3 MOSE—Tsɛmɔ Kɛha Yehowa Jamɔ Krɔŋkrɔŋ
ESA AKƐ Yehowa jalɔi afee krɔŋkrɔŋ. Enɛ ji nɔ ni Biblia mli wolo ni ji 3 Mose lɛ tiɔ mli shii abɔ efeɔ lɛ faŋŋ. Akɛ nɔkwɛmɔ nɔ lɛ, wɔkaneɔ yɛ mli akɛ: “Miji Yehowa, nyɛ Nyɔŋmɔ lɛ, hewɔ lɛ nyɛfea nyɛhe krɔŋkrɔŋ, koni nyɛhi krɔŋkrɔŋ, ejaakɛ krɔŋkrɔŋ ji mi.”—3 Mose 11:44; 19:2; 20:7, 26.
Gbalɔ Mose ji mɔ ni ŋma 3 Mose yɛ Sinai eka shi faŋŋ akɛ yɛ afi 1512 D.Ŋ.B. Eŋmaa heee fe nyɔŋ kome—kɛjɛ kpeebuu lɛ maa yɛ klɛŋklɛŋ nyɔŋ lɛ klɛŋklɛŋ gbi lɛ nɔ yɛ afi ni ji enyɔ ni akpɔ̃ Israelbii lɛ kɛjɛ Mizraim nyɔŋyeli mli kɛyashi be mli ni Yehowa kɛ amɛkanemɔ lɛ’ he famɔ ha yɛ “amɛ Mizraim shikpɔŋ lɛ nɔ jee sɛɛ afi ni ji enyɔ lɛ mli nyɔŋ ni ji enyɔ lɛ nɔ klɛŋklɛŋ gbi lɛ nɔ.” (4 Mose 1:1-3; 2 Mose 40:17) Wolo lɛ mli saji tsɔɔ shihilɛ yɛ nsraŋ, ni etsɔɔ bɔ ni ato amɛ aha yɛ ŋa lɛ nɔ.—3 Mose 4:21; 10:4, 5; 14:8; 17:1-5.
Yehowa Odasefoi ni yɔɔ ŋmɛnɛ lɛ bɛ Mla ni Nyɔŋmɔ tsɔ Mose nɔ ekɛha lɛ shishi, ejaakɛ Yesu Kristo gbele lɛ jie nakai mla lɛ kɛtee. (Romabii 6:14; Efesobii 2:11-16) No hewɔ lɛ ani akpɔi ni anaa yɛ 3 Mose lɛ he aaanyɛ aba sɛɛnamɔ aha Kristofoi? Kɛji nakai lɛ, belɛ yɛ mɛɛ gbɛi anɔ? Mɛni wɔbaanyɛ wɔjɛ wolo nɛɛ mli wɔkase yɛ wɔjamɔ ni wɔkɛhaa Yehowa lɛ he?
EMLI SAJI MAA KRƆŊKRƆŊ-FEEMƆ NƆ MI
Awieɔ nikeenii kɛ afɔleshaai ahe yɛ 3 Mose yitso 1 kɛyashi 7. Akɛ shaa afɔle muu lɛ fɛɛ haa Yehowa, taakɛ bɔ ni Yesu Kristo hu kɛ egbɔmɔtso fɛɛ ha lɛ. Akɛ naanyobɔɔ shidaa afɔlei ni akɛhaa lɛ eko haa Yehowa yɛ afɔleshaa latɛ lɛ nɔ, ni osɔfo lɛ yeɔ fã, ni mɔ ni kɛhaa lɛ hu yeɔ fã. Kɛ akɛto he lɛ, Kristo gbele lɛ Kaimɔ lɛ ji naanyobɔɔ niyenii kɛha Kristofoi ni afɔ amɛ mu lɛ.—3 Mose 1:1-17; 3:1-17; 7:11-36; 1 Korintobii 10:16-22.
Eshai afɔlei kɛ sɔ̃ afɔlei lɛ akɛhaa yɛ nɔnyɛɛ naa. Klɛŋklɛŋ nɔ̃ lɛ ji ni akɛkpata aha eshai ni tɔmɔ kɛkɛ kɛba ni jeee gbɛ aje afee, yɛ be mli ni eka shi faŋŋ akɛ nɔ ni ji enyɔ lɛ yɛ ni akɛsa Nyɔŋmɔ hiɛ yɛ hegbɛ ko ni áfite lɛ ni aku sɛɛ akɛ nakai hegbɛi lɛ eha efɔŋfeelɔ ni etsake etsui lɛ aloo akɛfee nakai aha lɛ lɛ hewɔ. (3 Mose 4:1-35; 5:1–6:7; 6:24-30; 7:1-7) Ayɔseɔ hu akɛ akaiɔ Israelbii lɛ fe shikome akɛ amɛkaye lá. (3 Mose 3:17; 7:26, 27) Ŋmaa afɔlei ni lá bɛ mli ni akɛyɔseɔ bɔ ni Yehowa ji nibii ahalɔ hu yɛ. (3 Mose 2:1-16; 6:14-23; 7:9, 10) Kristofoi ni yɔɔ ŋmɛnɛ lɛ kɛ miishɛɛ susuɔ nɛkɛ saji nɛɛ fɛɛ he, ejaakɛ afɔlei ni afã ni ashã yɛ Mla kpaŋmɔ lɛ shishi lɛ kɛ nine tsɔɔ Yesu Kristo kɛ efɔleshaa lɛ loo sɛɛnamɔi ni jɛɔ mli baa lɛ nɔ.—Hebribii 8:3-6; 9:9-14; 10:5-10.
No sɛɛ lɛ akɛ mlai ni kɔɔ osɔfoyeli he hu mamɔ shi. Yɛ Nyɔŋmɔ gbɛtsɔɔmɔ naa lɛ, Mose to Aaron akɛ osɔfonukpa, kɛ ebihii ejwɛ lɛ hu akɛ osɔfoi bibii. Kɛkɛ ni osɔfoyeli lɛ bɔi nitsumɔ.—3 Mose 8:1–10:20.
Agbɛnɛ nɔ ni nyiɛ sɛɛ ba ji mlai ni kɔɔ nibii ni he tse kɛ nɔ ni he tseee he. Mlai ni kɔɔ kooloi ni he tse kɛha yeli aloo nɔ ni he tseee he lɛ baa Israelbii lɛ ayi kɛjɛ moawai ni kɛ hela baaba amɛnɔ Iɛ ahe ni agbɛnɛ ewo husu ni ka amɛ kɛ gbɔmɛi krokomɛi ni jɛ maji ni ebɔle amɛ lɛ amli lɛ ateŋ lɛ mli hewalɛ. Mlai krokomɛi kɔɔ gbohii ni baaha amɛfee mɛi ni he tseee he, bɔ ni esa akɛ yei atsuu amɛhe yɛ amɛfɔmɔ sɛɛ, gbɛjianɔtoo kɛha mɛi ni yeɔ kpiti hela, kɛ nuu kɛ yoo he nu ni hoɔ ni haa amɛfeɔ mɛi ni he tseee he. Esa akɛ nɛkɛ mlai nɛɛ ahe susumɔ aha wɔna bɔ ni ehe hiaa akɛ wɔɔhiɛ krɔŋkrɔŋfeemɔ mli akɛ Yehowa jalɔi.—3 Mose 11:1–15:33.
Ashaa eshai ahe afɔlei ni he hiaa fe fɛɛ lɛ yɛ daa afi kpatamɔ gbi lɛ nɔ. Akɛ tsina nuu shaa afɔle ahaa osɔfoi lɛ kɛ mɛi ni eshwɛ yɛ Levi akutso lɛ mli lɛ. Akɛ too kpakpo kome shaa afɔle ahaa Israel akutsei ni jeee osɔfoi lɛ, ni ajajeɔ gbɔmɛi lɛ ahe eshai ashwieɔ too kpakpo kome ni hiɛ ka nɔ ni ayaŋmɛɛɔ ehe yɛ ŋa lɛ nɔ. Abuɔ tooi enyɔ lɛ fɛɛ akɛ eshai ahe afɔlei (16:5) , ni enyɔ lɛ miitsɔɔ okadi kome. No hewɔ lɛ jeee ákɛ akɛ Yesu Kristo sha afɔle kɛkɛ, shi etere mɛi ni egbo afɔleshaa gbele eha amɛ lɛ ahe eshai hu kɛtee.—3 Mose 16:1-34.
Agbɛnɛ mlai ni kɔɔ kooloi ni agbeɔ amɛ ayeɔ kɛ afɔleshaai krokomɛi ahe nyiɛ sɛɛ. Nɔ ni sa kadimɔ waa hu ji ŋwɛi mla ni guɔ lá ni aaaye lɛ. La ni aaatsi he kɛjɛ he lɛ ka he eji tɛ ni afo afɔ shi aha mɛi ni jaa Yehowa yɛ krɔŋkrɔŋ-feemɔ mli lɛ.—3 Mose 17:1-16; Bɔfoi lɛ Asaji 15:28, 29.
Esa akɛ kojomɔ mlai ni nyiɛ sɛɛ ba ni kɔɔ weku lɛ mlibii ni akɛ amɛ naa bɔlɛ, ajwamaŋbɔɔ kɛ nifeemɔi sɔrɔtoi ni ahiɔ, ni wɔŋjamɔ, mumɔi atsɛmɔ, mɔheguɔgbee kɛ ekrokomɛi ni fata he lɛ aha wɔna bɔ ni ehe hiaa akɛ wɔfee krɔŋkrɔŋ yɛ be mli ni wɔjaa Yehowa lɛ. Taakɛ eji lɛ, esa akɛ osɔfoi lɛ ahiɛ amɛhe krɔŋkrɔŋ. Nibii krokomɛi hu ji mlai ni akɛmamɔ shi aha asɔfoi agbalashihilɛ, osɔfoi ni he tseee kɛ krɔŋkrɔŋ nii ni aaaye.—3 Mose 18:1–22:33.
Nɔ ni atsi ta kɛnyiɛ sɛɛ ji daa afi gbii juji etɛ lɛ—Hehoo lɛ yɛ agbiɛnaa be mra mli, Pentekoste yɛ agbiɛnaa be naagbee be mli, kɛ Asesei agbijurɔ loo Naabuamɔ yɛ gbo be mli. Yɛ enɛɛmɛi asɛɛ lɛ mlai yɛ ni kɔɔ Yehowa gbɛi krɔŋkrɔŋ lɛ ni aaabule lɛ lɛ he, kɛ Hejɔɔmɔ gbii ayeli (daa otsi, nyɔŋ kɛ daa afii kpawo) kɛ Nyamɔ Afi, bɔ ni esa ákɛ akɛ Israel ohiafoi kɛ nyɔji aye aha.—3 Mose 23:1–25:55.
Nɔ ni nyiɛ sɛɛ lɛ akɛ jɔɔmɔi ni baajɛ toiboo ni aaafee aha Nyɔŋmɔ lɛ mli aba lɛ toɔ loomɔi ni baaba yɛ toigbele hewɔ lɛ he. Mlai hu ni kɔɔ shiwoo afɔlei ahe kɛ jara ni awoɔ yɛ he kɛ kooloo fɛɛ kooloo kromɔbi kɛ nɔ fɛɛ nɔ mlijaai nyɔŋma mli ekome akɛ “krɔŋkrɔŋ kɛha Yehowa” lɛ hu yɛ. Enɛɛmɛi kɛ “kitai ni Yehowa wo Mose yɛ Sinai Gɔŋ lɛ nɔ ni ekɛyaha Israelbii lɛ” baa naagbee.—3 Mose 26:1–27:34.
Ŋwanejee ko bɛ he akɛ 3 Mose lɛ kanemɔ jogbaŋŋ baaha oyoo bɔ ni emaa jamɔ krɔŋkrɔŋ kɛha Yehowa lɛ nɔ mi. Shi ekolɛ okɛ saji komɛi ni mli wawai baakpe. No hewɔ lɛ, obaanya sanebimɔi kɛ hetooi ni nyiɛ sɛɛ nɛɛ ahe.
AFƆLESHAAI KRƆŊKRƆŊ KƐ OSƆFOI ASƆƆMƆ NITSUMƆ
• 2:11—Mɛni hewɔ Yehowa ekpɛlɛɛɛ wò afɔlei anɔ lɛ?
Eka shi faŋŋ akɛ wò ni atsɔɔ yɛ biɛ lɛ jeee wòbi anɔ̃ shi moŋ aduawai amli nu ko ni ŋɔɔ tamɔ sikle. Kɛ jeee nakai kulɛ akɛfataŋ “klɛŋklɛŋ yibii” lɛ ahe. (3 Mose 2:12; 2 Kronika 31:5) Akɛni aduawai amli wo nɛɛ baanyɛ asha hewɔ lɛ, akpɛlɛɛɛ nɔ akɛ afɔleshaa nii yɛ afɔleshaa latɛ lɛ nɔ.
3:17—Mɛni hewɔ agu fɔ̀ ni aaaye lɛ?
Abu fɔ akɛ fã ko ni hi fe fɛɛ, tamɔ bɔ ni akɛ okadi wiemɔ nɛɛ tsu nii yɛ okadi gbɛ nɔ akɛ “shikpɔŋ lɛ nɔ fɔ lɛ.” (1 Mose 45:18) No hewɔ lɛ fɔ ni agu eyeli lɛ ha Israelbii lɛ yoo akɛ fã ni hi fe fɛɛ lɛ ji Yehowa nɔ̃. Eyɛ mli akɛ Kristofoi bɛ Mla lɛ fã nɛɛ shishi moŋ, shi ebaanyɛ ekai Yehowa webii ni yɔɔ ŋmɛnɛ lɛ akɛ esa akɛ amɛfee nɔ ni hi fe fɛɛ yɛ Yehowa jamɔ mli amɛha lɛ.—Abɛi 3:9, 10; Kolosebii 3:23, 24.
• 10:1, 2—Mɛni yɔɔ esha ni tamɔ nɛkɛ mli?
Beni Nadab kɛ Abihu kɛ hegbɛ ni esaaa amɛ nɛɛ tsuɔ nii lɛ, no mli lɛ eeenyɛ eba akɛ amɛtɔrɔ dãa. Ekolɛ nakai eji, ejaakɛ no sɛɛ nɔŋŋ ni Yehowa gu dãa ni wa ni osɔfoi lɛ aaanu beni amɛsɔmɔɔ yɛ kpeebuu lɛ mli lɛ. Shi yiŋtoo diɛŋtsɛ ni kɛ Nadab kɛ Abihu gbele lɛ ba lɛ jɛ “la kroko . . . nɔ ni [Yehowa] ewoko amɛ he kita.” (3 Mose 10:1-11) Nɔ ni ba nɛɛ tsɔɔ akɛ esa akɛ Yehowa tsuji ni hiɛ gbɛnaanii ŋmɛnɛ lɛ atsu ŋwɛi taomɔ nii ahe nii, ni akɛ amɛnyɛŋ amɛtsu nitsumɔi ni Nyɔŋmɔ kɛha lɛ ahe nii yɛ gbɛ ni ja nɔ kɛ amɛtɔrɔ dãa.
JAMƆ KRƆDKRƆŊ BIƆ HETSEMƆ
• 11:40—Te aaafee tɛŋŋ ni nɛkɛ mla nɛɛ kɛ 5 Mose 14:21 ni kɛɔ akɛ: “Nyɛkayea nɔ ko ni lɛ diɛŋtsɛ egbo” lɛ aaakpa gbee?
Yɛ anɔkwale mli lɛ, naagba ko bɛ nɛkɛ ŋmalɛi nɛɛ amli. 5 Mose 14:21 gu kooloo ni lɛ diɛŋtsɛ egbo aloo ana ni egbo lɛ yeli. Shi 3 Mose 11:40 je gbɛ etsɔɔ nɔ ni esa akɛ afee kɛ Israelnyo ko tɔ̃ yɛ enɛ mli. Nakai nɔŋŋ hu mla lɛ gu nifeemɔi tamɔ juu, shi mɛi komɛi ju. Bɔ ni agbalaa efɔŋfeelɔi atoi lɛ wo nibii ni Mla lɛ egu lɛ mli hewalɛ.
• 12:2, 5—Mɛni hewɔ bi fɔmɔ haa yoo bafeɔ mɔ ni “ehe tseee” lɛ?
Abɔ fɔmɔ nii lɛ ni ekɛ adesa wala ni yeɔ emuu aha. Shi yɛ nɔ ni jɛ esha ni wɔna lɛ mli ba hewɔ lɛ, akɛ emuu ni ayeee kɛ esha shihilɛ fɔ bii ni nyiɛ sɛɛ ba lɛ fɛɛ. Be kuku ni haa yoo feɔ mɔ ni ‘he tseee’ yɛ efɔmɔ, tsuiasɛɛyaa kɛ nui ni hoɔ yɛ ehe hewɔ nɛɛ gbalaa esha shihilɛ ni ana kɛjɛ fɔmɔ mli lɛ kɛbaa jwɛŋmɔ mli. (3 Mose 15:16-24; Lala 51:7; Romabii 5:12) Enɛ ji anɔkwale titri yɛ bifɔmɔ he, ejaakɛ abiɔ esha he afɔleshaa yɛ enɛ he. Nɔ ni yɔɔ miishɛɛ ji akɛ, yɛ ohiafoi ahe ni Yehowa susuɔ hewɔ lɛ akɛɛ amɛkɛ loofɔji aba fe toɔ ni jara wa lɛ. (3 Mose 12:8) Mla ni kɔɔ hetsuumɔ he nɛɛ baaye abua Israelbii lɛ ni amɛhiɛ asɔ bɔ ni ehe hiaa akɛ kpɔmɔ afɔleshaa ko aba ni ebaha eshai ni adesai efee lɛ anɔ ni ekɛ adesa emuuyeli aba ekoŋŋ. Shi kooloi ni amɛkɛ shaa afɔle lɛ nyɛŋ atsu enɛ. No hewɔ lɛ Mla lɛ baanyiɛ amɛhiɛ kɛya Kristo ŋɔɔ ni eye ebua amɛ ni amɛyoo anɔkwale ni eji akɛ efɔleshaa lɛ pɛ baanyɛ ekɛ anɔkwale eshaifaa kɛ adesa ni yɛ naagbee lɛ aaaku sɛɛ akɛ lɛ aba emuuyeli mli ekoŋŋ lɛ aba.—Galatabii 3:24; Hebribii 9:13, 14; 10:3, 4.
ESA AKƐ AHIƐ KRƆŊKRƆŊ-FEEMƆ MLI
• 16:29—Mɛni ji “nyɛwaa nyɛhe yi” lɛ shishii
Eka shi faŋŋ akɛ “Nyɛwaa nyɛhe yi” lɛ miitsɔɔ ŋmaahilɛ yɛ biɛ. Nibii krokomɛi ni atsuɔ yɛ kpatamɔ gbi lɛ nɔ hu ji kooloi afɔlei ni ashaa ahaa Levibii lɛ kɛ maŋ muu lɛ. Yɛ be mli ni osɔfonukpa lɛ ejaje esha ni maŋ lɛ fee yɛ tsutsu afi ni ho lɛ mli lɛ eshwie too kpakpo ni hiɛ ka lɛ nɔ lɛ, akɛ lɛ yaa, etereɔ amɛhe eshai lɛ kɛyaa ŋa lɛ nɔ. Yɛ nɔ ni anyiɛɔ sɛɛ yɛ Kpatamɔ Gbi lɛ nɔ lɛ hewɔ lɛ, ŋmaahilɛ kɔɔ eshai ni akpɛlɛɔ nɔ lɛ he.—3 Mose 16:5-10, 15, 20-22.
• 20:9—Mɛni hewɔ agbeɔ mɔ ni ‘lomɔɔ’ efɔlɔi lɛ?
Mɔ ni lomɔɔ efɔlɔi ni esumɔɔ ni efɔŋ ko aba amɛnɔ lɛ ji mɔ ni nyɛɛɔ mɔ ni ehiɛ gbɔmɔgbee su. Eyɛ mli akɛ ekɛ dade loo tawuu nii ko egbeee amɛ moŋ, shi eshweɔ amɛgbele yɛ etsui mli. Akɛni mumɔ ni naa wa nɛkɛ lɛ ji gbɔmɔgbee yɛ Yehowa hiɛ hewɔ lɛ Mla lɛ tsɔɔ akɛ bɔ ni afeɔ gbɔmɔgbelɔi lɛ nakai afee mɔ ni lomɔɔ efɔlɔi. Esa akɛ enɛ atsirɛ Kristofonyo ni ejie suɔmɔ kpo etsɔɔ enanemɛi heyelilɔi shi jeee nyɛɛ.—1 Yohane 3:14, 15.
• 25:35-37—Ani be fɛɛ mli ejaaa akɛ aheɔ hekpa kɛjɛɔ nyɛmi dɛŋ?
Kɛ nyɛmi ko kɛ shika fa nyɛmi kroko koni ekɛtsu nii lɛ, mɔ ni kɛ eshika lɛ ha lɛ baasumɔ ni ena eshika lɛ he sɛɛ no hewɔ lɛ ebaahe hekpa. Mɔ ni yafa shika lɛ kɛmiitsu nii koni shika lɛ afɔ aha lɛ, ni mɔ ni kɛ shika lɛ ha lɛ lɛ yɛ hegbɛ akɛ enaa sɛɛnamɔ ni jɛɔ mli baa lɛ eko kɛtsɔ hekpa ni sa ni eeehe nɔ. (Okɛto Mateo 25:27 he.) Shi Mla lɛ gu hekpa ni aaahe yɛ shika ni akɛha ohiafo koni ajie lɛ kɛjɛ fimɔ mli lɛ. Abaakpa gbɛ akɛ mɔ ni kɛ shika lɛ fa lɛ nine baashɛ eshika ni ekɛfa lɛ nɔ, shi asusuɔ akɛ ejaaa akɛ aaana he sɛɛ ko kɛjɛ ohiafo fimɔ mli.—2 Mose 22:25.
• 26:26—Mɛni ji ‘yei nyɔŋma aaasha aboloo yɛ flɔnɔɔ kome mli’ lɛ shishi?
Nɔ ni afɔɔ feemɔ ji, yoo fɛɛ yoo shaa enibii yɛ eflɔnɔɔ kome mli. Shi nɛkɛ wiemɔi nɛɛ tsɔɔ bɔ ni niyenii baajara akɛ flɔnɔɔ kome baafee nɔ ni fa kɛha nibii fɛɛ ni yei nyɔŋma aaashã lɛ. Enɛ ji nɔ ni jɛɔ Yehowa ni ‘aaaje ehe tsɛi’ loo aaate shi awo lɛ ni ahiɛɛɛ krɔŋkrɔŋ-feemɔ yɛ esɔɔmɔ mli lɛ mli aba lɛ ateŋ ekome.—3 Mose 26:23-25.
BƆ Nl 3 MOSE BAANYƐ ANA WƆ-SƆƆMƆ NƆ HEWALƐ AHA
Ŋmɛnɛŋmɛnɛ beaŋ Yehowa odasefoi bɛ Mla lɛ shishi. (Galatabii • 3:23-25) Shi akɛni nɔ ni awie yɛ 3 Mose lɛ haa wɔnaa bɔ ni Yehowa susuɔ saji komɛi ahe ehaa hewɔ lɛ, ebaanyɛ esa wɔ sɔɔmɔ lɛ he. Kadimɔ gbɛi fioo ni enɛɛmɛi efee anɔkwale yɛ mli lɛ.
Yehowa, Je Muu Fɛɛ Nuŋtsɔ lɛ sa jamɔ krɔŋkrɔŋ. Eŋmɛɛɛ bienyɛyeli ko gbɛ, eyɛ krɔŋkrɔŋ ni ebiɔ krɔŋkrɔŋ-feemɔ yɛ mɛi ni kɛ sɔɔmɔ krɔŋkrɔŋ haa lɛ lɛ adɛŋ. (3 Mose 11:45; 19:2) Tɛ ni afo afɔ shi nɛɛ hu kɔɔ Kristofoi ajamɔ he, taakɛ bɔfo Petro fee lɛ faŋŋ yɛ be mli ni eŋma akɛ: “Nyɛfea nyɛhe tamɔ bii toibolɔi, ni nyɛkaba nyɛjeŋ yɛ sa beni nyɛleee nɔ ko lɛ mli akɔnɔi lɛ anaa dɔŋŋ; shi moŋ, bɔ ni mɔ ni tsɛ nyɛ lɛ yɔɔ krɔŋkrɔŋ lɛ, nyɛ hu nyɛfea krɔŋkrɔŋ yɛ nyɛjeŋba fɛɛ mli; ejaakɛ aŋma akɛ: ‘Nyɛfea krɔŋkrɔŋ, ejaakɛ krɔŋkrɔŋ ji mi.’”—1 Petro 1:14-16.
Esa akɛ aha Yahowa gbɛi lɛ afee krɔŋkrɔŋ. Yehowa Odasefoi nyɛŋ amɛkɛ ahorabɔɔ aba Nyɔŋmɔ gbɛi lɛ nɔ, taakɛ bɔ ni afa Israelbii ni hi shi yɛ blema lɛ akɛ amɛkwɛ enɛ jogbaŋŋ lɛ. (3 Mose 22:32; 24:10-16, 23) Ákɛ mɛi ni atu wɔ ama afa, aloo atsuu wɔ he aha Yehowa sɔɔmɔ krɔŋkrɔŋ lɛ, esa akɛ wɔjie egbɛi lɛ yi ni wɔsɔle ni ehe atse yɛ gbɛ ni ja nɔ.—Lala 7:18; Mateo 6:9.
Yehowa biɔ ni wɔwuuu wɔshi esha. Jeee kpatamɔ afɔle kɛkɛ eshaifaa biɔ, shi moŋ esha ni afee lɛ jajemɔ, tsuitsakemɔ kɛ efɔŋ ni afee lɛ saamɔ bɔ ni aaanyɛ. Ni kɛji akɛ wɔle akɛ asafo lɛ mlinyo ko ofee esha ni hiɛdɔɔ yɔɔ mli shi ewieŋ lɛ, esa akɛ wɔha onukpai ni ahala amɛ lɛ ale. (Okɛto 3 Mose 4:2; 5:1, 5, 6 he.) Shi eshai komɛi yɛ ni eshaifaa bɛ he. (3 Mose 20:2, 10; Hebribii 6:4-6; 10:26-29) Shi kɛji akɛ wɔwuu wɔshi esha, ni wɔbɔ mɔdɛŋ wɔfee nibii yɛ wɔ-ŋwɛi Tsɛ lɛ gbɛ nɔ yɛ be fɛɛ mli, ni wɔkɛ wɔhe ha Yesu Kristo kpɔmɔ afɔleshaa lɛ, wɔbaana shidaamɔ kpakpa yɛ Yehowa, Nyɔŋmɔ krɔŋkrɔŋ lɛ hiɛ.—1 Yohane 2:1, 2.
Belɛ eka shi faŋŋ akɛ, ákɛ Yehowa Odasefoi Kristofoi lɛ, esa akɛ 3 Mose ana hewalɛ yɛ wɔjamɔ nɔ. Esa akɛ enyɛ wɔ nɔ ni wɔyoo anɔkwale ni eji akɛ wɔ Nyɔŋmɔ lɛ biɔ krɔŋkrɔŋfeemɔ kɛjɛɔ etsuji adɛŋ lɛ. No hewɔ lɛ esa akɛ wɔha egbɛi lɛ afee krɔŋkrɔŋ ni wɔwuu wɔshi esha yɛ be fɛɛ mli. Agbɛnɛ esa akɛ Biblia mli wolo nɛɛ atsirɛ wɔ ni wɔkɛ nɔ ni hi fe fɛɛ ni jɛ wɔŋɔɔ aha Ŋwɛi Flooflonyo lɛ, ni wɔhiɛ krɔŋkrɔŋ-feemɔ kɛ hetsemɔ mli daa yɛ sɔɔmɔ krɔŋkrɔŋ mli, kɛha Yehowa, wɔ Nyɔŋmɔ krɔŋkrɔŋ lɛ yijiemɔ.
[Akrabatsa ni yɔɔ baafa 11]
“Krɔŋkrɔŋ, krɔŋkrɔŋ, krɔŋkrɔŋ ji Nuŋtsɔ Yehowa Nyɔŋmɔ Ofe lɛ, mɔ ni yɛ lɛ kɛ mɔ ni yɔɔ lɛ kɛ mɔ ni baaba lɛ. Ni onukpai nyɔŋmai enyɔ kɛ ejwɛ lɛ hoɔ gbeɔ shi yɛ mɔ ni ta maŋtsɛsɛi lɛ nɔ lɛ hiɛ, ni amɛjaa mɔ ni hiɛ ka kɛjɛ naanɔ kɛyaa naanɔ lɛ, ni amɛtsɛrɛɔ amɛkekrei lɛ amɛshwieɔ maŋtsɛsɛi lɛ hiɛ amɛkɛɔ akɛ: Nuŋtsɔ Yehowa, bo ji mɔ ni sa akɛ oŋɔ anunyam kɛ agbojee kɛ hewalɛ lɛ, ejaakɛ bo obɔ nii fɛɛ, ni osuɔmɔ naa amɛyɔɔ ni abɔ amɛ.”—Kpojiemɔ 4:8-11.
[Mfonirii ni yɔɔ baafa 9]
Afɔlei ni asha yɛ Mla lɛ shishi lɛ damɔ shi kɛha Yesu Kristo afɔleshaa gbele lɛ kɛ sɛɛnamɔi mli jɛɔ mli baa lɛ