Weku Kwɛmɔ He Sɔ̃ lɛ He Nitsumɔ

“NYƐ tsɛmɛi lɛ, nyɛkawoa nyɛbii amlifu, shi moŋ nyɛlɛa amɛ yɛ Yehowa tsɔsemɔ kɛ ŋaawoo lɛ mli.” (Efesobii 6:4, NW) Bɔfo Paulo tsɔ nakai wiemɔi ni jɛ mumɔŋ lɛ nɔ ekɛ weku kwɛmɔ he sɔ̃ lɛ fɔ̃ he ni sa—ákɛ eji tsɛ lɛ sɔ̃.

Yɛ wekui pii amli lɛ, jeee tsɛ lɛ pɛ kwɛɔ ebii lɛ. Eŋa ni ji gbekɛbii lɛ anyɛ kɛ miishɛɛ yeɔ ebuaa ewu kɛha jatsu lɛ teremɔ. Enɛ hewɔ lɛ Maŋtsɛ Salomo jaje akɛ: “Mibi, bo otsɛ tsɔsemɔ lɛ toi, ni kaashɛ onyɛ mla lɛ ofɔ̃.”—Abɛi 1:8.

Kwɛmɔ yɛ Mumɔŋ kɛ Helooŋ

Fɔlɔi ni sumɔɔ amɛbii ejeee gbɛ amɛkpooo amɛ. Yɛ anɔkwale mli lɛ, wɔbaanyɛ wɔmu sane naa kɛjɛ Paulo wiemɔ ni ekɛha Timoteo lɛ mli akɛ, kɛ Kristofoi fee nakai lɛ, etamɔ nɔ ni amɛkpoo hemɔkɛyeli lɛ nɔŋŋ: “Shi kɛ mɔ ko kwɛɛɛ lɛ diɛŋtsɛ emɛi, titri lɛ, lɛ diɛŋtsɛ eshiabii lɛ, ekpa yɛ hemɔkɛyeli lɛ sɛɛ, ni efaŋ mɔ ni heee yeee fe lɛ.” (1 Timoteo 5:8) Kristofoi eyɔse akɛ, ní ‘aaatsɔse yɛ Yehowa ŋaawoo kɛ tsɔsemɔ’ mli lɛ biɔ babaoo diɛŋtsɛ fe ni aaaha amɛ heloonaa nibii kɛkɛ.

Susumɔ hewalɛwoo ni Mose kɛha Israel maŋ lɛ he okwɛ, beni amɛbɔ nsra yɛ Moab ŋa lɛ nɔ, ni no sɛɛ etsɛɛɛ ni amɛbote Shiwoo Shikpɔŋ lɛ nɔ lɛ. Etĩ Nyɔŋmɔ mla lɛ mli shii abɔ eha amɛ yɛ jɛmɛ, ni efã amɛ akɛ: “Nyɛŋɔa miwiemɔi nɛɛ nyɛtoa nyɛtsuii amli kɛ nyɛsusumai amli.” (5 Mose 11:18) Mra mli lɛ, ekai amɛ koni amɛsumɔ Yehowa kɛ amɛtsui, amɛ susuma, kɛ amɛ hewalɛ fɛɛ, ni ekɛfata he akɛ: “Nɛkɛ wiemɔi nɛɛ ni miwoɔo he kita ŋmɛnɛ gbi nɛɛ aka otsui nɔ.” (5 Mose 6:5, 6) Ehe miihia koni Israelbii ni ji fɔlɔi aŋmɛ Nyɔŋmɔ Mla lɛ mli wiemɔi lɛ gbɛ koni egbu shi kɛbote amɛtsuii amli. Israelbii ni ji fɔlɔi ni amɛtsuiaŋ eyimɔ obɔbɔ kɛ mumɔŋ hiɛsɔɔ lɛ baanyɛ abo Mose wiemɔi ni nyiɛ sɛɛ lɛ toi jogbaŋŋ: “Ni ojwɛŋ [Nyɔŋmɔ Mla lɛ mli wiemɔi lɛ] nɔ otsɔɔ obii, ni owie he, beni ota shi yɛ oshia lɛ kɛ beni onyiɛ gbɛ teŋ kɛ beni okã shi kɛ beni ote shi.”—5 Mose 6:7; 11:19; okɛto Mateo 12:34, 35 he.

Kadimɔ akɛ, esa akɛ tsɛmɛi ‘jwɛŋɔ’ nakai wiemɔi lɛ anɔ amɛtsɔɔ amɛbii ni ‘amɛwie he.’ Merriam-Webster’s Collegiate Dictionary lɛ tsɔɔ wiemɔ ni ji “ojwɛŋ nɔ” lɛ shishi akɛ, “ní aaatsɔɔ, ní anyɛ nɔ awo mli kɛtsɔ mlitĩi shii abɔ loo ŋaawoi anɔ.” Kɛ fɔlɔi wie Nyɔŋmɔ Mla lɛ he—leebi, shwane, kɛ nyɔŋ lɛ—enɛ haa amɛbii lɛ leɔ nibii babaoo. Yɛ be mli ni gbekɛbii lɛ naa suɔmɔ ni amɛfɔlɔi yɔɔ kɛha Nyɔŋmɔ Mla lɛ, amɛ hu enáa amɛnɔ hewalɛ koni amɛbɛŋkɛ Yehowa. (5 Mose 6:24,25) Miishɛɛ sane ji akɛ, Mose je gbɛ efã tsɛmɛi koni amɛtsɔɔ amɛbii anii ‘beni amɛta shi yɛ shia.’ Nakai nitsɔɔmɔ lɛ fata weku lɛ kwɛmɔ he. Shi ŋmɛnɛ hu?

“Beni Ota Shi yɛ Oshia Lɛ”

“Ebɛ mlɛo,” taakɛ Janet, ni ji nyɛ Kristofonyo ko ni yɔɔ bii ejwɛ lɛ tsɔɔ mli lɛ.a “Hiɛmiamɔ he miihia,” Paul ni ji ewu lɛ kɛ lɛ kpãa gbee. Taakɛ fɔlɔi Kristofoi krokomɛi pii feɔ lɛ, kɛ hoo lɛ, Paul kɛ Janet bɔɔ mɔdɛŋ amɛkɛ amɛbii lɛ kaseɔ Biblia lɛ shikome yɛ otsi mli. Paul tsɔɔ mli akɛ: “Wɔbɔɔ mɔdɛŋ wɔfeɔ wɔ weku Biblia mli nikasemɔ lɛ daa Ju gbɛkɛ yɛ be ni wɔto lɛ naa,” ni ekpɛlɛ nɔ akɛ, “jeee daa gbi eyeɔ omanye.” Ákɛ onukpa ni ahala lɛ yɛ esafo lɛ mli lɛ, bei komɛi lɛ abatsɛɔ lɛ kɛyatsuɔ saji komɛi ni he hiaa ahe nii. Ebii onukpai enyɔ lɛ miisɔmɔ akɛ be-fɛɛ sɔɔlɔi. Amɛna akɛ gbɛkɛ ji bei ni anyɛɔ anaa gbɔmɛi yɛ sɔɔmɔ nitsumɔ lɛ mli ni ewoɔ yibii. No hewɔ lɛ, ákɛ weku lɛ amɛtsakeɔ be kɛha amɛ weku nikasemɔ lɛ mli. Paul tsɔɔ akɛ: “Bei komɛi lɛ, wɔfeɔ wɔnikasemɔ lɛ beni wɔye wɔ gbɛkɛ niyenii lɛ wɔtã sɛɛ nɔŋŋ.

Eyɛ mli akɛ fɔlɔi jɛɔ nilee mli amɛfeɔ tswãa kɛtoɔ be kɛhaa amɛ weku nikasemɔ lɛ moŋ, shi amɛbɔɔ mɔdɛŋ koni afee daa. Clare ni ji amɛbiyoo lɛ kɛɛ akɛ: “Kɛ ehe bahia koni atsake be ni wɔkɛbaakase nii lɛ, Ataa kɛ be hee lɛ kpɛtɛɔ friji lɛ shinaa lɛ he, bɔ ni afee ni wɔ fɛɛ wɔle be ni akɛbaafee.”

Kutuu ni afeɔ kɛfeɔ Biblia mli nikasemɔ lɛ hu haa gbɛkɛbii lɛ náa hegbɛ kpakpa amɛkɛtsɔɔ amɛjwɛŋmɔ kɛ amɛ naagbai. Kɛ ebɛ kpɛŋŋ tsɔ ni aaaha gbekɛbii lɛ akane sanebimɔi lɛ ahetooi lɛ kɛkɛ kɛjɛ Biblia kasemɔ he wolo ni akɛtsuɔ nii lɛ mli lɛ, no lɛ nikasemɔ ni tamɔ nɛkɛ baawo yibii kpakpai. Martin ni yɔɔ bihii enyɔ lɛ tsɔɔ mli akɛ: “Wɔ weku nikasemɔ lɛ ji kpeehe ni wɔwieɔ bɔ ni wɔsumɔɔ yɛ.” Ekɛɛ akɛ: “Onaa bɔ ni nyɛ weku lɛ yaa nɔ ehaa yɛ mumɔŋ, kɛ nyɛkpe shikome yɛ otsi lɛ mli koni nyɛsusu Ŋmalɛ mli sane ko he lɛ. Ajieɔ saji sɔrɔtoi fɛɛ kpo yɛ sanegbaa lɛ mli. Oleɔ nɔ ni yaa nɔ yɛ skul, ni nɔ ni yɔɔ miishɛɛ fe fɛɛ lɛ onaa sui ni obii lɛ náa.” Sandra ni ji eŋa hu kɛ lɛ kpãa gbee, ni enuɔ he akɛ lɛ hu enáa weku nikasemɔ lɛ he sɛɛ babaoo. Ekɛɛ akɛ: “Yɛ be mli ni miwu kwɛɔ nikasemɔ lɛ nɔ lɛ, mikaseɔ nibii babaoo kɛjɛɔ bɔ ni mibihii lɛ haa sanebimɔi lɛ ahetoo amɛhaa lɛ mli.” Kɛkɛ lɛ Sandra kɛ esaji ahetooi lɛ eye ebua ebihii lɛ. Enyaa nikasemɔ lɛ he babaoo, ejaakɛ ekɛ ehe woɔ mli diɛŋtsɛ. Hɛɛ, weku nikasemɔ haa fɔlɔi yɔseɔ bɔ ni amɛbii susuɔ nii ahe amɛhaa.—Abɛi 16:23; 20:5.

Okɛ Ohe Awo Shihilɛ lɛ Mli, ni Omia Ohiɛ

Kɛ nyɛ weku nikasemɔ be lɛ shɛ lɛ, obaana akɛ, gbekɛ lɛ eko baabo toi jogbaŋŋ, ni ebaaná he miishɛɛ, yɛ be mli ni ehe baahia ni alaka mɔ kroko lɛ koni ebo toi ni ená he sɛɛ. Fɔlɔ Kristofonyo ko kɛɛ akɛ: “Nakai ji bɔ ni weku shihilɛ yɔɔ! Ákɛ fɔlɔ lɛ, ole nɔ ni esa akɛ ofee. No hewɔ lɛ, kɛ omia ohiɛ otsu he nii lɛ, Yehowa yeɔ ebuaa bo ni ewoɔ yibii.”

Be sɛɛkɛlɛ ni gbekɛ ko jwɛŋmɔ nyɛɔ emɔɔ nii lɛ baafee sɔrɔto waa yɛ afii ni eye lɛ hewɔ. Fɔlɔ ni yɔseɔ nii lɛ baasusu enɛ he. Gbalashihilɛ mli hefatalɔi komɛi yɛ bii enumɔ, ni amɛye kɛjɛ afii 6 kɛmiiya mɛi ni yɔɔ amɛ afii 20 mli. Michael ni ji amɛtsɛ lɛ kɛɛ akɛ: “Ha gbekɛ kwraa ni yɔɔ amɛteŋ lɛ klɛŋklɛŋ aha sanebimɔi lɛ ahetoo. Koni agbɛnɛ oha gbekɛbii ni edara lɛ kɛ saji amlitsɔɔmɔ fitsofitso afata he, ni owie saji otii ni amɛkɛha lɛ he.” Nɛkɛ gbɛ nɔ ni atsɔɔ akɛ gbekɛbii yeɔ haa yɛ nilee mli lɛ, yeɔ ebua fɔlɔi koni amɛtsɔɔ amɛ bɔ ni asusuɔ mɛi krokomɛi ahe. Martin kɛɛ: “Wɔbii lɛ ateŋ mɔ kome baanu shishi, shi yelikɛbuamɔ babaoo he baahia gbekɛ nuu kroko lɛ koni enu shishi. Minaa akɛ, be ni wɔkɛkaseɔ nii lɛ bafeɔ be ni wɔkɛjieɔ Kristofoi atsuishitoo kɛ mumɔ lɛ yibii krokomɛi lɛ akpo.”—Galatabii 5:22, 23; Filipbii 2:4.

Saamɔ ohe koni okɛ ohe awo nyɛmɔi sɔrɔtoi ni obii lɛ yɔɔ yɛ amɛdalɛ naa lɛ mli. Simon kɛ Mark, ni bianɛ lɛ amɛye kɛjɛ afii nyɔŋma kɛ etɛ kɛyaa lɛ na akɛ, beni amɛji gbekɛbii lɛ, amɛnyaa Gbɔmɔ ni Fe Mɔ Fɛɛ Mɔ ni Ehi Shi Pɛŋ wolo lɛ ni amɛ fɔlɔi kɛ amɛ kaseɔ lɛ he waa diɛŋtsɛ. Amɛkaiɔ akɛ: “Wɔtsɛ haa wɔfeɔ wɔnii tamɔ gbɔmɛi lɛ diɛŋtsɛ.” Amɛtsɛ kaiɔ akɛ ekulaa shi ni eniji jwere shikpɔŋ ni ekɛfeɔ enii tamɔ Samarianyo naanyo kpakpa lɛ kɛ ebihii lɛ. (Luka 10:30-35) “Efeɔ tamɔ eyɛ mli diɛŋtsɛ, ni eyɛ miishɛɛ waa.”

Gbekɛbii babaoo teɔ shi amɛwoɔ weku nikasemɔ ni afeɔ daa lɛ. Ani esa akɛ enɛ aha fɔlɔi akpa nikasemɔ lɛ feemɔ taakɛ amɛto he gbɛjianɔ lɛ? Dabi, dabi kwraa. Abɛi 22:15 kɛɔ akɛ: “Buulufeemɔ kpɛtɛ gbekɛ tsui he.” Fɔlɔ kome ko ni ji nyɛ susu akɛ enyɛɛɛ etsu weku nikasemɔ nɔkwɛlɔ ni eji lɛ he nii, akɛni nibii ni gbalaa mɔ jwɛŋmɔ fiteɔ nifeemɔ lɛ hewɔ. Shi emia ehiɛ. Bianɛ lɛ ebii lɛ buɔ lɛ waa diɛŋtsɛ, ni amɛbana bɔ ni suɔmɔ kɛ mɔ he susumɔ kpo ni ejie kpo etsɔɔ kɛtsɔ ehiɛ ni emiaa kɛfee weku nikasemɔ daa gbi lɛ he yɔɔ sɛɛnamɔ ha lɛ nɔ.

Ní Aaaye Abua Gbekɛbii Hii kɛ Yei “Awusai”

Esa akɛ Kristofoi onukpai ‘alɛ Nyɔŋmɔ asafokuu’ lɛ. (1 Petro 5:2, 3) Wekui ni yɔɔ amɛ asafo lɛ mli ni amɛaasara amɛ yɛ be kɛ bei amli lɛ haa amɛnáa hegbɛ ni amɛjieɔ fɔlɔi ni tsuɔ amɛ Kristofoi asɔ̃i ahe nii lɛ yi. Namɔ esa akɛ etsuɔ fɔlɔi komekomei abii anitsɔɔmɔ he sɔ̃ lɛ he nii? Esaaa akɛ hiɛ kpaa nɔ kɔkɔɔkɔ akɛ gbekɛbii anitsɔɔmɔ kã fɔlɔi lɛ anɔ.

Kɛ eba akɛ onukpai aaatsu fɔlɔ ko ni eje mli gbɛhe ko he nii lɛ, belɛ Kristofoi ahiɛshikamɔ baaye ebua amɛ koni amɛtsi amɛhe kɛjɛ naagbai ni ekɛ baaba kɛ amɛŋmɛɛ saji ahe kɛsaa lɛ he. Eyɛ mli akɛ nyɛmimɛi enyɔ baanyɛ ayasara Kristofonyo nyɛmiyoo ni ji fɔlɔ kome lɛ moŋ, shi amɛbaakwɛ shihilɛi lɛ kɛ nɔ fɛɛ nɔ ni baajɛ mli aba lɛ jogbaŋŋ yɛ be mli ni amɛtoɔ gbɛjianɔ koni amɛkɛfĩ weku nikasemɔ he gbɛjianɔtoo lɛ sɛɛ lɛ. Gbekɛbii lɛ (yɛ anɔkwale mli, kɛ fɔlɔ kome lɛ hu) ni aaafɔ̃ amɛ nine yɛ be kɛ bei amli koni amɛfata onukpa lɛ diɛŋtsɛ weku nikasemɔ lɛ feemɔ he lɛ baafee nɔ ni tswaa mɔ emaa shi ni sɛɛnamɔ yɔɔ he. Shi kɛlɛ, ohiɛ akakpa nɔ akɛ Yehowa ji wɔ ŋwɛi Tsɛ kpeteŋkpele. Eyɛ mli akɛ nyɛ lɛ pɛ kɛ bii lɛ feɔ nikasemɔ lɛ moŋ, shi eyɛ diɛŋtsɛ koni eye ebua lɛ.

Ni yɛ shihilɛ mli ni gbekɛ ko susuɔ mumɔŋ nibii ahe, shi efɔlɔi lɛ tsuuu amɛmumɔŋ gbɛnaa nii ahe nii, loo amɛsusuuu he kwraa lɛ hu? Ehe ehiaaa ni Yehowa tsuji anɔkwafoi anijiaŋ jeɔ wui kɔkɔɔkɔ. Lalatsɛ lɛ la akɛ: “Bo [Yehowa Nyɔŋmɔ] odɛŋ mɔ ni efĩ lɛ lɛ tuuɔ ehe ewoɔ; bo nɔŋŋ ji awusa hefatalɔ.” (Lala 10:14) Ni onukpai ni yɔɔ suɔmɔ ni yɔɔ asafo lɛ mli lɛ hu baafee bɔ fɛɛ bɔ ni amɛaanyɛ koni amɛwo fɔlɔi lɛ hewalɛ yɛ be mli ni amɛkwɛɔ amɛbii lɛ. Amɛbaanyɛ amɛto gbɛjianɔ koni aná weku lɛ kɛ sanegbaa, koni amɛya ni amɛkɛ ŋaawoi komɛi ni he hiaa ni kɔɔ bɔ ni akaseɔ nii kutuu ahaa lɛ aha. Yɛ anɔkwale mli lɛ, amɛkɔŋ fɔlɔi ni ji mɛi ni yɛ Ŋmalɛ naa lɛ eji amɛ sɔ̃ lɛ amɛfɔŋ amɛnɔ.

Ehe miihia ni aye abua gbekɛbii ni amɛfɔlɔi ekpɛlɛɛɛ anɔkwale lɛ nɔ lɛ babaoo. Kɛ amɛfɔlɔi kpɛlɛɔ nɔ akɛ amɛfata nyɛhe yɛ nyɛ weku nikasemɔ lɛ mli lɛ, no lɛ ebaafee nɔ ni sɛɛnamɔ yɔɔ he. Beni Robert ni bianɛ lɛ eda ni eyɔɔ lɛ diɛŋtsɛ eweku lɛ eye afii etɛ pɛ lɛ, no mli lɛ ekɛ efɔlɔi yaa Kristofoi akpeei. Ekɛ miishɛɛ kaiɔ nakai kpeei lɛ yɛ be mli ni efɔlɔi kɛ Kristofoi asafo lɛ kpa bɔɔ lɛ sɛɛ po. Beni ená afii nyɔŋma lɛ, ekɛ Odasefonyo gbekɛ nuu ko kpe, ni lɛ ekɛ lɛ yaa kpeei lɛ. Odasefonyo gbekɛ nuu lɛ fɔlɔi kɛ miishɛɛ kwɛ Robert akɛ mumɔŋ awusã, ni yɛ sɛɛ mli lɛ, amɛkɛ lɛ kase nii. Yɛ suɔmɔ kwɛmɔ nɛɛ hewɔ lɛ, etee hiɛ oya, ni amrɔ nɛɛ eeená sɔɔmɔ ni ekɛhaa akɛ onukpa yɛ asafo lɛ mli lɛ mli ŋɔɔmɔ.

Kɛ fɔlɔi te shi amɛwo amɛbii lɛ ahiɛyaa po lɛ, ashiii gbekɛbii lɛ efolo. Yehowa yɛ lolo akɛ ŋwɛi Tsɛ anɔkwafo. Lala 68:6 kɛɔ akɛ: “Awusãi atsɛ . . . ji Nyɔŋmɔ yɛ eshihilɛhe krɔŋkrɔŋ lɛ.” Gbekɛbii hii kɛ yei ni ji awusãi yɛ mumɔŋ lɛ le akɛ amɛbaanyɛ amɛya eŋɔɔ yɛ sɔlemɔ mli, ni ebaaye ebua amɛ. (Lala 55:23; 146:9) Yehowa gbɛjianɔtoo ni tamɔ nyɛ lɛ kɛ mɔdɛŋbɔɔ tsuɔ esɔ̃ lɛ he nii kɛtsɔ mumɔŋ niyenii ni ŋɔɔ ni ekɛhaa kɛtsɔɔ ewoji, kɛ agbɛnɛ Kristofoi asafoi ni fa fe 85,000 ni yɔɔ jeŋ fɛɛ lɛ akpeei ashishi nɔ lɛ anɔ. Enɛ hewɔ lɛ, kɛtsɔ mumɔŋ yelikɛbuamɔ ni Yehowa, wɔ-Tsɛ lɛ, kɛ egbɛjianɔtoo ni tamɔ nyɛ lɛ nɔ lɛ, “awusãi” lɛ po baaná Biblia nikasemɔ komɛi ahe sɛɛ yɛ gbɛ ko nɔ.

Esa akɛ ajieɔ fɔlɔi Kristofoi ni kɛ amɛ bii feɔ weku Biblia mli nikasemɔ daa lɛ yi. Esa akɛ asusuɔ fɔlɔi komekomei ni miaa amɛhiɛ amɛtsɔseɔ amɛbii bibii yɛ Yehowa gbɛ̀i anɔ lɛ ahe ni ajie amɛyi waa yɛ amɛ mɔdɛŋbɔi lɛ ahewɔ. (Abɛi 22:6) Mɛi fɛɛ ni susuɔ mumɔŋ awusãi ahe lɛ le akɛ enɛ saa wɔ ŋwɛi Tsɛ Yehowa hiɛ. Weku mumɔŋ nibii ahe nitsumɔ ji sɔ̃ ni tsii. Shi ‘kaaha etɔ bo, ejaakɛ obaakpa yɛ be ni sa mli kɛ onijiaŋ ejeee wui.’—Galatabii 6:9.

[Shishigbɛ niŋmai]

[Mfoniri ni yɔɔ baafa 23]

Weku nikasemɔ kɛ hegbɛ kpakpa haa gbekɛbii ni yɔɔ mli lɛ koni amɛjie amɛsusumɔi akpo amɛtsɔɔ amɛfɔlɔi

[He ni Mfoniri ni yɔɔ baafa 20 lɛ Jɛ]

Harper’s