Ehud Nuu ni Yɔɔ Hemɔkɛyeli kɛ Ekãa

KƐJƐ be mli ni Israelbii lɛ bashɛ Shiwoo Shikpɔŋ lɛ nɔ nɛɛ afii pii eho. Mose kɛ esɛɛyelɔ Yoshua, egboi jeeŋmɔ. Akɛni hii ni yɔɔ hemɔkɛyeli ni tamɔ nɛkɛ bɛ hewɔ lɛ, hiɛsɔɔ kɛha jamɔ krɔŋŋ ba shi kwraa. Israelbii lɛ eje Baal sɔrɔtoi lɛ kɛ akrabatsaia lɛ ajamɔ shishi po. Yɛ enɛ hewɔ lɛ, Yehowa kɛ ewebii lɛ wo Siriabii lɛ adɛŋ afii kpaanyɔ. Kɛkɛ ni Israelbii lɛ bo amɛtsɛ́ Nyɔŋmɔ kɛha yelikɛbuamɔ. Ekɛ mɔbɔnalɛ bo amɛ toi. Yehowa tee kojolɔ Otniel shi koni ekpɔ̃ E-webii lɛ.—Kojolɔi 3:7-11.

Kulɛ esa akɛ nibii ni tee nɔ nɛɛ atsɔɔ Israelbii lɛ shishijee anɔkwale ko—toiboo kɛha Yehowa kɛ jɔɔmɔi baa, yɛ be mli ni toigbele kɛ loomɔi baa. (5 Mose 11:26-28) Shi, Israelbii lɛ ekaseee nii kɛjɛɛɛ enɛ mli. Yɛ afii 40 toiŋjɔlɛ sɛɛ lɛ, amɛku sɛɛ amɛshi jamɔ krɔŋŋ ekoŋŋ.—Kojolɔi 3:12.

Moab Bati Amɛ Shi Trukaa

Yehowa ha ewebii lɛ yagbee Moab Maŋtsɛ Eglon dɛŋ. Biblia lɛ tsɔɔ bɔ ni eji akɛ “eshwi naakpa.” Amon kɛ Amalek baye bua lɛ, ni Eglon yatutua Israel ni eto emaŋtsɛwe yɛ Yeriko, “tɛŋi amaŋ lɛ.” Kwɛ nii ni kɛ ehe kpaaa gbee akɛ klɛŋklɛŋ Kaanan maŋtiase ni Israel ye nɔ lɛ aaatsɔ he ni mɔ ni jaa apasa nyɔŋmɔ Kemosh lɛ kɛaafee emaŋtiase!b—Kojolɔi 3:12, 13, 17.

Eglon wa Israelbii lɛ ayi yɛ afii 18 ni nyiɛ sɛɛ lɛ amli, ni eka shi faŋŋ akɛ, ebi oniatsumɔ nibii ni tsii kɛjɛ amɛdɛŋ. Akɛni ebi ni akɛ oniatsumɔ nibii aba yɛ be kɛ bei amli hewɔ lɛ, Moab waje lɛ diɛŋtsɛ egbɛhe yɛ shika gbɛfaŋ, ni eha Israel hewɔ nibii fɛɛ tã. Anuɔ shishi akɛ, no hewɔ ni Nyɔŋmɔ webii bolɔ kɛha kpɔmɔ, ni Yehowa bo toi shikome ekoŋŋ lɛ. Etee yiwalaherelɔ kroko shi kɛha amɛ—yɛ nɛkɛ be nɛɛ mli lɛ, Benyaminnyo ni atsɛɔ lɛ Ehud. Bɔni afee ni efo Israel yi ni Eglon waa lɛ sɛɛ lɛ, Ehud to ŋaa akɛ ebaafee nɔ ko yɛ gbi ni baanyiɛ sɛɛ ni abaahe oniatsumɔ nii lɛ nɔ.—Kojolɔi 3:14, 15.

Bɔni afee ni esaa ehe kɛha ŋaatsɔ̃ɔ ni ekãa yɔɔ mli nɛɛ, Ehud fee klante kɛ enaa ŋta, ni ekɛlɛ ji ninetalɔ kome. Kɛ eji ninetalɔ ni yɔɔ kuku lɛ, tawuu nii nɛɛ kɛlɛ aaafee waotalɔi 15. Mɛi komɛi baatsɛ lɛ dukpei. Eyɛ faŋŋ akɛ, akɛ nɔ̃ ko ebleko dade lɛ kɛ emlimɔmɔhe lɛ mli. No hewɔ lɛ, Ehud baanyɛ ni ekɛ eklante bibioo lɛ ato etade lɛ fã ni edɔ mli lɛ shishi. Agbɛnɛ hu, akɛni Ehud ji abɛkulɔ hewɔ lɛ, ebaanyɛ ni ekɛ eklante lɛ afi eninejurɔgbɛ—ni jeee he ni afiɔ tawuu klante yɛ daa lɛ.—Kojolɔi 3:15, 16.

Ehud ŋaatsɔɔ lɛ jeee nɔ ni oshara bɛ he. Akɛ nɔkwɛmɔ nɔ lɛ, kɛji akɛ maŋtsɛ lɛ tsuji lɛ kwɛ Ehud he kɛha tawuu nii hu? Kɛji akɛ amɛfeee nakai po lɛ, eyɛ faŋŋ akɛ amɛshiŋ amɛ maŋtsɛ lɛ kome pɛ ni ekɛ Israelnyo ahi shi! Ni kɛji akɛ amɛfee nakai bɔ ni no baaha agbe Eglon lɛ, mɛɛ gbɛ nɔ Ehud baatsɔ ajo foi? Nɛgbɛ ebaanyɛ ejo foi kɛyashɛ dani Eglon tsuji lɛ ale nɔ ni eba lɛ?

Ŋwanejee ko bɛ he akɛ, Ehud susu saji ni tamɔ nɛkɛ he, ni ekolɛ esusu osharai sɔrɔtoi ni baanyɛ ajɛ mli aba lɛ ahe. Fɛɛ sɛɛ lɛ, etee nɔ etsu ŋaa ni etsɔ lɛ he nii, ejie ekãafeemɔ kɛ Yehowa mli hemɔkɛyeli kpo.

Ehud Kɛ Eglon Kpe

Gbi ni akɛ oniatsumɔ shika ni nyiɛ sɛɛ lɛ baaha lɛ shɛ. Ehud kɛ ehii lɛ bote maŋtsɛwe lɛ. Etsɛɛɛ ni amɛbadamɔ Maŋtsɛ Eglon diɛŋtsɛ hiɛ. Shi be shɛko ni Ehud kɛaatutua lɛ. Beni akɛ oniatsumɔ shika lɛ eha sɛɛ lɛ, Ehud wo mɛi ni tere nibii lɛ agbɛ ni amɛtee.—Kojolɔi 3:17, 18.

Mɛni hewɔ Ehud shashao shi yɛ Eglon ni eeetswa lɛ nɔ̃ lɛ mli? Ani eeshe gbeyei? Dabi kwraa! Bɔni afee ni etsu eŋaatsɔɔ lɛ he nii lɛ, ehe miihia ni Ehud kɛ maŋtsɛ lɛ pɛ akpe—nɔ̃ ko ni ahaaa lɛ nakai feemɔ hegbɛ beni ekɛ lɛ kpe klɛŋklɛŋ lɛ. Agbɛnɛ hu, ehe baahia ni Ehud ashi jɛmɛ oya. Foijee baafee mlɛo aha mɔ kome fe mɛi pii ni tere oniatsumɔ nii lɛ. No hewɔ lɛ, Ehud mɛ kɛha be ni sa. Be fioo ni ekɛyasara Eglon lɛ ha enyɛ ele bɔ ni maŋtsɛwe lɛ shikamɔ yɔɔ, koni ena ele bɔ ni abuɔ maŋtsɛ lɛ he ahãa.

Beni eyashɛ “tɛbui ni yɔɔ Gilgal lɛ ahe lɛ,” Ehud shi egbɔmɛi lɛ, ni efa gbɛ kɛku esɛɛ kɛtee Eglon maŋtsɛwe lɛ. Kilomitai aaafee enyɔ nyiɛmɔ lɛ ha Ehud na be fioo koni ekɛjwɛŋ enitsumɔ lɛ he, koni esɔle eha Yehowa kɛha ejɔɔmɔ.—Kojolɔi 3:19, NW.

Ehud Ku Esɛɛ

Eka shi faŋŋ akɛ ahere Ehud kɛba maŋtsɛwe lɛ. Ekolɛ oniatsumɔ shika ni fa ni etsɔ̃ hiɛ ekɛbaha lɛ ha Eglon he jɔ. Ekolɛ eyɛ mli akɛ klɛŋklɛŋ kpee lɛ yɛ kuku moŋ, shi eha Ehud na hegbɛ ni fa bɔ ni eeeha eto ekɛ maŋtsɛ lɛ sanegbaa shishi yɛ miishɛɛ mli. Bɔ fɛɛ bɔ ni sane lɛ ji lɛ, Ehud eku esɛɛ eyapue yɛ Eglon hiɛ.

Ehud kɛɛ: “Maŋtsɛ, miyɛ teemɔŋ sane ko ni mibagbao.” Yɛ anɔkwale ni eji akɛ ebashɛ shɔŋŋ nɛkɛ lɛ tsɔɔ akɛ Yehowa miikudɔ lɛ. Ni kɛlɛ, naagba yɛ. Anyɛŋ awie “teemɔŋ sane” ni Ehud hiɛ lɛ yɛ maŋtsɛ lɛ tsuji lɛ ahiɛ. Kɛ Yehowa kɛ ehe baawo sane lɛ mli lɛ, nakai yelikɛbuamɔ lɛ he miihia Ehud amrɔ nɔŋŋ. Maŋtsɛ lɛ fã akɛ: “Bu onaa!” Akɛni Eglon sumɔɔɔ ni anu nɛkɛ “teemɔŋ sane” nɛɛ hewɔ lɛ, eha mɛi ni sɔmɔɔ lɛ lɛ je ehe. Kwɛ bɔ ni Ehud tsui baanyɔ emli aha!—Kojolɔi 3:19.

Eglon ta eŋwɛitsu lɛ mli beni Ehud ba eŋɔɔ lɛ, ni ebakɛɛ lɛ akɛ: “Miyɛ Nyɔŋmɔ naa shɛɛ ko ni mibakɛɛo.” Ani “Nyɔŋmɔ” ni Ehud tsi etã lɛ tsɔɔ akɛ eetsɔɔ Kemosh? Ekolɛ Eglon baasusu nakai. Akɛni enɛ tee emiishɛɛ shi hewɔ lɛ, ewo ehe nɔ kɛjɛ emaŋtsɛsɛi lɛ nɔ edamɔ shi ni eekpa gbɛ akɛ eeenu sane ko. Ehud bɛŋkɛ lɛ, ekolɛ ekwɛ jogbaŋŋ koni ekaha maŋtsɛ lɛ miina tutuamɔ hesusumɔ ko. Kɛkɛ ni efee nii oya, “kɛkɛ ni Ehud kpã enine abɛku lɛ mli, ni efã klante lɛ yɛ eninejurɔgbɛ lɛ, ni ekɛdũ [Eglon] musuŋ, ni klante lɛ tso lɛ hu nyiɛ dade lɛ sɛɛ kɛbote mli, ni fɔ batsi dade lɛ sɛɛ; ejaakɛ egbalaaa klante lɛ kɛjɛɛɛ emusu mli, shi eyaje kpo yɛ sɛɛ.”—Kojolɔi 3:20-22.

Maŋtsɛ lɛ sɔɔlɔi ni miililaa shi yɛ jɛmɛ gbɛ lɛ efeee hoo ko. Shi Ehud yɛ oshara mli lolo. Eglon tsuji lɛ baanyɛ asha foi kɛba mli be fɛɛ be, ni amɛbana amɛ maŋtsɛ ni egbee shi lɛ gbonyo lɛ. Ehe miihia ni Ehud ashi jɛmɛ oya nɔŋŋ! Eŋamɔ shinaai lɛ, ni ejo foi kɛtsɔ̃ asa lɛ yiteŋ fɔlɔ ni kɔɔyɔɔ tsɔɔ mli lɛ mli.—Kojolɔi 3:23, 24a.

Nɔ ni Akpa Shi Ana kɛ Amɛnɔ Kunim ni Aye

Etsɛɛɛ ni Eglon tsuji lɛ bafee mɛi ni taoɔ ale nɔ ni yaa nɔ. Ni kɛlɛ, amɛmiishe gbeyei akɛ amɛaatee maŋtsɛ lɛ mlifu shi kɛtsɔ eteemɔŋ kpee ni amɛaaba shishi lɛ nɔ. Kɛkɛ ni amɛna akɛ aŋamɔ ŋwɛitsu lɛ asa lɛ yiteŋ shinaai lɛ. Amɛsusu akɛ, “benɛ eewa enane yɛ kɔɔyɔɔ heremɔ tsu lɛŋ.” Shi, beni be shwieɔ mli lɛ, yeyeeyefeemɔ baye nɔ ni amɛtaoɔ amɛle lɛ najiaŋ. Eglon tsuji lɛ nyɛɛɛ amɛ dɔŋŋ. “Kɛkɛ ni amɛyakɔ samfee, ni amɛbagbele [ŋwɛitsu lɛ asa lɛ shinaai lɛ], ni naa, amɛ-nuntsɔ lɛ ka shikpɔŋ ni egbo.”—Kojolɔi 3:24b, 25.

Beni enɛ yaa nɔ lɛ, Ehud ejo foi momo. Etsɔ tɛi ajwaramɔhe ni yɔɔ Gilgal lɛ, ni yɛ naagbee lɛ eyashɛ Seira, he ko ni yɔɔ Efraim gɔji ashikpɔŋ lɛ nɔ. Ehud bua Israel hii lɛ anaa, ni enyiɛ amɛhiɛ yɛ ekomefeemɔ mli kɛyatutua Moabbii lɛ. Sane lɛ gbaa akɛ, “amɛgbe mɛi aaafee akpei nyɔŋma yɛ Moabbii lɛ ateŋ, hii hewalɔi kɛ kakalɔi sɔŋŋ, ni mɔ ko mɔ ko naaa foijee he gbɛ.” Akɛni aba Moab shi hewɔ lɛ, Israel shikpɔŋ lɛ naaa naagba ko dɔŋŋ aahu afii 80.—Kojolɔi 3:26-30.

Nii ni Wɔkaseɔ Kɛjɛɔ Ehud Nɔkwɛmɔ Nɔ lɛ Mli

Nyɔŋmɔ mli hemɔkɛyeli kanya Ehud. Hebribii yitso 11 lɛ ejeee gbɛ etsiii etã akɛ mɔ ni “tsɔ hemɔkɛyeli nɔ amɛye maŋtsɛyelii anɔ kunim . . . amɛhe wa yɛ ta mli, amɛwo mɛikpɔji ata lɛ foi.” (Hebribii 11:33, 34) Ni kɛlɛ, Yehowa fi Ehud sɛɛ ejaakɛ efee nii yɛ hemɔkɛyeli mli, ni ejie Israel kɛjɛ Maŋtsɛ Eglon yiwalɛ hewalɛ lɛ shishi.

Ekãa ji Ehud sui lɛ ekome. Esa akɛ efee ekãa dani enyɛ efɔ̃ klante diɛŋtsɛ yɛ gbɛ ni mɔɔ shi nɔ. Ákɛ ŋmɛnɛŋmɛnɛ beaŋ Nyɔŋmɔ tsuji lɛ, wɔkɛ klante ni tamɔ nɛkɛ tsuuu nii. (Yesaia 2:4; Mateo 26:52) Ni kɛlɛ, wɔkɛ “mumɔŋ klante” ni ji Nyɔŋmɔ Wiemɔ lɛ tsuɔ nii. (Efesobii 6:17) Ehud he esa yɛ etawuu nii lɛ kɛ nitsumɔ mli. Ehe miihia ni wɔ hu wɔhe asa yɛ Nyɔŋmɔ Wiemɔ lɛ kɛ nitsumɔ mli, yɛ be mli ni wɔshiɛɔ Maŋtsɛyeli lɛ he sanekpakpa lɛ. (Mateo 24:14) Biblia lɛ kasemɔ yɛ teemɔŋ, Kristofoi akpeei ni wɔɔya daa, sɔɔmɔ nitsumɔ lɛ mli ni wɔkɛ wɔhe aaawo yɛ ekãa naa, kɛ wɔ-ŋwɛi Tsɛ lɛ ni wɔkɛ wɔhe aaafɔ enɔ yɛ sɔlemɔ mli lɛ baaye abua wɔ ni wɔkase sui kpakpai ni Ehud, nuu ni yɔɔ hemɔkɛyeli kɛ ekãa lɛlɛŋ lɛ jie lɛ kpo lɛ.

[Shishigbɛ niŋmai]

[Mfoniri ni yɔɔ baafa 31]

Ehud kɛ ehii lɛ kɛ oniatsumɔ nibii baha Maŋtsɛ Eglon

[He ni Sane lɛ Jɛ]

Ajie kɛjɛ Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s