Ani Obaanyɛ Okɛ Ohe Afɔ Biblia lɛ Nɔ?

KƐ OKƆ Biblia ohiɛ odɛ lɛ, ani obaakpa gbɛ akɛ obaana shika ni akɛheɔ nɔ ko? Shi nɛkɛ blema jwiɛtɛi shika nɛɛ hu?

Mɛi babaoo naa Biblia lɛ akɛ wolo momo ko ni gbaa blema adesãi komɛi kɛ jeŋbai ni nɔ kwɔlɔ he sane. Kɛlɛ, amɛheee amɛyeee akɛ Biblia mli saji lɛ ji yinɔ sane ni ja pɛpɛɛpɛ, ni no hewɔ lɛ amɛjeɔ Nyɔŋmɔ Wiemɔ ni eji lɛ he ŋwane. Tsɛbelɛ, odaseyelii babaoo yɛ ni tsɔɔ bɔ ni Biblia lɛ ja ha lɛ mli. Nɛkɛ shika (ni anaa lɛ agbo) nɛɛ ji ehe nɔkwɛmɔ nɔ ko. Mɛni ji nɔ ni enɔ niŋmaa lɛ kɛɔ?

Afee shika lɛ yɛ Tarso, ni ji maŋ ko ni ale amrɔ nɛɛ akɛ Turkey lɛ wuoyi-bokagbɛ. Afee shika lɛ yɛ Persia amralo Mazaeus nɔyeli beaŋ yɛ afii ohai ejwɛ D.Ŋ.B. Ekadiɔ lɛ akɛ maŋ ni yɔɔ “Faa lɛ Biɛ Gbɛ,” ni ji Eufrate Faa lɛ, nɔ amralo lɛ.

Shi mɛni hewɔ ni wɔyɔɔ miishɛɛ yɛ nakai wiemɔ kuku lɛ he lɛ? Ejaakɛ obaana nakai sane lɛ nɔŋŋ yɛ o-Biblia lɛ mli. Ezra 5:​6–6:13 tsĩ sanegbaa ni tee nɔ yɛ Persia maŋtsɛ Dario kɛ amralo ni atsɛɔ lɛ Tatnai teŋ lɛ tã. Nɔ ni tee naataamɔ lɛ shi ji saamɔ ni Yudafoi lɛ saa amɛmaa sɔlemɔtsu ni yɔɔ Yerusalem lɛ. Ezra ji Nyɔŋmɔ Mla lɛ ŋmalɔ ko ni he esa waa, ni obaakpa gbɛ akɛ ebaafee esane lɛ kuku, ni eŋma lɛ pɛpɛɛpɛ. Obaana yɛ Ezra 5:6 kɛ 6:13 akɛ ewie Tatnai he akɛ “faa lɛ biɛ gbɛ amralo lɛ.”

Ezra ŋma no aaafee afi 460 D.Ŋ.B., ni ji afii 100 sɛɛ dani afee shika nɛɛ. Oo, mɛi komɛi yɛ ni aaanu he akɛ kadimɔ nɔ kɛha blema maŋnɔyelɔ ni tamɔ nɛkɛ lɛ ji nɔ ko bibioo ko kɛkɛ ni aŋma. Shi kɛ obaanyɛ okɛ ohe afɔ Biblia ŋmalɔi anɔ yɛ saji bibii tamɔ nɛkɛ mli lɛ, no lɛ ani esaaa akɛ nɔ haa hekɛnɔfɔɔ ni oyɔɔ yɛ nɔ ni amɛŋmala lɛ amli lɛ faa?

Obaana nibii krokomɛi ni fata he yɛ klɛŋklɛŋ saji enyɔ ni yɔɔ nɛkɛ wolo nɛɛ mli lɛ mli bɔni afee ni ona nakai hekɛnɔfɔɔ Iɛ.

[He ni Mfoniri ni yɔɔ baafa 32 lɛ Jɛ]

Collection of Israel Dept. of Antiquities Exhibited & photographed Israel Museum