Ojarawa yɛ Nyɔŋmɔ Hiɛ!
“Naanɔ suɔmɔ mikɛsumɔo, hewɔ lɛ mikɛ mlihilɛ miigbalao.”—YEREMIA 31:3.
1. Esoro su ni Yesu jie lɛ kpo yɛ egbii lɛ amli gbɔmɛi foji lɛ ahe yɛ Farisifoi lɛ anɔ he yɛ mɛɛ gbɛ nɔ?
AMƐNYƐƆ amɛnaa suɔmɔ henumɔi yɛ ehiŋmɛii amli. Nɛkɛ nuu, Yesu nɛɛ, tamɔɔɔ amɛ jamɔ mli hiɛnyiɛlɔi lɛ yɛ gbɛ ko kwraa nɔ; esusuɔ mɔ he. Emusuŋ tsɔ lɛ yɛ gbɔmɛi nɛɛ ahewɔ ejaakɛ “etɔ amɛ ni amɛfee yuuyaa tamɔ tooi ni bɛ kwɛlɔ.” (Mateo 9:36) Kulɛ esa akɛ amɛ jamɔ mli hiɛnyiɛlɔi lɛ afee tookwɛlɔi ni yɔɔ suɔmɔ, ni damɔɔ shi kɛhaa Nyɔŋmɔ ni yɔɔ suɔmɔ kɛ mɔbɔnalɛ. Shi yɛ no najiaŋ lɛ, amɛbuuu gbɔmɛi foji lɛ kwraa, ni amɛnaa amɛ akɛ mɛi komɛi ni he bɛ sɛɛnamɔ ko—mɛi ni alomɔ amɛ!a (Yohane 7:47-49; okɛto Ezekiel 34:4 he.) Eyɛ faŋŋ akɛ, esoro nɛkɛ susumɔ ni ejaaa, ni damɔɔɔ ŋmalɛ nɔ nɛɛ kwraa yɛ bɔ ni Yehowa naa ewebii ehaa lɛ he. Ekɛɛ emaŋ Israel akɛ: “Naanɔ suɔmɔ mikɛsumɔo.”—Yeremia 31:3.
2. Hiob nanemɛi etɛ lɛ bɔ mɔdɛŋ akɛ amɛaatsɔ eyiŋ akɛ ehe bɛ sɛɛnamɔ ko yɛ Nyɔŋmɔ hiɛ yɛ mɛɛ gbɛ nɔ?
2 Shi, eka shi faŋŋ akɛ jeee Farisifoi lɛ ji klɛŋklɛŋ mɛi ni ka akɛ amɛaalaka Yehowa tooi ni esumɔɔ amɛ lɛ akɛ amɛhe bɛ sɛɛnamɔ ko. Susumɔ Hiob sane lɛ he okwɛ. Eji jalɔ kɛ mɔ ni shwamɔ ko bɛ ehe yɛ Yehowa hiɛ, shi “miishɛjelɔi” etɛ lɛ wie amɛshi Hiob akɛ ebaa jeŋba shara, ni eji hemɔkɛyeli kwalɔ yiwalɔ, ni ebaagbo ni eshiŋ eshihilɛ he okadi ko kwraa yɛ esɛɛ. Amɛwie kɛ nɔmimaa akɛ Nyɔŋmɔ enaŋ jalɛ nifeemɔ ko kwraa yɛ Hiob gbɛfaŋ, ejaakɛ Nyɔŋmɔ heee lɛ diɛŋtsɛ ebɔfoi lɛ po eyeee, ni ebuɔ ŋwɛi diɛŋtsɛ po akɛ jɛmɛ tseee!—Hiob 1:8; 4:18; 15:15, 16; 18:17-19; 22:3.
3. Mɛɛ gbɛ Satan kɛtsuɔ nii ŋmɛnɛ ni ekɛbɔɔ mɔdɛŋ ni ekɛtsɔ gbɔmɛi ayiŋ akɛ amɛhe bɛ sɛɛnamɔ ko ni asumɔɔɔ amɛ sane hu?
3 Ŋmɛnɛ, Satan kɛ ‘ŋaatsɔɔ ni yɔɔ nigii,’ ni ji mɔdɛŋ ni ebɔɔ ni elaka gbɔmɛi akɛ asumɔɔɔ amɛ sane, ni amɛhe bɛ sɛɛnamɔ hu nɛɛ miitsu nii lolo. (Efesobii 6:11, NW, shishigbɛ niŋmaa) Eji anɔkwale akɛ, bei pii lɛ, ehaa gbɔmɛi naa hepupuumɔ kɛ hoofeemɔ su ni ekɛlakaa amɛ. (2 Korintobii 11:3) Shi enaa miishɛɛ hu akɛ eeeba bulɛ ni mɛi ni enine baanyɛ ashɛ amɛnɔ lɛ yɔɔ kɛha amɛhe lɛ shi. Efeɔ enɛ, titri lɛ yɛ nɛkɛ “naagbee gbii” ni ji jaramɔ be nɛɛ mli. Ŋmɛnɛ, mɛi pii daraa yɛ wekui amli, he ni mɛi “edɔɔɔ mɔ he”; mɛi babaoo hu yɛ ni mɛi ni amɛkɛkpeɔ daa ji gbɔmɛi ni hiɛ yɔɔ la, hiɛjoolɔi, kɛ yiwalɔi. (2 Timoteo 3:1-5) Ekolɛ afii abɔ ni akɛwa amɛ yi, hewolo nɔ su mligbalamɔ, hetsɛ, loo niseniianii ni afee amɛ lɛ baaha nɛkɛ gbɔmɛi nɛɛ ahe aye akɛ amɛhe bɛ sɛɛnamɔ ko, ni asumɔɔɔ amɛ sane hu. Nuu ko ŋma akɛ: “Minuuu he akɛ misumɔɔ mɔ ko sane, aloo mɔ ko hu sumɔɔ misane. Ewa waa kɛha mi akɛ mahe maye akɛ Nyɔŋmɔ susuɔ mihe kwraa po.”
4, 5. (a) Mɛni hewɔ susumɔ ni mɔ ko aaasusu akɛ ehe bɛ sɛɛnamɔ lɛ kɛ Ŋmalɛi lɛ kpaaa gbee lɛ? (b) Mɛni ji oshara kome ni jɛɔ he ni wɔɔhe wɔye akɛ wɔ mɔdɛŋbɔi lɛ eko kwraa he bɛ sɛɛnamɔ lɛ mli kɛbaa?
4 Susumɔ ni mɔ ko naa akɛ ehe bɛ sɛɛnamɔ lɛ yeɔ Nyɔŋmɔ Wiemɔ lɛ mli anɔkwale, ni ji tsɔɔmɔ ni kɔɔ kpɔmɔ nɔ lɛ he lɛ awui diɛŋtsɛ. (Yohane 3:16) Kɛ Nyɔŋmɔ baawo jara ni wa tamɔ nɛkɛ—lɛ diɛŋtsɛ e-Bi lɛ wala ni jara wa lɛ—ni ekɛha wɔna hegbɛ akɛ wɔɔhi shi kɛya naanɔ ekoŋŋ lɛ, no lɛ eka shi faŋŋ akɛ E-sumɔɔ wɔ; eka shi faŋŋ akɛ wɔjara wa waa yɛ E-hiɛ!
5 Kɛfata he lɛ, kwɛ bɔ ni eeefee nijiaŋwujee eha akɛ wɔɔnu he akɛ wɔsaaa Nyɔŋmɔ hiɛ, ni wɔmɔdɛŋbɔi lɛ eko kwraa he bɛ sɛɛnamɔ ko! (Okɛto Abɛi 24:10 he.) Kɛ ana jwɛŋmɔ ni ejaaa ni tamɔ nɛkɛ lɛ, ehaa mɛi komɛi buɔ hewalɛwoo ni akɛhaa kɛ jwɛŋmɔ kpakpa, kɛ yiŋtoo akɛ eye ebua wɔ ni wɔha sɔɔmɔ ni wɔkɛhaa Nyɔŋmɔ lɛ aya hiɛ bɔ ni wɔɔnyɛ lɛ, akɛ etamɔ fɔbuu wiemɔi moŋ. Ekolɛ ebaafee tamɔ nɔ ni ehaa wɔ mligbɛ henumɔ ni wɔyɔɔ lɛ mli waa akɛ nɔ fɛɛ nɔ ni wɔfeɔ lɛ faaa.
6. Mɛni ji tsabaa ni hi fe fɛɛ kɛha susumɔi gbohii ni wɔsusuɔ yɛ wɔhe lɛ?
6 Kɛ onu nɛkɛ susumɔi gbohii nɛɛ ahe yɛ omli lɛ, onijiaŋ akaje wui. Wɔteŋ mɛi babaoo feɔ shɛii yɛ wɔ diɛŋtsɛ wɔhe yɛ be kɛ bei amli, bɔ ni nilee bɛ mli. Ni kaimɔ akɛ, Nyɔŋmɔ Wiemɔ lɛ yɛ kɛha “mɔ saamɔ” ni agbɛnɛ hu “akɛkumɔɔ mɔji wuji” ashwieɔ shi. (2 Timoteo 3:16; 2 Korintobii 10:4) Bɔfo Yohane ŋma akɛ: “Ni no wɔkɛaale, akɛ anɔkwale lɛ mli wɔjɛ, ni wɔɔtse wɔtsuii wɔŋmɛ wɔmli yɛ ehiɛ, akɛ, kɛji wɔtsuii buɔ wɔ fɔ lɛ, Nyɔŋmɔ da fe wɔtsuii, ni ele nii fiaa.” (1 Yohane 3:19, 20) Belɛ nyɛhaa wɔsusua gbɛi etɛ ni Biblia lɛ tsɔɔ nɔ etsɔɔ wɔ akɛ wɔjara wa kɛha Yehowa lɛ he wɔkwɛa.
Yehowa Buɔ Ohe Akɔntaa
7. Te Yesu tsɔɔ Kristofoi fɛɛ akɛ amɛjara wa yɛ Nyɔŋmɔ hiɛ eha tɛŋŋ?
7 Klɛŋklɛŋ lɛ, Biblia lɛ tsɔɔ faŋŋ akɛ wɔteŋ mɔ fɛɛ mɔ jara wa waa yɛ Nyɔŋmɔ hiɛ. Yesu wie akɛ: “Ani jeee kpaai enyɔ ahɔ̃ɔ aflimatai enumɔ aheɔ? Shi Nyɔŋmɔ hiɛ kpaaa amɛteŋ ekome folo nɔ. Shi nyɛyiteŋ tsɔi tete akane fɛɛ. No hewɔ lɛ nyɛkashea gbeyei; nyɛjara wa fe aflimatai babaoo.” (Luka 12:6, 7) Nakai beaŋ lɛ, aflimata ji loofɔji ni ahɔ̃ɔ akɛ loo lɛ ateŋ nɔ ni jara waaa fe fɛɛ, ni kɛlɛ amɛteŋ ekome folo po bɛ ni e-Bɔlɔ lɛ susuuu ehe. Enɛ hewɔ lɛ akɛ nɔdaamɔ nɔ kɛha sɔrɔto feemɔ ni yɔɔ naakpɛɛ miiha yɛ biɛ: Yɛ gbɔmɛi adesai—ni jara wa aahu shii abɔ fe nomɛi lɛ—agbɛfaŋ lɛ, Nyɔŋmɔ le amɛhe saji fɛɛ fitsofitso. Etamɔ nɔ ni akane wɔyiteŋ tsɔi fɛɛ ekomekome!
8. Mɛni hewɔ nilee yɔɔ mli akɛ wɔɔsusu akɛ Yehowa baanyɛ akane wɔyiteŋ tsɔi fɛɛ lɛ?
8 Mɛni, ani akane wɔyitsɔi fɛɛ ekomekome? Kɛji osusuɔ akɛ Yesu abɛbua lɛ mli sane nɛɛ ji nɔ ko ni anyɛŋ afee diɛŋtsɛ lɛ, susumɔ enɛ he okwɛ: Nyɔŋmɔ kaiɔ etsuji anɔkwafoi lɛ jogbaŋŋ kɛmɔɔ shi akɛ enyɛɔ eteɔ amɛ shi kɛbaa wala mli—ebɔɔ amɛ ekoŋŋ kɛ amɛhe nibii fɛɛ fitsofitso, ni amɛwala yibii amli sui ni yɔɔ haŋtsii, kɛ afii abɔ ni amɛye lɛ mli saji ni amɛkaiɔ kɛ amɛ niiashikpamɔi fɛɛ fata he. No hewɔ lɛ wɔyitsɔi (ni kɛ aja mli lɛ, aaashɛ 100,000 tsaa yɛ yitso kome nɔ lɛ) kanemɔ baafee nitsumɔ bibioo kwraa kɛ akɛto he!—Luka 20:37, 38.
Mɛni Ha Wɔjara Wa yɛ Yehowa Hiɛ Lɛ?
9. (a) Mɛni ji sui komɛi ni Yehowa buɔ waa? (b) Mɛni hewɔ osusuɔ akɛ nakai sui lɛ ajara wa waa yɛ ehiɛ lɛ?
9 Nɔ ni ji enyɔ lɛ, Biblia lɛ tsɔɔ wɔ nɔ ni haa wɔjara waa yɛ Yehowa hiɛ lɛ. Kɛ wɔɔwie he kuku lɛ, enaa wɔsui kpakpai kɛ wɔ mɔdɛŋbɔi lɛ ahe miishɛɛ. Maŋtsɛ David kɛɛ ebinuu Salomo akɛ: “Yehowa taoɔ tsuii fɛɛ amli, ni ele yitseiaŋ jwɛŋmɔi fɛɛ.” (1 Kronika 28:9) Beni Nyɔŋmɔ taoɔ adesai atsuii akpekpei akpei abɔ mli yɛ jeŋ ni yiwalɛ, kɛ hetsɛ eyi lɛ obɔ nɛɛ mli lɛ, kwɛ bɔ ni emii baashɛ ehe aha kɛ ena tsui ko ni sumɔɔ toiŋjɔlɛ, anɔkwale, kɛ jalɛ! (Okɛto Yohane 1:47; 1 Petro 3:4 he.) Mɛni baa kɛ Nyɔŋmɔ na tsui ko ni eyi obɔ kɛ suɔmɔ kɛha lɛ, ni etaoɔ akɛ ekase ehe nii koni ekɛ mɛi krokomɛi aja nakai nilee lɛ hu lɛ? Yehowa kɛɔ wɔ yɛ Maleaki 3:16 akɛ eboɔ mɛi ni kɛ mɛi krokomɛi gbaa ehe sane lɛ atoi, ni eyɛ “kaimɔ wolo” po kɛha mɛi fɛɛ ni “sheɔ Yehowa gbeyei lɛ, kɛ mɛi ni jwɛŋɔ egbɛi lɛ he lɛ.” Nɛkɛ sui nɛɛ ajara wa waa kɛha lɛ!
10, 11. (a) Te mɛi komɛi baatswa odaseyeli ni yɔɔ ni tsɔɔ akɛ Yehowa buɔ amɛsui kpakpai lɛ amɛfɔ̃ tɛŋŋ? (b) Abia nɔkwɛmɔ nɔ lɛ tsɔɔ akɛ Yehowa buɔ wɔ sui kpakpai lɛ fɛɛ yɛ mɛɛ gbɛ nɔ?
10 Shi, tsui ni buɔ ehe fɔ lɛ baate shi awo nɛkɛ odaseyeli ni tsɔɔ bɔ ni wɔjara wa waa yɛ Nyɔŋmɔ hiɛ nɛɛ. Ekolɛ eeeya nɔ ewie ablɛbi ewo wɔtoiiaŋ be fɛɛ be akɛ, ‘Shi bɛ mɛi krokomɛi babaoo yɛ ni feɔ nɔkwɛmɔ nɔ kpakpa waa yɛ nakai sui lɛ amli fe mi. Kwɛ bɔ ni Yehowa nijiaŋ baaje wui aha kɛ ekɛ mi to amɛhe!’ Yehowa kɛ mɔ ko etooo mɔ kroko he, ni ejeee mɔ ni yɔɔ shɛii, aloo etaoɔ emuuyeli ni anyɛŋ ashɛ he. (Galatabii 6:4) Ekɛ sɛɛyoomɔ kɛ nyɛmɔ kpele tsuɔ nii ni ekɛleɔ tsuii amli saji, ni ebuɔ sui kpakpai fɛɛ akɛ amɛjara wa waa.
11 Akɛ nɔkwɛmɔ nɔ lɛ, beni Yehowa wo akpɔ akɛ akpata Maŋtsɛ Yerobeam maŋtsɛmɛi aweku ni ekwa hemɔkɛyeli lɛ fɛɛ ahiɛ, ni abɛɛ amɛ kɛya tamɔ abɛɔ “sɛbo” lɛ, E-fã akɛ afũ maŋtsɛ lɛ bii lɛ ateŋ mɔ kome, ni ji Abia, pɛ yɛ gbɛ kpakpa nɔ. Mɛni hewɔ? “Ehe ana nɔ kpakpa ko yɛ, yɛ Yehowa, Israel Nyɔŋmɔ lɛ hiɛ.” (1 Maŋtsɛmɛi 14:10, 13) Ani enɛ tsɔɔ akɛ Abia ji Yehowa jalɔ anɔkwafo? Dabi, etsɔɔɔ nakai, ejaakɛ egbo taakɛ eshia lɛ mli bii krokomɛi efɔŋ feelɔi lɛ hu gboi lɛ. (5 Mose 24:16) Shi kɛlɛ, Yehowa bu nakai “nɔ kpakpa” ni ena yɛ Abia tsui mli lɛ waa ni etsu he nii pɛpɛɛpɛ hu. Matthew Henry’s Commentary on the Whole Bible lɛ kɛɔ akɛ: “Kɛ nɔ kpakpa ko ni tamɔ nakai yɛ lɛ, abaana: Nyɔŋmɔ mɔ ni taoɔ lɛ, naa, ekɔɔɔ he eko akɛ eji nɔ bibioo kwraa, ni enaa he miishɛɛ hu.” Ni ohiɛ akakpa nɔ akɛ kɛ Nyɔŋmɔ naa su kpakpa he okadi bibioo ko po yɛ omli lɛ, ebaanyɛ eha eda kɛya hiɛ, shii abɔ ni obɔɔ mɔdɛŋ ni okɛ anɔkwayeli asɔmɔ lɛ lɛ.
12, 13. (a) Lala 139:3 tsɔɔ akɛ Yehowa buɔ wɔ mɔdɛŋbɔi lɛ yɛ mɛɛ gbɛ nɔ? (b) Mɛɛ shishinumɔ naa abaanyɛ awie yɛ akɛ Yehowa shaa wɔ nifeemɔi amli?
12 Yehowa buɔ wɔ mɔdɛŋbɔi lɛ waa yɛ gbɛ ni tamɔ nakai nɔŋŋ nɔ. Wɔkaneɔ yɛ Lala 139:1-3 akɛ: “Yehowa, otaoɔ mimli ni ole mi. Ole mishitamɔ kɛ mishitee mli fɛɛ; oyooɔ miyiŋtoo yɛ shɔŋŋ beebe. Otaoɔ minyiɛmɔ kɛ mishikamɔ fɛɛ mli; ni ole migbɛi fɛɛ.” No hewɔ lɛ Yehowa le wɔ nifeemɔi fɛɛ. Shi eyaa shɔŋŋ fe le ni eleɔ kɛkɛ. Yɛ Hebri wiemɔ mli lɛ, wiemɔ kuku ni awie akɛ “ole migbɛi fɛɛ” lɛ baanyɛ ahiɛ shishinumɔ akɛ “migbɛi fɛɛ ajara wa waa yɛ ohiɛ” aloo “obuɔ migbɛi fɛɛ waa.” (Okɛto Mateo 6:19, 20 he.) Shi, mɛɛ gbɛ nɔ Yehowa buɔ wɔgbɛi waa, yɛ be mli ni wɔyeee emuu ni eshai yɔɔ wɔhe hu nɛɛ?
13 Nɔ ni yɔɔ miishɛɛ ji akɛ, taakɛ woloŋlelɔi komɛi tsɔɔ lɛ, beni David ŋma akɛ Yehowa ‘taoɔ’ enyiɛmɔ kɛ ehejɔɔmɔ bei ‘fɛɛ mli’ lɛ, Hebri wiemɔ lɛ shishinumɔ diɛŋtsɛ ji ni “adoo nii anɔ” loo “asha nii amli.” Wolo ko wie yɛ he akɛ: “Eshishi ji akɛ . . . asha mli ni ajie jwɛi lɛ fɛɛ kɛjɛ mli, ni ashĩ ŋmaa lɛ fɛɛ yɛ mli—koni akɛbaa nɔ ni he yɔɔ sɛɛnamɔ lɛ fɛɛ yi. No hewɔ lɛ eetsɔɔ yɛ biɛ akɛ, kɛ wɔɔkɛɛ lɛ, Nyɔŋmɔ doo enɔ. . . . Egbɛ nibii ni ji jwɛi, aloo nibii ni he bɛ sɛɛnamɔ lɛ fɛɛ eshwa, ni ena nibii ni shwɛ ni ji nibii kpakpai ni he yɔɔ sɛɛnamɔ lɛ.” Ekolɛ tsui ni buɔ ehe fɔ lɛ baadoo wɔ nifeemɔi anɔ sɛɛsɛɛ, ni ebaabu wɔ fɔ ni mɔbɔnalɛ ko kwraa bɛ mli yɛ wɔ tsutsu tɔmɔi ahewɔ, ni ebaatswa nibii ni wɔfee tsutsu lɛ fɛɛ efɔ̃ akɛ amɛjeee nɔ ko kwraa. Shi kɛ wɔkɛ anɔkwayeli tsake wɔtsui ni wɔkɛ mɔdɛŋbɔɔ mia wɔhiɛ akɛ wɔtɔŋ nakai tɔmɔi lɛ dɔŋŋ lɛ, no lɛ Yehowa kɛ wɔhe eshai lɛ keɔ wɔ. (Lala 103:10-14; Bɔfoi lɛ Asaji 3:19) Eshaa wɔ nitsumɔ kpakpai lɛ kɛjɛɔ mli ni ekaiɔ nomɛi. Yɛ anɔkwale mli lɛ, ekaiɔ nomɛi kɛyaa naanɔ, shii abɔ ni wɔyaa nɔ wɔyeɔ lɛ anɔkwa lɛ. Ebaabu lɛ akɛ sane ni ejaaa kɛji ehiɛ kpa enɛɛmɛi anɔ, ni ejeee mɔ ni yeɔ sane ni ejaaa kɔkɔɔkɔ!—Hebribii 6:10.
14. Mɛni tsɔɔ akɛ Yehowa buɔ wɔ nitsumɔ yɛ Kristofoi asɔɔmɔ lɛ mli lɛ waa?
14 Mɛni ji nitsumɔi kpakpai ni Nyɔŋmɔ buɔ waa lɛ ekomɛi? No ji, nɔ fɛɛ nɔ ni wɔfeɔ yɛ e-Bi, Yesu Kristo kasemɔ mli lɛ. (1 Petro 2:21) Belɛ, eka shi faŋŋ akɛ, nitsumɔ kome ko ni he hiaa waa ji Nyɔŋmɔ Maŋtsɛyeli lɛ he sanekpakpa lɛ gbɛɛ kɛ shwamɔ. Wɔkaneɔ yɛ Romabii 10:15 lɛ akɛ: “Kwɛ bɔ ni hejɔlɛ he sanekpakpa shiɛlɔi ni shiɛɔ nii kpakpai lɛ anaji yɔɔ fɛo ha!” Eyɛ mli akɛ ekolɛ wɔsusuŋ wɔnaji foji nɛɛ ahe akɛ amɛhe yɛ “fɛo” moŋ, shi wiemɔ ni Paulo kɛtsu nii yɛ biɛ lɛ nɔŋŋ akɛtsu nii yɛ Hela Septuagint shishitsɔɔmɔ lɛ mli ni akɛwie Rebeka, Rahel, kɛ Yosef he—mɛi etɛ ni awieɔ akɛ amɛ fɛɛ amɛhe yɛ fɛo waa lɛ. (1 Mose 26:7; 29:17; 39:6) No hewɔ lɛ wɔhe ni wɔkɛwoɔ wɔ-Nyɔŋmɔ, Yehowa sɔɔmɔ mli lɛ yɛ fɛo, ni ejara wa waa hu yɛ ehiɛ.—Mateo 24:14; 28:19, 20.
15, 16. Mɛni hewɔ Yehowa buɔ wɔ tsuishiŋmɛɛ lɛ waa lɛ, ni Maŋtsɛ David wiemɔi ni yɔɔ Lala 56:9 lɛ maa enɛ nɔ mi yɛ mɛɛ gbɛ nɔ?
15 Su kroko hu ni Nyɔŋmɔ buɔ waa ji wɔ tsuishiŋmɛɛ. (Mateo 24:13) Kaimɔ akɛ, Satan miitao ni otsɔ osɛɛ oha Yehowa. Gbi fɛɛ gbi ni ohiɔ shi anɔkwafo ohaa Yehowa lɛ feɔ gbi kroko hu ni okɛyeɔ obuaa ni ekɛnaa hetoo ehaa Satan ahorabɔɔ wiemɔi lɛ. (Abɛi 27:11) Bei komɛi lɛ, tsuishiŋmɛɛ jeee nɔ ko ni yɔɔ mlɛo. Gbɔmɔtsoŋ hewalɛnamɔ mli naagbai, shika gbɛfaŋ haomɔi, henumɔŋ haomɔi, kɛ gbɛtsii nii krokomɛi baanyɛ aha gbi fɛɛ gbi ni hoɔ lɛ afee kaa. Wɔ tsuishiŋmɛɛ yɛ nɛkɛ kaai nɛɛ ashishi lɛ jara wa waa yɛ Yehowa hiɛ. No hewɔ ni Maŋtsɛ David bi ni Yehowa kɛ ehiɛ yaafonui lɛ ato mfoniri-feemɔŋ “tɔ” mli lɛ, ni ekɛ hekɛnɔfɔɔ bi akɛ, “Ani amɛbɛ owolo lɛ mli?” (Lala 56:9) Hɛɛ, Yehowa buɔ yaafonui kɛ amanehului ni wɔŋmɛɔ wɔtsui shi yɛ mli, ni wɔkɛhiɛɔ anɔkwayeli mli wɔhaa lɛ lɛ akɛ ejara wa waa, ni ekaiɔ fɛɛ hu. Nomɛi hu jara wa waa yɛ ehiɛ.
16 Yɛ wɔ sui kpakpai kɛ wɔ mɔdɛŋbɔi nɛɛ ahewɔ lɛ, kwɛ bɔ ni eyɔɔ faŋŋ akɛ Yehowa naa nibii babaoo ni he yɔɔ sɛɛnamɔ yɛ wɔteŋ mɔ fɛ mɔ mli! Bɔ fɛɛ bɔ ni Satan je lɛ kɛ wɔ eye eha lɛ, Yehowa naa wɔ akɛ wɔjara wa, ni wɔfata “jeŋmaji lɛ fɛɛ anii ni jara wa” lɛ he.—Hagai 2:7.
Nɔ ni Yehowa Fee ni Ekɛjie Esuɔmɔ lɛ Kpo
17. Mɛni hewɔ esa akɛ Kristo kpɔmɔ afɔleshaa lɛ ama nɔ mi aha wɔ akɛ Yehowa kɛ Yesu sumɔɔ wɔ aŋkroaŋkro lɛ?
17 Nɔ ni ji etɛ lɛ, Yehowa feɔ babaoo ni ekɛmaa suɔmɔ ni eyɔɔ kɛha wɔ lɛ nɔ mi. Eka shi faŋŋ akɛ, Kristo kpɔmɔ afɔleshaa lɛ ji hetoo ni mli wa fe fɛɛ ni akɛhaa Satan amale akɛ wɔhe bɛ sɛɛnamɔ ko ni asumɔɔɔ wɔsane hu lɛ. Esaaa ni wɔhiɛ kpaa nɔ kɔkɔɔkɔ akɛ piŋmɔ gbele ni Yesu gbo yɛ sɛŋmɔtso lɛ nɔ, kɛ hejaramɔ kpele ni Yehowa ŋmɛ etsui shi yɛ mli beni ekwɛɔ esuɔmɔ Bi lɛ gbele lɛ ji suɔmɔ ni amɛyɔɔ kɛha wɔ lɛ he odaseyeli. Kɛfata he lɛ, nakai suɔmɔ lɛ saa wɔhe aŋkroaŋkro. Nakai ji bɔ ni bɔfo Paulo nu shishi eha, ejaakɛ eŋma akɛ: “Nyɔŋmɔ Bi lɛ . . . sumɔ mi ni eŋɔ ehe eha yɛ mihewɔ.”—Galatabii 2:20.
18. Yehowa gbalaa wɔ kɛbɛŋkɛɔ Kristo yɛ mɛɛ shishinumɔ naa?
18 Yehowa ema suɔmɔ ni eyɔɔ kɛha wɔ lɛ nɔ mi kɛtsɔ yelikɛbuamɔ ni ekɛhaa wɔ aŋkroaŋkro koni wɔkɛ Kristo afɔleshaa lɛ mli sɛɛnamɔi lɛ atsu nii jogbaŋŋ kɛmɔ shi lɛ nɔ. Yesu wie yɛ Yohane 6:44 akɛ: “Mɔ ko nyɛŋ aba miŋɔɔ, akɛ ja Tsɛ lɛ ni tsu mi lɛ gbala lɛ dã.” Kɛtsɔ shiɛmɔ nitsumɔ lɛ ni shɛɔ wɔŋɔɔ aŋkroaŋkro, kɛ agbɛnɛ kɛtsɔ emumɔ krɔŋkrɔŋ lɛ ni Yehowa kɛtsuɔ nii ni ekɛyeɔ ebuaa wɔ ni wɔnuɔ mumɔŋ anɔkwalei ashishi ni wɔkɛtsuɔ nii hu, yɛ wɔ gbɔjɔmɔi kɛ emuu ni wɔyeee lɛ fɛɛ sɛɛ lɛ nɔ lɛ, Yehowa diɛŋtsɛ gbalaa wɔ kɛbɛŋkɛɔ e-Bi lɛ kɛ naanɔ wala he hiɛnɔkamɔ lɛ he. No hewɔ lɛ Yehowa baanyɛ awie yɛ wɔhe taakɛ ewie yɛ Israel he lɛ akɛ: “Naanɔ suɔmɔ mikɛsumɔo, hewɔ lɛ mikɛ mlihilɛ miigbalao.”—Yeremia 31:3.
19. Mɛni hewɔ esa akɛ sɔlemɔ hegbɛ ni wɔyɔɔ lɛ ama Yehowa suɔmɔ kɛha wɔ lɛ nɔ mi lɛ?
19 Shi ekolɛ wɔnaa Yehowa suɔmɔ ni mli wa waa kɛha wɔ lɛ mli niiashikpamɔ kɛtsɔɔ sɔlemɔ hegbɛ ni wɔyɔɔ lɛ nɔ. Efɔ̃ɔ wɔteŋ mɔ fɛɛ mɔ nine akɛ ‘wɔsɔle wɔha lɛ ni wɔkafɔ̃ɔ.’ (1 Tesalonikabii 5:17) Eboɔ toi! Atsɛɔ lɛ po akɛ ‘sɔlemɔ Toibolɔ.’ (Lala 65:3) Ekɛ nɛkɛ gbɛhe nɛɛ woko mɔ kroko dɛŋ ni etsu he nii, ekɛwoko lɛ diɛŋtsɛ e-Bi lɛ po dɛŋ. Bo lɛ susumɔ he okwɛ: Jeŋ muu fɛɛ Bɔlɔ lɛ woɔ wɔ hewalɛ ni wɔbɛŋkɛ lɛ yɛ sɔlemɔ mli, kɛ wiemɔ mli heyeli. Ekolɛ ofaikpamɔi lɛ po baatsirɛ Yehowa ni efee nɔ ni kulɛ efeŋ.—Hebribii 4:16; Yakobo 5:16; kwɛmɔ Yesaia 38:1-16.
20. Mɛni hewɔ suɔmɔ ni Nyɔŋmɔ yɔɔ kɛha wɔ lɛ jeee naajiemɔ ni wɔkɛaasusu wɔhe akɛ wɔhe hiaa fe nine lɛ?
20 Kristofonyo ni ŋmɛɔ pɛpɛɛpɛ lɛ eŋɔŋ Nyɔŋmɔ suɔmɔ kɛ bɔ ni ebuɔ wɔ lɛ he odaseyeli lɛ akɛ naajiemɔ ni ekɛaabu ehe akɛ ehe hiaa fe bɔ ni eji diɛŋtsɛ. Paulo ŋma akɛ: “Mikɛ duromɔ ni aŋɔduro mi lɛ miikɛɛ nyɛteŋ mɔ fɛɛ mɔ akɛ, ekabu lɛ diɛŋtsɛ ehe tuutu fe bɔ ni sa akɛ ebuɔ ehe; shi moŋ ejwɛŋ hiɛshikamɔ jwɛŋmɔ, mɔ fɛɛ mɔ lɛ taakɛ bɔ ni Nyɔŋmɔ esusu hemɔkɛyeli susumɔ eha lɛ lɛ.” (Romabii 12:3) No hewɔ lɛ beni wɔnyiɛɔ yɛ wɔ ŋwɛi Tsɛ lɛ suɔmɔ ni yɔɔ miishɛɛ lɛ mli lɛ, nyɛhaa wɔjwɛŋmɔ mli akaa shi ni wɔkaia akɛ wɔsaaa Nyɔŋmɔ duromɔ ni wɔnaa lɛ.—Okɛto Luka 17:10 he.
21. Mɛɛ Satan amale ko esa akɛ wɔte shi wɔwo daa nɛɛ, ni mɛɛ ŋwɛi anɔkwale esa akɛ wɔsusu he daa?
21 Nyɛhaa wɔteŋ mɔ fɛɛ mɔ abɔa mɔdɛŋ fɛɛ ni eeenyɛ ni ekɛte shi ewo susumɔi ni Satan woɔ he hewalɛ yɛ nɛkɛ jeŋ momo ni gboɔ nɛɛ mli lɛ. Nɔ ni fata enɛ he ji kpoomɔ ni wɔɔkpoo susumɔi ni wɔnaa akɛ wɔhe bɛ sɛɛnamɔ loo asumɔɔɔ wɔ lɛ. Kɛji gbɛjianɔtoo nɛɛ mli shihilɛ eha onaa ohe akɛ oji gbɛtsii nii ko ni da tsɔ fe bɔ ni Nyɔŋmɔ suɔmɔ kpele lɛ baanyɛ aye nɔ kunim, aloo onitsumɔi kpakpai lɛ daraaa kwraa bɔ ni ehiŋmɛii ni naa nɔ fɛɛ nɔ lɛ baanyɛ ana, aloo ohe eshai lɛ fa tsɔ fe bɔ ni e-Bi ni jara wa lɛ gbele lɛ po baanyɛ atsimɔ nɔ lɛ, no lɛ átsɔɔ bo amale. Tswaa nakai amalei lɛ fɛɛ oshwie kɛ nyaŋemɔ ni sa akɛ akɛnyaŋe amɛ lɛ! Nyɛhaa bɔfo Paulo wiemɔi ni jɛ mumɔŋ, ni yɔɔ Romabii 8:38, 39 lɛ ahia wɔ jwɛŋmɔ mli be fɛɛ be, akɛ: “Miyɛ hewalɛ yɛ nɔ, akɛ gbele jio wala jio, ŋwɛibɔfoi jio nɔyelɔi jio hewalɛi jio, nii ni yɔɔ nɛɛ jio, nii ni baaba lɛ jio, ŋwɛi jio shishi jio, aloo nii ni abɔ lɛ amli nɔ kroko jio, amɛnyɛŋ amɛgbala wɔkɛ Nyɔŋmɔ suɔmɔ ni yɔɔ Kristo Yesu, wɔ-Nuntsɔ lɛ mli lɛ mli.”
[Shishigbɛ niŋmai]
a Yɛ anɔkwale mli lɛ, amɛkɛ heguɔgbee wiemɔ ko, ni ji “ʽam-ha·ʼaʹrets,” loo “shikpɔŋ lɛ nɔ bii” shwieɔ ohiafoi lɛ. Taakɛ woloŋlelɔ ko tsɔɔ lɛ, Farisifoi lɛ tsɔɔ akɛ esaaa ni mɔ ko kɛ enii ni jara wa haa nɛkɛ gbɔmɛi nɛɛ akɛ amɛkwɛ nɔ, ni esaaa akɛ aheɔ amɛ odaseyeli ayeɔ, loo ahereɔ amɛ hiɛmɛɛ akɛ gbɔi, loo ayatoɔ amɛ gbɔ, aloo aheɔ nii po yɛ amɛdɛŋ. Jamɔ mli hiɛnyiɛlɔi lɛ wie akɛ mɔ ko biyoo ni ekɛaaha nɛkɛ gbɔmɛi nɛɛ eko gbala lɛ tamɔ nɔ ni efimɔ lɛ kɛ kpaai ni enyɛɛɛ nɔ ko kwraa efee, ni ekɛ lɛ eyaha kooloo awuiyelɔ.
Mɛni Ji Ojwɛŋmɔ?
◻ Mɛni hewɔ Satan bɔɔ mɔdɛŋ ni etsɔ̃ wɔyiŋ akɛ wɔhe bɛ sɛɛnamɔ ni asumɔɔɔ wɔ hu lɛ?
◻ Yesu tsɔɔ akɛ Yehowa buɔ wɔteŋ mɔ fɛɛ mɔ waa yɛ mɛɛ gbɛ nɔ?
◻ Te wɔfeɔ tɛŋŋ wɔleɔ akɛ Yehowa buɔ wɔsui kpakpai lɛ waa?
◻ Te wɔɔfee tɛŋŋ wɔna nɔmimaa akɛ Yehowa buɔ wɔ mɔdɛŋbɔi lɛ waa?
◻ Yehowa ema suɔmɔ ni eyɔɔ kɛha wɔ aŋkroaŋkro lɛ nɔ mi yɛ mɛɛ gbɛ nɔ?
[Mfoniri ni yɔɔ baafa 13]
Yehowa kadiɔ ni ekaiɔ mɛi fɛɛ ni jwɛŋɔ egbɛi lɛ he lɛ