Ani Óbote Nyɔŋmɔ Hejɔɔmɔ lɛ Mli?
“Mɔ ni ebote [Nyɔŋmɔ] hejɔɔmɔ lɛ mli lɛ, lɛ diɛŋtsɛ hu ejɔɔ ehe kɛjɛ enitsumɔi lɛ amli.”—HEBRIBII 4:10.
1. Mɛni hewɔ asumɔɔ hejɔɔmɔ waa nakai lɛ?
HEJƆƆMƆ. Mɛɛ wiemɔ ni ŋɔɔ ni sa hiɛ po nɛ! Akɛni jeŋ ni nɔ fɛɛ nɔ yaa nɔ kɛ oyaiyeli, ni mli wa waa hu mli wɔyɔɔ ŋmɛnɛ hewɔ lɛ, wɔteŋ mɛi pii baakpɛlɛ nɔ akɛ, abaasumɔ hejɔɔmɔ fioo ko lɛ waa. Gbekɛbii loo onukpai, mɛi ni ebote gbalashihilɛ mli loo oshijafoi, ekolɛ wɔbaanyɛ wɔnu nɔnyɛɛ he waa akɛ mɛi ni daa gbi shihilɛ eha etɔ amɛ. Kɛha mɛi ni yɔɔ gbɔmɔtsoŋ fatɔɔi loo amɛje kpa lɛ, daa gbi bafeɔ kaa. Taakɛ Ŋmalɛi lɛ kɛɔ lɛ, “bɔɔnii lɛ fɛɛ kɛ wɔ dɔmɔɔ ntsɔi ni amɛkɛ wɔ kɔmɔɔ kɛbashi ŋmɛnɛŋmɛnɛ.” (Romabii 8:22) Gbɔmɔ ni miijɔɔ ehe lɛ etsɔɔɔ akɛ eji hejɔ̃lɔ. Hejɔɔmɔ ji adesa hiamɔ nii ni esa akɛ aná.
2. Kɛjɛ mɛɛ be Yehowa etee nɔ ejɔɔ ehe?
2 Yehowa Nyɔŋmɔ diɛŋtsɛ miijɔɔ ehe. Wɔkaneɔ yɛ Klɛŋklɛŋ Mose wolo lɛ mli akɛ: “Ni agbe ŋwɛi kɛ shikpɔŋ kɛ amɛsafo lɛ fɛɛ naa. Ni gbi ni ji gbi kpawo lɛ Nyɔŋmɔ gbe enitsumɔ ni etsu lɛ naa, ni ejɔɔ ehe yɛ gbi ni ji gbi kpawo lɛ nɔ kɛjɛ enitsumɔ ni etsu lɛ fɛɛ mli.” Yehowa ha “gbi kpawo lɛ” bafee be krɛdɛɛ kɛha lɛ, ejaakɛ wiemɔ ni jɛ mumɔŋ lɛ yaa nɔ ekɛɔ akɛ: “Ni Nyɔŋmɔ jɔɔ gbi ni ji gbi kpawo lɛ, ni efee lɛ krɔŋkrɔŋ.”—1 Mose 2:1-3.
Nyɔŋmɔ Jɔɔ Ehe Kɛjɛ Enitsumɔ lɛ Mli
3. Mɛni nyɛŋ afee yiŋtoi ahewɔ ni Nyɔŋmɔ jɔɔ ehe lɛ?
3 Mɛni hewɔ Nyɔŋmɔ jɔɔ ehe yɛ “gbi ni ji gbi kpawo lɛ” nɔ lɛ? Ejɔɔɔ ehe yɛ tɔ ni etɔ lɛ hewɔ. Yehowa yɛ “nyɛmɔ ni fa kɛ hewalɛ kpele” ni “egbɔjɔɔɔ ni etɔɔɔ lɛ.” (Yesaia 40:26, 28) Ni asaŋ Nyɔŋmɔ ejɔɔɔ ehe akɛni eesumɔ ni efo nɔ ko feemɔ mli loo etsake be ni ekɛfeɔ nɔ ko lɛ mli, ejaakɛ Yesu kɛɛ wɔ akɛ: “Mitsɛ miitsu nii kɛbashi be nɛɛ, no hewɔ ni mi hu mitsuɔ lɛ.” (Yohane 5:17) Fɛɛ sɛɛ lɛ, “Nyɔŋmɔ lɛ, Mumɔŋ,” ni gbɔmɔtsoŋ nibii ni yaa ni baa kɛ heloonaa bɔɔnii ahiamɔ nii yeee enɔ.—Yohane 4:24.
4. “Gbi ni ji gbi kpawo lɛ” yɛ srɔto yɛ ‘gbii’ ekpaa ni tsɔ hiɛ lɛ he yɛ mɛɛ gbɛ nɔ?
4 Te wɔɔfee tɛŋŋ wɔná yiŋtoo hewɔ ni Nyɔŋmɔ jɔɔ ehe yɛ “gbi ni ji gbi kpawo lɛ nɔ” lɛ he shishinumɔ ko? Akɛni eyoo akɛ ehiɛ esɔ nɔ ni étsu yɛ nibɔɔ ‘gbii’ ekpaa kakadaŋŋ ni tsɔ hiɛ lɛ mli hewɔ lɛ, Nyɔŋmɔ je gbɛ ejɔɔ “gbi ni ji gbi kpawo lɛ” ni ejaje akɛ eyɛ “krɔŋkrɔŋ.” Concise Oxford Dictionary lɛ tsɔɔ “krɔŋkrɔŋ” mli akɛ eji “nɔ ni áje gbɛ ajɔɔ nɔ loo átuu aha (nyɔŋmɔ ko loo kɛha jamɔ yiŋtoo ko).” No hewɔ lɛ, “gbi ni ji gbi kpawo lɛ” ni Yehowa jɔɔ nɔ ni ejaje akɛ eji krɔŋkrɔŋ lɛ tsɔɔ akɛ enɛ kɛ “ehejɔɔmɔ” lɛ kɛ esuɔmɔnaa nii krɔŋkrɔŋ kɛ eyiŋtoo lɛ yɛ tsakpãa ko moŋ fe nibii ni he hiaa lɛ. Mɛni ji nakai tsakpãa lɛ?
5. Nyɔŋmɔ ha mɛni bɔi nitsumɔ yɛ klɛŋklɛŋ nibɔɔ ‘gbii’ ekpaa lɛ mli?
5 Nyɔŋmɔ fee ni eto nibii ni bɔleɔ shi lɛ kɛ mlai ni kudɔɔ shikpɔŋ lɛ kɛ nɔ fɛɛ nɔ ni ebɔle ehe kɛkpe lɛ ahe gbɛjianɔ yɛ nibɔɔ ‘gbii’ ekpaa ni tsɔ hiɛ lɛ mli. Jeŋ nilelɔi miikase naakpɛɛ gbɛ ni atsɔ nɔ ato nibii nɛɛ ahe gbɛjianɔ aha lɛ he nii agbɛnɛ. Kɛmiiba “gbi ni ji gbi ekpaa” lɛ naagbee lɛ, Nyɔŋmɔ bɔ klɛŋklɛŋ adesai enyɔ lɛ ni ekɛ amɛ to ‘trom mli yɛ Eden yɛ bokagbɛ.’ Yɛ naagbee lɛ, Nyɔŋmɔ jaje eyiŋtoo ni kɔɔ adesa weku lɛ kɛ shikpɔŋ lɛ he lɛ yɛ gbalɛ wiemɔi nɛɛ amli: “Nyɛfɔa ni nyɛyi afaa ni nyɛyia shikpɔŋ lɛ nɔ obɔ, ni nyɛnaanaa nɔ, ni nyɛyea ŋshɔŋloi kɛ ŋwɛi loofɔji kɛ kooloo fɛɛ kooloo ni tsiɔ ehe yɛ shikpɔŋ lɛ nɔ lɛ nɔ.”—1 Mose 1:28, 31; 2:8.
6. (a) Te Nyɔŋmɔ nu nibii fɛɛ ni ebɔ lɛ he eha tɛŋŋ yɛ “gbi ni ji gbi ekpaa lɛ” nɔ? (b) “Gbi ni ji gbi kpawo lɛ” yɛ krɔŋkrɔŋ yɛ mɛɛ shishinumɔ naa?
6 Beni nibɔɔ “gbi ni ji gbi ekpaa” lɛ ba naagbee lɛ, sane lɛ kɛɔ wɔ akɛ: “Ni Nyɔŋmɔ kwɛ nibii fɛɛ ni efee lɛ, ni naa, ehi naakpa.” (1 Mose 1:31) Nyɔŋmɔ tsui nyɔ emli yɛ nibii fɛɛ ni efee lɛ he. No hewɔ lɛ, ejɔɔ ehe, loo ekpa shikpɔŋ lɛ nɔ nibɔɔ nitsumɔi lɛ. Shi, yɛ bɔ ni paradeiso abɔɔ lɛ yeɔ emuu ni eyɔɔ fɛo lɛ fɛɛ sɛɛ lɛ, he ko fioo ko pɛ ekpeleɔ, ni adesai enyɔ ni abɔ amɛ pɛ yɔɔ shikpɔŋ nɔ. Ebaahe be dani shikpɔŋ lɛ kɛ adesa weku ni yɔɔ nɔ lɛ baashɛ shihilɛ ni Nyɔŋmɔ to eyiŋ yɛ he lɛ mli. Yɛ yiŋtoo nɛɛ hewɔ lɛ, ehala “gbi ni ji gbi kpawo” ni baaŋmɛ gbɛ koni nibii fɛɛ ni ebɔ yɛ ‘gbii’ ekpaa ni tsɔ hiɛ lɛ mli lɛ ayashɛ esuɔmɔnaa nifeemɔ kɛ gbeekpamɔ he. (Okɛto Efesobii 1:11 he.) Beni “gbi ni ji gbi kpawo lɛ” baa enaagbee lɛ, no mli lɛ shikpɔŋ lɛ etsɔ jeŋ muu fɛɛ paradeiso ni adesa weku ni yeɔ emuu hiɔ nɔ. (Yesaia 45:18) Áto “gbi ni ji gbi kpawo lɛ” ama afã, loo ájɔɔ nɔ aha Nyɔŋmɔ suɔmɔnaa nii ni kɔɔ shikpɔŋ lɛ kɛ adesai ahe lɛ he nitsumɔ kɛ emlibaa. Eyɛ “krɔŋkrɔŋ” yɛ nakai shishinumɔ lɛ naa.
7. (a) Nyɔŋmɔ jɔɔ ehe yɛ “gbi ni ji gbi kpawo lɛ” nɔ yɛ mɛɛ shishinumɔ naa? (b) Te nibii fɛɛ baatamɔ aha tɛŋŋ yɛ be mli ni “gbi ni ji gbi kpawo lɛ” baa enaagbee lɛ?
7 No hewɔ lɛ, Nyɔŋmɔ jɔɔ ehe kɛjɛ enibɔɔ nitsumɔ lɛ mli yɛ “gbi ni ji gbi kpawo lɛ” nɔ. Etamɔ nɔ ni etsi ehe kɛtee sɛɛ koni nɔ ni eto he gbɛjianɔ lɛ atsu nii. Eyɛ hekɛnɔfɔɔ kwraa akɛ, beni “gbi ni ji gbi kpawo lɛ” aaaba naagbee lɛ, nɔ fɛɛ nɔ ni eto eyiŋ yɛ he lɛ eba mli pɛpɛɛpɛ. Kɛji akɛ gbɛtsii nii komɛi po ba lɛ, no mli lɛ aye nɔ kunim. Kɛji akɛ Nyɔŋmɔ suɔmɔnaa nii ba mli kɛmɔ shi lɛ, ehe baaba sɛɛnamɔ kɛha adesai toibolɔi fɛɛ. Nɔ ko nɔ ko bɛ ni baatsi enɛ gbɛ, ejaakɛ Nyɔŋmɔ jɔɔmɔ yɛ “gbi ni ji gbi kpawo lɛ” nɔ, ni efee lɛ “krɔŋkrɔŋ.” Mɛɛ anunyam gbɛkpamɔ enɛ ji kɛha adesai toibolɔi nɛkɛ!
Israel Nyɛɛɛ Abote Nyɔŋmɔ Hejɔɔmɔ lɛ Mli
8. Mɛɛ be ni te fee tɛŋŋ ni Israelbii lɛ baye Hejɔɔmɔ Gbi?
8 Yehowa gbɛjianɔtoo kɛha nitsumɔ kɛ hejɔɔmɔ lɛ he ba sɛɛnamɔ kɛha Israel maŋ lɛ. Dani ekɛ Mla lɛ aaaha Israelbii lɛ yɛ Sinai Gɔŋ lɛ nɔ po lɛ, Nyɔŋmɔ tsɔ Mose nɔ ekɛɛ amɛ akɛ: “Nyɛkwɛa, ni Yehowa ha nyɛ hejɔɔmɔ gbi lɛ, no hewɔ ni ehaa nyɛ gbii enyɔ aboloo yɛ gbi ni ji gbi ekpaa lɛ nɔ lɛ; nyɛteŋ mɔ fɛɛ mɔ ahi shi yɛ ewe; mɔ ko akaje egbɛhe yɛ gbi ni ji gbi kpawo lɛ nɔ.” Nɔ ni jɛ mli ba ji akɛ, “maŋ lɛ jɔɔ amɛhe yɛ gbi ni ji gbi kpawo lɛ nɔ.”—2 Mose 16:22-30.
9. Mɛni hewɔ ŋwanejee ko bɛ he akɛ Hejɔɔmɔ Gbi mla lɛ ji tsakemɔ ni Israelbii lɛ sumɔɔ waa lɛ?
9 Gbɛjianɔtoo nɛɛ ji ehee kɛha Israelbii lɛ ni kpaako ájie amɛ kɛjɛ Mizraim nyɔŋyeli mli lɛ. Eyɛ mli akɛ Mizraimbii lɛ kɛ mɛi krokomɛi buɔ be yɛ gbii enumɔ-enumɔ kɛyashi nyɔŋma-nyɔŋma mli moŋ, shi efeee akɛ aŋmɛ Israelbii ni ayeɔ amɛ nyɔŋ lɛ gbɛ koni amɛná hejɔɔmɔ gbi. (Okɛto 2 Mose 5:1-9 he.) No hewɔ lɛ jwɛŋmɔ yɛ mli akɛ aaamu sane naa akɛ Israelbii lɛ here tsakemɔ nɛɛ atuu. Yɛ nɔ najiaŋ ni amɛaabu Hejɔɔmɔ Gbi taomɔ nii lɛ akɛ jatsu loo naatsii lɛ, esa akɛ amɛná esɛɛnyiɛmɔ he miishɛɛ. Yɛ anɔkwale mli lɛ, Nyɔŋmɔ kɛɛ amɛ yɛ sɛɛ mli akɛ, Hejɔɔmɔ Gbi lɛ baatsu nii akɛ kaimɔ nɔ kɛha amɛnyɔŋyeli yɛ Mizraim kɛ amɛkpɔmɔ kɛmiijɛ jɛmɛ.—5 Mose 5:15.
10, 11. (a) Mɛni Israelbii lɛ baakpa gbɛ akɛ amɛbaaná emli ŋɔɔmɔ kɛtsɔ toiboo ni amɛaafee lɛ nɔ? (b) Mɛni hewɔ Israelbii lɛ nyɛɛɛ abote Nyɔŋmɔ hejɔɔmɔ lɛ mli lɛ?
10 Eji Israelbii lɛ ni kɛ Mose shi Mizraim lɛ fee toiboo kulɛ, amɛbaaná hegbɛ akɛ amɛaabote shiwoo “shikpɔŋ ni fufɔ kɛ wo hoɔ yɛ nɔ” lɛ nɔ. (2 Mose 3:8) Jɛmɛ ji he ni kulɛ amɛbaaná anɔkwa hejɔɔmɔ yɛ, jeee yɛ Hejɔɔmɔ Gbi lɛ nɔ kɛkɛ, shi yɛ amɛshihilɛ be fɛɛ mli. (5 Mose 12:9, 10) Shi jeee nɛkɛ ji bɔ ni sane lɛ ba lɛ. Bɔfo Paulo ŋma yɛ amɛhe akɛ: “Mɛi ni nu lɛ ateŋ namɛi wo emlila lɛ? ani jeee mɛi ni kɛ Mose jɛ Mizraim lɛ fɛɛ ni? Ni namɛi emli fu afii nyɔŋmai ejwɛ sɔŋŋ lɛ? Ani jeee mɛi ni fee esha, ni amɛtswia shi amɛgboi yɛ ŋa lɛ nɔ lɛ? Ni namɛi anɔ ekã kita efɔ̃ akɛ amɛboteŋ ehejɔɔmɔ lɛ mli lɛ? ani jeee mɛi ni toi gbo lɛ? Ni wɔnaa akɛ hé ni amɛheee amɛyeee lɛ hewɔ amɛnyɛɛɛ mli amɛbote lɛ.”—Hebribii 3:16-19.
11 Mɛɛ nikasemɔ ni mli wa enɛ ji kɛha wɔ nɛkɛ! Yɛ hemɔkɛyeli ni amɛbɛ yɛ Yehowa mli hewɔ lɛ, nakai yinɔ lɛ nine shɛɛɛ hejɔɔmɔ ni ewo shi yɛ he kɛha amɛ lɛ nɔ. Yɛ no najiaŋ lɛ, amɛhiɛ kpata yɛ ŋa lɛ nɔ. Amɛnyɛɛɛ amɛyoo akɛ, ákɛ Abraham seshibii lɛ, akɛ amɛ ekpɛtɛ Nyɔŋmɔ suɔmɔnaa nifeemɔ he kpaakpa yɛ jɔɔmɔi ni amɛbaaná amɛha shikpɔŋ nɔ jeŋmaji fɛɛ lɛ mli. (1 Mose 17:7, 8; 22:18) Yɛ nɔ najiaŋ ni amɛaatsu nii yɛ ŋwɛi suɔmɔnaa nii kɛ gbeekpamɔ naa lɛ, je nɛŋ nibii asɛɛdii kɛ pɛsɛmkunya akɔnɔi gbala amɛjwɛŋmɔ kwraa. Ekaba akɛ wɔɔgbee nifeemɔ gbɛ ni tamɔ nɛkɛ mli kɔkɔɔkɔ!—1 Korintobii 10:6, 10.
Eshwɛ Hejɔɔmɔ Ko
12. Mɛɛ gbɛkpamɔ yɔɔ lolo kɛha klɛŋklɛŋ afii oha lɛ mli Kristofoi lɛ, ni te amɛaafee tɛŋŋ ni amɛnine ashɛ nɔ?
12 Beni etsi bɔ ni Israel nyɛɛɛ abote Nyɔŋmɔ hejɔɔmɔ lɛ mli yɛ hemɔkɛyeli ni amɛbɛ hewɔ lɛ tã lɛ sɛɛ lɛ, Paulo gbala ejwɛŋmɔ kɛtee enanemɛi heyelilɔi lɛ anɔ. Taakɛ anaa yɛ Hebribii 4:1-5 lɛ, ema nɔ mi kɛha amɛ akɛ, “áshi [Nyɔŋmɔ] hejɔɔmɔ lɛ mli botemɔ he shiwoo aha wɔ.” Paulo wo amɛ hewalɛ ni amɛná “sanekpakpa” lɛ mli hemɔkɛyeli, ejaakɛ “wɔ mɛi ni wɔhe wɔye lɛ wɔmiibote nakai hejɔɔmɔ lɛ mli.” Akɛni Yesu kpɔmɔ afɔleshaa lɛ ejie Mla lɛ kɛtee momo hewɔ lɛ, jeee gbɔmɔtsoŋ hejɔɔmɔ ni akɛha yɛ Hejɔɔmɔ Gbi lɛ shishi lɛ he Paulo wieɔ yɛ biɛ lɛ. (Kolosebii 2:13, 14) Paulo kɛ 1 Mose 2:2 kɛ Lala 95:11 ni etsɛ́ sɛɛ lɛ miiwo Hebri Kristofoi lɛ hewalɛ koni amɛbote Nyɔŋmɔ hejɔɔmɔ lɛ mli.
13. Mɛni hewɔ Paulo gbala jwɛŋmɔ kɛtee wiemɔ “ŋmɛnɛ” lɛ nɔ, yɛ be mli ni etsɛɔ wiemɔ sɛɛ kɛjɛɔ Lala 95 lɛ?
13 Esa akɛ kulɛ Nyɔŋmɔ hejɔɔmɔ lɛ mli ni amɛaanyɛ amɛbote lɛ afee “sanekpakpa” kɛha Hebri Kristofoi lɛ, tamɔ bɔ ni esa kɛ kulɛ Hejɔɔmɔ Gbi lɛ nɔ hejɔɔmɔ lɛ afee “sanekpakpa” kɛha Israelbii lɛ ni tsɔ amɛhiɛ lɛ. No hewɔ lɛ Paulo wo enanemɛi heyelilɔi lɛ hewalɛ ni amɛkatɔ̃ tɔ̃mɔi ni Israel tɔ̃ yɛ ŋa lɛ nɔ lɛ nɔŋŋ eko. Beni etsɛɔ wiemɔ sɛɛ kɛjɛɔ nɔ ni ŋmɛnɛ eji Lala 95:7, 8 lɛ, egbala jwɛŋmɔ kɛtee wiemɔ, “ŋmɛnɛ” lɛ nɔ, eyɛ mli akɛ jeeŋmɔ beebe Nyɔŋmɔ jɛ ejɔɔ ehe kɛjɛ enibɔɔ lɛ ahe. (Hebribii 4:6, 7) Mɛni Paulo taoɔ atsɔɔ lɛ? No ji akɛ, “gbi ni ji gbi kpawo lɛ” ni Nyɔŋmɔ kɛma afã koni eha eyiŋtoo ni kɔɔ shikpɔŋ lɛ kɛ adesa he lɛ aba mli kwraa kɛmɔ shi lɛ miiya nɔ lolo. No hewɔ lɛ, ehe miihia ni enanemɛi Kristofoi lɛ kɛ nakai yiŋtoo lɛ atsu nii moŋ fe ni amɛkɛ amɛhe aaawo pɛsɛmkunya nibii asɛɛdii mli. Eku sɛɛ ebɔ kɔkɔ lɛ ekoŋŋ akɛ: “Nyɛkawajea nyɛtsuii.”
14. Paulo tsɔɔ akɛ Nyɔŋmɔ “hejɔɔmɔ” lɛ miiya nɔ lolo yɛ mɛɛ gbɛ nɔ?
14 Kɛfata he lɛ, Paulo tsɔɔ akɛ shiwoo “hejɔɔmɔ” lɛ jeee Shiwoo Shikpɔŋ lɛ ni amɛaahi nɔ yɛ Yoshua hiɛnyiɛmɔ shishi kɛkɛ. (Yoshua 21:44) Paulo tsɔɔ mli akɛ, “ejaakɛ eji Yoshua ná ha amɛ hejɔɔmɔ kulɛ, fee sɛɛ lɛ ewieŋ yɛ gbi kroko hewɔ dɔŋŋ.” Yɛ enɛ hewɔ lɛ, Paulo kɛfata he akɛ: “No hewɔ lɛ, hejɔɔmɔ gbi yeli ko kã shi kɛ̃ ha Nyɔŋmɔ maŋ lɛ.” (Hebribii 4:8, 9) Mɛni ji nakai “hejɔɔmɔ gbi yeli” lɛ?
Botemɔ Nyɔŋmɔ Hejɔɔmɔ lɛ Mli
15, 16. (a) Mɛni wiemɔ, “hejɔɔmɔ gbi yeli” lɛ tsɔɔ? (b) Akɛ ‘mɔ ko aaajɔɔ ehe kɛaajɛ lɛ diɛŋtsɛ enitsumɔ he’ lɛ tsɔɔ mɛni?
15 Atsɔɔ wiemɔ “hejɔɔmɔ gbi yeli” shishi kɛjɛ Hela wiemɔ ni eshishi ji “aaye hejɔɔmɔ” mli. (Kingdom Interlinear) Nilelɔ William Lane kɛɛ akɛ: “Wiemɔ lɛ ná eshishinumɔ srɔto ko kɛjɛ Hejɔɔmɔ Gbi he fãmɔi ni aná kɛjɛ Yuda jamɔ mli ni damɔ 2 Mose 20:8-10 nɔ, he ni ama nɔ mi yɛ akɛ, hejɔɔmɔ kɛ yijiemɔ fɛɛ yaa hekome lɛ mli . . . Emaa nɔ krɛdɛɛ ni kɔɔ gbijurɔyeli kɛ miishɛɛ he, ni ajieɔ lɛ kpo yɛ woo kɛ yijiemɔ ni akɛhaa Nyɔŋmɔ lɛ mli lɛ nɔ mi.” No hewɔ lɛ, hejɔɔmɔ ni awo shi yɛ he lɛ jeee nitsumɔ mli heyeli kɛkɛ. Eji tsakemɔ kɛmiijɛ deŋme nitsumɔ ni yiŋtoo ko bɛ sɛɛ lɛ mli kɛmiiya sɔɔmɔ ni miishɛɛ yɔɔ mli ni woɔ Nyɔŋmɔ hiɛ nyam lɛ mli.
16 Paulo wiemɔi ni nyiɛ sɛɛ lɛ yeɔ enɛ he odase: “Ejaakɛ mɔ ni ebote [Nyɔŋmɔ] hejɔɔmɔ lɛ mli lɛ, lɛ diɛŋtsɛ hu ejɔɔ ehe kɛjɛ enitsumɔi lɛ amli, taakɛ bɔ ni Nyɔŋmɔ jɔɔ ehe kɛjɛ enɔ̃ lɛ mli lɛ.” (Hebribii 4:10) Nyɔŋmɔ ejɔɔɔ ehe yɛ nibɔɔ gbi ni ji gbi kpawo lɛ nɔ akɛni etɔ lɛ lɛ hewɔ. Shi moŋ, ekpa shikpɔŋ nɔ nibɔɔ nitsumɔ bɔni afee ni eha eninenaa nitsumɔ lɛ aya nɔ, ni eba anunyam ni yeɔ emuu mli, kɛha eyijiemɔ kɛ woo. Ákɛ Nyɔŋmɔ nibɔɔ lɛ fã lɛ, esa akɛ wɔ hu wɔtamɔ nakai gbɛjianɔtoo lɛ. Esa akɛ ‘wɔjɔɔ wɔhe kɛjɛ wɔ diɛŋtsɛ wɔ nitsumɔi amli,’ ni ji akɛ, esa akɛ wɔkpa mɔdɛŋ ni wɔbɔɔ akɛ wɔɔbu wɔ diɛŋtsɛ wɔhe bem yɛ Nyɔŋmɔ hiɛ koni wɔkɛbɔ mɔdɛŋ wɔná yiwalaheremɔ lɛ. Yɛ no najiaŋ lɛ, esa akɛ wɔná hemɔkɛyeli akɛ wɔyiwalaheremɔ damɔ Yesu Kristo kpɔ̃mɔ afɔleshãa ni no nɔ abaatsɔ abua nibii fɛɛ naa ni ekɛ Nyɔŋmɔ yiŋtoo akpa gbee lɛ nɔ.—Efesobii 1:8-14; Kolosebii 1:19, 20.
Nyɔŋmɔ Wiemɔ lɛ Yɛ Hewalɛ
17. Mɛɛ nifeemɔ gbɛ ni heloonaa Israel tsɔ nɔ esa akɛ wɔkwa?
17 Israelbii lɛ nyɛɛɛ abote Nyɔŋmɔ shiwoo hejɔɔmɔ lɛ mli yɛ amɛ toigbele kɛ hemɔkɛyeli ni amɛbɛ hewɔ. No hewɔ lɛ, Paulo wo Hebri Kristofoi lɛ hewalɛ akɛ: “No hewɔ lɛ nyɛhaa wɔbɔa mɔdɛŋ, koni wɔbote nakai hejɔɔmɔ lɛ mli, ni mɔ ko akanyiɛ nakai toigbele okadi lɛ sɛɛ ni egbee shi.” (Hebribii 4:11) Klɛŋklɛŋ afii oha lɛ mli Yudafoi pii heee Yesu amɛyeee, ni amɛteŋ mɛi pii na nɔ̃ waa beni Yudafoi anibii agbɛjianɔtoo lɛ ba enaagbee yɛ afi 70 Ŋ.B. lɛ. Kwɛ hiɛdɔɔ sane ni eji akɛ wɔɔná Nyɔŋmɔ shiwoo wiemɔ ni yɔɔ ŋmɛnɛ lɛ mli hemɔkɛyeli!
18. (a) Mɛɛ yiŋtoi Paulo kɛha akɛ no hewɔ ni ená Nyɔŋmɔ wiemɔ lɛ mli hemɔkɛyeli lɛ? (b) Nyɔŋmɔ wiemɔ lɛ “naa ba fe klante kɛ enaa nta fɛɛ” yɛ mɛɛ gbɛ nɔ?
18 Wɔyɛ yiŋtoi kpakpai ni wɔɔdamɔ nɔ wɔná hemɔkɛyeli yɛ Yehowa wiemɔ mli. Paulo ŋma akɛ: “Nyɔŋmɔ wiemɔ hiɛ kã ni eyɛ hewalɛ ni enaa ba fe klante kɛ enaa nta fɛɛ, ni egbuɔ kɛboteɔ mli kɛyashi beyinɔ ni egbalaa susuma kɛ mumɔ lɛ kɛ talɔi kɛ wuiaŋfɔi lɛ amli, ni eji tsuiiaŋ susumɔi kɛ jwɛŋmɔi lɛ akojolɔ.” (Hebribii 4:12) Hɛɛ, Nyɔŋmɔ wiemɔ loo shɛɛ sane lɛ “naa ba fe klante kɛ enaa nta fɛɛ.” Ehe miihia ni Hebri Kristofoi lɛ akai nɔ ni ba amɛ blematsɛmɛi lɛ anɔ lɛ. Akɛni amɛku amɛhiɛ amɛshwie Yehowa kojomɔ nɔ akɛ amɛhiɛ baakpata yɛ ŋã lɛ nɔ hewɔ lɛ, amɛka akɛ amɛaabote Shiwoo Shikpɔŋ lɛ nɔ. Shi Mose bɔ amɛ kɔkɔ akɛ: “Amalekbii lɛ kɛ Kanaanbii lɛ kɛ nyɛ aaakpe yɛ jɛi, ni nyɛaanyɔnyɔi yɛ klante naa.” Beni Israelbii lɛ shi amɛtsitsi kɛtee lɛ, “Amalekbii kɛ Kanaanbii ni yɔɔ nakai gɔŋ lɛ nɔ lɛ kpeleke shi, ni amɛbagbe amɛ ni amɛshwie amɛ kɛtee Horma tɔ̃ɔ.” (4 Mose 14:39-45) Yehowa wiemɔ lɛ naa ba fe klante kɛ enaa nta fɛɛ, ni mɔ fɛɛ mɔ ni baaje gbɛ aku ehiɛ ashwie nɔ lɛ baakpa nɔ ni baajɛ mli aba lɛ kɛ̃.—Galatabii 6:7-9.
19. Hewalɛ enyiɛ Nyɔŋmɔ wiemɔ lɛ ‘kɛgbuɔ’ nii, ni mɛni hewɔ esa akɛ wɔkpɛlɛ wɔhe akɔntaa ni wɔbaabu wɔha Nyɔŋmɔ lɛ nɔ?
19 Kwɛ bɔ ni Nyɔŋmɔ wiemɔ lɛ kɛ hewalɛ “[gbuɔ] kɛboteɔ mli kɛyashi beyinɔ ni egbalaa susuma kɛ mumɔ lɛ kɛ talɔi kɛ wuiaŋfɔi lɛ amli” ehãa! Egbuɔ shi kɛboteɔ aŋkroaŋkro susumɔi kɛ yiŋtoi amli, egbuɔ shi yɛ mfonirifeemɔŋ kɛyaninaa wuiaŋfɔi ni yɔɔ wui lɛ amli tɔ̃ɔ lɛ! Eyɛ mli akɛ Israelbii ni aha amɛye amɛhe kɛjɛ Mizraim nyɔŋyeli mli lɛ kpɛlɛ nɔ akɛ amɛbaaye Mla lɛ nɔ moŋ, shi Yehowa le yɛ amɛmligbɛ tɔ̃ɔ akɛ amɛhiɛ esɔɔɔ gbɛjianɔ ni eto kɛ etaomɔ nii lɛ. (Lala 95:7-11) Yɛ nɔ najiaŋ ni amɛaafee esuɔmɔnaa nii lɛ, nɔ ni amɛsusuɔ he ji amɛhelooŋ akɔnɔ nii ni amɛnine aaashɛ nɔ. No hewɔ lɛ, amɛboteee Nyɔŋmɔ shiwoo hejɔɔmɔ lɛ mli, shi moŋ amɛhiɛ kpata yɛ ŋã lɛ nɔ. Ehe miihia ni wɔkase nii kɛjɛ enɛ mli, ejaakɛ “ateee bɔɔnɔ̃ ko yɛ [Nyɔŋmɔ] hiɛ, shi nibii fɛɛ yɛ faŋŋ ni agbele nɔ yɛ lɛ mɔ ni wɔkɛyɔɔ sane lɛ hiŋmɛiiaŋ.” (Hebribii 4:13) No hewɔ lɛ, eba akɛ wɔɔtsu wɔ henɔjɔɔmɔ kɛha Yehowa lɛ he nii, koni ‘wɔkakpale kɛmiiya hiɛkpatamɔ mli.’—Hebribii 10:39.
20. Mɛni kã wɔhiɛ, ni mɛni esa akɛ wɔfee bianɛ koni wɔbote Nyɔŋmɔ hejɔɔmɔ lɛ mli?
20 Eyɛ mli akɛ “gbi ni ji gbi kpawo lɛ”—Nyɔŋmɔ hejɔɔmɔ gbi lɛ—miiya nɔ lolo moŋ, shi ehiɛ yɛ eyiŋtoo ni kɔɔ shikpɔŋ lɛ kɛ adesai ahe lɛ he nitsumɔ nɔ waa diɛŋtsɛ. Etsɛŋ kwraa, Mesia Maŋtsɛ, Yesu Kristo, baafee nii ni ekɛjie mɛi ni teɔ shi woɔ Nyɔŋmɔ suɔmɔnaa nii fɛɛ, ni Satan Abonsam fata he lɛ kɛjɛ shikpɔŋ nɔ. Yesu kɛ enanemɛi nɔyelɔi 144,000 lɛ kɛ shikpɔŋ lɛ kɛ adesai baaba shihilɛ ni Nyɔŋmɔ to eyiŋ yɛ he lɛ mli yɛ Kristo Afii Akpe Nɔyeli be lɛ mli. (Kpojiemɔ 14:1; 20:1-6) Be ni wɔkɛaatsɔɔ akɛ wɔkɛ wɔshihilɛ fɛɛ ebɔle Yehowa Nyɔŋmɔ suɔmɔnaa niifeemɔ he lɛ nɛ. Yɛ nɔ najiaŋ ni wɔɔbɔ mɔdɛŋ wɔbu wɔhe bem yɛ Nyɔŋmɔ hiɛ ni wɔha wɔ diɛŋtsɛ wɔ nibii aya hiɛ lɛ, be eshɛ agbɛnɛ ni ‘wɔkɛaajɔɔ wɔhe kɛjɛ wɔ diɛŋtsɛ wɔnitsumɔi ahe,’ ni wɔjɛ wɔtsui muu fɛɛ mli wɔsɔmɔ Maŋtsɛyeli lɛ he nibii. Kɛtsɔ nakai feemɔ kɛ anɔkwa ni wɔɔye wɔŋwɛi Tsɛ, Yehowa lɛ nɔ lɛ, wɔbaaná hegbɛ ni wɔkɛaaná Nyɔŋmɔ hejɔɔmɔ bianɛ kɛ agbɛnɛ kɛmiiya naanɔ lɛ mli ŋɔɔmɔ.
Ani Obaanyɛ Otsɔɔ Mli?
◻ Mɛɛ yiŋtoo hewɔ Nyɔŋmɔ jɔɔ ehe yɛ “gbi ni ji gbi kpawo lɛ” nɔ lɛ?
◻ Kulɛ mɛɛ hejɔɔmɔ Israelbii lɛ baaná mli ŋɔɔmɔ, ni mɛni hewɔ amɛnyɛɛɛ amɛbote mli lɛ?
◻ Mɛni esa akɛ wɔfee koni wɔbote Nyɔŋmɔ hejɔɔmɔ lɛ mli?
◻ Nyɔŋmɔ wiemɔ lɛ hiɛ kã, ni eyɛ hewalɛ, ni enaa ba fe klante kɛ enaa nta fɛɛ yɛ mɛɛ gbɛ nɔ?
[Mfoniri ni yɔɔ baafa 16-17]
Israelbii lɛ ye Hejɔɔmɔ Gbi lɛ, shi amɛboteee Nyɔŋmɔ hejɔɔmɔ lɛ mli. Ani ole nɔ̃ hewɔ?