“Hejɔlɛ Nyɔŋmɔ lɛ” Jwɛŋɔ Nɔ̃nalɔi Ahe

BIBLIA lɛ feɔ lɛ faŋŋ akɛ, David ni hi shi yɛ blema lɛ jeee mɔ ni leee nɔ̃naa. Ehi shi akɛ kobɔfo afii pii, ni maŋtsɛ yiwalɔ ni kuɛŋ ti, ni etswa efai shi akɛ ebaagbe lɛ miitiu lɛ ni ejeee esɛɛ. David tée ehe yɛ hei ni yɔɔ banee yɛ enɔ̃naa be nɛɛ mli. Shi efee nɔ ko kɛfata he. Ekɛ anɔkwayeli sɔle eha Yehowa yɛ emanehulu lɛ he. Eŋma yɛ sɛɛ mli kɛkɔ epiŋmɔ lɛ he akɛ: “Mikɛ migbee bolɔɔ mitsɛɔ Yehowa; mikɛ migbee kpaa Yehowa fai. Mifɔseɔ mikɔmɔyeli mishwieɔ ehiɛ, mijajeɔ mihaomɔ lɛ yɛ ehiɛ.”—Lala 142:2, 3.

Ŋmɛnɛ, mɛi komɛi baanyɛ aye David he ni ekɛfɔ Nyɔŋmɔ nɔ lɛ he fɛo. Amɛbaakɛɛ akɛ sɔlemɔ ji jwɛŋmɔŋ nifeemɔ ko ni hãa mɔ naa jwɛŋmɔŋ toiŋjɔlɛ, ni ákɛ eji be fitemɔ kɛ akɛaatsu nii diɛŋtsɛ. Ni kɛlɛ, hekɛnɔfɔɔ ni David yɔɔ yɛ Nyɔŋmɔ mli lɛ efeee efolo, ejaakɛ yɛ naagbee lɛ aye ehenyɛlɔi lɛ anɔ kunim. Beni David kwɛɔ eniiashikpamɔ ni eho lɛ, eŋma akɛ: “Nɔ̃nalɔ lɛ bolɔ, ni Yehowa bo toi, ni ehere lɛ kɛjɛ efimɔi fɛɛ mli.” (Lala 34:7) Atsɛɔ anɔkwa Nyɔŋmɔ lɛ ni David tsɔ̃ ehe kɛtee eŋɔɔ lɛ yɛ he kroko akɛ “hejɔlɛ Nyɔŋmɔ.” (Filipibii 4:9; Hebribii 13:20) Ani ekɛ hejɔlɛ kɛmiijɛ nɔ̃naa mli baaba koni wɔna toiŋjɔlɛ?

Yehowa Jwɛŋɔ Ohe

Yehowa jeee mɔ ni ewebii amanehului jeee ehe sane ko. (Lala 34:16) Jeee akɛ efee toi kɛha etsuji akɛ kuu lɛ ahiamɔ nii pɛ kɛkɛ, shi aŋkroaŋkro fɛɛ ni sheɔ lɛ gbeyei. Beni Salomo jɔɔ blema Yerusalem sɔlemɔtsu lɛ nɔ lɛ, ekpa Yehowa fai koni ebo “sɔlemɔ fɛɛ sɔlemɔ kɛ faikpamɔ fɛɛ faikpamɔ ni mɔ ko loo omaŋ Israel fɛɛ aaakpa lɛ, kɛ amɛteŋ mɔ fɛɛ mɔ le lɛ diɛŋtsɛ ehaomɔ kɛ emanehulu ni ebagbɛ enijiaŋ etsɔɔ nɛkɛ shia nɛɛ lɛ” toi. (2 Kronika 6:29; wɔma efã ko nɔ mi.) Taakɛ Salomo kpɛlɛ nɔ lɛ, aŋkro fɛɛ aŋkro yɛ lɛ diɛŋtsɛ enɔ̃naa ni yɔɔ sɔrɔto ni gbaa enaa. Mɔ ko yɛ ni enɔ̃ baanyɛ afee gbɔmɔtsoŋ hela. Kɛha mɔ kroko lɛ, enɔ̃ ji henumɔŋ nɔnyɛɛ. Ekolɛ mɛi komɛi baahao yɛ suɔlɔ ko gbele hewɔ. Nitsumɔ ni anaaa, shika helɛtemɔ mli naagbai, kɛ weku mli haomɔi hu ji nɛkɛ bei ni mli wawai nɛɛ amli nɔ̃naai ni ebu.

Susumɔ ‘bo diɛŋtsɛ ohaomɔ kɛ omanehulu’ lɛ he fioo. Yɛ bei komɛi amli lɛ, ekolɛ onu he tamɔ lalatsɛ David ni ŋma nɛkɛ lɛ: “Mikwɛ akɛ mɔ ko kɛ mi aaabaye ŋkɔmɔ lo, shi mɔ ko mɔ ko bɛ, miishɛjelɔi hu, shi minaaa mɔ ko mɔ ko.” Kɛlɛ, obaanyɛ ona nɔmimaa akɛ Nyɔŋmɔ jwɛŋɔ oshihilɛ lɛ he, ejaakɛ David ŋma yɛ nakai lala lɛ nɔŋŋ mli yɛ sɛɛ mli akɛ: “Yehowa boɔ ohiafoi atoi, ni egbeee egbokɛlɛfoi lɛ ahe guɔ.”—Lala 69:21, 34.

Kɛ wɔkɛ David wiemɔi lɛ aaatsu nii yɛ gbɛ ni mli lɛɛ nɔ lɛ, wɔbaanyɛ wɔna nɔmimaa akɛ adesai a-Bɔlɔ lɛ boɔ mɛi ni kɛ́ wɔɔwie lɛ nakai lɛ, amɛ nɔnaai ewo amɛ tsuŋ lɛ asɔlemɔi atoi. Nɔ ni fe nakai lɛ, etsuɔ amɛ haomɔi lɛ ahe nii. Susumɔ wiemɔi ni nyiɛ sɛɛ nɛɛ ni jieɔ Yehowa musuŋtsɔlɛ kɛha mɛi ni naa nɔ̃ lɛ kpo lɛ he.

“Nyɛkawaa yoo okulafo ko loo awusa ko yi. Shi kɛji owa amɛyi, ni amɛfo amɛtsɛ mi lɛ, ja mibo amɛ yaafo lɛ toi; ni mimlifu lɛ naa aaawa naakpa.”—2 Mose 22:22-24.

“Ni kɛ Nyɔŋmɔ aaaku ehiɛ afɔ ehalamɔbii ni bolɔɔ tsɛɔ lɛ shwane kɛ nyɔɔŋ lɛ nɔ aahu tete lɛ, aso ebafaŋ amɛhe?”—Luka 18:7.

“Eeejie ohiafoi ni bolɔɔ lɛ, kɛ nɔ̃nalɔ ni bɛ bualɔ lɛ. Eeena ohiafo kɛ mɔ ni efi lɛ lɛ mɔbɔ, ni eeehere mɛi ni efi amɛ lɛ asusumai ayiwala. Eeekpɔ amɛsusuma kɛaajɛ fifiamɔ kɛ yiwalɛ mli, ni amɛla jara aaawa yɛ ehiɛ.”—Lala 72:12-14.

“Mɔ ni taa nyɛhe lɛ, [Nyɔŋmɔ webii ni yɔɔ shikpɔŋ nɔ] eeta ehiŋmɛiŋ ajaŋmalatɛ he.”—Zakaria 2:[8.]

Nɛkɛ nɔkwɛmɔ nii fioo nɛɛ tsɔɔ bɔ ni wɔ-Bɔlɔ lɛ susuɔ ewebii ahilɛ-kɛhamɔ he waa ehãa. No hewɔ lɛ, wɔyɛ yiŋtoo kpakpa ni wɔɔdamɔ nɔ wɔnyiɛ bɔfo Petro ŋaawoo lɛ sɛɛ: “Nyɛŋɔa nyɛ haomɔ fɛɛ nyɛfɔa enɔ, ejaakɛ lɛ ejwɛŋɔ nyɛnɔ.” (1 Petro 5:7) Shi, mɛɛ gbɛ nɔ Nyɔŋmɔ aaatsɔ aye abua wɔ yɛ nɔ̃naa bei amli?

Bɔ ni Nyɔŋmɔ Yeɔ Ebuaa Nɔ̃nalɔi

Taakɛ wɔna lɛ, beni David na nɔ̃ lɛ, ekɛ hiɛdɔɔ sɔle eha Nyɔŋmɔ kɛha gbɛtsɔɔmɔ. Yɛ nakai beaŋ nɔŋŋ lɛ, efee nɔ̃ ko yɛ shihilɛ lɛ he koni ekɛjie kɛya, ni ekɛ ŋaa nifeemɔ tsu nii koni ekɛjo mɛi ni tiuɔ lɛ lɛ anaa foi. No hewɔ lɛ, ehe ni ekɛfɔ Yehowa nɔ kɛ mɔdɛŋ ni lɛ diɛŋtsɛ ebɔ lɛ ha David ŋmɛ etsui shi yɛ ehaomɔi lɛ amli. Mɛni wɔbaanyɛ wɔkase kɛjɛ enɛ mli?

Kɛ́ wɔmiina nɔ̃ lɛ, ejeee nɔ ni ejaaa akɛ wɔkɛ hegbɛ aaatsu nii ni wɔkɛná tsabaa wɔha naagba lɛ. Akɛ nɔkwɛmɔ nɔ lɛ, kɛ Kristofonyo na akɛ ebɛ nitsumɔ lɛ, ani ebɔŋ mɔdɛŋ akɛ eeetao nitsumɔ? Aloo kɛ eepiŋ yɛ gbɔmɔtsoŋ hela ko hewɔ lɛ, ani etaoŋ ehe tsofa? Yɛ anɔkwale mli lɛ, Yesu po, ni yɔɔ hewalɛ ni ekɛaatsa helai sɔrɔtoi fɛɛ lɛ kpɛlɛ nɔ akɛ, ‘tsofatsɛ he hiaa mɛi ni he yeɔ lɛ.’ (Mateo 9:12; okɛto 1 Timoteo 5:23 he.) Shi, amanehului komɛi yɛ ni anyɛŋ ajie kɛya; esa akɛ aŋmɛ tsui shi yɛ mli kɛkɛ. Shi kɛlɛ, anɔkwa Kristofonyo ebuuu piŋmɔ akɛ nɔ̃ kpakpa diɛŋtsɛ, tamɔ mɛi komɛi feɔ lɛ. (Okɛto 1 Maŋtsɛmɛi 18:28 he.) Shi moŋ, etoɔ gbɛjianɔ fɛɛ ni eeenyɛ koni ekɛdamɔ enɔ̃naa lɛ naa.

Shi, yɛ nakai beaŋ nɔŋŋ lɛ, jwɛŋmɔ yɛ mli akɛ, akɛ sane lɛ aaafɔ Yehowa hiɛ yɛ sɔlemɔ mli. Mɛni hewɔ? Klɛŋklɛŋ lɛ, kɛ wɔkɛ wɔhe fɔ wɔ-Bɔlɔ lɛ nɔ lɛ, eyeɔ ebuaa wɔ ni ‘wɔyoo nii ni hi titri lɛ.’ (Filipibii 1:10) Akɛ nɔkwɛmɔ nɔ lɛ, kɛ wɔmiitao nitsumɔ lɛ, wɔhe ni wɔkɛaafɔ Nyɔŋmɔ nɔ lɛ baaye abua wɔ ni wɔkakpɛlɛ nitsumɔ ni teɔ shi woɔ Biblia mli shishitoo mlai lɛ anɔ. Agbɛnɛ hu wɔbaakwa ‘gbɛ ni wɔɔdũ kɛjɛ hemɔkɛyeli lɛ he’ kɛtsɔ shika suɔmɔ nɔ. (1 Timoteo 6:10) Yɛ anɔkwale mli lɛ, kɛ wɔmiikpɛ yiŋ ni hiɛdɔɔ yɔɔ mli—yɛ nitsumɔ loo shihilɛ mli nɔ kroko he lɛ—ehe hiaa ni wɔdi David ŋaawoo lɛ sɛɛ: “Shɛ ojatsu lɛ ofɔ Yehowa nɔ, ni lɛ eeehiɛ omli; eŋmɛŋ gbɛ gbi ko gbi ko ni jalɔ adidã.”—Lala 55:23.

Sɔlemɔ yeɔ ebuaa wɔ hu koni wɔŋmɛ pɛpɛɛpɛ yɛ jwɛŋmɔŋ, koni wɔ nɔ̃naa lɛ akaye wɔnɔ. Bɔfo Paulo ŋma akɛ: “Nɔ fɛɛ nɔ mli lɛ, nyɛkɛ sɔlemɔ kɛ faikpamɔ kɛ shidaa atsia nyɛtutɔmɔi lɛ atã yɛ Nyɔŋmɔ hiɛ.” Mɛni baajɛ mli aba? “Nyɔŋmɔ hejɔlɛ ni fe jwɛŋmɔi fɛɛ lɛ aaato nyɛtsuii kɛ nyɛjwɛŋmɔi lɛ yɛ Kristo Yesu mli.” (Filipibii 4:6, 7) Hɛɛ, hejɔlɛ, Nyɔŋmɔ hejɔlɛ. Nakai hejɔlɛ lɛ “fe jwɛŋmɔi fɛɛ,” no hewɔ lɛ ebaanyɛ eha wɔfi shi shiŋŋ kɛ́ henumɔi ni haoɔ mɔ etsɔ tamɔ jatsu ni tsii yɛ wɔnɔ. ‘Ebaabu wɔtsuii kɛ jwɛŋmɔŋ nyɛmɔi ahe,’ koni eye ebua wɔ ni wɔkafee nɔ ko kpalakpala ni nilee bɛ mli, ni baanyɛ ekɛ nɔ̃ ko afata wɔ nɔ̃naa lɛ he.—Jajelɔ 7:7.

Sɔlemɔ baanyɛ afee babaoo lolo. Ebaanyɛ ni ekɛ sɔrɔtofeemɔ aba bɔ ni shihilɛ ko baa hãa lɛ mli. Susumɔ Biblia mli nɔkwɛmɔ nɔ ko he. Beni awo bɔfo Paulo tsuŋ yɛ Roma lɛ, ewo nanemɛi Kristofoi lɛ hewalɛ ni amɛsɔle amɛha lɛ. Mɛni hewɔ? Eŋma amɛ akɛ: “Ni miikpa nyɛ fai babaoo akɛ nyɛfee nakai, koni akpale mi aha nyɛ oya.” (Hebribii 13:19) Paulo le akɛ sɔlemɔ ni enanemɛi heyelilɔi lɛ aaakã he lɛ baanyɛ asa be ni abaajie lɛ lɛ he.—Filemon 22.

Ani sɔlemɔ baanyɛ atsake nɔ ni baajɛ onɔ̃naa lɛ mli aba lɛ? Ekolɛ ebaanyɛ efee nakai. Shi esa akɛ wɔyɔse akɛ, jeee be fɛɛ be Yehowa hãa wɔ sɔlemɔi lɛ ahetoo yɛ gbɛ ni ekolɛ wɔkpaa gbɛ lɛ nɔ. Akɛ nɔkwɛmɔ nɔ lɛ, Paulo sɔle shii abɔ yɛ ‘eheloo mli ŋmei’ ko he—ekolɛ gbɔmɔtsoŋ naagba ko ni kɔɔ ehiŋmɛi he. Ni Nyɔŋmɔ aaajie enɔ̃naa nɛɛ moŋ lɛ, ekɛɛ Paulo akɛ: “Miduromɔ lɛ fa hao, ejaakɛ mihewalɛ lɛ, gbedee-feemɔ mli eyeɔ emuu yɛ.”—2 Korintobii 12:7-9.

No hewɔ lɛ, yɛ bei komɛi amli lɛ, ajieŋ wɔnaagbai lɛ. Shi moŋ, wɔbaana hegbɛ ni wɔkɛtsɔɔ wɔhe ni wɔkɛfɔɔ wɔ-Bɔlɔ lɛ nɔ lɛ. (Bɔfoi lɛ Asaji 14:22) Kɛfata he lɛ, wɔbaanyɛ wɔna nɔmimaa akɛ, kɛji akɛ Yehowa ejieee nɔ̃naa lɛ po lɛ, ‘eeeje gbɛ eha [wɔ] koni wɔje mli.’ (1 Korintobii 10:13) Hɛɛ, yiŋtoo kpakpa hewɔ ni atsɛɔ Yehowa akɛ “musuŋtsɔlɛi atsɛ kɛ miishɛjemɔ fɛɛ Nyɔŋmɔ lɛ.” (2 Korintobii 1:3, 4) Ekɛ nɔ ni he hiaa wɔ koni wɔŋmɛ wɔtsui shi yɛ mli lɛ haa wɔ kɛ toiŋjɔlɛ babaoo.

Etsɛŋ—Jeŋ ni Nɔ̃naa Bɛ Mli Baaba!

Bɔlɔ lɛ woɔ shi akɛ, etsɛŋ ni ebaatsɔ e-Maŋtsɛyeli lɛ nɔ ejie adesai anɔ̃naai fɛɛ kɛya. Mɛɛ gbɛ nɔ ebaatsɔ efee enɛ? Kɛtsɔ Satan Abonsam, mɔ titri ni kɛ nɔ̃naa baa, kɛ toiŋjɔlɛ henyɛlɔ kpele fe fɛɛ, ni Biblia lɛ tsɛɔ lɛ “je nɛŋ nyɔŋmɔ” lɛ jiemɔ nɔ. (2 Korintobii 4:4) Shi etsɛŋ ni adesai anɔ hewalɛ ni ená lɛ sɛɛ baafo. Ejiemɔ lɛ baagbele gbɛ koni jɔɔmɔi babaoo ni anyɛŋ akane aba aha mɛi ni sheɔ Nyɔŋmɔ gbeyei lɛ. Biblia lɛ woɔ shi akɛ, Yehowa “aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔ̃naa ko hu bɛ dɔŋŋ; ejaakɛ tsutsu nii lɛ eho etee.”—Kpojiemɔ 21:1-4.

Ani jeŋ ni nɔ̃naa bɛ mli lɛ yɛ naakpɛɛ tsɔ akɛ aaanyɛ ahe aye? Wɔhi haomɔi amli aahu akɛ ewa waa akɛ wɔɔsusu bɛ ni ebɛ dɔŋŋ he. Shi, heyeli kɛmiijɛ gbeyeishemɔ, yeyeeyefeemɔ, kɛ amanehulu mli lɛ ji nɔ pɛpɛɛpɛ ni Nyɔŋmɔ to yiŋ yɛ he kɛha adesai yɛ nibɔɔ mli, ni eyiŋtoo lɛ baaye omanye.—Yesaia 55:10, 11.

Enɛ ji hiɛnɔkamɔ ni Sonia, Fabiana, kɛ Ana ni atsi amɛ tã klɛŋklɛŋ yɛ sane nɛɛ mli lɛ ná. Sonia, ni AIDS gbe ebihii enyɔ lɛ na toiŋjɔlɛ babaoo kɛjɛ hiɛnɔkamɔ ni Biblia lɛ kɛhaa lɛ mli—jalɔi kɛ mɛi ni ejaaa lɛ ashitee. (Bɔfoi lɛ Asaji 24:15) Ekɛɔ akɛ: “Miyɛ nɔmimaa yɛ nɔ̃ kome he, wɔhiɛnɔkamɔ lɛ fe piŋmɔi fɛɛ.”

Beni Ana yɔɔ awusai akwɛmɔhe lɛ lolo lɛ, Yehowa Odasefoi lɛ ateŋ mɔ kome yasara lɛ. Ana kɛɛ: “Etsɔɔ mi Yehowa gbɛi yɛ Biblia lɛ mli, ni mifo nyamɔ yaafo. Yelikɛbuamɔ he miihia mi waa, ni mikase akɛ Nyɔŋmɔ ko yɛ ni jwɛŋɔ wɔhe.” Beni Ana shi awusai akwɛmɔhe lɛ, ekpɛlɛ Biblia lɛ kasemɔ nɔ, ni ekase Yehowa shiwoi lɛ ahe nii babaoo. Kɛkɛ ni ejɔɔ ewala nɔ eha Yehowa, ni ekɛ baptisimɔ fee he okadi. “Kɛjɛ nakai be lɛ mli kɛbaa nɛɛ, mitee nɔ mitsɔ sɔlemɔ nɔ mikɛ mihe efɔ Yehowa nɔ, ni nɔmimaa ni miyɔɔ akɛ ebaaye ebua mi lɛ shɛjeɔ mimii.”

Fabiana hu ena miishɛjemɔ kɛ jwɛŋmɔŋ toiŋjɔlɛ babaoo yɛ enɔ̃naa lɛ mli kɛtsɔ Nyɔŋmɔ shiwoi ni kɔɔ wɔsɛɛ be he lɛ he nikasemɔ nɔ. “Anɔkwale lɛ kasemɔ kɛmiijɛ Biblia lɛ mli lɛ tamɔ nɔ ni aaje kpo kɛmiijɛ he ko ni ewo duŋ ni yɔɔ kusuu kɛmiibote tsu ni mli tse, ni kpɛlɛɔ kaŋkaŋ, ni yɔɔ fɛo mli.”—Okɛto Lala 118:5 he.

Shi, mɛɛ gbɛ nɔ jeŋ muu fɛɛ toiŋjɔlɛ baatsɔ aba, ni mɛɛ be? Nyɛhaa wɔkwɛa yɛ nikasemɔi ni nyiɛ sɛɛ lɛ amli.

[Akrabatsa ni yɔɔ baafa 6]

Nɔ̃naa Hiɛi Babaoo lɛ

▪ Kɛ́ aja mli lɛ, je lɛŋ gbɔmɛi amlijaa ejwɛ mli ekome hiɔ shi yɛ ohia futaa mli, ni akpekpei abɔ krokomɛi hu hiɔ shihilɛ ni shɛɛɛ gbɔmɛi anɔ he ni woɔ amɛ walanamɔ he gbeyei lɛ mli.

▪ Gbekɛbii fe akpekpei 200 aniyenii shɛɛ amɛnaa.

▪ Daa afi lɛ, musuŋtsɔmɔ gbeɔ gbekɛbii aaafee akpekpei etɛ ni yeko afii enumɔ.

▪ Tsɛŋemɔ helai gbe gbɔmɛi akpekpei 16.5 yɛ 1993 pɛ. Akɛni maji komɛi buɔ helai ahe akɔntaa yɛ gbɛ kroko nɔ hewɔ lɛ, yibɔ ni gboi lɛ baanyɛ afa fe nakai.

▪ Jwɛŋmɔŋ hela ko gbaa gbɔmɛi aaashɛ akpekpei 500 anaa.

▪ Gbɔmɛi ni gbeɔ amɛhe lɛ ayifalɛ miiya hiɛ waa yɛ gbekɛbii ateŋ fe mɛi ni eye afii krokomɛi.

▪ The Unesco Courier lɛ kɛɛ akɛ: “Hɔmɔ kɛ nitsumɔ ni anaaa atsu etsɔ̃ kpá yɛ je lɛ he. Gbɔmɛi akpekpei 35 ni naaa nitsumɔ yɔɔ je lɛŋ maji kpawo ni yɔɔ shika fe fɛɛ lɛ amli, ni yɛ Brazil pɛ lɛ, nitsulɔi akpekpei 20 yɛ ni nitsumɔ ni amɛyɔɔ lɛ po etsɔɔɔ akɛ amɛbaana nɔ ni sa amɛye.”

[Mfoniri ni yɔɔ baafa 7]

Sɔlemɔ baanyɛ aye abua wɔ ni wɔkɛ wɔjwɛŋmɔ ama Nyɔŋmɔ shiwoo ni kɔɔ jeŋ ni nɔ̃naa bɛ mli he lɛ nɔ