Jɔɔmɔi Wuji Kɛtsɔ Kpaŋmɔ Hee lɛ Nɔ
“Yesu . . . ji kpaŋmɔ ni hi fe no lɛ hu mlidamɔlɔ.”—HEBRIBII 8:6, NW.
1. Namɔ bafee ‘yoo lɛ seshi’ ni awo shi yɛ ehe yɛ Eden lɛ, ni ‘atswa enanetsitsi nɔ’ yɛ mɛɛ gbɛ nɔ?
BENI Adam kɛ Hawa fee esha lɛ sɛɛ lɛ, Yehowa jaje kojomɔ eshwie Satan, mɔ ni laka Hawa lɛ nɔ, ni ekɛɛ: “Mikɛ nyɛɛ aaaŋmɛ okɛ yoo lɛ teŋ, kɛ oseshi kɛ eseshi teŋ; eeetswa oyitso nɔ, ni bo hu oootswa enanetsitsi nɔ.” (1 Mose 3:15) Beni abaptisi Yesu yɛ Yordan Faa lɛ mli yɛ afi 29 Ŋ.B. lɛ, Seshi ni awo shi yɛ ehe yɛ Eden lɛ pue agbɛnɛ. Beni egbo yɛ piŋmɔ tso lɛ nɔ yɛ afi 33 Ŋ.B. lɛ, nakai blema gbalɛ lɛ fã ko ba mli. Satan ‘etswa’ Seshi lɛ ‘nanetsitsi nɔ.’
2. Taakɛ Yesu diɛŋtsɛ wiemɔi tsɔɔ lɛ, egbele lɛ he baa sɛɛnamɔ kɛhaa adesai yɛ mɛɛ gbɛ nɔ?
2 Miishɛɛ sane ji akɛ, eyɛ mli akɛ nakai pilamɔ lɛ waa mɔ he waa moŋ, shi ejeee nɔ ni baahi shi daa. Atee Yesu shi kɛjɛ gbohii ateŋ akɛ mumɔŋ bɔɔnɔ ni gbooo, ni ekwɔ kɛtee e-Tsɛ lɛ ŋɔɔ yɛ ŋwɛi, ni ekɛ elá ni efɔse eshwie shi lɛ jarawalɛ lɛ yaha yɛ jɛmɛ “yɛ mɛi pii akpɔmɔ hewɔ.” Enɛ hewɔ lɛ, lɛ diɛŋtsɛ ewiemɔi lɛ ba mli anɔkwale akɛ: “Sa akɛ awo gbɔmɔ bi lɛ nɔ. Koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala. Ejaakɛ nɛkɛ Nyɔŋmɔ sumɔ je lɛ, akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala.” (Mateo 20:28; Yohane 3:14-16; Hebribii 9:12-14) Kpaŋmɔ hee lɛ tsuɔ gbɛfaŋnɔ krɛdɛɛ ko yɛ Yesu gbalɛ lɛ mlibaa mli.
Kpaŋmɔ Hee Lɛ
3. Mɛɛ be ana akɛ kpaŋmɔ hee lɛ ebɔi nitsumɔ klɛŋklɛŋ?
3 Beni eshwɛ fioo ni Yesu baagbo lɛ, ekɛɛ esɛɛnyiɛlɔi lɛ akɛ elá ni afɔse ashwie shi lɛ ji “kpaŋmɔ hee lɛ [lá] lɛ.” (Mateo 26:28; Luka 22:20) Beni ekwɔ kɛtee ŋwɛi lɛ sɛɛ gbii nyɔŋma lɛ, ana akɛ kpaŋmɔ hee lɛ miitsu nii beni afɔse mumɔ krɔŋkrɔŋ lɛ ashwie kaselɔi aaashɛ 120 ni ebua amɛhe naa yɛ ŋwɛitsu ko nɔ yɛ Yerusalem lɛ anɔ lɛ. (Bɔfoi lɛ Asaji 1:15; 2:1-4) Nɛkɛ kaselɔi 120 ni akɛ amɛ bawo kpaŋmɔ hee nɛɛ mli lɛ tsɔɔ akɛ “klɛŋklɛŋ” kpaŋmɔ, ni ji Mla kpaŋmɔ lɛ, tsuuu nii dɔŋŋ agbɛnɛ.—Hebribii 8:13.
4. Ani kpaŋmɔ momo lɛ yeee omanye? Tsɔɔmɔ mli.
4 Ani kpaŋmɔ momo lɛ tsuuu nii jogbaŋŋ? Dabi kwraa. Eji anɔkwale akɛ, akɛni akɛ ekroko eye najiaŋ hewɔ lɛ, heloonaa Israel jeee Nyɔŋmɔ webii krɛdɛɛ dɔŋŋ. (Mateo 23:38) Shi enɛ ba lɛ nakai yɛ Israel toigbele kɛ Mɔ ni Yehowa Efɔ lɛ Mu lɛ ni amɛkpoo lɛ lɛ hewɔ. (2 Mose 19:5; Bɔfoi lɛ Asaji 2:22, 23) Shi, dani akɛ nɔ kroko aaaye Mla lɛ najiaŋ lɛ, etsu nitsumɔi babaoo. Ekɛ gbɛ ni aaatsɔ nɔ abɛŋkɛ Nyɔŋmɔ kɛ hebuu kɛmiijɛ apasa jamɔ he hã yɛ afii ohai babaoo mli. Kpaŋmɔ hee lɛ he okadii yɛ mli, ni akɛ afɔleshaai babaoo ni yɔɔ mli lɛ fee bɔ ni kpɔmɔ kɛmiijɛ esha kɛ gbele mli he hiaa adesa waa lɛ he nɔkwɛmɔnɔ. Lɛɛlɛŋ, Mla lɛ ji “[tsɔselɔ] kɛmiiya Kristo ŋɔɔ.” (Galatabii 3:19, 24; Romabii 3:20; 4:15; 5:12; Hebribii 10:1, 2) Shi kɛlɛ, jɔɔmɔ ni awo Abraham shi yɛ he lɛ baaba mli kɛmɔ shi kɛtsɔ kpaŋmɔ hee lɛ nɔ.
Ajɔɔ Jeŋmaji Kɛtsɔ Abraham Seshi lɛ Nɔ
5, 6. Yɛ Abraham kpaŋmɔ lɛ klɛŋklɛŋ mumɔŋ mlibaa mli lɛ, namɔ ji Abraham Seshi lɛ, ni mɛɛ jeŋmaŋ nine shɛ jɔɔmɔ nɔ klɛŋklɛŋ kɛtsɔ enɔ?
5 Yehowa wo Abraham shi akɛ: “Oseshi lɛ mli aaajɛ ajɔɔ shikpɔŋ lɛ nɔ jeŋmaji fɛɛ.” (1 Mose 22:18) Ajɔɔ gbɔi babaoo ni yɔɔ heshibaa tsuii lɛ, yɛ kpaŋmɔ momo lɛ shishi, kɛtsɔ amɛhe ni amɛkɛbɔ Israel, ni ji maŋ ni feɔ Abraham seshi lɛ he lɛ nɔ. Shi, yɛ eklɛŋklɛŋ mumɔŋ mlibaa mli lɛ, Abraham Seshi lɛ ji gbɔmɔ kome ni yeɔ emuu. Paulo tsɔɔ enɛ mli beni ewie akɛ: “Abraham lɛ, awie shiwoo wiemɔi lɛ aha lɛ kɛ eseshi lɛ. Ekɛɛɛ akɛ: ‘kɛ eseshibii lɛ,’ taakɛ mɛi pii anɔ̃, shi moŋ taakɛ mɔ kome nɔ̃, akɛ ‘kɛ oseshi lɛ,’ mɔ ni ji Kristo lɛ.”—Galatabii 3:16.
6 Hɛɛ, Yesu ji Abraham Seshi lɛ, ni kɛtsɔ Lɛ enɔ lɛ, jeŋmaji lɛ anine baashɛ jɔɔmɔ ni nɔ kwɔ kwraa fe nɔ fɛɛ nɔ ni heloonaa Israel nyɛ ená lɛ nɔ. Yɛ anɔkwale mli lɛ, klɛŋklɛŋ jeŋmaŋ ni nine shɛ jɔɔmɔ nɛɛ nɔ ji Israel diɛŋtsɛ. Yɛ Pentekoste afi 33 Ŋ.B. sɛɛ nɔŋŋ lɛ, bɔfo Petro kɛɛ Yudafoi akuu ko akɛ: “Nyɛji gbalɔi lɛ kɛ kpaŋmɔ lɛ bii, kpaŋmɔ ni Nyɔŋmɔ kɛ wɔtsɛmɛi lɛ kpaŋ, beni ekɛɛ Abraham akɛ: ‘Ni oseshi mli aaajɔɔ shikpɔŋ lɛ nɔ wekui fɛɛ yɛ’ lɛ. Ní Nyɔŋmɔ tee etsulɔ Yesu lɛ shi lɛ, nyɛ tsutsu nyɛŋɔɔ etsu lɛ ní ebajɔɔ nyɛ ní ekpale nyɛteŋ mɔ fɛɛ mɔ kɛjɛ enifɔjianii lɛ amli.”—Bɔfoi lɛ Asaji 3:25, 26.
7. Mɛɛ jeŋmaji ná jɔɔmɔ kɛtsɔ Yesu, Abraham Seshi lɛ nɔ?
7 Etsɛɛɛ kɛkɛ ni akpã jɔɔmɔ lɛ mli aha Samariabii lɛ, kɛ agbɛnɛ Jeŋmajiaŋbii lɛ hu. (Bɔfoi lɛ Asaji 8:14-17; 10:34-48) Aaafee afi 50 kɛ 52 Ŋ.B. teŋgbɛ lɛ, Paulo ŋma wolo eyaha Kristofoi ni yɔɔ Galatia yɛ Asia Bibioo lɛ akɛ: “Ákɛ nɔ ni ŋmalɛ lɛ ena momo akɛ hemɔkɛyeli mli Nyɔŋmɔ aaabu jeŋmaji lɛ abem yɛ hewɔ lɛ, ejaje sanekpakpa lɛ etsɔɔ Abraham eto akɛ: ‘Omli aaajɔɔ jeŋmaji lɛ fɛɛ yɛ.’ Belɛ mɛi ni jɛ hemɔkɛyeli mli lɛ, ajɔɔ amɛ kɛ Abraham ni hé ye lɛ.” (Galatabii 3:8, 9; 1 Mose 12:3) Eyɛ mli akɛ Kristofoi ni yɔɔ Galatia lɛ ateŋ mɛi pii ji ‘jeŋmajiaŋbii’ moŋ, shi ajɔɔ amɛ kɛtsɔ Yesu nɔ yɛ amɛhemɔkɛyeli lɛ hewɔ. Yɛ mɛɛ gbɛ nɔ?
8. Yɛ Paulo gbii lɛ amli Kristofoi lɛ agbɛfaŋ lɛ, mɛni fata jɔɔmɔ ni amɛaaná kɛtsɔ Abraham Seshi lɛ nɔ lɛ he, ni yɛ naagbee lɛ, mɛi enyiɛ anine shɛ jɔɔmɔ ni tamɔ nɛkɛ nɔ?
8 Paulo kɛɛ Galatabii Kristofoi, ni jɛ jeŋmaji sɔrɔtoi amli lɛ akɛ: “Kɛ́ Kristo nii ji nyɛ lɛ, belɛ Abraham seshibii ji nyɛ, kɛ gboshiniyelɔi hu yɛ shiwoo lɛ naa.” (Galatabii 3:29) Yɛ nakai Galatabii lɛ agbɛfaŋ lɛ, jɔɔmɔ ni amɛbaaná kɛtsɔ Abraham Seshi lɛ nɔ lɛ ekomɛi ji kpaŋmɔ hee lɛ mli gbɛfaŋnɔ ni amɛná lɛ, kɛ agbɛnɛ hu Yesu nanemɛi gboshiniyelɔi, Yesu hefatalɔi ni amɛji yɛ Abraham seshi lɛ mli lɛ. Wɔleee blema Israel maŋ lɛ mli bii lɛ ayifalɛ. Nɔ ni wɔle kɛkɛ ji akɛ, amɛyi bafa “tamɔ ŋshɔ naa shia kɛ falɛ.” (1 Maŋtsɛmɛi 4:20) Shi kɛlɛ, wɔle Yesu hefatalɔi yɛ mumɔŋ seshi lɛ mli lɛ ayifalɛ yɛ naagbee kwraa—144,000. (Kpojiemɔ 7:4; 14:1) Nakai mɛi 144,000 lɛ jɛ adesai “akutso fɛɛ akutso kɛ wiemɔ fɛɛ wiemɔ kɛ maŋ fɛɛ maŋ kɛ jeŋmaŋ fɛɛ jeŋmaŋ” mli, ni amɛnáa Abraham kpaŋmɔ lɛ mli jɔɔmɔi ni akɛaaha mɛi krokomɛi lɛ he nitsumɔ mli gbɛfaŋnɔ.—Kpojiemɔ 5:9.
Gbalɛ ko Ba Mli
9. Aŋma Yehowa mla lɛ yɛ mɛi ni yɔɔ kpaŋmɔ hee lɛ mli lɛ amli yɛ mɛɛ gbɛ nɔ?
9 Beni etsɔɔ hiɛ egbaa kpaŋmɔ hee lɛ etoɔ lɛ, Yeremia ŋma akɛ: “Kpaŋmɔ ni mikɛ Israel we lɛ baakpaŋ yɛ nakai gbii lɛ asɛɛ lɛ nɛ, Yehowa kɛɛ: Maŋɔ mimla lɛ mawo amɛmli ni maŋma yɛ amɛtsui nɔ.” (Yeremia 31:33) Eji su ko ni anaa yɛ mɛi ni yɔɔ kpaŋmɔ hee lɛ mli lɛ ahe akɛ amɛjɛɔ suɔmɔ mli amɛsɔmɔɔ Yehowa. (Yohane 13:35; Hebribii 1:9) Aŋma Yehowa mla lɛ yɛ amɛtsui mli, ni amɛkɛ hiɛdɔɔ sumɔɔ akɛ amɛaafee esuɔmɔnaa nii. Eji anɔkwale akɛ, aŋkroaŋkroi anɔkwafoi komɛi ni hi shi yɛ blema Israel lɛ sumɔ Yehowa mla lɛ waa diɛŋtsɛ. (Lala 119:97) Shi mɛi pii efeee nakai. Shi kɛlɛ amɛtee nɔ amɛhi shi akɛ maŋ lɛ fã. Mɔ ko mɔ ko nyɛŋ ahi kpaŋmɔ hee lɛ mli kɛji aŋmako Nyɔŋmɔ mla lɛ yɛ etsui mli.
10, 11. Yɛ mɛi ni yɔɔ kpaŋmɔ hee lɛ mli lɛ agbɛfaŋ lɛ, Yehowa ‘batsɔɔ amɛ-Nyɔŋmɔ’ yɛ mɛɛ gbɛ nɔ, ni mɛɛ gbɛ nɔ amɛ fɛɛ amɛaale lɛ yɛ?
10 Yehowa tee nɔ ewie yɛ mɛi ni yɔɔ kpaŋmɔ hee lɛ mli lɛ ahe akɛ: “Matsɔ amɛ-Nyɔŋmɔ, ni amɛ hu amɛaatsɔ mimaŋ!” (Yeremia 31:33) Mɛi pii já jeŋmaji lɛ anyɔŋmɔi lɛ yɛ blema Israel, shi amɛtee nɔ amɛhi shi akɛ Israelbii. Yehowa damɔ kpaŋmɔ hee lɛ nɔ eto mumɔŋ maŋ ko, ni ji “Nyɔŋmɔ Israel lɛ” shishi, koni no aye heloonaa Israel najiaŋ. (Galatabii 6:16; Mateo 21:43; Romabii 9:6-8) Shi kɛlɛ, kɛ mɔ ko kpá Yehowa pɛ jamɔ lɛ, nakai mɔ lɛ kãaa he ehiii shi akɛ mumɔŋ maŋ hee lɛ fã dɔŋŋ.
11 Yehowa wie hu akɛ: “Amɛ fɛɛ kwa amɛaale mi, kɛjɛ amɛteŋ mɔ bibioo nɔ kɛyashi amɛteŋ mɔ wulu nɔ.” (Yeremia 31:34) Mɛi pii ku amɛhiɛ amɛfɔ̃ Yehowa nɔ yɛ Israel, ni efee tamɔ nɔ ni amɛmiikɛɛ akɛ: “Yehowa efeŋ ekpakpa, ni esaa efeŋ efɔŋ hu!” (Zefania 1:12) Kɛ́ mɔ ko ku ehiɛ efɔ̃ Yehowa nɔ loo ewo jamɔ krɔŋkrɔŋ lɛ he muji lɛ, nakai mɔ lɛ kãaa he ehiii shi akɛ Nyɔŋmɔ Israel lɛ fã dɔŋŋ. (Mateo 6:24; Kolosebii 3:5) Mumɔŋ Israelbii lɛ ji “maŋ ni le amɛ-Nyɔŋmɔ lɛ.” (Daniel 11:32) Amɛnáa miishɛɛ akɛ ‘amɛaaná anɔkwa Nyɔŋmɔ kome lɛ kɛ Yesu Kristo he nilee.’ (Yohane 17:3) Yesu ni amɛleɔ lɛ lɛ haa Nyɔŋmɔ he nilee ni amɛyɔɔ lɛ mli kwɔɔ, ejaakɛ Yesu “ebajie [Nyɔŋmɔ] shi etsɔɔ faŋŋ,” yɛ gbɛ ni yɔɔ sɔrɔto kwraa nɔ.—Yohane 1:18; 14:9-11.
12, 13. (a) Mɛni nɔ Yehowa damɔɔ ni ekɛ mɛi ni yɔɔ kpaŋmɔ hee lɛ mli lɛ ahe eshai lɛ keɔ amɛ? (b) Yɛ eshaifaa gbɛfaŋ lɛ, kpaŋmɔ hee lɛ nɔ kwɔ fe kpaŋmɔ momo lɛ yɛ mɛɛ gbɛ nɔ?
12 Yɛ naagbee lɛ, Yehowa wo shi akɛ: “Maŋɔ amɛnishaianii lɛ mafa, ni amɛhe eshai lɛ mikaiŋ dɔŋŋ!” (Yeremia 31:34b) Nɔ ni fata Mose Mla lɛ he ji mlai ohai abɔ ni aŋmala ashwie shi ni abiɔ ni Israelbii lɛ aye nɔ. (5 Mose 28:1, 2, 15) Mɛi fɛɛ ni kuɔ Mla lɛ mli lɛ shãa afɔlei koni etsimɔ amɛhe eshai lɛ anɔ. (3 Mose 4:1-7; 16:1-31) Yudafoi babaoo bahe amɛye akɛ amɛbaanyɛ amɛtsɔmɔ jalɔi kɛtsɔ amɛ diɛŋtsɛ amɛnitsumɔi ni amɛtsuɔ yɛ Mla lɛ naa lɛ nɔ. Shi, Kristofoi yɔseɔ akɛ amɛnyɛŋ amɛná jalɛ kɛtsɔ amɛ diɛŋtsɛ amɛ nitsumɔi anɔ. Amɛnyɛŋ amɛjo eshafeemɔ naa foi. (Romabii 5:12) Yɛ kpaŋmɔ hee lɛ shishi lɛ, anyɛɔ anáa jalɛ shidaamɔ yɛ Nyɔŋmɔ hiɛ kɛtsɔɔ Yesu afɔleshaa lɛ pɛ nɔ. Shi kɛlɛ, nɛkɛ shidaamɔ nɛɛ ji nikeenii, duromɔ ni wɔsaaa ni jɛ Nyɔŋmɔ ŋɔɔ. (Romabii 3:20, 23, 24) Yehowa biɔ toiboo kɛjɛɔ etsuji adɛŋ lolo. Paulo kɛɛ akɛ mɛi ni yɔɔ kpaŋmɔ hee lɛ mli lɛ yɛ “Kristo mla shishi.”—1 Korintobii 9:21.
13 No hewɔ lɛ, esha he afɔleshaa yɛ kɛha Kristofoi hu, shi no jara wa kwraa fe afɔlei ni ashã yɛ Mla kpaŋmɔ lɛ shishi lɛ. Paulo ŋma akɛ: “Osɔfo fɛɛ osɔfo [ni yɔɔ Mla kpaŋmɔ lɛ shishi] lɛ, gbi fɛɛ gbi lɛ edamɔɔ shi esɔmɔɔ, ni eshãa nakai afɔlei lɛ nɔŋŋ kpitiokpitio, nii ni nyɛɛɛ eshai ajie gbi ko gbi ko lɛ; shi [Yesu] lɛ, nɔ ni eshã eshai ahe afɔle shikome nyɔŋlo lɛ, eyata Nyɔŋmɔ ninejurɔ nɔ.” (Hebribii 10:11, 12) Akɛni Kristofoi ni yɔɔ kpaŋmɔ hee lɛ mli lɛ náa Yesu afɔleshaa lɛ mli hemɔkɛyeli hewɔ lɛ, Yehowa buɔ amɛ akɛ jalɔi, mɛi ni esha bɛ amɛhe, ni no haa amɛfeɔ mɛi ni sa akɛ afɔ amɛ mu akɛ emumɔŋ bii. (Romabii 5:1; 8:33, 34; Hebribii 10:14-18) Kɛ́ amɛfee esha yɛ emuu ni amɛyeee ákɛ adesai lɛ hewɔ lɛ, amɛbaanyɛ amɛkpa Yehowa dɛŋ eshaifaa he fai, ni Yehowa damɔɔ Yesu afɔleshaa lɛ nɔ ekɛ amɛhe keɔ amɛ. (1 Yohane 2:1, 2) Shi kɛlɛ, kɛ amɛhala gbɛ ni ji esha ni amɛhiɛ kã he lɛ, amɛlaajeɔ amɛ jalɛ shidaamɔ lɛ kɛ hegbɛ ni amɛyɔɔ akɛ mɛi ni ená kpaŋmɔ hee lɛ mli gbɛfaŋnɔ lɛ.—Hebribii 2:2, 3; 6:4-8; 10:26-31.
Kpaŋmɔ Momo lɛ kɛ Ehee Lɛ
14. Mɛɛ ketiafoo abiɔ yɛ Mla kpaŋmɔ lɛ shishi? yɛ kpaŋmɔ hee lɛ shishi?
14 Afolɔ hii ni yɔɔ kpaŋmɔ momo lɛ mli lɛ ketia akɛ okadi ni tsɔɔ akɛ amɛyɛ Mla lɛ shishi. (3 Mose 12:2, 3; Galatabii 5:3) Beni Kristofoi asafo lɛ je shishi lɛ sɛɛ lɛ, mɛi komɛi nu he akɛ esa akɛ afolɔ Kristofoi ni jeee Yudafoi lɛ ketia. Shi bɔfoi lɛ kɛ onukpai ni yɔɔ Yerusalem lɛ, ni Nyɔŋmɔ Wiemɔ lɛ kɛ mumɔ krɔŋkrɔŋ lɛ kudɔɔ amɛ lɛ, yɔse akɛ enɛ he ehiaaa. (Bɔfoi lɛ Asaji 15:1, 5, 28, 29) Afii fioo komɛi asɛɛ lɛ, Paulo kɛɛ akɛ: “Jeee mɔ ni atsɛɔ lɛ Yudanyo lɛ ji Yudanyo, ni asaŋ jeee kponɔ nɔ̃ ni yɔɔ heloo mli lɛ ji ketiafoo; shi moŋ mɔ ni ji Yudanyo yɛ mligbɛ lɛ ji Yudanyo, ni tsuiŋ ketiafoo ni yɔɔ mumɔ mli, ni jeee ŋmalɛ okadi mli lɛ, ji ketiafoo.” (Romabii 2:28, 29) Ketiafoo diɛŋtsɛ, kɛha heloonaa Yudafoi lɛ po, he bɛ sɛɛnamɔ yɛ mumɔŋ dɔŋŋ yɛ Yehowa hiɛ. Yɛ mɛi ni yɔɔ kpaŋmɔ hee lɛ mli lɛ agbɛfaŋ lɛ, tsui lɛ, shi jeee heloo lɛ, ji nɔ ni esa akɛ afo lɛ ketia. Esa akɛ amɛfo nɔ fɛɛ nɔ ni yɔɔ amɛ susumɔi, akɔnɔi, kɛ kanyamɔ mli ni esaaa loo ehe tseee yɛ Yehowa hiɛ lɛ amɛshɛ amɛfɔ̃.a Mɛi pii yɛ ŋmɛnɛ ni amɛji hewalɛ ni mumɔ krɔŋkrɔŋ lɛ yɔɔ ni ekɛtsakeɔ mɛi asusumɔi yɛ nɛkɛ gbɛ nɔ lɛ he odaseyeli ni hiɛ kã.—1 Korintobii 6:9-11; Galatabii 5:22-24; Efesobii 4:22-24.
15. Mɛɛ sɔrɔtofeemɔ anaa yɛ maŋtsɛyeli nɔyeli gbɛfaŋ, kɛ́ akɛ heloonaa Israel miito Nyɔŋmɔ Israel lɛ he?
15 Yɛ Mla kpaŋmɔ lɛ he gbɛjianɔtoo mli lɛ, Yehowa ji Israel Maŋtsɛ, ni yɛ be ko sɛɛ lɛ, etsu emaŋtsɛyeli lɛ he nii kɛtsɔ maŋtsɛmɛi ni ji adesai anɔ yɛ Yerusalem. (Yesaia 33:22) Yehowa ji Nyɔŋmɔ Israel lɛ, ni ji mumɔŋ Israel hu nɔ maŋtsɛ, ni kɛjɛ afi 33 Ŋ.B. kɛbaa nɛɛ, eye nɔ kɛtsɔ Yesu Kristo, mɔ ni “aŋɔ hegbɛ fɛɛ aha [lɛ] yɛ ŋwɛi kɛ shikpɔŋ nɔ” lɛ nɔ. (Mateo 28:18; Efesobii 1:19-23; Kolosebii 1:13, 14) Ŋmɛnɛ, Nyɔŋmɔ Israel lɛ kpɛlɛɔ Yesu nɔ akɛ Nyɔŋmɔ ŋwɛi Maŋtsɛyeli lɛ, ni ato shishi yɛ afi 1914 lɛ nɔ Maŋtsɛ. Yesu ji Maŋtsɛ ni hi kwraa fe Hezekia, Yosia, kɛ blema Israel maŋtsɛmɛi anɔkwafoi krokomɛi lɛ po.—Hebribii 1:8, 9; Kpojiemɔ 11:15.
16. Mɛɛ osɔfoi nɛkɛ Nyɔŋmɔ Israel lɛ ji?
16 Jeee akɛ Israel ji maŋtsɛyeli kɛkɛ, shi moŋ eyɛ osɔfoi ni afɔ amɛ mu hu. Yɛ afi 33 Ŋ.B. lɛ, Nyɔŋmɔ Israel lɛ baye heloonaa Israel najiaŋ, ni ebatsɔ Yehowa ‘tsulɔ,’ ‘edasefoi.’ (Yesaia 43:10) Kɛjɛ nakai be lɛ nɔ kɛbaa lɛ, Yehowa wiemɔi ni ekɛ Israel wie, ni aŋma yɛ Yesaia 43:21 kɛ 2 Mose 19:5, 6 bakɔ Nyɔŋmɔ mumɔŋ Israel lɛ he. Agbɛnɛ Nyɔŋmɔ mumɔŋ maŋ hee lɛ ebatsɔ “weku ni ahala, . . . maŋtsɛmɛi ni yeɔ osɔfoi, jeŋmaŋ krɔŋkrɔŋ, maŋ ni eŋɔfee enɔ,” ni gbɛnaa nii kã amɛnɔ akɛ ‘amɛjaje Yehowa agbojeei lɛ amɛtsɔɔ.’ (1 Petro 2:9) Mɛi fɛɛ ni yɔɔ Nyɔŋmɔ Israel lɛ mli, hii kɛ yei fɛɛ, feɔ osɔfoyeli kuu kome. (Galatabii 3:28, 29) Ákɛ Abraham seshi lɛ fã ni ji enyɔ lɛ, amrɔ nɛɛ amɛkɛɔ akɛ: “Nyɛ jeŋmaji, nyɛkɛ emaŋ lɛ anyaa!” (5 Mose 32:43) Mumɔŋ Israel mli bii ni yɔɔ shikpɔŋ nɔ lolo lɛ feɔ “tsulɔ anɔkwafo kɛ nilelɔ” lɛ. (Mateo 24:45-47) Ja mɔ ko kɛ ehe ebɔ amɛhe dani ebaanyɛ ekɛ sɔɔmɔ krɔŋkrɔŋ ni akpɛlɛɔ nɔ aha Nyɔŋmɔ.
Nyɔŋmɔ Maŋtsɛyeli Lɛ—Naagbee Mlibaa Lɛ
17. Mɛɛ fɔmɔ mɛi ni yɔɔ kpaŋmɔ hee lɛ mli lɛ náa mli niiashikpamɔ?
17 Israelbii ni afɔ amɛ yɛ afi 1513 D.Ŋ.B. sɛɛ lɛ babote Mla kpaŋmɔ lɛ mli yɛ amɛfɔmɔ mli. Mɛi ni Yehowa kɛ amɛ woɔ kpaŋmɔ hee lɛ mli lɛ hu náa fɔmɔ ko mli niiashikpamɔ—yɛ amɛgbɛfaŋ lɛ, mumɔŋ fɔmɔ. Yesu tsĩ enɛ tã etsɔɔ Farisifonyo Nikodemo beni ekɛɛ lɛ akɛ: “Lɛɛlɛŋ, lɛɛlɛŋ, miikɛɛo akɛ: Kɛji ajɛɛɛ ŋwɛi afɔɔɔ mɔ ko lɛ, enyɛŋ Nyɔŋmɔ maŋtsɛyeli lɛ ena.” (Yohane 3:3) Kaselɔi 120 ni bua amɛhe naa yɛ Pentekoste afi 33 Ŋ.B. lɛ ji klɛŋklɛŋ adesai ni yeee emuu ni ná fɔmɔ hee nɛɛ mli niiashikpamɔ. Akɛni abu amɛ jalɔi yɛ kpaŋmɔ hee lɛ shishi hewɔ lɛ, amɛnine shɛ mumɔ krɔŋkrɔŋ lɛ nɔ ákɛ amɛ maŋtsɛyeli gboshinii lɛ ‘yibaafoonɔ̃.’ (Efesobii 1:14) “Ajɛ Mumɔ mli afɔ” amɛ ni amɛtsɔmɔ mɛi ni Nyɔŋmɔ eŋɔ amɛ akɛ bii, ni no ha amɛbafee Yesu nyɛmimɛi, ni yɛ no hewɔ lɛ, “Kristo nanemɛi niyelɔi.” (Yohane 3:6; Romabii 8:16, 17) Fɔmɔ ni ‘afɔ amɛ ekoŋŋ’ lɛ gbele gbɛ kɛha gbɛkpamɔi ni yɔɔ naakpɛɛ.
18. Fɔmɔ ni afɔɔ mɔ ekoŋŋ lɛ gbeleɔ hegbɛ naa kɛhaa mɛɛ gbɛkpamɔi ni yɔɔ naakpɛɛ kɛha mɛi ni yɔɔ kpaŋmɔ hee lɛ mli lɛ?
18 Beni efeɔ kpaŋmɔ hee lɛ mlidamɔlɔ lɛ, Yesu kɛ esɛɛnyiɛlɔi lɛ fee kpaŋmɔ kroko kɛfata he, ni ekɛɛ: “Mi hu miito maŋtsɛyeli maha nyɛ, taakɛ bɔ ni mitsɛ eto eha mi lɛ.” (Luka 22:29) Nɛkɛ Maŋtsɛyeli kpaŋmɔ nɛɛ saa nibii eto kɛha ninaa ni sa kadimɔ waa, ni aŋma he sane afɔ̃ shi yɛ Daniel 7:13, 14, 22, 27 lɛ mlibaa. Daniel na “mɔ ko tamɔ gbɔmɔ bi” ní “mɔ ni eye gbii pii lɛ,” ni ji Yehowa Nyɔŋmɔ kɛ maŋtsɛyeli hewalɛ miiha lɛ. Kɛkɛ ni Daniel na akɛ “mɛi krɔŋkrɔŋi lɛ ye maŋtsɛyeli lɛ nɔ.” Yesu ji mɔ ni “tamɔ gbɔmɔ bi,” ni nine shɛ ŋwɛi Maŋtsɛyeli lɛ nɔ kɛjɛ Yehowa Nyɔŋmɔ dɛŋ yɛ afi 1914 mli lɛ. Ekaselɔi ni akɛ mumɔ efɔ amɛ mu lɛ ji “mɛi krɔŋkrɔŋi lɛ” ni kɛ lɛ náa nakai Maŋtsɛyeli lɛ mli gbɛfaŋnɔ lɛ. (1 Tesalonikabii 2:12) Yɛ mɛɛ gbɛ nɔ?
19, 20. (a) Yɛ mɛi ni yɔɔ kpaŋmɔ hee lɛ mli lɛ agbɛfaŋ lɛ, mɛɛ naagbee mlibaa ni yɔɔ nyam Yehowa shiwoo ni ekɛha Abraham lɛ baaná? (b) Mɛɛ sanebimɔ kroko hu ehe hiaa ni asusu he?
19 Yɛ amɛ gbele sɛɛ lɛ, ateeɔ nɛkɛ mɛi ni afɔ amɛ mu nɛɛ ashi kɛjɛɔ gbohii ateŋ taakɛ atee Yesu shi lɛ, ákɛ mumɔŋ bɔɔnii ni gboiii koni amɛfata ehe kɛsɔmɔ akɛ maŋtsɛmɛi kɛ osɔfoi yɛ ŋwɛi. (1 Korintobii 15:50-53; Kpojiemɔ 20:4, 6) Mɛɛ hiɛnɔkamɔ ni yɔɔ nyam nɛ! ‘Amɛaaye maŋtsɛmɛi yɛ shikpɔŋ lɛ nɔ,’ jeee yɛ Kanaan shikpɔŋ lɛ nɔ kɛkɛ. (Kpojiemɔ 5:10) Ani ‘amɛaaye amɛhenyɛlɔi agbói lɛ anɔ’? (1 Mose 22:17) Hɛɛ, ni amɛbaafee enɛ yɛ gbɛ ni mɔɔ shi nɔ, beni amɛyeɔ amɛhenyɛlɔ ni ji jamɔ mli ajwamaŋ, Babilon Kpeteŋkpele lɛ hiɛkpatamɔ lɛ he odase, kɛ be mli ni mɛi ni afɔ amɛ mu ni atee amɛ shi nɛɛ fataa Yesu he ni “ekɛ dadetso” kpalaa jeŋmaji lɛ, ni ejwaraa Satan yitso kwraa lɛ. Amɛbaatsɔ enɛ nɔ amɛná gbalɛ ni yɔɔ 1 Mose 3:15 lɛ naagbee fã lɛ mlibaa mli gbɛfaŋnɔ.—Kpojiemɔ 2:26, 27; 17:14; 18:20, 21; Romabii 16:20.
20 Shi kɛlɛ, ekolɛ wɔɔbi akɛ, Ani Abraham kpaŋmɔ lɛ kɛ kpaŋmɔ hee lɛ kɔɔ nɛkɛ susumai anɔkwafoi 144,000 nɛɛ pɛ ahe? Dabi, abaatsɔ amɛnɔ ajɔɔ mɛi krokomɛi ni bɛ nɛkɛ kpaŋmɔi nɛɛ amli tɛ̃ɛ lɛ hu, taakɛ wɔbaana yɛ nikasemɔ ni nyiɛ sɛɛ lɛ mli lɛ.
[Shishigbɛ niŋmai]
a Kwɛmɔ Insight on the Scriptures, Kpo 1, ni Watchtower Bible and Tract Society of New York, Inc. fee lɛ, baafa 470.
Ani Okaiɔ?
◻ Mɛɛ be ana akɛ kpaŋmɔ hee lɛ ebɔi nitsumɔ klɛŋklɛŋ?
◻ Mɛni anyɛ atsu kɛtsɔ kpaŋmɔ momo lɛ nɔ?
◻ Namɔ ji Abraham Seshi lɛ mli mɔ titri, ni te ato naa ajɔɔ jeŋmaji lɛ kɛtsɔ nakai Seshi lɛ nɔ aha tɛŋŋ?
◻ Yɛ mɛi 144,000 lɛ agbɛfaŋ lɛ, mɛni ji Abraham kpaŋmɔ lɛ kɛ kpaŋmɔ hee lɛ naagbee mlibaa?
[Mfoniri ni yɔɔ baafa 13]
Eshai ni akɛkeɔ lɛ hiɛ shishinumɔ ni mli kwɔ kɛha mɛi ni yɔɔ kpaŋmɔ hee lɛ shishi lɛ fe mɛi ni yɔɔ kpaŋmɔ momo lɛ shishi lɛ