Ani Mose Ku Lɛdiɛŋtsɛ Ewiemɔ Nɔ?

YƐ HAOMƆ ni ji nɛɛhu​—nɔ̃ mli ni duŋ kabitii wo gbii etɛ​—lɛ sɛɛ lɛ, Farao wo Mose hegbeyei ni ekɛɛ: “‘Kwɛ ohe ni ahi, ni okaba mihiɛ dɔŋŋ; shi gbi nɔ ni ooona mihiɛ lɛ, ooogbo.” (2 Mose 10:28) Taakɛ 2 Mose Wolo 10:29 tsɔɔ lɛ, Mose to he akɛ: “Ojogbaŋŋ; mibaŋ ohiɛ dɔŋŋ!”

Shi wɔkaneɔ yɛ yitso ni tsa nɔ lɛ mli yɛ kukuji 4 kɛyashi 8 lɛ akɛ Mose jaje haomɔ ni ji 10 lɛ etsɔɔ Farao. Ani Mose ku lɛdiɛŋtsɛ ewiemɔ mli? Dabi, etamɔɔɔ akɛ nakai efee. Etamɔ nɔni esa akɛ abuɔ nɔni aŋma yɛ 2 Mose Wolo 11:​1-3 lɛ akɛ nii ni akɛɛ akɛfo nɔni tee nɔ lɛ mli kɛkɛ. Belɛ no tsɔɔ akɛ beni Mose ekɛɛ akɛ: “Mibaŋ ohiɛ dɔŋŋ” sɛɛ lɛ, efɔ̃ɔɔ wiemɔ, shi moŋ ekɛ haomɔ ni ji 10 lɛ jajemɔ tsá nɔ nɔŋŋ. Kɛkɛ ni, taakɛ nɔni aŋma lɛ kɛɛ lɛ, Mose kɛ “mlila je Farao ŋɔɔ kɛtee.”​—2 Mose 11:⁠8.

Akɛni Mose le akɛ haomɔ ni ji 10 lɛ baafee naagbeenɔ lɛ hewɔ ni enyɛ́ ekɛɛ Farao akɛ ebaŋ ehiɛ dɔŋŋ lɛ. Kɛ́ jeee nakai kulɛ ebaafee henɔwomɔ kɛ shwãa akɛ eeekpɛlɛ nɔ akɛ ebaŋ ehiɛ dɔŋŋ, ni ekolɛ no kɛ Yehowa suɔmɔnaanii kpaŋ gbee. Nɔni aŋma yɛ 2 Mose Wolo 11:​1-3 lɛ tsɔɔ akɛ Mose le akɛ haomɔ ni ji, 10 lɛ baafee naagbeenɔ, ni wiemɔi nɛɛ haa anaa nɔni sa akɛ Israelbii lɛ feɔ kɛji nakai haomɔ lɛ ba Mizraimbii anɔ lɛ.​—Okɛ 2 Mose Wolo 11:​2,3 ato 2 Mose Wolo 12:​35, 36 he okwɛ.

Bɔni ebalɛ ji akɛ ebahi ni Farao atsu ni ayatsɛ Mose kɛ Aaron kɛba. Beni haomɔ ni ji 10 lɛ eba Farao shi sɛɛ lɛ, ekɛɛ amɛ akɛ: “Nyɛtea shi nyɛjea mima.ŋbii lɛ ateŋ nyɛyaa, nyɛ kɛ Israelbii lɛ, ni nyɛyasɔmɔa Yehowa, taakɛ bɔni nyɛkɛɛ lɛ. Ni asaŋ nyɛŋɔa nyɛtooi kɛ nyɛtsinai lɛ hu kɛyaa, taakɛ bɔni nyɛkɛɛ lɛ; ni nyɛjɔa mi hu.” (2 Mose 12:​31, 32) Mɛɛ sane ni yɔɔ sɔrɔto ko nɛ! Nakai Farao ni wo Mose he gbeyei akɛ ebaagbelɛ lɛ nɔŋŋ kpaà fai akɛ ajɔɔlɛ nɛɛ. Esumɔɔɔ akɛ Mose kɛ Israelbii krokomɛi lɛ shiɔ Mizraim ni amɛmiilomɔlɛ lolo ni amɛmiishwe akɛ amanehului ni baa enɔ lɛ akã he lolo.