“Yehowa Nɔ Ji Ta Lɛ”

“Miiba oŋɔɔ yɛ Yehowa Zebaot ni ji Israel tai ni obɔ amɛ ahora lɛ a-Nyɔŋmɔ lɛ gbɛi amli!”​—1 SAMUEL 17:⁠45.

1, 2. (a) Mɛɛ kaa kã Israel asraafoi ni yɔɔ Maŋtsɛ Saul famɔ shishi lɛ ahiɛ? (b) Te Israel asraafoi lɛ fee amɛnii yɛ Goliat mpoatswaa lɛ naa amɛha tɛŋŋ, ni agbɛnɛ namɔ pue yɛ jɛmɛ?

TAI enyɔ ni he wa kɛ amɛhe miikpe ye Ela jɔɔ lɛŋ, ye Yerusalem wuoyianaigbɛ. Mɛi ni yɔɔ afa kome ji Israel tabilɔi lɛ, ni Maŋtsɛ Saul ni awo lɛ maŋtsɛ ehee lɛ nyiɛ amɛhiɛ lɛ. Mɛi ni yɔɔ afa kroko lɛ hu ji Filisti asraafoi ni amɛhiɛnyiɛlɔ obalaŋ Goliat damɔ amɛhiɛ lɛ. Eka shi faŋŋ akɛ, Goliat gbɛi lɛ shishi ji ”Nɔ ni Gbalaa Jwɛŋmɔ.” Ekɛlɛ ji ninetalɔi nɛɛhu ni ekɛ tawuu nii ewula ehe fɛɛ he. Goliat miibolɔ miiwo Israel kɛ musubɔɔ kɛ mpoatswaa wiemɔi.​—1 Samuel 17:​1-11.

² Namɔ baanya akpee Goliat mpoatswaa lɛ naa? “Shi beni Israel hii lɛ na nuu lɛ, amɛ fɛɛ amɛjo foi yɛ ehiɛ, ni amɛshe gbeyei naakpa.” Shi naa​—gbekɛ fioo ko bapue! Egbɛi ji David, ni eshishi ji ”Mɔ ni Asumɔɔ.” Ebafee ”mɔ ni asumɔɔ” kɛha Yehowa yɛ bɔ ni ekɛ ekaa tuu ehe eha jalɛnifeemɔ lɛ hewɔ. No mli lɛ Samuel efɔ David mu momo akɛ Israel wɔsɛɛ be maŋtsɛ, ni Yehowa mumɔ lɛ miitsu nii waa yɛ enɔ.​—1 Samuel 16:​12, 13, 18-21; 17:​24; Lala 11:7; 108:⁠6.

 3. Mɛɛ gbɛ nɔ David tsɔ ewula ehe eha ta lɛ, shi mɛni ji nɔ ni Goliat kɛwula ehe?

³ Beni enu ni Goliat ‘bɔ Israel tai lɛ a-Nyɔŋmɔ hiɛkalɔ lɛ ahora’ lɛ, David kɛ ehe ha akɛ ekɛ obalaŋ lɛ baawuu. Beni Saul kpɛlɛ nɔ lɛ, David fa kpo shi jeee kɛ tawuu atadei kɛ tawuu nii ni akɛyaa ta ni Saul kɛha lɛ lɛ. Nɔ ni ehiɛ pɛ ji tso, akromia, kɛ fɔbitɛi enumɔ​—yɛ be mli ni Goliat hiɛ akpɔlɔ ni dade ni ma naa lɛ tsiimɔ shɛɔ ŋsɛnii tɛi 15 ni ewo dama ni tsiimɔ shɛɔ ŋsɛnii tɛi 126 lɛ! Yɛ be mli ni Goliat obalaŋ lɛ kɛ etsɛŋ hiɛlɔ lɛ baa amɛhiɛ lɛ, ‘Filistinyo lɛ tsɔ enyɔŋmɔi lɛ anɔ elomɔ David.’​—1 Samuel 17:​12-44.

 4. Te David ha obalaŋ lɛ mpoatswaa lɛ hetoo eha tɛŋŋ?

⁴ Te David ha hetoo eha tɛŋŋ? Eha obalaŋ lɛ mpoatswaa lɛ hetoo, ni ebolɔ akɛ: “Bo lɛ ooba miŋɔɔ kɛ klante kɛ akpɔlɔ kɛ tsɛŋ; shi mi lɛ miiba oŋɔɔ yɛ Yehowa Zebaot ni ji Israel tai ni obɔɔ amɛ ahora lɛ a-Nyɔŋmɔ lɛ gbɛi amli! Ni ŋmɛnɛ gbi nɛɛ Yehowa aaajieo awo midɛŋ, ni magbeo, ni mafo oyi, ni maŋɔ Filistibii ata lɛ mli gbohii lɛ maha ŋwɛi loofɔji kɛ shikpɔŋ lɛ nɔ kooloi awuiyelɔi ŋmɛnɛ, koni shikpɔŋ muu lɛ fɛɛ ana alɛ akɛ Nyɔŋmɔ ko yɛ Israel, ni asafo ni ekpe nɛɛ fɛɛ aaana ale akɛ jeee klante loo akpɔlɔ Yehowa kɛhereɔ mɔ yiwala; ejaakɛ YEHOWA NƆ JI TA LƐ, ni eeeŋɔ nyɛ ewo wɔdɛŋ!”​—1 Samuel 17:​45-47.

 5. Mɛni jɛ tawuu lɛ mli ba, ni yijiemɔ lɛ ji namɔ nɔ?

⁵ David kɛ ekaa fa kɛtee ta lɛ naa. Efɔ efɔbitɛ lɛ ni efiliki kɛtee he ni ekadi lɛ, kɛkɛ ni Goliat gbee shikpɔŋ. Hɛɛ, Yehowa ewo David hemɔkɛyeli kɛ ekaa lɛ he nyɔmɔ kɛtsɔ fɔbitɛ bibioo ni tee trɔmɔɔ ni eyatswa obalaŋ lɛ hiɛnaa lɛ nɔ! David wo foi, eyagbala Goliat diɛŋtsɛ klante lɛ, ni ekɛfo hegbeyeiwolɔ lɛ yitso. Filistibii lɛ jo foi kɛ yiŋfutumɔ. Eji anɔkwale, abaanyɛ akɛɛ akɛ: “YEHOWA NƆ JI TA LƐ”!​—1 Samuel 17:​47-51.

 6. (a) Mɛni hewɔ Yehowa ebaa blema tawuu nɛɛ mli saji lɛ ayi lɛ? (b) Mɛɛ nɔmimaa he hiaa Nyɔŋmɔ tsuji yɛ be mli ni amɛŋmɛɔ amɛtsui shi yɛ yiwaa ni jɛɔ henyɛlɔi ni aaanyɛ akɛ amɛ ato Goliat he lɛ dɛŋ baa lɛ?

⁶ Mɛni hewɔ Yehowa baa nɛkɛ tawuu mli sane nɛɛ yi yɛ e-Wiemɔ lɛ mli, eyɛ mli akɛ awuu ta nɛɛ aaafee afi 3000 nɛ lɛ? Bɔfo Paulo kɛɔ wɔ akɛ: “Ejaakɛ nibii abɔ ni aŋma ato momo lɛ, wɔ diɛŋtsɛ wɔhe nitsɔɔmɔ hewɔ aŋma ato lɛ, koni wɔkɛ tsuishiŋmɛɛ kɛ ŋmalɛi lɛ amli miishɛjemɔ lɛ ana hiɛnɔkamɔ.” (Romabii 15:⁠4) Ŋmɛnɛ, Nyɔŋmɔ tsuji anɔkwafoi babaoo miiŋmɛ amɛtsui shi yɛ ahorabɔɔ kɛ shitee-kɛ-woo diɛŋtsɛ ni jɛɔ amɛhenyɛlɔi ni abaanyɛ akɛ amɛ ato Goliat he lɛ adɛŋ. Yɛ be mli ni henyɛlɔi anɔnyɛɛ faa lɛ, miishɛjemɔ wiemɔ akɛ “YEHOWA NƆ JI TA LƐ” he bahiaa wɔ.

Jeŋ muu Fɛɛ Maŋtsɛyeli he Sane Lɛ

 7. Mɛɛ sane ji nɔ ni kɔɔ Nyɔŋmɔ webii fɛɛ ni yɔɔ jeŋmaji fɛɛ mli lɛ ahe, ni mɛni hewɔ?

⁷ Goliat famɔ enaji kɛtee kɛba ni ebuuu Israel Nyɔŋmɔ lɛ. Nakai nɔŋŋ hu, yɛ afii ohai 20 nɛɛ mli lɛ, maŋkwramɔŋ gbɛjianɔtoi ni ji yiwalɛ nɔyelii hu epue, amɛtswa jeŋ muu fɛɛ maŋtsɛ ni Yehowa ji lɛ mpoa ni amɛmiibo mɔdɛŋ ni amɛwo etsuji lɛ ahe gbeyei ni amɛba amɛhe shi yɛ jamɔ mli amɛha Maŋ lɛ. Nɛkɛ sane nɛɛ he hiaa Nyɔŋmɔ webii ni yɔɔ maji fɛɛ mli. Mɛni hewɔ? Ejaakɛ Jeŋmaji Abe ni agba afɔ shi, aloo “jeŋmaji abe ni ato” lɛ ba naagbee yɛ 1914, ni nɔ ni ekɛba ji amrɔ nɛɛ be ni ji “jeŋmaji afimɔ” be lɛ. (Luka 21:​24-26; NW, King James Version) Jeŋmaji Abe lɛ je shishi yɛ be mli ni jeŋmaji lɛ bɔi shikpɔŋ nɔ Yerusalem nɔ naamɔ yɛ afi 607 D.Ŋ.B., ni enɛ he afii 2,520 ni nyiɛ sɛɛ ba lɛ kɛyashi 1914, beni Yehowa kɛ Yesu ta maŋtsɛsɛi nɔ akɛ e-Mesia Maŋtsɛ yɛ ŋwɛi Yerusalem lɛ.​—Hebribii 12:​22, 28; Kpojiemɔ 11:​15, 17.a

 8. (a) Te shikpɔŋ lɛ nɔ maŋtsɛmɛi lɛ here gbalɛ miifamɔ akɛ “nyɛsɔmɔa Yehowa kɛ gbeyeishemɔ” lɛ nɔ amɛha tɛŋŋ? (b) Mɛɛ je lɛŋ hiɛnyiɛlɔi bɔɔ Yehowa ahora ni amɛwoɔ edasefoi lɛ ahe gbeyei ŋmɛnɛ?

⁸ Tsakemɔ kpele ko ba yɛ ŋwɛi yɛ 1914. Jeŋmaji lɛ nyɛɛɛ aye nɔ ni ŋwɛi nine bɛ mli dɔŋŋ. Shi ani “maŋtsɛmɛi” ni yeɔ nɔ lɛ bo gbalɛ famɔ akɛ “nyɛsɔmɔa Yehowa kɛ gbeyeishemɔ,” ni amɛkpɛlɛ Maŋtsɛ hee ni E-wo lɛ lɛ nɔ lɛ toi? Dabi! Shi moŋ, “lumɛi lɛ hu efee ekome amɛtee Yehowa kɛ mɔ ni efɔ le mu lɛ [Yesu] yinɔ ajina.” Akɛni amɛmiidi amɛ diɛŋtsɛ amɛ hiɛnyam taomɔ sɛɛ hewɔ lɛ, amɛbafee “hoo” yɛ Ta kpeteŋkpele ni ji 1914-18 lɛ mli. (Lala 2:​1-6, 10-12) Kɛbashi amrɔ nɛɛ, jeŋ nɔyeli efee sane ni he hiaa ni ka adesai ahiɛ. Satan je lɛ yaa nɔ ekɛ maŋkwramɔŋ hiɛnyiɛlɔi, ni tamɔ Goliat nanemɛi ni ji Gatbii lɛ baa. Nɛkɛ yiwalɛ nɔyelii nɛɛ bɔɔ Yehowa ahora ni amɛbɔɔ mɔdɛŋ ni amɛwo edasefoi lɛ ahe gbeyei ni amɛba amɛhe shi, shi taakɛ eji yɛ be fɛɛ mli lɛ, ta lɛ kɛ kunimyeli lɛ ji Yehowa nɔ.​—2 Samuel 21:15-22.

Ŋmɛnɛŋmɛnɛ Beaŋ “Saul”

 9. Namɛi ŋmɛnɛ amɛnifeemɔ tamɔ Maŋtsɛ Saul nifeemɔ lɛ, ni yɛ mɛɛ gbɛi anɔ?

⁹ Maŋtsɛ Saul baa mfoniri nɛɛ mli yɛ nɛgbɛ? Yɛ etuatsemɔ hewɔ lɛ, Yehowa etsɔ hiɛ ekpɛ mli akɛ ‘ebaashɔ Israel odehei anɔyeli lɛ kɛjɛ edɛŋ.’ (1 Samuel 15:​22, 28) Agbɛnɛ, Saul nyɛɛɛ afa jeŋ muu fɛɛ maŋtsɛ ni Yehowa ji lɛ he yɛ Goliat mpoatswaa lɛ naa. Agbɛnɛ hu, etee nɔ ni yɛ no sɛɛ lɛ ewa David, Goliat nɔ kunimyelɔ kɛ mɔ ni Yehowa efɔ lɛ mu koni ebaye Saul wekukpaa lɛ najiaŋ lɛ yi. Kwɛ bɔ ni Kristendom osɔfoi lɛ anifeemɔ kɛ nɛkɛ nifeemɔ nɛɛ yeɔ egbɔ pɛpɛɛpɛ ha! Amɛtse atua amɛshi Biblia mli anɔkwale, ni amɛtsɔmɔ hemɔkɛyeli kwamɔ kpeteŋkpele lɛ ni ‘booo sanekpakpa’ ni kɔɔ wɔ-Nuŋtsɔ Yesu Kristo kɛ e-Maŋtsɛyeli ni baa lɛ ‘toi’ lɛ fa. Amɛnyɛɛɛ amɛfi jeŋ muu fɛɛ maŋtsɛ ni Yehowa ji lɛ sɛɛ ni amɛkɛ yiwalɛ ewa Yehowa Odasefoi ni afɔ amɛ mu lɛ kɛ amɛnanemɛi, asafo babaoo lɛ ayi. Yehowa baajie nɛkɛ hemɔkɛyeli kwalɔi nɛɛ kɛya ‘yɛ emlifu mli.’​—2 Tesalonikabii 1:​6-9; 2:3; Hoshea 13:⁠11.

10. (a) Mɛɛ sane osɔfoi akuu ko ni ale amɛ lɛ jaje ni aŋmɛ yɛ London yɛ 1918? (b) Ni amɛaadi amɛ 1918 yiŋtoo nɛɛ sɛɛ lɛ, mɛɛ gbɛ osɔfoi lɛ etsɔ nɔ?

¹⁰ Kristendom osɔfoi lɛ ni ŋmɛɔ saji ahe amɛkɛsaa lɛ agbɛ lɛ baje kpo yɛ faŋŋ mli yɛ klɛŋklɛŋ jeŋ ta lɛ mli. Eka shi faŋŋ akɛ no mli lɛ Yesu gbalɛ ni yɔɔ Mateo yitsei 24 kɛ 25, kɛ Luka yitso 21 lɛ miiba mli. Yɛ anɔkwale mli lɛ, yɛ 1918 mli lɛ, osɔfoi akuu ko ni ale amɛ jogbaŋŋ ni yɔɔ London, England, ni damɔ Baptist, Congregational, Presbyterian, Episcopal, kɛ Methodist Sɔlemɔi lɛ anajiaŋ lɛ ŋmala amɛyiŋtoo ko amɛha. Amɛjaje akɛ: “Haomɔ ni yaa nɔ ŋmɛnɛŋmɛnɛ lɛ kɛ enine miitsɔɔ Jeŋmaji Abe lɛ naagbee.” Shi amɛdiii nakai sane jajemɔ lɛ sɛɛ. Amrɔ nɛɛ po, Kristendom osɔfoi lɛ kɛ amɛhe ewo afai enyɔ ni kɛ amɛhe wu klɛŋklɛŋ jeŋ ta lɛ mli lɛ asɛɛfimɔ mli waa. Ni amɛaayoo ba ni Yesu eba yɛ Maŋtsɛyeli hewalɛ mli lɛ, amɛkɛ amɛhe ha je lɛŋ maji lɛ asusumɔ​—akɛ esa akɛ Jeŋmaji amaŋkwramɔŋ hewalɛi ni mli egbala lɛ aya nɔ aye gbɔmɛi lɛ anɔ, kɛtsɔ yiwalɔi tamɔ Goliat po nɔ, moŋ fe ni amɛaafee ekome yɛ Nyɔŋmɔ Maŋtsɛyeli lɛ shishi.​—Mateo 25:​31-33.

Aŋmɛɛɛ Saji Ahe Koni Akɛsaa!

11. Namɛi eŋmɛɛɛ saji ahe ni amɛkɛsaa yɛ jeŋ muu fɛɛ maŋtsɛyeli he sane lɛ he, ni namɔ nɔkwɛmɔ nɔ sɛɛ amɛnyiɛɔ?

¹¹ Ani Nyɔŋmɔ tsuji ni amɛtuu amɛhe amɛha lɛ lɛ ŋmɛɛ saji ahe koni amɛkɛsaa yɛ nɛkɛ jeŋ muu fɛɛ nɔyeli he sane nɛɛ he? Dabida, taakɛ nɔ ni aŋma afɔ shi yɛ Biblia lɛ mli lɛ tsɔɔ yɛ faŋŋ mli lɛ! (Daniel 3:​28; 6:25-27; Hebribii 11:​32-38; Kpojiemɔ 2:​2, 3, 13, 19) Kristofoi anɔkwafoi ni yɔɔ ŋmɛnɛ lɛ fiɔ Yehowa jeŋ muu fɛɛ nɔyeli lɛ kɛ Maŋtsɛyeli lɛ sɛɛ yɛ ahorabɔɔ kɛ yiwaa ni mli wa ni ŋmɛnɛŋmɛnɛ beaŋ Goliat ni woɔ amɛhe gbeyei lɛ kɛbaa amɛnɔ lɛ fɛɛ sɛɛ. No hewɔ lɛ, amɛnyiɛɔ Yesu, “David Bi” lɛ ni kɛ ekaa wuu mumɔŋ ta eha Yehowa jeŋ muu fɛɛ nɔyeli lɛ nanemaa hei asɛɛ, yɛ be mli ni yɛ nakai beaŋ nɔŋŋ lɛ, amɛfeɔ mɛi ni kɛ amɛhe wooo tai kɛ maŋkwramɔŋ saji ni yaa nɔ yɛ je lɛ mli lɛ mli. Yɛ be mli ni esɔleɔ ehaa e-Tsɛ lɛ, Yesu jaje akɛ esɛɛnyiɛlɔi lɛ, anɔkwale Kristofoi lɛ, hu “jɛɛɛ je nɛŋ.”​—Mateo 4:​8-10, 17; 21:9; Yohane 6:​15; 17:​14, 16; 18: 36, 37; 1 Petro 2:⁠21.

12. (a) Namɛi etswa ŋmɛnɛŋmɛnɛ beaŋ Goliat lɛ nɔ, ni yɛ mɛɛ gbɛ nɔ? (b) Bu ni amɛbuɔ “Goliat” akɛ egbo lɛ ena mɛɛ hewalɛ yɛ Yehowa webii anɔ?

¹² Kristofoi ni afɔ amɛ mu lɛ mli shwɛɛnii ni tamɔ David ni yɔɔ ŋmɛnɛ lɛ etswia ŋmɛnɛŋmɛnɛ beaŋ Goliat lɛ nii. Yɛ mɛɛ gbɛ nɔ? No ji akɛ amɛjie amɛhe kpo amɛtsɔɔ akɛ amɛyɛ Yehowa gbɛfaŋ kwraa yɛ jeŋ nɔyeli he bei lɛ mli. “YIŊKPƐƐ ko (Ni Majimaji Ateŋ Biblia Kaselɔi lɛ kpɛlɛ nɔ yɛ Cedar Point, Ohio kpee lɛ shishi, yɛ Hɔgbaa, September 10, 1922) ” lɛ kɛ nɔkwɛmɔ nɔ lɛ ha. Nɔ ni fata he ji nɔ ni nyiɛ sɛɛ nɛɛ

“10. Wɔmiima nɔ mi ni wɔmiiye he odase ekoŋŋ akɛ Nyɔŋmɔ oweletɔɔ gbi ni eketeɔ shi ewoɔ Satan maŋtsɛyeli ni anaa kɛ nɔ ni anaaa lɛ nɛ;

“11. Akɛ jeŋ loo gbɛjianɔtoo momo lɛ ni aaaku sɛɛ ato ama shi ekoŋŋ lɛ nyɛŋ ahi; akɛ be lɛ eshɛ ni akɛbaato Nyɔŋmɔ maŋtsɛyeli kɛtsɔ Kristo Yesu nɔ lɛ ama shi; ni akɛ hewalɛi kɛ gbɛjianɔtoi lɛ fɛɛ ni jɛɛɛ amɛsuɔmɔ mli amɛbaaa amɛhe shi amɛhaaa Nuŋtsɔ lɛ jalɛ nɔyeli lɛ, abaakpata amɛhiɛ.”

Ŋwanejee ko bɛ he akɛ “David Bi” lɛ ni ji Kristofoi asafo lɛ Yitso lɛ kudɔ nakai Maŋtsɛyeli anɔkwale “tɛ” ni afɔ̃ lɛ. (Mateo 12:​23; Yohane 16:​33; Kolosebii 1:18) Yiŋkpɛɛ ni akpɛlɛ nɔ yɛ daa afi kpee ni afee kɛjɛ 1922 kɛyashi 1928 lɛ shishi lɛ maa shidaamɔ nɛɛ nɔ mi. Yɛ Yehowa webii lɛ ahiɛ lɛ, “Goliat” ka shi ni egbo, afo eyitso. Adesa yiwalɛ nɔyelii bɛ hewalɛ ni amɛkɛaalaka Nyɔŋmɔ maŋtsɛyeli lɛ sɛɛfilɔi ekaalɔi lɛ ni amɛŋmɛɛ saji ahe ni amɛkɛsaa​—Okɛto Kpojiemɔ 20:4 he.

13. (a) Yɛ mɛɛ gbɛ nɔ Kristendom osɔfoi lɛ ŋmɛɛ saji ahe amɛkɛsaa yɛ nɔnyɛɛ ni ba yɛ Hitler Germany lɛ mli? (b) Mɛni ji nɔ ni Mothers in the Fatherland wolo lɛ bɔ he amaniɛ yɛ Odasefoi lɛ ni amɛŋmɛɛɛ saji ahe ni amɛkɛsaa lɛ he?

¹³ Ŋmɛnɛŋmɛnɛ beaŋ nɔkwɛmɔ nɔ ko ni ekaaa ni kɔɔ hegbeyeiwoo ni maŋkwramɔŋ nɔyelii ni tamɔ Goliat lɛ kɛba lɛ ba mli yɛ Hitler Germany. Jamɔi titrii ni ale amɛ ni ji Katolek kɛ Protestantbii fɛɛ ŋmɛɛ saji ahe amɛkɛsaa yɛ gbɛ ni yɔɔ mɔbɔ nɔ ni amɛkɛ jamɔ ha Nazi nɔyeli lɛ, amɛhiɛnyiɛlɔ lɛ batsɔ amaga ko ni amɛjaa, ni amɛŋaa eswastika aflaŋaa lɛ, ni amɛjɔɔ esraafoi lɛ be mli ni amɛto srɛnɛɛ kɛmiiya ni amɛyakpata amɛnanemɛi heyelilɔi ni yɔɔ maji ni bɛŋkɛ amɛ lɛ amli lɛ ahiɛ lɛ. Mɛi ni akɛɛ atsɛɔ amɛ Kristofoi ni jɛ hemɔkɛyelii sɔrɔtoi fɛɛ mli​—shi jeee Yehowa Odasefoi​—kɛ amɛhe wo maŋ hedɔɔ henumɔ lɛ mli. Wolo ni atsɛɔ lɛ Mothers in the Fatherland lɛ bɔ amaniɛ akɛ: “Akɛ [Yehowa Odasefoi] tee yiwalɛ ŋsraiaŋ, ni agbe amɛteŋ mɛi akpe, ni akpe kroko gboi kɛjɛ 1933 kɛmiiba 1945. . . . Katolekbii kɛ Protestantbii nu ni amɛ osɔfoi lɛ miiwo amɛ hewalɛ ni amɛkɛ Hitler afee ekome. Kɛ amɛte shi amɛwo enɛ lɛ, belɛ amɛmiifee enɛ kɛmiite shi kɛmiiwo famɔ ni jɛ sɔlemɔ lɛ kɛ maŋ lɛ fɛɛ ŋɔɔ.” Kwɛ bɔ ni Sɔlemɔ lɛ kɛ Maŋ lɛ fɛɛ baye la yi sɔ̃ ha!​—Yeremia 2:​34.b

14. Mɛni hewɔ afɔɔ Yehowa Odasefoi lɛ ayiwaa yɛ be babaoo mli lɛ?

¹⁴ Kɛbashi ŋmɛnɛ gbi nɛɛ, Yehowa Odasefoi anɔnyɛɛ kɛ yiwalɛ miiya nɔ yɛ shikpɔji pii anɔ, taakɛ bɔ ni Yesu gba efɔ shi lɛ. Shi yɛ shihilɛi fɛɛ mli lɛ, nɛkɛ Kristofoi nɛɛ kɛ ekaa yaa nɔ amɛshiɛɔ “maŋtsɛyeli lɛ he sanekpakpa nɛɛ.” (Mateo 24:​9, 13, 14) Shi nɔ ni wa yɛ shihilɛ lɛ mli ji akɛ abuɔ Odasefoi lɛ yɛ maji pii amli akɛ amɛyeɔ anɔkwa, maŋbii ni he tse, amɛfeɔ nɔkwɛmɔ nɔ kpakpa yɛ mla nɔ yeli kɛ gbɛjianɔtoo kpakpa mli. (Romabii 13:​1-7) Ni kɛlɛ afɔɔ amɛyi waa. Mɛni hewɔ? Akɛni jamɔ ji Yehowa pɛ nɔ hewɔ lɛ, amɛkulaaa shi amɛhaaa Maŋ lɛ he okadii aloo ni amɛaajie amɛyi. (5 Mose 4: 23, 24; 5:​8-10; 6:​13-15) Amɛjaa Yehowa pɛ “kɛkɛ,” ni amɛfeɔ Yehowa jeŋ muu fɛɛ Nuŋtsɔ yɛ amɛshihilɛ mli, ni amɛŋmɛɛɛ saji aheni amɛkɛsaa. (Mateo 4:​8-10; Lala 71:5; 73:28) Akɛni “amɛjɛɛɛ je lɛ mli” hewɔ lɛ, amɛhiɔ shi akɛ Kristofoi ni kɛ amɛhe wooo je lɛ mli maŋkwramɔ kɛ tawuu mli.​—Yohane 15:​18-21; 16:⁠33.

15, 16. (a) Namɔ nɔkwɛmɔ nɔ sɛɛ Odasefoi ni eye afii sɔrɔtoi fɛɛ baanyɛ anyiɛ yɛ be mli ni ŋmɛnɛŋmɛnɛ beaŋ Goliat lɛ woɔ amɛ he gbeyei lɛ, ni Kristofonyo gbekɛyoo ko ni eye afii ekpaa fee enɛ he nɔkwɛmɔ nɔ yɛ mɛɛ gbɛ nɔ? (b) Fɔlɔi ni ji Kristofoi miisumɔ ni amɛtsɔse amɛbii bibii lɛ ni amɛtamɔ namɔ?

¹⁵ Yɛ be babaoo mli lɛ ŋmɛnɛŋmɛnɛ beaŋ Goliat lɛ woɔ nɛkɛ emuuyeli mli hiɛlɔi ni kɛ Yehowa jamɔ yeɔ wɔŋjamɔ nifeemɔi ahiɛ lɛ ahe gbeyei. (Okɛto Kpojiemɔ 13:​16,17 he.) Shi Odasefoi, gbekɛbii kɛ onukpai, baanyɛ anyiɛ David nɔkwɛmɔ nɔ lɛ sɛɛ kɛtsɔ ekaa ni amɛkɛaaha mpoatswaa lɛ hetoo lɛ nɔ. Yɛ Amerika Wuoyigbɛ maŋ ko nɔ lɛ, Kristofonyo gbekɛyoo ko ni eye afii ekpaa lɛ na tsɔsemɔ fɛfɛo kɛjɛ egbekɛbiiashi (Okɛto Efesobii 6:4; 2 Timoteo 3:​14, 15 he.) Enɛ eye ebua ni efee lɛ gbekɛ ni le nii fe fɛɛ yɛ eklasbii ateŋ. Shi ehenilee ni akɛ Biblia lɛ etsɔse lɛ lɛ ha ekpoo akɛ ekɛ ehe aaawo wɔŋjamɔ kusum nifeemɔi amli yɛ klas. Beni etsɔɔ eshidaamɔ lɛ mli lɛ, tsɔɔlɔ lɛ bolɔ akɛ gbekɛyoo ni tamɔ lɛ lɛ edako tsɔ bɔ ni eeenyɛ ena henilee! Gbekɛ ni eye afii ekpaa nɛɛ tsɔɔ bɔ ni etsɔɔlɔ lɛ etɔ̃ kwraa kɛtsɔ odaseyeli fɛfɛo ni eye lɛ lɛ nɔ.

¹⁶ Hiɛnɔkamɔ yɛ akɛ fɔlɔi ni ji Kristofoi fɛɛ baatsɔse amɛbii bibii lɛ koni amɛnyiɛ David gbekɛnuu lɛ nɔkwɛmɔ nɔ lɛ sɛɛ kɛtsɔ shi ni amɛaadamɔ yɛ be mli ni jeŋ nɔyelii ni tamɔ Goliat lɛ woɔ amɛhe gbeyei lɛ. Eba akɛ amɛaatamɔ Hebri gbekɛbii anɔkwafoi etɛ lɛ, tamɔ Daniel kɛ mɛi krokomɛi babaoo ni Biblia lɛ ewie amɛhe ni amɛkɛ ekaa ‘mɔ henilee kpakpa mli’ yɛ gbɛ ni kɛ Biblia mli shishitoo mlai kpaa gbee nɔ lɛ.​—1 Petro 2:​19; 3:​16; Daniel 3:​16-18.

Bɔ ni Yinɔsaneŋmalalɔi Naa Lɛ

17. (a) Ŋleshi yinɔsaneŋmalɔ Toynbee bɔ kɔkɔ yɛ mɛni ni yaa nɔ he? (b) Ŋmɛnɛŋmɛnɛ beaŋ Goliat kuu lɛ kaa Nyɔŋmɔ webii lɛ anɔkwayeli lɛ yɛ mɛɛ gbɛ nɔ?

¹⁷ Ŋleshi yinɔsaneŋmalɔ Arnold Toynbee ni ale lɛ waa lɛ bɔ kɔkɔ yɛ “maji lɛ ajamɔ tamɔ wɔji ni yɔɔ gbeyei, ni yaa nɔ yɛ wɔbei nɛɛ amli lɛ he,” ni etsɔɔ enɛ mli hu akɛ etamɔ “demokrase wein hee ni egba aloo efee nyanyaanya ni yɔɔ weku mligbalamɔ tɔi memeji amli.” Mɛi ni kɛɔ akɛ amɛ diɛŋtsɛ amɛmaji lɛ anɔ kwɔlɔ fe mɛi krokomɛi fɛɛ anɔ, aahu po kɛyashɛɔ he ni amɛjaa Maŋ lɛ yɛ lɛ, efee mɛi ni nɔyelɔi lɛ kudɔɔ amɛ ni amɛbuaa amɛnaa koni amɛtsu amɛyiŋtoi ahe nii, kɛji akɛ ehi loo ehiii. Nɔ ni ejɛ mli eba ji akɛ, Goliat kuu lɛ ete shi koni amɛka anɔkwa ni Nyɔŋmɔ webii ni sumɔɔ maŋ ni afɔ amɛ yɛ mli lɛ shi amɛkpoɔ akɛ amɛkɛ jamɔ aaaha Maŋ lɛ kɛ ekadii lɛ yeɔ lɛ amɛkwɛ.

18. Mɛɛ sanebimɔi ni akɛpɛiɔ nibii amli ehe hiaa ni Kristofoi ni kɛ amɛhenilee tsuɔ nii lɛ fɛɛ aha hetoo?

¹⁸ Taakɛ eji yɛ Nazi Germany lɛ, ŋmɛnɛ sanebimɔi ni akɛpɛiɔ nibii amli yɛ ni esa akɛ Kristofoi ni kɛ amɛhenilee tsuɔ nii lɛ aha hetoo: Ani esa akɛ mahe maye akɛ Nyɔŋmɔ eduro maŋ ni miyɔɔ mli lɛ babaoo fe ekrokomɛi fɛɛ? Titri lɛ, amrɔ nɛɛ, yɛ adesai ayinɔsane be ni oshara yɔɔ mli fe fɛɛ nɛɛ mli lɛ, ani esa, ni jwɛŋmɔ yɛ mli akɛ aaabu shikpɔŋ lɛ fa bibioo ko akɛ ehi fe ekrokomɛi fɛɛ ni eshwɛ? Aloo ni aaabu adesa weku lɛ fa ko akɛ amɛnɔ kwɔlɔ fe wekui krokomɛi fɛɛ?

19. Mɛni ji nɔ ni Yinɔsaneŋmalɔ ni fe fɛɛ, Yehowa kɛɔ wɔ yɛ susumɔ kɛ nifeemɔ ni tamɔ nɔ ni maŋ kome ko nɔ bii fe maji krokomɛi fɛɛ lɛ he?

¹⁹ Nyɛhaa wɔsusua bɔ ni Yinɔsaneŋmalɔ ni fe fɛɛ​—Yehowa Nyɔŋmɔ, Biblia lɛ Ŋmalɔ lɛ susuɔ enɛ he lɛ he. Bɔfo Petro kɛɔ wɔ akɛ: “Lɛlɛŋ, miyoo akɛ, Nyɔŋmɔ jeee mɛi ahiɛaŋkwɛlɔ; shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.” Ni ani esaaa akɛ wɔfeɔ nii yɛ be fɛɛ mli ni ekɛ bɔfo Paulo wiemɔi ni jɛ mumɔŋ nɛɛ akpa gbee akɛ “la kome [Nyɔŋmɔ] eŋɔfee gbɔmɛi adesai fɛɛ, ni amɛhi shikpɔŋ lɛ fɛɛ hiɛ”? Belɛ mɛni hewɔ esa akɛ maŋ ko mli bii asusu ni amɛfee amɛnii tamɔ nɔ ni amɛ nɔ kwɔlɔ fe maji krokomɛi fɛɛ nɔ bii? Yɛ be mli ni ewieɔ gbɔmɛi fɛɛ he lɛ, Paulo kɛɛ: “Nyɔŋmɔ shwiei ji wɔ.”​—Bɔfoi lɛ Asaji 10:​34, 35; 17:​26, 29.

20. Mɛni etswaŋ Nyɔŋmɔ webii lɛ mpoa loo ekaŋ amɛ ekwɛŋ dɔŋŋ yɛ Yehowa gbɛjianɔtoo hee lɛ mli, ni mɛni wɔ nikasemɔ ni nyiɛ sɛɛ lɛ baawie he?

²⁰ Maŋkwramɔŋ yiwalɛ gbɛjianɔtoi ni tamɔ Goliat lɛ etswaŋ mɛi ni sumɔɔ jalɛnifeemɔ lɛ mpoa dɔŋŋ yɛ Yehowa gbɛjianɔtoo hee lɛ mli, ejaakɛ adesai akui amli henɔwomɔ kɛ hetsɛ baafee nɔ ni eho etee. (Lala 11:5-7) He fɛɛ he ni Nyɔŋmɔ webii yɔɔ yɛ shikpɔŋ lɛ nɔ lɛ, amɛshɛrɛ sui tamɔ maŋhedɔɔ amɛshwie amɛsɛɛ, koni amɛkɛfee toiboo amɛha Yesu famɔ akɛ ‘amɛsumɔ amɛhe taakɛ bɔ ni esumɔ amɛ lɛ.’ (Yohane 13:​34, 35; Yesaia 2:⁠4) Wɔ nikasemɔ ni nyiɛ sɛɛ lɛ tsɔɔ nɔ suɔmɔ ni enɛ ji!

[Shishigbɛ niŋmai]

Sanebimɔi ni Akɛtiɔ Mli

Obalaŋ Goliat ni woɔ mɔ he gbeyei Iɛ feɔ mɛni he mfoniri?

Yɛ mɛɛ gbɛi anɔ Nyɔŋmɔ tsuji lɛ eŋmɛɛɛ saji ahe ni amɛkɛsaa yɛ Jeŋ muu fɛɛ nɔyeli he sane Iɛ he?

Mɛni hewɔ Nyɔŋmɔ webii baanyɛ akɛɛ akɛ atswa ŋmɛnɛŋmɛnɛ beaŋ Goliat Iɛ nɔ̃ Iɛ?

Namɛi nyiɛɔ Maŋtsɛ Saul nifeemɔ lɛ sɛɛ, ni yɛ mɛɛ gbɛ nɔ?

Yehowa webii efee amɛnii tamɔ David yɛ nɔnyɛɛ ni ŋmɛnɛŋmɛnɛ beaŋ Goliat Iɛ kɛbaa amɛnɔ Iɛ yɛ mɛɛ gbɛ nɔ?

[Nikasemɔ lɛ he Sanebimɔi]