Amɛfee Yehowa Suɔmɔnaa Nii

Mose kɛ Aaron—Nyɔŋmɔ Wiemɔ lɛ Jajelɔi ni Yɔɔ Ekãa

FEEMƆ shihilɛ lɛ he mfoniri: Mose ni eye afii nyɔŋmai kpaanyɔ lɛ kɛ enyɛmi nuu Aaron damɔ nuu ni yɔɔ hewalɛ fe fɛɛ yɛ shikpɔŋ nɔ—Mizraim Farao hiɛ. Kɛha Mizraimbii lɛ, nuu nɛɛ fe nyɔŋmɔi lɛ anajiaŋdamɔlɔ kɛkɛ. Amɛheɔ amɛyeɔ akɛ lɛ diɛŋtsɛ lɛ nyɔŋmɔ ji lɛ. Abuɔ lɛ akɛ Horus, nyɔŋmɔ ni hiɛ laalɔɔ yitso lɛ ni afɔ lɛ yɛ gbɔmɔtso kroko mli. Isis kɛ Osiris kɛ Horus feɔ ekome kɛfeɔ triniti ni abuɔ amɛ titri yɛ Mizraim nyɔŋmɔi kɛ nyɔŋmɔyei ateŋ.

Mɔ fɛɛ mɔ ni bɛŋkɛɔ Farao lɛ baanyɛ ana blikã yitso ni yɔɔ gbeyei ni atɛŋ ni anaa yɛ emaŋtsɛ fai lɛ teŋgbɛ lɛ. Akɛɛ onufu nɛɛ nyɛɔ efɛ̃ɔ la kɛ hiɛkpatamɔ eshwieɔ Farao henyɛlɔi lɛ ateŋ mɔ fɛɛ mɔ nɔ. Agbɛnɛ Mose kɛ Aaron ebapue yɛ nyɔŋmɔ kɛ maŋtsɛ nɛɛ hiɛ kɛ nibimɔ ko ni eko bako ni tamɔ nakai da—ákɛ eha Israelbii ni amɛtsɔmɔ nyɔji lɛ aya koni amɛyaye gbijurɔ ko amɛha amɛ Nyɔŋmɔ, Yehowa.—2 Mose 5:1.

Yehowa egba efɔ shi momo akɛ Farao tsui baawa. No hewɔ lɛ, ehetoo ni mpoatswaa yɔɔ mli, akɛ: “Namɔ ji Yehowa lɛ ni mabo egbee toi ni maha Israel aya? Mileee Yehowa, ni Israel hu mihaaa amɛya” lɛ, efeee Mose kɛ Aaron naakpɛɛ. (2 Mose 4:21; 5:2) No hewɔ lɛ, asaa he aha béi ni baatsɔɔ nɔ ko. Yɛ kpee ni nyiɛ sɛɛ ba lɛ mli lɛ, Mose kɛ Aaron kɛ odaseyeli ni haa mɔ he jɔ̃ɔ lɛ ha Farao akɛ amɛdamɔ anɔkwa Nyɔŋmɔ kɛ ofe lɛ najiaŋ.

Naakpɛɛ Nɔ ko Ba

Taakɛ Yehowa etsɔɔ amɛ lɛ, Aaron fee naakpɛɛ nii ko ni ye hewalɛ ni Yehowa yɔɔ yɛ Mizraim nyɔŋmɔi lɛ anɔ lɛ he odase. Eshɛ́ edɛhiɛmɔ tso lɛ efɔ Farao hiɛ, ni amrɔ nɔŋŋ ni etsɔ onufu agbo ko! Akɛni naakpɛɛ nii nɛɛ ha ehiɛ fee lɛ yaa hewɔ lɛ, Farao tsɛ enilelɔi kɛ ŋkunyaayeli osɔfoi lɛ kɛba.a Yɛ daimonioi lɛ ahewalɛi ni yeɔ buaa hewɔ lɛ, nɛkɛ hii nɛɛ nyɛ amɛkɛ amɛ diɛŋtsɛ amɛ tsei fee nɔ ko ni tamɔ nakai nɔŋŋ.

Kɛ Farao kɛ esɔfoi lɛ nyã lɛ, amɛfee nakai yɛ be kuku ko mli. Bo lɛ kwɛmɔ bɔ ni amɛhiɛaŋ baatsake aha beni Aaron onufu lɛ mi amɛ onufui lɛ, ekome kome lɛ! Mɛi ni yɔɔ jɛmɛ lɛ fɛɛ nyɛ amɛna akɛ Mizraim nyɔŋmɔi lɛ jeee fɛi kɛha anɔkwa Nyɔŋmɔ, Yehowa.—2 Mose 7:8-13.

Shi, yɛ enɛ po sɛɛ lɛ, Farao tsui wa lolo. Beni Nyɔŋmɔ kɛ haomɔi nyɔŋma ni kpata nii ahiɛ ba Mizraim nɔ lɛ sɛɛ dani Farao kɛɛ Mose kɛ Aaron akɛ: “Nyɛtea shi nyɛjea mimaŋ bii lɛ ateŋ nyɛyaa, nyɛ kɛ Israelbii lɛ, ni nyɛyasɔmɔa Yehowa, taakɛ bɔ ni nyɛkɛɛ lɛ.”—2 Mose 12:31.

Nɔ ni Wɔkaseɔ Kɛjɛɔ Mli

Mɛni ha Mose kɛ Aaron nyɛ amɛtee Mizraim Farao ni yɔɔ hewalɛ waa lɛ hiɛ? Klɛŋklɛŋ lɛ, Mose wie akɛ ebɛ hekɛnɔfɔɔ yɛ enyɛmɔ mli, akɛ, “mijeee wielɔ ko, ni mililɛi hu tsii.” Yɛ be mli ni ama Yehowa sɛɛfimɔ nɔ mi aha lɛ po lɛ, ekpa fai akɛ: “Ofainɛ, mi-Nuntsɔ! mɔ ni oootsu kɛya lɛ, tsu.” Yɛ gbɛ kroko nɔ lɛ, Mose kpa fai akɛ Nyɔŋmɔ atsu mɔ kroko. (2 Mose 4:10, 13) Ni kɛlɛ, Yehowa kɛ Mose, heshibalɔ lɛ tsu nii, eha lɛ nilee kɛ hewalɛ ni he hiaa ni aaaha enyɛ etsu nitsumɔ ni akɛwo edɛŋ lɛ he nii.—4 Mose 12:3.

Ŋmɛnɛ, Yehowa Nyɔŋmɔ kɛ Yesu Kristo tsuji miitsu famɔ akɛ “nyɛyafea jeŋmaji fɛɛ mikaselɔi” lɛ he nii. (Mateo 28:19, 20) Bɔni afee ni wɔnyɛ wɔtsu wɔ gbɛfaŋnɔ yɛ nitsumɔ nɛɛ mli lɛ, esa akɛ wɔkɛ Ŋmalɛ mli nilee kɛ nyɛmɔi fɛɛ ni ekolɛ wɔyɔɔ lɛ atsu nii yɛ gbɛ ni hi fe fɛɛ nɔ. (1 Timoteo 4:13-16) Yɛ nɔ najiaŋ ni wɔɔgbala wɔjwɛŋmɔ kɛaaya nii ni wɔnyɛŋ wɔfee nɔ lɛ, nyɛhaa wɔkɛ hemɔkɛyeli akpɛlɛa nitsumɔ fɛɛ nitsumɔ ni Nyɔŋmɔ kɛha wɔ lɛ nɔ. Ebaanyɛ eha wɔhe asa ni ewo wɔ hewalɛ ni wɔfee esuɔmɔnaa nii.—2 Korintobii 3:5, 6; Filipibii 4:13.

Akɛni Mose kɛ gbɔmɔ kɛ daimonio shitee-kɛ-woo miikpe hewɔ lɛ, yelikɛbuamɔ ni fe adesa nɔ̃ he miihia lɛ lɛlɛŋ. No hewɔ lɛ, Yehowa ma nɔ mi kɛha lɛ akɛ: “Naa, miha otsɔ Nyɔŋmɔ oha Farao.” (2 Mose 7:1) Hɛɛ, Mose yɛ ŋwɛi sɛɛfimɔ kɛ hewalɛ. Akɛni Yehowa mumɔ lɛ yɔɔ enɔ hewɔ lɛ, Mose bɛ nɔ ni eeedamɔ nɔ eshe Farao loo nakai nɔyelɔ henɔwolɔ lɛ kɛ esamaŋfoi lɛ gbeyei.

Esa akɛ wɔ hu wɔkɛ wɔhe afɔ Yehowa mumɔ krɔŋkrɔŋ lɛ loo enifeemɔ hewalɛ lɛ nɔ, koni wɔnyɛ wɔtsu wɔ sɔɔmɔ lɛ wɔgbe naa. (Yohane 14:26; 15:26, 27) Yɛ ŋwɛi sɛɛfimɔ hewɔ lɛ, wɔbaanyɛ wɔha David wiemɔi nɛɛ ajije, beni ela akɛ: “Nyɔŋmɔ nɔ mihiɛ ka, misheee gbeyei, mɛni gbɔmɔ aaanyɛ mi afee?”—Lala 56:12.

Yɛ emusuŋtsɔlɛ hewɔ lɛ, Yehowa shiii Mose kome yɛ enitsumɔ lɛ mli. Shi moŋ Nyɔŋmɔ kɛɛ: “Onyɛmi Aaron aaatsɔ ogbalɔ. Bo lɛ wiemɔ nii fɛɛ ni mifao yɛ he lɛ; ni onyɛmi Aaron kɛ Farao awie.” (2 Mose 7:1, 2) Kwɛ suɔmɔ ni eji akɛ Yehowa aaatsu nii yɛ nyɛmɔ ni Mose aaanyɛ ekɛtsu nii lɛ pɛ mli!

Nyɔŋmɔ kɛ nanemɛi Kristofoi, ni kpɛlɛɔ kaa akɛ amɛaafee Yehowa, Ŋwɛi Flooflonyo lɛ Odasefoi nɔ lɛ anaanyobɔɔ haa wɔ. (1 Petro 5:9) No hewɔ lɛ, yɛ gbɛtsii nii ni ekolɛ wɔkɛaakpe lɛ fɛɛ sɛɛ lɛ, nyɛhaa wɔtamɔa Mose kɛ Aaron—Nyɔŋmɔ wiemɔ lɛ jajelɔi ni yɔɔ ekãa.

[Shishigbɛ niŋmaa]

[Mfoniri ni yɔɔ baafa 25]

Mose kɛ Aaron kɛ ekãa damɔ Yehowa najiaŋ yɛ Farao hiɛ