Sanebimɔi ni Jɛ Kanelɔi Adɛŋ

Ani tɛi tɛtrɛbii enyɔ lɛ pɛ akɛto kpaŋmɔ adeka lɛ mli, aloo akɛ nibii krokomɛi hu to mli?

Beni ajɔɔ sɔlemɔtsu ní Salomo ma lɛ nɔ yɛ afi 1026 D.Ŋ.B. lɛ, no mli lɛ “nɔ ko nɔ ko bɛ adeka lɛ mli ákɛ ja tɛi tɛtrɛbii enyɔ ní Mose ŋɔwo mli yɛ Horeb, he ni Yehowa kɛ Israelbii lɛ kpaŋ yɛ beni amɛjɛ Mizraim amɛbaa lɛ.” (2 Kronika 5:10) Shi sɛɛ mli lɛ, nibii tsake.

‘Yɛ nyɔŋ ni ji etɛ lɛ nɔ beni Israelbii lɛ eshĩ Mizraim shikpɔŋ lɛ nɔ sɛɛ lɛ,’ amɛyashɛ Sinai ŋa lɛ nɔ. (2 Mose 19:1, 2) Sɛɛ mli lɛ, Mose kwɔ kɛtee Sinai Gɔŋ lɛ nɔ ni eyahé tɛi tɛtrɛbii enyɔ ni aŋmala Mla lɛ yɛ nɔ lɛ. Etsɔɔ mli akɛ: “Ni mitsɔ mihe ni mikpeleke shi kɛjɛ gɔŋ lɛ nɔ, ni mibaŋɔ tɛi tɛtrɛbii lɛ miwo adeka ní mifee lɛ mli, ni amɛjwere mli, taakɛ bɔ ni Yehowa ewo mi kitã lɛ.” (5 Mose 10:5) Yehowa ha Mose fee nakai adeka lɛ koni akɛ tɛi tɛtrɛbii ni aŋmala Mla lɛ yɛ nɔ lɛ ato mli dã. (5 Mose 10:1) Afi 1513 D.Ŋ.B. naagbee gbɛ dani agbe kpaŋmɔ adeka lɛ naa ni akɛbɔi nitsumɔ.

Beni ajie Israelbii lɛ kɛjɛ Mizraim sɛɛ etsɛɛɛ ni amɛbɔi huhuuhu wiemɔ yɛ niyenii ni amɛyeɔ lɛ he. No hewɔ lɛ, Yehowa hã amɛ mana amɛye. (2 Mose 12:17, 18; 16:1-5) No beaŋ ni Mose kɛɛ Aaron akɛ: “Wo kpulu, ni owo mli mana gomer kome, ní oŋɔma Yehowa hiɛ, ní aŋɔto aha nyɛseshibii lɛ.” Nɔ ni tee nɔ lɛ he sane ni aŋma afɔ̃ shi lɛ kɛɔ akɛ: “Bɔ ni Yehowa fã Mose lɛ, nakai Aaron ŋɔma odase nɔ̃ [ni ji adeka ni akɛ nibii ni he hiaa toɔ mli] lɛ hiɛ, ni aŋɔto.” (2 Mose 16:33, 34) Eyɛ mli akɛ Aaron bua mana lɛ eko naa ewo kpulu mli yɛ nakai beaŋ moŋ, shi Mose gbe Adeka ni ekpɛɔ lɛ naa, ni ekɛ tɛi tɛtrɛbii lɛ wo mli dani akɛ mana lɛ yama odase nɔ̃ lɛ hiɛ.

Taakɛ wɔna kɛtsɔ hiɛ lɛ, akpɛ kpaŋmɔ adeka lɛ agbe naa yɛ afi 1513 D.Ŋ.B. naagbee gbɛ. Beni Kora kɛ mɛi krokomɛi ni fata ehe lɛ etse atua sɛɛ kwraa dani akɛ Aaron tso lɛ yato Adeka lɛ mli. Bɔfo Paulo wie “kpaŋmɔ adeka ni . . . no mli shika kpulu kɛ mana lɛ kɛ Aaron tso ni gba afofro lɛ kɛ kpaŋmɔ tɛi tɛtrɛbii lɛ yɔɔ” lɛ he.—Hebribii 9:4.

Nyɔŋmɔ ni duro Israelbii lɛ mana amɛye yɛ afii 40 gbɛ ni amɛfã yɛ ŋa lɛ nɔ lɛ. Beni amɛbɔi shiwoo ‘shikpɔŋ lɛ nɔ nibaanii lɛ eko yeli’ kɛkɛ ni akpa amɛ mana lɛ hamɔ. (Yoshua 5:11, 12) Akɛ Aaron tso lɛ yato kpaŋmɔ adeka lɛ mli yɛ yiŋtoo ko hewɔ, ni no ji koni aŋɔto okadi aha yinɔbii toigbolɔi lɛ, loo akɛye odase ashi amɛ. Enɛ tsɔɔ akɛ kɛ hooo lɛ, tso lɛ tee nɔ ehi mli yɛ gbɛ ni amɛfã kɛnyiɛ ŋã lɛ nɔ lɛ mli fɛɛ. Belɛ, nilee yɛ mli akɛ aaamu sane naa akɛ, ajie Aaron tso lɛ kɛ shika kpulu lɛ ni akɛ mana wo mli lɛ kɛjɛ kpaŋmɔ adeka lɛ mli beni Israelbii lɛ yashɛ Shiwoo Shikpɔŋ lɛ nɔ lɛ sɛɛ, ni ji dani ajɔɔ Salomo sɔlemɔtsu lɛ nɔ.