Kpɛlɛmɔ Biblia lɛ nɔ Yɛ nɔ ni Eji diɛŋtsɛ lɛ Naa
“Wɔdaa Nyɔŋmɔ shi ni wɔfɔɔɔ . . . , ejaakɛ beni nyɛnine shɛ Nyɔŋmɔ wiemɔ ni nyɛnu yɛ wɔnaa lɛ nɔ lɛ, nyɛmɔ mli akɛ Nyɔŋmɔ wiemɔ, taakɛ bɔ ni eji hu lɛlɛŋ lɛ, shi jeee akɛ gbɔmɛi awiemɔ ko ni, mɔ hu ni tsuɔ hewalɛ nii yɛ nyɛ ni nyɛheɔ nyɛyeɔ lɛ amli lɛ.”—1 TESALONIKABII 2:13.
1. Mɛɛ saji ni yɔɔ Biblia lɛ mli haa esoroɔ nakai wolo lɛ kwraa lɛlɛŋ lɛ?
BIBLIA ni ji Ŋmalɛ Krɔŋkrɔŋ lɛ ji wolo ni atsɔɔ shishi ni aja babaoo fe fɛɛ yɛ je lɛŋ. Akpɛlɛɔ nɔ amrɔ nɔŋŋ akɛ eji woji ni ehe gbɛi waa ni ale lɛ ateŋ ekome. Shi, nɔ ni he hiaa fe fɛɛ ji akɛ, Biblia lɛ kɛ gbɛtsɔɔmɔ ni he hiaa waa haa gbɔmɛi ni jɛ hewolo nɔ sui kɛ maji sɔrɔtoi fɛɛ amli, ni amɛnitsumɔ loo shihilɛ mli ni amɛyɔɔ lɛ kɔɔɔ he eko. (Kpojiemɔ 14:6, 7) Biblia lɛ haa sanebimɔi tamɔ: Mɛni ji yiŋtoo ni yɔɔ adesai ashihilɛ sɛɛ? (1 Mose 1:28; Kpojiemɔ 4:11) Mɛni hewɔ ni adesai anɔyelii nyɛko amɛkɛ toiŋjɔlɛ kɛ shweshweeshwe shihilɛ ni sɛɛ tsɛɔ aba lɛ? (Yeremia 10:23; Kpojiemɔ 13:1, 2) Mɛni hewɔ gbɔmɛi gboiɔ? (1 Mose 2:15-17; 3:1-6; Romabii 5:12) Te wɔɔfee tɛŋŋ wɔkpee shihilɛ mli naagbai anaa yɛ omanyeyeli mli, yɛ jeŋ ni ehao nɛɛ mli? (Lala 119:105; Abɛi 3:5, 6) Mɛni yɔɔ wɔsɛɛ be kɛha wɔ? lɛ ahetoo, bɔ ni eŋɔɔ mɔ jwɛŋmɔ kɛ tsui fɛɛ naa.—Daniel 2:44; Kpojiemɔ 21:3-5.
2. Mɛni hewɔ Biblia lɛ haa wɔsanebimɔi lɛ ahetoo ni anyɛɔ akɛ he fɔɔ nɔ kɛmɔɔ shi lɛ?
2 Mɛni hewɔ Biblia lɛ haa sanebimɔi nɛɛ ahetoo kɛ hewalɛ lɛ? Ejaakɛ eji Nyɔŋmɔ Wiemɔ. Ekɛ adesai tsu nii ni amɛŋmala, shi taakɛ ajaje faŋŋ yɛ 2 Timoteo 3:16 lɛ, ‘Ŋmalɛ fɛɛ Ŋmalɛ jɛ Nyɔŋmɔ mumɔ lɛŋ.’ Ejeee nɔ ni jɛ bɔ ni mɔ ko tsɔɔ adesai anifeemɔi ashishi ehaa lɛ mli. “Gbalɛ [nibii ni baaba lɛ ajajemɔ, ŋwɛi kitai, Biblia mli jeŋba he tɛ] ko bako yɛ gbɔmɔ suɔmɔ naa pɛŋ, shi moŋ mumɔ krɔŋkrɔŋ lɛ tsirɛɔ Nyɔŋmɔ gbɔmɛi krɔŋkrɔŋi lɛ ni amɛwieɔ.”—2 Petro 1:21.
3. (a) Ha nɔkwɛmɔ nii ni tsɔɔ bɔ ni gbɔmɛi buɔ Biblia lɛ waa yɛ shikpɔji sɔrɔtoi anɔ. (b) Mɛni hewɔ aŋkroaŋkroi sumɔɔ ni amɛkɛ amɛwala awo oshara mli ni amɛkane Ŋmalɛi lɛ?
3 Akɛni amɛle Biblia lɛ he sɛɛnamɔ hewɔ lɛ, mɛi pii kɛ amɛhe wo tsuŋwoo, kɛ gbele he oshara po mli, koni amɛna eko ni amɛkane. Enɛ ba mli nakai afii komɛi ni eho nɛ yɛ Katolik maŋ ni ji Spain, he ni osɔfoi lɛ she gbeyei akɛ amɛhewalɛ baaje amɛdɛŋ kɛji gbɔmɛi lɛ kane Biblia lɛ yɛ amɛ diɛŋtsɛ amɛwiemɔ mli lɛ; eba mli nakai yɛ Albania hu, he ni atsu yiwalɛ mlai ahe nii yɛ nɔyelii ni heee Nyɔŋmɔ nɔ amɛyeee lɛ ashishi, bɔni afee ni akɛha hewalɛ ni jamɔ naa yɛ mɛi anɔ lɛ fɛɛ sɛɛ afo kwraa lɛ. Ni kɛlɛ, aŋkroaŋkroi ni sheɔ Nyɔŋmɔ gbeyei lɛ bu Ŋmalɛi ni amɛyɔɔ nɛɛ akɛ ejara wa waa, ni amɛkane, ni amɛkɛ amɛhe gba he sane. Yɛ Jeŋ Ta II mli, yɛ Sachsenhausen gbokɛlɛfoi aŋsara lɛ mli lɛ, atsɔ ŋaa gbɛ ni yɔɔ nigii nɔ akɛ Biblia jɛ tsuŋwoo he kome mli kɛtee ekroko mli (eyɛ mli akɛ aahi nakai feemɔ kwraa), ni mɛi ni nine shɛ nɔ lɛ kase hei komɛi amɛwo amɛyitsoŋ ni amɛkɛ mɛi krokomɛi gba he sane. Yɛ 1950 afii lɛ amli, yɛ he ni nakai beaŋ lɛ eji Komunist East Germany lɛ, Yehowa Odasefoi ni awo amɛ tsuŋ yɛ amɛhemɔkɛyeli lɛ hewɔ lɛ kɛ amɛhe wo tsuŋwoo kakadaŋŋ he oshara mli beni amɛkɛ Biblia lɛ fãi bibii komɛi haa kɛjɛɔ gbokɛlɛfonyo kome ŋɔɔ kɛyaa mɔ kroko ŋɔɔ koni amɛkane nyɔɔŋ teŋ lɛ. Mɛni hewɔ amɛfee nakai? Ejaakɛ amɛyoo akɛ Biblia lɛ ji Nyɔŋmɔ Wiemɔ, ni amɛle akɛ “jeee aboloo kɛkɛ,” shi moŋ “nɔ fɛɛ nɔ ni jɛɔ Yehowa daaŋ lɛ haa gbɔmɔ yi naa wala.” (5 Mose 8:3) Nɛkɛ wiemɔi nɛɛ, ni aŋmala yɛ Biblia lɛ mli lɛ, ye ebua nakai Odasefoi lɛ koni amɛya nɔ akɛ mɛi ni hiɛ kamɔ yɛ mumɔŋ, yɛ yiwaa kpele ni akɛba amɛnɔ lɛ fɛɛ sɛɛ.
4. Mɛɛ gbɛhe esa akɛ Biblia lɛ ana yɛ wɔshihilɛ mli?
4 Biblia lɛ jeee wolo ni sa akɛ akɛto nibii atoohe ni akwɛ mli shikome shikome kɛkɛ, ni nakai nɔŋŋ hu atoko akɛ kɛ nanemɛi heyelilɔi kpe kɛha jamɔ pɛ dani akɛtsuɔ nii. Esa akɛ akɛtsu shihilɛi ni wɔkɛkpeɔ lɛ ahe nii daa gbi, koni etsɔɔ wɔ gbɛ ni sa ni wɔnyiɛ nɔ.—Lala 25:4, 5.
Ato akɛ Akane ni Anu Shishi
5. (a) Kɛji eeehi lɛ, mɛni esa akɛ wɔteŋ mɔ fɛɛ mɔ ana eko? (b) Yɛ blema Israel lɛ, te gbɔmɛi fee tɛŋŋ amɛle nɔ ni yɔɔ Ŋmalɛi lɛ amli? (d) Te Lala 19:8-12 saa su ni ohiɛ yɛ Biblia kanemɔ he lɛ he ehaa tɛŋŋ?
5 Yɛ wɔgbii nɛɛ amli lɛ, nine nyɛɔ shɛɔ Biblia lɛ nɔ yɛ gbɛ ni waaa nɔ yɛ shikpɔji pii anɔ, ni wɔmiiwo mɔ fɛɛ mɔ ni kaneɔ Buu-Mɔɔ lɛ hewalɛ ni ena eko. Yɛ be mli ni aŋmaa Biblia lɛ, no mli lɛ tsɔnei ni akɛkalaa woji bɛ. No mli lɛ gbɔmɛi lɛ ateŋ mɛi pii bɛ amɛ diɛŋtsɛ amɛnɔ. Shi Yehowa to gbɛjianɔ kɛha etsuji koni amɛnu nɔ ni aŋma lɛ. Enɛ hewɔ lɛ, 2 Mose 24:7 bɔɔ amaniɛ akɛ, beni Mose eŋmala nibii ni Yehowa fa lɛ akɛ eŋmala lɛ fɛɛ sɛɛ lɛ, “ekɔ kpaŋmɔ lɛ wolo lɛ, ni ekane ewo maŋ lɛ toiiaŋ.” Akɛni amɛ diɛŋtsɛ amɛye naakpɛɛ nii ni ba yɛ Sinai Gɔŋ lɛ nɔ lɛ he odase hewɔ lɛ, amɛyoo akɛ nɔ ni Mose kaneɔ ehaa amɛ lɛ jɛ Nyɔŋmɔ ŋɔɔ, ni ákɛ ehe miihia ni amɛle nɛkɛ saji nɛɛ. (2 Mose 19:9, 16-19; 20:22) Wɔ hu ehe miihia ni wɔle nɔ ni aŋma yɛ Nyɔŋmɔ Wiemɔ lɛ mli lɛ.—Lala 19:8-12.
6. (a) Dani Israel maŋ lɛ aaabote Shiwoo Shikpɔŋ lɛ nɔ lɛ, mɛni Mose fee? (b) Mɛɛ gbɛ nɔ wɔɔtsɔ wɔkase Mose nɔkwɛmɔ nɔ lɛ?
6 Beni Israel maŋ lɛ saa amɛhe ni amɛfo Yordan Faa lɛ kɛbote Shiwoo Shikpɔŋ lɛ nɔ, koni amɛkpa amɛ nyiɛmɔ kɛ shikpaa shihilɛ yɛ ŋa lɛ nɔ lɛ, ebafee nɔ ni sa kɛha amɛ akɛ amɛsaa amɛtĩ Yehowa Mla lɛ kɛ bɔ ni ekɛ amɛ yeɔ ehaa lɛ mli ekoŋŋ. Nyɔŋmɔ mumɔ kanya Mose, ni esaa ekɛ amɛ tĩ Mla lɛ mli ekoŋŋ. Ekai amɛ nibii ni yɔɔ Mla lɛ mli, ni emamɔ shishitoo mlai kɛ sui ni esa akɛ ena amɛkɛ Yehowa teŋ wekukpaa lɛ nɔ hewalɛ lɛ hu nɔ mi eha amɛ. (5 Mose 4:9, 35; 7:7, 8; 8:10-14; 10:12, 13) Beni wɔtsuɔ nitsumɔi heei aloo wɔkɛ shihilɛi heei kpeɔ ŋmɛnɛ lɛ, wɔ hu ehe baaba sɛɛnamɔ waa kɛha wɔ akɛ wɔɔsusu bɔ ni esa akɛ Ŋmalɛ mli ŋaawoo ana nɔ ni wɔfeɔ lɛ nɔ hewalɛ eha lɛ he.
7. Beni Israelbii lɛ fo Yordan lɛ sɛɛ nɔŋŋ lɛ, mɛni afee koni eha Yehowa Mla lɛ aka amɛjwɛŋmɔi kɛ amɛtsuii amli?
7 Beni Israel fo Yordan Faa lɛ sɛɛ nɔŋŋ lɛ, gbɔmɛi lɛ bua amɛhe naa ekoŋŋ koni amɛsaa amɛtĩ nɔ ni Yehowa ekɛɛ amɛ kɛtsɔ Mose nɔ lɛ mli. Maŋ lɛ bua amɛhe naa aaafee kilomitai 50 yɛ Yerusalem kooyigbɛ. Akutsei lɛ fã yɛ Ebal Gɔŋ lɛ hiɛ, ni fã hu yɛ Gerizim Gɔŋ lɛ hiɛ. Jɛmɛ ji he ni Yoshua “kane mla lɛ mli wiemɔi lɛ fɛɛ, jɔɔmɔ lɛ kɛ loomɔ lɛ” yɛ. Enɛ hewɔ lɛ, hii, kɛ yei, kɛ gbekɛbii, kɛ gbɔi ni yɔɔ amɛteŋ lɛ fɛɛ nu mlai ni kudɔɔ jeŋba ni haŋ amɛna Yehowa nɔkpɛlɛmɔ, kɛ jɔɔmɔi ni amɛnine baashɛ nɔ kɛ amɛbo Yehowa toi lɛ fɛɛ akanemɔ ekoŋŋ yɛ ebe naa pɛpɛɛpɛ. (Yoshua 8:34, 35) Ehe miihia ni amɛha nɔ ni ji ekpakpa kɛ nɔ ni ji efɔŋ yɛ Yehowa hiɛ lɛ ahi amɛjwɛŋmɔ mli faŋŋ. Kɛfata he lɛ, ehe miihia ni amɛkpɛ́ suɔmɔ kɛha nɔ ni ji ekpakpa, kɛ nyɛɛ kɛha nɔ ni ji efɔŋ yɛ amɛtsuii anɔ, tamɔ bɔ ni wɔteŋ mɔ fɛɛ mɔ feɔ ŋmɛnɛ lɛ.—Lala 97:10; 119:103, 104; Amos 5:15.
8. Mɛɛ sɛɛnamɔ yɔɔ Nyɔŋmɔ Wiemɔ lɛ ni akaneɔ yɛ bei pɔtɛɛ amli yɛ Israel maŋ henaabuamɔi komɛi ashishi lɛ he?
8 Kɛfata Mla lɛ kanemɔi yɛ nakai bei ni sa kadimɔ waa lɛ amli lɛ he lɛ, atsɔɔ gbɛjianɔtoo ko kɛha Nyɔŋmɔ Wiemɔ lɛ kanemɔ daa yɛ 5 Mose 31:10-12. Daa afii kpawo lɛ, esa akɛ maŋ muu lɛ fɛɛ abua amɛhe naa ni amɛbo Nyɔŋmɔ Wiemɔ lɛ kanemɔ toi. Enɛ bafee mumɔŋ niyenii kɛha amɛ. Eha shiwoi ni kɔɔ Seshi lɛ he lɛ tee nɔ ehi amɛjwɛŋmɔi kɛ amɛtsuii amli, ni no tsɔɔ anɔkwafoi lɛ agbɛ kɛtee Mesia lɛ he. Gbɛjianɔtoi kɛha mumɔŋ niyenii yeli ni ato shishi beni Israel yɔɔ ŋa lɛ nɔ lɛ sɛɛ efooo beni amɛbote Shiwoo Shikpɔŋ lɛ nɔ lɛ. (1 Korintobii 10:3, 4) Shi moŋ, aha Nyɔŋmɔ Wiemɔ lɛ tee hiɛ babaoo kɛtsɔ nibii krokomɛi ni gbalɔi lɛ jie lɛ kpo lɛ anɔ.
9. (a) Ani be mli ni Israelbii lɛ ebua amɛhe naa yɛ kui wuji amli pɛ dani amɛkaneɔ Ŋmalɛi lɛ? Tsɔɔmɔ mli. (b) Mɛɛ gbɛ nɔ atsɔɔ akɛ Ŋmalɛi lɛ amli famɔi lɛ haa yɛ wekui amli, ni afeɔ kɛ mɛɛ yiŋtoo?
9 Esaaa ni atsiɔ̃ Nyɔŋmɔ Wiemɔ lɛ mli ŋaawoo lɛ mlitii naa awoɔ bei ni gbɔmɛi lɛ buaa amɛhe naa babaoo yɛ he kome lɛ pɛ mli. Esa akɛ asusu Nyɔŋmɔ Wiemɔ lɛ fãi komɛi, kɛ shishitoo mlai ni yɔɔ mli lɛ ahe daa gbi. (5 Mose 6:4-9) Yɛ hei pii ŋmɛnɛ lɛ, mɛi ni darako yɛ afii amli lɛ hu nyɛɔ amɛnaa amɛ diɛŋtsɛ amɛ Biblia, ni ehe baaba sɛɛnamɔ waa kɛha amɛ akɛ amɛaafee nakai. Shi jeee nakai nibii ji, yɛ blema Israel. Nakai beaŋ lɛ, kɛ fɔlɔi kɛ famɔi miiha kɛmiijɛ Nyɔŋmɔ Wiemɔ lɛ mli lɛ, esa akɛ amɛkɛ amɛhe afɔ̃ nɔ ni amɛkase amɛwo amɛyitsoŋ kɛ anɔkwalei ni amɛbuɔ waa yɛ amɛtsuii amli lɛ nɔ, kɛfata nibii bibii fɛɛ ni ekolɛ amɛ diɛŋtsɛ amɛŋmala amɛshwie shi lɛ ahe. Kɛtsɔ nii amlitii nɔtonɔto nɔ lɛ, amɛbaabɔ mɔdɛŋ ni amɛdũ suɔmɔ kɛha Yehowa kɛ egbɛ̀i lɛ amɛwo amɛbii lɛ amli. Oti ni ma amɛhiɛ lɛ jeee ni amɛkase nii amɛwo amɛyitsoŋ obɔ̃ kɛkɛ, shi moŋ ni aye abua weku lɛ mli bii lɛ ateŋ mɔ fɛɛ mɔ koni ehi shi bɔ ni baatsɔɔ akɛ ejieɔ suɔmɔ kpo ehaa Yehowa kɛ e-Wiemɔ lɛ.—5 Mose 11:18, 19, 22, 23.
Ŋmalɛ Kanemɔ yɛ Kpeehei Lɛ
10, 11. Mɛɛ Ŋmalɛ kanemɔ he gbɛjianɔtoo ko akɛtsu nii yɛ kpeehei lɛ, ni te Yesu bu nɛkɛ bei nɛɛ eha tɛŋŋ?
10 Beni aloo Yudafoi lɛ kɛtee Babilon nomŋɔɔ mli lɛ sɛɛ be ko mli lɛ, ato kpeehei ahe gbɛjianɔ akɛ hei kɛha jamɔ. Akwɛ Ŋmalɛi lɛ anɔ aŋmala ekrokomɛi babaoo, bɔni afee ni akane Nyɔŋmɔ Wiemɔ lɛ ni asusu he yɛ nɛkɛ hei ni akpeɔ yɛ nɛɛ. Enɛ ji oti kome ko ni ha anyɛ abaa blema niŋmaai ni akɛ niji ŋmala, ni Hebri Ŋmalɛi lɛ fãi komɛi yɔɔ mli lɛ aaashɛ 6,000 sɔŋŋ yi lɛ.
11 Kpeehe sɔɔmɔ lɛ fã ko ni he hiaa waa ji Torah, ni kɛ ŋmɛnɛŋmɛnɛ beaŋ Bibliai amli klɛŋklɛŋ woji enumɔ lɛ yeɔ egbɔ lɛ kanemɔ. Bɔfoi lɛ Asaji 15:21 lɛ bɔɔ amaniɛ akɛ yɛ Ŋ.B. klɛŋklɛŋ afii oha lɛ mli lɛ, akaneɔ nɛkɛ wolo nɛɛ yɛ daa Hejɔɔmɔ Gbi lɛ nɔ, ni Mishnah lɛ tsɔɔ akɛ beni shɛɔ afii ohai enyɔ lɛ mli lɛ, no mli lɛ akaneɔ Torah lɛ yɛ otsi lɛ mli gbii ni ji enyɔ kɛ enumɔ lɛ hu nɔ. Aŋkroaŋkroi pii kɛ amɛhe woɔ mli ni amɛkaneɔ hei ni aha amɛ lɛ, mɔ ko nyiɛɔ mɔ kroko sɛɛ. Nɔ ni Yudafoi ni hi Babilon lɛ fɔɔ feemɔ ji, amɛkaneɔ Torah muu lɛ fɛɛ daa afi; nɔ ni afɔɔ feemɔ yɛ Palestina ji, atoɔ nikanemɔ nɛɛ he gbɛjianɔ awoɔ be sɛɛjekɛmɔ ni ji afii etɛ mli. Akaneɔ niŋmaa lɛ fã ko kɛjɛɔ Gbalɔi lɛ amli ni atsɔɔ shishi. Nɔ ni Yesu fɔɔ feemɔ ji akɛ, eyaa he ni ato kɛha Hejɔɔmɔ Gbi Biblia kanemɔ gbɛjianɔtoi ni yɔɔ he ni ehi lɛ.—Luka 4:16-21.
Mɔ Diɛŋtsɛ Nɔkpɛlɛmɔ kɛ Ekɛ Nitsumɔ
12. (a) Beni Mose kane Mla lɛ eha gbɔmɛi lɛ, mɛɛ gbɛ nɔ gbɔmɛi lɛ na he sɛɛ yɛ? (b) Te gbɔmɛi lɛ here nɔ amɛha tɛŋŋ?
12 Atooo Ŋmalɛi ni jɛ mumɔŋ lɛ kanemɔ he gbɛjianɔ akɛ efee nifeemɔ folo ko kɛkɛ. Ni afeee ni akɛha gbɔmɛi lɛ ale nibii ni amɛtaoɔ amɛle lɛ kɛkɛ. Beni Mose kane “kpaŋmɔ lɛ wolo lɛ” eha Israel yɛ ŋa kplanaa ni yɔɔ Sinai Gɔŋ lɛ hiɛ lɛ nɔ lɛ, efee nakai koni amɛle gbɛnaa nii ni jwere amɛnɔ yɛ Nyɔŋmɔ hiɛ, koni amɛtsu nibii nɛɛ ahe nii. Ani amɛbaafee nakai? Nikanemɔ lɛ bi ni amɛha hetoo. Gbɔmɛi lɛ yoo enɛ, ni amɛjie naa waa ni amɛkɛɛ: “Nii fiaa ni Yehowa ewie lɛ, wɔɔfee ni wɔɔbo toi.”—2 Mose 24:7; okɛto 2 Mose 19:8; 24:3 he.
13. Beni Yoshua kane loomɔi kɛha toigbele lɛ, mɛni abi ni gbɔmɛi lɛ afee, yɛ mɛɛ yiŋtoo hewɔ?
13 Yɛ sɛɛ mli, beni Yoshua kane jɔɔmɔi kɛ loomɔi ni awo amɛ shi yɛ he lɛ etsɔɔ maŋ lɛ, abi ni amɛjie naa. Yɛ loomɔi lɛ eko fɛɛ eko sɛɛ lɛ, akɛ famɔ ha amɛ akɛ: “Ni maŋ muu lɛ fɛɛ akɛɛ: ‘Amen!’ ” (5 Mose 27:4-26) Enɛ hewɔ lɛ, aŋma afɔ̃ shi akɛ amɛsusu otii lɛ fɛɛ ahe ekomekome ni amɛkpɛlɛ Yehowa fɔbuu ni ekɛbaa nɛkɛ efɔji ni atsi tã nɛɛ fɛɛ nɔ lɛ anɔ. Mɛɛ nifeemɔ wulu eeeji nɛkɛ, beni maŋ muu lɛ fɛɛ kɛ gbeewalɛ tsɔɔ enɔkpɛlɛmɔ lɛ!
14. Yɛ Nehemia gbii lɛ amli lɛ, mɛni hewɔ Mla lɛ kanemɔ yɛ maŋ lɛ he ba sɛɛnamɔ waa kɛha amɛ lɛ?
14 Yɛ Nehemia gbii lɛ amli, beni gbɔmɛi lɛ fɛɛ bua amɛhe naa yɛ Yerusalem koni amɛbo Mla lɛ toi lɛ, amɛna akɛ amɛyeee famɔi ni aŋmala yɛ mli lɛ anɔ kɛmɔɔɔ shi. Nakai be lɛ mli lɛ, amɛkɛ oyaiyeli tsu nɔ ni amɛkase lɛ he nii. Ni mɛni jɛ mli ba? “Amɛmii shɛ amɛhe naakpa.” (Nehemia 8:13-17) Yɛ otsi ni akɛkane Biblia lɛ daa gbi yɛ gbijurɔyeli lɛ mli lɛ sɛɛ lɛ, amɛyoo akɛ nibii babaoo he miihia lolo. Amɛtsɔ sɔlemɔ nɔ amɛsaa amɛtĩ bɔ ni Yehowa kɛ ewebii ye eha, kɛjɛ Abraham gbii lɛ amli kɛbaa lɛ he yinɔsane lɛ mli. Enɛɛmɛi fɛɛ kanya amɛ ni amɛkã kita akɛ amɛbaaye Mla lɛ mli taomɔ nii lɛ anɔ, ni amɛbaatsi amɛhe kɛjɛ maŋsɛɛbii kɛ gbalashihilɛ mlibotemɔ he, ni amɛbaakpɛlɛ gbɛnaa nii ni sɔlemɔwe lɛ kɛ emli sɔɔmɔ kɛfɔɔ amɛnɔ lɛ nɔ.—Nehemia, yitsei 8-10.
15. Yɛ mɛɛ gbɛ nɔ famɔi ni yɔɔ 5 Mose 6:6-9 lɛ tsɔɔ akɛ, Nyɔŋmɔ Wiemɔ lɛ mli tsɔsemɔ ni akɛaaha yɛ wekui amli lɛ akafee nɔ ko ni aafee kɛkɛ?
15 Nakai nɔŋŋ hu, yɛ weku lɛ mli lɛ, ataooo ni Ŋmalɛi lɛ atsɔɔmɔ afee nɔ ko ni aafee kɛkɛ. Taakɛ wɔna kɛtsɔ hiɛ momo lɛ, akɛ mfoniri-feemɔŋ wiemɔ tsu nii yɛ 5 Mose 6:6-9, ni akɛɛ gbɔmɛi lɛ ni ‘amɛkɛ Nyɔŋmɔ wiemɔi lɛ afimɔ amɛ nineshi akɛ okadi’—ni amɛtsɔ nɔkwɛmɔ nɔ kɛ nifeemɔ fɛɛ nɔ amɛtsɔɔ suɔmɔ ni amɛyɔɔ kɛha Yehowa gbɛi lɛ. Ni esa akɛ amɛkɛ Nyɔŋmɔ wiemɔi lɛ afee ‘hiɛnaa-taramɔ nii yɛ amɛhiŋmɛii ateŋ’—ni amɛtsɔ nakai feemɔ nɔ amɛkai shishitoo mlai ni yɔɔ Ŋmalɛi lɛ amli lɛ daa gbi, ni amɛkɛ enɛɛmɛi atsu nii akɛ nɔdaamɔ nɔ kɛha amɛyiŋkpɛi. (Okɛ wiemɔi ni akɛtsu nii yɛ 2 Mose 13:9, 14-16 lɛ ato he okwɛ.) Esa akɛ ‘amɛŋmala yɛ amɛ shinaa tsei kɛ amɛ agbói ahe’—koni amɛtsɔ nakai feemɔ nɔ amɛha ale amɛshiai kɛ amɛ akutsei lɛ akɛ hei ni abuɔ Nyɔŋmɔ wiemɔ lɛ yɛ ni akɛtsuɔ nii hu. Yɛ wiemɔ kroko mli lɛ, esa akɛ amɛshihilɛ aye odase babaoo akɛ amɛsumɔɔ Yehowa jalɛ mlai lɛ ni amɛkɛtsuɔ nii hu. Kwɛ bɔ ni enɛ he baaba sɛɛnamɔ kɛha amɛ! Ani Nyɔŋmɔ Wiemɔ lɛ he hiaa waa tamɔ nakai yɛ wɔshia mli bii lɛ adaa gbi shihilɛ mli? Dɔlɛ sane ji akɛ, Yudafoi lɛ ha enɛɛmɛi fɛɛ tsɔmɔ nibii ni amɛmiifee kɛkɛ, ni amɛŋmalaa ŋmalɛi amɛwoɔ too-wolo bibii anɔ ni amɛkɛtsotsoroɔ amɛkuɛ, tamɔ nɔ ni eji ŋkunyaayeli nibii komɛi. Amɛjamɔ lɛ jɛɛɛ amɛtsui mli dɔŋŋ, ni Yehowa kpoo.—Yesaia 29:13, 14; Mateo 15:7-9.
Gbɛnaa Nii ni Kã Mɛi ni Hiɛ Nɔkwɛmɔ Gbɛhei lɛ Anɔ
16. Mɛni hewɔ Ŋmalɛ lɛ kanemɔ daa he hiaa Yoshua lɛ?
16 Agbala jwɛŋmɔ yɛ gbɛ krɛdɛɛ nɔ kɛtee mɛi ni ji nɔkwɛlɔi yɛ maŋ lɛ mli lɛ anɔ, yɛ sane ni kɔɔ Ŋmalɛ kanemɔ he lɛ gbɛfaŋ. Yehowa kɛɛ Yoshua akɛ: “Ojwɛŋ nɔ ni oye mla lɛ . . . fɛɛ nɔ.” Bɔni afee ni enyɛ etsu nakai gbɛnaa nii lɛ he nii jogbaŋŋ lɛ, akɛɛ lɛ akɛ: “Jwɛŋmɔ he nyɔɔŋ kɛ shwane, . . . ejaakɛ no aaaha otsɔ nɔbatsɛ kɛ hiɛshikalɔ.” (Yoshua 1:7, 8) Taakɛ eji anɔkwale yɛ Kristofonyo nɔkwɛlɔ fɛɛ nɔkwɛlɔ he ŋmɛnɛ lɛ, Ŋmalɛi lɛ ni Yoshua kaneɔ daa lɛ baaye abua lɛ ni eha kitai pɔtɛɛ komɛi ni Yehowa ewo E-webii lɛ ahi ejwɛŋmɔ mli jogbaŋŋ. Ehe miihia ni Yoshua anu bɔ ni Yehowa kɛ E-tsuji ye eha yɛ shihilɛi sɔrɔtoi amli lɛ hu shishi. Beni ekaneɔ wiemɔi ni kɔɔ Nyɔŋmɔ yiŋtoo he lɛ, ehe miihia ni esusu gbɛnaa nii ni ka lɛ diɛŋtsɛ enɔ, yɛ nakai yiŋtoo lɛ gbɛfaŋ lɛ he jogbaŋŋ.
17. (a) Kɛji maŋtsɛmɛi lɛ baana Ŋmalɛ lɛ kanemɔ he sɛɛ yɛ bɔ ni Yehowa ewie lɛ naa lɛ, mɛni hu he hiaa kɛfata amɛ nikanemɔ lɛ he? (b) Mɛni hewɔ Biblia kanemɔ daa kɛ enɔjwɛŋmɔ he hiaa waa kɛha Kristofoi onukpai lɛ?
17 Yehowa kɛ famɔ ha akɛ mɔ fɛɛ mɔ ni sɔmɔɔ akɛ maŋtsɛ yɛ E-webii anɔ lɛ akwɛ Nyɔŋmɔ Mla lɛ nɔ eŋma eko, yɛ emaŋtsɛyeli lɛ shishijee mli, ni ebaakwɛ nɔ ni osɔfoi lɛ kɛto lɛ nɔ eŋma enɛ. No sɛɛ lɛ, esa akɛ “ekane mli ewala gbii abɔ fɛɛ.” Oti hewɔ ni efeɔ enɛ lɛ jeee ni ekase emli saji ewo eyitsoŋ kɛkɛ. Shi moŋ, nɔ hewɔ ji akɛ, koni “ekase Yehowa, e-Nyɔŋmɔ lɛ, gbeyeishemɔ,” koni “etsui akawo ehe nɔ fe enyɛmimɛi lɛ.” (5 Mose 17:18-20) Enɛ biɔ ni ejwɛŋ nɔ ni ekaneɔ lɛ nɔ jogbaŋŋ. Eka shi faŋŋ akɛ maŋtsɛmɛi lɛ ekomɛi susu akɛ amɛ nitsumɔi ahewɔ lɛ, amɛnaaa deka ni amɛkɛaafee enɛ, ni enɛ ha maŋ muu lɛ fɛɛ na amanehulu yɛ enɛ ni amɛfeee lɛ hewɔ. Eka shi faŋŋ akɛ onukpai lɛ anitsumɔ yɛ Kristofoi asafo lɛ mli lɛ tamɔɔɔ maŋtsɛmɛi anɔ yɛ gbɛ ko kwraa nɔ. Shi kɛlɛ, taakɛ eji yɛ maŋtsɛmɛi lɛ agbɛfaŋ lɛ, ehe miihia waa ni onukpai lɛ akane Nyɔŋmɔ Wiemɔ lɛ ni amɛjwɛŋ nɔ. Nakai ni amɛaafee lɛ baaye abua amɛ ni amɛya nɔ amɛhiɛ mɛi ni atuu amɛkwɛmɔ awo amɛdɛŋ lɛ ahe jwɛŋmɔ kpakpa. Ebaaye ebua amɛ hu ni amɛtsu amɛ gbɛnaa nii akɛ tsɔɔlɔi lɛ he nii yɛ gbɛ ni woɔ Nyɔŋmɔ hiɛ nyam ni ewajeɔ nanemɛi Kristofoi yɛ mumɔŋ lɛlɛŋ lɛ nɔ.—Tito 1:9; okɛto Yohane 7:16-18 he; okɛ 1 Timoteo 1:6, 7 ato he.
18. Mɛɛ nɔkwɛmɔ nɔ ko ni bɔfo Paulo fee, Biblia lɛ kanemɔ kɛ ekasemɔ daa baaye ebua wɔ ni wɔnyiɛ sɛɛ?
18 Bɔfo Paulo, ni ji klɛŋklɛŋ afii oha lɛ mli Kristofonyo nɔkwɛlɔ lɛ, ji mɔ ko ni le Ŋmalɛi ni jɛ mumɔŋ lɛ jogbaŋŋ. Beni eye gbɔmɛi ni hi blema Tesalonika lɛ odase lɛ, enyɛ ejɛ Ŋmalɛi lɛ amli ekɛ amɛ susu saji ahe jogbaŋŋ kɛmɔ shi, ni eye ebua amɛ koni amɛnu shishi. (Bɔfoi lɛ Asaji 17:1-4) Eshɛ toibolɔi anɔkwafoi lɛ atsuii ahe. Enɛ hewɔ lɛ, mɛi ni bo lɛ toi lɛ ateŋ mɛi pii batsɔmɔ heyelilɔi. (1 Tesalonikabii 2:13) Ani kɛtsɔ o-Biblia kanemɔ kɛ ekasemɔ gbɛjianɔtoo lɛ nɔ lɛ, onyɛɔ ojɛɔ Ŋmalɛi lɛ amli okɛ mɛi susuɔ saji ahe jogbaŋŋ kɛmɔɔ shi? Ani gbɛhe ni Biblia kanemɔ yɔɔ yɛ oshihilɛ mli, kɛ bɔ ni ofeɔ lɛ ohaa lɛ yeɔ odase akɛ ohiɛ sɔɔ nɔ ni Nyɔŋmɔ Wiemɔ lɛ ni oyɔɔ lɛ tsɔɔ lɛ lɛlɛŋ? Wɔbaasusu bɔ ni mɛi ni amɛbe he gbɛjianɔtoo yɔɔ kpɛŋŋ lɛ po baafee ni amɛha sanebimɔi nɛɛ ahetoo akɛ hɛɛ, lɛ he, yɛ nikasemɔ ni nyiɛ sɛɛ lɛ mli.
Te Obaaha Hetoo Oha Tɛŋŋ?
◻ Mɛni hewɔ gbɔmɛi sumɔɔ ni amɛkɛ amɛwala kɛ heyeli awo oshara mli ni amɛkane Biblia lɛ?
◻ Kɛ wɔsusu gbɛjianɔ ni ato kɛha blema Israel koni amɛnu Nyɔŋmɔ Wiemɔ lɛ he lɛ, mɛɛ sɛɛ wɔnaa?
◻ Mɛni esa akɛ wɔkɛ nɔ ni wɔkaneɔ yɛ Biblia lɛ mli lɛ afee?
◻ Mɛni hewɔ Biblia kanemɔ kɛ enɔjwɛŋmɔ he hiaa waa kɛha Kristofoi onukpai titri lɛ?
[Mfoniri ni yɔɔ baafa 9]
Yehowa kɛɛ Yoshua akɛ: “Jwɛŋmɔ he nyɔɔŋ kɛ shwane”