Ja Bɔlɔ Lɛ, Jeee Bɔɔ Nii Lɛ

“Yehowa o-Nyɔŋmɔ lɛ oja, ni lɛ pɛ kɛkɛ okɛ sɔɔmɔ krɔŋkrɔŋ aha.”​—LUKA 4:​8, New World Translation

 1. Te atsɔɔ wiemɔ “aja” lɛ mli aha tɛŋŋ, ni te esa akɛ akɛ anɔkwa jamɔ aha tɛŋŋ?

ATSƆƆ wiemɔ “aja” lɛ mli yɛ wiemɔi komekomei ashishitsɔɔmɔ wolo mli yɛ nɛkɛ gbɛ nɔ: “Ni akɛ bulɛ, woo loo hetuu-kɛ-hamɔ kpeteŋkpele, loo nɔ ni fa babaoo po aha.”a Namɔ esa akɛ akɛ jamɔ ni tamɔ nɛkɛ aha lɛ? Yesu Kristo kɛɛ: “Esa ekɛ osumɔ Yehowa o-Nyɔŋmɔ lɛ kɛ otsui muu lɛ fɛɛ kɛ osusuma muu lɛ fɛɛ kɛ ojwɛŋmɔ muu lɛ fɛɛ.” (Mateo 22: 37 New World Translation) Agbɛnɛ hu, beni akɛɛ lɛ akɛ kɛji akɛ efee “ jamɔ nifeemɔ ko” eha Satan lɛ, akɛ je leŋ maŋtsɛyelii lɛ fɛɛ baaha lɛ lɛ, Yesu kpoo, ni ejaje aka “Yehowa o-Nyɔŋmɔ lɛ esa akɛ oja, ni lɛ pɛ kɛkɛ okɛ sɔɔmɔ krɔŋkrɔŋ aha.” (Luka 4:​7, 8, New World Translation.) Ejeɔ kpo faŋŋ yɛ Yesu wiemɔi kɛ enifeemɔi amli akɛ Yehowa Nyɔŋmɔ pɛ esa akɛ aja. Nɔ ni fata nɛkɛ jɛmɔ nɛɛ he ji “sɔɔmɔ krɔŋkrɔŋ,” ejaakɛ “hemɔkɛyeli ni nitsumɔi bɛ he lɛ ji hemɔkɛyeli gbonyo.”​—Yakobo 2:⁠26.

 2. Mɛni hewɔ eja gbɛ akɛ aaaja Bɔlɔ lɛ pɛ lɛ?

² Yehowa jamɔ ni tamɔ nɛkɛ lɛ jɔ ejaakɛ lɛ ji Jeŋ Muu Fɛɛ Maŋtsɛ, ŋwɛi kɛ shikpɔŋ kɛ emli wala-sɔrɔtoi ni yɔɔ naakpɛɛ kɛ gbeyei lɛ fɛɛ a-Bɔlɔ. Yɛ bɔ ni eji nɛɛ hewɔ lɛ, lɛ pɛ ji mɔ ni esa akɛ adesai kɛ “bulɛ, woo, loo hetuu-kɛ-hamɔ babaoo ni fa kɛtekeɔ nɔ haa. Bibliai lɛ kɛɔ akɛ: “Nuŋtsɔ [Yehowa] bo ji mɔ ni sa akɛ oŋɔ anunyam kɛ agbojee kɛ hewalɛ lɛ, ejaakɛ bo obɔ nii fɛɛ, ni osuɔmɔ naa amɛyɔɔ ni abɔ amɛ.” (Kpojiemɔ 4:11) Yɛ anɔkwale mli lɛ, adesa folo ko bɛ bɔɔ nɔ ni yɔɔ wala loo nɔ ni bɛ wala ko bɛ ni “bulɛ, woo loo hetuu-kɛhamɔ” ni tamɔ nɛkɛ sa lɛ. Yehowa pɛ ji mɔ ni sa akɛ akɛ “hetuu-kɛ-hamɔ haa ekome too.”​—2 Mose 20:​3-6, New World Translation.

Hehiamɔ Krɛdɛɛ

 3. Mɛni hewɔ hiamɔ krɛdɛɛ ko yɔɔ kɛha wɔ akɛ wɔɔja Nyɔŋmɔ lɛ?

³ Akɛni kojomɔ be mli wɔyɔɔ hewɔ lɛ, hehiamɔ krɛdɛɛ ko yɛ Nyɔŋmɔ ni wɔɔja lɛ yɛ gbɛ ni ja nɔ lɛ he. Aakpɛ mli yɛ naanɔ shihilɛi ahe. Nyɔŋmɔ gbalɛ Wiemɔ lɛ kɛɔ wɔ akɛ Kristo Yesu eba eŋwɛi anunyam mli “ni ebɔfoi lɛ fɛɛ fata ehe,” yɛ nibii agbɛjianɔtoo nɛɛ “naagbee gbii” nɛɛ amli. Kɛha mɛɛ yiŋtoo? Yesu diɛŋtsɛ gba nakai yiŋtoo lɛ, akɛ: “Ni aaabua jeŋmaji lɛ fɛɛ naa yɛ ehiɛ, ni eeegbala amɛ mli, taakɛ bɔ ni tookwɛlɔ gbalaa gwaŋtɛŋi kɛ abotiai amli lɛ.” Gwaŋtɛŋi lɛ baaya “naanɔ wala mli.” Abotiai lɛ baaya “naanɔ hiɛkpatamɔ mli.”​—2 Timoteo 3:​1-5; Mateo 25:​31, 32, 46, New World Translation.

 4. (a) Mɛɛ gbɛ nɔ Paulo tsɔɔ ehaa ayɔseɔ mɛi ni abaakpata amɛhiɛ kwraa yɛ je nɛŋ naagbee lɛ? (b) Mɛɛ su mɛi ni baana naanɔ wala lɛ jieɔ lɛ kpo amɛtsɔɔ?

⁴ Bɔfo Paulo ŋma yɛ “be ni aaajie Nuŋtsɔ Yesu kpo kɛaajɛ ŋwɛi kɛ ehewalɛ bɔfoi lɛ, mɔ ni kɛ lalilɛi aaatɔ owele yɛ mɛi ni leee Nyɔŋmɔ kɛ mɛi ni booo wɔ-Nuŋtsɔ Yesu Kristo sanekpakpa lɛ toi lɛ anɔ lɛ, mɛi ni aaana nyɔmɔwoo ni ji naanɔ hiɛkpatamɔ kɛaajɛ Nuŋtsɔ lɛ hiɛ kɛ ehewalɛ anunyam lɛ he” lɛ he. (2 Tesalonikabii 1:​7-9) No hewɔ lɛ, naanɔ hiɛkpatamɔ ji gbɔmɛi kuɛŋtilɔi ni tamɔ abotiai ni sumɔɔɔ ni amɛleɔ Nyɔŋmɔ yiŋtoi loo amɛkpooɔ akɛ amɛaafee he nɔ ko yɛ be mli ni akɛ hegbɛ lɛ eha amɛ lɛ anaagbee. Shi “naanɔ wala” ji heshibalɔi lɛ, gbɔmɛi ni tamɔ gwaŋtɛŋi ni miisumɔ ni amɛle Yehowa he nɔ ko, ni boɔ efamɔi atoi, ni baa amɛhe shi amɛhaa esuɔmɔnaa nifeemɔ lɛ anaagbee. Biblia lɛ kɛɔ akɛ: “Ni je lɛ hoɔ eyaa kɛ emli sɛɛdii nii lɛ; shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.”​—1 Yohane 2:​17; kwɛmɔ 2 Petro 2:12 hu.

 5, 6. (a) Mɛni esa akɛ mɔ ko afee koni ena anɔkwale ni kɔɔ Yehowa kɛ eyiŋtoi ahe lɛ? (b) Mɛni hewɔ wɔyɔɔ hekɛnɔfɔɔ akɛ mɛi ni taoɔ anɔkwale lɛ baana anɔkwale lɛ ni shihilɛ mli ni amɛyɔɔ lɛ kɔɔɔ he eko lɛ?

⁵ Gbɔmɛi ni tamɔ gwaŋtɛŋi lɛ miisumɔ ni amɛkɛ amɛbe, hewalɛ, kɛ heloo gbɛfaŋ nibii asha afɔle ni amɛkɛtao anɔkwale lɛ. Amɛfeɔ nɔ ni Abɛi 2:​1-5 kɛɔ lɛ: “Mibi, kɛ omɔ miwiemɔi lɛ amli, ni okɛ mikitai lɛ to omasɛi, koni oba otoi shi oha nilee, ni okɛ otsui ha sanesɛɛkɔmɔ; hɛɛ, kɛ obolɔ otsɛ sɛɛyoomɔ, ni owo ogbee nɔ oha sane shishinumɔ, kɛji otao esɛɛgbɛ tamɔ jwiɛtɛi, ni otao tamɔ jwetrii ni aŋɔtee lɛ: No dani ooonu Yehowa gbeyeishemɔ shishi, ni ooona Nyɔŋmɔ he nilee.”

⁶ Suɔmɔ ni ayɔɔ akɛ aaatao Yehowa sɛɛ gbɛ lɛ ji nɔ ni gbalaa gbɔmɛi ni tamɔ gwaŋtɛŋi lɛ kɛjɛɔ mɛi ni tamɔ abotiai lɛ ahe. “Kɛji oootao lɛ lɛ, eeeha ona lɛ; shi kɛji okwa lɛ lɛ, eeeshɛo efɔ kɛya naanɔ.” (1 Kronika 28:⁠9) No hewɔ lɛ, bɔ fɛɛ bɔ ni weku loo maŋ nɔ ni mɔ ko jɛ nɔ lɛ ji, bɔ fɛɛ bɔ ni ewoloŋlee ji, kɛji akɛ eji niiatsɛ loo ohiafo lɛ, kɛji akɛ ekɛ anɔkwayeli tao anɔkwalei ni kɔɔ Nyɔŋmɔ he lɛ, ebaana. Kristo kɛ ebɔfoi lɛ baajɛ amɛŋwɛi gbɛhe lɛ ni amɛkwɛ ni mɔ ni taoɔ enɛ lɛ abale anɔkwale lɛ, ni he ni gbɔmɔ lɛ yɔɔ lɛ kɔɔɔ he eko. Mɛɛ nyɔmɔwoo yɔɔ nakai taomɔ lɛ mli? Yesu kɛɛ: “Enɛ ji naanɔ wala lɛ, akɛ amɛaana bo anɔkwa Nyɔŋmɔ kome pɛ lɛ kɛ mɔ ni otsu lɛ lɛ, Yesu Kristo, he nilee.”​—Yohane 17:​3, New World Translation; kwɛmɔ Ezekiel 9:4 hu.

Bɔɔ Nɔ Jamɔ ni Aaakwa

 7, 8. (a) Mɛɛ oshara yɔɔ yɛ adesai ni aaaja amɛ lɛ mli? (b) Tsɔɔmɔ “bulɛ, woo loo hetuu-kɛ-hamɔ ni tekeɔ nɔ” ni akɛhaa Maria lɛ mli.

⁷ Mɛi pii yɛ shikpɔŋ lɛ nɔ he fɛɛ he ni buɔ adesai​—mɛi ni yɔɔ wala mli loo amɛgboi ​—akɛ mɛi ni sa “bulɛ, woo loo hetuu-kɛhamɔ babaoo ni tekeɔ nɔ.” Yɛ be mli ni amɛbaanyɛ amɛnu he akɛ enɛ ji jamɔ ni amɛkɛhaa Nyɔŋmɔ lɛ fa lɛ, egbalaa amɛ kɛjɛɔ anɔkwa jamɔ he diɛŋtsɛ. Enɛ gbeleɔ gbɛ kɛhaa amɛ koni amɛhe tsɔɔmɔi amɛye ni amɛkɛ amɛhe awo nifeemɔi ni teɔ shi woɔ Nyɔŋmɔ suɔmɔnaa nii lɛ mli. Nɔkwɛmɔ nɔ ko ni ekaaa ji gbɛ ni gbɔmɛi akpekpei abɔ ni yɔɔ Roma Katolek kɛ Eastern Orthodox Katolek shikpɔji lɛ anɔ lɛ buɔ Maria ni ji Yesu nyɛ lɛ.

⁸ Amɛkulaa shi amɛhaa amagai kɛ Maria he amagai yɛ jamɔ su mli, ni yɛ sɔlemɔ lɛ tsɔɔmɔi amli lɛ, atsɛɔ lɛ akɛ “Maria Obalayoo Foro Theotokos.” Wiemɔ the·o·toʹkos lɛ shishi ji “mɔ ni ŋɔɔ Nyɔŋmɔ hɔ” loo “Nyɔŋmɔ nyɛ.” New Catholic Encyclopedia lɛ kɛɔ akɛ: “Maria ji Nyɔŋmɔ nyɛ. . . . Kɛji akɛ Maria jeee Nyɔŋmɔ nyɛ lɛlɛŋ lɛ, belɛ Kristo jeee Nyɔŋmɔ diɛŋtsɛ lɛ kɛ agbɛnɛ gbɔmɔ diɛŋtsɛ hu.” No hewɔ lɛ, ákɛ amɛ Triniti tsɔɔmɔ lɛ fa lɛ, nɛkɛ jamɔi nɛɛ tsɔɔ akɛ Yesu ji Nyɔŋmɔ Ofe lɛ ni eba yɛ adesa su mli, ni enɛ feɔ Maria “Nyɔŋmɔ nyɛ.” Jɛɛhe nɛɛ nɔŋŋ kɛfataa he akɛ nɔ ni fata he ni atuɔ ahaa Maria lɛ he ji: “(1) bulɛ ni mli kwɔ loo woo ni akpɛlɛɔ nɔ akɛ esa Obalayoo Foro krɔŋkrɔŋ Nyɔŋmɔ Nyɛ lɛ agbojee; (2) ni aaatsɛ lɛ kɛha yelikɛbuamɔ, aloo aaatsɛ wɔ Awura lɛ koni ebadamɔ mli akɛ nyɛ kɛ maŋnyɛ; . . . ni akɛ sɔlemɔ [aha Maria] yɛ teemɔŋ.”

 9. Ani Biblia lɛ tsɔɔ akɛ Maria ji “Nyɔŋmɔ nyɛ”?

⁹ Shi, wiemɔ the·o·toʹkos lɛ pueee yɛ Ŋmalɛi ni jɛ mumɔŋ lɛ mli. Ehe ko he ko bɛ ni Biblia lɛ kɛɔ yɛ akɛ Maria ji “Nyɔŋmɔ nyɛ.” Yesu etsɔɔɔ enɛ, ni asaŋ klɛŋklɛŋ afii oha lɛ mli Kristofoi lɛ efeee nakai. Kɛfata he lɛ, Biblia lɛ tsɔɔ yɛ faŋŋ mli akɛ Yesu jeee Nyɔŋmɔ Ofe ni eba yɛ adesa su mli shi moŋ eji Nyɔŋmɔ Bi.b Beni bɔfo ko kɛɛ Maria akɛ ebaafɔ bi lɛ, akɛɛ lɛ akɛ: “Mumɔ krɔŋkrɔŋ aaaba onɔ, ni Ŋwɛinyo lɛ hewalɛ aaabaha onɔ, no hewɔ lɛ nakai bi krɔŋkrɔŋ lɛ hu ni ooofɔ lɛ, aaatsɛ lɛ Nyɔŋmɔ Bi.” (Luka 1:35) No hewɔ lɛ Yesu ji Nyɔŋmɔ Bi, jeee Nyɔŋmɔ diɛŋtsɛ yɛ adesa su mli. No hewɔ lɛ, Maria ji Nyɔŋmɔ bi Yesu nyɛ, jeee Nyɔŋmɔ ni eba yɛ adesa su mli nyɛ. No hewɔ ni Yesu loo ekaselɔi lɛ tsɛɛɛ Maria akɛ “Nyɔŋmɔ nyɛ” gbi ko gbi ko lɛ.

10, 11. (a) Mɛɛ nɔkwɛmɔ nii tsɔɔ bɔ ni Yesu buɔ enyɛ lɛ? (b) Te bɔfoi lɛ kɛ Yesu kaselɔi lɛ bu enyɛ tɛŋŋ?

¹⁰ Gbɛ ni Yesu tsɔ nɔ esusu enyɛ he lɛ tsɔɔ egbɛhe ni akɛtoɔ nii ahe loo husu yɔɔ mli. Yɛ yookpeemɔ okpɔlɔŋmɛɛ ko shishi yɛ Kana lɛ, Biblia lɛ kɛɔ wɔ yɛ jɛmɛ akɛ: “Ni beni wein lɛ shɛɛɛ lɛ. Yesu nyɛ kɛɛ lɛ akɛ: Amɛbɛ wein. Yesu kɛɛ lɛ akɛ: Mɛɛ sane mikɛo yɔɔ, Awo?” Biblia lɛ ni ji Roman Catholic Douay Version lɛ kaneɔ nɛkɛ: “Yoo, mɛni ji nɔ ni enɛ kɔɔ yɛ mi kɛ ohe?” (Yohane 2:​3, 4) Yɛ be kroko mli lɛ, mɔ ko kɛɛ lɛ akɛ: “Miishɛɛ ji musu ni hiɛo kɛ fufɔ ni oye lɛ!” Enɛ ji hegbɛ fɛfɛo ni Yesu ena ni ekɛ woo krɛdɛɛ aaaha enyɛ ni ekɛtsɔɔ akɛ esa akɛ mɛi krokomɛi hu afee nakai nɔŋŋ. Shi moŋ, Yesu kɛɛ: “Eyɛ mli moŋ, shi miishɛɛ ji mɛi ni nuɔ Nyɔŋmɔ wiemɔ lɛ ni amɛyeɔ nɔ lɛ!”​—Luka 11:​27, 28, New World Translation.

¹¹ Nɛkɛ wiemɔi nɛɛ tsɔɔ akɛ Yesu kwɛ jogbaŋŋ koni ekɛ hetuu-kɛ-hamɔ loo woo ko ni esaaa akaha Maria loo ni ekɛ sabala krɛdɛɛ ko baaha lɛ. Eŋmɛɛɛ gbɛ ni wekukpaa ni ka amɛteŋ lɛ ana enɔ hewalɛ. Ni bɔfoi lɛ kɛ kaselɔi lɛ nyiɛ enɔkwɛmɔ nɔ lɛ sɛɛ, ejaakɛ he ko he ko bɛ yɛ amɛniŋmaai ni jɛ mumɔŋ lɛ mli ni akɛ woo, sabala, loo hegbɛ ko ni esaaa miiha Maria. Yɛ be mli ni amɛkɛ bulɛ ha lɛ akɛ Yesu nyɛ lɛ, amɛtekeee enɛ. Eka shi faŋŋ akɛ amɛwieee ehe akɛ “Nyɔŋmɔ nyɛ.” Amɛle akɛ Yesu jeee Nyɔŋmɔ Ofe ni eba yɛ adesa su mli, ni yɛ enɛ hewɔ lɛ, Maria hu nyɛŋ afee Nyɔŋmɔ nyɛ, gbɛhe ko ni da fe nɔ ni Nyɔŋmɔ Wiemɔ lɛ ŋmɛɔ gbɛ kɛhaa Maria lɛ.

Nyɛ-Nyɔŋmɔyoo Jamɔ Lɛ

12. Nɛgbɛ ni mɛɛ be jwɛŋmɔ lɛ je kpo akɛ Maria ji “Nyɔŋmɔ nyɛ?

¹² Belɛ nɛgbɛ ji he ni nɛkɛ jwɛŋmɔ nɛɛ je shishi kɛjɛ? Ebote Kristendom ni ekwa hemɔkɛyeli lɛ mli fiofio yɛ afii ohai etɛ kɛ ejwɛ yɛ wɔ Ŋmɛnɛŋmɛnɛ Be nɛɛ mli. Enɛ ji anɔkwale titri lɛ yɛ afi 325 Ŋ.B. sɛɛ, beni Nikaea gwabɔɔ lɛ kpɛlɛ tsɔɔmɔ ni jɛɛɛ ŋmalɛ mli akɛ Kristo kɛ Nyɔŋmɔ yeɔ egbɔ lɛ nɔ lɛ. Beni akpɛlɛ nakai jwɛŋmɔ ni ejaaa lɛ nɔ pɛ kɛkɛ ni ebafee mlɛo akɛ aaatsɔɔ akɛ Maria ji “Nyɔŋmɔ nyɛ.” The Encyclopedia Britannica lɛ wie enɛ he akɛ: “Sabala [‘Nyɔŋmɔ nyɛ’] lɛ tamɔ nɔ ni eba akɛ nɔ ko ni akɛmiitsu hetuu-kɛ-hamɔ he nii, ekolɛ yɛ Alexandria, yɛ afii ohai 3 kɛ 4 lɛ mli be ko . . . Beni shɛɔ afii ohai 4 lɛ naagbee lɛ, Theotokos lɛ ebahe shi yɛ omanyeyeli mli yɛ sɔlemɔ lɛ fai sɔrɔtoi amli.” New Catholic Encyclopedia lɛ kadi akɛ sɔlemɔ lɛ kpɛlɛ tsɔɔmɔ lɛ nɔ “kɛjɛ Efeso Gwabɔɔ yɛ afi 431 lɛ mli.”

13. Mɛni ji nɔ ni eka shi faŋŋ akɛ ena Efeso Gwabɔɔ ni tee nɔ yɛ 431 Ŋ.B. lɛ nɔ hewalɛ ni no ha amɛjaje akɛ Maria ji “Nyɔŋmɔ nyɛ” lɛ?

¹³ Nɔ ni yɔɔ miishɛɛ ji he ni nakai gwabɔɔ lɛ kpe yɛ kɛ nɔ hewɔ. Wolo ni ji The Cult of the Mother-Goddess ni E. O. James ŋma lɛ jaje akɛ: “Efeso Gwabɔɔ lɛ kpe yɛ Theotokos asa lɛ nɔ yɛ afi 431. Jɛmɛ, yɛ maŋ ni ehe gbɛi yɛ ehe ni etuu eha Artemi, loo Diana taakɛ Romabii lɛ tsɛɔ lɛ lɛ mli, yɛ he ni akɛɛ emaga ko jɛ ŋwɛi ebagbee shi yɛ lɛ, yɛ sɔlemɔ tsu ni ajɔɔ nɔ aha Magna Mater [Nyɛ Kpeteŋkpele] kɛjɛ afi 330 B.C. (Dani Kristo Ba) , ni taakɛ blema sane tsɔɔ lɛ jɛmɛ ji Maria shia lɛ hewɔ lɛ, he ko he ko bɛ ni abaanyɛ afi sabala ‘mɔ ni ŋɔ Nyɔŋmɔ hɔ’ lɛ sɛɛ yɛ fe biɛ.”

14. Yinɔsane maa nɔ mi akɛ tsɔɔmɔ nɛɛ jɛ wɔŋjamɔ mli yɛ mɛɛ gbɛ nɔ?

¹⁴ No hewɔ lɛ taakɛ Triniti lɛ ji lɛ, “Nyɔŋmɔ nyɛ” tsɔɔmɔ lɛ ji wɔŋjalɔi atsɔɔmɔ ni aha hiɛ akɛmiifo shi akɛ Kristofoi ahemɔkɛyeli. Ehe gbɛi yɛ wɔŋjalɔi ajamɔi amli afii ohai abɔ dani Kristo ba. The New Encyclopædia lɛ jajeɔ yɛ yitso “nyɛ nyɔŋmɔyoo” lɛ shishi akɛ: “Yei nyɔŋmɔi sɔrɔtoi lɛ eko fɛɛ eko kɛ yei ahe nibii, fɔmɔ, shweremɔ, bɔlɛnamɔ, tsɔsemɔ kɛ dalɛ shibɔlemɔ. Akɛ wiemɔ lɛ hu eto nibii sɔrɔtoi babaoo he tamɔ nɔ ni akɛɛ atsɛɔ lɛ Stone Age Venuses lɛ kɛ Obalayoo Foro Maria he. . . . Hiŋmɛigbelemɔ loo blema saji ko bɛ ni kɛ yei ahe okadii ni tsɔɔ amɛ nyɔŋmɔi tsuko nii. . . . Yoo nɛɛ ji ŋwɛi bi lɛ hebulɔ kɛ mɔ ni lɛɔ lɛ, ni kɛ akpa mli lɛ, kɛha adesai fɛɛ.” No hewɔ lɛ, Katolek osɔfo Andrew Greely kɛɔ yɛ ewolo The Making of the Popes 1978 lɛ mli akɛ: “Maria Okadi lɛ gbalaa loo etsaa Kristojamɔ nɔ tɛɛ kɛyaa blema [wɔŋjamɔ] nyɛ nyɔŋmɔiyei ajamɔ lɛ mli.”

Jamɔ ni Esaaa

15. (a) Mɛni ba yɛ Kristendom yɛ Maria he? (b) Taakɛ Biblia lɛ tsɔɔ lɛ, namɔ pɛ baanyɛ akpa Nyɔŋmɔ fai aha wɔ?

¹⁵ Ni aaakɛɛ akɛ Maria ji “Nyɔŋmɔ nyɛ” lɛ woɔ enɔ kɛyaa gbɛhe ko ni baaha adesai aja lɛ lɛ mli, ni no ji nɔ ni eba afii ohai abɔ. Gbɔmɛi akpekpei ohai abɔ ni yɔɔ shikpɔji babaoo nɔ lɛ esɔle kɛha lɛ loo kɛtsɔ enɔ ni amɛkɛ jamɔ mli hetuu-kɛ-hamɔ eha emagai loo ejamɔ he nibii. Yɛ be mli ni Nyɔŋmɔ jamɔ he nilelɔi baanyɛ abɔ mɔdɛŋ ni amɛjie amɛnaa yɛ enɛ he kɛtsɔ kɛɛmɔ ni amɛaakɛɛ akɛ woo ni akɛhaa Maria lɛ jeee gbɛ ni yɔɔ tɛɛ nɔ ni atsɔɔ ajaa Nyɔŋmɔ lɛ, kɛlɛ jeee bɔ ni Nyɔŋmɔ susuɔ he nɛ. “Nyɔŋmɔ kome yɔɔ, kɛ Nyɔŋmɔ kɛ gbɔmɛi ateŋdamɔlɔ kome hu ni ji gbɔmɔ Kristo Yesu lɛ.” (1 Timoteo 2:5; 1 Yohane 2:​1, 2)) Yesu diɛŋtsɛ kɛɛ: “Mi nɔŋŋ ji gbɛ lɛ kɛ anɔkwale lɛ kɛ wala lɛ; mɔ ko baaa Tsɛ lɛ ŋɔɔ, akɛ ja etsɔ mi nɔ.”​—Yohane 14:⁠6.

16. Yɛ mɛɛ gbɛ nɔ Petro kɛ Yohane fɛɛ fee lɛ faŋŋ akɛ Yehowa pɛ ji mɔ ni esa akɛ aja lɛ?

¹⁶ Hetuu-kɛ-hamɔ ni akɛaaha Maria tɛɛ aloo yɛ gbɛ kroko nɔ, ni aaasɔle aha lɛ, ni aaakula shi aha emagai kɛ ejamɔ he nibii krokomɛi lɛ ji bɔɔ nɔ lɛ jamɔ moŋ fe Bɔlɔ lɛ. Eji wɔŋjamɔ, ni afaa Kristofoi akɛ “nyɛjoa wɔŋjamɔ naa foi.” (1 Korintobii 10:14) Beni jeŋmaŋnyo Kornelio kɛ woo kula shi eha bɔfo Petro lɛ, kadimɔ nɔ ni ba nɛɛ: “Beni Petro boteɔ shia lɛ, Kornelio kɛ lɛ bakpe, ni eho egbee shi yɛ enajianaa ni eja lɛ. Shi Petro wo enɔ, ni ekɛɛ: Tee shi, shi mi hu gbɔmɔ ji mi.” (Bɔfoi lɛ Asaji 10: 25, 26) Ni aaakula shi yɛ jamɔ mli aha adesa ko lɛ ejaaa, ni Petro ekpɛlɛɛɛ enɛ nɔ. Agbɛnɛ hu, yɛ be mli ni bɔfo Yohane nine eshɛ ninaa ko nɔ kɛjɛ bɔfo ko ŋɔɔ lɛ, ebɔ amaniɛ akɛ: “Miho mibu shi ni mija yɛ bɔfo lɛ ni tsɔɔ mi nii nɛɛ lɛ anajianaa. Ni ekɛɛ mi akɛ: Kaakwɛ ni ofee! Ejaakɛ onaanyo tsulɔ kɛ onyɛmimɛi kɛ gbalɔi kɛ mɛi ni toɔ nɛkɛ wolo nɛɛ mli wiemɔi lɛ ateŋ mɔ ko ji mi; Nyɔŋmɔ moŋ oja.” (Kpojiemɔ 22:​8, 9) Kɛji akɛ esaaa akɛ ajaa Nyɔŋmɔ bɔfo po lɛ, kwɛ bɔ ni adesai kɛ amɛhe amagai esaŋ jamɔ ko kwraa.

17. Mɛni ji nɔ ni Katolek ensaiklopedia ko kpɛlɛɔ nɔ akɛ ebaanyɛ ejɛ Maria ni aaaja lɛ lɛ mli aba?

¹⁷ The Catholic Encyclopedia lɛ kpɛlɛ nɔ akɛ nɔ ni baajɛ hetuu kɛ Maria hamɔ nɛɛ mli aba ji jamɔ ni ejaaa gbɛ lɛ. Wolo nɛɛ mra mli nɔ ni akala lɛ jaje akɛ: “Akɛ nakai hetuu-kɛ-hamɔ ni ehe gbɛi ni akɛhaa Obalayoo Foro ni Ajɔɔ Lɛ lɛ ji nɔ ni yɛ be babaoo mli lɛ afeɔ kɛtekeɔ nɔ ni nibii ni ehii hu jɛɔ mli baa lɛ, eji nii ni anyɛŋ aje he ŋwane.”

18. Mɛɛ jɛɛhe tsɔɔmɔ ni jɛɛɛ ŋmalɛ mli nɛɛ baanyɛ ajɛ kɛba?

¹⁸ Mɛɛ jɛɛhe tsɔɔmɔ ni jɛɛɛ ŋmalɛ mli nɛɛ baanyɛ aba kɛjɛ? Jɛɛhe ni hɔ shishi lɛ ji Nyɔŋmɔ Henyɛlɔ, Satan Abonsam. (Yohane 8:44) Mɛni hewɔ sa akɛ eha tsɔɔmɔ ni tamɔ nɛkɛ ashwere? Bɔni afee ni egbe Jeŋ Muu Fɛɛ Nuŋtsɔ Yehowa he guɔ ni eba lɛ shi, koni ewo adesai anɔ, ni eha yiŋfutumɔ aba. Egbalaa gbɔmɛi kɛjɛɔ anɔkwa jamɔ he ni ehaa amɛkɛ amɛhiɛ fɔɔ bɔɔ nɔ jamɔ nɔ kɛha yiwalaheremɔ. Eha hewalɛ ni osɔfoi lɛ naa yɛ gbɔmɛi foji lɛ anɔ lɛ mli bawa afii ohai babaoo, ejaakɛ amɛtsɔɔ gbɔmɛi foji nɛɛ akɛ esa akɛ amɛba amɛhe shi kwraa ni amɛsɔmɔ amɛjamɔ mli hiɛnyiɛlɔi lɛ ejaakɛ osɔfoi lɛ pɛ ji mɛi ni yɔɔ Nyɔŋmɔ he nilee ni yɔɔ hwanyaŋŋ nɛɛ he nilee diɛŋtsɛ.

19, 20. (a) Mɛni hewɔ wɔbaanyɛ wɔna nɔmimaa akɛ gbɔmɛi ni tamɔ gwaŋtɛŋi lɛ baana anɔkwale lɛ dani atsu Nyɔŋmɔ kojomɔi ahe nii lɛ? (b) Mɛɛ saji abaaha hetoo yɛ nikasemɔ ni nyiɛ sɛɛ lɛ mli?

¹⁹ Shi, Yesu gba fɔ shi akɛ: “Ni aaashiɛ Maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ baaba.” (Mateo 24:14) Ni Yehowa wo shi akɛ ebaabua gbɔmɛi ni tamɔ gwaŋtɛŋi lɛ fɛɛ anaa kɛtsɔ nakai Maŋtsɛyeli shiɛmɔ lɛ nɔ, koni ‘etsɔɔ amɛ egbɛi lɛ ni amɛnyiɛ yɛ etempɔŋi lɛ anɔ.’ (Yesaia 2:​2-4) Akɛni abua amɛnaa kɛtee Yehowa jamɔ krɔŋŋ lɛ he hewɔ lɛ, Yesu wie yɛ amɛhe akɛ: “Nyɛaale anɔkwale lɛ, ni anɔkwale lɛ aaaha nyɛye nyɛhe.” (Yohane 8:32) No hewɔ lɛ mɛi ni taoɔ anɔkwale lɛ baana ni amɛbaaye amɛhe kɛjɛ apasa jamɔ mli tsɔɔmɔi ni tsiɔ gbɔmɛi lɛ anaa kɛjɛɔ Bɔlɔ lɛ suɔmɔnaa nifeemɔ he lɛ he.

²⁰ Jamɔ mli tsɔɔmɔi krokomɛi kɛ nifeemɔi ni egbala gbɔmɛi lɛ kɛjɛ Bɔlɔ lɛ anɔkwa jamɔ he lɛ yɛ ni gbɔmɛi foji lɛ ekpɛlɛ nɔ, ni eha amɛkɛ hetuu-kɛ-hamɔ eha bɔɔ nii lɛ. Mɛni ji enɛɛmɛi ateŋ ekomɛi, ni mɛni ejɛ mli eba? Anɔkwa jamɔ kɔɔ mɛni he? Nikasemɔ ni nyiɛ sɛɛ lɛ baapɛi nɛkɛ sanebimɔi nɛɛ amli.

[Shishigbɛ niŋmai]

◻ Mɛɛ gbɛ nɔ Yesu tsɔ efee lɛ faŋŋ akɛ Yehowa pɛ ji mɔ ni esa akɛ aja lɛ?

◻ Mɛni hewɔ hehiamɔ krɛdɛɛ yɔɔ jamɔ ni aaaja yɛ gbɛ ni ja nɔ lɛ he bianɛ lɛ?

◻ Mɛni hewɔ esaaa akɛ akɛ woo ni esaaa haa Maria lɛ?

◻ Nɛgbɛ ji he ni jwɛŋmɔ ni ana akɛ Maria ji “Nyɔŋmɔ nyɛ” lɛ ba kɛjɛ?

◻ Yɛ mɛɛ gbɛ nɔ bɔfo Petro kɛ Yohane ma nɔ mi akɛ Yehowa pɛ ji mɔ ni esa akɛ aja lɛ?

[Nikasemɔ lɛ he Sanebimɔi]