Saji Ni Atsɛ Yisɛɛ Yɛ Wɔshiɛmɔ Kɛ Wɔshihilɛ Kpee Nifeemɔ Wolo Lɛ Mli
JULY 5-11
NYƆŊMƆ WIEMƆ LƐ MLI JWETRII | 5 MOSE 11-12
“Bɔ Ni Yehowa Sumɔɔ Ni Ajá Lɛ Ahã”
it-2 1007 kk. 4
Susuma
Mɔ Susuma Muu Fɛɛ Ni Ekɛaasɔmɔ. Wiemɔ ni ji “susuma” lɛ, damɔ shi kɛhã gbɔmɔ muu lɛ fɛɛ. Kɛ̃lɛ, ŋmalɛi komɛi woɔ wɔ hewalɛ ni wɔkɛ ‘wɔtsui fɛɛ kɛ wɔsusuma fɛɛ’ atao Nyɔŋmɔ sɛɛ gbɛ, wɔsumɔ lɛ, ni wɔsɔmɔ lɛ (5Mo 4:29; 11:13, 18), ni 5 Mose 6:5 lɛ hu kɛɛ: “Suɔmɔ Yehowa, o-Nyɔŋmɔ lɛ, kɛ otsui fɛɛ kɛ osusuma fɛɛ kɛ onyɛmɔ fɛɛ.” Yesu kɛɛ esa akɛ mɔ kɛ esusuma muu fɛɛ kɛ enyɛmɔ fɛɛ kɛ agbɛnɛ hu, ‘ejwɛŋmɔ muu fɛɛ’ asɔmɔ Nyɔŋmɔ. (Mar 12:30; Luk 10:27) Shi ekolɛ obaabi akɛ, ‘Akɛni susuma lɛ kɔɔ nibii nɛɛ fɛɛ ahe hewɔ lɛ, mɛni hewɔ atsĩ amɛtã afata he lɛ?’ Hã wɔkɛ nɔkwɛmɔnɔ ko atsɔɔ nɔ ni eeenyɛ efee akɛ enɛ tsɔɔ lɛ mli: Mɔ ko baanyɛ ehɔ̃ɔ ehe (esusuma) ehã mɔ ko akɛ nyɔŋ, ni tsɔɔ akɛ, ebaatsɔ mɔ lɛ nɔ, ni mɔ lɛ baafee enuŋtsɔ. Kɛ̃lɛ, ekolɛ ekɛ etsui fɛɛ sɔmɔŋ enuŋtsɔ lɛ, ni tsɔɔ akɛ nɔ ko tsirɛɛɛ lɛ ni efee nibii ni baasa enuŋtsɔ lɛ hiɛ, ni no hewɔ lɛ, ekɛ enyɛmɔ fɛɛ loo ejwɛŋmɔ fɛɛ efeŋ nibii ni enuŋtsɔ lɛ baaná he sɛɛ. (Okɛto Efe 6:5; Kol 3:22 lɛ he.) No hewɔ lɛ, ekã shi faŋŋ akɛ atsĩ nibii nɛɛ atã afata susuma lɛ he koni wɔkai be fɛɛ be, ni wɔjwɛŋ he be ni wɔsɔmɔɔ Nyɔŋmɔ, mɔ ni ji wɔ-Nuŋtsɔ lɛ, kɛ e-Bi lɛ, mɔ ni kɛ ewala hã akɛ kpɔmɔnɔ kɛhé wɔ lɛ. ‘Susuma muu fɛɛ’ ni akɛaasɔmɔ Nyɔŋmɔ lɛ kɔɔ gbɔmɔ muu lɛ fɛɛ he, ni ajieee nɔ ko yɛ mli, gbɔmɔtso lɛ fã ko jio, nifeemɔ ko jio, nyɛmɔ ko jio, shwelɛ ko jio.—Okɛto Mat 5:28-30; Luk 21:34-36; Efe 6:6-9; Fip 3:19; Kol 3:23, 24 lɛ he.
it-1 84 kk. 3
Afɔleshaa Latɛ
Afã Israelbii lɛ akɛ amɛkumɔ afɔleshaa latɛi fɛɛ ni amamɔ ahã amale nyɔŋmɔi lɛ, ni amɛkpãtã wɔŋ tɛi kɛ wɔŋ tsei fɛɛ ni bei pii lɛ afeɔ yɛ afɔleshaa latɛi nɛɛ amasɛi lɛ. (2Mo 34:13; 5Mo 7:5, 6; 12:1-3) Esaaa akɛ amɛfeɔ nibii nɛɛ eko eko, ni esaaa akɛ amɛshãa amɛbii yɛ la mli hu tamɔ Kanaanbii lɛ feɔ lɛ. (5Mo 12:30, 31; 16:21) Esaaa akɛ Israelbii lɛ mamɔɔ afɔleshaa latɛi babaoo, moŋ lɛ, afã amɛ akɛ amɛma afɔleshaa latɛ kome pɛ kɛhã anɔkwa Nyɔŋmɔ koome lɛ jamɔ, ni amɛbaama yɛ he ni Yehowa baahala lɛ. (5Mo 12:2-6, 13, 14, 27; okɛ enɛ ato nɔ ni Babilonbii lɛ fee lɛ he; amɛmamɔ afɔleshaa latɛi 180 sɔŋŋ amɛhã amɛnyɔŋmɔyoo Ishtar pɛ.) Klɛŋklɛŋ lɛ, afã amɛ akɛ kɛ́ amɛfo Yordan Faa lɛ, amɛkɛ tɛi ni akoko ama afɔleshaa latɛ (5Mo 27:4-8), ni Yoshua fee enɛ yɛ Ebal Gɔŋ lɛ nɔ.—Yos 8:30-32.
Pɛimɔ Ŋmalɛi Lɛ Amli Jogbaŋŋ
it-1 925-926
Gerizim Gɔŋ
Be ni Israelbii lɛ ye Ai nɔ kunim lɛ sɛɛ etsɛɛɛ nɔŋŋ lɛ, Yoshua hã Israel wekui lɛ yabua amɛhe naa yɛ Gerizim Gɔŋ lɛ kɛ Ebal Gɔŋ lɛ hiɛ, taakɛ Mose fã amɛ lɛ. Akane jɔɔmɔi ni maŋbii lɛ baaná kɛ́ amɛbo Yehowa toi, kɛ loomɔi ni baaba amɛnɔ kɛ́ amɛgbo enɔ toi lɛ atsɔɔ amɛ yɛ jɛmɛ. Simeon, Levi, Yuda, Isakar, Yosef, kɛ Benyamin wekui lɛ damɔ Gerizim Gɔŋ lɛ hiɛ. Levibii lɛ kɛ kpaŋmɔ adeka lɛ hi jɔɔ lɛ mli, ni wekui ekpaa krokomɛi lɛ damɔ Ebal Gɔŋ lɛ hiɛ. (5Mo 11:29, 30; 27:11-13; Yos 8:28-35) Eeenyɛ efee akɛ, akane jɔɔmɔi lɛ atsɔɔ wekui ni ebua amɛhe naa yɛ Gerizim Gɔŋ lɛ hiɛ lɛ, ni amɛhere nɔ, ni akane loomɔi lɛ atsɔɔ wekui krokomɛi ni ebua amɛhe naa yɛ Ebal Gɔŋ lɛ hiɛ lɛ, ni amɛhere nɔ. Mɛi komɛi kɛɔ akɛ akane jɔɔmɔi lɛ atsɔɔ mɛi ni ebua amɛhe naa yɛ Gerizim Gɔŋ lɛ hiɛ lɛ, ejaakɛ eyɛ fɛo waa ni enɔ yɛ frɔ̃frɔ̃, ni akane loomɔi lɛ atsɔɔ mɛi ni ebua amɛhe naa yɛ Ebal Gɔŋ lɛ hiɛ lɛ, ejaakɛ enɔ yɛ tɛitɛi ni ebaaa nii, shi nɔ ko bɛ Biblia lɛ mli ni tsɔɔ nakai.
JULY 12-18
NYƆŊMƆ WIEMƆ LƐ MLI JWETRII | 5 MOSE 13-15
“Mla Lɛ Hã Ana Akɛ Yehowa Susuɔ Ohiafoi Ahe”
it-2 1110 kk. 3
Mlijai Nyɔŋma Mli Ekome
Etamɔ nɔ ni yɛ nibii amlijai nyɔŋma mli ekome ni akɛhãa kɛyeɔ abuaa osɔfoi ni jɛ Levi weku lɛ mli lɛ sɛɛ lɛ, ayɛ nibii amlijai nyɔŋma mli ekome kroko hu ni akɛhãa daa afi, ni no hu lɛ Levibii lɛ náa he sɛɛ. Israel wekui lɛ ji mɛi titri ni náa mlijai nyɔŋma mli ekome kroko nɛɛ he sɛɛ be ni amɛtee gbii juji ni maŋ muu lɛ fɛɛ yeɔ daa afi lɛ. Kɛ́ he ni weku ko yɔɔ lɛ kɛ Yerusalem teŋ jekɛ waa, ni no hewɔ lɛ ebaawa ehã amɛ akɛ amɛkɛ mlijai nyɔŋma mli ekome nɛɛ baaya jɛmɛ lɛ, no lɛ weku lɛ baanyɛ afee lɛ shika, ni kɛ́ amɛyashɛ Yerusalem lɛ amɛbaanyɛ amɛkɛhé nii amɛye ni amɛmii ashɛ amɛhe be ni ayeɔ gbi jurɔ lɛ. (5Mo 12:4-7, 11, 17, 18; 14:22-27) Agbɛnɛ hu, daa afii kpawo lɛ ayeɔ hejɔɔmɔ afi, ni afi ni ji etɛ kɛ afi ni ji ekpaa lɛ naagbee lɛ akɛ nibii amlijai nyɔŋma mli ekome nɛɛ tsuuu nii be ni maŋ muu lɛ fɛɛ yeɔ gbi jurɔ lɛ, shi moŋ abuaa naa ahãa Levibii, gbɔi, yei okulafoi, kɛ gbekɛbii ni bɛ tsɛmɛi ni yɔɔ Israelbii lɛ amaji lɛ amli lɛ.—5Mo 14:28, 29; 26:12.
it-2 833
Hejɔɔmɔ Afi
Atsɛɔ Hejɔɔmɔ Afi lɛ akɛ “afi ni ahãa mɛi yeɔ amɛhe [hash·shemit·tahʹ].” (5Mo 15:9; 31:10) Yɛ nakai afi lɛ mli lɛ, ahãa shikpɔŋ lɛ jɔɔ ehe kwraa, loo eyeɔ ehe, ni tsɔɔ akɛ, ekãa shi ni aduuu nii yɛ nɔ. (2Mo 23:11) Agbɛnɛ hu, ahãa mɛi jɔɔ amɛhe, loo amɛyeɔ amɛhe yɛ nyɔji ni amɛhiɛ lɛ gbɛfaŋ. Eji ‘heyeli kɛhã Yehowa,’ ni akɛwoɔ ehiɛ nyam. Biblia he nilelɔi komɛi kɛɛ afolɔɔɔ nyɔji amli yɛ nakai afi lɛ mli, moŋ lɛ, mɛi ni ahiɛ amɛ nyɔji lɛ biii amɛnyɛmimɛi Hebribii lɛ ni amɛwo nyɔmɔ lɛ, ejaakɛ akɛ okwaafoi lɛ, nakai afi lɛ amɛnáŋ shika, shi amɛbaanyɛ amɛbi gbɔi ni amɛwo nyɔji ni amɛhiɛ lɛ. Shi soro susumɔ ni Biblia he nilelɔi krokomɛi hiɛ yɛ sane nɛɛ he.—5Mo 15:1-3.
it-2 978 kk. 6
Nyɔŋ
Mlai ni kudɔɔ wekukpaa ni yɔɔ nyɔŋ kɛ enuŋtsɔ teŋ. Yɛ Israelbii lɛ ateŋ lɛ, esoro bɔ ni akɛ Hebrinyo ni ji nyɔŋ lɛ yeɔ ahãa yɛ bɔ ni akɛ gbɔ loo gbɔ ni ebahi shikpɔŋ lɛ nɔ ni ji nyɔŋ lɛ yeɔ ahãa lɛ he. Gbɔi ni ji nyɔji lɛ ji amɛnuŋtsɔmɛi lɛ anii, ni amɛnuŋtsɔmɛi lɛ baanyɛ ashi amɛ amɛhã amɛbii (3Mo 25:44-46), shi kɛ́ Hebrinyo ni ji nyɔŋ lɛ sɔmɔ enuŋtsɔ afii ekpaa lɛ, ahãa eyeɔ ehe yɛ afi ni ji kpawo lɛ mli. Shi kɛ́ esɔmɔko afii ekpaa po ni Heyeli Afi lɛ shɛ lɛ, ahãa eyeɔ ehe. Kɛ́ Hebrinyo ni ji nyɔŋ lɛ miisɔmɔ lɛ, esa akɛ akɛ lɛ aye tamɔ apaafonyo. (2Mo 21:2; 3Mo 25:10; 5Mo 15:12) . . . Kɛ́ Hebrinyo ko miihã enyɔŋ ko ni ji Hebrinyo lɛ aye ehe lɛ, esa akɛ eke lɛ nibii ni ebaanyɛ ekɛje shihilɛ shishi ekoŋŋ.—5Mo 15:13-15.
JULY 19-25
NYƆŊMƆ WIEMƆ LƐ MLI JWETRII | 5 MOSE 16-18
“Shishitoo Mlai Ni Hãa Akojoɔ Yɛ Jalɛ Naa”
it-1 343 kk. 5
Shwilamɔ
Yɛ Mla lɛ mli lɛ, kɛ́ kojolɔ ko ekojooo jogbaŋŋ lɛ, akɛɔ akɛ eshwila, ni no hewɔ lɛ, Mla lɛ wie eshi nyɔɔŋnihemɔ, nikee, kɛ hiɛiaŋkwɛmɔ shii abɔ, ejaakɛ nibii nɛɛ baanyɛ ashwila kojolɔ ko, ni no baahã etsɔ sane hiɛ ebu shi. “Nyɔɔŋnii shwilaa mɛi ni naa nii jogbaŋŋ lɛ ahiŋmɛii.” (2Mo 23:8, shn.) “Nyɔɔŋnii shwilaa hiɛshikalɔi ahiŋmɛii.” (5Mo 16:19) Ekɔɔɔ he eko bɔ ni kojolɔ ko ja loo ekɔɔ sane sɛɛ hã lɛ, kɛ́ mɛi ni eyeɔ amɛsane lɛ ateŋ mɔ ko ke lɛ nii lɛ, no baanyɛ ahã eje gbɛ etsɔ sane hiɛ ebu shi, loo efee nakai ni ehiɛ bɛ ehe nɔ. Nyɔŋmɔ mla lɛ ŋmɛ pɛpɛɛpɛ, ni ehã ana akɛ, jeee nikeenii pɛ nyɛɔ eshwilaa mɔ, shi bɔ ni mɔ ko nuɔ he ehãa lɛ hu. Ewie akɛ: “Nyɛkakwɛa hiɛiaŋ ni nyɛye sane nyɛhã ohiafo aloo nyɛye sane nyɛhã niiatsɛ.” (3Mo 19:15) No hewɔ lɛ, esaaa akɛ kojolɔ ko damɔɔ bɔ ni enuɔ he ehãa nɔ eyeɔ sane eshiɔ niiatsɛ ko yɛ niiatsɛ ni mɔ lɛ ji lɛ hewɔ, ni esaaa akɛ efeɔ nakai koni mɛi asumɔ esane.—2Mo 23:2, 3.
it-2 511 kk. 7
Yibɔ, Yibɔ Okadii
Enyɔ. Akɛ yibɔ ni ji enyɔ lɛ fɔɔ nitsumɔ yɛ mla saji amli. Kɛ́ odasefoi enyɔ asaji kɛ amɛhe kpã gbee lɛ, emaa sane lɛ nɔ mi. Abi ni aná odasefoi enyɔ, loo etɛ po, dani sane ko ama shi yɛ kojolɔi lɛ ahiɛ. Akɛ shishitoo mla nɛɛ tsuɔ nii yɛ Kristofoi asafo lɛ mli hu. (5Mo 17:6; 19:15; Mat 18:16; 2Ko 13:1; 1Ti 5:19; Heb 10:28) Be ni Nyɔŋmɔ jieɔ e-Bi lɛ shi etsɔɔ Israelbii lɛ akɛ adesai a-Yiwalaherelɔ lɛ, ekɛ shishitoo mla nɛɛ nɔŋŋ tsu nii. Yesu wie akɛ: “Aŋma yɛ nyɛ diɛŋtsɛ nyɛ-Mla lɛ mli akɛ: ‘Mɛi enyɔ odase lɛ, anɔkwale ni.’ Miyeɔ mi diɛŋtsɛ mihe odase, ni Tsɛ lɛ ni tsu mi lɛ hu yeɔ mihe odase.”—Yoh 8:17, 18.
it-2 685 kk. 6
Osɔfo
Osɔfoi lɛ ji mɛi titri ni yɔɔ hegbɛ akɛ amɛgbála Nyɔŋmɔ mla lɛ mli amɛtsɔɔ mɛi, ni amɛtsu gbɛfaŋnɔ ko ni he hiaa waa yɛ Israelbii lɛ asaneyeli mli. Yɛ maji ni akɛhã osɔfoi lɛ amli lɛ, kɛ́ ehe bahia lɛ osɔfoi lɛ yeɔ amɛbuaa kojolɔi lɛ, ni kɛ́ sane ko yeli wa tsɔ kɛhã mɛi ni yeɔ sane yɛ maŋ ko mli lɛ, osɔfoi lɛ kɛ kojolɔi lɛ feɔ ekome kɛtsuɔ he nii.—5Mo 17:8, 9.
Pɛimɔ Ŋmalɛi Lɛ Amli Jogbaŋŋ
it-1 787
Mɔ Ni Ajieɔ Kɛjeɔ Mɛi Ateŋ, Shwiemɔ
Yɛ Mla lɛ mli lɛ, kɛ́ hooo ni odasefoi enyɔ hã sane ko ma shi lɛ, abaanyɛ adamɔ no nɔ ajie mɔ ko kɛje emaŋbii lɛ ateŋ. (5Mo 19:15) Abi ni odasefoi nɛɛ klɛŋklɛŋ atswia mɔ ni yeɔ fɔ lɛ tɛi. (5Mo 17:7) Enɛ baatsɔɔ akɛ amɛhiɛ dɔɔ Nyɔŋmɔ mla lɛ he, ni amɛmiisumɔ ni Israel asafo lɛ he atse, agbɛnɛ hu, ebaahã mɛi akwɛ amɛhe nɔ jogbaŋŋ koni amɛkabaye amale odase loo amɛye amɛhe oyai kɛye odase.
KASEMƆ BƆ NI ASHIƐƆ JOGBAŊŊ
Ani Ayɛ Kojolɔi Yɛ Kristofoi Asafo Lɛ Mli?
it-1 519 kk. 4
Saneyelihe
Yɛ Kristofoi Asafo Lɛ Mli. Eyɛ mli akɛ Kristofoi asafo lɛ bɛ hegbɛ ni eyeɔ mɛi ni etɔ̃ maŋ mla nɔ lɛ asane moŋ, shi kɛ́ emli bii lɛ eko tɔ̃ Biblia mli mlai lɛ eko nɔ lɛ, amɛbaanyɛ amɛtsɔse lɛ loo amɛshwie lɛ po kɛje asafo lɛ mli. No hewɔ lɛ, bɔfo Paulo kɛɛ asafo lɛ akɛ amɛ, ni tsɔɔ akɛ asafo lɛ najiaŋdamɔlɔi lɛ, ni ji nɔkwɛlɔi ni yɔɔ asafo lɛ mli lɛ, ji mɛi ni esa akɛ amɛkojo mɛi ni yɔɔ asafo lɛ mli lɛ. (1Ko 5:12, 13) Paulo kɛ Petro fɛɛ ŋmala woji amɛyahã asafoi kɛ nɔkwɛlɔi, ni amɛkɛɛ asafoŋ onukpai lɛ akɛ, amɛhã amɛhiɛ ahi asafo lɛ mumɔŋ shidaamɔ nɔ jogbaŋŋ, ni amɛye amɛbua mɛi ni kɔɔ gbɛ ni ejaaa lɛ, ni amɛwie amɛtsɔɔ amɛ. (2Ti 4:2; 1Pe 5:1, 2; okɛto Gal 6:1 lɛ he.) Esa akɛ abɔ mɛi ni kɛ mligbálamɔ baa loo amɛtsɔɔ tsɔɔmɔi krokomɛi lɛ kɔkɔ shi kome kɛ nɔ ni ji shii enyɔ nɔ, dani asafo lɛ aye amɛsane. (Tit 3:10, 11) Shi esa akɛ ashwie eshafeelɔi ni ekpiliŋ amɛtsui lɛ kɛje asafo lɛ mli. Kɛ́ afee nakai lɛ, belɛ aatsɔse efɔŋfeelɔ lɛ koni ena akɛ, anyɛŋ aŋmɛ gbɛ ni eya nɔ efee nakai esha lɛ yɛ asafo lɛ mli. (1Ti 1:20) Paulo fã nɔkwɛlɔi ni yɔɔ asafo lɛ mli lɛ ni amɛkpe akɛ kojolɔi ni amɛtsu sane ni tamɔ nakai lɛ he nii. (1Ko 5:1-5; 6:1-5) Kɛ́ akɛ sane ko fɔ̃ mɔ ko nɔ lɛ, esaaa akɛ amɛkojoɔ mɔ lɛ be ni amɛtaoko sane lɛ mli jogbaŋŋ, ni esaaa akɛ amɛkwɛɔ hiɛiaŋ hu, moŋ lɛ, esa akɛ amɛná odasefoi enyɔ loo etɛ dani amɛkpɛlɛ nɔ akɛ eji anɔkwale.—1Ti 5:19, 21.
JULY 26–AUGUST 1
NYƆŊMƆ WIEMƆ LƐ MLI JWETRII | 5 MOSE 19-21
“Adesa Wala Jara Wa Hã Yehowa”
it-1 344
Lá
Kɛ́ mɔ ko miinyɛ mɔ ko ni no hewɔ lɛ eeshwe ni mɔ lɛ agbo, loo eyagbe mɔ lɛ he guɔ loo eyaye amale odase eshi mɔ lɛ, ni no hã mɔ lɛ wala yaje oshãra mli lɛ, no lɛ, eye mɔ lɛ lá yi sɔ̃.—3Mo 19:16; 5Mo 19:18-21; 1Yo 3:15.
Pɛimɔ Ŋmalɛi Lɛ Amli Jogbaŋŋ
it-1 518 kk. 1
Saneyelihe
Ayeɔ sane yɛ maŋ fɛɛ maŋ agbó naa. (5Mo 16:18; 21:19; 22:15, 24; 25:7; Rut 4:1) Wiemɔ ni ji “agbó” lɛ tsɔɔ henaabuamɔhe ni bɛŋkɛ agbó ni ta maŋ lɛ naa lɛ. Maŋbii lɛ buaa amɛhe naa yɛ agbói lɛ anaa ni akaneɔ Mla lɛ ni akɛ gbɛtsɔɔmɔi krokomɛi hu hãa amɛ yɛ jɛmɛ. (Ne 8:1-3) Akɛni mɛi tsɔɔ agbó lɛ mli kɛyaa kɛbaa yɛ gbi lɛ mli hewɔ lɛ, kɛ́ mɔ ko yaahé nɔ ko loo ayaahɔ̃ɔ nɔ ko ahã lɛ ni eetao odasefonyo lɛ, ewaaa akɛ ebaaná eko yɛ agbó lɛ naa. Agbɛnɛ hu, akɛni mɛi buaa amɛhe naa yɛ agbó lɛ naa kɛ́ aaye mɔ ko sane hewɔ lɛ, ebaahã kojolɔi lɛ akwɛ jogbaŋŋ ni amɛye jalɛ sane, ni amɛkpɛ yiŋ jogbaŋŋ hu.
AUGUST 2-8
NYƆŊMƆ WIEMƆ LƐ MLI JWETRII | 5 MOSE 22-23
“Mla Lɛ Hã Ana Akɛ Yehowa Nuɔ He Ehãa Kooloi”
it-1 375-376
Jatsu
Blema lɛ akɛ kooloi tsuɔ nii kɛholeɔ jatsui, ni afã Israelbii lɛ akɛ, kɛ́ amɛyana mɔ ko ni nyɛɔ amɛ teji ní egbee shi ní ejatsu kã enɔ lɛ, amɛkashi lɛ amɛtee, moŋ lɛ, esa akɛ ‘amɛjie kooloo lɛ.’—2Mo 23:5.
it-1 621 kk. 1
Mose Wolo Ni Ji Enumɔ
Akɛ famɔ hã yɛ 5 Mose lɛ mli ni hãa wɔnaa akɛ, esa akɛ ajie suɔmɔ kpo atsɔɔ kooloi. Kɛ́ loofɔlɔ nyɛ ko bu ebii loo ewɔji anɔ lɛ, ewaaa akɛ abaamɔ lɛ, ni no hewɔ lɛ afã Israelbii lɛ akɛ, kɛ́ amɛyana eko nakai lɛ amɛkamɔ loofɔlɔ nyɛ lɛ. Esa akɛ amɛŋmɛɛ nyɛ lɛ he ni eya, shi amɛbaanyɛ amɛmɔmɔ bii lɛ amɛhã amɛhe. Kɛ́ amɛfee nakai lɛ, loofɔlɔ nyɛ lɛ baanyɛ eŋmɛ ni efɛlɛ ekoŋŋ.—5Mo 22:6, 7.
Pɛimɔ Ŋmalɛi Lɛ Amli Jogbaŋŋ
it-1 600
Nyɔmɔ, Mɔ Ni Hiɛ Nyɔmɔ
Ejeee sane kpakpa akɛ Israelnyo ko baayafa nii; yɛ gbɛ ko nɔ lɛ, mɔ ni yafaa nii lɛ tsɔɔ nyɔŋ ehãa mɔ ni fa lɛ nii lɛ. (Abɛ 22:7) Enɛ hewɔ lɛ, afã Nyɔŋmɔ webii lɛ akɛ amɛmli ahi ahã amɛnyɛmimɛi Israelbii lɛ, ni kɛ́ amɛkɛ nɔ ko miifa amɛnyɛmi Israelnyo ko ni ehia lɛ lɛ, amɛkafó amɛ pɛ amɛnɔ mli, ni tsɔɔ akɛ amɛkahe he kpa, koni ekaba lɛ akɛ amɛmiitsɔ hiamɔ ni ehia amɛnyɛmi lɛ nɔ amɛmiiye ehe nii. (2Mo 22:25; 5Mo 15:7, 8; La 37:26; 112:5) Shi amɛbaanyɛ amɛhe he kpa yɛ gbɔi adɛŋ. (5Mo 23:20) Biblia he nilelɔi ni ji Yudafoi lɛ susuɔ akɛ, sane nɛɛ kɔɔ shika ni mɔ yafaa kɛhã nitsumɔ lɛ he, shi jeee shika ni mɔ yafaa akɛni ehia lɛ lɛ hewɔ. Bei pii lɛ, gbɔi etsɛɛɛ yɛ Israel, ni amɛteŋ mɛi pii ji jarayelɔi, hewɔ lɛ nilee yɛ mli akɛ kɛ́ amɛyafa shika ko lɛ abaakpa gbɛ akɛ amɛbaawo kɛ he kpa, ejaakɛ amɛ hu amɛkɛ shika faa mɛi kɛ he kpa.
KASEMƆ BƆ NI ASHIƐƆ JOGBAŊŊ
Ani Eji Tɔmɔ Akɛ Abaagbe Kooloi?
g 4/15 13
Nɔ Ni Biblia Lɛ Kɛɔ Yɛ Kooloi Ahe
NƆ NI MƐI KƐƆ Gbɔbilɔi kɛ wolɛi komɛi gbeɔ kooloi kɛjieɔ amɛhiɛtserɛ, loo koni amɛkɛna akɛ amɛhe esa. Russianyo Leo Tolstoy, ni eji woloŋmalɔ lɛ ŋma akɛ, kɛ́ mɔ ko gbe kooloo ni eye lɛ “ehiii kwraa,” ni mɛi komɛi kɛ lɛ baakpã gbee.
NƆ NI BIBLIA LƐ KƐƆ Nyɔŋmɔ ŋmɛɔ gbɛ ni gbɔmɛi agbe kooloi koni kooloi lɛ akaye amɛ awui, loo koni amɛkɛfee atade. (2 Mose 21:28; Marko 1:6) Biblia lɛ kɛɔ hu akɛ, adesai baanyɛ agbe kooloi ni amɛye. Awie yɛ 1 Mose 9:3 lɛ akɛ: “Kooloo fɛɛ kooloo ni hiɛ kã ni tsiɔ ehe lɛ atsɔ nyɛniyenii.” Yesu po wa ekaselɔi lɛ ni amɛgbe loo ni sɛɛ mli lɛ, amɛye eko.—Yohane 21:4-13.
Fɛɛ sɛɛ lɛ, Biblia lɛ kɛɛ Nyɔŋmɔ nyɛɔ “mɔ fɛɛ mɔ ni sumɔɔ yiwalɛ nifeemɔ.” (Lala 11:5) Enɛ hãa wɔnaa akɛ, Nyɔŋmɔ sumɔɔɔ ni wɔyeɔ kooloi awui loo wɔgbeɔ amɛ kɛjieɔ wɔhiɛtserɛ.
Biblia lɛ hãa wɔnaa akɛ, kooloi awala jara wa waa kɛhã Nyɔŋmɔ.
• Biblia lɛ kɛɛ be ni Nyɔŋmɔ bɔɔ nibii lɛ, “[Ebɔ] ŋa mli kooloi ni yɔɔ shikpɔŋ lɛ nɔ lɛ, eko fɛɛ eko kɛ ehenɔi, kɛ shĩa kooloi lɛ, eko fɛɛ eko kɛ ehenɔi, kɛ kooloi fɛɛ ni wamɔɔ yɛ shikpɔŋ lɛ nɔ lɛ, eko fɛɛ eko kɛ ehenɔi. Ni Nyɔŋmɔ na akɛ ehi.”—1 Mose 1:25.
• Biblia lɛ wie yɛ Yehowa he akɛ: “Ehãa kooloi lɛ niyenii.” (Lala 147:9) Nyɔŋmɔ bɔ shikpɔŋ lɛ bɔ ni kooloi lɛ baaná niyenii ni fa kwraa fe bɔ ni he baahia amɛ, kɛ he ko hu ni amɛbaawɔ.
• Israel maŋtsɛ David sɔle akɛ: “Ao Yehowa, bo obaa gbɔmɛi kɛ kooloi ayi.” (Lala 36:6) Akɛ nɔkwɛmɔnɔ lɛ, be ni Nu Afua lɛ ba jeŋ fɛɛ lɛ, Yehowa baa gbɔmɛi kpaanyɔ kɛ kooloi srɔtoi fɛɛ awala yi dani ekpãtã mɛi fɔji lɛ ahiɛ.—1 Mose 6:19.
Eyɛ faŋŋ akɛ, Yehowa shwɛɛɛ kooloi ni ebɔ lɛ ahe, ni eekpa gbɛ akɛ adesai hu kɛ amɛ baaye jogbaŋŋ.
“Jalɔ kwɛɔ eshĩa kooloi jogbaŋŋ.”—Abɛi 12:10.
AUGUST 9-15
NYƆŊMƆ WIEMƆ LƐ MLI JWETRII | 5 MOSE 24-26
“Mla Lɛ Hã Ana Akɛ Yehowa Nuɔ He Ehãa Yei”
it-2 1196 kk. 4
Yoo
Mlai ni kɔɔ tawuu he lɛ bi ni kɛ nuu ko bote gbalashihilɛ mli ehee lɛ ahã eye ehe afi kome, ni eŋa lɛ hu ná he sɛɛ. Enɛ hã nuu lɛ kɛ eŋa lɛ ná hegbɛ ni amɛkɛbaafɔ, ni kɛ́ eba lɛ nakai lɛ, kɛ́ nuu lɛ tee ta lɛ yoo lɛ kɛ bi ni amɛfɔ lɛ baashɛje emii, ni kɛ́ aleenɔ ni nuu lɛ yagbo yɛ ta lɛ mli lɛ, no lɛ, yoo lɛ kɛ amɛbi lɛ baashɛje emii waa.—5Mo 20:7; 24:5.
it-1 963 kk. 2
Kpɛkpɛoyeli
Eyɛ faŋŋ akɛ, gbɛjianɔ kpakpa nɛɛ ni ato ahã ohiafoi lɛ hã mɛi fee ejurɔ, ehãaa amɛfó amɛ pɛ amɛnɔ mli, ni ehã amɛkɛ amɛhiɛ fɔ̃ Yehowa nɔ koni ejɔɔ amɛ, shi ehãaa mɛi afee anihaolɔi. Ehãa wɔnuɔ sane nɛɛ ni David wie lɛ shishi: “Minako jalɔ ni akwa lɛ pɛŋ, loo jalɔ ni ebii miitao niyenii.” (La 37:25) Kɛ́ ohiafoi kɛ gbɛjianɔtoo nɛɛ ni yɔɔ Mla lɛ mli lɛ tsu nii, ni amɛtsu nii waa lɛ hɔmɔ yeŋ amɛ, ni ebaŋ lɛ akɛ amɛ loo amɛbii baaba niyenii.
Pɛimɔ Ŋmalɛi Lɛ Amli Jogbaŋŋ
it-1 640 kk. 5
Gbalatsemɔ
Gbalatsemɔ Wolo. Eyɛ mli akɛ sɛɛ mli lɛ, Israel hii kɛ gbɛjianɔ ni ato yɛ Mose Mla lɛ mli akɛ nuu baanyɛ eshwie eŋa lɛ eyatsuuu nii jogbaŋŋ moŋ, shi no etsɔɔɔ akɛ kɛjɛ shishijee lɛ Mla lɛ hã efee mlɛo kɛhã Israelnyo ko akɛ ebaashwie eŋa. Kɛ́ mɔ ko miitao eshwie eŋa lɛ, Mla lɛ bi ni efee nibii komɛi. Esa akɛ eŋma wolo, ni tsɔɔ akɛ, “eŋma gbalatsemɔ wolo ehã yoo lɛ.” Esa akɛ “ekɛwo [yoo lɛ dɛŋ], ní eshwie lɛ kɛje eshĩa lɛ.” (5Mo 24:1) Eyɛ mli akɛ Ŋmalɛ lɛ ewieee sane nɛɛ he fitsofitso moŋ, shi etamɔ nɔ ni enɛ bi ni nuu lɛ ayana onukpai komɛi ni ahala, ni ekolɛ klɛŋklɛŋ lɛ, onukpai nɛɛ baabɔ mɔdɛŋ ni amɛsaa nuu lɛ kɛ eŋa lɛ teŋ. Be ni ebaahe nuu lɛ kɛfee wolo lɛ, ni agbɛnɛ hu, efee nibii fɛɛ ni esa akɛ efee dani eshwie eŋa lɛ baahã ená be kɛsusu yiŋ ni ekpɛɔ lɛ he jogbaŋŋ. Esa akɛ nuu lɛ aná nɔ ko ni ebaadamɔ nɔ etse eŋa lɛ gbãla, ni kɛ́ akɛ mla nɛɛ tsu nii jogbaŋŋ lɛ, ehãŋ nuu ko aye ehe oyai kɛtse eŋa gbãla.
AUGUST 16-22
NYƆŊMƆ WIEMƆ LƐ MLI JWETRII | 5 MOSE 27-28
Pɛimɔ Ŋmalɛi Lɛ Amli Jogbaŋŋ
it-1 360
Husu Kadimɔnɔ
Yehowa mla lɛ gu husu kadimɔnɔ ni atsiɔ kɛyaa sɛɛ. (5Mo 19:14; kwɛmɔ Abɛ 22:28 lɛ hu.) Yɛ anɔkwale mli lɛ, abu mɔ ni tsiɔ “enaanyo husu kadimɔnɔ” kɛyaa sɛɛ lɛ akɛ mɔ ni alomɔ. (5Mo 27:17) Akɛni bei pii lɛ ŋmɔshi nii ni yɔɔ shikpɔŋtsɛmɛi ashikpɔŋ nɔ ji nɔ titri ni hãa amɛnáa amɛdaaŋ ŋmaa hewɔ lɛ, kɛ́ mɔ ko tsi mɔ ko husu kadimɔnɔ kɛtee sɛɛ lɛ, yɛ gbɛ ko nɔ lɛ, eetse mɔ lɛ daaŋ ŋmaa nɔ. Kɛ́ mɔ ko fee nakai lɛ, etamɔ nɔ ni eju nɔŋŋ, ni nakai nɔŋŋ blemabii lɛ na lɛ.—Hio 24:2.
AUGUST 23-29
NYƆŊMƆ WIEMƆ LƐ MLI JWETRII | 5 MOSE 29-30
Pɛimɔ Ŋmalɛi Lɛ Amli Jogbaŋŋ
it-1 665 kk. 3
Toi
Yehowa tsɔ etsuji lɛ anɔ ewie Israelbii kuɛŋtilɔi ni booo lɛ toi ahe akɛ, ‘afolɔko amɛtoii ketia.’ (Yer 6:10, shn.; Bɔf 7:51) Etamɔ nɔ ni akɛ nɔ ko etsimɔ amɛtoii, hewɔ lɛ amɛnuuu nii. Yehowa gbeleko amɛtoii, ejaakɛ lɛ ehãa mɛi ni taoɔ esɛɛ gbɛ lɛ toii ni baahã amɛnu nii ashishi ni amɛbo lɛ toi, shi eŋmɛɔ gbɛ ni toigbolɔi atoii atsimɔ ni amɛkanu ewiemɔ lɛ shishi. (5Mo 29:4; Ro 11:8) Bɔfo Paulo gba akɛ, be ko baaba ni mɛi komɛi ni tsɛɔ amɛhe Kristofoi lɛ baakwa anɔkwa hemɔkɛyeli lɛ, ni amɛsumɔŋ ni amɛbo Nyɔŋmɔ Wiemɔ lɛ mli anɔkwale lɛ toi, moŋ lɛ amɛbaasumɔ ni akɛ nibii ni amɛ diɛŋtsɛ amɛsumɔɔ lɛ “ata amɛtoiiaŋ” ahã amɛ, ni no hewɔ lɛ, amɛbaabo amale tsɔɔlɔi toi.—2Ti 4:3, 4; 1Ti 4:1.
AUGUST 30–SEPTEMBER 5
NYƆŊMƆ WIEMƆ LƐ MLI JWETRII | 5 MOSE 31-32
“Lala Ko Ni Nyɔŋmɔ Hã Afo Lɛ Mli Mfonirifeemɔŋ Wiemɔi”
w09 5/1 14 kk. 4
Ani Onuɔ Biblia Lɛ Mli Mfonirifeemɔŋ Wiemɔi Lɛ Shishi?
Bei komɛi lɛ, Biblia lɛ kɛ Yehowa toɔ nibii ni wala bɛ amɛmli lɛ ahe. Atsɛ lɛ akɛ, “Israel Tɛsaa lɛ,” ‘tɛsaa,’ kɛ ‘teemɔhe.’ (2 Samuel 23:3; Lala 18:2; 5 Mose 32:4) Mɛni hewɔ akɛ Yehowa to nibii nɛɛ ahe lɛ? Bɔ ni tɛsaa wulu maa shi shiŋŋ ni etsiii ehe lɛ, nakai nɔŋŋ Yehowa baanyɛ ahã ohi shi shweshweeshwe be fɛɛ be.