Hɔmɔ ni Gbeɔ Mɔ yɛ niyenii Babaoo Be Mli
“Naa, mitsuji lɛ oooye nii, shi nyɛ lɛ, hɔmɔ aaayenyɛ.”—YESAIA 65:13.
1, 2. (a) Jeŋmaji lɛ miipele yakatswaa kɛ mɛɛ naagba he? (b) Mɛɛ hiɛnɔkamɔ ni jwɛŋmɔ yɔɔ mli diɛŋtsɛ Biblia lɛ tsɔɔ wɔ?
HƆMƆ ni baanyɛ aba yɛ wɔsɛɛ be he gbeyeishemɔ tsotsoro je muu lɛ fɛɛ yiteŋ! Yɛ be mli ni ewieɔ oshara sane nɛɛ he lɛ, The Boston Globe lɛ mli niŋmaa titri ko jaje akɛ: “Esa akɛ jeŋ ko kɛ emli gbɔmɛi ni miihe ashɛ akpekpei akpe ni hɔmɔ miihe agbe amɛ Iɛ atao gbɛi ni eeetsɔ nɔ eye ebua maji ni yeɔ ohia lɛ koni amɛnine ashɛ no ko ni miibɛŋkɛ niyenii babaoo ni maji ni yɔɔ shika babaoo lɛ anine shɛɔ nɔ lɛ he. Shi kɛ aaawie lɛ pɔtɛɛ lɛ, maji ni akɛɛ ámɛtee hiɛ lɛ po nyɛŋ akɛɛ akɛ amɛyɛ amɛhe kɛjɛ hɔmɔ he. Mɛnɛɛmɛi hu nyɛɛɛ ni amɛto gbɛjianɔ ko ni baaha amɛmaŋbii fɛɛ afee mɛi ni baatɔrɔ. Adesai ni jwɛŋɔ nɛkɛ saji nɛɛ ahe lɛ kɛ naagba ni yaa hiɛ be fɛɛ be lɛ miikpe lolo. Ani tsabaa ko yɛ?
2 Wolo ni wɔŋɔ emli sane wɔwie yɛ yiteŋgbɛ nɛɛ kpɛlɛ nɔ akɛ: “Nɔ ni kumɔɔ mɔ tsui kwraa yɛ hɔmɔ ni yeɔ mɔ he sane nɛɛ mli ji akɛ . . . je lɛ yɛ nyɛmɔ ni ekɛaalɛ mɔ fɛɛ mɔ.” Ni kɛlɛ hɔmɔ kɛ niyenii ni faaa he haomɔ lɛ miiya hiɛ lolo. Mɛni hewɔ esɔ akɛ enɛ aba lɛ nakai? Wɔ-Bɔlɔ ni yɔɔ suɔmɔ lɛ kɛ nibii babaoo eduro bɔɔnii akpekpei to akpei abɔ ni yɔɔ shikpɔŋ nɔ lɛ fɛɛ. Yɛ be mli ni esaa shikpɔŋ lɛ akɛ gbɔmɔ shia lɛ, eha shikpɔŋ lɛ fee nɔ ni baanyɛ aba niyenii babaoo, babaoo po fe bɔ ni mɛi fɛɛ baanyɛ aye. (Lala 72:16-19; 104:14, 15, 25) Ama nɔ mi aha wɔ po yɛ haomɔ bei nɛɛ amli akɛ wɔ Nihelɔ kpeteŋkpele lɛ kɛ niyenii ni sɔ baaha mɛi ni kwɛɔ Jɛɛhe ni jɔ lɛ. Etsɔɔ Mɔ ni ekɛ lɛ eha akɛ Niyenii Anɔkwɛlɔ Nukpa lɛ nɔ ekɛɔ wɔ akɛ: “Shi nyɛtaoɔ Nyɔŋmɔ maŋtsɛyeli lɛ kɛ ejalɛ lɛ tsutsu, ni akɛ nii nɛɛ fɛɛ [shihilɛ mli nibii ni he hiaa yɛ heloo naa] aaafata he aha nyɛ.”—Mateo 6:33; 1 Yohane 4:14.
Hɔmɔ Ni Gbeɔ Mɔ
3. Mɛɛ haomɔ ji nɔ ni sa kadimɔ fe fɛɛ, ni agba enɛ afɔ shi yɛ mɛɛ gbɛ nɔ?
3 Nɔ ni sa kadimɔ jogbaŋŋ fe fɛɛ yɛ shikpɔŋ nɔ ŋmɛnɛ ji mumɔŋ hɔmɔ ni ehiii kwraa lɛ. Ekɔɔ toiŋjɔlɛ ni bɛ lɛ he diɛŋtsɛ. Adesai miidida kɛmiibɔle shi, amɛkɛ hehiamɔ miitao gbɛ ni amɛaatsɔ nɔ amɛje mli. Nyɔŋmɔ Ofe lɛ ha egbalɔ lɛ ŋma shihilɛ nɛɛ he sane afii ohai abɔ ni eho nɛ, akɛ: “Naa, gbii miiba, Nuŋtsɔ Yehowa kɛɛ, ni maha hɔmɔ aba shikpɔŋ lɛ nɔ, jeee abolo hɔmɔ loo kumai ni, shi Yehowa wiemɔi lɛ atoiboo nɔ̃ ni! Ni amɛaatɔ ntitaŋ kɛaajɛ ŋshɔ naa kɛya ŋshɔ naa, ni amɛaatsomlo kɛaajɛ kooyigbɛ kɛya bokagbɛ amɛyatao Yehowa wiemɔ lɛ, ni amɛnaŋ!”—Amos 8:11, 12.
4, 5. (a) Mɛni hewɔ mɛi komɛi enaaa Nyɔŋmɔ tsɛbelɛ amɛtaoɔ lɛ lɛ? (b) Esoro Yesu yɛ Jamɔ mli hiɛnyiɛlɔi ni yɔɔ egbii lɛ amli lɛ ahe yɛ mɛɛ gbɛ nɔ?(Mateo 15:1-14)
4 Shi ani gbɛ ko yɛ ni aaatsɔ nɔ ajɛ duŋ kpii nɛɛ mli? Bɔfo Paulo baa hetoo akɛ hɛɛ, ni ekɛ nɛkɛ wiemɔi nɛɛ wowɔ hewalɛ, “Nyɔŋmɔ ni fee je lɛ . . . yinɔi ni eto lɛ kɛ amɛshihilɛ hei lɛ ahusui lɛ ekpɛ mli eto momo, koni amɛtao Nyɔŋmɔ sɛɛgbɛ, akɛ aleee nɔ kɛ amɛgbugbuu shi lɛ, amɛaana lɛ lo, tsɛbelɛ ekɛ wɔteŋ mɔ fɛɛ mɔ teŋ jɛkɛɛɛ.”—Bɔfoi lɛ Asaji 17:24-27.
5 Kɛji akɛ Nyɔŋmɔ “ekɛ wɔteŋ mɔ fɛɛ mɔ teŋ jɛkɛɛɛ” lɛ, mɛni hewɔ gbɔmɛi gbugbuɔ shi akɛ aleee nɔ amɛbaana lɛ lo, ni kɛlɛ, amɛnaaa lɛ hu lɛ? No ji akɛ amɛmiitao lɛ yɛ hei ni ejaaa lɛ. Mɛi ni tsɛɔ amɛ diɛŋtsɛ amɛhe Kristofoi lɛ ateŋ mɛi enyiɛ kwɛɔ Kristofoi ewolo ni ji Ŋmalɛ Krɔŋkrɔŋ lɛ mli? Mɛi ni akɛɛ atsɛɔ amɛ “tookwɛlɔi” lɛ ateŋ enyiɛ kɛ Nyɔŋmɔ Wiemɔ lɛ tsuɔ nii ni amɛkɛtsɔɔ “tooi” lɛ anii? (Okɛto Ezekiel 34:10 he.) Yesu kɛɛ jamɔ mli hiɛnyiɛlɔi henɔwolɔi ni hi shi yɛ egbii lɛ amli lɛ akɛ “nyɛleee ŋmalɛi lɛ kɛ Nyɔŋmɔ hewalɛ lɛ.” (Mateo 22:29; Yohane 5:44) Shi Yesu le ŋmalɛi lɛ, ni ejɛ mli etsɔɔ gbɔmɛi lɛ anii, ejaakɛ amɛnii fee lɛ mɔbɔ “ejaakɛ etɔ amɛ ni amɛfee yuuyaa tamɔ toi ni bɛ kwɛlɔ.”—Mateo 9:36.
Niyenii Babaoo Be Yɛ Mɛɛ Gbɛ Nɔ?
6. Yɛ mɛɛ gbɛ nɔ Yehowa ma saji anɔ mi eha etsuji lɛ yɛ mumɔŋ niyenii babaoo he?
6 Yehowa woɔ mɛi ni taoɔ ni amɛle lɛ yɛ anɔkwayeli mli lɛ hewalɛ ni eshɛjeɔ amɛmii. Yɛ be mli ni ekãa apasa jamɔ mli tookwɛlɔi lɛ ahiɛ lɛ, ewie kɛtsɔ egbalɔ Yeremia nɔ akɛ: “Naa, mitsuji lɛ aaaye nii, shi nyɛ lɛ hɔmɔ aaayenyɛ, naa, mitsuji lɛ aaanu nii, shi nyɛ lɛ, kumai aaayenyɛ; naa, mitsuji lɛ aaanya, shi nyɛ lɛ, nyɛhiɛ aaagboi.” (Yesaia 65:13, 14) Shi mɛɛ gbɛ nɔ Nyɔŋmɔ tsɔɔ ekɛ niyenii babaoo haa lɛ diɛŋtsɛ etsuji? Mɛni esa akɛ wɔfee koni wɔkɛ miishɛɛ ana egbɛjianɔ ni eto kɛha wala yibaamɔ, yɛ mumɔŋ hɔmɔ ni yaa nɔ ŋmɛnɛ lɛ fɛɛ sɛɛ lɛ mli gbɛfaŋnɔ?
7. Mɛɛ blema drama loo nɔkwɛmɔ nɔ ko ajɛ suɔmɔ mli akɛha wɔ koni ewowɔ hewalɛ ŋmɛnɛ?
7 Akɛni yibaamɔ damɔ Nyɔŋmɔ taomɔ nii ni wɔɔle ni wɔkɛ hemɔkɛyeli atsu he nii kwraa lɛ nɔ hewɔ lɛ, esa akɛ wɔkɛ miishɛɛ abote Nyɔŋmɔ Wiemɔ lɛ mli, ni wɔtao ni wɔle esuɔmɔnaa nii kɛha wɔ ni wɔyoo gbɛ ni etsɔɔ nɔ ekɛwɔ yeɔ. (Yohane 17:3) Yɛ enɛ hewɔ lɛ, wɔbaasusu Biblia mli drama loo nɔkwɛmɔ nɔ ko ni tamɔ nɔ ni yaa nɔ ŋmɛnɛ lɛ pɛpɛɛpɛ he. Mɔ titri ni drama nɛɛ kɔɔ ehe ji blematsɛ Yosef. Taakɛ Yehowa tsɔ Yosef nɔ eto gbɛjianɔ yɛ nilee mli eha E-webii lɛ, nakai nɔŋŋ E-kɛ suɔmɔ nyiɛɔ mɛi ni taoɔ E-sɛɛ gbɛ lɛ ahiɛ ŋmɛnɛ—Okɛto Romabii 15:4; 1 Korintobii 10:11, Reference Bible shishigbɛ niŋmaa (*) ; Galatabii 4:24 he.
Yosef, Wala Yibaalɔ
8, 9. (a) Namɛi ahe mfonirii Yosef kɛ Yakob kɛ Farao fee yɛ naagbee bei lɛ amli? (b) Yɛ mɛɛ gbɛ nɔ emlibaa baanyɛ afee nɔ ni kɔɔ wɔhe?
8 Akɛ wala yibaalɔ lɛ, Yosef ni ji Yakob bi lɛ tsu nitsumɔ ko ni sa kadimɔ jogbaŋŋ. Ani enɛ feɔ nɔ ko ni baaba yɛ sɛɛ mli bei Iɛ amli lɛ he mfonirii Ojogbaŋŋ, susumɔ bɔ ni Yosef ŋmɛ etsui shi yɛ niseniianii anaa yɛ maŋsɛɛ shikpɔŋ nɔ, ehemɔkɛyeli ni hosooo, emuuyeli mli ni ehiɛ, kɛ gbɛhe ni nɔ kwɔ ni awo enɔ kɛtee mli akɛ nilelɔ gbɛjianɔtolɔ yɛ hɔmɔ kpeteŋkpele be mli lɛ he. (1 Mose 39:1-3, 7-9; 41:38-41) Ani wɔnaaa nɔ ko ni tamɔ nakai nɔŋŋ yɛ Yesu shihilɛ gbɛ lɛ mli?
9 Amanehulu mli Yesu tsɔ ebatsɔ Wala Aboloo yɛ je ni “Yehowa wiemɔi lɛ atoiboo” he hɔmɔ miiye amɛ lɛ mli. (Amos 8:11; Hebribii 5:8, 9; Yohane 6:35) Wekukpaa ni ka Yosef kɛ Yakob kɛ Farao fɛɛ ateŋ lɛ kaiɔ wɔ Yehowa kɛ nɔ ni etsɔ e-Bi lɛ nɔ etsu lɛ. (Yohane 3:17, 34; 20:17; Romabii 8:15, 16; Luka 4:18) Mɛi krokomɛi hu na gbɛfaŋnɔ yɛ nɛkɛ nɔkwɛmɔ nɔ loo drama diɛŋtsɛ nɛɛ mli, ni wɔkɛ miishɛɛ baasusu gbɛfaŋnɔ ni amɛ fɛɛ amɛna lɛ he. Ŋwanejee ko bɛ he akɛ abaakai wɔ bɔ ni Yosef kpeteŋkpele, Kristo Yesu ji mɔ ni wɔhiɛ ka enɔ lɛ. Kwɛ shi ni wɔdaa akɛ ebaa wɔyi kɛjɛɔ hɔmɔ ni gbeɔ mɔ yɛ “naagbee gbii” ni yaa nɔ efiteɔ nɛɛ mli! —2 Timoteo 3:1, 13.
Bɔ Ni Wɔnaa Drama Lɛ Wɔhaa
10. (a) Mɛɛ gbɛ nɔ atsɔ asaa Yosef aha nitsumɔ ni he hiaa ni ebaatsu lɛ? (b) Mɛɛ sui ni ekaaa ejie lɛ kpo yɛ eshihilɛ shishijee?
10 Adesa ko bɛ ni kulɛ ebaanyɛ ele nɔ ni yɔɔ Yehowa jwɛŋmɔ mli kɛha E-webii lɛ yɛ Yosef gbii lɛ amli. Shi be mli ni atsɛ Yosef ni ebatsu enitsumɔ ni he hiaa, lɛ, no mli lɛ, Yehowa etsɔse lɛ ni eha eye emuu yɛ etaomɔ nii amli. Wɔkaneɔ yɛ be mli ni eji gbekɛ lɛ he akɛ: “Beni Yosef ye afii nyɔŋma kɛ kpawo lɛ, ekɛ enyɛmimɛi lɛ lɛɔ toi; ni obalanyo lɛ kɛ etsɛ ŋamɛi Bilha kɛ Zilpa bii lɛ yɔɔ, ni ebataa nɔ fɔŋ ni amɛfeɔ lɛ he sane ehaa amɛtsɛ.” (1 Mose 37:2) Eye anɔkwale eha etsɛ nibii taakɛ bɔ ni Yesu hu ye anɔkwale kɛmɔ shi yɛ e-Tsɛ tooi nɛɛ akwɛmɔ mli yɛ “yinɔ bii ni heee yeee ni bɛ amɛŋɛlɛ nɔ” lɛ ateŋ.—Mateo 17:17, 22, 23.
11. (a) Mɛni hewɔ Yosef tsɛ bii lɛ banyɛ lɛ lɛ? (b) Mɛɛ shihilɛi ni tamɔ nakai nɔŋŋ kɔɔ Yesu he?
11 Yosef tsɛ, Israel, basumɔ lɛ jogbaŋŋ kwraa fe enyɛmimɛi lɛ fɛɛ, ni ekpɛ atade wuyaa fɛfɛo ko eha lɛ. Shi yɛ enɛ hewɔ lɛ, Yosef nyɛmimɛi lɛ “nyɛ lɛ ni amɛnyɛɛɛ amɛkɛ lɛ awie yɛ hejɔlɛ mli.” Amɛna nɔ ni amɛbaadamɔ amɛnyɛ lɛ lolo yɛ be mli ni ela lamɔi enyɔ ni atsɔɔ shishi akɛ lɛ ji mɔ ni baaye amɛnɔ lɛ. Nakai nɔŋŋ hu Yudafoi ahiɛnyiɛlɔi lɛ banyɛ Yesu yɛ anɔkwale ni eyeɔ, etsɔɔmɔi ni tsɔɔ mɔ yiŋ, kɛ Yehowa jɔɔmɔ ni eka shi faŋŋ akɛ eyɔɔ enɔ lɛ hewɔ.—1 Mose 37:11; Yohane 7:46; 8:40.
12. (a) Mɛni hewɔ Yakob susuɔ ebii lɛ ahilɛkɛhamɔ he lɛ? (b) Mɛɛ nɔ ko ni tamɔ nakai nɔŋŋ wɔnaa yɛ Yosef shihilɛ gbɛ lɛ kɛ Yesu nɔ lɛ he.
12 Be ko lɛ Yosef nyɛmimɛi lɛ miikwɛ toi yɛ Shekem. Yosef tsɛ lɛ hao diɛŋtsɛ ejaakɛ jɛmɛ ji he ni Shekem bule Dina yɛ, ni no ha, Simeon kɛ Levi kɛ amɛnyɛmimɛi lɛ gbe nakai maŋ lɛ mli hii lɛ. Yakob kɛɛ Yosef akɛ eya ni eyakwɛ bɔ ni amɛyɔɔ ni eba ebabɔ lɛ amaniɛ. Yɛ bɔ ni enyɛmimɛi lɛ sumɔɔɔ esane lɛ fɛɛ sɛɛ lɛ, Yosef shwe akɛ eeeya ni eyatao amɛ. Yɛ nakai gbɛ nɔ nɔŋŋ Yesu hu kɛ miishɛɛ kpɛlɛ Yehowa nitsumɔ ni ekɛha lɛ yɛ shikpɔŋ nɛɛ nɔ lɛ nɔ, eyɛ mli akɛ no baatsɔ amanehulu kpeteŋkpele kɛ piŋmɔ aha lɛ yɛ be mli ni ahaa eyeɔ emuu akɛ yiwalaheremɔ Najiaŋdamɔlɔ Nukpa lɛ. Mɛɛ nɔkwɛmɔ nɔ kpakpa Yesu fee kɛha wɔ fɛɛ yɛ etsuishiŋmɛɛ lɛ mli nɛkɛ!—1 Mose 34:25-27; 37:12-17; Hebribii 2:10; 12:1, 2.
13. (a) Yosef tse bii lɛ jie amɛmlifu loo nyɛɛ kpo yɛ mɛɛ gbɛ nɔ? (b) Abaanya akɛ Yakob awerɛho lɛ ato mɛni he?
13 Yosef tsɛ bii nyɔŋma lɛ na lɛ yɛ shɔŋŋ akɛ eeba. Amrɔ nɔŋŋ pɛ kɛkɛ ni amɛkɛ mlifu te shi wo lɛ, ni amɛtsɔ ŋaa koni amɛha eje amɛteŋ. Klɛŋklɛŋ lɛ amɛtsɔ ŋaa koni amɛgbe lɛ. Shi akɛni Ruben sheɔ gbɛnaa nii ni ka enɔ ákɛ kromɔbi lɛ gbeyei hewɔ lɛ, enyɛ amɛnɔ ni amɛkɛ lɛ wo nubu ko ni mli egbi mli, ni eekpa gbɛ akɛ ebaaku esɛɛ eba yɛ sɛɛ mli ebaŋmɛɛ ehe. Dani enɛ aaaba lɛ, Yuda tsɔ enyɛmimɛi lɛ ayiŋ koni amɛhɔɔ lɛ akɛ nyɔŋ amɛha Ishmaelbii komɛi ni hoɔ yɛ jɛmɛ lɛ. Kɛkɛ ni Yosef nyɛmimɛi lɛ jie etade lɛ amɛtsɔ too ko lá mli ni amɛkɛyatsɔɔ amɛtsɛ. Beni Yakob kwɛ atade lɛ, ebo akɛ: “Mibi lɛ atade lɛ ni! Kooloo fɔŋ ko eye lɛ, tsɛremɔ etsɛrɛ Yosef mli nɛɛ!” Eka shi faŋŋ akɛ Yehowa hu ye awerɛho ni tamɔ nakai yɛ Yesu amanehulu lɛ he be mli ni etsuɔ eshikpɔŋ nɔ nitsumɔ lɛ he nii lɛ.—1 Mose 37:18-35; 1 Yohane 4:9, 10.
Yosef Yɛ Mizraim
14. Nɛkɛ blema drama loo nɔkwɛmɔ nɔ nɛɛ he baanyɛ aba sɛɛnamɔ aha wɔ yɛ mɛɛ gbɛ nɔ?
14 Esaaa akɛ wɔmuɔ sane naa akɛ nakai nɔkwɛmɔ nii ni ba ni yɔɔ naakpɛɛ ni kɔɔ Yosef he lɛ mlibaa baa mli yɛ bɔ ni ebalɛ yɛ be he akɔntaabuu naa lɛ naa pɛpɛɛpɛ. Shi moŋ, wɔnaa nɔkwɛmɔ nii sɔrɔtoi ni ba yɛ nakai blema bei lɛ amli ni wɔkaseɔ nii kɛjɛɔ mli ni ewoɔ wɔ hewalɛ ŋmɛnɛ. Taakɛ bɔfo Paulo jaje lɛ: “Ejaakɛ nibii abɔ ni aŋma ato momo lɛ, wɔ diɛŋtsɛ wɔhe nitsɔɔmɔ hewɔ aŋma ato lɛ, koni wɔkɛ tsuishiŋmɛɛ kɛ ŋmalɛi lɛ amli miishɛjemɔ lɛ ana hiɛnɔkamɔ. Shi tsuishiŋmɛɛ kɛ miishɛjemɔ Nyɔŋmɔ lɛ aha nyɛna jwɛŋmɔ kome yɛ nyɛteŋ tamɔ Kristo Yesu; koni nyɛkɛ jwɛŋmɔ kome kɛ naabu kome awo Nyɔŋmɔ kɛ wɔ-Nuŋtsɔ Kristo Yesu tsɛ lɛ hiɛ nyam.”—Romabii 15:4-6.
15. Mɛni hewɔ Yosef kɛ Potifar we lɛ shwere lɛ?
15 Akɛ Yosef tee Mizraim, ni ahɔɔ lɛ yɛ jɛmɛ aha Mizraimnyo ko ni atsɛɔ lɛ Potifar, Farao blafoiatsɛ. Yehowa kɛ Yosef hi shi, etee nɔ ehi shi yɛ shishitoo taomɔ nii kpakpai ni etsɛ edũ ewo emli lɛ nɛa, eyɛ mli akɛ ekɛ etsɛ shia lɛ teŋ jɛkɛ naakpa. Yosef kwaaa Yehowa jamɔ. Enuŋtsɔ, Potifar yoo sui kpakpai ni ekaaa ni Yosef yɔɔ lɛ ni ekɛ lɛ to eshiabii lɛ fɛɛ nɔ. Yehowa tee nɔ ejɔɔ Potifar we lɛ yɛ [Yosef] hewɔ.—1 Mose 37: 36; 39:1-6.
16, 17. (a) Mɛɛ emuuyeli he kaa kroko ba Yosef nɔ? (b) Yosef niiashikpamɔ yɛ gbokɛlɛfoi atsu lɛŋ lɛ tsɔɔ gbɛtsɔɔmɔ yɛ mɛɛ saji amli?
16 Jɛmɛ ji he ni Potifar ŋa lɛ bɔ mɔdɛŋ ni elaka Yosef yɛ. Shi Yosef ekpɛlɛɛɛ lɛ. Gbi ko lɛ emɔ etade mli, shi ejo foi, ni eshi etade lɛ yɛ edɛŋ. Efolɔ Yosef naa yɛ Potifar hiɛ akɛ eebɔ mɔdɛŋ ni ekɛlɛ ana bɔlɛ, ni Potifar ha ashɛ Yosef awo gbokɛlɛfoi atsuŋ. Akɛ dade gbokɛlɛi wo lɛ yɛ bei komɛi. Shi yɛ etsuŋwoo mli haomɔi nɛɛ fɛɛ mli lɛ, Yosef tee nɔ ejie ehe kpo akɛ mɔ ni hiɛɔ emuuyeli mli. No hewɔ lɛ, gbokɛlɛfoi anɔkwɛlɔ lɛ kɛ lɛ fee gbokɛlɛfoi lɛ fɛɛ nɔ onukpa.—1 Mose 39:7-23; Lala 105:17, 18.
17 Beni be shwieɔ mli lɛ, Farao daawolɔ nukpa kɛ abolooshalɔ nukpa lɛ tɔ enɔ ni ewo amɛ tsuŋ. Afa ni Yosef asɔmɔ amɛ. Agbɛnɛ Yehowa tsu saji ahe nii ekoŋŋ. Nakai maŋtsɛ we onukpai enyɔ lɛ alamɔi gba amɛnaa waa. Yɛ be mli ni Yosef ema nɔ mi akɛ “shishitsɔɔmɔ lɛ . . . Nyɔŋmɔ nɔŋ” lɛ etsɔɔ amɛ lamɔi lɛ ashishi. Ni taakɛ Yosef tsɔɔ lɛ, gbii etɛ sɛɛ pɛpɛɛpɛ lɛ, (yɛ Farao fɔmɔgbi yeli gbi lɛ nɔ lɛ) akɛ daawolɔ lɛ to egbɛhe lɛ ekoŋŋ, shi asɛŋ abolooshalɔ nukpa lɛ.—1 Mose 40:1-22.
18. (a) Mɛɛ gbɛ nɔ atsɔ akai Yosef? (b) Mɛni titri yɔɔ Farao lamɔ lɛ mli?
18 Eyɛ mli akɛ Yosef kpa daawolɔ lɛ fai akɛ ewie etsɔɔ Farao yɛ ehewɔ moŋ, shi afii enyɔ ho dani nuu nɛɛ kai Yosef. Shi enɛ po jɛ lamɔi sɔrɔtoi enyɔ ko ni Farao la ni enaaa naa yɛ gbɛkɛ kome ko lɛ hewɔ. Beni maŋtsɛ lɛ ŋkunyaayelɔi kɛ osɔfoi lɛ nyɛɛɛ atsɔɔ lɛ lamɔ lɛ shishi lɛ, daawolɔ lɛ kɛɛ Farao akɛ Yosef baanyɛ atsɔɔ lamɔi lɛ ashishi No hewɔ lɛ Farao tsu ayatsɛ Yosef, ni enyɛ ekɛ heshibaa tsɔɔ anɔkwale lamɔi ashishitsɔɔmɔ jɛɛhe lɛ, akɛ: “Nyɔŋmɔ aaaha Farao hejɔlɛ hetoo.” Kɛkɛ ni Mizraim nɔyelɔ lɛ gba lamɔi lɛ etsɔɔ Yosef, akɛ:
“Naa, midamɔ faa lɛ naa, ni naa, tsinai kpawo ni eshwishwii ni he yɔɔ fɛo fa kpo kɛjɛ faa lɛ mli, ni amɛyaye nii yɛ jwɛiiaŋ. Ni naa, tsinai krokomɛi kpawo hu nyiɛ amɛsɛɛ ba, amɛnii yɛ mɔbɔ ni amɛhe yɛ nyaŋemɔ ni amɛtarataraa loo; ni minako amɛ nɔ pɛŋ kɛ tɛŋ yɛ Mizraim shikpɔŋ lɛ nɔ fɛɛ. Ni tsinai ni etara loo ni amɛhe yɔɔ nyaŋemɔ lɛ ye klɛŋklɛŋ tsinai kpawo lɛ ni eshwishwii lɛ. Ni amɛbote amɛmusuŋ lɛ, anaaa akɛ amɛye amɛ; shi moŋ amɛhe yɛ nyaŋemɔ lolo tamɔ tsutsu lɛ nɔŋŋ. . . .
“Ni misaa mikwɛ yɛ milamɔ lɛ mli, ni naa, abeletsei kpawo ba tso kome yi, eba kpokploo. Ni naa, abeletsei kpawo ni nii bɛ yi, ni yɔɔ legelege. ni boka kɔɔ ɔɔ egbiamɛ keklee bakwɛ yɛ amɛsɛɛ. Ni abeletsei legelegei lɛ ni abletsei kpakpai kpawo lɛ. Ní mijaje enɛ mitsɔɔ woloŋlelɔi lɛ, shi mɔ ko mɔ ko enaaa he eko ekɛɛ mi.”—1 Mose 40:23–41:24.
19. (a) Yosef jie heshibaa kpo yɛ mɛɛ gbɛ nɔ? (b) Lamɔi lɛ ashishitsɔɔmɔ jieɔ mɛɛ sane kpo?
19 Mɛɛ lamɔi ni yɔɔ naakpɛɛ nɛ! Te aaafee tɛŋŋ ni mɔ ko aaanyɛ atsɔɔ enɛɛmɛi ashishi? Yosef fee nakai, shi jeee kɛha lɛ diɛŋtsɛ enunyam taomɔ. Ekɛɛ: “Farao lamɔ lɛ ekomeŋ. Nyɔŋmɔ etsɔɔ Farao nɔ ni ebaafee.” Kɛkɛ ni Yosef tee nɔ ejie nakai lamɔi lɛ amli gbalɛ shɛɛsane ni mli wa lɛ akpo akɛ:
“Naa, afii kpawo miiba ni abaana niyenii babaoo yɛ Mizraim shikpɔŋ lɛ nɔ fɛɛ. Ní no sɛɛ lɛ hɔmɔyeli afii kpawo baaba, ni mɛi ahiɛ aaakpa nifalɛ lɛ fɛɛ nɔ yɛ Mizraim shikpɔŋ lɛ nɔ; ni hɔmɔ lɛ aaakpata shikpɔŋ lɛ hiɛ. . . . Ní nɔ ni aku lamɔ nɛɛ abɔ he toi enyɔ aha Farao lɛ, eshishi ji akɛ Nyɔŋmɔ baafee nakai lɛlɛŋ shi Nyɔŋmɔ baafee lɛ oya.”—1 Mose 41:25-32
20, 21. (a) Te Farao fee enii yɛ kɔkɔbɔɔ lɛ he eha tɛŋŋ? (b) Mɛɛ gbɛ nɔ aaatsɔ akɛ Yosef ato Yesu he yɛ he ni wɔshɛ nɛɛ?
20 Mɛni Farao baanyɛ afee yɛ hɔmɔ ni baa nɛɛ mli? Yosef wo ŋaa akɛ Farao atsɔ hiɛ asaa ehe kɛtsɔ to ni eeeto nuu nilelɔ ko yɛ shikpɔŋ muu lɛ fɛɛ nɔ koni ebua niyenii ni baashwɛ yɛ nikpamɔ be afii kpakpai lɛ amli lɛ anaa. No mli lɛ Farao eyoo nilee kɛ nyɛmɔi ni ekaaa ni Yosef yɔɔ lɛ. No hewɔ lɛ ejie Iɛ diɛŋtsɛ ewolonaasɔomɔga lɛ yɛ enine ni eŋɔwo Yosef nine, enɛ ha Farao hala lɛ akɛ shikpɔŋ Iɛ fɛɛ nɔ onukpa.—1 Mose 41:33-46.
21 Beni Yosef yadamɔ Farao hiɛ lɛ, no mli lɛ eye afii 30, ni nakai afii lɛ nɔŋŋ Yesu Kristo ye be mli ni abaptisi lɛ ni eje esɔɔmɔ nitsumɔ ni haa wala lɛ shishi lɛ. Nikasemɔ ni nyiɛ sɛɛ lɛ baatsɔɔ bɔ ni Yehowa kɛ Yosef tsũ nii ni ekɛfee Yehowa “Yiwalaheremɔ Najiaŋdamɔlɔ Nukpa” yɛ mumɔŋ hɔmɔ be mli, ni titri lɛ yɛ bɔ ni ekɔɔ wɔŋmɛnɛŋmɛnɛ gbii nɛɛ he lɛ he mfoniri—Bɔfoi lɛ Asaji 3:15; 5:31.a
[Shishigbɛ niŋmai]
a Ajie kɛjɛ May 1, 1987 Watchtower lɛ mli.
Te Ohaa Hetoo ohaa Tɛŋŋ?
◻ Hɔmɔ miigba gbɔmɛi anaa ŋmɛnɛ yɛ gbɛi sɔrɔtoi enyɔ nɔ yɛ mɛɛ gbɛ nɔ?
◻ Mɛɛ sui kpakpai komɛi Yosef jie lɛ kpo yɛ be mli ni ekɛ enyɛmimɛi ni ji etsɛ bii lɛ yɔɔ lɛ?
◻ Mɛni wɔbaanyɛ wɔkase kɛjɛ Yosef shishijee niiashikpamɔ lɛ mli yɛ Mizraim?
◻ Bɔ ni Yehowa susu Yosef kɛ gbɔmɛi ni hɔmɔ yeɔ amɛ lɛ ahe lɛ maa mɛni nɔ mi kɛhaa wɔ?
[Akrabatsa ni yɔɔ baafa 11]
The Sunday Star (Toronto, March 30, 1986) lɛ mli niŋmalɔ ko wie yɛ mɛi ni akɛɛ atsɛɔ amɛ sɔlemɔi wuji lɛ ahe akɛ “He ni amɛgbeɔ shi loo amɛnine enyɛ shi waa yɛ ji bɔ ni amɛnyɛɛɛ amɛbɛŋkɛ ŋmɛnɛŋmɛnɛ beaŋ hii, yei kɛ obalaŋtai ni mumɔŋ hɔmɔ yeɔ amɛ waa lɛ.”