Okɛ Bulɛ Aha Yehowa, Eji Hewalɛ ni 4 Mose Woɔ
YEHOWA NYƆŊMƆ sa bulɛ ni ejalɔi aaajɛ amɛtsui mli fɛɛ amɛkɛaaha lɛ lɛ. Esa akɛ amɛbo lɛ toi ni amɛkɛ etsuji ni ehala amɛ lɛ afee ekome yɛ anɔkwale mli. Kwɛ bɔ ni áma enɛ nɔ mi jogbaŋŋ áha yɛ Biblia mli wolo ni ji 4 Mose lɛ mli.
Nɛkɛ wolo nɛɛ damɔ Israelbii lɛ akanemɔ shii enyɔ taakɛ aŋma yɛ yitso 1 kɛyashi 4 kɛ 26 lɛ nɔ. Mose ji mɔ ni ŋma 4 Mose yɛ Moab ŋa lɛ nɔ, yɛ 1473 D.Ŋ.B., ni titri lɛ ehe afii 38 kɛ nyɔji 9, kɛyashi 1512 D.Ŋ.B.—4 Mose 1:1; 5 Mose 1:3.
Ajara 4 Mose lɛ mli saji lɛ amli etɛ, ni nomɛi ji nibii ni ba yɛ Sinai Gɔŋ lɛ he (1:1–10:10) , sɛɛ mli lɛ yɛ ŋa lɛ nɔ (10:11–21:35) kɛ agbɛnɛ yɛ Moab ŋa lɛ nɔ (22:1–36:13) . Shi mɛni ji nɔ ni nɛkɛ nibii ni ba nɛɛ baanyɛ atsɔɔ wɔ? Ani shishitoo mlai komɛi yɛ 4 Mose ni ehe aaaba sɛɛnamɔ aha Yehowa Odasefoi ŋmɛnɛ?
Emli Saji Haa Bulɛ Kɛha Nyɔŋmɔ Yaa Hiɛ
lsraelbii lɛ ehi Sinai Gɔŋ lɛ shishi aaafee afi yɛ be mli ni Yehowa fa Mose akɛ ekane amɛ lɛ. Ekane amɛ ni aŋma hii ni amɛye afii 20 kɛyaa lɛ fɛɛ agbɛi, ni amɛyibɔ ji 603,550, ja Levibii lɛ pɛ. Nyɔŋmɔ ŋɔ Levibii lɛ kɛha sɔɔmɔ yɛ kpeebuu lɛ mli ekɛto kromɔbii lɛ anajiaŋ. Atsɔɔ amɛ bɔ ni amɛbaanyiɛ yɛ amɛgbɛfaa lɛ mli amɛha, ni Yuda ni ji akutso ni amɛyi fa pii lɛ baanyiɛ hiɛ. Akane Levibii lɛ yɛ Nyɔŋmɔ famɔ naa ni aŋma amɛgbɛi ni atu sɔɔmɔ ni yɔɔ krɔŋkrɔŋ awo amɛdɛŋ.—4 Mose 1:1–4:19.
Yehowa kɛ famɔ ni kɔɔ mɛi ni yeɔ helai komɛi ni esa akɛ ajie amɛ kɛya ŋsra lɛ sɛɛ lɛ ha, ni nɔ ni nyiɛ sɛɛ ji mlai ni kɔɔ awuŋayeli he tamɔ ŋa ni esa akɛ eye anɔkwale kɛ Naziribii ashiwoo sɔrɔtoi ahe. Agbɛnɛ akɛ sɔɔmɔ yɛ kpeebuu lɛ mli lɛ he nibii komɛi ha. Beni ama kpeebuu lɛ agbo naa ni agbele afɔleshaa latɛ lɛ naa lɛ, wekui amli lumɛi lɛ kɛ shaa afɔlei ni jara wawai ha. Mose ha afee kanetso taakɛ ena yɛ ninaa ni Yehowa kɛha lɛ mli lɛ pɛpɛɛpɛ. Kɛ asũ amɛ kanei lɛ ni atsuu Levibii lɛ ahe lɛ, kɛkɛ lɛ amɛbaanyɛ amɛje sɔɔmɔ shishi.—4 Mose 5:1–8:26.
Ati famɔi ni akɛha yɛ Hehoo lɛ he lɛ mli ekoŋŋ. Ŋsra lɛ fãa ni atoɔ shi kɛtsɔɔ naakpɛɛ atatu ko ni bahaa kpeebuu Iɛ nɔ lɛ nɔ. Mɛi lɛ toɔ shi ni efãa “yɛ Yehowa famɔ naa.” Bɔni afee ni asafo muu lɛ fɛɛ akpe ni agbɛnɛ kɛha yiŋtooi krokomɛi lɛ, ayɛ jwiɛtɛi tɛtrɛmantrɛi enyɔ ni akɛtsuɔ nii.—4 Mose 9:1–10:10.
Beni amɛshi Mizraim lɛ sɛɛ aaafee afii enyɔ, yɛ nyɔŋ ni ji enyɔ lɛ nɔ yɛ gbi ni ji gbi 20 lɛ nɔ lɛ, atatu ni ha kpeebuu lɛ yiteŋ lɛ fã ni Israel bɔi nyiɛmɔ. Abɔ huhuuhu wiemɔi ni esaaa he amaniɛ. Enɛɛmɛi ateŋ ekome ji loo ni afo abi, shi fufeemɔ jie ehe kpo beni Yehowa kɛ trakɔkɔi lɛ ha lɛ. Miriam kɛ Aaron wie shi amɛnyɛmi Mose ni akɛ kpiti hela gbala Miriam toi yɛ he kuku ko mli. Kwɛ bɔ ni esa akɛ enɛ atsirɛ wɔ ni wɔkɛ bulɛ aha hegbɛ ni jɛ Nyɔŋmɔ lɛ.—4 Mose 10:11–12:16.
Sralɔi nyɔŋma kɛ enyɔ ni atsu amɛ kɛtee Shiwoo Shikpɔŋ lɛ nɔ kɛ aduawai kpakpai ni ŋɔɔ ba yɛ no sɛɛ gbii 40. Shi sralɔi nyɔŋma bawie akɛ shikpɔŋ lɛ nɔ gbɔmɛi dara ni amɛhiɔ maji ni atswa gbogboi wuji awo he amli ni enɛ je Israelbii lɛ anijiaŋ wui ni amɛyasumɔ ni amɛku amɛsɛɛ amɛya Mizraim. Yoshua kɛ Kaleb, sralɔi anɔkwafoi lɛ wo amɛ hewalɛ ni amɛna Yehowa mli hemɔkɛyeli. Beni gbɔmɛi lɛ wie akɛ amɛbaatswia Mose, Yoshua kɛ Kaleb tɛi lɛ, Nyɔŋmɔ kɛɛ akɛ ebaatswia maŋ muu lɛ fɛɛ nii ni eshwie amɛ kɛjɛ ehiɛ. Shi Mose kpa fai ni Yehowa fa akɛ gbɔmɛi lɛ baatsomlo yɛ ŋa lɛ nɔ afii 40, kɛyashi be mli ni mɛi ni amɛye kɛjɛ 20 kɛyaa kɛ mɛi ni amɛdara fe nakai lɛ fɛɛ aaagboi. Ja Yoshua kɛ Kaleb kɛ Levi akutso lɛ pɛ. No sɛɛ lɛ Israelbii lɛ bɔ mɔdɛŋ ni amɛye Shiwoo Shikpɔŋ lɛ nɔ, shi aye amɛnɔ kunim yɛ gbɛ ni yɔɔ mɔbɔ nɔ.—4 Mose 13:1–14:45.
No sɛɛ lɛ akɛ mlai sɔrɔtoi ni kɔɔ afɔleshaai, Hejɔɔmɔ gbi yeli kɛ atade naamui ahe ha. Kɛkɛ ni Kora, Datan, Abiram, On kɛ lumɛi 250 wie shi Mose kɛ Aaron. Mɛni jɛ nɛkɛ bulɛ ni bɛ kwraa nɛɛ mli ba? Yehowa kɛ la kpata Kora kɛ lumɛi 250 lɛ ahiɛ, yɛ be mli ni atuatselɔi krokomɛi lɛ ahiɛ kpata beni shikpɔŋ lɛ gbele edaaŋ ni emi amɛ kɛ amɛwekui kɛ nibii fɛɛ ni amɛyɔɔ lɛ. Yɛ gbi ni nyiɛ sɛɛ lɛ nɔ nɔŋŋ lɛ, Israelbii lɛ wie huhuuhu amɛshi Mose kɛ Aaron, no hewɔ lɛ yɛ bulɛ ni bɛ nɛɛ hewɔ lɛ, tsɛŋemɔ hela ko gbe amɛteŋ mɛi 14,700. Bɔni afee ni eha huhuuhu wiemɔi lɛ aba naagbee, ni tsɔɔ akɛ ehala Aaron ni jɛ Levi akutso lɛ mli lɛ, Nyɔŋmɔ ha Aaron tso lɛ gba afoforo. Nɔ ni nyiɛ enɛ sɛɛ ji mlai ni kɔɔ Levibii anitsumɔi ahe kɛ amɛ hetsuumɔ kɛmiijɛ hebulemɔ he.—4 Mose 15:1–19:22.
Beni amɛyashɛ Kadesh lɛ, amɛbolɔ akɛ amɛmiitao nu. Akɛni Mose wooo Yehowa hiɛ nyam yɛ naakpɛɛ gbɛ ni etsɔ nɔ ekɛ nu lɛ ha hewɔ lɛ, Yehowa kɛɛ amɛ akɛ amɛboteŋ Shiwoo Shikpɔŋ lɛ nɔ. Beni amɛshi Kadesh lɛ, gbɔmɛi lɛ yashɛ Hor Gɔŋ lɛ he, he ni Aaron gbo yɛ, ni awo ebinuu Eleazar osɔfo nukpa yɛ esɛɛ. So sɛɛ lɛ Israelbii lɛ ye Arad maŋtsɛ lɛ nɔ kunim. So sɛɛ lɛ amɛwie amɛshi Nyɔŋmɔ kɛ Mose, ni nɛkɛ be nɛɛ mli lɛ Yehowa tsu onufui ni ebɔɔ yɔɔ amɛnaa kɛba amɛteŋ akɛ toigbalamɔ. Mɛi ni onufui nɛɛ kɔmɔ amɛ lɛ ayi ná wala kɛtsɔ akɔɔble onufu ni Nyɔŋmɔ ha Mose fee ni ekɛtsotsoro tso nɔ yɛ amɛteŋ lɛ nɔ. No sɛɛ lɛ Israelbii lɛ ye Amorbii amaŋtsɛ Sihon kɛ Bashan maŋtsɛ Og nɔ kunim ni amɛhe amɛshikpɔji lɛ.—4 Mose 20:1–21:35.
No sɛɛ lɛ agba nibii ni tee nɔ yɛ Moab ŋa lɛ nɔ lɛ. No sɛɛ lɛ Moab Maŋtsɛ Balak bɔ Bileam apaa koni elomɔ Israel. Shi ejɔɔ amɛ moŋ shii etɛ. Bileam nɔ atsɔ ni aha yei ni jaa Baal lɛ nyiɛ Israelbii ahiɛ kɛtee ajwamaŋbɔɔ kɛ wɔŋjamɔ mli. Akpata 24,000 hiɛ dani Pinehas ha haomɔ lɛ ba naagbee kɛtsɔ Israel nuu ajwamaŋbɔlɔ ko ni kɛ Media yoo ko naa bɔlɛ lɛ ni egbe amɛ lɛ nɔ.—4 Mose 22:1–25:18; 31:15, 16.
Beni aku sɛɛ akane gbɔmɛi lɛ ekoŋŋ lɛ, atsɔɔ bɔ ni esa akɛ biyei ana amɛgboshinii, Mose na Shiwoo Shikpɔŋ lɛ ni ehala Yoshua akɛ esɛɛyelɔ. Akɛ daa gbi, daa otsi, daa nyɔŋ nɔ kɛ daa afi afɔleshaai sɔrɔtoi kɛ shiwooi ahe famɔi ha. Atɔ Medianbii lɛ anɔ owele yɛ gbɛfaŋnɔ ni amɛna ni amɛha Israelbii lɛ fee esha amɛshi Nyɔŋmɔ lɛ hewɔ.—4 Mose 26:1–31:54.
Aha Rubean, Gad kɛ Manase akutsei lɛ shikpɔŋ yɛ Yordan bokagbɛ, shi ja amɛye amɛbua ni aye shikpɔŋ ni ka faa lɛ anaigbɛ lɛ nɔ kunim da. No sɛɛ lɛ, akɛ hei ni Israel to shi yɛ, yɛ be mli ni amɛjɛ Mizraim amɛyaa Moab ŋa lɛ nɔ lɛ agbɛi ha. No sɛɛ lɛ Israelbii lɛ anine shɛ famɔi ni kɔɔ amɛshihilɛ yɛ Shiwoo Shikpɔŋ lɛ nɔ lɛ nɔ. Ekomɛi ji akɛ esa akɛ amɛkpata apasa jamɔ he nibii fɛɛ hiɛ ni amɛshwie gbɔmɛi lɛ kɛjɛ shikpɔŋ lɛ nɔ. No sɛɛ lɛ atsɔɔ shikpɔŋ lɛ husui, ni ahala lumɛi ni amɛye amɛbua Yoshua kɛ Eleazar ni amɛja shikpɔŋ lɛ, ni ahala maŋtiasei 48 aha Levibii lɛ. Ahala maŋtiasei ekpaa akɛ abobaa maji kɛ famɔi ni kɔɔ gbɛ ni esa akɛ atsɔ nɔ aye, mɔ ni jeee gbɛ eje egbe gbɔmɔ lɛ kɛ gbɔmɔgbee he saji. Yɛ naagbee lɛ, akɛ mlai ni kɔɔ niyelɔi agbalashihilɛ he ha.—4 Mose 32:1- 36:13.
Yɛ be mli ni okaneɔ 4 Mose lɛ, ekolɛ bɔ ni emaa bulɛ ni esa akɛ ajie lɛ kpo atsɔɔ Yehowa kɛ mɛi ni ehala amɛ ni ekɛ nitsumɔ ewo amɛdɛŋ yɛ ewebii ateŋ lɛ baafee bo fɛo. Shi obaasusu saji komɛi ahe. No hewɔ lɛ, obaanya sanebimɔi nɛɛ kɛ hetooi ni nyiɛ sɛɛ lɛ ahe.
Saji Ni Ba Yɛ Sinai Gɔŋ Lɛ He
• 5:11-31—Mɛni diɛŋtsɛ baa ŋa ni eye gbalafitemɔ he fɔ lɛ nɔ?
Nu ni anuɔ nɛɛ kɛ piŋmɔ ko baaa. Anuɔ yɛ Yehowa hiɛ, ejaakɛ lɛ ji mɔ ni le kɛji akɛ yoo lɛ efite gbala. Kɛji akɛ eyeɔ fɔ lɛ, nu lɛ baaha emusu afuu, ni eshwuɔ baasha. Eka shi faŋŋ ákɛ akɛ shuɔ lɛ tsu nii yɛ okadi gbɛ nɔ akɛdamɔ shi aha fɔmɔ nii. (Okɛto 1 Mose 46:26 he.) ‘Shuɔ ni aaashara’ lɛ tsɔɔ akɛ nɛkɛ fɔmɔ nii nɛɛ baasuu afee bibioo, ni ehaŋ yoo lɛ anɔ hɔ. Enɛ kɛ anɔkwale ni eji akɛ kɛji akɛ yoo lɛ yeee fɔ lɛ eeeŋɔ hɔ ekoŋŋ lɛ kpaa gbee.
• 8:25, 26—Ani shishitoo mla ni kɔɔ Levibii ni daraa yɛ afii amli ni kpaa nitsumɔ he lɛ kɔɔ Yehowa webii ahe ŋmɛnɛ.’
Levi akutsei etɛ lɛ mli hii fɛɛ yeɔ buaa osɔfoi lɛ. Be shɛɔ ni Levibii Iɛ ayi faa tsɔ fe sɔɔmɔ hegbɛi ni yɔɔ sɔlemɔwe lɛ. Ŋwanejee ko bɛ he akɛ yɛ enɛ he susumɔ kɛha afii ni amɛyeɔ hu ni amɛyi akafa tsɔ yɛ sɔɔmɔ lɛ mli hewɔ lɛ, Yehowa fa ni Levi hii lɛ ateŋ mɛi ni ámɛna afii 50 lɛ afɔɔ nitsumɔ, eyɛ mli akɛ amɛbaanyɛ amɛjɛ amɛsuɔmɔ mli amɛye amɛbua. Shi, enɛ kɛ mla ko ni tamɔ nakai haaa mumɔŋ Israelbii kɛ amɛhefatalɔi lɛ, ejaakɛ amɛbɛ Mla lɛ shishi. (Romabii 6:14; Efesobii 2:11-16) Kɛji akɛ gbɔlɛ haaa Kristofonyo ko atsu nitsumɔi pɔtɛɛ komɛi lɛ, abaanyɛ aha lɛ sɔɔmɔ nitsumɔ kroko ni ebaanyɛ etsu. Kɛha Yehowa Odasefoi lɛ, nitsumɔ kpamɔ kɛmiijɛ Maŋtsɛyeli lɛ he sanekpakpa shiɛmɔ mli bɛ.
Bɔ Ni Amɛtsomlo Kɛjɛ He Kome Kɛtee He Krokro
• 12:1—Mɛni hewɔ Miriam kɛ Aaron wie shi Mose yɛ eŋa Kushnyo lɛ hewɔ?
Enɛ jeee ni amɛmiite shi amɛwo Mose ŋa lɛ. Jwɛŋmɔ ni yɔɔ sɛɛ ji bɔ ni amɛsumɔɔ ni amɛná hewalɛ babaoo, titri lɛ Miriam. Mose ŋa, Zipora, fa gbɛ shi eku sɛɛ ebafata ehe, ni Miriam miishe gbeyei akɛ ebanan gbɛi akɛ yei lɛ ateŋ mɔ titri yɛ nsra lɛŋ. (2 Mose 18:1-5) No hewɔ lɛ enyɛ eha Aaron bafata ehe ni amɛwie amɛshi Mose akɛ ekɛ Kushnyo eyahi shi, ni amɛbi gbɛhe krɛdɛɛ ni eyɔɔ yɛ Nyɔŋmɔ hiɛ lɛ he sane. Yɛ enɛ hewɔ lɛ, Yehowa kɛ haomɔ ba Miriam kɛ Aaron nɔ, shi yɛ anɔkwale ni eji akɛ kpiti shwie Miriam lɛ tsɔɔ akɛ lɛ ji mɔ ni je sane lɛ shishi. Aaron su kpakpa lɛ je kpo beni ejaje etɔmɔi ni ekpa fai eha Miriam ni kpiti eshwie lɛ lɛ. (4 Mose 12:10-13) Yɛ Zipora gbɛfaŋ lɛ, lɛ lɛ eji Reuel, Midianyo lɛ biyoo. (1 Mose 25:1, 2; 4 Mose 10:29) Akɛ “Midian shikpɔŋ” lɛ toɔ Kushan ni eka shi faŋŋ akɛ eji gbɛi kroko kɛha Midian aloo ekolɛ maŋ ni bɛŋkɛ amɛ lɛ he yɛ Habakuk 3:7. Agbɛnɛ hu Arabia wekui komɛi yɛ ni atsɛɔ amɛ Kusi loo Kushim. No hewɔ lɛ etamɔ nɔ ni “Kushnyo” jeee gbɛi ni akɛtsɛɔ Ham seshibii kɛtsɔ Kush nɔ lɛ pɛ, shi moŋ, ekɔɔ mɛi ni hi Midian lɛ ahe. No hewɔ lɛ, abaanyɛ atsɛ Zipora akɛ Kushnyo.
21:14, 15—Mɛni ji “Yehowa tai awolo” lɛ?
Ŋwanejee ko bɛ he akɛ, eji Yehowa webii atai ahe yinɔsane wolo ni anyɛɔ akɛ he fɔɔ nɔ. Ebaanyɛ eje shishi kɛjɛ be mli ni Abraham ye omanye yɛ ta ni ewu eshi maŋtsɛmɛi ejwɛ ni baŋɔ Lot kɛ eweku lɛ kɛtee lɛ anɔ lɛ. (1 Mose 14:1-16) Ŋmalɛi lɛ wieɔ niŋmaai sɔrɔtoi ni jɛɛɛ mumɔŋ ahe, ni ekomɛi yɛ ni Biblia mli niŋmalɔi ni mumɔ tsirɛ amɛ lɛ kɛtsu nii akɛ amɛniŋmaai lɛ ajɛɛhe.—Yoshua 10:12, 13; 1 Maŋtsɛmɛi 11:41; 14:19, 29.
Yɛ Moab Ŋa Lɛ Nɔ
• 22:20-22—Akɛni Yehowa kɛɛ Bileam akɛ ekɛ Balak hii lɛ aya hewɔ lɛ, mɛni hewɔ emli fu beni gbalɔ lɛ kɛ amɛ tee lɛ?
Yehowa kɛɛ Bileam akɛ enyɛŋ elomɔ Israelbii lɛ, shi gbalɔ hiɛjoolɔ lɛ tee kɛ yiŋtoo akɛ ebaafee nakai koni Moab Maŋtsɛ Balak awo lɛ nyɔmɔ. (2 Petro 2:15, 16; Yuda 11) Yɛ yiŋtoo nɛɛ hewɔ lɛ Nyɔŋmɔ mlifu te shi wo Bileam. Shi, Yehowa ekpɛlɛɛɛ Israel ni elomɔɔ amɛ lɛ nɔ. Shi Bileam, ni tamɔ Kain lɛ ji mɔ ni yi wa yɛ Nyɔŋmɔ suɔmɔnaa nifeemɔ ni abuuu mli. (1 Mose 4:6-8) Yɛ be mli ni Yehowa tsake loomɔ lɛ efee lɛ jɔɔmɔ lɛ, Bileam hiɛjoomɔ lɛ kanya lɛ koni ewo Balak ŋaa ni ekɛ Moab kɛ Midian yei alaka Israelbii lɛ ni amɛkɛ amɛhe awo Baal jamɔ mli. (5 Mose 23:5; 4 Mose 31:15, 16; Kpojiemɔ 2:14) Enɛ kɛ Nyɔŋmɔ mlifu ba Israel nɔ ni nɔ ni jɛ mli ba ji 24,000 ni gboi. Yɛ sɛɛ mli lɛ, hiɛjoolɔ Bileam gbo yɛ mɛi ni etaoɔ elomɔ amɛ lɛ adɛŋ. (4 Mose 25:1-9; 31:8) Mɛɛ kɔkɔbɔɔ ni akɛteɔ shi awoɔ hiɛjoomɔ nɛ!
• 25:10-13—Yɛ mɛɛ gbɛ nɔ aha shiwoo ni kɔɔ osɔfoyeli he nɛɛ ba mli?
Etamɔ nɔ ni osɔfonukpayeli lɛ tee nɔ yɛ Pinehas weku lɛ mli kɛyashi Osɔfonukpa Eli ni ji Itamar seshinyo lɛ nɔ. Nɛkɛ tsakemɔ nɛɛ ba ekolɛ yɛ mɔ ko ni bafee mɔ ni esaaa yɛ Pinehas weku lɛ mli lɛ hewɔ. Shi Maŋtsɛ Salomo kɛ Osɔfonukpa Zadok ni jɛ Pinehas weku lɛ mli lɛ ye Abiatar ni jɛ Itamar weku lɛ mli lɛ najiaŋ. (1 Maŋtsɛmɛi 1:1-14; 2:26, 27, 35) Taakɛ yinɔsane ni aŋma afɔ shi lɛ tsɔɔ lɛ, eka shi faŋŋ akɛ osɔfonukpayeli lɛ tee nɔ afii babaoo yɛ Pinehas weku lɛ mli.
• 30:6-8—Ani Kristofonyo yoo ko wu baanyɛ afo yoo lɛ shiwooi amli?
Dabi, ejaakɛ Yesu Kristo sɛɛnyiɛlɔi lɛ bɛ Mla lɛ shishi. Yehowa kɛ gbɔmɛi miiye akɛ aŋkroaŋkroi agbɛnɛ yɛ shiwooi ahe, ni wu ko ni ji Kristofonyo bɛ hegbɛ akɛ efoɔ shiwooi amli aloo akɛ etsiɔ naa. Shi kɛlɛ, esaaa akɛ Kristofonyo ko ni ji ŋa kɛ ehe woɔ shiwoo ko ni teɔ shi woɔ Nyɔŋmɔ Wiemɔ lɛ loo e-Ŋmalɛ naa nitsumɔi ni esa akɛ etsu eha ewu lɛ mli.—Jajelɔ 5:2-6.
Ehe Yɛ Sɛɛnamɔ Babaoo Kɛha Wɔ
4 Mose wolo lɛ kɛ tsakpaa ko ni kɛ mɔ yaa be mli ni aaato Nyɔŋmɔ Maŋtsɛyeli lɛ ama shi lɛ mli haa wɔ. Ekɛ nine tsɔɔ Yesu Kristo nɔ. Akɛ nɔkwɛmɔ nɔ lɛ, kooloi afɔlei lɛ kɛ tsina yoo ni akɛ lɛ shaa afɔle lɛ lamlu lɛ tsɔɔ gbɛjianɔtoo kɛha hetsuumɔ kɛtsɔ Yesu afɔleshaa lɛ nɔ. (4 Mose 19:2-9; Hebribii 9:13, 14) Sane ni kɔɔ akɔɔble onufu lɛ hu he lɛ fee gbɛjianɔ kpele ni Yehowa baato kɛha naanɔ wala kɛtsɔ Kristo nɔ lɛ he mfoniri.—4 Mose 21:8, 9; Yohane 3:14, 15.
4 Mose wolo lɛ baanyɛ aye abua wɔ ni wɔkwa wɔŋjamɔ kɛ ajwamaŋbɔɔ. Ehɛleɔ wɔ shi yɛ osharai ni yɔɔ huhuuhu wiemɔi ni awieɔ ashiɔ Nyɔŋmɔ kɛ mɛi ni ohala amɛ kɛ ogbɛjianɔtoo lɛ he. Eka shi faŋŋ akɛ esa akɛ nɛkɛ sane ni kanyaa mɔ nɛɛ atsirɛ wɔ ni wɔjie bulɛ ni mli kwɔ fe fɛɛ kpo wɔtsɔɔ wɔ Nyɔŋmɔ ni yɔɔ suɔmɔ lɛ ni ji Yehowa.
[Mfoniri ni yɔɔ baafa 22]
Te esa akɛ Miriam toigbalamɔ lɛ aná bɔ ni wɔsusuɔ hegbɛ ni Nyɔŋmɔ kɛha Iɛ he Iɛ nɔ hewalɛ eha tɛŋŋ?