ nakai, ejaakɛ lalatsɛ lɛ tee nɔ ewie akɛ: “Nakai gbi lɛ nɔŋŋ eyiŋtooi lɛ laajeɔ” (“esusumɔi fɛɛ baa naagbee,” NEB). Belɛ, mɛni ji mumɔ lɛ, ni ‘ejeɔ kpo’ kɛjɛɔ gbɔmɔ mli yɛ egbele beaŋ yɛ mɛɛ gbɛ nɔ?

12. Mɛni ji nɔ ni Hebri kɛ Hela wiemɔi ni atsɔɔ shishi akɛ “mumɔ” yɛ Biblia lɛ mli lɛ tsɔɔ?

¹² Wiemɔi ni atsɔɔ shishi yɛ Biblia lɛ mli akɛ “mumɔ” (Hebri, ruʹach; Hela, pneuʹma) lɛ klɛŋklɛŋ shishinumɔ ji “mumɔ ni amuɔ.” Enɛ hewɔ lɛ, yɛ nɔ najiaŋ ni eeekɛɛ akɛ “emumɔ je emli lɛ,” shishitsɔɔmɔ ni R. A. Knox fee lɛ kɛ wiemɔ kuku ni ji “mumɔ ni emuɔ lɛ shiɔ egbɔmɔtso lɛ” tsuɔ nii. (Lala 145:4, Knox) Shi wiemɔ “mumɔ” lɛ tsɔɔ babaoo fe nifeemɔ ni ji mumɔ ni amuɔ kɛkɛ. Ákɛ nɔkwɛmɔnɔ lɛ, beni ewieɔ adesai kɛ kooloi awala ni akpata hiɛ yɛ jeŋ fɛɛ Nu Afua lɛ mli lɛ he lɛ, 1 Mose 7:22 lɛ kɛɛ akɛ: “Nii fɛɛ ni muɔ wala mumɔ [loo, mumɔ; Hebri, ruʹach] yɛ amɛgugɔ mli yɛ shikpɔŋ gbiŋ lɛ nɔ lɛ fɛɛ gboi.” No hewɔ lɛ “mumɔ” baanyɛ atsɔɔ wala hewalɛ ni tsuɔ nii yɛ bɔɔnii ni yɔɔ wala, ní ji gbɔmɛi adesai kɛ kooloi fɛɛ amli, ní mumɔ ni amuɔ lɛ haa eyaa nɔ ehiɔ shi lɛ.

13. Abaanyɛ akɛ mumɔ lɛ ato sarawa hewalɛ he yɛ mɛɛ gbɛ nɔ?

¹³ Ákɛ nɔkwɛmɔnɔ lɛ: Sarawa hewalɛ haa tsɔne hewalɛ ni ekɛtsuɔ nii. Kɛ́ hewalɛ lɛ sɛɛ fo lɛ, tsɔne lɛ kpaa nitsumɔ kwraa. Sarawa hewalɛ lɛ tsɔɔɔ tsɔne kroko ní lɛ diɛŋtsɛ enyɛɔ etsuɔ nii. Nakai nɔŋŋ hu kɛ́ gbɔmɔ gbo lɛ, hewalɛ ni emumɔ kɛhaa egbɔmɔtso lɛ wala yibii lɛ sɛɛ foɔ. Eshiii gbɔmɔtso lɛ kɛyahiii shihilɛhe kroko.—Lala 104:29.

14, 15. Mumɔ lɛ kuɔ sɛɛ kɛyaa Nyɔŋmɔ ŋɔɔ yɛ gbele mli yɛ mɛɛ gbɛ nɔ?

¹⁴ Belɛ, mɛni hewɔ ni Jajelɔ 12:7 lɛ wieɔ akɛ kɛ́ gbɔmɔ gbo lɛ, “mumɔ lɛ aaaku esɛɛ aya Nyɔŋmɔ ni ŋɔha lɛ ŋɔɔ lɛ”? Ani etsɔɔ akɛ mumɔ lɛ fãa gbɛ diɛŋtsɛ kɛtsɔɔ ŋwɛiniiaŋ kɛyaa Nyɔŋmɔ hiɛ diɛŋtsɛ? Jeee nakai nɔ ko kwraa ji nɔ ni etsɔɔ lɛ. Kaimɔ akɛ, mumɔ lɛ ji wala hewalɛ lɛ. Kɛ́ nakai wala hewalɛ lɛ tee lɛ, Nyɔŋmɔ pɛ ji mɔ ni baanyɛ ekɛba ekoŋŋ. No hewɔ lɛ mumɔ lɛ ‘kuɔ esɛɛ kɛyaa anɔkwa Nyɔŋmɔ lɛ ŋɔɔ’ kɛ shishinumɔ akɛ, kɛ́ wɔsɛɛ be shihilɛ he hiɛnɔkamɔ ko yɛ kɛha nakai mɔ lɛ, edamɔ Nyɔŋmɔ pɛ nɔ agbɛnɛ.

¹⁵ Nyɔŋmɔ baanyɛ ekɛ mumɔ lɛ, loo wala hewalɛ lɛ aku sɛɛ aba ekoŋŋ koni gbɔmɔ lɛ aba wala mli ekoŋŋ. (Lala 104:30) Shi ani Nyɔŋmɔ eto eyiŋ akɛ ebaafee nakai?

[Shishigbɛ niŋmaa]

[Akrabatsa ni yɔɔ baafa 23]

Tsutsu Shihilɛ He Kaimɔi

KƐJI nɔ ko kwraa ehiii shi yɛ gbɔmɔtso lɛ gbele sɛɛ lɛ, no lɛ tsutsu shihilɛ he kaimɔi ni mɛi komɛi kɛɔ akɛ amɛyɔɔ lɛ hu?

Hindu woloŋlelɔ Nikhilananda kɛɔ akɛ ‘anyɛŋ akɛ susumɔ atsɔɔ niiashikpamɔi ni anáa yɛ gbele sɛɛ lɛ amli.’ Yɛ ewiemɔ ni yitso ji “Naanɔ Shihilɛ Mli Hemɔkɛyeli he Nɔkwɛmɔnii yɛ Jamɔi Amli” lɛ mli lɛ, Nyɔŋmɔ jamɔ he nilelɔ Hans Küng wie faŋŋ akɛ: “Tsutsu shihilɛ he kaimɔi ahe saji ni awieɔ—titri lɛ nɔ ni jɛɔ gbekɛbii aŋɔɔ loo nɔ ni jɛɔ maji ni aheɔ fɔmɔ ekoŋŋ yɛ gbɔmɔtso hee mli ayeɔ yɛ lɛ—eko kwraa bɛ ni abaanyɛ ama nɔ mi.” Ekɛfata he akɛ: “[Nibii amli taolɔi ni kɛ mɔdɛŋbɔɔ kɛ jeŋ nilee mli ŋaa gbɛi tsuɔ enɛ he nii lɛ] ateŋ mɛi babaoo kpɛlɛɔ nɔ akɛ niiashikpamɔi ni amɛkɛhaa lɛ kɛ nɔdaamɔnɔ hãaa kɛha shikpɔŋ nɔ shihilɛ mlitii he odaseyeli ni kɔneɔ mɔ yiŋ diɛŋtsɛ.”

Shi kɛji akɛ onuɔ he akɛ bo diɛŋtsɛ lɛ oyɛ tsutsu shihilɛ he kaimɔi hu? Henumɔi ni tamɔ nɛkɛ baanyɛ ajɛ nibii sɔrɔtoi babaoo. Akɛ saji ni wɔnine shɛɔ nɔ lɛ mli babaoo toɔ kwraa yɛ jwɛŋmɔ lɛ teemɔhe ko mli, ejaakɛ wɔkɛtsuuu nii tɛ̃ɛ loo amrɔ nɔŋŋ. Kɛji kaimɔi ni hiɛ ekpa nɔ lɛ tetee shi lɛ, mɛi komɛi tsɔɔ enɛ shishi akɛ amɛji tsutsu shihilɛ he odaseyeli. Shi kɛlɛ, anɔkwale lɛ ji akɛ wɔbɛ tsutsu shihilɛ ko he niiashikpamɔi ni abaanyɛ ama nɔ mi fe shihilɛ ni wɔyɔɔ mli amrɔ nɛɛ pɛ. Gbɔmɛi ni yɔɔ wala mli yɛ shikpɔŋ nɔ lɛ ateŋ mɛi babaoo kaiii nɔ ko kwraa ni tsɔɔ akɛ amɛhi shi dã; nakai nɔŋŋ amɛsusuuu akɛ amɛhi tsutsu shihilɛi amli dã.