Henɔjɔɔmɔ—Kɛha Namɔ?

“Nii fiaa ni Yehowa ewie lɛ, wɔɔfee ni wɔɔbo toi.”—2 MOSE 24:7.

 1, 2. (a) Mɛni mɛi komɛi etuu amɛhe amɛha? (b) Ani mɛi ni yɔɔ jamɔi amli lɛ pɛ anaa henɔjɔɔmɔ yɛ amɛgbɛfaŋ?

YƐ FEBRUARY 1945 mli lɛ, abua Zero-fighter kɔɔyɔŋ lɛlɛ kudɔlɔi ni fata Japan Yatabe Tawuu Kɔɔyɔŋ Lɛji Akuu lɛ he lɛ fɛɛ naa yɛ kpee he agbo ko mli. Aha amɛteŋ mɔ fɛɛ mɔ wolo koni eŋma yɛ nɔ, kɛji eesumɔ ni ekɛ ehe aha akɛ kamikaze, ni ji tutualɔi hegbelɔi akuu lɛ mli nyo. Asraafonyo ko ni fata he yɛ nakai beaŋ lɛ kɛɛ akɛ: “Misusu akɛ eji hegbɛ ni mina akɛ mikɛ mihe asha afɔle yɛ maŋ lɛ jaramɔ be mli. Akɛni mihenumɔi nyɛ minɔ akɛ mikɛ mihe aha hewɔ lɛ, mikɛ mihe ha kɛha nakai nitsumɔ lɛ.” Atsɔse lɛ yɛ kɔɔyɔŋ lɛlɛ ni atsɛɔ lɛ Ohka (ni ji hegbelɔi akɔɔyɔŋ lɛlɛ ni akɛyatswaa okpɛlɛm) lɛ kudɔmɔ kɛ ekɛ nitsumɔ mli, koni eyagbee henyɛlɔi atawuu lɛlɛ nɔ. Shi, ta lɛ ba naagbee ni enako hegbɛ ni ekɛaafee nakai, ní égbo eha emaŋ lɛ kɛ emaŋtsɛ wulu lɛ. Beni aye Japan nɔ kunim yɛ ta lɛ mli lɛ, hemɔkɛyeli ni eyɔɔ yɛ maŋtsɛ wulu nɛɛ mli lɛ laaje kwraa.

² Eshɛ be ko, ni Japanbii pii tuu amɛhe amɛha maŋtsɛ wulu, ni amɛheɔ amɛyeɔ akɛ eji nyɔŋmɔ ni hiɛ kã lɛ. Ayɛ nibii krokomɛi ni ajaa, yɛ shikpɔji krokomɛi anɔ, ni ekomɛi po yɛ lolo. Mɛi akpekpei abɔ etuu amɛhe amɛha Maria, Buddha, loo nyɔŋmɔi krokomɛi—ni bei pii lɛ, akɛ amagai feɔ amɛhe mfoniri. Akɛni akɛ naatsemɔ kɛ henumɔ naa amɛnɔ hewalɛ hewɔ lɛ, mɛi komɛi kɛ amɛshika ni amɛkɛ tɔlɛ babaoo na lɛ yawoɔ TV nɔ sanekpakpa shiɛlɔi akotokui amli, kɛ amɛ sɛɛfimɔ fɛɛ, ni feɔ tamɔ jamɔ nɔŋŋ pɛpɛɛpɛ. Yɛ ta lɛ sɛɛ lɛ, Japanbii ni nine enyɛ shi lɛ tao nɔ kroko ni amɛbaanyɛ amɛjɔɔ amɛwala nɔ amɛha. Yɛ mɛi komɛi agbɛfaŋ lɛ, nitsumɔ batsɔ nakai nii lɛ. Bokagbɛ bii ji amɛ jio, Anaigbɛ bii ji amɛ jio, mɛi pii jɔɔ amɛhe nɔ amɛhaa ninamɔ babaoo naabuamɔ. Gbekɛbii haa lalafolɔi komɛi feɔ mɛi ni he hiaa fe fɛɛ yɛ amɛshihilɛ mli, ni amɛkaseɔ amɛshihilɛ gbɛ. Mɛi pii etsɔmɔ mɛi ni jaa amɛ diɛŋtsɛ amɛhe ŋmɛnɛ, ni amɛkɛ amɛ suɔmɔnaa nii efee nɔ ni amɛtuu amɛhe fɛɛ amɛha. (Filipibii 3:19; 2 Timoteo 3:2) Shi ani nɛkɛ nibii loo gbɔmɛi nɛɛ sa hetuu-kɛhamɔ ni jɛɔ mɔ susuma fɛɛ mli lɛlɛŋ?

 3. Nibii komɛi ni atuu he aha lɛ fee nɔ ni he baaa sɛɛnamɔ ko yɛ mɛɛ gbɛ nɔ?

³ Kɛ amɛkɛ shihilɛ diɛŋtsɛ ni yɔɔ lɛ kpe lɛ, bei pii lɛ amaga jalɔi ayiŋ futuɔ amɛ. Kɛ amaga jalɔi na akɛ amɛ amagai lɛ jeee nɔ ko nɔ ko, fe “gbɔmɛi aninenaa nitsumɔi” kɛkɛ lɛ, nɔ ni jɛɔ amagai nɛɛ ajamɔ mli baa ji nijiaŋwujee. (Lala 115:4) Kɛ akpa sanekpakpa shiɛlɔi ni ale amɛ jogbaŋŋ lɛ anifeemɔi fɔji lɛ ahe mama lɛ, ehaa gbɔmɛi anɔkwafoi lɛ nuɔ he akɛ amɛnine enyɛ shi. Beni shika gbɛfaŋ “shweremɔ” lɛ ba naagbee lɛ, nitsulɔi na jwɛŋmɔŋ naagbai beni amɛna akɛ amɛfata mɛi ni abaashwie amɛ kɛjɛ nitsumɔi amli lɛ ahe lɛ. Nitsumɔi amli shigbeemɔi ni ba nyɛsɛɛ nɛɛ ye mɛi ni jaa Mamona lɛ awui waa diɛŋtsɛ. Nyɔmɔ ni amɔ̃, kɛ hiɛnɔkamɔ akɛ akɛbaana shika babaoo lɛ, batsɔ jatsu diɛŋtsɛ, kɛ gbɛkpamɔ bibioo pɛ ni yɔɔ akɛ abaanyɛ awo nɛkɛ nyɔji nɛɛ. (Mateo 6:24, NW shishigbɛ niŋmaa) Kɛ rɔk lalafolɔi kɛ hiɛtserɛjielɔi krokomɛi ni mɛi efee amɛ nyɔŋmɔi lɛ gboi loo anuuu amɛhe dɔŋŋ lɛ, ehaa mɛi ni jaa amɛ lɛ feɔ shwɛm. Ni bei pii lɛ, mɛi ni kɛ amɛshihilɛ be fɛɛ diɔ amɛ akɔnɔ nii asɛɛ lɛ kpaa yibii ni yɔɔ dɔlɛ.—Galatabii 6:7.

 4. Mɛni tsirɛɔ gbɔmɛi ni amɛjɔɔ amɛwala nɔ amɛhaa nibii ni he bɛ sɛɛnamɔ lɛ?

⁴ Mɛni tsirɛɔ gbɔmɛi ni amɛjɔɔ amɛhe nɔ amɛhaa nibii ni sɛɛnamɔ bɛ he tamɔ nɛkɛ lɛ? Bei pii lɛ, no ji jeŋ ni yɔɔ Satan Abonsam shishi nɛɛ mumɔ lɛ. (Efesobii 2:2, 3) Anaa hewalɛ ni mumɔ nɛɛ naa yɛ mɛi anɔ lɛ yɛ gbɛi sɔrɔtoi anɔ. Mɔ ko yɛ ni ekolɛ weku kusum ko ni etsa nɔ kɛjɛ eblematsɛmɛi lɛ ayinɔ aahu kɛbashɛ enɔ lɛ ji nɔ ni kudɔɔ lɛ. Woloŋlee loo tsɔsemɔ ni ana hu baanyɛ ana mɔ ko susumɔ nɔ hewalɛ ni mli wa. Ekolɛ shihilɛ ni yɔɔ nitsumɔ he lɛ baatsirɛ “nitsumɔ mli tabilɔi” lɛ ewo nitsumɔ mli deŋmegbomɔ ni hejɔɔmɔ bɛ mli, ni baanyɛ ekɛ amɛwala awo oshara mli lɛ mli. Heloonaa ninamɔ su ni yɔɔ je lɛŋ lɛ woɔ hewalɛ ni ana nii babaoo. Mɛi babaoo ena tsui fɔŋ, ni enɛ tsirɛɔ amɛ ni amɛtuu amɛhe amɛha amɛ pɛsɛmkunya akɔnɔi. Amɛsusuuu he amɛkwɛɛɛ akɛ ani nɛkɛ nibii ni amɛtiuɔ sɛɛ nɛɛ sa hetuu-kɛhamɔ lo.

Maŋ ni Ejɔɔ Ehe Nɔ

 5. Mɛɛ henɔjɔɔmɔ ko afee aha Yehowa nɔ ni fe afii 3,500 ni eho nɛ?

⁵ Nɔ ni fe afii 3,500 ni eho nɛ lɛ, jeŋmaŋ ko ná nɔ ko ni sa jogbaŋŋ kɛha hetuu-kɛhamɔ. Amɛjɔɔ amɛhe nɔ amɛha Yehowa, Nyɔŋmɔ ni yeɔ maŋtsɛ lɛ. Akɛ kuu lɛ, Israel maŋ lɛ jaje ehenɔjɔɔmɔ kɛha Nyɔŋmɔ lɛ yɛ Sinai ŋa lɛ nɔ.

 6. Mɛni kulɛ esa akɛ Nyɔŋmɔ gbɛi lɛ atsɔɔ kɛha Israelbii lɛ?

⁶ Mɛni tsirɛ Israelbii lɛ ni amɛkɔ gbɛ ni tamɔ nɛkɛ? Beni amɛyɔɔ nyɔŋyeli mli yɛ Mizraim lɛ, Yehowa kɛ nitsumɔ wo Mose dɛŋ akɛ enyiɛ amɛhiɛ kɛya heyeli mli. Mose bi bɔ ni sa akɛ ejie Nyɔŋmɔ ni tsu lɛ lɛ kpo etsɔɔ amɛ, ni Nyɔŋmɔ jie lɛ diɛŋtsɛ ehe kpo akɛ “Miji mɔ ni miji.” Efã Mose ni ekɛɛ Israel bii lɛ akɛ: “Miji tsu mi nyɛŋɔɔ nɛɛ.” (2 Mose 3:13, 14) Nɛkɛ wiemɔ nɛɛ tsɔɔ akɛ Yehowa batsɔɔ nɔ fɛɛ nɔ ni he hiaa koni ekɛha eyiŋtoi aba mli. Ebaajie ehe kpo akɛ Mɔ ni Haa eshiwoi Baa Mli, ni ebaafee enɛ, yɛ gbɛ ni Israelbii ablematsɛmɛi lɛ enako nɔ ko ni tamɔ nakai dã lɛ nɔ.—2 Mose 6:2, 3.

 7, 8. Mɛɛ odaseyelii Israelbii lɛ ná, ni tsɔɔ akɛ Yehowa ji Nyɔŋmɔ ni sa akɛ amɛtuu amɛhe amɛha lɛ?

⁷ Israelbii lɛ ye amanehului ni akɛba Mizraim shikpɔŋ lɛ kɛ enɔ bii lɛ anɔ kɛtsɔ Haomɔi Nyɔŋma lɛ anɔ lɛ he odase. (Lala 78:44-51) Kɛkɛ ni, amɛyifalɛ aaashɛ akpekpei etɛ, ni yei kɛ gbekɛbii fata he, bua amɛhe naa, ni amɛfã kɛshi Goshen shikpɔŋ lɛ nɔ gbi ko gbɛkɛnaashi, ni no diɛŋtsɛ po lɛ, eji nifeemɔ ko ni sa kadimɔ waa diɛŋtsɛ. (2 Mose 12:37, 38) No sɛɛ, beni amɛshɛ Ŋshɔ Tsuru lɛ naa lɛ, Yehowa jie ehe kpo akɛ “tawulɔ,” ni egba ŋshɔ lɛ mli enyɔ ni eha Israelbii lɛ tsɔ mli, ni sɛɛ mli lɛ eha etsa ekoŋŋ ni emii Mizraimbii ni nyiɛ amɛsɛɛ lɛ, ni ekɛhere ewebii lɛ ayiwala kɛjɛ Farao asraafoi lɛ adɛŋ. Nɔ ni jɛ mli ba ji akɛ, “Israel na nine wulu ni Yehowa ŋɔ-tsɔɔ Mizraim lɛ; ni maŋ lɛ she Yehowa gbeyei, ni amɛhe Yehowa . . . amɛye.”—2 Mose 14:31; 15:3; Lala 136:10-15.

⁸ Israelbii lɛ wie huhuuhu amɛshi Yehowa kɛ enajiaŋdamɔlɔ Mose, yɛ niyenii kɛ nu ni amɛnaaa hewɔ, oookɛɛ amɛbɛ nɔ ni Nyɔŋmɔ gbɛi lɛ shishi ji lɛ he odaseyeli lolo. Yehowa tsu trakɔkɔi kɛbaha amɛ, ni enɛ mana kɛjɛ ŋwɛi eshwie shi, ni eha nu tue kɛjɛ tɛsaa mli yɛ Meriba. (2 Mose 16:2-5, 12-15, 31; 17:2-7) Yehowa jie Israelbii lɛ kɛjɛ Amalekbii lɛ atutuamɔ hu mli. (2 Mose 17:8-13) Gbɛ ko kwraa bɛ ni Israelbii lɛ baatsɔ nɔ amɛkpoo nɔ ni Yehowa kɛɛ Mose yɛ sɛɛ mli nɛɛ, akɛ: “Yehowa, Yehowa, Nyɔŋmɔ musuŋtsɔlɔ kɛ durolɔ ni toɔ tsui, ni mɔbɔnalɛ kɛ anɔkwale fa pii, ni hiɛɔ mɔbɔnalɛ mli ehaa mɛi akpei abɔ, ni ŋɔɔ tɔmɔ kɛ efɔŋ kɛ esha efaa.” (2 Mose 34:6, 7) Lɛlɛŋ, Yehowa ma nɔ mi akɛ eji mɔ ni sa amɛ hetuu-kɛhamɔ.

 9. Mɛni hewɔ Yehowa ha Israelbii lɛ hegbɛ ni amɛkɛtsɔɔ akɛ amɛjɔɔ amɛhe nɔ amɛha lɛ akɛ amɛbaasɔmɔ lɛ lɛ, ni te amɛhere nɔ amɛha tɛŋŋ?

⁹ Eyɛ mli akɛ Yehowa yɛ hegbɛ yɛ Israelbii lɛ anɔ akɛ enii, ejaakɛ lɛ ji mɔ ni jie amɛ kɛjɛ Mizraim moŋ, shi akɛ Nyɔŋmɔ ni yɔɔ mlihilɛ kɛ mɔbɔnalɛ lɛ, eha amɛ hegbɛ koni amɛ diɛŋtsɛ amɛjɛ amɛ suɔmɔ mli amɛtsɔɔ akɛ amɛmiisumɔ ni amɛsɔmɔ lɛ. (5 Mose 7:7, 8; 30:15-20) Agbɛnɛ hu etsɔɔ taomɔ nii ni kpaŋmɔ ni kã ekɛ Israelbii lɛ ateŋ lɛ damɔ nɔ lɛ mli. (2 Mose 19:3-8; 20:1–23:33) Beni Mose tsɔɔ amɛ nɛkɛ taomɔ nii nɛɛ fɛɛ lɛ, Israelbii lɛ jaje akɛ: “Nii fiaa ni Yehowa ewie lɛ, wɔɔfee ni wɔɔbo toi.” (2 Mose 24:3-7) Amɛjɛ amɛ diɛŋtsɛ amɛ suɔmɔ mli amɛbatsɔmɔ maŋ ni ejɔɔ ehe nɔ eha Nuntsɔ Maŋtsɛ Yehowa.

Hiɛsɔɔ kɛ Mɔ Yaa Henɔjɔɔmɔ Mli

10. Mɛni nɔ esa akɛ wɔ henɔjɔɔmɔ kɛha Yehowa lɛ adamɔ?

¹⁰ Yehowa, Bɔlɔ lɛ, kã he esa wɔ susuma muu fɛɛ mli hetuu-kɛhamɔ lolo. (Maleaki 3:6; Mateo 22:37; Kpojiemɔ 4:11) Shi, esaaa akɛ wɔ henɔjɔɔmɔ lɛ damɔɔ hé ni wɔheɔ nɔ fɛɛ nɔ wɔyeɔ kɛkɛ, kɛ henumɔi ni sɛɛ etsɛɛɛ, loo mɛi krokomɛi alakamɔi anɔ—kɛji amɛji wɔ fɔlɔi po. Esa akɛ edamɔ anɔkwale ni kɔɔ Yehowa he lɛ he nilee ni ja kɛmɔ shi, kɛ hiɛsɔɔ ni wɔyɔɔ kɛha nɔ ni Yehowa efee eha wɔ lɛ nɔ. (Romabii 10:2; Kolosebii 1:9, 10; 1 Timoteo 2:4) Taakɛ bɔ ni Yehowa ha Israelbii lɛ hegbɛ ni amɛjɛ amɛ diɛŋtsɛ amɛ suɔmɔ mli amɛtsɔɔ amɛ henɔjɔɔmɔ lɛ, nakai nɔŋŋ ehaa wɔ hu hegbɛ ni wɔjɛ wɔ suɔmɔ mli wɔjɔɔ wɔhe nɔ, ni wɔha ale nakai henɔjɔɔmɔ lɛ yɛ faŋŋ mli.—1 Petro 3:21.

11. Mɛni wɔ Biblia lɛ kasemɔ ejie lɛ kpo yɛ Yehowa he?

¹¹ Wɔtsɔɔ Biblia lɛ kasemɔ nɔ wɔbaleɔ Nyɔŋmɔ akɛ mɔ ko diɛŋtsɛ. E-Wiemɔ lɛ yeɔ ebuaa wɔ ni wɔyooɔ esui, taakɛ ejeɔ kpo yɛ adebɔɔ mli lɛ. (Lala 19:2-5) Wɔnyɛɔ wɔnaa kɛjɛɔ e-Wiemɔ lɛ mli akɛ ejeee Triniti ni he yɔɔ naakpɛɛ, ni anyɛŋ anu lɛ shishi. Ayeee enɔ yɛ ta mli, ni no hewɔ lɛ ehe ehiaaa ni eŋmɛɛɔ e-Nyɔŋmɔyeli lɛ he. (2 Mose 15:11; 1 Korintobii 8:5, 6; Kpojiemɔ 11:17, 18) Akɛni eha eshiwoi eba mli hewɔ lɛ, ehaa wɔkaiɔ nɔ ni egbɛi fɛfɛo, Yehowa lɛ damɔ shi kɛha. Lɛ ji Yiŋtolɔ Kpeteŋkpele lɛ. (1 Mose 2:4, NW shishigbɛ niŋmaa; Lala 83:19; Yesaia 46:9-11) Kɛtsɔ Biblia lɛ kasemɔ nɔ lɛ, wɔbanuɔ bɔ ni eji anɔkwafo, ni anyɛɔ akɛ he fɔɔ enɔ hu lɛ shishi jogbaŋŋ.—5 Mose 7:9; Lala 19:8, 10; 111:7.

12. (a) Mɛni gbalaa wɔ kɛbɛŋkɛɔ Yehowa he lɛ? (b) Shihilɛ mli niiashikpamɔi diɛŋtsɛ ni aŋmala yɛ Biblia lɛ mli lɛ tsirɛɔ wɔ ni wɔsumɔ akɛ wɔɔsɔmɔ Yehowa yɛ mɛɛ gbɛ nɔ? (d) Te onuɔ Yehowa sɔɔmɔ he ohaa tɛŋŋ?

¹² Nɔ titri ni gbalaa wɔ kɛbɛŋkɛɔ Yehowa ji esu ni tsɔɔ suɔmɔ lɛ. Biblia lɛ jieɔ bɔ ni ekɛ adesai yeɔ yɛ suɔmɔ kɛ mɔbɔnalɛ mli, ni ekɛ amɛhe keɔ amɛ lɛ kpo faŋŋ. Susumɔ bɔ ni eha Hiob shwere babaoo yɛ be mli ni Hiob kɛ anɔkwayeli ehiɛ emuuyeli mli lɛ he okwɛ. Hiob niiashikpamɔ lɛ maa nɔ mi akɛ “[Yehowa] mli tsɔɔ lɛ babaoo, ni emli jɔ hu.” (Yakobo 5:11; Hiob 42:12-17) Susumɔ bɔ ni Yehowa kɛ David ye ha beni efite gbala ni egbe gbɔmɔ hu lɛ he okwɛ. Hɛɛ, Yehowa efee klalo akɛ kɛ eshafeelɔ lɛ bɛŋkɛ lɛ kɛ “tsui ni werɛ eho ehe ni tswiaa shi kɛ dɔlɛ lɛ,” ekɛ eshai ni yɔɔ hiɛdɔɔ lɛ po aaake. (Lala 51:5-13, 19) Susumɔ bɔ ni Yehowa kɛ Saul ni jɛ Tarso, mɔ ni shishijee lɛ, efee ehe Nyɔŋmɔ webii ayiwalɔ diɛŋtsɛ lɛ ye ha lɛ hu he okwɛ. Nɛkɛ nɔkwɛmɔ nii nɛɛ maa Nyɔŋmɔ mɔbɔnalɛ kɛ bɔ ni esumɔɔ ni ekɛ mɛi ni tsakeɔ amɛtsui lɛ atsu nii lɛ nɔ mi. (1 Korintobii 15:9; 1 Timoteo 1:15, 16) Paulo nu he akɛ ebaanyɛ ekɛ ewala fɛɛ aha kɛha nɛkɛ Nyɔŋmɔ ni yɔɔ suɔmɔ nɛɛ sɔɔmɔ. (Romabii 14:8) Ani bo hu onuɔ he nakai?

13. Mɛɛ suɔmɔ kpele ko ni Yehowa jie lɛ kpo nyɛɔ mɛi ni yɔɔ jalɛ tsuii lɛ anɔ ni amɛjɔɔ amɛhe nɔ amɛha lɛ?

¹³ Yɛ Israelbii lɛ agbɛfaŋ lɛ, Yehowa here amɛ yiwala kɛjɛ Mizraim nyɔŋyeli mli, ni ésaa gbɛ ni eeetsɔ nɔ ehere wɔ yiwala kɛjɛ esha kɛ gbele nyɔŋyeli mli—Yesu Kristo kpɔmɔ afɔleshaa lɛ. (Yohane 3:16) Paulo kɛɔ akɛ: “Nyɔŋmɔ jieɔ lɛ diɛŋtsɛ esuɔmɔ ni ekɛsumɔ wɔ lɛ shi etsɔɔ, akɛ be mli ni wɔji eshafeelɔi lɛ beebe ni Kristo bagbo yɛ wɔnajiaŋ.” (Romabii 5:8) Nɛkɛ suɔmɔ gbɛjianɔtoo nɛɛ nyɛɔ mɛi ni yɔɔ jalɛ tsuii lɛ anɔ ni amɛjɔɔ amɛhe nɔ amɛhaa Yehowa kɛtsɔɔ Yesu Kristo nɔ. “Ejaakɛ Kristo suɔmɔ lɛ nyɛɔ wɔ nɔ, ni wɔkojoɔ nɛkɛ, akɛ, kɛ mɔ kome gbo mɛi fɛɛ yi gbele lɛ, belɛ mɛi lɛ fɛɛ egboi. Ni egbo mɛi fɛɛ yi gbele, koni mɛi ni hiɛ kamɔ lɛ ahiɛ akakamɔ miiha amɛ diɛŋtsɛ amɛhe dɔŋŋ, shi moŋ amɛhiɛ akamɔ aha mɔ ni gbo ni atee lɛ shi ekoŋŋ aha amɛ lɛ.”—2 Korintobii 5:14, 15; Romabii 8:35-39.

14. Ani bɔ ni Yehowa kɛ mɛi yeɔ haa lɛ he nilee ni wɔɔna lɛ kɛkɛ fa bɔ ni eeetsirɛ wɔ ni wɔjɔɔ wɔwala nɔ wɔha lɛ? Tsɔɔmɔ mli.

¹⁴ Ni kɛlɛ, Yehowa su kɛ bɔ ni ekɛ adesai yeɔ haa lɛ he nilee ni wɔɔna lɛ kɛkɛ faaa. Esa akɛ wɔ diɛŋtsɛ wɔna hiɛsɔɔ wɔha Yehowa. Mɛɛ gbɛ nɔ wɔɔtsɔ wɔfee enɛ? Kɛtsɔ Nyɔŋmɔ Wiemɔ lɛ ni wɔkɛaatsu nii yɛ wɔshihilɛ mli lɛ nɔ, ni wɔ diɛŋtsɛ wɔyoo akɛ shishitoo mlai ni yɔɔ mli lɛ tsuɔ nii jogbaŋŋ kɛmɔɔ shi. (Yesaia 48:17) Esa akɛ wɔnu he akɛ Yehowa ehere wɔyiwala kɛjɛ jeŋ fɔŋ ni yɔɔ Satan nɔyeli shishi nɛɛ mli ŋmɔtɔ lɛ mli. (Okɛto 1 Korintobii 6:11 he.) Beni wɔmiaa wɔhiɛ ni wɔfee nɔ ni ja lɛ, wɔkaseɔ bɔ ni wɔkɛ wɔhe fɔɔ Yehowa nɔ, ni wɔ diɛŋtsɛ wɔnaa niiashikpamɔ akɛ Yehowa ji Nyɔŋmɔ hiɛkalɔ lɛ, “sɔlemɔ Toibolɔ” lɛ. (Lala 62:8; 65:2, NW) Etsɛɛɛ ni wɔnuɔ he akɛ wɔbɛŋkɛ lɛ kpaakpa ni wɔnyɛɔ wɔjieɔ wɔ mligbɛ henumɔi fɛɛ kpo wɔtsɔɔ lɛ. Miishɛɛ henumɔ ni ji suɔmɔ ni wɔyɔɔ kɛha Yehowa lɛ daa yɛ wɔmli. Ŋwanejee ko bɛ he akɛ enɛ baaha wɔjɔɔ wɔwala nɔ wɔha lɛ.

15. Mɛni tsirɛ nuu ko, ni tsutsu ko lɛ ejɔɔ ehe nɔ eha heloonaa nitsumɔ ni ebasɔmɔ Yehowa lɛ?

¹⁵ Mɛi babaoo ebale Yehowa, Nyɔŋmɔ ni yɔɔ suɔmɔ nɛɛ, ni amɛjɔɔ amɛwala nɔ akɛ amɛkɛbaasɔmɔ lɛ. Akɛ nɔkwɛmɔ nɔ lɛ, susumɔ sarawa hewalɛ nibii ahe nitsulɔ ko ni yɔɔ nitsumɔ ni miishwere waa nɛɛ he okwɛ. Eshɛɔ bei komɛi ni ejeɔ nitsumɔ shishi leebi maaŋkpa, ni etsuɔ nii aahu gbi muu fɛɛ, ni etsaa nɔ kɛyashiɔ nyɔɔŋ teŋ, ni ebaa shia enɔ leebi maaŋkpa ŋmɛji enumɔ. Kɛ ejɔɔ ehe fioo aaafee ŋmɛlɛtswaa kome lɛ, kɛkɛ lɛ eshi shia kɛtee nitsumɔ kroko hu nɔ. Ekaiɔ akɛ: “Mijɔɔ mihe nɔ kwraa miha mi-nitsumɔ nɛɛ.” Beni eŋa je Biblia lɛ kasemɔ shishi pɛ kɛkɛ ni eyafata ehe. Ekɛɛ: “Nyɔŋmɔi ni mile kɛtsɔ hiɛ aahu kɛbashi nakai beaŋ lɛ miitao ni asɔmɔ amɛ kɛkɛ, shi amɛfeee nɔ ko kwraa ni he baaba sɛɛnamɔ kɛha wɔ. Shi Yehowa tsutsu ŋɔ hegbɛ lɛ ni etsu e-Bi koome lɛ kɛba shikpɔŋ nɛɛ nɔ, ni enɛ bi afɔleshaa kpele diɛŋtsɛ yɛ egbɛfaŋ.” (1 Yohane 4:10, 19) Beni shɛɔ nyɔji nyɔŋma lɛ, nuu nɛɛ ejɔɔ ehe nɔ eha Yehowa. No sɛɛ lɛ, ekɛ ejwɛŋmɔ fɛɛ fɔ̃ anɔkwa Nyɔŋmɔ lɛ sɔɔmɔ nɔ. Ekɛ ehe wo be-fɛɛ sɔɔmɔ nitsumɔ lɛ mli ni efã kɛtee he ni hiamɔ lɛ da yɛ. Taakɛ bɔfoi lɛ ji lɛ, lɛ hu ‘eshi nɔ fɛɛ nɔ ni enyiɛ Yesu sɛɛ.’ (Mateo 19:27) Nyɔji enyɔ sɛɛ lɛ, afɔ̃ ekɛ eŋa fɛɛ nine akɛ amɛbasɔmɔ yɛ Buu Mɔɔ Biblia kɛ Woji Bibii Asafo lɛ nitsumɔ he nine ni yɔɔ maŋ nɔ he ni amɛyɔɔ lɛ, koni ebaye ebua kɛ sarawa hewalɛ nibii ahe nitsumɔ. Ekɛ nɔ ni fe afii 20 etsu nii yɛ nitsumɔ he nine lɛ, ni eetsu nitsumɔ ni esumɔɔ—jeee kɛha lɛ diɛŋtsɛ ehe, shi moŋ kɛha Yehowa.

Ha Ale Ohenɔjɔɔmɔ lɛ Yɛ Faŋŋ Mli

16. Mɛni ji nifeemɔi komɛi ni tsɔɔ hiɛ beni mɔ ko jɔɔ ehe nɔ ehaa Yehowa lɛ?

¹⁶ Yɛ be mli ni amɛkase Biblia lɛ be kpalaŋŋ sɛɛ lɛ, gbekɛbii kɛ onukpai fɛɛ banaa hiɛsɔɔ amɛhaa Yehowa kɛ nɔ ni efee kɛha amɛ lɛ. Esa akɛ enɛ atsirɛ amɛ ni amɛjɔɔ amɛhe nɔ amɛha Nyɔŋmɔ. Ekolɛ oji nɛkɛ gbɔmɛi nɛɛ ateŋ mɔ ko. Mɛɛ gbɛ nɔ oootsɔ ojɔɔ ohe nɔ oha Yehowa? Yɛ be mli ni ona anɔkwa nilee kɛjɛ Biblia lɛ mli sɛɛ lɛ, esa akɛ otsu nakai nilee lɛ he nii, ni ona Yehowa kɛ Yesu Kristo mli hemɔkɛyeli. (Yohane 17:3) Tsakemɔ otsui ni otsi ohe kɛjɛ otsutsu eshafeemɔ gbɛi fɛɛ he. (Bɔfoi lɛ Asaji 3:19) No sɛɛ lɛ, obashɛɔ nifeemɔ ni ji henɔjɔɔmɔ he, ni ofeɔ enɛ kɛtsɔɔ otsuiŋ tɔ̃ɔ ni ojɛɔ osɔleɔ ohaa Yehowa lɛ nɔ. Ŋwanejee ko bɛ he akɛ nɛkɛ sɔlemɔ nɛɛ baaha oti ko ahi ojwɛŋmɔ mli daa nɛɛ, ejaakɛ no bafeɔ wekukpaa hee ni ebakã okɛ Yehowa teŋ lɛ shishijee.

17. (a) Mɛni hewɔ onukpai lɛ kɛ mɛi heei ni ejɔɔ amɛhe nɔ lɛ susuɔ sanebimɔi komɛi ni ato he gbɛjianɔ lɛ ahe lɛ? (b) Mɛɛ nɔ ko ni he hiaa esa akɛ mɔ ko afee yɛ ehenɔjɔɔmɔ lɛ sɛɛ nɔŋŋ, ni yɛ mɛɛ yiŋtoo hewɔ?

¹⁷ Taakɛ bɔ ni Mose tsɔɔ Israelbii lɛ gbɛnaa nii ni fata kpaŋmɔ wekukpaa ni ebakã amɛkɛ Yehowa teŋ lɛ he lɛ, nakai nɔŋŋ onukpai ni yɔɔ Yehowa Odasefoi asafoi lɛ amli lɛ yeɔ buaa mɛi ni ejɔɔ amɛhe nɔ etsɛko lɛ ni amɛsusu nibii ni fata he lɛ ahe jogbaŋŋ. Amɛkɛ sanebimɔi ni ato he gbɛjianɔ tsuɔ nii ni amɛkɛmaa nɔ mi akɛ amɛteŋ mɔ fɛɛ mɔ nuɔ Biblia mli shishijee tsɔɔmɔi lɛ ashishi jogbaŋŋ, ni amɛle nɔ ni Yehowa Odasefonyo ni amɛaaji lɛ tsɔɔ. No sɛɛ lɛ, nifeemɔ ni akɛaaha ale henɔjɔɔmɔ lɛ yɛ faŋŋ mli lɛ sa jogbaŋŋ. Efɔɔ kaa akɛ, mɔ hee ni ejɔɔ ehe nɔ lɛ shweɔ ni eha mɛi krokomɛi ale akɛ ebaje ekɛ Yehowa teŋ wekukpaa ni ji hegbɛ kpele ni ena nɛɛ mli. (Okɛto Yeremia 9:24 he.) Afeɔ enɛ yɛ gbɛ ni ja nɔ kɛtsɔɔ nu mli baptisimɔ ni akɛfeɔ henɔjɔɔmɔ he okadi lɛ nɔ. Nu lɛ shishi ni akɛ mɔ lɛ woɔ, kɛ enɔ ni awoɔ ekoŋŋ lɛ feɔ kpoomɔ ni ekpooɔ etsutsu shihilɛ gbɛ ni haa efeɔ lɛ diɛŋtsɛ esuɔmɔnaa nii lɛ, ni awoɔ enɔ kɛbaa shihilɛ gbɛ hee, ni ji Nyɔŋmɔ suɔmɔnaa nifeemɔ mli. Ejeee duromɔ-hamɔ loo krɔŋŋ-feemɔ nii, ni nakai nɔŋŋ hu ejeee kusum ko tamɔ Shinto kusum ni atsɛɔ lɛ misogi ni akɛɛ akɛ nu tsuuɔ mɔ he yɛ mli lɛ.a Shi moŋ, baptisimɔ feɔ henɔjɔɔmɔ ni atsɔ sɔlemɔ nɔ afee momo lɛ jajemɔ yɛ faŋŋ mli.

18. Mɛni hewɔ wɔbaanyɛ wɔna nɔmimaa akɛ wɔ henɔjɔɔmɔ lɛ efeŋ efolo lɛ?

¹⁸ Nɛkɛ nifeemɔ ni yɔɔ hiɛdɔɔ nɛɛ ji niiashikpamɔ ko ni hiɛ kpaŋ nɔ, ni ekaiɔ Nyɔŋmɔ tsulɔ hee lɛ yɛ wekukpaa ni baahi shi daa, ni ebakã ekɛ Yehowa teŋ agbɛnɛ lɛ he. Nɔ ni tamɔɔɔ henɔjɔɔmɔ ni kamikaze kɔɔyɔŋ lɛlɛ kudɔlɔ lɛ fee eha emaŋ lɛ kɛ maŋtsɛ wulu lɛ, nɛkɛ henɔjɔɔmɔ kɛha Yehowa nɛɛ efeŋ efolo, ejaakɛ lɛ ji Nyɔŋmɔ ofe ni hiɔ shi kɛyaa naanɔ, ni nyɛɔ etsuɔ otii fɛɛ ni ekɛmamɔɔ ehiɛ lɛ ahe nii lɛ. Lɛ, hɛɛ, lɛ ekome pɛ esa akɛ wɔtuu wɔsusuma muu fɛɛ wɔha.—Yesaia 55:9-11.

19. Mɛni he abaasusu yɛ nikasemɔ ni nyiɛ sɛɛ lɛ mli?

¹⁹ Shi kɛlɛ, nibii babaoo fata henɔjɔɔmɔ he. Akɛ nɔkwɛmɔ nɔ lɛ, te henɔjɔɔmɔ saa wɔ daa gbi shihilɛ he ehaa tɛŋŋ? Abaasusu enɛ he yɛ nikasemɔ ni nyiɛ enɛ sɛɛ lɛ mli.

[Shishigbɛ niŋmai]

Ani Okaiɔ?

◻ Mɛni hewɔ henɔjɔɔmɔ, taakɛ ejeɔ kpo yɛ je lɛ gbɛfaŋ lɛ, yagbeɔ naa yɛ nijiaŋwujee mli lɛ?

◻ Mɛni tsirɛ Israelbii lɛ ni amɛjɔɔ amɛhe nɔ amɛha Yehowa?

◻ Mɛni tsirɛɔ wɔ ni wɔjɔɔ wɔhe nɔ wɔhaa Yehowa ŋmɛnɛ?

◻ Wɔjɔɔ wɔhe nɔ wɔhaa Nyɔŋmɔ yɛ mɛɛ gbɛ nɔ?

◻ Te nu mli baptisimɔ he hiaa ha tɛŋŋ?

[Mfoniri ni yɔɔ baafa 10]

Israel jɔɔ ehe nɔ eha Yehowa yɛ Sinai