Beni Asa yawuu ta lɛ ni ebaa lɛ, gbalɔ Azaria kɛ lɛ yakpe. Gbalɔ lɛ wo lɛ hewalɛ ni ebɔ lɛ kɔkɔ hu akɛ: “Nyɛboa mi toi, Asa kɛ Yuda kɛ Benyamin fɛɛ! Yehowa kɛ nyɛ yɛ gbii abɔ ní nyɛkɛ lɛ yɔɔ lɛ; ni kɛji nyɛtao esɛɛgbɛ lɛ, eeeha nyɛna lɛ, shi kɛ́ nyɛkwa lɛ lɛ, lɛ hu eeekwa nyɛ! . . . Nyɛwajea nyɛhe ni nyɛkahaa nyɛnijiaŋ miijea wui; ejaakɛ aaawo nyɛnitsumɔ lɛ he nyɔmɔ!”—2 Kron. 15:1, 2, 7.

Wiemɔi nɛɛ baanyɛ awaje wɔhemɔkɛyeli lɛ. Ehaa wɔnaa akɛ, kɛ́ wɔtee nɔ wɔkɛ anɔkwayeli sɔmɔ Yehowa lɛ, eshiŋ wɔ kɔkɔɔkɔ. Kɛ́ wɔbolɔ wɔtsɛ́ lɛ kɛha yelikɛbuamɔ lɛ, wɔbaanyɛ wɔná nɔmimaa akɛ ebaabo wɔ toi. Azaria kɛɛ akɛ: “Nyɛwajea nyɛhe.” Bei pii lɛ, ebiɔ ekãa dani wɔbaanyɛ wɔfee nɔ ni ja, shi wɔle akɛ yɛ Yehowa yelikɛbuamɔ naa lɛ, wɔbaanyɛ wɔfee nakai.

Shi kɔkɔbɔɔ fata wiemɔ ni Azaria kɛha Asa lɛ he. Ekɛɛ lɛ akɛ: “Kɛ́ nyɛkwa [Yehowa] lɛ, lɛ hu eeekwa nyɛ!” Ekaba lɛ nakai kɔkɔɔkɔ yɛ wɔgbɛfaŋ, ejaakɛ nɔ ni baajɛ mli kɛba lɛ baanyɛ afee oshara! (2 Pet. 2:20-22) Ŋmalɛi lɛ etsɔɔɔ nɔ hewɔ ni Yehowa kɛ kɔkɔbɔɔ nɛɛ ha Asa lɛ, shi maŋtsɛ lɛ eyabooo toi.