Ani Abaanyɛ Akɛ He Afɔ̃ Wolo Nɛɛ Nɔ?

“Minaa kadimɔnii pii ni ji anɔkwale ni anyɛɔ akɛ he fɔ̃ɔ nɔ yɛ Biblia lɛ mli fe [jeŋ] yinɔsane fɛɛ ni yɔɔ lɛ mli.”—Sir Isaac Newton, Ŋleshi jeŋ nilelɔ ni ehe gbɛi.¹

ANI abaanyɛ akɛ he afɔ̃ nɛkɛ wolo nɛɛ ni ji—Biblia lɛ—nɔ? Ani ekɔɔ gbɔmɛi ni hi wala mli diɛŋtsɛ, hei ni hi shi diɛŋtsɛ, kɛ saji ni tee nɔ diɛŋtsɛ he? Kɛji nakai ni lɛ, belɛ esa akɛ odaseyeli ahi shi akɛ niŋmalɔi ni kwɛɔ amɛhe nɔ jogbaŋŋ ni yeɔ anɔkwa ŋmala. Odaseyeli yɛ. Ana ni afũ babaoo yɛ shikpɔŋ sũ mli, ni babaoo hu yɛ wolo lɛ diɛŋtsɛ mli.

Shitsaa Kɛha Odaseyeli Lɛ

Gbɔmɛi aninenaa nitsumɔi ni jɛ blema ni afũ yɛ Biblia shikpɔji anɔ ni akpa shi ana lɛ efi anɔkwale ni Biblia lɛ ji yɛ yinɔsane kɛ shikpɔŋ he mfonirii amli lɛ sɛɛ. Susumɔ odaseyelii ni mɛi ni taoɔ blema nibii lɛ etsa shi amɛna lɛ ekomɛi ahe okwɛ.

Biblia kanelɔi le David, oblanyo tookwɛlɔ ni yɔɔ ekãa ni batsɔ Israel maŋtsɛ lɛ jogbaŋŋ. Egbɛi jeɔ kpo shii 1,138 yɛ Biblia lɛ mli, ni wiemɔ “David We”—ni bei pii lɛ ekɔɔ emaŋtsɛmɛi awekukpaa lɛ he lɛ—jeɔ kpo shii 25. (1 Samuel 16:13; 20:16) Shi, yɛ Biblia lɛ sɛɛ lɛ, odaseyeli ko ni yɔɔ faŋŋ bɛ ni tsɔɔ akɛ David hi shi, ja nyɛsɛɛ nɛɛ nɔŋŋ. Ani David ji adesã mli mɔ ko kɛkɛ ni afo ehe sane atã?

Yɛ afi 1993 mli lɛ, shitsalɔi akuu ko ni Nilelɔ Avraham Biran nyiɛ amɛhiɛ lɛ kpá shi amɛna nɔ ko ni haa mɔ naa kpɛɔ ehe, ni abɔ he amaniɛ yɛ wolo ni atsɛɔ lɛ Israel Exploration Journal lɛ mli. Amɛyana tɛ diŋ ko yɛ blema ŋmeŋme ko ni atsɛɔ lɛ Tel Dan, ni yɔɔ Israel kooyigbɛ lɛ. Nɔ ni akpɛ yɛ tɛ lɛ hiɛ ji wiemɔi ni ji “David We” kɛ “Israel Maŋtsɛ.”² Akɛɛ niŋmaa, ni jɛ afii ohai nɛɛhu D.Ŋ.B. lɛ mli lɛ ji kunimyeli kaimɔ saŋ ni Arambii—ni ji Israel henyɛlɔi ni hi amɛ bokagbɛ lɛ tswa amɛma shi. Mɛni hewɔ blema niŋmaa nɛɛ sa kadimɔ waa lɛ?

Yɛ amaniɛ ni Nilelɔ Biran kɛ ehefatalɔ Nilelɔ Joseph Naveh bɔ lɛ hewɔ lɛ, sane ko ni aŋma awo Biblical Archaeology Review lɛ mli lɛ jaje akɛ: “Enɛ ji klɛŋklɛŋ be ni ana gbɛi David lɛ yɛ Biblia lɛ sɛɛ, yɛ blema niŋmaai amli.”3a Nɔ kroko hu sa kadimɔ yɛ niŋmaa lɛ he. Aŋma wiemɔ “David We” lɛ akɛ wiemɔ kome. Wiemɔ he Nilelɔ Anson Rainey ni he esa lɛ tsɔɔ mli akɛ: “Bei pii lɛ ashiɔ . . . wiemɔ mli jaralɔ, titri lɛ kɛ ale gbɛi ni atsaraa lɛ jogbaŋŋ lɛ. Eka shi faŋŋ akɛ ‘David We’ lɛ ji maŋkwramɔŋ kɛ shikpɔŋ kadimɔ gbɛi diɛŋtsɛ ni tamɔ nakai yɛ afii ohai nɛɛhu D.Ŋ.B. lɛ teŋgbɛ.”⁵ No hewɔ lɛ, eyɛ faŋŋ akɛ ale Maŋtsɛ David kɛ emaŋtsɛmɛi awekukpaa lɛ jogbaŋŋ yɛ blema je lɛ mli.

Ani Ninive—Ashur maŋ kpeteŋkpele lɛ ni atsi tã yɛ Biblia lɛ mli lɛ—hi shi diɛŋtsɛ? Kɛbashi nyɛsɛɛ afii ohai 19 nɛɛ mli lɛ, mɛi ni wieɔ shiɔ Biblia lɛ ateŋ mɛi komɛi ekpɛlɛɛɛ akɛ amɛaahe amɛye. Shi yɛ afi 1849 lɛ, Sir Austen Henry Layard shitsaa lɛ ha eyana Maŋtsɛ Sanherib maŋtsɛwe ni yɔɔ Kuyunjik, he ni fee blema Ninive fã lɛ. No hewɔ lɛ aha mɛi ni wieɔ shiɔ lɛ mua amɛnaa yɛ nɛkɛ sane nɛɛ he. Shi nɛkɛ tsũi ni ekumɔ nɛɛ yɛ babaoo kɛɛmɔ. Nɔ ni yɔɔ piai ni abaa yi jogbaŋŋ lɛ ekome gbogboi ahe ji nitɛŋmɔ ni miitsɔɔ bɔ ni aye maŋ ko ni atswa gbogboi awo he jogbaŋŋ lɛ nɔ kunim, kɛ gboklɛfoi ni aha amɛnyiɛ maŋtsɛ ni tutuaa amɛ lɛ hiɛ. Nɔ ni yɔɔ maŋtsɛ lɛ yiteŋgbɛ ji niŋmaa nɛɛ: “Sanherib, je lɛ maŋtsɛ, Ashur maŋtsɛ, ta nîmedu-maŋtsɛsɛi nɔ, ni ekwɛ nomŋɔɔ nii ni (aŋɔ) kɛjɛ Lakish (La-ki-su) lɛ.”⁶

Nitɛŋmɔ kɛ niŋmaa nɛɛ, ni abaanyɛ ana yɛ Ŋleshi Blema Nibii Atoohe lɛ kɛ Biblia lɛ mli sane ni kɔɔ Yudea maŋ ni ji Lakish ni Sanherib ye nɔ kunim, ni aŋma afɔ̃ shi yɛ 2 Maŋtsɛmɛi 18:13, 14 lɛ kpãa gbee. Beni ewieɔ sɛɛnamɔ ni yɔɔ nɔ ni ana nɛɛ he lɛ, Layard ŋma akɛ: “Namɔ yɔɔ ni baanyɛ ahe aye akɛ ekolɛ ebaanyɛ efee anɔkwale loo ebaanyɛ eba lɛ nakai, dani akpa shi ana nɛkɛ nibii nɛɛ, ákɛ nɔ ni yɔɔ shikpɔŋ sũ kɛ jwɛi ni kadiɔ he ni Ninive yɔɔ ni bua shi nɛɛ shishi lɛ, abaanyɛ ana [Yuda maŋtsɛ] Hezekia kɛ Sanherib teŋ tawuu lɛ he yinɔsane, ni Sanherib diɛŋtsɛ ŋma yɛ be pɔtɛɛ mli ni tawuu lɛ ba yɛ lɛ, ni maa Biblia mli saji ni aŋmala fɛɛ fitsofitso ashwie shi lɛ anɔ mi?”⁷

Shitsalɔi etsa gbɔmɛi aninenaa nitsumɔi sɔrɔtoi babaoo—shɔ̃ɔ nii, tsũi ni ekumɔ, sũ taoi, kapɛji, woji, kaimɔ saŋi, kɛ tɛi anɔ niŋmaai—ni maa anɔkwale ni Biblia lɛ ji lɛ nɔ mi. Tsɔnei ni akɛtsaa shi eha ana Kaldeabii amaŋ ni ji Ur, jarayeli kɛ jamɔ shihemɔhe ni Abraham hi jɛmɛ lɛ.⁸ (1 Mose 11:27-31) Nabonidus Chronicle, ni atsa shi ana yɛ afii ohai 19 lɛ mli lɛ tsɔɔ bɔ ni fee ni Babilon gbee shi yɛ Koresh Kpeteŋkpele lɛ hiɛ yɛ afi 539 D.Ŋ.B., sane ni ba ni awie he yɛ Daniel yitso 5 lɛ.⁹ Niŋmaai ni (abaa efufuji ayi yɛ Ŋleshi Blema Nibii Atoohe) lɛ ni ana yɛ tsũ agbo ko yiteŋ yɛ blema Tesalonika lɛ hiɛ maŋtiasei amli nɔyelɔi ni atsɔɔ akɛ amɛji “maŋklaloi,” wiemɔ ni aleee yɛ Hela nilelɔi awoji amli shi Biblia ŋmalɔ Luka kɛtsu nii lɛ agbɛi.¹⁰ (Bɔfoi lɛ Asaji 17:6, NW shishigbɛ niŋmaa) No hewɔ lɛ abu bɔ ni Luka niŋmaa lɛ ja ha lɛ bem yɛ enɛ mli—taakɛ eji yɛ ekrokomɛi amli lɛ.—Okɛto Luka 1:3 he.

Shi kɛlɛ, jeee be fɛɛ be shitsalɔi kɛ amɛhe kpãa gbee, aahu ni amɛkɛ Biblia lɛ aaakpã gbee. Kɛ́ nakai po lɛ, odaseyeli ni mli wa yɛ Biblia lɛ diɛŋtsɛ mli akɛ eji wolo ni abaanyɛ akɛ he afɔ̃ nɔ.

Akɛha ni Akɛ Nɔ̃ Ko Eteee

Yinɔsane ŋmalɔi anɔkwafoi eŋmaŋ kunimyelii (tamɔ niŋmaa ni kɔɔ Lakish nɔ kunim ni Sanherib ye lɛ he lɛ) pɛ shi amɛnɔ kunim ni aye lɛ hu, jeee omanyelii pɛ shi nine ni nyɛ shi hu, jeee hewalɛi pɛ shi gbɔjɔmɔi hu. Jeŋ yinɔsaji fioo ko pɛ jieɔ anɔkwayeli ni tamɔ nɛkɛ kpo.

Yɛ Ashur yinɔsane ŋmalɔi ahe lɛ, Daniel D. Luckenbill tsɔɔ mli akɛ: “Bei pii lɛ eyɛ faŋŋ akɛ, odehei ayakayaka nifeemɔ tsakeɔ yinɔsane mli anɔkwale.”¹¹ Beni efeɔ “odehei ayakayaka nifeemɔ” nɛɛ he nɔkwɛmɔnɔ lɛ, Ashur Maŋtsɛ Ashurnasirpal yinɔsaji shwãa akɛ: “Maŋtsɛ ji mi, ablade ji mi, áwo minɔ, mihe wa, akɛ woo haa mi, awoɔ mihiɛ nyam, miyɛ gbɛi fe mɔ fɛɛ mɔ, miyɛ hewalɛ, miyɛ ekãa, mitsui esa tamɔ jata, ni kãkãlɔ ji mi!”¹² Ani obaakpɛlɛ nɔ fɛɛ nɔ ni okaneɔ yɛ yinɔsaji nɛɛ amli lɛ nɔ akɛ yinɔsane ni ji anɔkwale?

Nɔ ni tamɔɔɔ nakai lɛ, mɛi ni ŋmala Biblia lɛ jie anɔkwayeli ni yɔɔ faŋŋ kpo. Mose, ni ji Israel hiɛnyiɛlɔ lɛ bɔ fãtɔɔi ni yɔɔ enyɛmi nuu Aaron, kɛ enyɛmi yoo Miriam, kɛ ewɔfasei Nadab kɛ Abihu, kɛ ewebii, kɛ lɛ diɛŋtsɛ ehe lɛ ahe amaniɛ yɛ faŋŋ mli. (2 Mose 14:11, 12; 32:1-6; 3 Mose 10:1, 2; 4 Mose 12:1-3; 20:9-12; 27:12-14) Atsimɔɔɔ Maŋtsɛ David tɔmɔi ni hiɛdɔɔ yɔɔ mli lɛ anɔ, shi moŋ aŋmala ashwie shi—ni nakai eba lɛ yɛ be mli ni David yeɔ nɔ lolo akɛ maŋtsɛ lɛ. (2 Samuel yitsei 11 kɛ 24) Mateo, ni ŋma wolo ni egbɛi kã nɔ lɛ, gba bɔ ni bɔfoi (ni eji amɛteŋ mɔ kome lɛ) je ŋwane yɛ mɔ ni he hiaa fe fɛɛ yɛ amɛteŋ, kɛ bɔ ni amɛjo foi amɛshi Yesu yɛ gbɛkɛ ni amɔ lɛ lɛ he sane. (Mateo 20:20-24; 26:56) Mɛi ni ŋmala Kristofoi a-Hela Ŋmalɛi lɛ amli woji lɛ kpɛlɛ naagbai, ni bɔlɛnamɔ mli jeŋba shara kɛ mligbalamɔi fata he yɛ mra be mli Kristofoi asafoi lɛ ekomɛi amli lɛ nɔ yɛ heyeli mli. Ni amɛwie kpookpoo yɛ nakai naagbai lɛ ahe nitsumɔ mli.—1 Korintobii 1:10-13; 5:1-13.

Amaniɛbɔɔ ni ji anɔkwale ni yɔɔ faŋŋ nɛkɛ lɛ tsɔɔ bɔ ni asusuɔ anɔkwale lɛ he waa ahãa. Akɛni mɛi ni ŋmala Biblia lɛ miisumɔ ni amɛbɔ saji ni eŋɔɔɔ ni kɔɔ amɛsuɔlɔi, amɛwebii, kɛ amɛ diɛŋtsɛ amɛhe po lɛ ahe amaniɛ hewɔ lɛ, ani yiŋtoo kpakpa ko bɛ ni aaadamɔ nɔ ahe amɛniŋmaai lɛ aye?

Emlitsɔɔmɔi Fitsofitso lɛ Ja

Kɛ aaye sane yɛ kojomɔhe lɛ, bei pii lɛ abaanyɛ adamɔ odasefonyo lɛ odase lɛ mli anɔkwalei bibii anɔ ahe edaseyeli lɛ aye. Gbeekpamɔ ni baa yɛ emlitsɔɔmɔi bibii amli lɛ baanyɛ ama odaseyeli lɛ nɔ mi akɛ eja ni eji anɔkwale, yɛ be mli ni wiemɔi ni kɛ amɛhe kpãaa gbee ni hiɛdɔɔ yɔɔ mli lɛ baanyɛ akpa enɛ he mama akɛ aka yiŋ awie. Yɛ gbɛ kroko nɔ lɛ, saji ni ato naa pɛpɛɛpɛ fe nine—nɔ ni ato emlitsɔɔmɔi lɛ eko fɛɛ eko naa pɛpɛɛpɛ fɛfɛo lɛ—baanyɛ aha ana akɛ eji amale odase.

Te sane nɛɛ kɔɔ Biblia ŋmalɔi lɛ “odaseyeli” he ehaa tɛŋŋ? Mɛi ni ŋmala Biblia lɛ jie gbeekpamɔ ni yɔɔ naakpɛɛ kpo. Gbeekpamɔ ni yɔɔ gbagbalii kã bɔ ni atsɔɔ mli fitsofitso aha lɛ fɛɛ mli. Shi kɛlɛ, ajeee gbɛ atooo gbeekpamɔ lɛ naa, koni no atee yiŋkɔshikɔshifeemɔ shi ákɛ benɛ akpã gbee yɛ he ko. Eyɛ faŋŋ akɛ nɔ ko ni akpaŋɔ he afeɔ bɛ nibii ni kɛ amɛhe kpã gbee lɛ amli, ni niŋmalɔi lɛ kɛ amɛhe kpãa gbee yɛ bei pii amli ni jeee gbɛ amɛje amɛfee. Susumɔ nɔkwɛmɔnii komɛi ahe okwɛ.

Biblia ŋmalɔ Mateo ŋma akɛ: “Ni beni Yesu ba Petro we lɛ, ena no shaayoo lɛ kã shi kɛ fulu.” (Mateo 8:14; wɔma efã ko nɔ mi.) Mateo kɛ sane mlitsɔɔmɔ ni yɔɔ miishɛɛ ni he ehiaaa ha yɛ biɛ: Petro ebote gbalashihilɛ mli. Paulo ŋma nɔ ko ekɛfi anɔkwa sane bibioo nɛɛ sɛɛ akɛ: “Ani wɔbɛ hegbɛ akɛ wɔhiɛɔ nyɛmi yoo ni ji wɔŋã kɛnyiɛɔ, tamɔ bɔfoi krokomɛi lɛ hu . . . kɛ Kefa?”b (1 Korintobii 9:5) Emli sane lɛ tsɔɔ akɛ Paulo miifã ehe kɛmiijɛ wiemɔi ni jeee anɔkwale ni awieɔ ashiɔ lɛ lɛ mli. (1 Korintobii 9:1-4) Eyɛ faŋŋ akɛ, nɛkɛ anɔkwa sane bibioo nɛɛ—Petro ni ebote gbalashihilɛ mli lɛ—jeee sane ni Paulo kɛba koni ekɛfi anɔkwale ni Mateo sane lɛ ji lɛ sɛɛ, shi eji sane ni baje mli trukaa kɛkɛ.

Sanekpakpa ŋmalɔi ejwɛ lɛ fɛɛ—Mateo, Marko, Luka, kɛ Yohane—ŋma akɛ, yɛ gbɛkɛ ni amɔ Yesu lɛ, ekaselɔi lɛ ateŋ mɔ kome gbala klante ni ekɛbã osɔfonukpa lɛ tsulɔ lɛ, ekɛfo nuu lɛ toi. Yohane Sanekpakpa lɛ pɛ bɔ sane ni tamɔ nɔ ni ehe ehiaaa nɛɛ he amaniɛ: “Nyɔ̃ŋ lɛ gbɛi ji Malko.” (Yohane 18:10, 26) Mɛni hewɔ Yohane pɛ tsĩ nuu lɛ gbɛi atã lɛ? Yɛ enɛ sɛɛ kukuji fioo ko sɛɛ lɛ, sane lɛ kɛ anɔkwa sane ko ni atsĩii tã yɛ he ko he ko ha: “Osɔfonukpa lɛ le” Yohane. Ni osɔfonukpa lɛ shiabii lɛ hu le lɛ; tsuji lɛ le lɛ, ni lɛ hu ele amɛ. (Yohane 18:15, 16) Belɛ nakai ebaaba lɛ akɛ Yohane aaatsĩ nuu ni pila lɛ gbɛi atã, yɛ be mli ni Sanekpakpa ŋmalɔi krokomɛi ni leee gbɔmɔ lɛ etsĩii egbɛi atã.

Yɛ bei komɛi amli lɛ, ashiɔ sane mlitsɔɔmɔi ni yɔɔ fitsofitso lɛ ekomɛi kɛjɛɔ sane kome mli shi akɛhaa yɛ he kroko kɛtsɔɔ wiemɔi ni awieɔ trukaa lɛ anɔ. Akɛ nɔkwɛmɔnɔ lɛ, sane ni Mateo ŋma ni kɔɔ Yesu kojomɔ yɛ Yudafoi a-Gwabɔɔ lɛ hiɛ lɛ kɛɔ akɛ gbɔmɛi komɛi ni yɔɔ jɛmɛ lɛ “gbala ehiɛ ma, ni amɛkɛɛ: ‘Gbaa otsɔɔ wɔ, bo Kristo. Namɔ gbá bo ma lɛ?’” (Mateo 26:67, 68, NW) Mɛni hewɔ amɛbaabi ni Yesu ‘agba’ mɔ ni gbá lɛ ma lɛ etsɔɔ amɛ, yɛ be mli ni magbalɔ lɛ damɔ ehiɛ lɛ? Mateo etsɔɔɔ mli. Shi Sanekpakpa ŋmalɔi lɛ ateŋ mɛi enyɔ kɛ sane mlitsɔɔmɔ ni elaaje lɛ ha: Mɛi ni waa Yesu yi lɛ ha ehiɛ dani agba lɛ ma lɛ. (Marko 14:65; Luka 22:64) Mateo kɛ esane lɛ ha ni esusuuu he ákɛ akɛ enaagbee mlitsɔɔmɔ kwraa lɛ efata he.

Yohane Sanekpakpa lɛ gbaa be ko ni asafo babaoo ko bua amɛhe naa koni amɛbo Yesu nitsɔɔmɔ lɛ toi. Taakɛ nɔ ni aŋma afɔ̃ shi lɛ tsɔɔ lɛ, beni Yesu na gbɔmɛi babaoo lɛ, “ekɛɛ Filipo akɛ: ‘Nɛgbɛ wɔɔyahe aboloo yɛ wɔha mɛnɛɛmɛi amɛye?’” (Yohane 6:5, NW) Mɛni hewɔ yɛ kaselɔi ni yɔɔ jɛmɛ lɛ fɛɛ ateŋ lɛ, Yesu bi Filipo he ni amɛaaná aboloo yɛ amɛhe lɛ? Niŋmalɔ lɛ ewieee. Shi yɛ sane ni tamɔ enɛ nɔŋŋ lɛ mli lɛ, Luka bɔ amaniɛ akɛ nɔ ni ba nɛɛ ba mli yɛ he ko ni bɛŋkɛ Betsaida, ni ji maŋ ko ni yɔɔ Galilea Ŋshɔ lɛ kooyigbɛ, ni Yohane Sanekpakpa lɛ etsɔ hiɛ ewie akɛ “Filipo jɛ Betsaida.” (Yohane 1:44; Luka 9:10) No hewɔ lɛ Yesu bi mɔ ko ni emaŋ bɛŋkɛ jɛmɛ lɛ sane yɛ gbɛ ni ja nɔ. Gbeekpamɔ ni kã emlitsɔɔmɔi lɛ amli lɛ sa kadimɔ, ni kɛlɛ eyɛ faŋŋ akɛ ejeee nɔ ko ni aje gbɛ awie.

Yɛ saji lɛ ekomɛi amli lɛ, saji komɛi amlitsɔɔmɔi ni ashiɔ lɛ haa aheɔ Biblia ŋmalɔ lɛ ayeɔ moŋ. Akɛ nɔkwɛmɔnɔ lɛ, mɔ ni ŋma 1 Maŋtsɛmɛi lɛ wieɔ nuhɔmɔ ko ni naa wa ni ba Israel lɛ he. Enaa wa aahu akɛ maŋtsɛ lɛ naaa nu kɛ jwɛi ni fa eha ekpɔŋɔi kɛ etejiokpɔŋɔi lɛ koni amɛhi wala mli. (1 Maŋtsɛmɛi 17:7; 18:5) Ni kɛlɛ, nakai sane lɛ nɔŋŋ bɔɔ amaniɛ akɛ, gbalɔ Elia fã ni akɛ nu ni fa abaha lɛ yɛ Karmel Gɔŋ lɛ nɔ (koni akɛtsu afɔleshaa he nii) koni akɛwo bu ni atsa abɔle he ko ni ekolɛ elɛɛmɔ shɛɔ mitai 1,000 dalɛ lɛ mli. (1 Maŋtsɛmɛi 18:33-35) Yɛ be mli ni ayeɔ nuhɔmɔ lɛ, nɛgbɛ nu lɛ fɛɛ jɛ kɛba? Mɔ ni ŋma 1 Maŋtsɛmɛi lɛ gbaaa ehe naa akɛ eeetsɔɔ mli. Shi kɛlɛ, mɔ fɛɛ mɔ ni yɔɔ Israel lɛ le akɛ Karmel yɛ Mediteranea Ŋshɔ lɛ naa gbɛ, taakɛ sane mlitsɔɔmɔ ni ba trukaa yɛ sɛɛ mli yɛ sane lɛ mli lɛ tsɔɔ lɛ. (1 Maŋtsɛmɛi 18:43) No hewɔ lɛ, ŋshɔŋ nu baafee nɔ ni yɔɔ kɛha enɛ feemɔ. Kɛji akɛ wolo kroko ni tsɔɔ sane nɛɛ mli lɛ ji adesã kɛkɛ ni akɛmiilaka mɛi akɛ anɔkwa sane lɛ, belɛ mɛni hewɔ eŋmalɔ lɛ, ni baanyɛ afee hiɛtɛlɔ ni foɔ sane etãa lɛ shi sane ni mli wa ni yɔɔ faŋŋ nɛɛ efɔ̃ shi yɛ ŋmalɛ lɛ mli?

No hewɔ lɛ, ani abaanyɛ akɛ he afɔ̃ Biblia lɛ nɔ? Shitsalɔi etsa blema gbɔmɛi aninenaa nitsumɔi ni fa kɛjɛ sũ mli ni maa nɔ mi akɛ Biblia lɛ wieɔ gbɔmɛi diɛŋtsɛ, hei diɛŋtsɛ, kɛ saji diɛŋtsɛ ni ba he. Shi, nɔ ni nyɛɔ mɔ nɔ babaoo po ji odaseyeli ni anaa yɛ Biblia lɛ diɛŋtsɛ mli lɛ. Niŋmalɔi ni wieɔ anɔkwale lɛ haaa mɔ ko aye ehe—ni amɛ diɛŋtsɛ po amɛfata he—yɛ anɔkwalei ŋmiiŋmi ni amɛŋmala lɛ pɛpɛɛpɛ lɛ mli. Bɔ ni emligbɛ niŋmaai lɛ kɛ amɛhe kpãa gbee ha, ni saji ni baa trukaa ni jeee gbɛ aje atsɔ he ŋaa lɛ fata he lɛ, kɛ anɔkwale ni kã shi faŋŋ haa “odaseyeli” lɛ. Yɛ “kadimɔnii ni ji anɔkwale” nɛɛ hewɔ lɛ, Biblia lɛ ji wolo ni obaanyɛ okɛ ohe afɔ̃ nɔ diɛŋtsɛ.

[Shishigbɛ niŋmai]

[Mfoniri ni yɔɔ baafa 15]

Tel Dan woji fufuji lɛ

[Mfoniri ni yɔɔ baafa 16, 17]

Ashur gbogbo he nitɛŋmɔi ni miitsɔɔ Lakish he ka ni awo, ni atsĩ tã yɛ 2 Maŋtsɛmɛi 18:13, 14 lɛ