Yitso Enumɔ
Amɛhemɔkɛyeli Je Kaa Ni Fe Fɛɛ Lɛ Mli Shweshweeshwe
1. Te mɛi pii nuɔ Nyɔŋmɔ ni atuɔ he ahãa lɛ kɛ amɛ jakumaŋ lɛ he amɛhãa tɛŋŋ?
ANI esa akɛ okɛ ohetuu-kɛhamɔ aha Nyɔŋmɔ aloo okɛha maŋ ni oyɔɔ mli lɛ? Mɛi pii baaha hetoo akɛ, ‘Mikɛ woo ni bulɛ yɔɔ mli haa enyɔ lɛ fɛɛ. Mijáa Nyɔŋmɔ yɛ bɔ ni mijamɔ lɛ tsɔɔ lɛ naa; yɛ nakai beaŋ nɔŋŋ lɛ, mikɛ mihe eha anɔkwa ni miyeɔ mijakumaŋ lɛ.’
2. Babilon maŋtsɛ lɛ ji jamɔŋ kɛ maŋkwramɔŋ gbɔmɔ wulu yɛ mɛɛ gbɛ nɔ?
2 Srɔtofeemɔ ni kã jamɔ mli hetuu-kɛhamɔ kɛ maŋhedɔɔ teŋ lɛ baanyɛ afee nɔ ni ehiɛ eha ŋmɛnɛ, shi enɛ bɛ blema Babilon kwraa. Yɛ anɔkwale mli lɛ, akɛ nɔ ni ji je lɛ nɔ̃ lɛ kɛ nɔ ni yɔɔ krɔŋkrɔŋ lɛ efutu aahu akɛ anyɛɛɛ ana srɔtofeemɔ lɛ yɛ bei komɛi amli. Nilelɔ Charles F. Pfeiffer ŋma akɛ: “Yɛ blema Babilon lɛ, maŋtsɛ lɛ sɔmɔɔ akɛ Osɔfonukpa kɛ maŋ lɛ nɔyelɔ fɛɛ. Eshãa afɔlei, ni lɛ etsɔɔ bɔ ni eshishibii lɛ ajamɔ shihilɛ baaji.”
3. Mɛni tsɔɔ akɛ Nebukadnezar jáa nyɔŋmɔi waa?
3 Susumɔ Maŋtsɛ Nebukadnezar he okwɛ. Egbɛi lɛ shishi ji “Oo Nebo, Buu Gboshiniyelɔ lɛ He!” Nebo ji Babilonia nilee kɛ okwaayeli nyɔŋmɔ. Nebukadnezar ji mɔ ni sumɔɔ jamɔ waa. Taakɛ wɔna kɛtsɔ hiɛ lɛ, ema ni esaa Babilonia nyɔŋmɔi pii asɔlemɔtsui, ni mɔ ni etu ehe eha lɛ titri ji Marduk, mɔ ni ekɛ tawuu mli kunimyelii ahe yijiemɔ ha lɛ lɛ.a Etamɔ nɔ ni Nebukadnezar kɛ ehe fɔ̃ ŋkunyaayeli nɔ waa ni ekɛto etawuu he gbɛjianɔ.—Ezekiel 21:18-23.
4. Tsɔɔmɔ bɔ ni Babilon jamɔ su lɛ yɔɔ hã lɛ mli.
4 Yɛ anɔkwale mli lɛ, jamɔ mumɔ ko egbɛ eshwã Babilon fɛɛ. Maŋtiase lɛ pupuuɔ ehe yɛ gbatsũi fe 50 ni ajáa nyɔŋmɔi kɛ nyɔŋmɔyei babaoo yɛ mli, ní Anu (atatuiaŋ nyɔŋmɔ), Enlil (shikpɔŋ, kɔɔyɔɔ, kɛ ahum nyɔŋmɔ), kɛ Ea (nui anɔ nyɔŋmɔ) lɛ fata he lɛ ahe. Sin (nyɔɔŋtsere nyɔŋmɔ), Shamash (hulu nyɔŋmɔ), kɛ Ishtar (fɔmɔ nyɔŋmɔyoo) lɛ hu feɔ triniti kroko. Ŋkunyaayeli, ashwaifeemɔ, kɛ ŋulamiiaŋkwɛmɔ tsu nɔ titri yɛ Babilonia jamɔ mli.
5. Mɛɛ kaa jamɔ su ni yɔɔ Babilon lɛ kɛbafɔ Yudafoi ni yɔɔ nomŋɔɔ mli lɛ ahiɛ?
5 Gbɔmɛi ni jáa nyɔŋmɔi babaoo ni ahiɔ amɛteŋ lɛ batsɔ kaa kpele kɛha Yuda nomii lɛ. Yɛ afii ohai abɔ ni tsɔ hiɛ lɛ, no mli lɛ Mose ebɔ Israelbii lɛ kɔkɔ akɛ kɛ amɛtse atua amɛshi Mlawolɔ ni Fe Fɛɛ lɛ, nɔ ni baajɛ mli aba amɛnɔ lɛ baafee oshara. Mose kɛɛ amɛ akɛ: “Yehowa aaakpalao kɛ omaŋtsɛ ni oooŋɔto onɔ lɛ kɛaatee maŋ ni bo loo otsɛmɛi lɛ leee lɛ mli, ni jɛi oooyasɔmɔ nyɔŋmɔi krokomɛi, tsei kɛ tɛi yɛ.”—5 Mose 28:15, 36.
6. Mɛni hewɔ Babilon shihilɛ lɛ kɛ kaa krɛdɛɛ ko bafɔ Daniel, Hanania, Mishael, kɛ Azaria hiɛ lɛ?
6 Agbɛnɛ Yudafoi lɛ na amɛhe yɛ shihilɛ ni tamɔ nɛkɛ pɛpɛɛpɛ mli. Emuuyeli mli ni amɛaahiɛ amɛha Yehowa lɛ baawa, titri lɛ kɛha Daniel, Hanania, Mishael, kɛ Azaria. Aje gbɛ ahala Hebri gbekɛbii ejwɛ nɛɛ koni atsɔse amɛ kɛha nɔyeli lɛ sɔɔmɔ. (Daniel 1:3-5) Kaimɔ akɛ, akɛ Babilonia gbɛi po ha amɛ—Belteshazar, Shadrak, Meshak, kɛ Abednego—ekolɛ koni ekanya amɛ ni amɛhi shi yɛ shihilɛ hee ni amɛnaa amɛhe yɛ mli lɛ mli.b Nɛkɛ hii nɛɛ agbɛhei ni nɔ kwɔlɔ lɛ baaha ayoo kpoomɔ ni amɛaakpoo jamɔ ni amɛkɛaaha shikpɔŋ lɛ nɔ nyɔŋmɔi lɛ waa diɛŋtsɛ—eeefee maŋjwaa nii po.
SHIKA AMAGA KO KƐ HEGBEYEIWOO KO BA
7. (a) Tsɔɔmɔ bɔ ni amaga ni Nebukadnezar kɛma shi lɛ yɔɔ hã lɛ mli. (b) Mɛni ji yiŋtoo ni yɔɔ amaga ni akɛma shi lɛ sɛɛ?
7 Eka shi faŋŋ akɛ bɔni afee ni ewo ekomefeemɔ ni yɔɔ emaŋtsɛyeli lɛ mli lɛ mli hewalɛ hewɔ lɛ, Nebukadnezar kɛ shika amaga ko ma shi yɛ Dura ŋa lɛ nɔ. Ekwɔlɛ ji mitai 27 ni elɛɛmɔ ji mitai 2.7.c Mɛi komɛi heɔ yeɔ akɛ amaga lɛ ji akulashiŋ loo shiŋmilitso ko ni ma shi jaŋŋ. Ekolɛ amaga kpeteŋkpele ni esu tamɔ gbɔmɔ lɛ ni damɔ shi kɛha Nebukadnezar diɛŋtsɛ loo nyɔŋmɔ Nebo lɛ ma shishitoo ko ni kwɔ gojoo nɔ. Bɔ fɛɛ bɔ ni sane lɛ ji lɛ, kaimɔnɔ ni kwɔ gojoo nɛɛ ji Babilonia Maŋtsɛyeli lɛ he okadi. Bɔ ni eji nɛɛ hewɔ lɛ, afee koni ana ni akɛ woo aha lɛ.—Daniel 3:1.
8. (a) Namɛi atsɛ́ kɛba amaga lɛ naagbelemɔ lɛ, ni mɛni abiɔ ni mɛi fɛɛ ni yɔɔ jɛmɛ lɛ afee? (b) Mɛni baafee mɛi ni baakpoo amaga lɛ ni amɛaakula shi yɛ ehiɛ lɛ atoigbalamɔ?
8 No hewɔ lɛ, Nebukadnezar to enaagbelemɔ he gbɛjianɔ. Ebua amraloi, lumɛi, akutseiaŋ onukpai, kojolɔi, nitolɔi, mlatsɔɔlɔi, maŋkraloi, kɛ shikpɔji lɛ anɔ onukpai lɛ fɛɛ anaa. Kɛkɛ ni shiɛlɔ ko bo waa akɛ: “Nyɛ maji kɛ asafoi kɛ wiemɔi! aakɛɛ nyɛ akɛ: Be fɛɛ be ni nyɛaanu koofeŋ kɛ blɛ kɛ saŋku kɛ kete kɛ obɛnta kɛ obonu kɛ jooi srɔtoi agbɛɛmɔ lɛ, nyɛkulaa shi, ni nyɛjáa shika amaga lɛ ni maŋtsɛ Nebukadnezar kɛma shi lɛ; ni mɔ fɛɛ mɔ ni kulaaa shi ni ejá lɛ, nakai ŋmɛlɛtswaa lɛ nɔ nɔŋŋ lɛ aaashɛ lɛ afɔ la kɛ flɔnɔɔ ni tsoɔ grigri lɛ mli.”—Daniel 3:2-6.
9. Mɛni amaga ni Nebukadnezar kɛma shi lɛ ni akulaa shi yɛ ehiɛ lɛ tsɔɔ yɛ faŋŋ mli?
9 Mɛi komɛi heɔ yeɔ akɛ Nebukadnezar to gbijurɔyeli nɛɛ he gbɛjianɔ koni ekɛbɔ mɔdɛŋ ni ekɛnyɛ Yudafoi lɛ anɔ koni amɛŋmɛɛ jamɔ ni amɛkɛhaa Yehowa lɛ he ni amɛkɛ amɛ afutu. Shi ekolɛ jeee nɛkɛ sane lɛ ji, ejaakɛ eyɛ faŋŋ akɛ maŋ lɛ mli onukpai lɛ pɛ atsɛ amɛ kɛtee nifeemɔ lɛ shishi. No hewɔ lɛ, Yudafoi pɛ ni baahi jɛmɛ ji mɛi ni sɔmɔɔ akɛ nɔyeli lɛ mli onukpai yɛ gbɛ ko nɔ lɛ. No hewɔ lɛ, etamɔ nɔ ni amaga lɛ ni akulaa shi yɛ ehiɛ lɛ ji nifeemɔ ni akɛwajeɔ ekomefeemɔ ni aaakã nɔyeli lɛ mli onukpai lɛ ateŋ lɛ. Woloŋlelɔ John F. Walvoord wie akɛ: “Yɛ gbɛ ko nɔ lɛ, onukpai ni akɛ amɛ tsɔ̃ɔ nɛɛ ji Nebukadnezar maŋtsɛyeli lɛ hewalɛ lɛ he nɔkwɛmɔnɔ ni hãa mɔ tsui nyɔɔ emli, ni yɛ gbɛ kroko nɔ lɛ eji nɔ ni tsɔɔ akɛ aayɔse nyɔŋmɔi lɛ ní yɛ amɛsusumɔ naa lɛ amɛkunimyelii lɛ jɛ amɛ lɛ.”
YEHOWA TSUJI KPOO AKƐ AMƐAAŊMƐƐ SAJI AHE NI AMƐKƐSAA
10. Mɛni hewɔ egbáŋ mɛi ni jeee Yudafoi lɛ anaa akɛ amɛaabo Nebukadnezar fãmɔ lɛ toi lɛ?
10 Yɛ bɔ ni amɛtu amɛhe amɛha nyɔŋmɔi ni amɛkɛ woo haa amɛ lɛ fɛɛ sɛɛ lɛ, egbaŋ mɛi ni amɛbua amɛhe naa yɛ Nebukadnezar amaga lɛ hiɛ lɛ anaa akɛ amɛaajá lɛ. Biblia he nilelɔ ko tsɔɔ mli akɛ: “Nɔ ni amɛ fɛɛ amɛfɔɔ feemɔ ji amagai ni amɛjáa amɛ, ni nyɔŋmɔ kome jamɔ etsĩii amɛnaa koni amɛkajá ekroko.” Etee nɔ akɛ: “Ekɛ jwɛŋmɔ ni amaga jálɔi lɛ hiɛ yaa pɛpɛɛpɛ akɛ, nyɔŋmɔi pii yɛ . . . ni ákɛ ejeee nɔ ni esaaa ákɛ, akɛ woo aaaha gbɔmɛi komɛi loo maŋ kroko ko nɔ nyɔŋmɔ.”
11. Mɛni hewɔ Shadrak, Meshak, kɛ Abednego kpoo akɛ amɛaakula shi yɛ amaga lɛ hiɛ lɛ?
11 Shi eji sane kroko kwraa kɛha Yudafoi lɛ. Yehowa, amɛ-Nyɔŋmɔ lɛ efã amɛ akɛ: “Kaafee amaga ko loo nɔ ko ni tamɔ nii ni yɔɔ ŋwɛi, loo nii ni yɔɔ shikpɔŋ lɛ nɔ, loo nii ni yɔɔ nu mli lɛ yɛ shikpɔŋ lɛ shishi lɛ oha ohe. Kaajá amɛ ni kaasɔmɔ amɛ hu; ejaakɛ mi, Yehowa, o-Nyɔŋmɔ lɛ, miji Nyɔŋmɔ ni biɔ he ni atuɔ ahãa ekome too.” (2 Mose 20:4, 5, NW) No hewɔ lɛ, beni lalai lɛ je shishi ni mɛi ni amɛbua amɛhe naa lɛ kula shi yɛ amaga lɛ hiɛ lɛ, Hebri oblahii etɛ—Shadrak, Meshak, kɛ Abednego—tee nɔ amɛdamɔ shi.—Daniel 3:7.
12. Mɛɛ efɔŋ Kaldeabii komɛi folɔ Hebribii etɛ lɛ anaa akɛ amɛfee, ni mɛni hewɔ?
12 Hebribii etɛ ni ji maŋ onukpai ni kpoo amaga lɛ jamɔ lɛ anifeemɔ wo Kaldeabii lɛ ekomɛi amli la. Amrɔ nɔŋŋ ni amɛtee maŋtsɛ lɛ ŋɔɔ ni ‘amɛyafolɔ Yudafoi lɛ anaa.’d Amɛsumɔɔɔ ni atsɔɔ sane ko mli ahã amɛ. Akɛni amɛmiisumɔ ni agbala Hebribii lɛ atoi yɛ anɔkwa ni amɛyeee kɛ maŋjwaa nifeemɔ lɛ he hewɔ lɛ, naafolɔlɔi lɛ kɛɛ akɛ: “Yudafoi komɛi yɛ ni oŋɔ amɛ oto Babel shikpɔŋ lɛ nɔ nitsumɔi lɛ anɔ, amɛji Shadrak, Meshak, kɛ Abednego. Nɛkɛ gbɔmɛi nɛɛ yeee bo maŋtsɛ okpɔ lɛ nɔ; amɛsɔmɔɔɔ onyɔŋmɔi lɛ, ni shika amaga ni okɛma shi lɛ hu amɛjáaa.”—Daniel 3:8-12.
13, 14. Mɛni Nebukadnezar wie yɛ gbɛ ni Shadrak, Meshak, kɛ Abednego kɔ lɛ he?
13 Kwɛ bɔ ni Nebukadnezar nijiaŋ baaje wui aha akɛ Hebribii etɛ lɛ kpoo efãmɔ lɛ! Eyɛ faŋŋ akɛ eyeee omanye yɛ Shadrak, Meshak, kɛ Abednego tsakemɔ koni amɛtsɔmɔ Babilonia Maŋtsɛyeli lɛ sɛɛfilɔi anɔkwafoi lɛ mli. Ani etsɔseko amɛ yɛ Kaldeabii anilee mli? Ni etsake amɛgbɛi lɛ po! Shi kɛji akɛ Nebukadnezar susu akɛ tsɔsemɔ babaoo ni tamɔ nɛkɛ baatsɔɔ amɛ jamɔ gbɛ hee ko aloo ákɛ amɛgbɛi ni eeetsake lɛ baatsake bɔ ni amɛji lɛ, no lɛ etɔ̃ kwraa. Shadrak, Meshak, kɛ Abednego hi shi akɛ Yehowa tsuji anɔkwafoi.
14 Maŋtsɛ Nebukadnezar mli wo la naakpa. Amrɔ nɔŋŋ ni efã ní Shadrak, Meshak, kɛ Abednego aba ehiɛ. Ebi amɛ akɛ: “Shadrak, Meshak, kɛ Abednego, ani nyɛhiɛ kã he ni nyɛsɔmɔɔɔ mi-nyɔŋmɔi lɛ, ni nyɛjáaa shika amaga lɛ ni mikɛma shi lɛ?” Ŋwanejee ko bɛ he akɛ Nebukadnezar kɛ hejɔ̃mɔ kɛ hé ni eheee eyeee wie nɛkɛ wiemɔi nɛɛ. Ekolɛ ebaasusu akɛ, ‘Te aaafee tɛŋŋ ni hii etɛ ni jwɛŋmɔŋ kã shi nɛkɛ aaakpoo fãmɔ ni mli kã shi faŋŋ nɛɛ—kɛ nɔ ni kɛ toigbalamɔ ni naa wa nɛkɛ baa kɛ abooo toi lɛ?’—Daniel 3:13, 14.
15, 16. Mɛɛ hegbɛ Nebukadnezar kpã mli ehã Hebribii etɛ lɛ?
15 Nebukadnezar miisumɔ ni ekɛ hegbɛ kroko aha Hebribii etɛ lɛ. Ekɛɛ: “Agbɛnɛ kɛji nyɛsaa nyɛhe nyɛto lɛ, no lɛ be fɛɛ be ni nyɛaanu koofeŋ lɛ kɛ blɛ lɛ kɛ saŋku lɛ kɛ kete lɛ kɛ obɛnta lɛ kɛ obonu lɛ kɛ jooi srɔtoi lɛ fɛɛ agbɛɛmɔ lɛ, nyɛkulaa shi, ni nyɛjáa amaga ni mifee lɛ; shi kɛji nyɛjáaa lɛ, nakai ŋmɛlɛtswaa lɛ nɔ nɔŋŋ lɛ, aaashɛrɛ nyɛ ashwie la kɛ flɔnɔɔ ni tsoɔ grigri lɛ mli! Ni namɔ ji Nyɔŋmɔ ni aaajie nyɛ yɛ midɛŋ lɛ?”—Daniel 3:15.
16 Eka shi faŋŋ akɛ, nikasemɔ ni yɔɔ lamɔ mli amaga lɛ he (taakɛ aŋma afɔ̃ shi yɛ Daniel yitso 2) lɛ ekaaa Nebukadnezar jwɛŋmɔ kɛ etsui mli kɛyaaa shɔŋŋ. Ekolɛ ehiɛ ekpa lɛ diɛŋtsɛ ewiemɔ ni ewie etsɔɔ Daniel akɛ: “Nyɛ-Nyɔŋmɔ lɛ ji nyɔŋmɔi a-Nyɔŋmɔ kɛ maŋtsɛmɛi anuntsɔ” lɛ nɔ. (Daniel 2:47) Etamɔ nɔ ni Nebukadnezar miitswa Yehowa mpoa agbɛnɛ, eekɛɛ akɛ lɛ tete po lɛ E-nyɛŋ ejie Hebribii lɛ kɛjɛ toigbalamɔ ni mɛɔ amɛ lɛ mli.
17. Te Shadrak, Meshak, kɛ Abednego here hegbɛ ni maŋtsɛ lɛ kɛha lɛ nɔ amɛha tɛŋŋ?
17 Ehe ehiaaa ni Shadrak, Meshak, kɛ Abednego aku sɛɛ asusu saji ahe. Amrɔ nɔŋŋ ni amɛha hetoo akɛ: “Nebukadnezar, ehiaaa wɔ akɛ wɔhão hetoo yɛ nɛkɛ sane nɛɛ mli. Kɛji nakai lɛ, wɔ-Nyɔŋmɔ lɛ ni wɔsɔmɔɔ lɛ aaanyɛ ajie wɔ yɛ la kɛ flɔnɔɔ ni tsoɔ grigri lɛ mli, ni eeejie wɔ yɛ odɛŋ, maŋtsɛ. Shi kɛ́ jeee nakai hu lɛ, maŋtsɛ, ná ole akɛ wɔsɔmɔŋ onyɔŋmɔi lɛ, ni wɔjaŋ shika amaga ni okɛma shi lɛ.”—Daniel 3:16-18.
ASHƐRƐ AMƐ AWO LA FLƆNƆƆ LƐ MLI!
18, 19. Mɛni ba beni ashɛrɛ Hebribii etɛ lɛ awo la kɛ flɔnɔɔ ni tsoɔ grigri lɛ mli lɛ?
18 Akɛni Nebukadnezar mli ewo la hewɔ lɛ, efã etsuji lɛ ni amɛha flɔnɔɔ lɛ adɔ toi kpawo fe bɔ ni ahaa edɔɔ daa lɛ. Kɛkɛ ni efã “eta lɛ mli hii hewalɔi komɛi” koni amɛfimɔ Shadrak, Meshak, kɛ Abednego ni amɛshɛrɛ amɛ amɛshwie “la kɛ flɔnɔɔ ni tsoɔ grigri lɛ mli.” Amɛtsu maŋtsɛ lɛ fãmɔ lɛ he nii, ni amɛshɛrɛ Hebribii etɛ ni afimɔ amɛ kɛ amɛtadei lɛ amɛwo la lɛ mli—ekolɛ bɔni afee ni la lɛ ashã amɛ oyayaayai. Shi, Nebukadnezar hii lɛ moŋ ji mɛi ni lalilɛii lɛ gbe amɛ.—Daniel 3:19-22.
19 Shi, nɔ ko ni yɔɔ naakpɛɛ waa miiya nɔ. Eyɛ mli akɛ Shadrak, Meshak, kɛ Abednego yɛ la kɛ flɔnɔɔ ni tsoɔ grigri lɛ teŋ moŋ, shi lalilɛii lɛ eshãaa amɛ. Susumɔ bɔ ni Nebukadnezar naa baakpɛ ehe aha lɛ he okwɛ! Ashɛrɛ amɛ ashwie la ni tsoɔ grigri mli, afimɔ amɛ jogbaŋŋ, shi kɛlɛ amɛhiɛ kã lolo. Ni kwɛmɔ, amɛnyiɛ la lɛ mli yɛ heyeli mli! Shi Nebukadnezar kadi nɔ kroko. Ebi emaŋ onukpai lɛ akɛ: “Ani jeee mɛi etɛ wɔfimɔ wɔwo la lɛ mli lɛ?” Amɛha lɛ hetoo akɛ: “Eyɛŋ, maŋtsɛ!” Nebukadnezar bo akɛ: “Naa, mi lɛ miina mɛi ejwɛ ni afɛne amɛ ni amɛnyiɛ la lɛ mli, ni nɔ ko nɔ ko efeko amɛ, ni mɔ ni gbe yi fee ejwɛ lɛ su tamɔ nyɔŋmɔi lɛ abi!”—Daniel 3:23-25.
20, 21. (a) Mɛni Nebukadnezar yɔse yɛ Shadrak, Meshak, kɛ Abednego he beni amɛfã kpo kɛjɛ flɔnɔɔ lɛ mli lɛ? (b) Mɛni anyɛ Nebukadnezar nɔ koni ekpɛlɛ nɔ?
20 Nebukadnezar tsi bɛŋkɛ la flɔnɔɔ ni tsoɔ grigri lɛ naa. Kɛkɛ ni ewo egbee nɔ ebo akɛ: “Shadrak kɛ Meshak kɛ Abednego, nyɛ Nyɔŋmɔ mɔ ni yɔɔ ŋwɛi shɔŋŋ lɛ tsuji, nyɛjea kpo ni nyɛbaa!” Hebribii etɛ lɛ je kpo kɛjɛ la lɛ mli. Ŋwanejee ko bɛ he akɛ mɛi fɛɛ ni kɛ amɛhiŋmɛii na naakpɛɛ nii nɛɛ—ni amraloi, lumɛi, akutseiaŋ onukpai, kɛ maŋkraloi lɛ fata he lɛ—ahe jɔ̃ amɛhe naakpa. Kwɛmɔ, etamɔ nɔ ni oblahii nɛɛ boteko flɔnɔɔ lɛ mli po! Lasũ fũ po bɛ amɛhe, ni amɛyiteŋ tsɔi kome po ŋãlãaa.—Daniel 3:26, 27.
21 Agbɛnɛ enɛ nyɛ Maŋtsɛ Nebukadnezar nɔ ni ekpɛlɛ nɔ akɛ Yehowa ji Ŋwɛiflooflo Nyɔŋmɔ. Ejaje akɛ: “Ajie Shadrak, Meshak kɛ Abednego Nyɔŋmɔ lɛ yi akɛ etsu ebɔfo, ni ebajie etsuji ni ŋɔ amɛhiɛ amɛfɔ̃ enɔ, ni amɛtsake maŋtsɛ lɛ wiemɔ lɛ hiɛ, ni amɛŋɔ amɛgbɔmɔtsei amɛha, koni amɛkasɔmɔ nyɔŋmɔ ko nyɔŋmɔ ko ni amɛjá lɛ, akɛ ja amɛ-Nyɔŋmɔ lɛ kɛkɛ!” Kɛkɛ ni maŋtsɛ lɛ kɛ kɔkɔbɔɔ ni hiɛdɔɔ yɔɔ mli nɛɛ fata he: “No hewɔ lɛ miiwo akpɔ akɛ: Maŋ fɛɛ maŋ kɛ asafo fɛɛ asafo kɛ wiemɔ fɛɛ wiemɔ ni aaawie Shadrak kɛ Meshak kɛ Abednego Nyɔŋmɔ lɛ he efɔŋ ko lɛ, aaafolɔ amɛmli dukuduku, ni aaaha amɛshiai atsɔmɔ tumu; ejaakɛ Nyɔŋmɔ ko Nyɔŋmɔ ko bɛ ni aaanyɛ mɔ ajie nɛkɛ.” No hewɔ lɛ, aku sɛɛ aŋɔ Hebribii etɛ lɛ kɛba maŋtsɛ lɛ duromɔ mli ekoŋŋ ni ‘ahole amɛnɔ yɛ Babilon nɔyelihe lɛ mli.’—Daniel 3:28-30.
HEMƆKƐYELI KƐ KAA NI FE FƐƐ LƐ ŊMƐNƐ
22. Ŋmɛnɛŋmɛnɛ beaŋ Yehowa tsuji hu kɛ shihilɛi ni tamɔ Shadrak, Meshak, kɛ Abednego nɔ lɛ miikpe yɛ mɛɛ gbɛ nɔ?
22 Ŋmɛnɛ, Yehowa jálɔi kɛ shihilɛi ni tamɔ Shadrak, Meshak kɛ Abednego nɔ lɛ miikpe. Wɔkpɛlɛɔ nɔ po akɛ Nyɔŋmɔ webii lɛ jeee mɛi ni yɔɔ nomŋɔɔ mli diɛŋtsɛ. Kɛlɛ, Yesu kɛɛ akɛ esɛɛnyiɛlɔi lɛ baafee mɛi ni “amɛjɛɛɛ je lɛ mli.” (Yohane 17:14) Amɛji “gbɔi” kɛ shishinumɔ akɛ amɛkɛ kusumii, subaŋi, kɛ mɛi ni ebɔle amɛhe lɛ anifeemɔi ni damɔɔɔ ŋmalɛ nɔ lɛ efeee amɛnɔ̃. Taakɛ bɔfo Paulo ŋma lɛ, Kristofoi ‘ajeŋba akatamɔ nibii agbɛjianɔtoo nɛɛ nɔ̃ lɛ.’—Romabii 12:2.
23. Hebribii etɛ lɛ jie shifimɔ kpo yɛ mɛɛ gbɛ nɔ, ni te Kristofoi ni yɔɔ ŋmɛnɛ lɛ aaafee tɛŋŋ ni amɛnyiɛ amɛ nɔkwɛmɔnɔ lɛ sɛɛ?
23 Hebribii etɛ lɛ kpoo akɛ amɛaaha amɛjeŋba atamɔ Babilonia gbɛjianɔtoo lɛ nɔ̃ lɛ. Tsɔsemɔ ni mɔ̃ɔ shi yɛ Kaldeabii anilee lɛ mli lɛ nyɛɛɛ atsake amɛ. Nɔ ko nɔ ko bɛ ni baanyɛ atsake amɛ shidaamɔ yɛ jamɔ he sane lɛ mli, Yehowa ji mɔ ni amɛyeɔ lɛ anɔkwa. Esa akɛ Kristofoi ni yɔɔ ŋmɛnɛ lɛ afee shiŋŋ nakai nɔŋŋ. Esaaa akɛ amɛhiɛ gboɔ akɛni esoro amɛ yɛ mɛi ni yɔɔ je lɛ mli lɛ ahe lɛ hewɔ. Yɛ anɔkwale mli lɛ, “je lɛ miiho aya ni nakai eji kɛ emli akɔnɔnii lɛ.” (1 Yohane 2:17, NW) No hewɔ lɛ, ebaafee kwashiai asane kɛ yakayakaniifeemɔ akɛ wɔɔhi shi yɛ nibii agbɛjianɔtoo ni gboɔ nɛɛ su naa.
24. Yɛ mɛɛ gbɛ nɔ shidaamɔ ni anɔkwale Kristofoi ekɔ lɛ tamɔ Hebribii etɛ lɛ anɔ lɛ?
24 Esa akɛ Kristofoi ahiɛ ahi amɛhe nɔ yɛ wɔŋjamɔ fɛɛ wɔŋjamɔ he, ni sui ni yɔɔ nigii lɛ hu fata he.e (1 Yohane 5:21) Shadrak, Meshak, kɛ Abednego kɛ toiboo kɛ bulɛ damɔ shi yɛ shika amaga lɛ hiɛ, shi amɛyɔse akɛ shĩ ni amɛaakula yɛ ehiɛ lɛ fe bulɛ nifeemɔ ko kɛkɛ. Eji jamɔ nifeemɔ, ni emli ni amɛkɛ amɛhe aaawo lɛ baatee Yehowa mlifu shi. (5 Mose 5:8-10) John F. Walvoord ŋma akɛ: “Eji aflaŋaa lɛ ŋamɔ, eyɛ mli akɛ yɛ bɔ ni jamɔ kɛ anɔkwa ni ayeɔ maŋ lɛ yɔɔ tsakpaa hewɔ lɛ, ebaanyɛ ehiɛ jamɔ su hu.” Ŋmɛnɛ, anɔkwa Kristofoi kɔɔ shidaamɔ ni yɔɔ shiŋŋ kɛteɔ shi amɛwoɔ wɔŋjamɔ.
25. Mɛni ókase kɛjɛ Shadrak, Meshak, kɛ Abednego shihilɛ ni ba mli diɛŋtsɛ nɛɛ mli?
25 Biblia lɛ mli saji ni kɔɔ Shadrak, Meshak, kɛ Abednego he lɛ kɛ nikasemɔ diɛŋtsɛ ni nɔ bɛ hãa mɛi fɛɛ ni etswa amɛfai shi akɛ amɛkɛ hetuu-kɛhamɔ baaha Yehowa pɛ lɛ. Eka shi faŋŋ akɛ nɛkɛ Hebribii etɛ nɛɛ yɛ bɔfo Paulo jwɛŋmɔ mli beni ewie mɛi pii ní jie hemɔkɛyeli kpo, ní mɛi ni “gbe la hewalɛ” lɛ fata he lɛ ahe lɛ. (Hebribii 11:33, 34) Yehowa baawo mɛi fɛɛ ni kaseɔ hemɔkɛyeli ni tamɔ nɛkɛ lɛ nyɔmɔ. Ajie Hebribii etɛ lɛ kɛjɛ la kɛ flɔnɔɔ ni tsoɔ grigri lɛ mli, shi wɔbaanyɛ wɔná nɔmimaa akɛ ebaatee anɔkwafoi fɛɛ ni laajeɔ amɛwala akɛ emuuyeli mlihiɛlɔi lɛ ashi ni ekɛ naanɔ wala baajɔɔ amɛ. Yɛ fɛɛ mli lɛ, Yehowa “báa emɛi krɔŋkrɔŋi lɛ asusumai ayi; ejieɔ amɛ kɛjɛɔ mɛi fɔji adɛŋ.”—Lala 97:10.
[Shishigbɛ niŋmai]
a Mɛi komɛi heɔ yeɔ akɛ Marduk, ni abuɔ lɛ akɛ mɔ ni to Babilonia Maŋtsɛyeli lɛ shishi lɛ damɔ shi kɛha Nimrod ni afee lɛ nyɔŋmɔ lɛ. Shi anyɛŋ awie enɛ he kɛ nɔmimaa.
b “Belteshazar” shishi ji “Buu Maŋtsɛ lɛ Wala He.” “Shadrak” baanyɛ atsɔɔ Sumeria nyɔɔŋtsere nyɔŋmɔ “Aku Fãmɔ.” Ekolɛ “Meshak” kɔɔ Sumeria nyɔŋmɔ ko he, ni “Abednego” shishi ji “Nego Tsulɔ” loo Nebo.
c Bɔ ni amaga nɛɛ da hã hewɔ lɛ, Biblia he nilelɔi komɛi heɔ yeɔ akɛ eji tso ni agbɔ ni akɛ shika ekpa he.
d Aramaik wiemɔ ni atsɔɔ shishi akɛ ‘folɔ naa’ lɛ shishi ji ‘aye’ mɔ ko ‘he nibii’—akpe lɛ, taakɛ eji lɛ kɛtsɔ heguɔgbee nɔ.
e Ákɛ nɔkwɛmɔnɔ lɛ, Biblia lɛ kɛ fufeemɔ kɛ hiɛjoomɔ toɔ wɔŋjamɔ he.—Filipibii 3:18, 19; Kolosebii 3:5.
MƐNI OYƆSE?
• Mɛni hewɔ Shadrak, Meshak, kɛ Abednego kpoo akɛ amɛaakula shi yɛ amaga ni Nebukadnezar kɛma shi lɛ hiɛ lɛ?
• Mɛni Nebukadnezar fee yɛ shidaamɔ ni Hebribii etɛ lɛ kɔ lɛ he?
• Yɛ mɛɛ gbɛ nɔ Yehowa wo Hebribii etɛ lɛ nyɔmɔ yɛ amɛhemɔkɛyeli hewɔ?
• Mɛni ókase kɛjɛ Shadrak, Meshak, kɛ Abednego shihilɛ diɛŋtsɛ he sane lɛ toi ni obo lɛ mli?
[Baafa muu mfoniri ni yɔɔ baafa 68]
[Mfonirii ni yɔɔ baafa 70]
1. Sɔlemɔtsu mɔ̃ɔ (ziggurat) ni yɔɔ Babilon
2. Marduk sɔlemɔtsu
3. Akɔɔble mfoniri ni tsɔɔ nyɔŋmɔi ni ji Marduk (abɛku) kɛ Nebo (ninejurɔ) ni damɔ drakoi anɔ
4. Nebukadnezar Cameo, ni ehe gbɛi yɛ etsumaa nitsumɔi ahewɔ
[Baafa muu mfoniri ni yɔɔ baafa 76]
[Baafa muu mfoniri ni yɔɔ baafa 78]