Ani Oshia Ji Toiŋjɔlɛ Kɛ Hejɔɔmɔ He?
“Eba akɛ Yehowa aaake nyɛ nii, ni nyɛteŋ mɔ fɛɛ mɔ ana hejɔɔmɔ he yɛ ewu we.”—RUT 1:9 New World Translation.
1. Mɛɛ yei etɛ je gbɛfaa ko ni kɛ amɛ baa Yuda lɛ shishi aaafee afii 3,000 ni eho nɛ?
AAFEE afii 3,000 ni eho nɛ, ni yei etɛ ko je gbɛfaa ko ni yɔɔ gbeyei shishi. Gbɛfaa nɛɛ kɛ amɛ baatsɔ kpokpaa ni julɔi kɛ gbɔmɛi awuiyelɔi yɔɔ nɔ lɛ mli. Yei nɛɛ miifa gbɛ kɛmiitsɔ Moab shikpɔŋ ni tɛi yɔɔ nɔ lɛ nɔ. Amɛteŋ onukpa lɛ ji okulafo Naomi, ni etswa efai shi akɛ ebaashɛ Betlehem ni yɔɔ emaŋ ni ji Yuda lɛ mli. Mɛi ni fata ehe ji obalayei okulafoi enyɔ, Orpa kɛ Rut, Moab yei ni ji Naomi bihii Kilion kɛ Malon ni egboi lɛ aŋamɛi. Bo toi!
2. Mɛni Naomi shwe kɛha Orpa kɛ Rut?
2 Naomi kɛɛ: “Nyɛkua nyɛsɛɛ nyɛyaa, nyɛteŋ mɔ fɛɛ mɔ aya enyɛ we; Yehowa afee nyɛ ejurɔ, taakɛ bɔ ni nyɛfee gbohii lɛ kɛ mi ejurɔ lɛ!” Ni mɛni ji nɔ ni Naomi jie lɛ kpo akɛ eesumɔ ni ena? Ekɛɛ “eba akɛ Yehowa aaake nyɛ nii, ni nyɛteŋ mɔ fɛɛ mɔ ana hejɔɔmɔ he yɛ ewu we.” (Rut 1:8, 9, New World Translation) Hɛɛ, Naomi wo eshaayei lɛ hewalɛ ni amɛku amɛsɛɛ ni amɛya amɛwebii aŋɔɔ, kɛ hiɛnɔkamɔ akɛ Nyɔŋmɔ aaaha obalayei nɛɛ ateŋ mɔ fɛɛ mɔ hejɔɔmɔ he kɛ miishɛɛ ni baa kɛjɛɔ wu kpakpa kɛ shia ni anaa lɛ mli lɛ eko.
3. Mɛɛ shidaamɔ Rut kɔ, ni mɛni jɛ mli ba yɛ naagbee?
3 Orpa ku esɛɛ, shi jeee anɔkwafo Rut. Akɛni ekpoo akɛ eeekwa eshaayoo lɛ hewɔ lɛ, Rut tswa efai shi akɛ: “Omaŋ ji mimaŋ, ni o-Nyɔŋmɔ ji mi hu mi-Nyɔŋmɔ.” Mɛni jɛ mli ba yɛ naagbee kwraa? Rut na shia ni ji toiŋjɔlɛ kɛ hejɔɔmɔ he yɛ Boaz ŋɔɔ ni awo lɛ “nyɔmɔ shishiishi”! Ebatsɔ Maŋtsɛ David kɛ e-Nuŋtsɔ, Yesu Kristo ni mɔ ko mɔ ko kɛ lɛ yeee egbɔ lɛ blemanyɛ.—Rut 1:16; 2:12; 4:13-22; Lala 110:1; Mateo 1:1-6.
4. Mɛɛ sanebimɔ ni hɛleɔ mɔ jwɛŋmɔ shi te shi?
4 Nɔ ni Naomi shweɔ ji ni Yehowa aha eshaayei nɛɛ ateŋ mɔ fɛɛ mɔ ana gbala kpakpa kɛ shia ni toiŋjɔlɛ kɛ hejɔɔmɔ yɔɔ mli akɛ nikeenii. Lɛlɛŋ, Nyɔŋmɔ miisumɔ ni etsuji lɛ ashia shihilɛ afee nɔ ni toiŋjɔlɛ yɔɔ mli. Kɛ oji Yehowa Odasefonyo lɛ, belɛ ani oshia lɛ ji toiŋjɔlɛ kɛ hejɔɔmɔ he?
Hefatalɔ Ni Sa Lɛ Halamɔ
5. Kɛ oji Kristofonyo ni boteko gbalashihilɛ mli shi oosusu gbalashihilɛ mlibotemɔ he lɛ, mɛni ji klɛŋklɛŋ nii ni kɛ shia shihilɛ ni toiŋjɔlɛ yɔɔ mli baa?
5 Kɛ oji Kristofonyo ni boteko gbalashihilɛ mli ni oosusu gbalashihilɛ mli botemɔ he lɛ, ŋwanejee ko bɛ he akɛ ohiɛ ka nɔ akɛ obaana shia shihilɛ ni toiŋjɔlɛ yɔɔ mli. Bɔfo Paulo ha klɛŋklɛŋ nifeemɔ yɛ enɛ mli lɛ fee faŋŋ, beni eŋma akɛ: “Yoo lɛ, gbii abɔ ni ewu hiɛ ka nɛɛ, akɛ mla efi lɛ; shi kɛji ewu lɛ gbo lɛ, eyɛ hegbɛ akɛ eeegba mɔ ni esumɔɔ, shi ja efee yɛ Nuŋtsɔ lɛ mli.”—1 Korintobii 7:39.
6. (a) Akɛ ‘abote gbalashihilɛ mli yɛ Nuŋtsɔ lɛ mli’ lɛ tsɔɔ mɛni? (b) Mɛɛ saji esa akɛ mɔ ni taoɔ gbalashihilɛ mli hefatalɔ lɛ asusu he? (d) Mɛni hewɔ esa akɛ mɔ ko atsɔ sɔlemɔ nɔ ahala hefatalɔ ni abaptisi lɛ lɛ?
6 ‘Abote gbalashihilɛ mli yɛ Nuŋtsɔ lɛ mli’ lɛ tsɔɔ akɛ akɛ naanyo heyelilɔ pɛ abote gbalashihilɛ mli. Shi esaaa akɛ Kristofonyo lɛ shaa foi kɛboteɔ gbalashihilɛ mli, kɛ mɔ ni ejɔɔ ehe nɔ eha Yehowa po. Ani mɔ lɛ ‘taoɔ jalɛ kɛ heshibaa sɛɛ gbɛ’ diɛŋtsɛ? (Zefania 2:3) Kɛ nuu loo yoo ji lɛ lɛ, ani ejɛ etsui muu fɛɛ mli eesɔmɔ Nyɔŋmɔ? Ani gbɔmɔ lɛ jɛɔ tsui ni mli eyi obɔ kɛ suɔmɔ wiemɔi mli ejieɔ Yehowa yi? Ani sɔɔmɔ nitsumɔ lɛ ji mɔ lɛ shihilɛ mli nii titri kɛ nii ni efɔɔ feemɔ? Kɛ nuu loo yoo ji lɛ lɛ, ani eyɛ taomɔ nii ni he hiaa kɛha sɔɔmɔ nitsumɔ lɛ kɛ agbɛnɛ kɛha Kristofoi agbalashihilɛ? Hɛɛ, esa akɛ akɛ nilee kɛ sɔlemɔ ahala hefatalɔ ni abaptisi lɛ po. Kɛ aaahi lɛ, na nɔmimaa akɛ heyelilɔ lɛ yɛ mumɔŋ sui kpakpai. Ekomefeemɔ ni tamɔ nɛkɛ lɛ tsiɔ nɔnyɛɛ kɛ tsuiyeli ni gbaa toiŋjɔlɛ naa ni yɛ bei babaoo mli lɛ eyɔɔ shiai ni jamɔ egbala amɛmli lɛ mli lɛ naa.
7. Mɛni he hiaa koni miishɛɛ ni da fe fɛɛ aba gbalashihilɛ mli?
7 Kristofoi enyɔ ni amɛjɔɔ amɛhe nɔ lɛ baanyɛ atsu amɛhenumɔŋ hiamɔ nii ahe nii ni amɛja mumɔŋ nibii hu yɛ gbalashihilɛ mli. Nɔ ni jɛɔ enɛ mli baa ji adesai ekomefeemɔ kpaa ni bɛŋkɛ kpaakpa ni aaanyɛ ana. Eji anɔkwale akɛ Kristofoi hii kɛ yei sumɔɔ ni ekomefeemɔ ni bɛŋkɛ kpaakpa aba amɛ kɛ amɛ gbalashihilɛ mli hefatalɔi lɛ ateŋ. Abɔ adesai kɛ henumɔ akɛ amɛja mɔ ko, ni wɔmiishɛɛ ni fe fɛɛ lɛ baa beni wɔtoɔ gbɛjianɔ kpakpa ni wɔtsu wɔmumɔŋ hiamɔ nii ahe nii lɛ. (Mateo 5:3) Kɛ wɔyoo enɛ lɛ, eka shi faŋŋ akɛ wɔsumɔŋ ni wɔgbo Yehowa nɔ toi kɛtsɔ mɔ ni heee yeee ni wɔkɛ lɛ aaabote gbalashihilɛ mli koni wɔha nɛkɛ mumɔŋ ekomefeemɔ ni haa gbalashihilɛ yaa hiɛ nɛɛ abɔ wɔ lɛ nɔ. (5 Mose 7:3, 4) Hɛɛ, kɛha wɔmiishɛɛnamɔ ni fe fɛɛ yɛ gbalashihilɛ mli lɛ, bɔɔ mɔdɛŋ ni okwɛ ni Nyɔŋmɔ ahi nyɛgbalashihilɛ lɛ mli. Nɛkɛ okadi “kpaa ni akɛbɔ he shii etɛ lɛ, etseee mra.” (Jajelɔ 4:12) Yɛ anɔkwale mli lɛ, ni ooona Yehowa Nyɔŋmɔ yɛ ogbalashihilɛ mli lɛ baaha efee nɔ ni wa ni ebaaye ebua ni eha oshia lɛ afee toiŋjɔlɛ kɛ hejɔɔmɔ he.
Ŋaawoo Ni Kɛ Shia Toiŋjɔlɛ Baa
8. Mɛɛ ŋaawoo ji nɔ ni sa jogbaŋŋ kɛha Kristofoi ni amɛbote gbalashihilɛ mli?
8 Yɛ Kristofoi ni amɛbote gbalashihilɛ mli momo lɛ agbɛfaŋ lɛ, mɛni he hiaa koni shia lɛ afee toiŋjɔlɛ kɛ hejɔɔmɔ he? Nibii pii yɛ mli moŋ, shi nɔ ni sa kadimɔ krɛdɛɛ ji Paulo ŋaawoo ni yɔɔ Efesobii 5:21-33 lɛ. Eji anɔkwale akɛ wu loo ŋa baanyɛ ni ebɔ mɔdɛŋ ni ekɛ nakai wiemɔi lɛ ama ehefatalɔ lɛ fatɔɔi anɔ mi. Shi kwɛ bɔ ni ehi jogbaŋŋ moŋ akɛ ooojwɛŋ ŋaawoo ni onaa yɛ jɛmɛ lɛ nɔ koni okɛtsu nii yɛ bo diɛŋtsɛ oshihilɛ mli!
9. Mɛɛ ŋaawoo Paulo kɛha wumɛi ni ji Kristofoi lɛ?
9 Kɛ oji Kristofonyo wu lɛ, Paulo ŋaawoo nɛɛ ni okɛaatsu nii yɛ bo diɛŋtsɛ oshihilɛ mli lɛ baaye abua ni eha oshia lɛ afee toiŋjɔlɛ kɛ hejɔɔmɔ he. Bɔfo lɛ woɔ hewalɛ akɛ: “Nyɛ wumɛi lɛ, nyɛsumɔa nyɛ diɛŋtsɛ nyɛŋamɛi, taakɛ bɔ ni Kristo hu sumɔ asafo lɛ ni eŋɔ lɛ diɛŋtsɛ ehe eha yɛ ehewɔ.” Paulo kɛɛ hu akɛ: “Nakai sa akɛ wumɛi hu asumɔ amɛ diɛŋtsɛ amɛŋamɛi, tamɔ amɛ diɛŋtsɛ amɛ gbɔmɔtsei. Mɔ ni sumɔɔ eŋa lɛ, lɛ diɛŋtsɛ ehe esumɔɔ. Ejaakɛ mɔ ko enyɛko lɛ diɛŋtsɛ eheloo da, shi moŋ elɛɔ lɛ ni ehiɛɔ lɛ dɔdɔɔdɔ, taakɛ bɔ ni Nuŋtsɔ lɛ hiɛɔ asafo lɛ. . . . Sa akɛ nyɛ hu nyɛteŋ mɔ fɛɛ mɔ asumɔ lɛ diɛŋtsɛ eŋa nakai, tamɔ lɛ diɛŋtsɛ ehe.” Esa akɛ wu lɛ ‘asumɔ eŋa lɛ tamɔ esumɔɔ lɛ diɛŋtsɛ ehe’—tamɔ nɔ ni yoo lɛ ji lɛ diɛŋtsɛ. Kwɛ bɔ ni enɛ sa jogbaŋŋ ha, ejaakɛ ‘mɛi enyɔ lɛ etsɔ heloo kome’!—1 Mose 2:24.
10. Yɛ nɔ ni 1 Timoteo 5:8 tsɔɔ lɛ hewɔ lɛ, mɛɛ gbɛnaa nii ka Kristofonyo wu lɛ nɔ?
10 Wu ni sumɔɔ eŋa taakɛ bɔ ni efeɔ lɛ diɛŋtsɛ ehe lɛ baanyiɛ hiɛ yɛ mumɔŋ saji amli. Shihilɛ ni yɔɔ eweku lɛ mli lɛ he gbɛnaa nii ka enɔ ni enyɛŋ eŋmɛ gbɛ ni nibii aya kɛkɛ. Dabi, esa akɛ ekwɛ shia muu lɛ fɛɛ heloo naa nibii kɛ mumɔŋ nihii anɔ. Paulo kɛɛ: “Shi kɛ mɔ ko kwɛɛɛ lɛ diɛŋtsɛ emɛi, titri lɛ lɛ diɛŋtsɛ eshiabii lɛ, ekpa yɛ hemɔkɛyeli lɛ sɛɛ, ni efaŋ mɔ ni heee yeee fe lɛ.”—1 Timoteo 5:8.
11. Mɛɛ ŋaawoo Paulo kɛha ŋamɛi ni ji Kristofoi lɛ?
11 Kristofonyo ŋa lɛ baanyɛ afee babaoo ni eha shia lɛ afee toiŋjɔlɛ kɛ hejɔɔmɔ he. Kɛha ŋamɛi lɛ, Paulo kɛ ŋaawoo ni jɛ mumɔŋ nɛɛ haa: “Nyɛ yeigbayei lɛ, nyɛbaa nyɛhe shi nyɛhaa nyɛ diɛŋtsɛ nyɛwumɛi lɛ, tamɔ bɔ ni nyɛfeɔ nyɛhaa Nuŋtsɔ lɛ, ejaakɛ wu lɛ ji ŋa lɛ yitso, taakɛ bɔ ni Kristo hu ji asafo lɛ yitso, ni lɛ nɔŋŋ ji gbɔmɔtso lɛ yiwalaherelɔ lɛ. Shi taakɛ bɔ ni asafo lɛ baa ehe shi ehaa Kristo lɛ, nakai nɔŋŋ yei lɛ hu afee aha amɛ diɛŋtsɛ amɛwumɛi lɛ yɛ nɔ fɛɛ nɔ mli. . . . Esa akɛ ŋa lɛ kɛ bulɛ ni mli kwɔ aha ewu lɛ.” (Efesobii 5:22-24, 33, New World Translation) Nɛkɛ “bulɛ ni mli kwɔ” nɛɛ yeɔ buaa ni shia lɛ feɔ toiŋjɔlɛ kɛ hejɔɔmɔ he. Yɛ anɔkwale mli lɛ, eyɛ sɔrɔto yɛ su ni je lɛŋ ŋamɛi babaoo ni hiɛ heyeli su, kɛ mpoatswaa mumɔ ni gbaa naa ni fiteɔ shia lɛ yɔɔ lɛ he.
12. Te esa akɛ wumɛi kɛ ŋamɛi ni ji Kristofoi lɛ afee amɛnii amɛha tɛŋŋ?
12 Esa akɛ wumɛi kɛ ŋamɛi ni ji Kristofoi afee nii yɛ gbɛi ni baaha suɔmɔ kɛ bulɛ ashwere nɔ. Esa akɛ wu lɛ afee mɔ ni susuɔ nii ahe, mɔ ni yɔɔ suɔmɔ, mɔ ni eda yɛ mumɔŋ. Esa akɛ ŋa lɛ afee mɔ ni sheɔ Nyɔŋmɔ gbeyei, mɔ ni kɛ mɔ kpaa gbee, mɔ ni asumɔɔ. Ewaaa akɛ ooona bɔ ni sui ni tamɔ nɛkɛ aaaha shia afee toiŋjɔlɛ kɛ hejɔɔmɔ he lɛ.
“Nyɛkɛ Nyɛhe Akafɔa Shi Nyɛhaa Abonsam” Kɔkɔɔkɔ
13. Mɛɛ ŋaawoo Paulo kɛha yɛ Efesobii 4:26, 27?
13 Akɛni adesai yeee emuu hewɔ lɛ, efeŋ mlɛo akɛ aaahiɛ toiŋjɔlɛ mli yɛ shia. Akɛ nɔkwɛmɔ nɔ lɛ, nɔ ni jɛɔ nɔnyɛɛ ni jɛ hei krokomɛi mli baa ji haomɔ ni baaha toiŋjɔlɛ ni yɔɔ shia lɛ alaaje. Shi Paulo ŋaawoo ni yɔɔ Efesobii 4:26, 27 lɛ kɛ nitsumɔ baanyɛ ayɛ abua toiŋjɔlɛ ni yɔɔ wɔshiai amli lɛ. Paulo ŋma akɛ: “Nyɛmli afua, shi nyɛkafea esha; hulu akanyɔ shi yɛ mlila lɛ nɔ, ni asaŋ nyɛkɛ nyɛhe akafɔa shi nyɛhaa Abonsam.” Kɛji akɛ wu loo ŋa mli fu yɛ gbɛ ni ja nɔ yɛ be ko mli lɛ, amɛteŋ mɔ ko akaha nɛkɛ mlifu shihilɛ nɛɛ miitsɔ esha kɛtsɔ mlifu lɛ mli ni amɛaahiɛ ni amɛbɛ amɛhe amɛwo amɛmli lɛ nɔ. Ekaba kɔkɔɔkɔ akɛ wɔɔŋmɛ gbɛ ni toiŋjɔlɛ fitelɔ, Satan Abonsam, ashɔ toiŋjɔlɛ ni yɔɔ wɔ Kristofoi ashiai amli lɛ kɛjɛ wɔdɛŋ!—1 Petro 5:8.
14. Kɛ naagba ko eba lɛ, mɛɛ ŋaa awoɔ koni no aha toiŋjɔlɛ aba shia lɛ mli ekoŋŋ?
14 Bɔni afee ni toiŋjɔlɛ ahi shia lɛ, esa akɛ gbalashihilɛ mli hefatalɔi lɛ ateŋ mɔ fɛɛ mɔ kɛ Biblia mli ŋaawoo atsu nii yɛ eshihilɛ mli. Kɛ naagba ko ha nibii fee basaa lɛ, nyɛyi enyɔ lɛ ni nyɛaasɔle nyɛbi Nyɔŋmɔ mumɔ lɛ baaha nyɛjie mumɔ lɛ yibii lɛ kpo ni ebaaha toiŋjɔlɛ ahi shia lɛ. (Luka 11:13; Galatabii 5:22, 23) Hɛɛ, yɛ shihilɛi ni mli wawai ashishi po lɛ, nɛkɛ gbɛ nɛɛ baaye abua ni eha shia lɛ afee toiŋjɔlɛ kɛ hejɔɔmɔ he.
Gbekɛbii Agbɛfaŋnɔ Yɛ Weku Lɛ Toiŋjɔlɛ Namɔ Mli
15. Te gbekɛbii aaafee tɛŋŋ amɛye amɛbua ni toiŋjɔlɛ ahi weku lɛ mli hu?
15 Gbekɛbii hu baanyɛ aye abua ni amɛha weku lɛ mli toiŋjɔlɛ ashwere. Yɛ mɛɛ gbɛ nɔ? Kɛtsɔ toiboo kɛ ekomefeemɔ mumɔ ni amɛaajie lɛ kpo amɛtsɔɔ lɛ nɔ. Nɛkɛ mumɔ loo su ni tamɔ nɛkɛ lɛ damɔ Ŋmalɛ mli tsɔɔmɔ ni amɛnine shɛɔ nɔ kɛ gbɛ ni Kristofonyo fɔlɔ lɛ tsɔɔ nɔ etsuɔ enitsumɔ akɛ tsɔɔlɔ lɛ he nii lɛ nɔ. Tsɔsemɔ ni he hiaa nɛɛ ji nɔkwɛmɔ nɔ kpakpa ni aaafee akɛ fɔlɔi. Taakɛ Abɛi 22:6 tsɔɔ saji amli fɛfɛo lɛ: “Tsɔɔmɔ gbekɛ gbɛ ni sa akɛ etsɔ nɔ, ni kɛ egbɔ hu lɛ, ejeŋ nɔ.” Kɛ gbekɛbii lɛ na tsɔsemɔ kpakpa kɛ fɔlɔi anɔkwɛmɔ nɔ kpakpa lɛ, amɛkpaleŋ kɛjɛŋ gbɛ ni ja lɛ nɔ. Shi, babaoo damɔ tsɔsemɔ lɛ hilɛ kɛ he ni eyashɛɔ lɛ nɔ, kɛ agbɛnɛ bɔ ni ekɔɔ gbekɛ lɛ tsui hu he lɛ nɔ.
16. Mɛɛ nɔkwɛmɔ nɔ ni kɔɔ gbekɛ tsɔsemɔ he wɔyɔɔ yɛ Timoteo sane lɛ mli?
16 Jee shishi otsɔse gbekɛbii lɛ yɛ mumɔŋ beni amɛdarako kwraa lɛ. Afee nakai yɛ Timoteo gbɛfaŋ, ejaakɛ Paulo wo lɛ hewalɛ akɛ: “Hii shi yɛ nii ni okase ni oyɔɔ hewalɛ yɛ nɔ lɛ amli, ejaakɛ ole mɔ naa ni okase yɛ, ni egbekɛbiiashi ojɛ ole ŋmalɛi krɔŋkrɔŋi lɛ, ni aaanyɛ aha ole nii ni atsɔ Kristo Yesu nɔ hemɔkɛyeli nɔ kɛya yiwalaheremɔ mli lɛ.” (2 Timoteo 3:14, 15) Hɛɛ, aha Timoteo ‘na hewalɛ’ yɛ Ŋmalɛ mli anɔkwalei lɛ anɔ. Hela wiemɔ ni akɛtsu nii yɛ biɛ lɛ tsɔɔ “yiŋtsɔmɔ yɛ shiŋŋfeemɔ mli; ana nɔmimaa” yɛ nɔ ko he. (New Thayer’s Greek-English Lexicon, baafa 514) Nakai ‘yiŋtsɔmɔ ni yɔɔ shiŋŋ’ lɛ biɔ mɔdɛŋbɔɔ waa yɛ Timoteo nyɛ Kristofonyo, Eunike kɛ enaa Loise gbɛfaŋ. Amɛye omanye yɛ ‘hemɔkɛyeli ni osatofeemɔ bɛ mli’ ni amɛtɛo amɛwo Timoteo mli lɛ mli, eyɛ mli akɛ eka shi faŋŋ akɛ etsɛ ji mɔ ni heee yeee lɛ. (2 Timoteo 1:5) Ani oobɔ mɔdɛŋ ni otɛo hemɔkɛyeli ni tamɔ nɛkɛ yɛ obii amli?
17. Mɛɛ odaseyeli yɔɔ ni tsɔɔ akɛ abaanyɛ atsɔɔ mɔ ko nii kɛjɛ egbekɛbiiashi?
17 Ajɛ Timoteo gbekɛbiiashi atsɔɔ lɛ Ŋmalɛi lɛ. No hewɔ lɛ, kaabu nyɛmɔ ni gbekɛbii yɔɔ ni amɛkɛaakase nii lɛ akɛ nɔ ko bibioo. The New York Times lɛ bɔ amaniɛ akɛ taakɛ nikasemɔ ko tsɔɔ lɛ, “aŋsɔ faji atsaramɔi toi enyɔ yɔɔ—ni ji hei ni aŋsɔ lɛ mli walayibii ni tamɔ tsei aniji lɛ kpeɔ yɛ—yɛ gbekɛbii aŋsɔi lɛ mli hei komɛi fe bɔ ni eyɔɔ onukpai anɔ mli.” Gbekɛbii ni darako kwraa po baanyɛ akase nɔ ko yɛ nɔ ni hi kɛ nɔ ni ehiii, nɔ ni ŋɔɔ loo nɔ ni waa mɔ he lɛ he. Richard M. Restak, M.D. wie yɛ ewolo ni ji The Brain lɛ mli akɛ: “Abaanyɛ akɛ kaimɔi ato aŋsɔ lɛ mli yɛ amɛhiamɔ naa kɛha yibaamɔ yɛ nibii ni wala yɔɔ mli lɛ fɛɛ mli. Kooloo baanyɛ ‘akai’ mɔ ni mɔɔ lɛ ekpeɔ ni kɛ ena ni ehenyɛlɔ nɛɛ miiba pɛ lɛ, ebaagbala ehe shi. Akɛ kaimɔi hu fɔɔ shi loo akɛtoɔ ni ato naa ni eko nyiɛ eko sɛɛ yɛ henumɔŋ niiashikpamɔi lɛ anaawalɛ naa. Akɛ gbekɛbii lɛ, esaaa akɛ akɛɔ wɔ nɔ ni fe shikome akɛ wɔkɛ wɔnine akafɔ stof ni edɔ nɔ.” Shi babaoo yɛ ni abaakase yɛ bɔ ni aŋsɔ lɛ tsuɔ nii ehaa lɛ he, shi gbekɛ baanyɛ atsɔ niiashikpamɔ nɔ akase nii. Akɛ nɔkwɛmɔ nɔ lɛ, abaanyɛ atsɔɔ gbekɛ bibioo lɛ koni eta shi diŋŋ yɛ Kristofoi akpeei ashishi yɛ be mli ni edako po.
18. Mɛɛ ŋaawoo Paulo kɛha gbekɛbii kɛ fɔlɔi yɛ Efesobii 6:1-4?
18 Beni gbekɛbii daraa lɛ, amɛbaanyɛ amɛnu mumɔŋ famɔi ashishi fiofio kɛya hiɛ. Kɛfata nibii krokomɛi ahe lɛ, amɛbaanyɛ amɛkase akɛ Nyɔŋmɔ miikpa amɛ gbɛ akɛ amɛbaabo amɛfɔlɔi atoi. Enɛ biɔ fɔlɔi atsɔsemɔ ni yɔɔ shiŋŋ ni suɔmɔ yɔɔ mli, ejaakɛ Paulo ŋma akɛ: “Nyɛ bii lɛ, nyɛboa nyɛfɔlɔi lɛ atoi yɛ Nuŋtsɔ lɛ mli; ejaakɛ enɛ ja. ‘Wo otsɛ kɛ onyɛ,’ no ji klɛŋklɛŋ kita ni hiɛ shiwoo akɛ: ‘Koni ahi ahao, ni otsɛ yɛ shikpɔŋ lɛ nɔ.’ Ni nyɛ tsɛmɛi lɛ, nyɛkawoa nyɛbii amlifu, shi moŋ nyɛlɛa amɛ yɛ Nuŋtsɔ [Yehowa] lɛ tsɔsemɔ kɛ ŋaawoo lɛ mli.” (Efesobii 6:1-4) Gbekɛbii toibolɔi yeɔ buaa babaoo ni amɛhaa shia lɛ feɔ toiŋjɔlɛ kɛ hejɔɔmɔ he.
19. Mɛni baanyɛ awo fɔlɔi kɛ gbekɛbii atsakpaa lɛ mli hewalɛ?
19 Shi mɛni baanyɛ awo fɔlɔ kɛ ebi tsakpaa lɛ mli hewalɛ? Biblia lɛ kɛ Kristofoi awoji ni amɛ fɛɛ amɛaakane baaye abua yɛ enɛ feemɔ mli diɛŋtsɛ. Woji tamɔ My Book of Bible Stories kɛ Tsɔɔlɔ Kpele lɛ Toiboo lɛ ji woji ni sɛɛnamɔ yɔɔ he diɛŋtsɛ ni yeɔ buaa gbekɛbii lɛ. Kɛ nyɛmiikane Biblia lɛ yɛ bei krokomɛi amli lɛ, maa suɔmɔ kɛha Nyɔŋmɔ nɔ mi. Ni kɛ nyɛmiiye nii lɛ, gbaa saji ni jieɔ Yehowa yi akɛ Nihelɔ Kpeteŋkpele. Kɛ okɛ gbekɛbii miifa gbɛ lɛ, okɛ adebɔɔ he nibii ni yɔɔ naakpɛɛ lɛ aha Nyɔŋmɔ—kwɛɛnii, fɔfɔii, tsei, gɔji, faai, kpaakpoi, kɛ kooloi. Kɛ okɛ ohe ewo sɔɔmɔ nitsumɔ lɛ mli lɛ, ŋɔɔ hegbɛ lɛ ni owie Nyɔŋmɔ suɔmɔ lɛ he. Ye obua obi lɛ ni eda yɛ suɔmɔ ni eeena eha Yehowa akɛ mɔ pɔtɛɛ lɛ mli, daa gbi. Shi, bɔni afee ni onine ashɛ obi lɛ tsui nɔ lɛ, esa akɛ suɔmɔ ni tamɔ nɛkɛ ahi bo diɛŋtsɛ otsui mli.—5 Mose 6:4-7.
20. Mɛɛ gbɛ nɔ tsɔsemɔ ni sa lɛ he hiaa yɛ?
20 Kaaha ohiɛ miikpa nɔ gbi ko gbiko akɛ tsɔsemɔ he miihia. Kɛ akɛha ni ahe yɛ gbɛ ni ja nɔ lɛ, “ewoɔ toiŋjɔlɛ yibii, ni ji, jalɛ.” (Hebribii 12:11, New World Translation) Ni gbekɛbii ni kɛ nilee baa amɛhe shi amɛhaa amɛfɔlɔi atsɔsemɔ lɛ kɛ miishɛɛ kɛ woo baa weku lɛ mli ni ehaa egbɛi kpakpa lɛ hiɔ shi. (Abɛi 10:1; 13:1; 23:24, 25) Yɛ anɔkwale mli lɛ, kɛ fɔlɔi kɛ gbekɛbii tsu amɛ-Ŋmalɛ naa nitsumɔi ahe nii lɛ, amɛhaa amɛshia lɛ feɔ toiŋjɔlɛ kɛ hejɔɔmɔ he.
Hiɛmɔ Shia Ni Toiŋjɔlɛ Kɛ Hejɔɔmɔ Yɔɔ Mli Lɛ Mli
21. Taakɛ Abɛi 24:3, 4 tsɔɔ lɛ, te aaafee tɛŋŋ ahiɛ shia ko akɛ toiŋjɔlɛ kɛ hejɔɔmɔ he mli lɛ?
21 Te aaafee tɛŋŋ ahiɛ shia ko akɛ toiŋjɔlɛ kɛ hejɔɔmɔ he? Abɛi ko kɛɔ akɛ: “Nilee akɛmaa tsu, ni sanesɛɛkɔmɔ akɛhaa edamɔɔ shi, ni nilee akɛhaa piaiaŋ yimɔɔ kɛ nii ni jara wa ni yɔɔ fɛo fɛɛ.” (Abɛi 24:3, 4) Weku ni hiɛ dɔɔ yɛ nitsumɔ mli lɛ nilee kɛ nitsumɔ nɔ atsɔɔ akɛ heloo gbɛfaŋ nibii kpakpai woɔ shia lɛ mli obɔ. Shi abaanyɛ atswa shia ko ama shi shiŋŋ yɛ shishitoi anɔ kɛji akɛ emlibii lɛ jie sanesɛɛyoomɔ kpo ni amɛkɛ ŋwɛi nilee tsu nii, ni amɛkɛ Ŋmalɛ mli nilee to amɛnitsumɔi ahe yɛ gbɛ ni ja nɔ. Hɛɛ, nilee tswaa weku ko emaa shi, ni ehaa eyeɔ omanye yɛ shihilɛ mli yɛ ekomefeemɔ mli.
22. Mɛni baajɛ Nyɔŋmɔ famɔi ni akɛaatsu nii lɛ mli aba?
22 Nɔ ni baajɛ Nyɔŋmɔ tsɔsemɔi ni akɛtsuɔ nii yɛ shia lɛ mli aba ji toiŋjɔlɛ, ejaakɛ akɛɛ Israelbii lɛ akɛ: “Bɔ ni Yehowa, okpɔlɔ kɛ Israel mɔ krɔŋkrɔŋ lɛ kɛɛ nɛ: Mi ji Yehowa, o-Nyɔŋmɔ lɛ, mɔ ni tsɔɔo nii ni hi hao, mɔ ni tsɔɔo gbɛ ni onyiɛ nɔ lɛ. Eji obo mikitai lɛ atoi kulɛ, ohejɔlɛ aaatamɔ faa, ni ojalɛ hu aaatamɔ ŋshɔkei.” (Yesaia 48:17, 18) No hewɔ lɛ, eba akɛ wumɛi, ŋamɛi kɛ bii fɛɛ ni sheɔ Nyɔŋmɔ gbeyei lɛ kɛ ŋwɛi nilee aaatsu nii yɛ amɛshihilɛ mli. Kɛkɛ lɛ wɔshiai baafee toiŋjɔlɛ kɛ hejɔɔmɔ he yɛ be fɛɛ mli.
Ani Okaiɔ?
◻ Kɛ shia shihilɛ aaafee nɔ ni toiŋjɔlɛ yɔɔ mli Iɛ, mɛni esa akɛ Kristofonyo ni boteko gbalashihilɛ mli ni susuɔ gbalashihilɛ he Iɛ ahala?
◻ Taakɛ Efesobii 5:21-33 tsɔɔ lɛ, mɛni esa akɛ wumɛi kɛ ŋamɛi afee koni amɛ nine ashɛ toiŋjɔlɛ ni aaahi shia Iɛ mli nɔ?
◻ Yɛ mɛɛ gbɛ nɔ ŋaawoo ni yoo Efesobii 4:26, 27 lɛ kɛ nitsumɔ baaye abua ni eha shia lɛ afee he ni toiŋjɔlɛ yɔɔ?
◻ Mɛɛ gbɛ gbekɛbii baanyɛ atsɔ nɔ ni amɛyɛ amɛbua ni toiŋjɔlɛ ahi weku Iɛ mli?
Te wɔɔfee tɛŋŋ wɔha wɔshiai afee toiŋjɔlɛ kɛ hejɔɔmɔ hei Iɛ?
[Mfoniri ni yɔɔ baafa 17]
Ehe miihia ni wumɛi kɛ ŋamɛi Kristofoi afee nii yɛ gbɛi ni baaha suɔmɔ kɛ bulɛ ashwere nɔ
[Mfoniri ni yɔɔ baafa 18]
Atsɔɔ Timoteo Nyɔŋmɔ anɔkwalei Iɛ kɛjɛ egbekɛbiiashi. Ani ooye oobua obii Iɛ ni amɛdara yɛ nilee kɛ suɔmɔ ni amɛyɔɔ amɛhaa Yehowa Iɛ mli?