“Yehowa Wɔ-Nyɔŋmɔ Lɛ Wɔɔsɔmɔ”
“Shi mi lɛ, mikɛ miwe lɛ, wɔɔsɔmɔ Yehowa.”—YOSHUA 24:15.
1. Yoshua wolo lɛ yɛ kɛha wɔ hewalɛwoo kɛ yibaamɔ yɛ mɛɛ gbɛ nɔ?
AŊMALA Yoshua wolo lɛ mli nibii ni kanyaa mɔ waa lɛ aha “wɔhe nitsumɔ” ni agbɛnɛ “akɛto okadi aha wɔ” koni akɛwo wɔ hewalɛ koni abaa “wɔ mɛi ni nibii agbɛjianɔtoo nɛɛ naagbee enina wɔ lɛ” ayi. (Romabii 15:4; 1 Korintobii 10:11, NW) Ama Nyɔŋmɔ gbeyeishemɔ sui, tamɔ tsuishiŋmɛɛ, hemɔkɛyeli kɛ toiboo nɔ mi. “Hemɔkɛyeli naa Yeriko gbogboi lɛ kumɔ shwie shi, beni ebɔle lɛ gbii kpawo lɛ. Hemɔkɛyeli hewɔ Rahab ajwamaŋ lɛ pleneee efataaa mɛi ni heee yeee lɛ ahe lɛ, ejaakɛ ehere saralɔi lɛ hejɔlɛ naa.” (Hebribii 11:30, 31) Esa akɛ Yoshua, Rahab kɛ anɔkwafoi krokomɛi ni hi yɛ nakai blema gbii lɛ amli lɛ ahemɔkɛyeli lɛ akanya wɔ ni wɔhe awa koni wɔnyɛ wɔgbe Nyɔŋmɔ nitsumɔ kɛha ŋmɛnɛ lɛ naa.—Yoshua 10:25; Yohane 4:34.
2. (a) Yoshua fee toiboo kɛyashi naagbee yɛ nibii bibii po mli yɛ mɛɛ gbɛ nɔ? (b) Mɛni ba yɛ Ebal kɛ Gerizim gɔji lɛ ahe?
2 Yɛ be mli ni amɛye Ai nɔ kunim kwraa amɛgbe naa lɛ, agbɛnɛ Yoshua gbala ejwɛŋmɔ kɛtee famɔi ni aŋmala ashwie shi yɛ 5 Mose 27:1–28:68 lɛ nɔ koni ekase lɛ fitsofitso. Ekɛ tɛi muji ni mɔ ko woko dade nɔ yɛ nɔ pɛŋ ma afɔleshaa latɛ jɛ jɛmɛ yɛ Ebal Gɔŋ lɛ nɔ, ni jɛmɛ ji he ni etsii famɔ nɛɛ he nii yɛ akɛ: “Nyɛshaa shãa afɔlei yɛ nɔ ni nyɛyea yɛ jɛi, ni nyɛmli afilia nyɛ yɛ Yehowa nyɛ-Nyɔŋmɔ lɛ hiɛ.” Amɛhala tɛi krokomɛi amɛfee kaimɔ tɛ yɛ jɛmɛ, ni amɛsha he enyɛŋ, ni amɛŋmala Mla lɛ mli wiemɔi lɛ yɛ nɔ. Kɛkɛ ni ajara akutsei lɛ amli, kuu kome damɔ Gerizim Gɔŋ lɛ ŋɛlɛnɔ, “koni ajɔɔ gbɔmɛi lɛ,” ni fa hu damɔ “Ebal Gɔŋ lɛ ŋɛlɛnɔ” kɛha loomɔ lɛ. Levibii lɛ hole amɛgbeei anɔ ni amajaje loomɔi ni aaaba kɛha toigbele lɛ ni gbɔmɛi lɛ fɛɛ here nɔ akɛ “Amen!” Kɛkɛ ni ajaje jɔɔmɔi ni baajɛ toiboo mli aba lɛ hu. Shi kpoo ha Israel ‘kɛji akɛ eyeee mla lɛ mli wiemɔi lɛ anɔ ni eeeshe Yehowa Nyɔŋmɔ anunyamtsɛ ni he yɔɔ gbeyei lɛ gbɛi lɛ gbeyei lɛ!’—Yoshua 8:32-35.
3, 4. (a) Mɛɛ nikasemɔ ko ni mli wa waa gbɛ ni Israel tsɔ nɔ lɛ kɛhaa wɔ ŋmɛnɛ? (b) Mɛni hewɔ esaaa akɛ nibii ni wɔɔnu ni aati mli shii abɔ lɛ atoiboo tɔɔ wɔ lɛ? (d) Mɛni ebiɔ dani abote “agbo fintɔŋŋ” lɛ mli?
3 Ani Israel tee nɔ ebo ‘mla lɛ mli wiemɔi’ lɛ atoi? Yɛ bɔ ni afɔɔ Mose kɔkɔbɔɔ lɛ kɛ agbɛnɛ yɛ sɛɛ mli lɛ Yoshua nɔ lɛ he wiemɔ fɛɛ sɛɛ lɛ, amɛbooo toi. Mɛɛ nikasemɔ kpele enɛ ji kɛha ŋmɛnɛ! Yɛ kɔkɔ ni ayaa nɔ abɔɔ lɛ fɛɛ sɛɛ lɛ, mɛi pii yɛ ni amɛsusuɔ yɛ be fɛɛ mli akɛ amɛbaanyɛ amɛku amɛhiɛ amɛshwie Nyɔŋmɔ taomɔ nii anɔ ni ‘amɛtsɔ amɛ diɛŋtsɛ amɛgbɛ nɔ,’ kɛ yiŋtoo akɛ amɛbaaje mli hu. Mɛɛ kwashiai asane nɛ! Yɛ be mli ni ewieɔ Israel niiashikpamɔ lɛ he lɛ, Paulo jaje akɛ: “Mɔ ni susuɔ akɛ edamɔ shi lɛ ekwɛ ehe ni ahi koni ekagbee shi.”—1 Korintobii 10:12; Jajelɔ 2:13.
4 Nyɔŋmɔ webii lɛ ateŋ mɛi komɛi ewie eshi kɔkɔbɔɔ ni akɛha lɛ, ni amɛkɛɔ akɛ nibii loo saji ni amɛnuɔ ni atiɔ mli shii abɔ lɛ etɔ amɛ kɛ toiboo. Shi yɛ be babaoo mli lɛ nɛkɛ gbɔmɛi nɛɛ nɔŋŋ ji mɛi ni gbeeɔ Satan tsɔnei lɛ amli klɛŋklɛŋ. Biblia mli wolo ni jɛ mumɔŋ ni ji 5 Mose (yɛ Hebri mli lɛ Mish·neh’ hat·to·rahʹ ni eshishi ji, “Mla Mlitii”) lɛ hiɛ Mose wiemɔi muji ejwɛ; ni enɛɛmɛi fee lɛ faŋŋ kɛha Israel akɛ esa akɛ amɛbo Yehowa mlai ni atsɔ hiɛ ajaje lɛ toi. Mose kɛ wiemɔi babaoo ni kɔɔ toigbele he kɔkɔbɔɔ kɛ “loomɔi” ni baajɛ mli aba lɛ yifalɛ fe toi ejwɛ tsu nii kɛ akɛto wiemɔi ni kɔɔ “jɔɔmɔi” ni akɛtsu nii lɛ he lɛ. Yoshua ku sɛɛ ehɛle Israel shi ekoŋŋ yɛ Ebal Gɔŋ lɛ nɔ akɛ esa akɛ amɛbo toi. Ani etsɔɔɔ wɔ bɔ ni ehe hiaa waa akɛ wɔɔbɔ mɔdɛŋ ni wɔtsɔ “agbo fintɔŋŋ lɛ mli!”—Mateo 7:13, 14, 24-27; 24:21, 22.
5. Mɛɛ maji ni amɛfee ekome agbɛnɛ Israel kɛkpe, ni mɛni yɔɔ ni tamɔ nakai ni onaa ŋmɛnɛ?
5 Aato gbɛjianɔ aaha naagbee tawuu ko. Yeriko maŋ ni kwɛɔ jɛi niiaŋ nɔ lɛ hiɛ ekpata, taakɛ bɔ ni abaakpata apasa jamɔ hiɛ yɛ be mli ni “amanehulu kpeteŋkpele” lɛ aaaje shishi lɛ. Ai egbee shi, shi agbɛnɛ “maŋtsɛmɛi fɛɛ ni yɔɔ Yordan gɔji lɛ ateŋ kɛ jɔɔi lɛ amli kɛ ŋshɔ kpeteŋkpele lɛ naa fɛɛ, yɛ Lebanon ŋɛlɛnɔ, ni ji Hetibii kɛ Amoribii kɛ Kanaanbii kɛ Perizbii kɛ Hivbii kɛ Yebusbii lɛ . . . bua amɛhe naa ni amɛfee ekome, koni amɛkɛ Yoshua kɛ Israel abawuu.” (Yoshua 9:1, 2) Nɔ ni tamɔ enɛ yɛ ŋmɛnɛŋmɛnɛ beaŋ lɛ, wɔmiina ni jeŋmaji ni yɔɔ shikpɔŋ nɔ lɛ efee ekome yɛ nɔ ni akɛɛ atsɛɔ lɛ Jeŋmaji Ekomefeemɔ lɛ mli. Amɛmiitao toiŋjɔlɛ kɛ shweshweeshwe shihilɛ amɛha amɛhe yɛ amɛ diɛŋtsɛ amɛgbɛ nɔ, shi “amɛfee ekome amɛtee Yehowa kɛ mɔ efɔ lɛ mu lɛ” ni ji Yoshua kpeteŋkpele lɛ “yinɔ ajina.” (Lala 2:1, 2) Mɛni baajɛ mli aba?
Hiɛtɛɛ Loo Nilee Ni Akɛfeɔ Nii
6, 7. (a) Gibeonbii lɛ ná mɛni he miishɛɛ, ni mɛɛ ŋaa amɛkɛtsu nii? (b) Te Yoshua kojo sane lɛ eha tɛŋŋ?
6 Mɛi krokomɛi ni jeee Israelbii lɛ je shishi akɛ amɛaanya yiwalaheremɔ he, taakɛ Rahab ni tsɔ amɛhiɛ lɛ fee lɛ. Mɛnɛɛmɛi ji Gibeonbii lɛ, amɛjɛ maŋ kpeteŋkpele ko ni yɔɔ Yebus loo Yerusalem kooyigbɛ lɛ mli. Amɛnu Yehowa nitsumɔi wuji lɛ ahe ni amɛtswa amɛfai shi akɛ amɛbaatao toiŋjɔlɛ kɛ shweshweeshwe shihilɛ yɛ Yehowa gbɛ nɔ. Shi yɛ mɛɛ gbɛ nɔ? Amɛtsu bɔfoi kɛtee Israel ŋsara lɛŋ yɛ Gilgal. Ni hii nɛɛ hiɛ aboloi ni egbi ni efufuui, amɛhiɛ fɔlɔtɔi memeji kɛ wolotɔi memeji ni egbalagbalai ni ataratarai mli kɛ amɛtokotai memeji ni atsaratsarai kɛ atadei memeji. Yɛ be mli ni amɛbɛŋkɛ Yoshua lɛ, nɛkɛ hii nɛɛ kɛɛ akɛ: “Maŋsɛɛ shɔŋŋ otsuji jɛ ni amɛba yɛ Yehowa, o-Nyɔŋmɔ lɛ gbɛi ahewɔ; ejaakɛ wɔnu ehe sane.” Beni enu enɛ lɛ “Yoshua kɛ amɛ ye omanye sane, ni ekɛ amɛ kpaŋ hu akɛ agbeŋ amɛ.”—Yoshua 9:3-15.
7 Shi etsɛɛɛ ni Israelbii lɛ na le akɛ yɛ anɔkwale mli lɛ Gibeonbii lɛ ji mɛi ‘ni hiɔ amɛteŋ diɛŋtsɛ’! Mɛni Yoshua fee agbɛnɛ yɛ amɛlakamɔ lɛ he? Ekɛ woo ha kita ni etsɔ hiɛ eka amɛ akɛ ‘ebaaha amɛhi wala mli lɛ, koni amɛtsɔmɔ lailɛlɔi kɛ faaŋyalɔi amɛha Israel asafo muu fɛɛ.’—Yoshua 9:16-27; Okɛto 5 Mose 20:10, 11 he.
8. Yɛ mɛɛ gbɛi anɔ nɛkɛ Gibeonbii lɛ fee “asafo babaoo” lɛ ahe mfoniri yɛ?
8 Eka shi faŋŋ akɛ Netinim loo sɔlemɔwe tsuji lɛ ateŋ mɛi pii, ni yɛ sɛɛ mli afii lɛ amli lɛ amɛsɔmɔ yɛ Yehowa sɔlemɔwe lɛ jɛ Gibeonbii lɛ ateŋ. No hewɔ lɛ, Gibeonbii lɛ baanyɛ afee “asafo babaoo” ni amrɔ nɛɛ amɛjaa Nyɔŋmɔ “nyɔɔŋ kɛ shwane yɛ esɔlemɔwe” krɔŋkrɔŋ lɛ ahe mfoniri. (Kpojiemɔ 7:9, 15) Eyɛ mli akɛ amɛhiɔ shi yɛ Kanaanbii ajeŋ ko mli moŋ, shi nɛkɛ gbɔmɛi nɛɛ “jɛɛɛ je lɛŋ” ni nakai amɛji kɛjɛ amɛtsuiŋ tɔŋŋ. Tsutsu lɛ mumɔŋ niyenii ni “efufuui” amɛyeɔ, taakɛ anaa yɛ Kristendom sɔlemɔi lɛ amli lɛ, ni amɛbɛ “wein” ko ni haa amɛnaa miishɛɛ. Akɛni amɛkɛ Nyɔŋmɔ webii lɛ ebakpe hewɔ lɛ, ámɛbayoo akɛ Yehowa miifee naakpɛɛ nibii wuji kɛmiitsɔ edasefoi lɛ anɔ. Amɛfa gbɛ kakadaŋŋ kɛjɛ Satan je lɛ mli bɔni afee ni amɛbatsake ‘atadei’ ni egbalagbalai lɛ ni amɛna kadimɔ hee akɛ Yehowa tsuji heshibalɔi, ni amɛkɛ gbɔmɔ hee lɛ eha amɛhe.—Yohane 14:6, 7; 17:11, 14, 16; Efesobii 4:22-24.
Gbɛjiantoo Lɛ Sɛɛnamɔ
9. (a) Mɛɛ haomɔ kroko te shi? (b) Te Yoshua tsu enɛ he nii eha tɛŋŋ, kɛ mɛɛ nɔmimaa?
9 Beni Adonizedek, Yerusalem maŋtsɛ lɛ nu akɛ toiŋjɔlɛ eba Gibeonbii lɛ kɛ Israel teŋ lɛ, “amɛshe gbeyei naakpa; ejaakɛ maŋ kpeteŋkpele ji Gibeon, tamɔ maŋtsɛmɛi nɔŋŋ . . . ni emli hii lɛ fɛɛ lɛ kakalɔi sɔŋŋ ni.” Ekɛ maŋtsɛmɛi ejwɛ ko yafee ekome ni amɛbawo Gibeon he ka. Amrɔ nɔŋŋ pɛ kɛkɛ ni Gibeonbii lɛ bi yelikɛbuamɔ kɛjɛ Yoshua dɛŋ: “Ba wɔŋɔɔ mramra koni obahere wɔyiwala, koni obaye obua wɔ.” Amrɔ nɔŋŋ pɛ kɛkɛ ni Yoshua kpɛlɛ nɔ, ni Yehowa ma nɔ mi kɛha lɛ akɛ: “Kaashe amɛ gbeyei; ejaakɛ mitu amɛ miwo odɛŋ; amɛteŋ mɔ ko damɔŋ ohiɛ!” Kɛkɛ ni Yoshua kɛ etabilɔi kakalɔi lɛ nyiɛ nyɔɔŋ-nyɔɔŋ fɛɛ bɔni afee ni amɛbapue henyɛlɔi lɛ anɔ trukaa.—Yoshua 10:1-9.
10. (a) Mɛɛ nifeemɔ ko ŋmɛnɛ etamɔ Gibeon he ka ni awo lɛ? (b) Mɛɛ faishitswaa ŋmɛnɛŋmɛnɛ Gibeonbii lɛ jieɔ lɛ kpo?
10 Taakɛ nakai maŋtsɛmɛi enumɔ lɛ fee lɛ, ŋmɛnɛ, maŋ nɔyelɔi komɛi amli fuɔ kɛ amɛna bɔ ni amɛwebii lɛ ateŋ mɛi pii—emli “kakalɔi” po—lɛ miidamɔ shi kɛmiiha Yoshua kpeteŋkpele Iɛ kɛ ejeŋ muu fɛɛ Jalɛ Maŋtsɛyeli lɛ. Nɛkɛ nɔyelɔi nɛɛ heɔ yeɔ akɛ esa akɛ ahiɛ jakumaŋ husui amli lolo, eyɛ mli akɛ jeŋmaji lɛ kɛ amɛhe miibe ni amɛkɛ amɛhe miiwuu ta yɛ be fɛɛ mli. No hewɔ lɛ amɛbɔɔ mɔdɛŋ ni amɛfo mumɔŋ niyenii ni “asafo babaoo” lɛ ni sumɔɔ toiŋjɔlɛ lɛ nine shɛɔ nɔ lɛ mli, koni amɛgu amɛkpeei ni ji he ni amɛyeɔ nɛkɛ “niyenii” nɛɛ yɛ lɛ koni amɛkɛ amɛhe akagba mumɔŋ saji ahe sane dɔŋŋ. Shi ŋmɛnɛŋmɛnɛ beaŋ Gibeonbii nɛɛ kɛ mumɔŋ Israelbii lɛ damɔɔ shi yɛ anɔkwayeli mli amɛkɛɔ akɛ: “Wɔkɛnyɛ aaatee.”—Zakaria 8:23; okɛto Bɔfoi lɛ Asaji 4:19, 20; 5:29 he.
11. Mɛɛ gbɛ nɔ Yehowa Odasefoi tsɔɔ amɛtsuɔ naagbai loo haomɔi ahe nii yɛ ŋmɛnɛ?
11 Kɛ “asafo babaoo” lɛ bi yelikɛbuamɔ kɛjɛ “nyɛ̃” ni ji gbɛjianɔtoo lɛ dɛŋ lɛ, akɛhaa amɛ amrɔ nɔŋŋ, ni babaoo hu. Anaa bɔ ni Yehowa Odasefoi kɛ miishɛɛ kɛ oyaiyeli hu tsuɔ nii lɛ yɛ gbɛi sɔrɔtoi anɔ—tamɔ bɔ ni kɛ́ oshara ba hei komɛi lɛ amɛkɛ oyaiyeli mamɔɔ Maŋtsɛyeli Asai ni he hiaa kɛ kpee hei krokomɛi ni amɛkɛ “niyenii” ni he hiaa haa lɛ. Beni ato gbɛjianɔ akɛ abaafee kpee ko yɛ June ni ho nɛɛ yɛ Yankee Stadium, New York, Amerika lɛ, nyɛmimɛi babaoo diɛŋtsɛ kɛ amɛhe ha koni amɛbasaa jɛmɛ yɛ nyɔɔŋteŋ, yɛ be mli ni ágbe shwɛmɔ ko naa yɛ jɛmɛ lɛ sɛɛ; nakai shwɛmɔ he lɛ batsɔ he ko ni yɔɔ fɛo ni jɛmɛ etse fe be fɛɛ yɛ nakai gbii ejwɛ ni nyiɛ sɛɛ lɛ mli. Yehowa Odasefoi onukpai ni akɛ gbɛnaa nii ewo amɛdɛŋ kɛ oyaiyeli tsuɔ naagbai ni teɔ shi yɛ sanekpakpa lɛ shiɛmɔ he lɛ he nii amrɔ nɔŋŋ.—Filipibii 1:6, 7.
Yehowa Wuɔ Ehaa Israel
12. Mɛɛ naakpɛɛ nii Yehowa kɛtsu nii yɛ ta ni ewuu eha Israelbii ni ekɛfa Gibeonbii lɛ ahe lɛ mli? (Okɛto Habakuk 3:1, 2, 11, 12 he) .
12 Agbɛnɛ kwɛmɔ Gibeon. Yehowa miiha nakai henyɛlɔi asraafoi lɛ ayiŋ miifutu amɛ. Israel miitiu amɛ ni amɛmiigbe amɛ waa. Ni mɛni wɔnaa ni jɛɔ ŋwɛi shwieɔ shi lɛ? Nyɔŋmɔŋtɛi kpeteŋkpelei! Nɛkɛ nyɔŋmɔŋtɛi kpeteŋkpelei nɛɛ miigbe gbɔmɛi lɛ babaoo fe bɔ ni Israel tabilɔi lɛ diɛŋtsɛ feɔ. Agbɛnɛ bo toi. Yoshua kɛ Yehowa miiwie ni mɛni ekɛɔ lɛ “yɛ Israel fɛɛ hiɛ” lɛ? Akɛ: “Hulu, wa odamɔ shi yɛ Gibeon, ni bo nyɔɔŋtsere hu, yɛ Ayalon jɔɔ lɛŋ!” Naakpɛɛ nii ni yɔɔ gbeyei naakpa nɛ! “Ni hulu damɔ shi yɛ ŋwɛi teŋ,” ni ekpɛ yɛ tawuu he lɛ, kɛyashi be mli ni agbe Nyɔŋmɔ oweletɔɔ lɛ he nitsumɔ naa. Jeee wɔnɔ̃ ji ni wɔɔje ŋwane yɛ bɔ ni Yehowa fee nakai naakpɛɛ nii lɛ eha he, tamɔ bɔ ni wɔnyɛŋ wɔbi sane yɛ gbɛ ni etsɔ nɔ ‘efee nakai kanei enyɔ ni amɛkpɛ’ yɛ enibɔɔ gbi ni ji ejwɛ lɛ nɔ lɛ he lɛ. (1 Mose 1:16-19; Lala 135:5, 6) Nɔ ni aŋma afɔ shi lɛ yɛ faŋŋ: “Ni nakai gbi lɛ hiɛ loo esɛɛ nɛɛ gbi ko bako pɛŋ ni tamɔ no, ni Yehowa ebo gbɔmɔ gbee toi nɛkɛ; ejaakɛ Yehowa wuu ha Israel.”—Yoshua 10:10-14.
13. Yoshua tee nɔ ewo etatsɛmɛi lɛ ahewalɛ lolo yɛ mɛɛ gbɛ nɔ ni mɛni jɛ mli ba yɛ naagbee?
13 Mɛi ni shwɛ yɛ ta lɛ sɛɛ lɛ amɔɔmɔ lɛ ba naagbee kɛtsɔ maŋtsɛmɛi enumɔ lɛ ni agbe amɛ lɛ nɔ, ni nakai be lɛ mli Yoshua kɛɛ etatsɛmɛi lɛ akɛ: “Nyɛkashea gbeyei, ni nyɛtsui hu akafaa! Nyɛhe awaa ni nyɛfea ekãa; ejaakɛ nɛkɛ Yehowa baafee nyɛhenyɛlɔi lɛ fɛɛ ni nyɛkɛwuɔ lɛ!” Enɛ efee anɔkwale momo yɛ Kanaan maŋtsɛmɛi kpawo lɛ ahe, ni etee nɔ efee anɔkwale hu yɛ be mli ni aye maŋtsɛyelii krokomɛi 24 hu nɔ kunim lɛ. Kɛkɛ ni shikpɔŋ lɛ jɔɔ ehe yɛ afii ekpaa tawuu sɛɛ.—Yoshua 10:16-25; 12:7-24.
14. Mɛɛ su kɛ hekɛnɔfɔɔ esa akɛ wɔkpɛkpee Harmagedon?
14 Ŋmɛnɛ, yɛ be mli ni Harmagedon naagbee ta lɛ ka wɔhiɛ nɛɛ, eba akɛ wɔɔfee ekãa ni wɔhe awa tamɔ Yoshua kɛ ehii kakalɔi lɛ, kɛ Israel asafo muu lɛ fɛɛ hu. Wɔbaanyɛ wɔna hekɛnɔfɔɔ yɛ enɛ mli akɛ, taakɛ bɔ ni Yehowa kpala Israelbii akpekpei abɔ lɛ kɛba Shiwoo Shikpɔŋ lɛ nɔ shweshweeshwe lɛ, nakai nɔŋŋ ebaanyɛ efee naakpɛɛ nibii ni yɔɔ gbeyei lolo yɛ ewebii akpekpei abɔ ni sheee gbeyei lɛ ni ekɛ amɛ aaatsɔ Harmagedon mli kɛba egbɛjianɔtoo hee lɛ mli lɛ.—Kpojiemɔ 7:1-3, 9, 14; 19:11-21; 21:1-5.
Wɔfaishitswaa
15. Mɛɛ nitsumɔi nɛkɛ “tooi krokomɛi” lɛ baakpa gbɛ yɛ Nyɔŋmɔ gbɛjianɔtoo hee Iɛ mli?
15 Eyɛ mli akɛ agbɛnɛ Yoshua miihe ana afii 90 moŋ, shi nitsumɔ agbo ko hu ka ehiɛ—ni no ji shikpɔŋ lɛ ni eeeja mli eha Israel akutsei lɛ. Enɛ etsɔɔɔ akɛ shihilɛ baafee mlɛo aha Israelbii lɛ. Yɛ anɔkwale mli lɛ Kaleb bi ni aha lɛ shikpɔŋkuku yɛ Hebron, he ni obalaŋ Anakim lɛ yɔɔ lɛ; eesumɔ ni eya nɔ etsu nii ni ebule Yehowa henyɛlɔi lɛ ateŋ mɛi ni eshwɛ lɛ ashishi kwraa. Enɛ etsɔɔɔ akɛ adesai henyɛlɔi baahi shi yɛ Kristo Afii Akpe Nɔyeli lɛ mli yɛ shikpɔŋ nɔ. Shi nitsumɔ yɛ ni abaatsu. Esaaa akɛ wɔkpaa ogbɔjɔ kɛ hejɔfeemɔ shihilɛ gbɛ yɛ nibii agbɛjianɔtoo hee lɛ mli. Kɛ akɛ nitsumɔ wo amɛdɛŋ yɛ shikpɔŋ hee lɛ nɔ lɛ, Nuŋtsɔ lɛ “tooi krokomɛi” lɛ baana nitsumɔ babaoo ni amɛbaatsu yɛ shikpɔŋ lɛ hiɛ saamɔ ni amɛkɛtsake lɛ amɛfee lɛ paradeiso diɛŋtsɛ yɛ jeŋ fɛɛ lɛ mli.—Yoshua 14:6-15; Marko 10:29, 30; Romabii 12:11.
16. “Abobaa maji” ni Yehowa to he gbɛjianɔ lɛ feɔ mɛni he mfoniri ŋmɛnɛ?
16 Yɛ be mli ni Yoshua kɛ shikpɔŋ lɛ haa amɛ lɛ, ehala maji ekpaa eto afa eha Levibii lɛ koni amɛfee “abobaa maji,” etɛ yɛ Yordan sɛɛ ni etɛ yɛ Yordan hiɛ. Enɛ ji Yehowa gbɛjianɔtoo koni ekɛbaa gbɔmɔgbelɔ ni jeee gbɛ eje efee lɛ yi koni enyɛ ejo foi kɛya maji nɛɛ kome mli. Esa akɛ nɛkɛ gbɔmɔgbelɔ nɛɛ aye odase akɛ eyɛ henilee ni mli tse yɛ Nyɔŋmɔ hiɛ, ni efeɔ enɛ kɛtsɔɔ maŋ lɛ mli ni ehiɔ aahu kɛyashiɔ osɔfonukpa lɛ gbele be mli tɔŋŋ lɛ nɔ. Nakai nɔŋŋ hu taakɛ bɔ ni amɛkɛ jeŋ ni eye lá yi sɔ lɛ ebɔ yɛ tsutsu hewɔ lɛ, esa akɛ “asafo babaoo” lɛ ni yɔɔ ŋmɛnɛ lɛ atao henilee kpakpa yɛ Nyɔŋmɔ hiɛ. Amɛnaa nakai henilee kpakpa lɛ kɛtsɔɔ amɛhe eshai ni amɛjajeɔ, ni amɛtseɔ amɛhe kɛjɛɔ efɔŋ lɛ he lɛ nɔ, kɛ agbɛnɛ amɛhe nɔ ni amɛjɔɔ amɛhaa Yehowa, kɛ nu mli ni abaptisiɔ amɛ yɛ. Kɛkɛ lɛ esa akɛ amɛmɔ nakai shidaamɔ lɛ mli. Aakpa gbɛ akɛ “asafo babaoo” lɛ baahi “maŋ” lɛ mli aahu kɛyashi Yesu gbele yɛ okadi gbɛ nɔ yɛ osɔfoi anitsumɔ lɛ he, yɛ Afii Akpe Nɔyeli lɛ naagbee.—Yoshua 20:1-9; Kpojiemɔ 20:4, 5; 1 Korintobii 15:22, 25, 26.
17. Mɛɛ miishɛɛ sane ni baajɛ mli aba wɔkpaa Iɛ gbɛ ŋmɛnɛ?
17 Kwɛ bɔ ni Yehowa jɔɔ ewebii ni ji Israel yɛ naakpɛɛ gbɛ nɔ eha. Gbɛ lɛ nɔ nyiɛmɔ wa, ni kaai lɛ fa pii. Shi yɛ naagbee lɛ amɛbashɛ Shiwoo Shikpɔŋ lɛ nɔ ni amɛbahi jɛmɛ. Kwɛ bɔ ni amɛtsuii baayimɔ obɔ kɛ shidaa kɛha Yehowa! Ni akɛni wɔyeɔ wɔ-Nyɔŋmɔ lɛ anɔkwale hewɔ lɛ, eba akɛ miishɛɛ aaayimɔ wɔmli obɔbɔ yɛ be mli ni wɔboteɔ enibii agbɛjianɔtoo hee ni “shikpɔŋ hee” lɛ fata he lɛ mli lɛ. Yɛ anɔkwale mli lɛ ebaafee anɔkwale yɛ wɔhe taakɛ eji anɔkwale yɛ Yoshua gbii lɛ amli lɛ: “Nibii kpakpai fɛɛ ni Yehowa wo Israel we lɛ shi yɛ he lɛ, emli ekome folo ekaaa shi; fɛɛ kwa ba mli.” (Yoshua 21:45) Eba akɛ ooona mli gbɛfaŋnɔ yɛ miishɛɛ mli!
18. (a) Mɛni Yoshua ti mli egba Israel onukpai lɛ? (b) Mɛni esa akɛ wɔshwe yɛ Yehowa gbɛjianɔtoo hee lɛ he?
18 Yɛ naagbee lɛ, yɛ be mli ni Yoshua eye afii 110 lɛ, ebua Israel onukpai lɛ anaa. Ni egba amɛ naakpɛɛ gbɛi ni Yehowa etsɔ nɔ ejeɔ anɔkwafoi lɛ kɛjɛ Abraham gbii lɛ amli aahu kɛbashi nakai gbi lɛ nɔ he sane. Kɛkɛ ni Yehowa kɛɛ amɛ akɛ: “Ni mikɛ shikpɔŋ ko ni nyɛtsuko nɔ nii ha nyɛ, kɛ maji ni jeee nyɛ nyɛto, ni nyɛhi mli; weintromi kɛ mutromi ni jeee nyɛ nyɛfee lɛ amli nii nyɛyeɔ nɛɛ.” Yɛ nibii babaoo ni akɛha nɛɛ ahewɔ lɛ, yɛ anɔkwale mli lɛ Israelbii lɛ baasumɔ ni “amɛshe Yehowa gbeyei ni amɛsɔmɔ lɛ yɛ anɔkwayeli fɛɛ mli” kɛya naanɔ. Ni akɛni wɔkwɛɔ Yehowa anunyam nibii agbɛjianɔtoo hee ni baaba shikpɔŋ nɛɛ nɔ lɛ gbɛ hewɔ lɛ, yɛ anɔkwale mli lɛ, esa akɛ wɔteŋ mɔ fɛɛ mɔ ashwe enɛ.—Yoshua 24:13, 14.
19. (a) Mɛni nihaIamɔ Yoshua kɛfɔ gbɔmɛi lɛ ahiɛ, ni te amɛha hetoo amɛhe tɛŋŋ? (b) Esa akɛ wɔsumɔ akɛ wɔɔtamɔ namɛi? (d) Te nɔ ni esa akɛ wɔhala, ni kɛ mɛɛ faishitswaa?
19 Kɛkɛ ni Yoshua kɛɛ gbɔmɛi lɛ yɛ faŋŋ mli akɛ: “Shi kɛji esaaa nyɛhiɛ akɛ nyɛaasɔmɔ Yehowa lɛ, no lɛ ŋmɛnɛ gbi nɛɛ, nyɛkɔa mɔ ni nyɛaasɔmɔ. . . . SHI MI LƐ, MIKƐ MIWE LƐ, WƆƆSƆMƆ YEHOWA!” Ani wɔteŋ mɔ fɛɛ mɔ baanyɛ awie nɛkɛ wiemɔi nɛɛ, ani wɔweku Iɛ mlibii ni heɔ yeɔ lɛ baanyɛ awie nakai, wɔ asafoi lɛ baanyɛ awie nakai, ani “Nyɔŋmɔ webii” ni yɔɔ jeŋ fɛɛ lɛ baanyɛ awie nakai? Hɛɛ amɛbaanyɛ amɛwie nakai! (Efesobii 2:19) Gbɔmɛi ni hi shi yɛ Yoshua gbii lɛ amli lɛ ha lɛ hetoo akɛ: “Yehowa wɔ-Nyɔŋmɔ lɛ wɔɔsɔmɔ, ni lɛ egbee toi wɔɔbo!” (Yoshua 24:15, 24) Shi nɔ ni yɔɔ mɔbɔ ji akɛ, yɛ sɛɛ mli afii amli lɛ, amɛnyɛɛɛ amɛfee nakai. Wɔsumɔɔɔ ni wɔtamɔ mɛi ni nyɛɛɛ afee nakai lɛ. Wɔmiisumɔ ni wɔtamɔ Yoshua kɛ eshiabii lɛ, tamɔ Kaleb, tamɔ Gibeonbii lɛ, tamɔ Rahab. Hɛɛ, “YEHOWA WƆ NYƆŊMƆ LƐ WƆƆSƆMƆ.” Eba akɛ wɔkɛ ekãa kɛ hekɛnɔfɔɔ kwraa aaafee nakai, ákɛ nɔ ko nɔ ko bɛ ni baanyɛ “agbala wɔkɛ Nyɔŋmɔ suɔmɔ ni yɔɔ Kristo Yesu wɔ-Nuŋtsɔ lɛ mli lɛ mli.”—Romabii 8:39.a
[Shishigbɛ niŋmai]
a Ajie kɛjɛ December 15, 1986 Watchtower lɛ mli.
Mɛni Wɔkaseɔ Kɛjɛɔ Yoshua Wolo Lɛ Mli—
◻ Yɛ sɛɛnamɔ ni nine shɛɔ nɔ kɛjɛɔ kɔkɔ ni atiɔ mIi abɔ lɛ mli?
◻ Yɛ ŋmɛnɛŋmɛnɛ beaŋ Gibeonbii lɛ ahe nitsumɔ mli?
◻ Yɛ bɔ ni Yehowa baawuu Harmagedon ta lɛ aha lɛ mli?
◻ Yɛ bɔ ni ehe hiaa akɛ aaajo foi kɛaaya “abobaa maŋ” lɛ mli.
◻ Yɛ mɔ ni esa akɛ wɔsɔmɔ lɛ lɛ halamɔ mli?