Gbijurɔyelii ni Sa Kadimɔ yɛ Israel Yinɔsane Mli
“Afi kome mli lɛ shii etɛ ohii lɛ fɛɛ abapue yɛ Yehowa, o-Nyɔŋmɔ lɛ, hiɛ, yɛ he ni ehala lɛ . . . , ni mɔ ko akabapue yɛ Yehowa hiɛ kɛ edɛ folo.”—5 MOSE 16:16.
1. Mɛni abaanyɛ awie yɛ Biblia beaŋ gbijurɔyeli bei ahe?
MƐNI baa ojwɛŋmɔ mli kɛji osusu gbijurɔyeli he? Nɔ ni kadi gbii juji ni aye yɛ blema lɛ ekomɛi ji dãanumɔ shɛii kɛ jeŋba shara. Enɛ ji anɔkwale yɛ ŋmɛnɛŋmɛnɛ beaŋ gbii juji komɛi agbɛfaŋ. Shi esoro gbii juji ni atsɔɔ yɛ Nyɔŋmɔ Mla ni ekɛha Israel lɛ mli lɛ. Eyɛ mli akɛ amɛji miishɛɛ bei moŋ, shi anyɛɔ atsɛɔ amɛ hu akɛ “kpee krɔŋkrɔŋ.”—3 Mose 23:2.
2. (a) Mɛni abiɔ ni Israelbii hii afee shii etɛ yɛ afi mli? (b) Taakɛ akɛ wiemɔ lɛ tsu nii yɛ 5 Mose 16:16 lɛ, mɛni ji “gbi jurɔ”?
2 Israel hii anɔkwafoi—ni bei pii lɛ amɛwekui fata amɛhe lɛ—náa miishɛɛ babaoo akɛ amɛaafã gbɛ kɛya Yerusalem, ‘he ni Yehowa ehala lɛ,’ ni amɛjɛɔ amɛsuɔmɔ mli amɛkɛ amɛhe woɔ gbijurɔyelii wuji etɛ mli. (5 Mose 16:16) Old Testament Word Studies wolo lɛ tsɔɔ Hebri wiemɔ ni atsɔɔ shishi akɛ “gbi jurɔ” yɛ 5 Mose 16:16 lɛ shishi akɛ “miishɛɛ kpele be . . . be mli ni akɛ afɔleshaai kɛ okpɔlɔŋmɛɛ yeɔ Nyɔŋmɔ duromɔ he nɔkwɛmɔnii krɛdɛɛi komɛi ahe gbi jurɔ.”a
Gbii Juji Kpelei lɛ Ahe Sɛɛnamɔ
3. Mɛɛ jɔɔmɔi daa afi gbii juji etɛ lɛ haa wɔkaiɔ?
3 Akɛni okwaafoi ji amɛ hewɔ lɛ, Israelbii lɛ kɛ amɛhe fɔ̃ɔ Nyɔŋmɔ jɔɔmɔ ni amɛnáa akɛ nugbɔnɛmɔ lɛ nɔ. Gbijurɔyelii wuji etɛ ni yɔɔ Mose Mla lɛ mli lɛ kɛ akoko kpamɔ ni baa yɛ agbiɛnaa shishijee gbɛ, kɛ ŋmãa kpamɔ yɛ agbiɛnaa naagbee gbɛ, kɛ nikpamɔ ni eshwɛ ni baa yɛ hulutsoo be lɛ naagbee gbɛ lɛ naabuamɔ lɛ kpeɔ. Nɛkɛ bei nɛɛ ji bei kɛha miishɛɛ kpele kɛ shidaa kɛha nugbɔnɛmɔ gbɛjianɔtoo lɛ Yibaalɔ kɛ shikpɔŋ ni baa nii lɛ Feelɔ lɛ. Shi nibii babaoo kɔɔ gbijurɔyelii lɛ ahe fe enɛ.—5 Mose 11:11-14.
4. Mɛɛ yinɔsane mli nifeemɔ ko akɛ klɛŋklɛŋ gbijurɔyeli lɛ kaiɔ?
4 Ayeɔ klɛŋklɛŋ gbi jurɔ lɛ yɛ blema Biblia kalanda lɛ klɛŋklɛŋ nyɔŋ lɛ nɔ, kɛjɛ Nisan 15 kɛyashi 21, ni kɛ wɔ March naagbee loo April shishijee gbɛ kpãa gbee lɛ. Atsɛɔ lɛ Akpiti Gbi Jurɔ, ni akɛni enyiɛɔ Nisan 14 Hehoo lɛ sɛɛ nɔŋŋ hewɔ lɛ, atsɛɔ lɛ “Hehoo gbi jurɔ” hu. (Luka 2:41; 3 Mose 23:5, 6) Nɛkɛ gbi jurɔ nɛɛ kaiɔ Israel yɛ kpɔmɔ ni akpɔ̃ amɛ kɛjɛ amanehulu mli yɛ Mizraim lɛ he, ni atsɛɔ akpiti lɛ akɛ “amanehulu aboloo.” (5 Mose 16:3) Ekaiɔ amɛ akɛ amɛ foijee kɛmiijɛ Mizraim lɛ ba yɛ oyaiyeli mli aahu akɛ, amɛnáaa be ni amɛkɛaaha amɛmãi lɛ asha ni amɛmɛ koni efũ. (2 Mose 12:34) Esaaa akɛ anaa mãsha aboloo yɛ Israelnyo ko shia yɛ be mli ni ayeɔ gbi jurɔ nɛɛ. Esa akɛ akɛ gbele agbala mɔ fɛɛ mɔ, kɛ gbɔi hu, ní yeɔ gbi jurɔ nɛɛ, ni eyeɔ mãsha aboloo lɛ toi.—2 Mose 12:19.
5. Mɛɛ hegbɛ ekolɛ gbi jurɔ ni ji enyɔ lɛ haa akaiɔ, ni namɛi esa akɛ akɛ amɛ afata miishɛɛnamɔ lɛ he?
5 Ayeɔ gbi jurɔ ni ji enyɔ lɛ yɛ Nisan 16 sɛɛ otsii kpawo (gbii 49) mli, ni egbeeɔ nyɔŋ ni ji etɛ, Sivan gbi ni ji 6, ni kɛ wɔ May nyɔŋ lɛ naagbee gbɛ kpãa gbee lɛ nɔ. (3 Mose 23:15, 16) Atsɛɔ lɛ Otsii Agbi Jurɔ (yɛ Yesu gbii lɛ amli lɛ, atsɛɔ lɛ Pentekoste hu, ni eshishi ji “Nyɔŋmai Enumɔ” yɛ Hela mli), ni ayeɔ yɛ be ni bɛŋkɛ afi lɛ mli be tuuntu ni Israel bote Mla kpaŋmɔ lɛ mli yɛ Sinai Gɔŋ lɛ he lɛ mli. (2 Mose 19:1, 2) Yɛ be mli ayeɔ gbi jurɔ nɛɛ, ekolɛ Israelbii anɔkwafoi lɛ ajwɛŋmɔ hiɔ hegbɛ ni amɛná akɛ aje gbɛ ahala amɛ akɛ Nyɔŋmɔ maŋ krɔŋkrɔŋ lɛ nɔ. Nyɔŋmɔ maŋ krɛdɛɛ ni amɛji lɛ biɔ ni amɛfee toiboo amɛha Nyɔŋmɔ Mla lɛ, taakɛ kita ni awo akɛ amɛjie suɔmɔ kɛ mɔ hesusumɔ kpo amɛtsɔɔ mɛi ni bɛ nɔ ko lɛ koni mɛnɛɛmɛi hu anyɛ amɛná gbi jurɔ lɛ mli ŋɔɔmɔ lɛ.—3 Mose 23:22; 5 Mose 16:10-12.
6. Gbi jurɔ ni ji etɛ lɛ kaiɔ Nyɔŋmɔ webii lɛ yɛ mɛɛ niiashikpamɔ he?
6 Atsɛɔ gbijurɔyelii wuji etɛ ni ayeɔ daa afi lɛ ateŋ naagbee nɔ lɛ akɛ Henaabuamɔ Gbi Jurɔ, loo Asesei Agbi Jurɔ. Ayeɔ yɛ nyɔŋ ni ji kpawo lɛ, ni ji Tishri, loo Ethanim nyɔŋ lɛ mli, kɛjɛ gbi ni ji 15 kɛyashi gbi ni ji 21, ni kɛ wɔ October shishijee gbɛ kpãa gbee lɛ nɔ. (3 Mose 23:34) Yɛ be nɛɛ mli lɛ, Nyɔŋmɔ webii lɛ hiɔ amɛshiai lɛ agbói anaa loo amɛtsũi ayiteŋ yɛ shihilɛhei ni ahiɔ mli be kukuoo (asesei) ni akɛ tsei aniji kɛ baai fee lɛ amli. Enɛ kaiɔ amɛ yɛ amɛ afii 40 gbɛfaa kɛjɛ Mizraim kɛmiiya Shiwoo Shikpɔŋ lɛ nɔ, beni ehe bahia ni maŋ lɛ akase bɔ ni amɛkɛ amɛhe aaafɔ̃ Nyɔŋmɔ nɔ kɛha amɛ daa gbi hiamɔ nii lɛ he.—3 Mose 23:42, 43; 5 Mose 8:15, 16.
7. Wɔnáa nɛkɛ gbii juji ni aye yɛ blema Israel nɛɛ ahesusumɔ he sɛɛ yɛ mɛɛ gbɛ nɔ?
7 Nyɛhaa wɔsusua gbijurɔyelii ni fee nɔ ni sa kadimɔ waa yɛ Nyɔŋmɔ blema webii lɛ ayinɔsane mli lɛ ekomɛi ahe wɔkwɛa. Esa akɛ enɛ awo wɔ hewalɛ ŋmɛnɛ, ejaakɛ wɔ hu afɔ̃ɔ wɔ nine ni wɔbua wɔhe naa kutuu daa otsi, kɛ shii etɛ yɛ afi mli yɛ henaabuamɔi kɛ kpeei wuji ashishi.—Hebribii 10:24, 25.
Yɛ David Weku lɛ Mli Maŋtsɛmɛi lɛ Abei Amli
8. (a) Mɛɛ gbi jurɔ ko ni sa kadimɔ waa aye yɛ Maŋtsɛ Salomo gbii lɛ amli? (b) Mɛɛ mfonirifeemɔŋ Asesei Agbi Jurɔ lɛ naagbee kwraa wɔbaanyɛ wɔkpa gbɛ?
8 Gbi jurɔ ko ni sa kadimɔ waa ni aye yɛ Asesei Agbijurɔyeli be lɛ mli lɛ ba mli yɛ David binuu, Maŋtsɛ Salomo nɔyeli be ni shwere waa lɛ mli. “Asafo kpeteŋkpele diɛŋtsɛ” jɛ Shiwoo Shikpɔŋ lɛ naagbeehei lɛ ni amɛbabua amɛhe naa kɛha Asesei Agbi Jurɔ lɛ kɛ sɔlemɔtsu lɛ nɔjɔɔmɔ. (2 Kronika 7:8) Beni agbe naa lɛ, Maŋtsɛ Salomo wo mɛi ni baye gbi jurɔ lɛ agbɛ, ni “amɛjɔɔ maŋtsɛ lɛ, ni amɛyiŋ amɛtee amɛbuui amli kɛ miishɛɛ kɛ tsuijurɔ yɛ ejuji fɛɛ ni Yehowa efee etsulɔ David kɛ emaŋ Israel lɛ hewɔ.” (1 Maŋtsɛmɛi 8:66) Enɛ fee gbijurɔyeli ni sa kadimɔ waa diɛŋtsɛ. Ŋmɛnɛ, Nyɔŋmɔ tsuji miikpa mfonirifeemɔŋ Asesei Agbi Jurɔ lɛ naagbee kwraa ni baaba yɛ Salomo Kpeteŋkpele, ni ji Yesu Kristo Afii Akpe Nɔyeli lɛ naagbee lɛ gbɛ. (Kpojiemɔ 20:3, 7-10, 14, 15) Yɛ nakai beaŋ lɛ, gbɔmɛi ni yɔɔ shikpɔŋ lɛ nɔ he fɛɛ he, ní mɛi ni atee amɛ shi lɛ kɛ mɛi ni fo Harmagedon lɛ fata he lɛ, baafee ekome kɛja Yehowa Nyɔŋmɔ yɛ miishɛɛ mli.—Zakaria 14:16.
9-11. (a) Mɛni hã aye gbi jurɔ ko ni sa kadimɔ waa yɛ Maŋtsɛ Hezekia gbii lɛ amli lɛ? (b) Mɛɛ nɔkwɛmɔnɔ mɛi ni jɛ akutsei nyɔŋma kooyigbɛ maŋtsɛyeli lɛ mli lɛ ateŋ mɛi pii fee, ni ekaiɔ wɔ yɛ mɛni he ŋmɛnɛ?
9 Gbijurɔyeli ni sa kadimɔ ni nyiɛ enɛ sɛɛ ni abɔ he amaniɛ yɛ Biblia lɛ mli lɛ ba yɛ Maŋtsɛ Ahaz yiwalɔ lɛ, mɔ ni ŋá sɔlemɔwe lɛ ni enyiɛ Yuda maŋtsɛyeli lɛ hiɛ kɛtee hemɔkɛyeli kwamɔ mli lɛ nɔyeli lɛ sɛɛ. Ahaz sɛɛyelɔ lɛ ji mɔ kpakpa, Maŋtsɛ Hezekia. Yɛ enɔyeli be lɛ klɛŋklɛŋ afi lɛ mli, beni eye afii 25 lɛ, Hezekia je nibii asaamɔ kɛ tsakemɔ he gbɛjianɔtoo kpele ko shishi. Egbele sɔlemɔwe lɛ amrɔ nɔŋŋ ni eto gbɛjianɔ kɛha esaamɔ. Kɛkɛ ni maŋtsɛ lɛ kɛ woji maje kɛyaha Israelbii ni yɔɔ amɛhenyɛlɔi ni ji Israel akutsei nyɔŋma maŋtsɛyeli ni yɔɔ kooyigbɛ lɛ mli lɛ, ni efɔ̃ amɛ nine akɛ amɛba ni amɛbaye Hehoo lɛ kɛ Akpiti Gbi Jurɔ lɛ. Mɛi pii ba, yɛ amɛmaŋbii lɛ ahefɛoyeli lɛ fɛɛ sɛɛ.—2 Kronika 30:1, 10, 11, 18.
10 Ani gbijurɔyeli lɛ ye omanye? Biblia lɛ bɔɔ amaniɛ akɛ: “Ni Israelbii lɛ ni ba Yerusalem lɛ ye akpiti gbi jurɔ lɛ gbii kpawo sɔŋŋ kɛ nyamɔ kpeteŋkpele; ni Levibii lɛ kɛ osɔfoi lɛ jie Yehowa yi gbi fɛɛ gbi, ni amɛkɛ lala nibii ni naa wa la amɛha Yehowa.” (2 Kronika 30:21) Kwɛ nɔkwɛmɔnɔ fɛfɛo ni nakai Israelbii lɛ fee amɛha Nyɔŋmɔ webii, ni amɛteŋ mɛi pii ŋmɛɔ amɛtsui shi yɛ shitee-kɛ-woo mli, ni amɛfãa gbɛ kakadaŋŋ kɛyaa kpeei wuji ashishi ŋmɛnɛ lɛ!
11 Ákɛ nɔkwɛmɔnɔ lɛ, susumɔ “Nyɔŋmɔ Jamɔ Hetuu-Kɛhamɔ” Kpokpaa Wulu nɔ Kpeei etɛ ni afee yɛ Poland yɛ afi 1989 mli lɛ ahe okwɛ. Gbɔmɛi 166,518 ni tee kpeei lɛ ateŋ mɛi komɛi ji kui wuji ni jɛ tsutsu Soviet Union kɛ Europa Bokagbɛ maji komɛi anɔ, hei ni no mli lɛ atsĩ Yehowa Odasefoi anitsumɔ lɛ naa yɛ lɛ. “Yɛ mɛi ni tee kpeei nɛɛ ateŋ mɛi komɛi agbɛfaŋ lɛ,” taakɛ Jehovah’s Witnesses—Proclaimers of God’s Kingdomb wolo lɛ bɔ amaniɛ lɛ, “no ji klɛŋklɛŋ kwraa ni amɛtee Yehowa webii ahenaabuamɔ wulu ko shishi, ní mɛi lɛ ayi fa fe 15 loo 20. Amɛtsuii yimɔ obɔ̃bɔ̃ kɛ hiɛsɔɔ beni amɛkwɛɔ gbɔmɛi akpei nyɔŋmai abɔ ni yɔɔ shwɛmɔhe lɛ, ní amɛfataa amɛhe yɛ sɔlemɔ mli, ní amɛfeɔ amɛgbeei ekome yɛ Yehowa yijiemɔ lalai amli lɛ.”—Baafa 279.
12. Mɛni hã aye gbi jurɔ ni sa kadimɔ waa yɛ Maŋtsɛ Yosia nɔyeli be lɛ mli lɛ?
12 Yɛ Hezekia gbele sɛɛ lɛ, Yudeabii lɛ yabote apasa jamɔ mli ekoŋŋ yɛ Maŋtsɛ Manase kɛ Maŋtsɛ Amon shishi. Kɛkɛ ni maŋtsɛ kpakpa kroko hu baye nɔ, obalanyo Yosia, mɔ ni kɛ ekãa tsu nii ni ekɛ anɔkwa jamɔ bama shi ekoŋŋ lɛ. Beni eye afii 25 lɛ, Yosia fã akɛ asaa sɔlemɔtsu lɛ. (2 Kronika 34:8) Beni asaa tsũ lɛ, ayana Mla ni Mose ŋma lɛ yɛ sɔlemɔtsu lɛ mli. Nɔ ni Maŋtsɛ Yosia kane yɛ Nyɔŋmɔ Mla lɛ mli lɛ kanya lɛ waa, ni eto gbɛjianɔ koni akane atsɔɔ maŋbii lɛ fɛɛ. (2 Kronika 34:14, 30) Kɛkɛ ni eto gbɛjianɔ kɛha Hehoo lɛ yeli, yɛ nɔ ni aŋma lɛ kɛ gbeekpamɔ naa. Maŋtsɛ lɛ hu fee nɔkwɛmɔnɔ fɛfɛo kɛtsɔ nibii babaoo ni ekɛke kɛha gbijurɔyeli lɛ nɔ. Enɛ hewɔ lɛ, Biblia lɛ bɔ amaniɛ akɛ: “Ayeko Hehoo ko ni tamɔ enɛ pɛŋ yɛ Israel kɛjɛ gbalɔ Samuel gbii lɛ anɔ.”—2 Kronika 35:7, 17, 18.
13. Gbii juji ni aye yɛ Hezekia kɛ Yosia gbii lɛ amli lɛ kaiɔ wɔ yɛ mɛni he ŋmɛnɛ?
13 Tsakemɔi ni Hezekia kɛ Yosia fee lɛ kɛ anɔkwa jamɔ ni atswa ama shi ekoŋŋ yɛ naakpɛɛ gbɛ nɔ, ní ba mli yɛ anɔkwa Kristofoi ateŋ kɛjɛ be mli ni akɛ Yesu Kristo ta maŋtsɛsɛi nɔ yɛ afi 1914 kɛbaa lɛ kpãa gbee pɛpɛɛpɛ. Taakɛ eji anɔkwale, titri lɛ yɛ tsakemɔi ni Yosia fee lɛ agbɛfaŋ lɛ, nɔ ni atswa ama shi ekoŋŋ yɛ ŋmɛnɛŋmɛnɛ beaŋ nɛɛ damɔ nɔ ni aŋma yɛ Nyɔŋmɔ Wiemɔ lɛ mli lɛ nɔ. Ni ákɛ nɔ ni kɛ Hezekia kɛ Yosia gbii lɛ kpãa gbee lɛ, nɔ ni ekadi nɔ ni atswa ama shi ekoŋŋ yɛ ŋmɛnɛŋmɛnɛ beaŋ nɛɛ ji kpeei bibii kɛ kpeei wuji, he ni akɛ Biblia gbalɛ kɛ Biblia shishitoo mlai ni akɛtsuɔ nii yɛ ebe naa lɛ amlitsɔɔmɔ ni yɔɔ miishɛɛ hãa yɛ lɛ. Nɔ ni hãa nɛkɛ nitsɔɔmɔ bei nɛɛ amli miishɛɛ lɛ faa hu ji mɛi babaoo ni abaptisiɔ amɛ lɛ. Taakɛ Israelbii ni shwa amɛhe yɛ Hezekia kɛ Yosia gbii lɛ amli lɛ ji lɛ, mɛi heei ni abaptisiɔ amɛ lɛ ekwa Kristendom kɛ Satan je lɛ fã ni eshwɛ lɛ anifeemɔi fɔji lɛ kwraa. Yɛ afi 1997 mli lɛ abaptisi gbɔmɛi ni fa fe 375,000 ni amɛkɛfee amɛ henɔjɔɔmɔ kɛha Nyɔŋmɔ krɔŋkrɔŋ, Yehowa lɛ he okadi—kɛ aja mli lɛ, efa fe gbɔmɛi 1,000 daa gbi.
Yɛ Nomŋɔɔ lɛ Sɛɛ
14. Mɛni hã aye gbi jurɔ ni sa kadimɔ waa yɛ afi 537 D.Ŋ.B. lɛ?
14 Yɛ Yosia gbele sɛɛ lɛ, maŋ lɛ ku esɛɛ kɛtee apasa jamɔ ni baa mɔ shi lɛ mli ekoŋŋ. Yɛ naagbee lɛ, Yehowa gbala ewebii lɛ atoi kɛtsɔ Babilon asraafoi ni eha amɛte shi amɛshi Yerusalem yɛ afi 607 D.Ŋ.B. lɛ nɔ. Akpata maŋtiase lɛ kɛ esɔlemɔtsu lɛ hiɛ, ni shikpɔŋ lɛ tsɔ amaŋfɔ. Nɔ ni nyiɛ sɛɛ ji Yudafoi lɛ anomŋɔɔ afii 70 yɛ Babilon. Kɛkɛ ni Nyɔŋmɔ kanya Yudafoi shwɛɛnii ko ni eshwa amɛhe lɛ, ni amɛku amɛsɛɛ kɛtee Shiwoo Shikpɔŋ lɛ nɔ koni amɛyatswa anɔkwa jamɔ amɛma shi ekoŋŋ. Amɛyashɛ Yerusalem maŋtiase ni efite lɛ mli yɛ nyɔŋ ni ji kpawo lɛ nɔ, yɛ afi 537 D.Ŋ.B. Nɔ ni amɛfee klɛŋklɛŋ ji akɛ, amɛma afɔleshaa latɛ koni amɛkɛshã daa gbi afɔlei taakɛ atsɔɔ yɛ Mla kpaŋmɔ lɛ mli lɛ. Afee enɛ yɛ be ni sa mli kɛha gbi jurɔ kroko ni sa kadimɔ waa lɛ yeli. “Asaŋ amɛye asesei agbi jurɔ lɛ hu, taakɛ bɔ ni aŋma lɛ.”—Ezra 3:1-4.
15. Mɛɛ nitsumɔ yɔɔ kɛha shwɛɛnii ni ahã amɛku amɛsɛɛ amɛba ekoŋŋ yɛ afi 537 D.Ŋ.B. lɛ, ni shihilɛ ní tamɔ nakai hi shi yɛ afi 1919 yɛ mɛɛ gbɛ nɔ?
15 Nitsumɔ kpele kã nɛkɛ nomii ni eku amɛsɛɛ nɛɛ ahiɛ—Nyɔŋmɔ sɔlemɔtsu lɛ kɛ Yerusalem kɛ egbogboi lɛ ni amɛbaasaa amɛtswa. Amɛkɛ shitee-kɛ-woo babaoo kpe kɛjɛ henyɛlɔi ni bɛŋkɛ amɛ lɛ aŋɔɔ. Beni amɛmaa sɔlemɔtsu lɛ, no mli lɛ eji “nibii bibii agbi.” (Zakaria 4:10) Shihilɛ lɛ kɛ shihilɛ ni Kristofoi anɔkwafoi ni afɔ amɛ lɛ hi mli yɛ afi 1919 lɛ kpãa gbee. Yɛ nakai afi ni sa kaimɔ lɛ mli lɛ, ajie amɛ kɛjɛ mumɔŋ nomŋɔɔ mli kɛjɛ Babilon Kpeteŋkpele lɛ, ni ji jeŋ apasa jamɔ maŋtsɛyeli lɛ mli. No mli lɛ amɛyifalɛ ji akpei fioo ko pɛ, ni amɛkɛ jeŋ ni nyɛ̃ɔ amɛ kpe. Ani Nyɔŋmɔ henyɛlɔi lɛ baanyɛ atsĩ anɔkwa jamɔ hiɛyaa lɛ naa? Nakai sanebimɔ lɛ hetoo hãa wɔkaiɔ naagbee gbijurɔyelii enyɔ ni aŋmala ashwie shi yɛ Hebri Ŋmalɛi lɛ amli lɛ.
16. Mɛni sa kadimɔ yɛ gbi jurɔ ko ni aye yɛ afi 515 D.Ŋ.B. lɛ he?
16 Yɛ naagbee lɛ, asaa ama sɔlemɔtsu lɛ yɛ Adar nyɔŋ lɛ nɔ, yɛ afi 515 D.Ŋ.B., yɛ be ni sa mli kɛha Nisan agbiɛnaa gbi jurɔ lɛ yeli. Biblia lɛ bɔɔ amaniɛ akɛ: “Amɛye akpiti gbi jurɔ gbii kpaanyɔ kɛ nyamɔ; ejaakɛ Yehowa eha amɛmli efili amɛ, ni eha Ashur maŋtsɛ lɛ tsui emɔ amɛ, koni ewo amɛnijiaŋ yɛ Nyɔŋmɔ ni ji Israel Nyɔŋmɔ lɛ we lɛ he nitsumɔ lɛ mli.”—Ezra 6:22.
17, 18. (a) Mɛɛ gbi jurɔ ni sa kadimɔ waa aye yɛ afi 455 D.Ŋ.B.? (b) Wɔyɛ shihilɛ ni tamɔ nakai mli ŋmɛnɛ yɛ mɛɛ gbɛ nɔ?
17 Afii 60 sɛɛ, yɛ afi 455 D.Ŋ.B. lɛ, nɔ kroko hu ni sa kadimɔ ba. Asesei Agbi Jurɔ ni aye nakai afi lɛ kadi Yerusalem gbogboi lɛ ni asaa atswa ekoŋŋ lɛ naagbee. Biblia lɛ bɔɔ amaniɛ akɛ: “Asafo muu lɛ fɛɛ ni ku amɛsɛɛ kɛjɛ nomŋɔɔ lɛ mli kɛba lɛ fee asesei, ni amɛhi asesei lɛ amli. Ni Israelbii lɛ efeko nakai dã kɛjɛ Yeshua, Nun bi lɛ, yinɔ aahu kɛbashi nakai gbi lɛ nɔ. Ni amɛmii shɛ amɛhe naakpa.”—Nehemia 8:17.
18 Mɛɛ Nyɔŋmɔ anɔkwa jamɔ ní asaa atswa ama shi ekoŋŋ yɛ shitee-kɛ-woo ni naa wa waa fɛɛ sɛɛ ni sa kaimɔ nɛ! Shihilɛ ni yɔɔ ŋmɛnɛ lɛ tamɔ nakai nɔŋŋ. Yɛ yiwaa kɛ shitee-kɛ-woo babaoo lɛ fɛɛ sɛɛ lɛ, Nyɔŋmɔ Maŋtsɛyeli lɛ he sanekpakpa shiɛmɔ nitsumɔ kpele lɛ eyashɛ shikpɔŋ lɛ naagbeehei lɛ, ni ajaje Nyɔŋmɔ kojomɔ shɛɛ saji lɛ yɛ he fɛɛ he. (Mateo 24:14) Mɛi 144,000 ni afɔ amɛ mu lɛ ateŋ mɛi ni eshwɛ lɛ anaagbee naasɔomɔ lɛ ebɛŋkɛ. Abua amɛhefatalɔi “tooi krokomɛi” lɛ ayifalɛ ni fe akpekpei enumɔ naa kɛjɛ jeŋmaji lɛ fɛɛ amli ni afee amɛkɛ shwɛɛnii ni afɔ amɛ mu lɛ fɛɛ “kuu kome.” (Yohane 10:16; Kpojiemɔ 7:3, 9, 10) Mɛɛ Asesei Agbi Jurɔ lɛ gbalɛ mli mfoniri lɛ mlibaa ni yɔɔ naakpɛɛ po nɛ! Ni nɛkɛ naabuamɔ nitsumɔ kpele nɛɛ baatsa nɔ kɛyabote jeŋ hee lɛ mli beni abaafɔ̃ gbɔmɛi akpekpei akpei abɔ ni atee amɛ shi lɛ anine koni amɛbafata he koni amɛye mfonirifeemɔŋ Asesei Agbi Jurɔ lɛ.—Zakaria 14:16-19.
Yɛ Ŋ.B. Klɛŋklɛŋ Afii Oha lɛ Mli
19. Mɛni hã esoro Asesei Agbi Jurɔ ni aye yɛ afi 32 Ŋ.B. lɛ kwraa lɛ?
19 Ŋwanejee ko bɛ he akɛ gbijurɔyelii ni sa kadimɔ fe fɛɛ ni aŋmala ashwie shi yɛ Biblia lɛ mli lɛ ateŋ ekomɛi ji nɔ ni Nyɔŋmɔ Bi, Yesu Kristo tee lɛ. Ákɛ nɔkwɛmɔnɔ lɛ, susumɔ Asesei (loo, Kpee Buui) Agbi Jurɔ ni Yesu tee yɛ afi 32 Ŋ.B. lɛ he okwɛ. Ekɛ nakai be lɛ tsu nii ni ekɛtsɔɔ anɔkwalei ni he hiaa, ni etsɛ wiemɔi asɛɛ kɛjɛ Hebri Ŋmalɛi lɛ amli ni ekɛfi enitsɔɔmɔ lɛ sɛɛ. (Yohane 7:2, 14, 37-39) Gbijurɔyeli nɛɛ mli nifeemɔ ko ni afeɔ daa ji kusum ni ji kanetsei wuji ejwɛ ni asuɔ yɛ sɔlemɔtsu lɛ mligbɛ kpo lɛ nɔ lɛ. Enɛ fataa he ni ehaa gbijurɔyeli nifeemɔi, ni tsaa nɔ aahu kɛyashiɔ nyɔɔŋ lɛ mli miishɛɛ lɛ faa babaoo. Eka shi faŋŋ akɛ, Yesu tsĩ nɛkɛ kanei wuji nɛɛ atã beni ewie akɛ: “Miji je lɛ mli la lɛ. Mɔ ni nyiɛɔ misɛɛ lɛ, enyiɛŋ duŋ mli gbi ko gbi ko, shi moŋ eeená wala la lɛ.”—Yohane 8:12.
20. Mɛni hewɔ esoro afi 33 Ŋ.B. Hehoo lɛ kwraa lɛ?
20 Kɛkɛ ni Hehoo lɛ kɛ Akpiti Gbi Jurɔ ni aye yɛ afi 33 Ŋ.B. ni he hiaa lɛ bashɛ. Yesu henyɛlɔi lɛ gbe lɛ yɛ nakai Hehoo Gbi lɛ nɔ, ni ebatsɔ mfonirifeemɔŋ Hehoo Toobi, ni gbo koni ewo “je lɛ he esha lɛ” kɛya lɛ. (Yohane 1:29; 1 Korintobii 5:7) Gbii etɛ sɛɛ, yɛ Nisan 16 lɛ, Nyɔŋmɔ tee Yesu shi kɛ mumɔŋ gbɔmɔtso ni gbooo. Enɛ kɛ akoko kpamɔ lɛ mli klɛŋklɛŋ yibii ni akɛshãa afɔle taakɛ Mla lɛ biɔ ni afee lɛ ba yɛ be kome mli. Enɛ hewɔ lɛ, Nuntsɔ Yesu Kristo ni atee lɛ shi lɛ batsɔ “klɛŋklɛŋ mɔ yɛ mɛi ni ewɔ lɛ ateŋ.”—1 Korintobii 15:20.
21. Mɛni ba yɛ Pentekoste afi 33 Ŋ.B.?
21 Pentekoste afi 33 Ŋ.B. lɛ fee gbi jurɔ ni sa kadimɔ lɛɛlɛŋ. Yudafoi kɛ mɛi ni etsake kɛba Yuda jamɔ mli lɛ ateŋ mɛi babaoo bua amɛhe naa yɛ Yerusalem yɛ gbi nɛɛ nɔ, ni Yesu kaselɔi aaafee 120 hu fata he. Beni gbijurɔyeli lɛ yaa nɔ lɛ, Nuntsɔ Yesu Kristo ni atee lɛ shi lɛ fɔse Nyɔŋmɔ mumɔ krɔŋkrɔŋ lɛ eshwie mɛi 120 lɛ anɔ. (Bɔfoi lɛ Asaji 1:15; 2:1-4, 33) Atsɔ nakai gbɛ nɔ afɔ amɛ mu ni amɛbatsɔ Nyɔŋmɔ maŋ hee ni ehala kɛtsɔ kpaŋmɔ hee lɛ ni Yesu Kristo ji teŋdamɔlɔ lɛ nɔ. Yɛ be mli ni ayeɔ nakai gbi jurɔ lɛ, Yudafoi a-osɔfonukpa lɛ kɛ mãsha aboloi enyɔ ni akɛ ŋmãa kpamɔ lɛ mli klɛŋklɛŋ yibii lɛ shã lɛ yahaa Nyɔŋmɔ. (3 Mose 23:15-17) Nɛkɛ mãsha aboloi nɛɛ feɔ adesai 144,000 ni yeee emuu, ni Yesu ‘he kɛha Nyɔŋmɔ’ koni amɛsɔmɔ akɛ “maŋtsɛmɛi kɛ osɔfoi . . . ni [baaye] maŋtsɛ yɛ shikpɔŋ lɛ nɔ” lɛ ahe mfoniri. (Kpojiemɔ 5:9, 10; 14:1, 3) Ekolɛ mãsha aboloi enyɔ lɛ feɔ anɔkwale ni eji akɛ nɛkɛ ŋwɛi nɔyelɔi nɛɛ jɛ adesai eshafeelɔi akui enyɔ, Yudafoi kɛ Jeŋmajiaŋbii ateŋ lɛ hu he mfoniri.
22. (a) Mɛni hewɔ Kristofoi yeee Mla kpaŋmɔ lɛ mli gbii juji lɛ? (b) Mɛni he wɔbaasusu yɛ nikasemɔ ni nyiɛ sɛɛ lɛ mli?
22 Beni kpaŋmɔ hee lɛ bɔi nitsumɔ yɛ Pentekoste afi 33 Ŋ.B. lɛ, no batsɔɔ akɛ Mla kpaŋmɔ momo lɛ he bɛ sɛɛnamɔ yɛ Nyɔŋmɔ hiɛ dɔŋŋ. (2 Korintobii 3:14; Hebribii 9:15; 10:16) No etsɔɔɔ akɛ Kristofoi ni afɔ amɛ mu lɛ bɛ mla shishi. Amɛbajeɔ ŋwɛi mla ni Yesu Kristo tsɔɔ, ni aŋma yɛ amɛtsuii amli lɛ shishi. (Galatabii 6:2) No hewɔ lɛ, Kristofoi yeee daa afi gbii juji etɛ, ni fata Mla kpaŋmɔ momo lɛ he lɛ. (Kolosebii 2:16, 17) Shi kɛlɛ, wɔbaanyɛ wɔkase nibii babaoo kɛjɛ subaŋ ni Nyɔŋmɔ tsuji ni hi shi kɛtsɔ Kristofoi abe lɛ hiɛ lɛ jie lɛ kpo yɛ amɛ gbijurɔyelii kɛ jamɔ kpeei krokomɛi ahe lɛ amli. Wɔbaasusu nɔkwɛmɔnii ni ŋwanejee ko bɛ he akɛ ebaakanya wɔ fɛɛ koni wɔna bɔ ni ehe hiaa ni wɔya Kristofoi ahenaabuamɔi ashishi daa lɛ ahe, yɛ wɔ nikasemɔ ni nyiɛ sɛɛ lɛ mli.
[Shishigbɛ niŋmai]
a Kwɛmɔ Insight on the Scriptures, ni Watchtower Bible and Tract Society of New York, Inc. fee lɛ, Kpo 1, baafa 820, mlijaa 1, kukuji 1 kɛ 3 lɛ hu, yɛ “Festival” shishi.
b Mɛi ni fee ji Watchtower Bible and Tract Society of New York, Inc.
Sanebimɔi Kɛha Emlitĩi
◻ Israel gbii juji wuji etɛ lɛ tsu mɛɛ yiŋtoo he nii?
◻ Mɛni kadi gbii juji ni aye yɛ Hezekia kɛ Yosia gbii lɛ amli lɛ?
◻ Mɛɛ gbi jurɔ ni sa kadimɔ waa aye yɛ afi 455 D.Ŋ.B., ni mɛni hewɔ ewoɔ wɔ hewalɛ lɛ?
◻ Mɛni sa kadimɔ yɛ Hehoo lɛ kɛ Pentekoste afi 33 Ŋ.B. he?
[Akrabatsa ni yɔɔ baafa 12]
Gbijurɔyeli He Nikasemɔ Kɛha Wɔ Ŋmɛnɛ
Esa akɛ mɛi fɛɛ ni baaná Yesu afɔleshaa ni kpataa hãa esha lɛ he sɛɛ kɛya naanɔ lɛ ahi shi yɛ nɔ ni Akpiti Gbi Jurɔ lɛ feɔ he mfoniri lɛ kɛ gbeekpamɔ naa. Nɛkɛ mfonirifeemɔŋ gbi jurɔ nɛɛ ji miishɛɛ ni Kristofoi ni afɔ amɛ mu lɛ kɛye amɛjiemɔ kɛmiijɛ nɛkɛ jeŋ fɔŋ nɛɛ mli kɛ amɛkpɔmɔ kɛmiijɛ esha fɔbuu shishi kɛtsɔ Yesu kpɔmɔ nɔ̃ lɛ nɔ lɛ he gbi jurɔ lɛ. (Galatabii 1:4; Kolosebii 1:13, 14) Gbijurɔyeli lɛ diɛŋtsɛ heɔ gbii kpawo—ni ji yibɔ ni akɛtsuɔ nii yɛ Biblia lɛ mli kɛfeɔ mumɔŋ emuuyeli he mfoniri lɛ. Mfonirifeemɔŋ gbijurɔyeli lɛ yaa nɔ aahu yɛ be mli ni Kristofoi ni afɔ amɛ mu lɛ asafo lɛ yɔɔ shikpɔŋ nɔ lɛ mli fɛɛ, ni esa akɛ aye kɛ ‘anɔkwayeli kɛ anɔkwale.’ No tsɔɔ hiɛ ní aaahi he nɔ be fɛɛ be yɛ mfonirifeemɔŋ mãsha lɛ he. Akɛ mãsha tsuɔ nii yɛ Biblia lɛ mli akɛfeɔ tsɔɔmɔi fɔji, osatofeemɔ, kɛ efɔŋ he mfoniri. Esa akɛ Yehowa anɔkwa jálɔi aná nyɛɛ amɛhã mãsha ni tamɔ nɛkɛ, ni amɛkaŋmɛ gbɛ ni efite amɛ diɛŋtsɛ amɛshihilɛi, ni amɛkaŋmɛ gbɛ hu ni efite Kristofoi asafo lɛ hetsemɔ lɛ.—1 Korintobii 5:6-8; Mateo 16:6, 12.
[Mfoniri ni yɔɔ baafa 9]
Akɛ akoko hee ni akpa lɛ ké kome bahãa daa afi yɛ Nisan 16, ni ji gbi ni atee Yesu shi lɛ nɔ
[Mfoniri ni yɔɔ baafa 10]
Ekolɛ Yesu tsĩ gbijurɔyeli kanei lɛ atã beni etsɛ lɛ diɛŋtsɛ ehe akɛ “je lɛ mli la lɛ”