Shiɛmɔ Nyɔŋmɔ Maŋtsɛyeli Lɛ Otsɔɔ
“Ha ni gbohii afu amɛgbohii, shi bo lɛ, yaa ni oyashiɛ Nyɔŋmɔ maŋtsɛyeli lɛ!”—LUKA 9:60.
1. Yesu wiemɔ ni yɔɔ Luka 9:60 lɛ teɔ mɛɛ sanebimɔi ni he hiaa ashi?
NYƆŊMƆ Maŋtsɛyeli lɛ—no ji nɔ ni he hiaa Yesu fe nɔ fɛɛ nɔ yɛ eshihilɛ mli! Nakai nɔŋŋ eji ŋmɛnɛ kɛha wɔteŋ mɔ fɛɛ mɔ ni ji enanemaahei asɛɛnyiɛlɔi anɔkwafoi lɛ. Akɛ Kristofoi lɛ, wɔmiibɔ mɔdɛŋ ni wɔnyiɛ Yesu nanemaahei lɛ asɛɛ kpaakpa kɛtsɔ shihilɛ yɛ Biblia lɛ naa lɛ nɔ. (1 Petro 2:21) Shi amrɔ nɛɛ, yɛ be mli ni wɔyɔɔ 1986 mli nɛɛ, ani benɛ ehe miihia ni wɔsaa wɔka nibii ni he hiaa wɔ fe fɛɛ yɛ wɔshihilɛ mli lɛ ekoŋŋ wɔkwɛ? Akɛ nɔkwɛmɔ nɔ lɛ, te obaagbala Yesu wiemɔ ni ewie etsɔɔ mɔ ko nɛɛ mli otsɔɔ tɛŋŋ, beni ekɛɛ, “ha ni gbohii afu amɛgbohii” lɛ? Mɛni hewɔ osusuɔ akɛ Yesu ma hiamɔ ni Maŋtsɛyeli lɛ he sane ni ashiɛɔ atsɔɔ lɛ he hiaa lɛ nɔ mi yɛ nakai be mli fe nɔ ni tamɔ weku hiamɔ nii lɛ? Mɛni okɛɔ yɛ enɛ he?
2. Mɛɛ be Yehowa nɔyeli lɛ je shishi, ni ebaahi shi aahu kɛyashi mɛɛ be?
2 Jeeŋmɔ dani Yesu kɛ wiemɔ ni ji “Nyɔŋmɔ Maŋtsɛyeli” lɛ aaatsu nii lɛ, lalatsɛ David ŋma yɛ mumɔ lɛ tsirɛmɔ naa akɛ: “Yehowa lɛ, eŋɔ emaŋtsɛsɛi lɛ ema shi yɛ ŋwɛi, ni emaŋtsɛyeli lɛ yeɔ nii fɛɛ nɔ.” (Lala 103:19) Yehowa maŋtsɛyeli lɛ je shishi beni eje adebɔɔ shishi. Anyɛŋ atsi emaŋtsɛsɛi lɛ shishitoo lɛ kɛjɛ egbɛhe lɛ. Anyɛŋ ashɔ hegbɛ ni eyɔɔ akɛ jeŋ muu fɛɛ maŋtsɛ lɛ kɛjɛ edɛ. Ebɛ naakpɛɛ mɔ akɛ lalatsɛ ko aaawie akɛ: “Nyɛjajea enunyam lɛ nyɛtsɔa yɛ jeŋmaji lɛ ateŋ, . . . ejaakɛ Yehowa da ni esa yijiemɔ babaoo”!—Lala 96:3, 4; 109:21; Daniel 4:34, 35.
3. (a) Mɛɛ nifeemɔi ha atswa Yehowa nɔyeli lɛ mpoa? (b) Nyɔŋmɔ eto eyiŋ akɛ ebaatsu je muu fɛɛ nɔyeli he sane nɛɛ he nii yɛ mɛɛ gbɛ nɔ?
3 Shi, jeee mɛi fɛɛ etee nɔ amɛkahe amɛjie Yehowa yi. Klɛŋklɛŋ hemɔkɛyeli kwalɔ ni ji Satan tswa gbɛ ni Yehowa tsɔ nɔ etsu E-nɔyeli yɛ E-bɔɔ nii ni yɔɔ shikpɔŋ nɔ lɛ ahe nii eha lɛ mpoa. (1 Mose 3:1-5; Hiob 1:6-12; 2:1-5) Nɔ ni jɛ mli ba ji, Satan atuatsemɔ su nɛɛ tsɛŋe bɔɔ nii komɛi yɛ shikpɔŋ nɔ kɛ ŋwɛi yɛ sɛɛ mli. Satan tsirɛ gbɔmɛi ayisɛɛ ni amɛto adesa maŋtsɛyelii sɔrɔtoi. Ekɛ enɛɛmɛi etsu nii ekɛtswa hegbɛ nii Nyɔŋmɔ nɔyeli lɛ yɔɔ lɛ mpoa. (Kpojiemɔ 13:1-6) Bɔni afee ni esaa je muu fɛɛ nɔyeli he sane ni ete shi nɛɛ lɛ, Yehowa to nɔ ko ni ekaaa he gbɛjianɔ taakɛ agba afɔ shi yɛ Daniel 2:44 lɛ: “Ni nɛkɛ maŋtsɛmɛi nɛɛ ayinɔ lɛ Nyɔŋmɔ ni yɔɔ ŋwɛi lɛ aaatee maŋtsɛyeli ko shi ama shi ni efiteŋ dɔŋŋ kɛaatee naanɔ, eeejwara maŋtsɛyelii nɛɛ fɛɛ wɔtsɔwɔtsɔ ni eeekpata amɛhiɛ, shi lɛ diɛŋtsɛ lɛ eeedamɔ shi kɛaatee naanɔ.”
Yehowa Ebaye Israel Nɔ Maŋtsɛ
4. David baanyɛ akɛɛ akɛ “Yehowa miiye maŋtsɛ” yɛ mɛɛ shishiumɔ naa, ni enɛ biɔ ni afee mɛni?
4 No hewɔ lɛ, ebafee faŋŋ bianɛ akɛ, eyɛ mli akɛ Yehowa nɔyeli lɛ jɛ adebɔɔ shishijee tɔɔ moŋ, shi eto eyiŋ akɛ ebaajie enɔyeli lɛ kpo yɛ gbɛ krɛdɛɛ ko nɔ ni ekɛsaa sane ni kɔɔ emaŋtsɛyeli hegbɛ lɛ he lɛ kɛya naanɔ. Ŋwɛi Mesia Maŋtsɛyeli lɛ nɔ ebaatsɔ efee enɛ. Shikpɔŋ nɔ maŋtsɛyeli ni Yehowa to yɛ Israel maŋ lɛ nɔ lɛ baafee nɛkɛ Maŋtsɛyeli ni “efiteŋ dɔŋŋ kɛaatee naanɔ” lɛ he mfoniri yɛ gbɛ bibioo nɔ. Yɛ enɛ hewɔ lɛ, beni Maŋtsɛ David kɛ kpaŋmɔ adeka lɛ ba Yerusalem maŋtiase lɛ mli lɛ, enyɛ ekɛ mlifilimɔ lá akɛ: “Ŋwɛi anya, ni shikpɔŋ mli afili lɛ, ni akɛɛ yɛ jeŋmaji lɛ ateŋ akɛ: ‘Yehowa miiye maŋtsɛ!’” (1 Kronika 16:31) Hɛɛ, Yehowa “miiye maŋtsɛ” yɛ Israel fɛɛ nɔ yɛ shishinumɔ krɛdɛɛ ko naa. Eji nyamɔ kpele be, ni David miisumɔ ni ejaje nakai nifeemɔ ni yɔɔ miishɛɛ nɛɛ etsɔɔ yɛ he fɛɛ he!
5, 6. (a) David yɛ sɔrɔto yɛ maŋtsɛmɛi ateŋ yɛ mɛɛ gbɛ nɔ? (b) David fee namɔ he mfoniri, ni yɛ mɛɛ gbɛ nɔ?
5 Maŋtsɛ David tsɔsemɔ akɛ tookwɛlɔ lɛ ha ebatsɔ maŋtsɛ ni yɔɔ sɔrɔto yɛ maŋtsɛmɛi lɛ ateŋ. Eji tookwɛlɔ kɛ maŋtsɛ. Lalatsɛ lɛ tsɔɔ David ni Nyɔŋmɔ ehala lɛ eha gbɛhe nɛɛ mli akɛ: “Ni [Yehowa] ehala etsulɔ David, ni efa lɛ kɛjɛ tooiatsuiaŋ . . . koni ebalɛ Yakob ni ji emaŋ lɛ kɛ Israel ni ji egbɛfaŋnɔ lɛ. Ni elɛ amɛ yɛ etsuiŋ emuuyeli lɛ naa, ni ekɛ ŋaaniji atsɔɔ amɛ gbɛ.”—Lala 78:70-72.
6 Bɔ ni David kwɛ ewebii lɛ anɔ tamɔ etooi, bɔ ni etsui ye emuu yɛ e-Nyɔŋmɔ lɛ he, kɛ eŋaa ákɛ hiɛnyiɛlɔ lɛ ha ehe basa akɛ mɔ ni feɔ Mesia ni baa lɛ he mfoniri, mɔ ni akɛ lɛ baatsu nii yɛ gbɛ krɛdɛɛ ko nɔ koni ejie Yehowa jeŋ muu fɛɛ maŋtsɛyeli lɛ kpo etsɔɔ ni etsu nii akɛ Tookwɛlɔ kɛ Maŋtsɛ ni asumɔɔ lɛ. Gbalɔ Ezekiel gba nɛkɛ nibii ni yɔɔ miishɛɛ ni baaya nɔ yɛ Yehowa yiŋtoo mli yɛ sɛɛ mli lɛ efɔ shi akɛ: “Ni maŋɔ tookwɛlɔ kome mato amɛ [Israel] nɔ, ni eeelɛ amɛ, lɛ ji mitsulɔ David; . . . Ni mi, Yehowa matsɔ amɛ-Nyɔŋmɔ, ni mitsulɔ David aaafee lumɔ yɛ amɛteŋ; mi, Yehowa, miwie!”—Ezekiel 34:22-24.
Tookwɛlɔ Kɛ Maŋtsɛ Ni Agba Yɛ Ehe Lɛ Pue
7, 8. (a) Te fee tɛŋŋ ni ayɔse Tookwɛlɔ kɛ Maŋtsɛ ni agba yɛ ehe lɛ, ni epuemɔ lɛ sa mɛni? (b) Yehowa ‘kpɛlɛ’ Yesu nɔ yɛ mɛɛ yiŋtoo hewɔ?
7 Mɔ ni Yehowa gba yɛ ehe lɛ ji lɛ diɛŋtsɛ e-Bi, Yesu. Bɔfo Gabriel wie ehe etsɔɔ obalayoo fro Maria akɛ: “Ni naa, obaana musu ni ooofɔ binuu, ni ooowo lɛ gbɛi akɛ Yesu. Eeetsɔ agbo, ni aaatsɛ lɛ Ŋwɛinyo lɛ Bi, ni Nuŋtsɔ Nyɔŋmɔ aaaŋɔ etsɛ David maŋtsɛsɛi lɛ aha lɛ. Ni eeeye Yakob we lɛ nɔ maŋtsɛ kɛaatee naanɔ, ni emaŋtsɛyeli lɛ sɛɛ efoŋ.” (Luka 1:31-33) Mɛɛ Yehowa maŋtsɛyeli lɛ kpojiemɔ fɛfɛo po ebaafee nɛkɛ! Yɛ anɔkwale mli lɛ, nifeemɔ ni tamɔ enɛ ni baa lɛ sa jajemɔ yɛ jeŋ fɛɛ, akɛ: “Yehowa miiye maŋtsɛ!”
8 Yɛ Yesu naakpɛɛ fɔmɔ lɛ sɛɛ beni eda etsɔ onukpa lɛ, ekɛ ehe ha kɛha baptisimɔ yɛ nu mli yɛ Yordan faa lɛ mli. Nyɔŋmɔ kpɛlɛ Yesu nɔ akɛ e-Bi yɛ nakai be lɛ mli kɛtsɔ mumɔ lɛ ni efɔse eshwie enɔ lɛ nɔ beni ekɛɛ akɛ: “Bo ji misuɔmɔ bi lɛ, bo ohe tsuijurɔ minaa!” (Luka 3:22) Ená Yesu ‘he tsuijurɔ’ kɛha mɛni? Nɔ ni Luka ŋma efɔ shi lɛ tsɔɔ mli akɛ: “Ni beni Yesu diɛŋtsɛ bɔi lɛ, eye aaafee afii nyɔŋmai etɛ.” (Luka 3:23; Ref. Bi. shishigbɛ niŋmaa: “Aloo, ‘eje [nitsɔɔmɔ] shishi.’”) Revised Standard Version lɛ kɛ New International Version lɛ kɛɔ akɛ,“Beni eje esɔɔmɔ shishi lɛ.” Mɛni ji Yesu “nitsumɔ” aloo “sɔɔmɔ” lɛ? Ani ‘etsɔɔ nii’? Niŋmalɔ Mateo kɛ hetoo haa: “Ni Yesu kpa Galilea muu lɛ fɛɛ, etsɔɔ nii yɛ amɛkpeehei lɛ, ni eshiɛɔ maŋtsɛyeli lɛ he sanekpakpa lɛ etsɔɔ, ni etsaa hela fɛɛ hela kɛ hejaramɔ fɛɛ hejaramɔ yɛ ma lɛŋ.”—Mateo 4:23.
9. Yesu tamɔ eblematsɛ David yɛ mɛɛ gbɛi anɔ?
9 Yesu tuu ewala fɛɛ eha ‘Nyɔŋmɔ maŋtsɛyeli lɛ shiɛmɔ yɛ he fɛɛ he.’ Efee bɔ ni etsui eye emuu lɛ he nɔkwɛmɔ nɔ kɛtsɔ Yehowa Maŋtsɛyeli lɛ ni etuu ehe eha ni eŋmɛɛɛ he ni ekɛaasaa lɛ nɔ tamɔ eblematsɛ David. (Luka 9:60; 4:3-13; Yohane 16:33) Yesu jie ehe kpo akɛ nakai ‘tookwɛlɔ kome’ lɛ ni Yehowa wo shi akɛ ebaaha eba lɛ. Eyɛ he miishɛɛ akɛ eeelɛ mɛi ni jamɔŋ hiɛnyiɛlɔi lɛ eha “etɔ amɛ ni amɛfee yuuyaa tamɔ tooi ni bɛ kwɛlɔ” yɛ mumɔŋ lɛ. (Mateo 9:36) Yɛ ehesaai yɛ gbɔmɛi anɔkwɛmɔ nitsumɔ lɛ gbɛfaŋ kɛ bɔ ni egbele enitsumɔ lɛ mli fiofio eha yɛ afii ni shwie mli lɛ amli lɛ he lɛ, Yesu kɛɛ: “Miji tookwɛlɔ kpakpa lɛ, ni mile mɛi ni ji mimɛi, ni mimɛi lɛ hu le mi . . . Ni miyɛ toi krokomɛi ni jɛɛɛ toiatsu nɛɛ mli; ni nomɛi hu ja miŋɔ amɛ kɛba, ni amɛbanu migbee, ni toi lɛ fee kuu kome kɛ kwɛlɔ kome.”—Yohane 10:14,16.
10. Te wɔɔfee tɛŋŋ wɔkase nii kɛjɛ bɔ ni Yudafoi ni Yesu tsɛ amɛ akɛ amɛbanyiɛ esɛɛ lɛ fee amɛnii amɛha lɛ mli?
10 Te Yudafoi lɛ fee amɛnii amɛha tɛŋŋ beni Yesu fɔ nine etsɛ amɛ akɛ amɛbatsɔmɔ esɛɛnyiɛlɔi lɛ? Amɛnifeemɔi lɛ soro. Beni wɔpɛiɔ amɛnifeemɔi nɛɛ ekomɛi amli wɔkwɛɔ lɛ, susumɔ bɔ ni ohereɔ enɛ nɔ ohaa lɛ he okwɛ kɛjɛ be mli ni okɛ Nyɔŋmɔ Maŋtsɛyeli lɛ he sane lɛ kpe nɛɛ.
“Nyiɛmɔ Misɛɛ”—Te Ohereɔ Nɔ Ohaa Tɛŋŋ?
11. Tsɔɔmɔ bɔ ni Simon, Andrea, Yakobo, Yohane kɛ Mateo here Yesu tsɛmɔ akɛ, “Nyɛbanyiɛa misɛɛ” lɛ nɔ amɛha lɛ mli.
11 Beni Yesu hoɔ yɛ he ni bɛŋkɛ Galilea ŋshɔ lɛ naa lɛ, ena Simon kɛ enyɛmi Andrea akɛ amɛmiihɛ yɛ ŋshɔ lɛ mli. “Ni Yesu kɛɛ amɛ akɛ: ‘Nyɛbanyiɛa misɛɛ, ni mafee nyɛ gbɔmɛi ahe wolɛi.’ Ni amrɔ lɛ amɛshi amɛyaai lɛ, amɛbanyiɛ esɛɛ. Ni beni ejɛ jɛi eyaa hiɛ fioo lɛ, ena Yakobo, Zebedeo bi lɛ, kɛ enyɛmi Yohane . . . ni . . . etsɛ amɛ; ni amɛshi amɛtsɛ Zebedeo kɛ epaafoi lɛ yɛ lɛlɛ lɛ mli, ni amɛbanyiɛ esɛɛ.” (Marko 1:16-20) Nakai nɔŋŋ toohelɔ Levi aloo Mateo hu fee enii oya yɛ gbɛ ni ja nɔ. “[Yesu] ekɛɛ lɛ akɛ: ‘Nyiɛmɔ misɛɛ!’ Ni eshi fɛɛ ni ete shi ebanyiɛ esɛɛ.”—Luka 5:27, 28.
12. Mɛni gbaa nakai nuu ni kɛɛ Yesu akɛ: “Manyiɛ osɛɛ kɛaatee he fɛɛ he ni oyaa” lɛ naa?
12 Shi, jeee mɛi lɛ fɛɛ here Yesu tsɛmɔ akɛ, “Nyiɛmɔ misɛɛ,” lɛ nɔ amrɔ nɔŋŋ. Susumɔ nakai nuu lɛ ni atsi eta yɛ Luka yitso 9, mɔ ni Yesu kɛ lɛ kpe beni ejɛ akrowa ko kɛmiiya akrowa kroko lɛ he okwɛ. Ekɛɛ Yesu akɛ: “Manyiɛ osɛɛ kɛaatee he fɛɛ he ni oyaa.” Nɔ ni Mateo ŋma lɛ tsɔɔ akɛ nuu nɛɛ ji woloŋmalɔ. Abuɔ woloŋmalɔi nɛɛ jogbaŋŋ ni atsɛɔ amɛ “Rabi.” Agbɛnɛ kadimɔ nɔ ni Yesu kɛɛ lɛ lɛ: “Osɔi yɛ bui, ŋwɛi loofɔji hu yɛ tsui; shi gbɔmɔbi lɛ bɛ he ni ekɛ eyitso ŋmɛɔ.” (Luka 9:57, 58) Yesu miikɛɛ nuu nɛɛ akɛ kɛ́ ebatsɔ E-sɛɛnyiɛlɔ lɛ ebaatswia shi kɛ tɔlɛ. Nɔ ni enɛ tsɔɔ ji akɛ nuu nɛɛ woɔ ehe nɔ tsɔ fe bɔ ni ebaakpɛlɛ nɛkɛ shihilɛ ni baa shi nɛɛ nɔ. He ni eyaa eyaye jenamɔ lɛ yɛ ni eleee lɛ miigba ejwɛŋmɔ naa waa.
13. Mɛni hewɔ Yesu ha mɔ kroko ni kulɛ ebaanyɛ etsɔ esɛɛnyiɛlɔ lɛ hetoo nakai lɛ?
13 Yesu kɛɛ mɔ kroko hu ni damɔ shi yɛ jɛmɛ lɛ akɛ: “Nyiɛmɔ misɛɛ!” Shi eha Yesu hetoo akɛ: “Ŋmɛɛ mi gbɛ ni mayafu mitsɛ dã.” Kadimɔ hetoo ni Yesu kɛha lɛ lɛ: “Ha ni gbohii afu amɛgbohii, shi bo lɛ yaa ni oyashiɛ Nyɔŋmɔ maŋtsɛyeli lɛ!” (Luka 9:59, 60) Naajiemɔ ni nuu nɛɛ taoɔ lɛ etsɔɔɔ akɛ etsɛ lɛ egbo momo. Eji egbo momo kulɛ, eka shi faŋŋ akɛ ebinuu nɛɛ nyɛŋ eyadamɔ shi yɛ gbɛ toi ebo Yesu sanegbaa toi. Dabida, nɔ ni nuu nɛɛ kɛɛ lɛ tsɔɔ akɛ eetao ni emɛ kɛyashi etsɛ baagbo. Esako ehe ehako Nyɔŋmɔ Maŋtsɛyeli lɛ ni ekɛaaye klɛŋklɛŋ gbɛhe yɛ eshihilɛ mli amrɔ nɔŋŋ lɛ.—Mateo 6:33.
14, 15. (a) Mɛni jeɔ kpo yɛ nɔ ni mɔ ni ji etɛ lɛ bi Yesu lɛ mli? (b) Mɛni wɔbaanyɛ wɔkase kɛjɛ hetoo ni Yesu kɛha nɛkɛ nuu nɛɛ lɛ mli ŋmɛnɛ?
14 Nɔ ni aŋma afɔ shi lɛ wieɔ nuu ni ji etɛ ko he, mɔ ni kɛ ehe ha shi ekɛɛ: “Manyiɛ osɛɛ, Nuŋtsɔ; shi ŋmɛɛ mi gbɛ ni maya mayashɛ mɛi ni yɔɔ miwe lɛ dã.” Nɛkɛ nuu nɛɛ miibi ni akɛ shihilɛi komɛi afata Yesu sɛɛnyiɛlɔ ni eeetsɔ lɛ he aha lɛ. Yɛ enɛ hewɔ lɛ, eetao ni ekɛɛ Yesu akɛ: ‘Naa! Matsɔ osɛɛnyiɛlɔ, shi ja . . . ’ Mɛɛ hetoo Yesu kɛha? “Mɔ ni kɛ enine yamɔɔ tsinakɔi mli ni ekuɔ ekuɛ ekwɛɔ esɛɛ lɛ, esaaa Nyɔŋmɔ maŋtsɛyeli lɛ.” (Luka 9:61, 62) Kɛ́ nuu ni hiɛ tsinakɔi lɛ miitao etsa akofii lɛ trɔmɔɔ yɛ ŋmɔ mli lɛ, esa ni eka he ekwɛ ehiɛ tɛɛ. Kɛ́ etsɔ eyitso ekwɛ esɛɛ lɛ, akofii ni etsaa lɛ baakɔdɔ. Ebaanyɛ egbee shi po! Nakai eyɔɔ yɛ Yesu sɛɛnyiɛlɔi ahe; yɛ amɛgbɛfaŋ lɛ, akɛ amɛaaku amɛkuɛ ni amɛkwɛ nibii agbɛjianɔtoo momo nɛɛ mli nibii lɛ fioo po lɛ tsɔɔ akɛ amɛmitao haomɔ amɛha amɛhe, ni ebaaha amɛtɛrɛ ni amɛdu ‘gbɛ kɛjɛ “gbɛ fintɔŋŋ ni kɛ mɔ yaa naanɔ wala mli’ lɛ nɔ.—Mateo 7:14; kwɛmɔ Luka 17:31-35.
15 Ani onu Yesu tsɛmɔ: “Nyiɛmɔ misɛɛ” lɛ? Te ohereɔ nɔ ohaa tɛŋŋ? Ani ohere nɔ jogbaŋŋ tamɔ ekaselɔi Simon, Andrea, Yakobo, Yohane kɛ Mateo? Ani ofee klalo akɛ okɛ ohe baasha afɔle ni enɛ biɔ lɛ, bɔni afee ni onyiɛ Nuŋtsɔ lɛ nanemaahei asɛɛ tamɔ nɛkɛ hii nɛɛ? Kɛ́ ohetoo lɛ ji hɛɛ lɛ, belɛ obaaná hegbɛ ni ji Nyɔŋmɔ Maŋtsɛyeli lɛ he sanekpakpa ni ashiɛɔ atsɔɔ lɛ mli ŋɔɔmɔ lɛ mli gbɛfaŋ nɔ.
16. Te Yesu saa ekaselɔi lɛ ni amɛfata ehe yɛ sanekpakpa shiɛmɔ lɛ mli eha tɛŋŋ?
16 Dani Yesu aaatsu ekaselɔi lɛ kɛaaya akɛ amɛyashiɛ Maŋtsɛyeli lɛ amɛtsɔɔ lɛ, ekɛ ŋaa tsɔɔ amɛ bɔ ni amɛfee enɛ amɛha lɛ kɛtsɔ nɔkwɛmɔ nɔ ni lɛ diɛŋtsɛ efee lɛ nɔ. Yɛ enɛ sɛɛ lɛ, Yesu tsɔɔ amɛ bɔ ni amɛaafee ni amɛtao gbɔmɛi ni hiɛ gwantɛŋ su lɛ yɛ shikpɔŋkuku fɛɛ shikpɔŋkuku ni akɛaaha amɛ lɛ mli. Anyɛɔ akɛ Yesu gbɛtsɔɔmɔi nɛɛ tsuɔ nii lolo ŋmɛnɛ yɛ afii ohai 20 nɛɛ mli. Nyɛhaa wɔpɛia enɛɛmɛi ateŋ ekomɛi ni aŋmala yɛ Mateo wolo lɛ yitso 10 lɛ amli wɔkwɛa.
Maŋtsɛyeli Shiɛmɔ He Gbɛtsɔɔmɔi
17. Okɛ Maŋtsɛyeli sane lɛ ni ashiɛ yɛ klɛŋklɛŋ afii oha lɛ mli lɛ ato ŋmɛnɛŋmɛnɛ nɔ lɛ he ni akwɛ.
17 Kaselɔi lɛ asane lɛ yitso baafee nɔ ni Yesu jaje etsɔɔ lɛ nɔŋŋ: “Shi ni nyɛyaa nɛɛ, nyɛshiɛa nyɛkɛa akɛ: ‘Ŋwɛi maŋtsɛyeli lɛ eshɛ shi eta.’” (Mateo 10:7) Shi, amrɔ nɛɛ ato nakai Maŋtsɛyeli lɛ ama shi yɛ ŋwɛi. Yehowa Tookwɛlɔ Maŋtsɛ Yesu Kristo miiye maŋtsɛ bianɛ! No hewɔ lɛ, David wiemɔi lɛ eba mli yɛ gbɛ ni da nɔ bianɛ akɛ: “Ŋwɛi anya, ni shikpɔŋ mli afili lɛ, ni akɛɛ yɛ jeŋmaji lɛ ateŋ akɛ: ‘Yehowa miiye maŋtsɛ!’” (1 Kronika 16:31) Ŋmɛnɛ, hegbɛ ni wɔna lɛ jeee nɔ ni wɔkɛ fiɔ Yehowa jeŋ muu fɛɛ maŋtsɛyeli lɛ jajemɔ yɛ gbɛ krɛdɛɛ nɔ lɛ sɛɛ pɛ, shi moŋ, eŋɔɔ wɔnaa akɛ wɔ hu wɔyɛ wala mli yɛ be mli ni abaatsu Yehowa jeŋ muu fɛɛ nɔyeli he sane ni ka shi lɛ he nii shikome nyɔŋlo lɛ.
18. Mɛni nɔ mi Yesu ma eha esɛɛnyiɛlɔi lɛ yɛ Mateo 10:8-10, ni namɛi titri baanyɛ aye enɛ he odase ŋmɛnɛ?
18 Mateo 10:8-10 tsɔɔ su ni mɛi ni tsuɔ shiɛmɔ nitsumɔ nɛɛ hiɛ. Esa ni Nyɔŋmɔ Maŋtsɛyeli lɛ aba klɛŋklɛŋ yɛ amɛshihilɛ mli, ni amɛhiamɔ nibii krokomɛi lɛ aye gbɛhe ni ji enyɔ. Mɛni hewɔ? Yesu kɛɛ: “Nitsulɔ lɛ eŋmaa sa lɛ.” Wɔŋwɛi Tsɛ lɛ baakwɛ mɛi ni kɛ amɛhiɛ fɔɔ enɔ lɛ anɔ yɛ be fɛɛ mli. Ni Yehowa Odasefoi ni ji sɔɔlɔi akpei ohai abɔ ni kɛ amɛbe fɛɛ sɔmɔɔ ŋmɛnɛ lɛ baanyɛ aye anɔkwale nɛɛ he odase.—4 Mose 18:30, 31; 5 Mose 25:4.
19. Te afeɔ tɛŋŋ ataoɔ mɛi ni sa lɛ ŋmɛnɛ, ni yɛ namɔ gbɛtsɔɔmɔ shishi?
19 Yesu kɛ famɔ nɛɛ ha yɛ enɛ sɛɛ akɛ: “Shi maŋ fɛɛ maŋ aloo akrowa fɛɛ akrowa mli ni nyɛaatee lɛ, nyɛbia mɔ ni sa shi yɛ jɛi, nyɛyato jɛi kɛyashi beyinɔ ni nyɛatee.” (Mateo 10:11) Mɔ ni sa mɛni? Mɔ ni hegbɛ ni akɛhereɔ Yehowa tsuji ahiɛmɛɛ kɛ mɔ ni boɔ Nyɔŋmɔ Maŋtsɛyeli he sane lɛ toi sa lɛ. Shi, yɛ nakai be lɛ mli lɛ, ekolɛ kaselɔi lɛ baahi nakai mɔ ni hereɔ amɛ lɛ shia ni amɛjɛ jɛmɛ amɛya shikpɔŋkuku lɛ mli fɛɛ amɛyatao mɛi krokomɛi ni sa hu. Ŋmɛnɛ, Yehowa Odasefoi nyiɛɔ nakai gbɛ ni ajie afɔ shi nɛɛ nɔŋŋ nɔ. Amɛkɛ ŋmlɛtswaai akpekpei abɔ bɔɔ mɔdɛŋ amɛkɛtaoɔ mɛi ni sa lɛ yɛ shikpɔŋkukuji lɛ amli. Kɛkɛ lɛ, beni amɛna amɛ lɛ, Odasefoi lɛ kɛ miishɛɛ babaoo kuɔ sɛɛ amɛyasaraa nɛkɛ shiatsɛmɛi nɛɛ ni amɛgbalaa Nyɔŋmɔ Wiemɔ lɛ mli amɛtsɔɔ amɛ. No hewɔ lɛ, ŋmɛnɛ Yesu kɛ hesaa miikwɛ gbɔmɛi ni tamɔ gwantɛŋi nɛɛ anɔ ni ekɛ amɛ miiba eninejurɔ nɔ yɛ duromɔ mli.—Mateo 25:31-33.
20. Shiabii ni sa lɛ nine shɛɔ toiŋjɔlɛ ni Maŋtsɛyeli shiɛlɔ lɛ biɔ ehaa amɛ lɛ nɔ lɛ mɛɛ gbɛ nɔ?
20 “Kɛ́ nyɛmiibote shia lɛ, nyɛŋaa shiabii lɛ; ni kɛji shia lɛ sa lɛ, nyɛhaa toiŋjɔlɛ ni nyɛsumɔɔ lɛ aba nɔ.” (Mateo 10:12, 13, NW) Bɔ ni aŋaa mɔ yɛ Yesu gbii amli ji akɛ “Toiŋjɔlɛ aba shia nɛɛ.” (Luka 10:5) Ŋwɛi bɔfoi lɛ la yɛ Yesu fɔmɔ lɛ mli amɛkɛɛ: “Anunyam aha Nyɔŋmɔ yɛ Ŋwɛi flooflo, ni hejɔlɛ aba shikpɔŋ lɛ nɔ, ni ana gbɔmɛi ahe tsuijurɔ!” (Luka 2:14) Shiabii ni sa lɛ anine shɛ nɛkɛ toiŋjɔlɛ ni agba afɔ shi nɛɛ nɔ kɛtsɔ Maŋtsɛyeli lɛ he sane lɛ ni kaselɔi lɛ hiɛ lɛ ni amɛkpɛlɛ nɔ lɛ nɔ. Maŋtsɛyeli lɛ he sanekpakpa lɛ tsuɔ nii ni tamɔ nɛkɛ nɔŋŋ ŋmɛnɛ. Enɛ haa toiŋjɔlɛ wekukpaa bakaa gbɔmɛi kɛ Nyɔŋmɔ teŋ kɛtsɔ Yesu Kristo nɔ, ni ekɛ toiŋjɔlɛ baa nanemɛi heyelilɔi ateŋ hu.—2 Korintobii 5:20, 21; Filipibii 4:7; Efesobii 4:3.
21. Mɛni hewɔ 1986 afi ŋmalɛ lɛ sa jogbaŋŋ lɛ?
21 Abaaŋmala 1986 kalanda afi Ŋmalɛ ni ajie kɛjɛ Luka 9:60 lɛ akpɛtɛ shi yɛ Yehowa Odasefoi a-Maŋtsɛyeli Asai fɛɛ nɔ yɛ shikpɔŋ lɛ fɛɛ nɔ akɛ: “Yaa ni oyashiɛ Nyɔŋmɔ maŋtsɛyeli lɛ!” Mɛɛ kaimɔ nɔ fɛfɛo kɛ wiemɔ ni tsirɛɔ mɔ enɛ aaaji aha Nyɔŋmɔ anɔkwa tsuji fɛɛ bɔni afee ni amɛna Nyɔŋmɔ Maŋtsɛyeli shiɛmɔ lɛ mli gbɛfaŋ nɔ yɛ be fɛɛ mli! Hɛɛ, nakai Maŋtsɛyeli lɛ ehi biɛ kɛjɛ 1914! Eji dɛŋdade ni yɔɔ Mesia Maŋtsɛ lɛ dɛŋ koni ekɛjwara Satan jeŋ maŋtsɛyelii lɛ fɛɛ. No hewɔ lɛ, ŋwanejee ko bɛ he akɛ esa akɛ Nyɔŋmɔ Maŋtsɛyeli lɛ afee nɔ ni he hiaa fe fɛɛ yɛ Yehowa Odasefoi lɛ ateŋ mɔ fɛɛ mɔ shihilɛ mli. Wɔle akɛ enɛ ji wɔyiwalaheremɔ kɛha naanɔ wala!—1 Timoteo 4:16.a
[Shishigbɛ niŋmaa]
a Ajie kɛjɛ December 15, 1985 Watchtower lɛ mli.
Te Obaaha Hetoo Oha Tɛŋŋ?
◻ Yehowa maŋtsɛyeli lɛ ma shi daa ni eyɛ shweshweeshwe yɛ mɛɛ gbɛ nɔ?
◻ Mɛɛ jeŋ muu fɛɛ sane ebiɔ ni atsu he nii?
◻ Mɛni esa akɛ Yesu sɛɛnyiɛlɔi fɛɛ asaa amɛhe akɛ amɛaafee?
◻ Mɛni hewɔ wiemɔ “Yehowa miiye maŋtsɛ” lɛ efee nɔ ni shishinumɔ babaoo yɔɔ mii ŋmɛnɛ?
◻ 1986 afi ŋmalɛ lɛ baatsu mɛɛ yiŋtoo he nii?
[Wiemɔ ni akɔ ni akɛmiitsu nii ni yɔɔ baafa 24]
“Bɔɔ nii nɛɛ ahe mɔdɛŋ, okɛ ohe awo mli kwraa, koni mɛi fɛɛ ana oshweremɔ faŋŋ. Ohiɛ ahi ohe nɔ kɛ tsɔɔmɔ lɛ nɔ, hii shi yɛ nii nɛɛ amli; ejaakɛ kɛji ofee enɛ lɛ, ooohere bo diɛŋtsɛ kɛ mɛi ni boɔo toi lɛ fɛɛ yiwala.”—1 Timoteo 4:15, 16.
[Mfoniri ni yɔɔ baafa 21]
Mateo shi nɔ fɛɛ nɔ yɛ esɛɛ ni ebanyiɛ Yesu sɛɛ