Okɛ Ohe Ahã Koni Ajie Yehowa Yi!

1, 2. (a) Te Elifaz kɛ Bildad kɛɛ Nyɔŋmɔ naa sɔɔmɔ ni wɔsɔmɔɔ lɛ lɛ ehãa tɛŋŋ? (b) Mɛni Yehowa wie yɛ sane lɛ he?

BE KO lɛ, Elifaz, Temannyo lɛ, bi Hiob akɛ: “Ani adesa ko he yɛ sɛɛnamɔ hã Mawu? Moŋ nilelɔ lɛ, lɛ diɛŋtsɛ enáa ehe sɛɛ! Ani kɛ́ jalɔ jio lɛ, Ofe lɛ náa sɛɛ ko yɛ mli? aloo kɛ́ ohã ogbɛi lɛ ye emuu lɛ, enáa nɔ ko yɛ mli?” (Hiob 22:1-3) Ani osusu sanebimɔi nɛɛ kɛ ekrokomɛi ni tamɔ nakai lɛ ahe pɛŋ? Ŋwanejee ko bɛ he akɛ, Elifaz yasusu akɛ saji ni ebiɔ Hiob lɛ fɛɛ hetoo ji dabi. Enaanyo Bildad, Shuhinyo lɛ, hu wie kɛfi esɛɛ akɛ, adesa ko adesa ko nyɛŋ aja yɛ Nyɔŋmɔ hiɛ.​—Kanemɔ Hiob 25:4.

² No mli lɛ, Elifaz kɛ Bildad miitao Hiob anu he akɛ mɔdɛŋ ni ebɔɔ kɛsɔmɔɔ Yehowa lɛ he bɛ sɛɛnamɔ. Amɛkɛɛ yɛ Yehowa hiɛ lɛ, adesai tamɔ omlɛ̃gɛ̃i, loo gɔgɔmii. (Hiob 4:19; 25:6) Eji anɔkwale akɛ Yehowa nɔ kwɔ kwraa fe wɔ. No hewɔ lɛ, ekolɛ obaasusu akɛ Elifaz kɛ Bildad baa amɛhe shi ni no hewɔ amɛwie nɔ ni amɛwie lɛ. (Hiob 22:29) Anɔkwa, kɛ́ odamɔ gɔŋ ko ni kwɔ nɔ, loo oyɛ kɔɔyɔŋ lɛlɛ ko mli yɛ ŋwɛi shɔŋŋ ni ookwɛ shikpɔŋ lɛ, onaa adesai sɔmpiɔɔ yɛ shikpɔŋ. Shi ani nakai ji bɔ ni Yehowa hu naa wɔ kɛ nibii ni wɔfeɔ kɛfiɔ e-Maŋtsɛyeli lɛ sɛɛ lɛ? Dabi. Nɔ ni ekɛɛ Elifaz, Bildad, kɛ Zofar lɛ hãa wɔnaa enɛ faŋŋ. Ekɛɛ amɛ akɛ amɛwieee ehe anɔkwale. Kɛkɛ ni ejie Hiob yi ni etsɛ lɛ akɛ “mitsulɔ.” (Hiob 42:7, 8) No hewɔ lɛ eyɛ faŋŋ akɛ, adesai ahe “yɛ sɛɛnamɔ” kɛhã Nyɔŋmɔ.

 3. Mɛni Elihu wie yɛ sɔɔmɔ ni wɔsɔmɔɔ Yehowa lɛ he? Ni mɛni ewiemɔi lɛ tsɔɔ?

³ Be ni Hiob nanemɛi etɛ lɛ wie amɛgbe naa lɛ, Elihu bi Hiob akɛ: “Kɛji oji jalɔ lɛ, mɛni ohãa lɛ [Nyɔŋmɔ]? loo mɛni enáa yɛ odɛŋ?” (Hiob 35:7) Ani Nyɔŋmɔ kã Elihu hu hiɛ yɛ sane nɛɛ ni ebi lɛ hewɔ? Dabi, ejaakɛ esanebimɔ lɛ etsɔɔɔ akɛ sɛɛnamɔ ko bɛ he akɛ wɔbaasɔmɔ Nyɔŋmɔ. Nɔ moŋ ni etsɔɔ kɛkɛ ji akɛ, kɛ́ wɔjá Yehowa jio, wɔjáaa lɛ jio lɛ, no hãaa etɔ fã. Yehowa yeɔ emuu. Adesai nyɛŋ ahã Nyɔŋmɔ aná nii loo ehe awa fe bɔ ni eji amrɔ nɛɛ. Moŋ lɛ, sui kpakpai, hesai, kɛ nyɛmɔi fɛɛ ni wɔyɔɔ lɛ jɛ eŋɔɔ, ni ekwɛɔ bɔ ni wɔkɛ nibii nɛɛ tsuɔ nii wɔhãa lɛ.

 4. Kɛ́ wɔfee mɛi ejurɔ lɛ, te Yehowa naa lɛ tɛŋŋ?

⁴ Kɛ́ wɔjie suɔmɔ ni tsakeee kpo wɔtsɔɔ Yehowa tsuji lɛ, enaa lɛ tamɔ nɔ ni lɛ wɔfeɔ wɔhãa lɛ. Abɛi 19:17 lɛ kɛɔ akɛ: “Mɔ ni naa ohiafo mɔbɔ lɛ, ekɛmiifa Yehowa; ni nɔ ni eŋɔhã lɛ lɛ, eeeto lɛ najiaŋ ekoŋŋ.” Ŋmalɛ nɛɛ hãa wɔnaa akɛ, Yehowa naa ejurɔ fɛɛ ejurɔ ni wɔfeɔ ohiafoi loo mɛi ni efi amɛ lɛ. Kɛ́ wɔna mɛi mɔbɔ lɛ, Yehowa, mɔ ni bɔ jeŋ muu lɛ fɛɛ lɛ, naa lɛ tamɔ nɔ ni wɔfa lɛ nɔ ko. Enaa lɛ tamɔ nɔ ni ehiɛ wɔ, ni wɔji adesai ni jeee nɔ ko nɛɛ nyɔmɔ ni esa akɛ ewo. Ni ewoɔ nakai nyɔmɔ lɛ kɛtsɔ jɔɔmɔi kɛ nijuji ni efeɔ ehãa wɔ lɛ anɔ. Yesu, ni ji Nyɔŋmɔ Bi lɛ, wie nɔ ko ni maa enɛ nɔ mi.​—Kanemɔ Luka 14:13, 14.

 5. Mɛɛ sanebimɔi wɔbaahã hetoo?

⁵ Yehowa fɔ̃ gbalɔ Yesaia nine ni esɔmɔ akɛ enajiaŋdamɔlɔ. Enɛ hãa wɔnaa akɛ, Yehowa miisumɔ ni ekɛ adesai ni yeɔ lɛ anɔkwa lɛ afee ekome kɛtsu eyiŋtoo lɛ he nii. (Yes. 6:8-10) Yesaia jɛ esuɔmɔ mli ekpɛlɛ ninefɔ̃ɔ lɛ nɔ. Ewie akɛ: “Naa mi, tsu mi.” Ŋmɛnɛ lɛ, mɛi akpei abɔ ekɔ Yesaia nane. Amɛjɛ amɛtsuiŋ amɛkɛ amɛhe ehã kɛhã nitsumɔi ni wa yɛ Yehowa asafo lɛ mli. Shi ekolɛ obaabi ohe akɛ: ‘Akɛ mɔ aŋkro lɛ, ani nɔ ni mitsuɔ lɛ he miihia? Eŋɔɔ minaa waa akɛ Yehowa ehã mi hegbɛ akɛ manyɛ mikɛ mihe ahã kɛhã enitsumɔ lɛ. Shi kɛ́ mikɛ mihe hãaa lɛ, ani Yehowa náŋ mɛi ni baatsu koni eyiŋtoo lɛ aba mli?’ Saji komɛi ni tee nɔ yɛ Debora kɛ Barak beiaŋ lɛ baanyɛ aye abua wɔ ni wɔná sanebimɔi nɛɛ ahetoo.

 6. Mɛni hewɔ yɛ adesai ahiɛ lɛ, ewa akɛ Israelbii lɛ baaye Yabin asraafoi lɛ anɔ kunim lɛ?

⁶ Yɛ Barak kɛ Debora beiaŋ lɛ, Kanaan maŋtsɛ Yabin ‘wa Israelbii lɛ ayi dɛŋdɛŋ’ afii 20. Israelbii ni yɔɔ akrowai lɛ amli lɛ she gbeyei akɛ amɛbaaje kpo kɛjɛ amɛshĩai amli po. Yabin asraafoi lɛ hiɛ dade shwiilii 900, kɛ tawuu nibii krokomɛi babaoo. Shi Israelbii lɛ ehiɛɛɛ tawuu nibii kpakpai ni amɛkɛbaawu amɛshi amɛhenyɛlɔi lɛ, ni asaŋ amɛbɛ damai kɛ nibii krokomɛi ni amɛkɛbaabu amɛhe.​—Koj. 4:1-3, 13; 5:6-8.a

7, 8. (a) Mɛni ji nɔ klɛŋklɛŋ ni Yehowa fã Barak akɛ efee? (b) Te Israelbii lɛ fee tɛŋŋ amɛye Yabin asraafoi lɛ anɔ kunim? (Kwɛmɔ mfoniri ni yɔɔ nikasemɔ lɛ shishijee lɛ.)

⁷ Shi Yehowa tsɔ gbalɔyoo kɛ kojolɔ Debora nɔ ekɛɛ tatsɛ Barak akɛ: “Ani jeee fã ni Yehowa, Israel Nyɔŋmɔ lɛ, efão akɛ: Yaafã ta kɛya Tabor gɔŋ lɛ nɔ, ni oŋɔ Naftalibii lɛ kɛ Zebulonbii lɛ ateŋ hii akpei nyɔŋma ofata ohe? Ni makpala Sisera, Yabin tatsɛ lɛ, kɛ eshwiilii lɛ kɛ emɛi babaoo lɛ kɛba oŋɔɔ yɛ Kishon faa lɛ naa, ni maŋɔ lɛ mawo odɛŋ.”​—Koj. 4:4-7.

⁸ Atswa adafi akɛ aatao mɛi ni kɛ amɛhe baahã kɛhã ta lɛ, ni mɛi fɛɛ ni here tsɛmɔ lɛ nɔ lɛ bua amɛhe naa yɛ Tabor Gɔŋ lɛ nɔ. Barak shashaooo shi kwraa, ekɛ esraafoi lɛ tee amɛkɛ henyɛlɔi lɛ yakpe yɛ Taanak. (Kanemɔ Kojolɔi 4:14-16.) Amɛhiɛ ta lɛ wuu kɛkɛ ni trukaa lɛ, nugbɔ bɔi nɛmɔ waa ni ehã shikpɔŋ lɛ fɛɛ fee ŋmɔtɔ. Barak tiu Sisera asraafoi lɛ kɛtee Haroshet tɔ̃ɔ, ni tsɔɔ akɛ amɛfo gbɛ aaafee kilomitai 24. Sisera dade shwiili lɛ yaka yɛ gbɛ lɛ nɔ. No hewɔ lɛ, eyi shi ni ejo foi kɛtee Zaananim. Eeenyɛ efee akɛ, Zaananim nɛɛ bɛŋkɛ Kedesh. Etee Yael, Kennyo Heber ŋa lɛ buu lɛ mli ni eyaba abo. Yael here lɛ hiɛmɛɛ, ni eyeee be ko ni ewɔ, ejaakɛ etɔ lɛ bliboo. Kɛkɛ ni Yael fee ekãa ni egbe lɛ. (Koj. 4:17-21) Yehowa hã Israelbii lɛ ye amɛhenyɛlɔi lɛ anɔ kunim!b

 9. Mɛni Kojolɔi 5:20, 21 lɛ hãa wɔleɔ yɛ ta ni Israelbii lɛ kɛ Sisera wu lɛ he?

⁹ Ehi waa akɛ wɔbaakase Kojolɔi yitso 4 kɛ yitso 5 lɛ fɛɛ shi kome, ejaakɛ yitso 5 lɛ hãa wɔnuɔ yitso 4 lɛ shishi jogbaŋŋ. Akɛ nɔkwɛmɔnɔ lɛ, Kojolɔi 5:20, 21 lɛ kɛɔ akɛ: “Ajɛ ŋwɛi awu ta lɛ, ŋulamii tete je amɛgbɛhei ni amɛkɛ Sisera wu! Kishon faa lɛ loo amɛ kɛtee.” Ani ŋmalɛ nɛɛ miitsɔɔ akɛ ŋwɛibɔfoi ye amɛbua Israelbii lɛ? Aloo eetsɔɔ akɛ ŋulamii diɛŋtsɛ tsirɛ kɛjɛ ŋwɛi batswiatswia shi? Biblia lɛ etsɔɔɔ. Shi kɛ́ okwɛ lɛ, mɛni baahã nugbɔ anɛ waa yɛ he tuuntu ni amɛwuɔ ta lɛ yɛ lɛ yɛ nakai be pɔtɛ̃ɛ lɛ mli bɔ ni baahã ta shwiilii 900 sɔŋŋ aka ŋmɔtɔ mli? Eyɛ faŋŋ akɛ, Yehowa nine yɛ mli. No hewɔ lɛ, ebɛ naakpɛɛ akɛ yɛ Kojolɔi 4:14, 15 lɛ, awie shii etɛ akɛ Yehowa ni hã Israelbii lɛ ye amɛhenyɛlɔi lɛ anɔ kunim. Israelbii 10,000 ni kɛ amɛhe hã lɛ ateŋ mɔ ko mɔ ko nyɛɛɛ ashi etsitsi akɛ lɛ ehã amɛye kunim lɛ.

10, 11. Mɛni ji “Meroz”? Ni mɛni hewɔ alomɔ lɛ lɛ?

¹⁰ Nɔ ko ni Debora kɛ Barak wie be ni amɛláa kɛjieɔ Yehowa yi yɛ naakpɛɛ gbɛ nɔ ni etsɔ ehã amɛye kunim lɛ hewɔ lɛ baanyɛ ahã wɔhiɛ afee wɔ yaa fioo. Amɛwie akɛ: “Nyɛlomɔa Meroz, nyɛlomɔa emli bii lɛ krɛdɛɛ! Ejaakɛ amɛbafataaa Yehowa he, amɛbafataaa Yehowa he yɛ kakãlɔi lɛ ateŋ!”​—Koj. 5:23.

¹¹ Etamɔ nɔ ni loomɔ nɛɛ tsu nii kɛmɔ shi, ejaakɛ mɔ ko mɔ ko nyɛɛɛ atsɔɔ nɔ tuuntu ni Meroz ji. Kɛji maŋ ko gbɛ́i ni lɛ, ani eeenyɛ efee akɛ nakai maŋ lɛ mli bii lɛ kɛ amɛhe hãaa be ni aatao mɛi ayawu ta lɛ? Ni kɛji maŋ nɛɛ kã he tuuntu ni Sisera tsɔ kɛjo foi lɛ, ani eeenyɛ efee akɛ emli bii lɛ ná hegbɛ ní amɛbaasa enaa loo amɛmɔ lɛ shi amɛfeee nakai? Ani amɛnuuu akɛ Yehowa miitao mɛi? Ni kɛ́ amɛkɛɛ amɛnuuu lɛ, ani amɛnaaa mɛi 10,000 ni bua amɛhe naa kɛhã ta lɛ? Feemɔ Merozbii lɛ ahe mfoniri ni amɛdamɔ shi amɛmiikwɛ tatsɛ ni yitsoŋ wa nɛɛ ni eshwɛ ekome too ni eejo foi kɛmiinyiɛ amɛmaŋ lɛ gbɛjegbɛi lɛ anɔ eetao he ko ni ebatee ehe yɛ. Kulɛ naa hegbɛ wulu ni amɛná ni amɛbaafee nɔ ko kɛfi Yehowa sɛɛ ni amɛhã eyiŋtoo lɛ aba mli koni ejɔɔ amɛ. Shi etamɔ nɔ ni be ni hegbɛ lɛ ba lɛ, Merozbii lɛ fee anyagba ni eho etee! Kɛji nɛkɛ nibii tee lɛ lɛɛlɛŋ lɛ, belɛ ekã shi faŋŋ akɛ, ekãa ni Yael fee ni egbe Sisera lɛ hã esoro lɛ kwraa yɛ amɛhe.​—Koj. 5:24-27.

12. Te mɛi srɔtoi ni awie amɛhe yɛ Kojolɔi 5:9, 10 lɛ ateŋ mɔ fɛɛ mɔ fee enii ehã tɛŋŋ? Ni mɛni wɔbaanyɛ wɔkase yɛ mli ŋmɛnɛ?

¹² Kojolɔi 5:9, 10 lɛ hãa wɔnaa nɔ kroko hu ni hã esoro mɛi ni fata Barak he kɛtee ta lɛ yɛ mɛi ni kɛ lɛ eyaaa lɛ ahe. Debora kɛ Barak jie “Israel nɔyelɔi lɛ” ayi, ejaakɛ amɛkɛ amɛhe hã yɛ amɛsuɔmɔ naa yɛ maŋbii lɛ ateŋ, loo kɛ́ wɔbaawie lɛ, amɛfata maŋbii lɛ ahe kɛtee. Amɛtamɔɔɔ mɛi ni ‘tara tejiyei yɛji anɔ,’ ni nu he akɛ amɛnɔ kwɔ kwraa tsɔ fe bɔ ni amɛkɛ amɛhe baawo ta lɛ mli lɛ, kɛ mɛi ni ‘tara kentei fɛfɛji anɔ’ ni sumɔɔ ogbɔjɔ shihilɛ lɛ. Ŋmalɛi lɛ wie mɛi komɛi ‘ni nyiɛ gbɛ lɛ nɔ’ lɛ hu ahe. Mɛi nɛɛ sumɔɔ hejɔlɛ, moŋ fe ni amɛbaafata amɛnyɛmimɛi lɛ ahe kɛkwɔ Tabor gɔŋ lɛ ni amɛkpeleke shi kɛya Kishon jɔɔ ni mli ewo ŋmɔtɔ lɛ mli amɛyawu ta lɛ eko. Lala lɛ wo mɛi ni fee nakai lɛ hewalɛ ni amɛjwɛŋ hegbɛ kpele ni eŋmɛɛ amɛ yɛ Yehowa sɔɔmɔ lɛ mli lɛ he. Ni nakai esa akɛ mɛi fɛɛ ni yɔɔ ŋmɛnɛ ni shashaoɔ shi akɛ amɛkɛ amɛhewalɛ fɛɛ baasɔmɔ Yehowa lɛ hu afee.

13. Mɛɛ gbɛ nɔ esoro bɔ ni Ruben, Dan, kɛ Asher akutsei lɛ amli bii lɛ fee amɛnii amɛhã lɛ yɛ mɛi ni jɛ Zebulun kɛ Naftali akutsei lɛ amli lɛ ahe?

¹³ Mɛi ni kɛ amɛhe hã lɛ kɛ amɛhiŋmɛii na bɔ ni Yehowa fã hegbɛ ni eyɔɔ akɛ Jeŋ Muu Fɛɛ Nɔyelɔ lɛ he. Amɛná niiashikpamɔ ko ni amɛbaanyɛ amɛjɛ mli amɛgba mɛi krokomɛi “Yehowa jalɛ nitsumɔi lɛ.” (Koj. 5:11) Yɛ Kojolɔi 5:15-17 lɛ, akã mɛi ni jɛ Ruben, Dan, kɛ Asher akutsei lɛ amli lɛ ahiɛ. Mɛni hewɔ? Ejaakɛ amɛhã amɛheloonaa nibii, ni ji amɛtoi, amɛlɛji, kɛ amɛlɛjiadaamɔhei lɛ ahe hia amɛ fe Yehowa nitsumɔ lɛ. Shi mɛi ni jɛ Zebulun kɛ Naftali akutsei lɛ amli lɛ efeee nakai. Biblia lɛ kɛɛ ‘amɛshɛ amɛhe amɛfɔ̃ hã gbele,’ loo amɛkɛ amɛwala wo oshara mli koni amɛfi Debora kɛ Barak sɛɛ. (Koj. 5:18) Wɔbaanyɛ wɔkase nɔ ko ni he hiaa waa yɛ sui ni akutsei srɔtoi lɛ amli bii lɛ jie lɛ kpo be ni ehe bahia ni amɛkɛ amɛhe ahã lɛ mli.

14. Mɛni wɔbaanyɛ wɔfee kɛtsɔɔ akɛ wɔfiɔ Yehowa nɔyeli lɛ sɛɛ?

¹⁴ Ŋmɛnɛ lɛ, Yehowa webii eyaaa ta. Kɛ̃lɛ, wɔbaanyɛ wɔtsɔ ekãa ni wɔkɛtsuɔ shiɛmɔ nitsumɔ lɛ nɔ wɔtsɔɔ akɛ wɔfiɔ Yehowa nɔyeli lɛ sɛɛ. Amrɔ nɛɛ, mɛi ahe miihia Yehowa asafo lɛ fe bei fɛɛ ni eho. Enɛ hewɔ lɛ, nyɛmimɛi hii kɛ yei akpekpei abɔ kɛ amɛhe ehã yɛ be fɛɛ sɔɔmɔ lɛ mli, ni amɛmiisɔmɔ akɛ gbɛgbalɔi, Betelbii, kɛ mɛi ni yeɔ amɛbuaa kɛmamɔɔ Maŋtsɛyeli Asai. Nyɛmimɛi komɛi hu kɛ amɛhe hãa kɛtsuɔ nibii srɔtoi yɛ kpeei bibii kɛ kpeei wuji ashishi. Agbɛnɛ hu, asafoŋ onukpai komɛi tsuɔ nii dɛŋdɛŋ akɛ Ajinafoi Akui Ni Kɛ Helatsamɔhei Shãraa lɛ amli bii, ni amɛteŋ mɛi komɛi hu toɔ kpeei wuji ahe gbɛjianɔ. Yehowa hiɛ sɔɔ nyɛmimɛi nɛɛ ni kɛ amɛhe ehã lɛ waa, ni wɔbaanyɛ wɔwie kɛ nɔmimaa akɛ, ehiɛ kpaŋ deŋme ni amɛgboɔ amɛhãa lɛ lɛ nɔ.​—Heb. 6:10.

15. Mɛni baaye abua wɔ ni wɔna kɛji wɔmiifee anyagba yɛ Yehowa sɔɔmɔ lɛ mli?

¹⁵ Esa akɛ wɔteŋ mɔ fɛɛ mɔ abi ehe akɛ: ‘Ani mishiɔ nitsumɔ lɛ tsiimɔ lɛ mifɔ̃ɔ mɛi krokomɛi anɔ? Ani heloonaa nibii asɛɛtiumɔ miihe be kɛ hewalɛ ni manyɛ mikɛsɔmɔ Yehowa lɛ fɛɛ? Ani miyɛ ekãa kɛ hemɔkɛyeli tamɔ Barak, Debora, Yael, kɛ mɛi 10,000 ni kɛ amɛhe hã lɛ? Ani mikɛ nibii fɛɛ ni miyɔɔ lɛ miiwo Yehowa sɔɔmɔ lɛ mli, tamɔ bɔ ni amɛfee lɛ?’ Kɛ́ eefee bo akɛ ofã oyahi maŋ kroko nɔ bɔ ni afee ni nibii amli ahi ahã bo lɛ, bi ohe akɛ: ‘Ani misɔle ni misusu bɔ ni enɛ baasa miweku lɛ kɛ misafo lɛ he ehã lɛ he jogbaŋŋ?’c

16. Eyɛ mli akɛ nɔ ko he ehiaaa Yehowa moŋ, shi mɛni wɔbaanyɛ wɔhã lɛ?

¹⁶ Yehowa ewo wɔhiɛ nyam waa akɛ ehã wɔ hegbɛ ni wɔtsɔɔ akɛ wɔfiɔ enɔyeli lɛ sɛɛ. Kɛjɛ be ni Abonsam laka Adam kɛ Hawa koni amɛje Yehowa sɛɛ ni amɛbafi esɛɛ lɛ, ehe ebahia waa ni wɔfi Yehowa nɔyeli lɛ sɛɛ koni Satan ana faŋŋ akɛ wɔfiii esɛɛ. Kɛ́ wɔhã hemɔkɛyeli kɛ anɔkwayeli tsirɛ wɔ ni wɔkɛ wɔhe hã yɛ Yehowa sɔɔmɔ lɛ mli lɛ, Yehowa náa miishɛɛ waa. (Abɛi 23:15, 16) Wɔhãa enáa hetoo ehãa Satan, mɔ ni bɔɔ lɛ ahora lɛ. (Abɛi 27:11) Kɛ́ oye Yehowa anɔkwa ni obo lɛ toi lɛ, etamɔ nɔ ni oohã lɛ nɔ ko ni jara wa, ni enɛ hãa emii shɛɔ ehe pam!

17. Yɛ nɔ ni aŋma yɛ Kojolɔi 5:31 lɛ naa lɛ, wɔsɛɛ lɛ, mɛni baaba?

¹⁷ Etsɛŋ, shikpɔŋ lɛ nɔ baayi obɔ kɛ mɛi ni fiɔ Yehowa nɔyeli lɛ sɛɛ. Kwɛ bɔ ni wɔshweɔ nakai be lɛ! Debora kɛ Barak lá amɛhã Yehowa akɛ: “Ohenyɛlɔi lɛ fɛɛ ahiɛ aaakpãtã. . . . Shi mɛi ni sumɔɔo lɛ aaafee tamɔ hulu be ni eteɔ shi yɛ ehewalɛ mli lɛ!” (Koj. 5:31) Ani wɔkɛ amɛ kpãaa gbee? Yehowa baahã lala nɛɛ mli wiemɔi lɛ aba mli be ni ekpãtãa Satan jeŋ fɔŋ nɛɛ hiɛ lɛ. Kɛ́ Harmagedon ta lɛ je shishi lɛ, ehe ebahiaŋ ni wɔkɛ wɔhe ahã kɛwu ta lɛ eko. Moŋ lɛ, ‘wɔbaadamɔ shi diŋŋ ni wɔkwɛ wɔyiwala ni Yehowa baahere lɛ.’ (2 Kron. 20:17) Shi kɛyashi nakai be lɛ baashɛ lɛ, wɔyɛ hegbɛi babaoo ni wɔkɛ ekãa kɛ hiɛdɔɔ baafi Yehowa sɛɛ koni eyiŋtoo lɛ aba mli.

18. Kɛ́ wɔkɛ wɔhe hã kɛsɔmɔ Yehowa lɛ, mɛɛ gbɛ nɔ mɛi krokomɛi baaná he sɛɛ?

¹⁸ Debora kɛ Barak jie Yehowa, ni ji Mɔ Ni Nɔ Kwɔ Fe Fɛɛ lɛ yi kɛje amɛkunimyeli lala lɛ shishi, moŋ fe ni amɛbaajie adesai ayi. Amɛlá akɛ: “Akɛni . . . maŋ lɛ hu here amɛhe [loo, amɛkɛ amɛhe hã] hewɔ lɛ, nyɛjiea Yehowa yi!” (Koj. 5:1, 2) Nakai nɔŋŋ kɛ́ wɔ hu wɔkɛ wɔhe hã kɛsɔmɔ Yehowa lɛ, ebaatsirɛ mɛi fɛɛ ni baaná he sɛɛ lɛ ni amɛ hu ‘amɛjie Yehowa yi.’