“Esa Akɛ Aboɔ Nyɔŋmɔ Moŋ Toi Fe Gbɔmɛi”

“Yehowa Nɔ̃ Ji Ta Lɛ”

ASRAAFOI akui enyɔ komɛi ní kɛ amɛhe yeee kɛ amɛhe kpe yɛ jɔɔ ko mli, ni kuu kome yɛ abɛkugbɛ, ni ekroko lɛ yɛ ninejurɔgbɛ. Goliat ni ji Filistibii atatsɛ nukpa lɛ bɔ Israel asraafoi lɛ ahora, ni enɛ tee nɔ gbii 40 sɔŋŋ, shi akɛni ŋmiŋmi mɔmɔ Israelbii lɛ hewɔ lɛ, amɛhɔ shi diŋŋ ní mɔ ko ejieee ehiɛ.—1 Samuel 17:1-4, 16.

Goliat kɛ gbeewalɛ tswa Israelbii lɛ mpoa akɛ: “Nyɛfãa nuu kome nyɛhaa nyɛhe, ni ekpeleke shi kɛba miŋɔɔ! Kɛji enyɛ ekɛ mi wu ni egbe mi lɛ, no lɛ wɔɔtsɔmɔ nyɛtsuji; shi kɛji mi hu minyɛ lɛ ni migbe lɛ lɛ, no lɛ nyɛ hu nyɛaatsɔmɔ wɔtsuji, ni nyɛsɔmɔ wɔ! . . . Mi lɛ miibɔ Israel tabilɔi lɛ ahora ŋmɛnɛ: nyɛjiea nuu kome nyɛhaa mi, koni wɔwu!”—1 Samuel 17:8-10.

Yɛ blema lɛ, tatsɛmɛi nukpai ní nyiɛɔ amɛsraafoi ahiɛ lɛ nyɛɔ amɛkɛ amɛhe nɔɔ yɛ amɛsraafoi lɛ anajiaŋ. Mɔ ni yeɔ enaanyo nɔ kunim lɛ, belɛ amɛ amɛye kunim yɛ ta lɛ mli. Shi, asraafonyo ni tswa Israelbii mpoa lɛ jeee asraafonyo ko kɛkɛ. Eji henyɛlɔ oblaŋ ní nɔ kwɔ—eyitsoŋ wa, ni asheɔ lɛ gbeyei naakpa. Shi Yehowa webii asraafoi ni Goliat ye amɛhe fɛo lɛ ha etsa lɛ diɛŋtsɛ egbonyobu.

Ta ní awu lɛ jeee tawuu folo ko kɛkɛ. Eji ta ko ni Yehowa kɛ Filistibii anyɔŋmɔi lɛ wu. Akɛni ŋmiŋmi mɔ Israelbii a-Maŋtsɛ Saul hewɔ lɛ, enáaa ekãa ni enyiɛ ewebii lɛ ahiɛ ni amɛwu amɛshi Nyɔŋmɔ henyɛlɔi lɛ.—1 Samuel 17:11.

Oblanyo Fioo ko Kɛ Ehe Fɔ̃ Yehowa Nɔ

Beni asraafoi akui lɛ leee mɔ ni tutuaa enaanyo tsutsu lɛ, oblanyo fioo ko ní no mli lɛ afɔ lɛ mu akɛ maŋtsɛ ni baaye Israel nɔ wɔsɛɛ lɛ yasara enyɛmimɛi ni fata Saul asraafoi lɛ ahe lɛ. Oblanyo nɛɛ gbɛi ji David. Beni enu wiemɔi ni jɛ Goliat naa lɛ, ebi akɛ: “Namɔ po ji nɛkɛ Filistinyo foolɔ nɛɛ, ni ebɔɔ Nyɔŋmɔ hiɛkalɔ lɛ tai lɛ ahora nɛɛ?” (1 Samuel 17:26) Kɛha David lɛ, Goliat damɔ shi eha Filistibii kɛ amɛnyɔŋmɔi lɛ fɛɛ. David mli wo la yɛ gbɛ ni ja nɔ, ni eesumɔ akɛ edamɔ Yehowa kɛ Israelbii lɛ anajiaŋ ni ekɛ nakai oblaŋ wɔŋjalɔ lɛ awu. Shi Maŋtsɛ Saul kɛɛ lɛ akɛ: “Onyɛŋ okɛ nɛkɛ Filistinyo nɛɛ ayakpe ni okɛ lɛ awu; ejaakɛ bo lɛ gbekɛ jio.”—1 Samuel 17:33.

Kwɛ srɔtofeemɔ ni yɔɔ Saul kɛ David niiahesusumɔ mli! Kɛha Saul lɛ, David ji gbekɛ fioo ni miitao ekɛ oblaŋ ko ni yitsoŋ wa ayanɔ. Shi kɛha David lɛ, nakai oblaŋ lɛ ji adesa ko kɛkɛ ni esaaa akɛ aŋmɛɔ lɛ gbɛ ni ebɔɔ Yehowa ni ji Jeŋ Muu Fɛɛ Maŋtsɛ lɛ ahora. David ná ekãa ejaakɛ ele akɛ Nyɔŋmɔ haŋ mɔ ni yeɔ E-gbɛi kɛ E-webii lɛ ahe fɛo lɛ aye ehe. Goliat kɛ ehe fɔ̃ hewalɛ ni eyɔɔ lɛ nɔ, shi David kɛ ehe fɔ̃ Yehowa nɔ, ni bɔ ni Nyɔŋmɔ susu nɔ ni tee nɔ lɛ he eha lɛ, nakai lɛ hu efee.

‘Miiba Oŋɔɔ yɛ Yehowa Gbɛi Amli!’

David hemɔkɛyeli lɛ mli wa. Ekai akɛ Nyɔŋmɔ ye ebua lɛ ni etswia oshishibrishi kɛ jata ko nii ni ekɛhere etooi komɛi ayiwala. Tookwɛlɔ oblanyo fioo lɛ ná nɔmimaa akɛ Yehowa baaye ebua lɛ ni eye henyɛlɔ Filistinyo ni he wa lɛ hu nɔ kunim. (1 Samuel 17:34-37) David yahala fɔbitɛi enumɔ, ni ekɔ akromia efata he, ni eyi mli ekɛ Goliat yakpe.

David yadamɔ nifeemɔ ni tamɔ nɔ ni enyɛŋ ekpee naa lɛ naa yɛ hewalɛ ni Yehowa haa lɛ naa. Ekɛ ekãa kɛɛ Filistinyo lɛ akɛ: “Bo lɛ ooba miŋɔɔ kɛ klante kɛ akpɔlɔ kɛ tsɛŋ; shi mi lɛ miiba oŋɔɔ yɛ Yehowa Zebaot ni ji Israel tai ni obɔ amɛ ahora lɛ a-Nyɔŋmɔ lɛ gbɛi amli! Ŋmɛnɛ gbi nɛɛ Yehowa aaajieo awo midɛŋ, . . . koni shikpɔŋ muu lɛ fɛɛ aaaná ale akɛ Nyɔŋmɔ ko yɛ Israel, ni asafo ni ekpe nɛɛ fɛɛ aaaná ale akɛ jeee klante loo akplɔ Yehowa kɛhereɔ mɔ yiwala; ejaakɛ Yehowa nɔ̃ ji ta lɛ!”—1 Samuel 17:45-47.

Te nibii yagbe naa ha tɛŋŋ? Amaniɛbɔɔ ni ajɛ Nyɔŋmɔ mumɔ mli aŋma lɛ kɛɔ akɛ: “Ni David kɛ akromia kɛ tɛ lɛ ye Filistinyo lɛ nɔ kunim, ni etswia Filistinyo lɛ nɔ̃ ni egbele lɛ, tsɛ David ehiɛɛɛ klante ko.” (1 Samuel 17:50) Eyɛ mli akɛ ehiɛɛɛ klante moŋ, shi no mli lɛ, Yehowa Nyɔŋmɔ fi esɛɛ kpɛŋŋ.a

Nakai ta lɛ ha ana akɛ eja akɛ David ná hemɔkɛyeli yɛ Yehowa mli! Kɛ́ ebi ni wɔkpɛ wɔyiŋ akɛ wɔbaabo adesai atoi loo wɔbaaná hekɛnɔfɔɔ yɛ hewalɛ ni Nyɔŋmɔ kɛhereɔ mɔ lɛ mli lɛ, no lɛ nɔ ni ebaabi ni wɔfee lɛ yɛ faŋŋ, ni no ji akɛ: ‘Esa akɛ wɔbo Nyɔŋmɔ moŋ toi fe gbɔmɛi.’ (Bɔfoi lɛ Asaji 5:29) Kɛfata he lɛ, kɛ́ wɔkɛ shihilɛ ko ni mli wa kpe, ni wɔtsu he nii taakɛ Yehowa Nyɔŋmɔ sumɔɔ ni atsu he nii lɛ, no lɛ wɔbaanyɛ wɔtsu naagbai ni mli wawai tete ahe nii yɛ gbɛ ni ja nɔ.

[Shishigbɛ niŋmaa]

[Akrabatsa/Mfoniri ni yɔɔ baafa 9]

TE GOLIAT DALƐ LƐ?

Amaniɛbɔɔ ni yɔɔ 1 Samuel 17:4-7 lɛ haa wɔleɔ akɛ Goliat kwɔ fe ninetalɔi ekpaa—ni tsɔɔ akɛ ekwɔ fe mitai 3. Dama ni Filistinyo nɛɛ wo lɛ haa wɔnaa bɔ ni eda ni eyɔɔ hewalɛ ha. Edama lɛ tsiimɔ ji kilogram 57! Akplɔ ni ehiɛ lɛ naa tso tamɔ mamalolɔ agbatso, ni ekplɔ lɛ yitso tsiimɔ ji kilogram 7. Kwɛ sane, etamɔ nɔ ni dama folo ni Goliat wo lɛ mli tsii fe David!