Yerusalem ni Yeɔ Egbɛi lɛ Anɔkwa
“Nyɛnyaa ni nyɛmli afilia nyɛ kɛyaa naanɔ yɛ nii ni mibɔɔ lɛ ahewɔ; ejaakɛ naa, miibɔ Yerusalem ní etsɔ mlifilimɔ.”—YESAIA 65:18.
1. Te Ezra nu he yɛ maŋtiase ni Nyɔŋmɔ ehala lɛ he eha tɛŋŋ?
ÁKƐ mɔ ni kɛ miishɛɛ kaseɔ Nyɔŋmɔ Wiemɔ lɛ waa lɛ, Yudanyo osɔfo Ezra buɔ tsakpãa ni be ko lɛ Yerusalem kɛ Yehowa jamɔ krɔŋŋ yɔɔ lɛ waa diɛŋtsɛ. (5 Mose 12:5; Ezra 7:27) Suɔmɔ ni eyɔɔ kɛha Nyɔŋmɔ maŋ lɛ jeɔ kpo yɛ Biblia lɛ fã ni akɛ mumɔ tsirɛ lɛ koni eŋma—Kronika Klɛŋklɛŋ wolo lɛ kɛ Enyɔ lɛ kɛ Ezra wolo lɛ mli. Anaa akɛ gbɛi ni ji Yerusalem lɛ pueɔ nɔ ni miihe ashɛ shii 800 ni epueɔ yɛ Biblia muu lɛ fɛɛ mli lɛ mlijaa ejwɛ mli ekome yɛ yinɔsane mli niŋmaai nɛɛ amli.
2. Mɛɛ shishinumɔ yɛ gbalɛ naa wɔbaanyɛ wɔna kɛjɛ nɔ ni gbɛi ni ji Yerusalem lɛ tsɔɔ lɛ mli?
2 Abaanyɛ anu “Yerusalem” ni jeɔ kpo yɛ Hebri ni akɛŋma Biblia lɛ mli lɛ shishi yɛ Hebri wiemɔ lɛ su ko ni atsɛɔ lɛ nɔ ni bɔ he enyɔ lɛ mli. Akɛ nɔ ni bɔ he enyɔ lɛ tsuɔ nii titri ahaa nibii ni baa enyɔnyɔɔnyɔ, tamɔ hiŋmɛii, toii, niji, kɛ naji. Yɛ bɔ ni akɛbɔ he enyɔ nɛɛ hewɔ lɛ, abaanyɛ asusu gbɛi Yerusalem lɛ he akɛ eji gbalɛ ni kɔɔ toiŋjɔlɛ ni Nyɔŋmɔ webii baaná mli ŋɔɔmɔ toi enyɔ yɛ eshishinumɔ naa—mumɔŋ kɛ heloonaa lɛ he. Ŋmalɛi lɛ etsɔɔɔ kɛji akɛ Ezra nu enɛ shishi jogbaŋŋ. Shi akɛ osɔfo lɛ, efee nɔ ni hi fe fɛɛ ni eeenyɛ koni ekɛye ebua Yudafoi lɛ koni amɛná amɛkɛ Nyɔŋmɔ teŋ toiŋjɔlɛ mli ŋɔɔmɔ. Ni eji anɔkwale akɛ etsu nii waa koni Yerusalem ahi shi yɛ shishinumɔ ni yɔɔ egbɛi lɛ sɛɛ lɛ naa, ni ji, “Mɔ ni Yɔɔ [loo, Shishitoo] Toiŋjɔlɛ ni Bɔ He Enyɔ.”—Ezra 7:6.
3. Afii enyiɛ ho dani akɛ wɔ je Ezra nitsumɔi lɛ ashishi ekoŋŋ, ni mɛɛ shihilɛi amli wɔnaa lɛ yɛ?
3 Biblia lɛ etsɔɔɔ he ni Ezra yɔɔ yɛ afii 12 ni ba yɛ be mli ni ebasara Yerusalem lɛ kɛ be mli ni Nehemia bashɛ maŋtiase lɛ mli lɛ. Mumɔŋ shihilɛ ni ehiii kwraa ni maŋ lɛ yɔɔ mli yɛ nakai beaŋ lɛ tsɔɔ akɛ Ezra bɛ jɛmɛ. Ni kɛlɛ, wɔna ni Ezra miisɔmɔ ekoŋŋ akɛ osɔfo anɔkwafo yɛ Yerusalem beni atswa maŋtiase lɛ gbogbo lɛ agbe naa lɛ sɛɛ nɔŋŋ.
Kpee Gbi ko ni Yɔɔ Naakpɛɛ
4. Mɛni sa kadimɔ yɛ Israel nyɔŋ ni ji kpawo lɛ klɛŋklɛŋ gbi lɛ nɔ?
4 Agbe Yerusalem gbogbo lɛ naa yɛ be ni sa pɛpɛɛpɛ mli kɛha gbijurɔyeli nyɔŋ ni he hiaa ni ji Tishri, ni ji nyɔŋ ni ji kpawo yɛ Israel jamɔ kalanda lɛ nɔ lɛ nɔ. Tishri klɛŋklɛŋ gbi lɛ ji nyɔŋ hee niyeli krɛdɛɛ ko ni atsɛɔ lɛ Tɛtɛrɛmantɛrɛ Kpamɔ Gbi Jurɔ lɛ. Osɔfoi lɛ kpãa tɛtɛrɛmantɛrɛi yɛ nakai gbi lɛ nɔ beni amɛshãa afɔlei amɛhaa Yehowa. (4 Mose 10:10; 29:1) Nɛkɛ gbi nɛɛ sáa Israelbii lɛ kɛhaa daa afi Kpatamɔ Gbi ni ayeɔ yɛ Tishri gbi ni ji 10 lɛ nɔ kɛ miishɛɛ Gbi Jurɔ ni ji Naabuamɔ ni baa kɛjɛɔ nakai nyɔŋ lɛ nɔŋŋ nɔ gbi ni ji 15 kɛyashi 21 lɛ nɔ lɛ.
5. (a) Te Ezra kɛ Nehemia kɛ “nyɔŋ ni ji kpawo lɛ nɔ klɛŋklɛŋ gbi lɛ” tsu nii jogbaŋŋ amɛha tɛŋŋ? (b) Mɛni hewɔ Israelbii lɛ fó lɛ?
5 Yɛ “nyɔŋ ni ji kpawo lɛ nɔ klɛŋklɛŋ gbi lɛ nɔ” lɛ, “maŋ lɛ bluublu” bua amɛhe naa, eeenyɛ efee akɛ Nehemia kɛ Ezra wo amɛ hewalɛ ní amɛfee nakai. Hii kɛ yei “kɛ mɛi fɛɛ ni kɛ amɛnu ni amɛaanu shishi lɛ” fata he. No hewɔ lɛ, gbekɛbii yɛ jɛmɛ ni amɛbo toi yɛ be mli ni Ezra damɔ nɔdaamɔ nɔ ni kwɔ nɔ ni ekane Mla lɛ “kɛjɛ leebi kɛyashi shwane fintiŋŋ” lɛ. (Nehemia 8:1-4) Afolɔɔ mli ni ahaa Levibii lɛ yeɔ buaa gbɔmɛi lɛ koni amɛnu nɔ ni akaneɔ lɛ shishi. Enɛ ha Israelbii lɛ werɛ ho amɛhe beni amɛyoo bɔ ni amɛkɛ amɛtsɛmɛi lɛ tsi amɛhe kɛjɛ Nyɔŋmɔ Mla lɛ toiboo he kɛtee shɔŋŋ kwraa lɛ.—Nehemia 8:5-9.
6, 7. Mɛni Kristofoi baanyɛ akase kɛjɛ nɔ̃ ni Nehemia fee ni ekɛha Yudafoi lɛ kpa yaafo lɛ mli?
6 Shi enɛ jeee be ni akɛfóɔ. Eji gbijurɔyeli, ni kpaako gbɔmɛi lɛ egbe Yerusalem gbogbo lɛ saamɔ naa. No hewɔ lɛ, Nehemia ye ebua amɛ koni amɛná jwɛŋmɔ ni ja kɛtsɔ nɔ ni ewie nɛɛ nɔ akɛ: “Nyɛyaa ni nyɛyayea nii ni ewo fɔ, ni nyɛnua nii ni ŋɔɔ dɔkɔdɔkɔ, ni nyɛkɛ eko amajea mɛi ni afeko nɔ ko atoko amɛ lɛ; ejaakɛ ŋmɛnɛ gbi nɛɛ yɛ krɔŋkrɔŋ ha wɔ-Nuntsɔ lɛ, hewɔ lɛ nyɛwerɛ akahoa nyɛhe; ejaakɛ Yehowa he nyamɔ lɛ ji nyɛ hewalɛ.” Yɛ toiboo mli lɛ, “maŋ muu lɛ fɛɛ yiŋ amɛtee ni amɛyaye nii ni amɛnu nɔ ko ni amɛkɛ ekomɛi maje, ni amɛná miishɛɛ babaoo; ejaakɛ wiemɔi ni ajaje atsɔɔ amɛ lɛ amɛnu shishi.”—Nehemia 8:10-12.
7 Nyɔŋmɔ webii ni yɔɔ ŋmɛnɛ lɛ baanyɛ akase nii babaoo kɛjɛ sane nɛɛ mli. Esa akɛ mɛi ni náa hegbɛ akɛ amɛaaná gbɛfaŋnɔ yɛ asafoŋ kpeei kɛ kpokpaa nɔ kpeei ashishi lɛ aha nɔkwɛmɔnɔ ni atsɔɔ mli nɛɛ ahi amɛjwɛŋmɔ mli. Kɛfata ŋaawoo ni akɛjajeɔ mɔ ni he hiaa yɛ bei komɛi amli lɛ he lɛ, bei ni tamɔ nɛkɛ maa sɛɛnamɔi kɛ jɔɔmɔi ni baa kɛjɛɔ Nyɔŋmɔ taomɔ nii ni ashɛɔ he lɛ anɔ mi. Akɛ yijiemɔ yɛ nitsumɔi kpakpai ni amɛtsuɔ lɛ kɛ hewalɛwoo koni amɛya nɔ amɛŋmɛ amɛtsui shi haa. Esa akɛ Nyɔŋmɔ webii ashi kpeei nɛɛ ashishi amɛya kɛ miishɛɛ tsui yɛ tsɔsemɔ wiemɔi ni tswaa mɔ maa shi ni amɛnine eshɛ nɔ kɛjɛ Nyɔŋmɔ Wiemɔ lɛ mli lɛ hewɔ.—Hebribii 10:24, 25.
Henaabuamɔ Kroko ni Yɔɔ Miishɛɛ
8, 9. Mɛɛ kpee krɛdɛɛ ko tee nɔ yɛ nyɔŋ ni ji kpawo lɛ gbi ni ji enyɔ lɛ nɔ, ni mɛni jɛ mli ba kɛha Nyɔŋmɔ webii lɛ?
8 Yɛ nakai nyɔŋ krɛdɛɛ lɛ nɔ gbi ni ji enyɔ lɛ nɔ lɛ, “maŋ lɛ fɛɛ mli tsɛmɛi awei lɛ anɔ onukpai lɛ kɛ osɔfoi lɛ kɛ Levibii lɛ babua amɛhe naa yɛ Ezra, woloŋmalɔ lɛ, ŋɔɔ, koni amɛbabo mla lɛ mli wiemɔi lɛ atoi.” (Nehemia 8:13) Ezra he esa jogbaŋŋ kɛha kpee ni tamɔ nɛkɛ nɔkwɛmɔ, ejaakɛ ekɛ “etsui efɔ nɔ akɛ eeetao Yehowa mla lɛ sɛɛgbɛ ni eye nɔ, ni etsɔɔ mɛi akpɔi lɛ kɛ mlai lɛ yɛ Israel.” (Ezra 7:10) Ŋwanejee ko bɛ he akɛ, kpee nɛɛ ma hei ni ehe hiaa ni Nyɔŋmɔ webii lɛ aye Mla kpaŋmɔ lɛ nɔ pɛpɛɛpɛ yɛ lɛ anɔ mi. Nɔ ni he hiaa amrɔ nɔŋŋ ji bɔ ni ehe hiaa ni amɛsaa amɛhe jogbaŋŋ koni amɛye Asesei Agbi Jurɔ ni baa lɛ.
9 Aye gbi jurɔ ni yeɔ otsi nɛɛ yɛ gbɛ ni ja nɔ, ni gbɔmɛi lɛ fɛɛ hi asesei ni akɛ tsei srɔtoi aniji fee ni ahiɔ shishi yɛ be kuku mli lɛ ashishi. Gbɔmɛi lɛ mamɔ asesei nɛɛ yɛ amɛtsũi ayiteŋ tɛtrɛɛ lɛ anɔ, yɛ amɛkpoi anɔ, yɛ sɔlemɔtsu lɛ kpo lɛ nɔ, kɛ Yerusalem blohui lɛ amli. (Nehemia 8:15, 16) Mɛɛ hegbɛ fɛfɛo enɛ ji nɛkɛ akɛ aaabua gbɔmɛi lɛ anaa ni akane Nyɔŋmɔ Mla lɛ atsɔɔ amɛ! (Okɛto 5 Mose 31:10-13 he.) Afee enɛ daa gbi, “kɛjɛ klɛŋklɛŋ gbi lɛ nɔ aahu kɛyashi” gbi jurɔ lɛ “naagbee gbi lɛ nɔ,” ni Nyɔŋmɔ webii lɛ ‘amii shɛ amɛhe naakpa.’—Nehemia 8:17, 18.
Wɔkaku Wɔhiɛ Wɔshwie Nyɔŋmɔ We lɛ Nɔ
10. Mɛni hewɔ ato henaabuamɔ krɛdɛɛ he gbɛjianɔ yɛ nyɔŋ ni ji kpawo lɛ gbi ni ji 24 lɛ nɔ lɛ?
10 Be kɛ hé ni sa, ni akɛjajeɔ fatɔɔi ni hiɛdɔɔ yɔɔ mli yɛ Nyɔŋmɔ webii ateŋ lɛ yɛ. Akɛni ena faŋŋ akɛ be ni akɛfeɔ enɛ lɛ nɛ hewɔ lɛ, Ezra kɛ Nehemia to gbɛjianɔ kɛha ŋmãahilɛ gbi yɛ Tishri nyɔŋ lɛ gbi ni ji 24 lɛ nɔ. Amɛkane Nyɔŋmɔ Mla lɛ ekoŋŋ, ni gbɔmɛi lɛ jaje amɛhe eshai. Kɛkɛ ni Levibii lɛ tĩ bɔ ni Nyɔŋmɔ kɛ ewebii ni egba afã lɛ ye yɛ mɔbɔnalɛ mli lɛ mli, ewie wiemɔi ni ŋɔɔ ekɛjie Yehowa yi ni ekɛ amɛ kpaŋ “kpaŋmɔ ni mli wa” ni amɛ onukpai lɛ, Levibii lɛ, kɛ osɔfoi lɛ kɛ amɛgbɛii sɔo naa.—Nehemia 9:1-38.
11. Mɛɛ “kpaŋmɔ ni mli wa” Yudafoi lɛ kɛfimɔ amɛhe?
11 Gbɔmɛi lɛ fɛɛ kã kitã akɛ amɛbaaye nibii ni aŋmala yɛ “kpaŋmɔ ni mli wa” lɛ mli lɛ anɔ. ‘Amɛbaaye anɔkwa Nyɔŋmɔ lɛ mla lɛ nɔ.’ Ni amɛkpɛlɛ nɔ akɛ amɛkɛ “shikpɔŋ lɛ nɔ bii” lɛ boteŋ kpaŋmɔ kɛha gbãlashihilɛ mli. (Nehemia 10:29-31) Agbɛnɛ hu, Yudafoi lɛ kã kitã akɛ amɛbaaye Hejɔɔmɔ Gbi lɛ nɔ, amɛbaatsu onia daa afi ni amɛkɛfi anɔkwa jamɔ sɛɛ, ni amɛkɛ lai kɛha afɔleshãa latɛ lɛ baaba, ni amɛkɛ amɛtooi kɛ tsinai akromɔbii baaha kɛha afɔleshãa, ni amɛkɛ amɛshikpɔŋ lɛ nɔ tsei anɔ yibii baaba sɔlemɔwe lɛ niyelihei lɛ. Eyɛ faŋŋ akɛ amɛtswa amɛfai shi akɛ ‘amɛkwaŋ amɛ-Nyɔŋmɔ lɛ we lɛ.’—Nehemia 10:33-40.
12. Mɛni kɔɔ Nyɔŋmɔ we lɛ ni akwaŋ ŋmɛnɛ lɛ he?
12 Ŋmɛnɛ, esa akɛ Yehowa webii akwɛ jogbaŋŋ ni amɛkaku amɛhiɛ amɛshwie hegbɛ ní amɛná akɛ ‘amɛkɛ sɔɔmɔ krɔŋkrɔŋ aaaha’ yɛ Yehowa mumɔŋ sɔlemɔtsu kpeteŋkpele lɛ kpo lɛ nɔ lɛ nɔ. (Kpojiemɔ 7:15) Enɛ kɔɔ daa sɔlemɔi ni jɛ tsuiŋ kɛha Yehowa jamɔ lɛ nɔyaa lɛ he. Sɔlemɔi nɛɛ ni wɔɔhi shi yɛ naa lɛ biɔ hesaamɔ kɛha Kristofoi akpeei kɛ he ni akɛwoɔ mli, kɛ gbɛjianɔtoo kɛha shiɛmɔ nitsumɔ lɛ mli gbɛfaŋnɔ ni anáa, kɛ mɛi ni yɔɔ wiemɔ lɛ he miishɛɛ lɛ ayelikɛbuamɔ kɛtsɔ sɛɛkuu nɔ kɛ́ aaahi, koni akɛ amɛ afee Biblia mli nikasemɔi. Mɛi pii ni sumɔɔɔ akɛ amɛkwaa Nyɔŋmɔ we lɛ kɛ shika yeɔ buaa shiɛmɔ nitsumɔ lɛ kɛ anɔkwa jamɔhei lɛ asaamɔ. Wɔ hu wɔbaanyɛ wɔye wɔbua kpeehei ni he hiaa waa lɛ amãamɔ ni wɔha amɛhe atse ni amɛfee falefale hu. Gbɛ ni he hiaa ni wɔɔtsɔ nɔ wɔjie suɔmɔ kpo kɛha Nyɔŋmɔ mumɔŋ we lɛ ji ni wɔha toiŋjɔlɛ ashwere yɛ heyelilɔi lɛ ateŋ, ni wɔye wɔbua mɛi ni heloonaa loo mumɔŋ yelikɛbuamɔ he hiaa amɛ lɛ.—Mateo 24:14; 28:19, 20; Hebribii 13:15, 16.
Naagbelemɔ Gbi Jurɔ kɛ Miishɛɛ
13. Mɛɛ sane ni he hiaa ebiɔ ni agbala jwɛŋmɔ kɛya nɔ dani anyɛ agbele Yerusalem gbogbo lɛ naa, ni mɛɛ nɔkwɛmɔnɔ kpakpa mɛi pii fee?
13 “Kpaŋmɔ ni mli wa” ni asɔo naa yɛ Nehemia gbii lɛ amli lɛ saa Nyɔŋmɔ blema webii lɛ kɛha gbi ni abaagbele Yerusalem gbogbo lɛ naa lɛ. Shi ehe miihia ni atsu sane kroko ko ni he hiaa he nii lolo. Amrɔ nɛɛ ni atswa gbogbo ni da awo he kɛ agbói 12 nɛɛ, ehe miihia ni aná gbɔmɛi ni fa yɛ Yerusalem. Eyɛ mli akɛ Israelbii komɛi yɛ jɛmɛ moŋ, “shi maŋ lɛ mli lɛɛ ni eda hu, shi mɛi ni yɔɔ mli lɛ faaa.” (Nehemia 7:4) Bɔni afee ni amɛtsu naagba nɛɛ he nii lɛ, gbɔmɛi lɛ “fɔ̃fɔ̃ɔ oshikii, koni mɛi nyɔŋma ateŋ lɛ mɔ kome abahi Yerusalem, maŋ krɔŋkrɔŋ lɛŋ.” Bɔ ni amɛjɛ amɛsuɔmɔ mli amɛkpɛlɛ gbɛjianɔtoo nɛɛ nɔ lɛ tsirɛ gbɔmɛi lɛ ni amɛjɔɔ “hii fɛɛ ni shi amɛtsitsi akɛ amɛaabahi Yerusalem lɛ.” (Nehemia 11:1, 2) Mɛɛ nɔkwɛmɔnɔ kpakpa po enɛ ji kɛha anɔkwa jalɔi fɛɛ ni ŋmɛnɛ amɛshihilɛi ŋmɛɔ amɛ gbɛ koni amɛfã kɛya he ni Kristofoi ni amɛdara yɛ mumɔŋ lɛ ayelikɛbuamɔ he hiaa waa yɛ lɛ nɛkɛ!
14. Mɛni ba yɛ Yerusalem gbogbo lɛ naagbelemɔ gbi lɛ nɔ?
14 Etsɛɛɛ ni hesaamɔi ni he hiaa je shishi kɛha gbi wulu ni akɛbaagbele Yerusalem gbogbo lɛ naa lɛ. Abua lalafolɔi kɛ lalɔi anaa kɛjɛ Yuda maji ni bɔle amɛ lɛ amli. Afee amɛ shidaa lalɔi akui wuji enyɔ, ni abaato sɛrɛnɛɛ kɛnyiɛ kuu fɛɛ kuu sɛɛ. (Nehemia 12:27-31, 36, 38) Lalɔi lɛ kɛ mɛi ni amɛto kɛnyiɛ amɛsɛɛ lɛ je shishi kɛjɛ gbogbo lɛ nɔ he ko ni kɛ sɔlemɔtsu lɛ teŋ jɛkɛ, ekolɛ kɛjɛ Jɔɔ Agbo lɛ naa, ni amɛnyiɛ kɛtsɔ hei srɔtoi enyɔ kɛyashi be mli ni amɛbakpe yɛ Nyɔŋmɔ we lɛ. “Ni amɛshã shãa afɔlei babaoo nakai gbi lɛ, ni amɛnyanyai; ejaakɛ Nyɔŋmɔ ehã amɛnya nyamɔ kpeteŋkpele; ni yei lɛ kɛ gbekɛbii lɛ hu nyanyai, aahu ni anu Yerusalem nyamɔ lɛ yɛ shɔŋŋ po.”—Nehemia 12:43.
15. Mɛni hewɔ Yerusalem gbogbo lɛ nɔjɔɔmɔ lɛ jeee nɔ ni adamɔɔ nɔ anáa naanɔ miishɛɛ lɛ?
15 Biblia lɛ etsɔɔɔ be ni nyamɔ gbi jurɔ nɛɛ tee nɔ lɛ. Ŋwanejee ko bɛ he akɛ eji Yerusalem saamɔ ekoŋŋ lɛ mli be ni he hiaa fe fɛɛ, nifeemɔ lɛ naagbee. Shi kɛlɛ, ehe miihia ni aya nɔ atsu tsũtswaa he nii babaoo yɛ maŋtiase lɛ mli diɛŋtsɛ. Beni be shwieɔ mli lɛ, Yerusalem maŋ lɛ mli bii lɛ laaje amɛmumɔŋ shidaamɔ kpakpa lɛ. Ákɛ nɔkwɛmɔnɔ lɛ, beni Nehemia yasara maŋ lɛ nɔ ni ji shii enyɔ lɛ, ena akɛ aaku hiɛ aashwie Nyɔŋmɔ we lɛ nɔ ekoŋŋ, ni Israelbii lɛ kɛ yei wɔŋjalɔi miibote gbãlashihilɛ mli ekoŋŋ. (Nehemia 13:6-11, 15, 23) Áma shihilɛ gbohii nɛɛ nɔŋŋ nɔ mi yɛ gbalɔ Maleaki niŋmaai lɛ amli. (Maleaki 1:6-8; 2:11; 3:8) No hewɔ lɛ, Yerusalem gbogbo lɛ nɔjɔɔmɔ lɛ jeee nɔ ni kɛ naanɔ miishɛɛ baa.
Nɔ ni kɛ Naanɔ Miishɛɛ Baa
16. Mɛɛ naagbee nibii Nyɔŋmɔ webii kpaa amɛ gbɛ?
16 Ŋmɛnɛ, Yehowa webii miishwe be ni Nyɔŋmɔ baaye ehenyɛlɔi fɛɛ nɔ kunim lɛ. Enɛ baaje shishi kɛ “Babilon Kpeteŋkpele”—mfonirifeemɔŋ maŋtiase ko ni feɔ apasa jamɔi fɛɛ lɛ hiɛkpatamɔ. (Kpojiemɔ 18:2, 8) Apasa jamɔ hiɛkpatamɔ baakadi amanehulu kpeteŋkpele ni baa lɛ klɛŋklɛŋ nifeemɔ. (Mateo 24:21, 22) Nɔ ni kã wɔhiɛ hu ji nifeemɔ ko ni he hiaa diɛŋtsɛ—Nuntsɔ Yesu Kristo kɛ eyemforo ni ji mɛi 144,000 ni feɔ “Yerusalem Hee” lɛ mli bii lɛ agbãlashihilɛ yɛ ŋwɛi lɛ. (Kpojiemɔ 19:7; 21:2) Wɔnyɛŋ wɔtsɔɔ be pɔtɛɛ mli ni nakai ŋwɛi gbãlashihilɛ lɛ baaba naagbee, shi ebaafee miishɛɛ be diɛŋtsɛ.—Kwɛmɔ August 15, 1990, Watchtower lɛ baafai 30-31.
17. Mɛni wɔle yɛ Yerusalem Hee lɛ ni aaagbe naa lɛ he?
17 Wɔle akɛ Yerusalem Hee lɛ ní aaagbe naa lɛ ebɛŋkɛ kpaakpa. (Mateo 24:3, 7-14; Kpojiemɔ 12:12) Ákɛ nɔ ni tamɔɔɔ shikpɔŋ nɔ Yerusalem maŋtiase lɛ, efeŋ nɔ ni baaha mɔ nijiaŋ aje wui kɔkɔɔkɔ. Nɔ̃ hewɔ lɛ ji akɛ, emli bii lɛ fɛɛ ji Yesu Kristo sɛɛnyiɛlɔi ní akɛ mumɔ efɔ amɛ mũ, áka amɛ ákwɛ, ni átsuu amɛhe. Kɛ́ amɛye anɔkwa kɛyashi gbele mli lɛ, etsɔɔ akɛ amɛteŋ mɔ fɛɛ mɔ efee mɔ ni yeɔ Jeŋ Muu Fɛɛ Maŋtsɛ, Yehowa Nyɔŋmɔ anɔkwa kɛyaa naanɔ. Enɛ tsɔɔ nɔ ko pɔtɛɛ kɛhaa adesai ni eshwɛ lɛ—hiɛkalɔi kɛ gbohii!
18. Mɛni hewɔ esa akɛ ‘wɔnya ni wɔmli afili wɔ kɛya naanɔ’ lɛ?
18 Susumɔ nɔ ni baaba beni Yerusalem Hee lɛ gbalaa ejwɛŋmɔ kɛyaa adesai ni tsɔɔ Yesu kpɔ̃mɔ afɔleshãa lɛ mli hemɔkɛyeli lɛ anɔ lɛ he okwɛ. Bɔfo Yohane ŋma akɛ: “Naa, Nyɔŋmɔ buu lɛ yɛ gbɔmɛi ateŋ, ni eeeshi ebuu lɛ yɛ amɛteŋ, ni amɛaatsɔmɔ emaŋ, ni Nyɔŋmɔ diɛŋtsɛ kɛ amɛ aaahi shi, ni eeetsɔ amɛ-Nyɔŋmɔ. Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.” (Kpojiemɔ 21:2-4) Agbɛnɛ hu, Nyɔŋmɔ kɛ nɛkɛ maŋtiase gbɛjianɔtoo nɛɛ baatsu nii ni ekɛhole gbɔmɛi anɔ kɛya adesa emuuyeli mli. (Kpojiemɔ 22:1, 2) Mɛɛ naakpɛɛ yiŋtoi ‘ní aaaha mɔ mli afili lɛ kɛya naanɔ yɛ nii ni Nyɔŋmɔ bɔɔ agbɛnɛ lɛ hewɔ’ enɛɛmɛi ji nɛkɛ!—Yesaia 65:18.
19. Mɛni ji mumɔŋ paradeiso ni ábua Kristofoi anaa áwo mli lɛ?
19 Shi kɛlɛ, ehe ehiaaa ni adesai ni amɛtsake amɛtsui lɛ amɛ kɛyashi nakai be lɛ mli koni amɛnine ashɛ Nyɔŋmɔ dɛŋ yelikɛbuamɔ nɔ. Afi 1919 mli ni Yehowa je mɛi 144,000 lɛ naagbee bii lɛ naabuamɔ shishi koni akɛ amɛ awo mumɔŋ paradeiso mli, he ni Nyɔŋmɔ mumɔ lɛ yibii—tamɔ suɔmɔ, miishɛɛ, kɛ toiŋjɔlɛ—fa babaoo yɛ lɛ. (Galatabii 5:22, 23) Mumɔŋ paradeiso nɛɛ he nɔ̃ ko ni jeɔ kpo waa lɛ efee emli bii ni afɔ amɛ mũ lɛ ahemɔkɛyeli, mɛi ni amɛwo yibii babaoo yɛ Nyɔŋmɔ Maŋtsɛyeli lɛ he sanekpakpa lɛ shiɛmɔ yɛ shikpɔŋ ni ayɔɔ nɔ lɛ fɛɛ nɔ lɛ hiɛ ni ámɛnyiɛ lɛ. (Mateo 21:43; 24:14) Yɛ enɛ hewɔ lɛ, áŋmɛ “tooi krokomɛi” ni miihe ashɛ akpekpei ekpaa, ni yɔɔ shikpɔŋ nɔ hiɛnɔkamɔ lɛ gbɛ koni amɛbote mumɔŋ paradeiso lɛ mli ni amɛbaná nitsumɔ ni woɔ yibii amli ŋɔɔmɔ. (Yohane 10:16) Amɛhe esa kɛha enɛ, kɛtsɔ e-Bi Yesu Kristo kpɔ̃mɔ afɔleshãa lɛ mli hemɔkɛyeli ni amɛyɔɔ lɛ ni amɛdamɔ nɔ amɛjɔɔ amɛhe nɔ amɛha Yehowa Nyɔŋmɔ lɛ nɔ. Amɛhe ni amɛkɛbɔ mɛi ni baatsɔmɔ Yerusalem Hee lɛ mli bii wɔsɛɛ lɛ ahe lɛ efee jɔɔmɔ diɛŋtsɛ kɛha amɛ. No hewɔ lɛ, Yehowa etsɔ bɔ ni ekɛ Kristofoi ni afɔ amɛ mũ lɛ ye hã lɛ nɔ ekɛ “shikpɔŋ hee” lɛ shishitoo ni ma shi shiŋŋ ema shi—gbɔmɛi asafoku ko ni sheɔ Nyɔŋmɔ gbeyei ni baahi ŋwɛi Maŋtsɛyeli lɛ shikpɔŋ nɔ nɔyelihe lɛ nɔ.—Yesaia 65:17; 2 Petro 3:13.
20. Yerusalem Hee lɛ baahi shi yɛ egbɛi lɛ shishinumɔ naa yɛ mɛɛ gbɛ nɔ?
20 Etsɛŋ ni toiŋjɔlɛ shihilɛi ni Yehowa webii náa mli ŋɔɔmɔ bianɛ yɛ amɛmumɔŋ paradeiso lɛ mli lɛ baaje kpo yɛ paradeiso diɛŋtsɛ mli yɛ shikpɔŋ nɔ. Enɛ baaba yɛ be mli ni Yerusalem Hee lɛ kpelekeɔ shi kɛjɛɔ ŋwɛi koni ebajɔɔ adesai lɛ. Nyɔŋmɔ webii baaná toiŋjɔlɛ shihilɛi ni áwo shi yɛ he yɛ Yesaia 65:21-25 lɛ mli ŋɔɔmɔ yɛ gbɛi srɔtoi enyɔ nɔ. Ákɛ Yehowa jalɔi ni amɛ́fee ekome yɛ mumɔŋ paradeiso lɛ mli lɛ, mɛi ni afɔ amɛ mũ lɛ ni kpaako amɛnine baashɛ amɛgbɛhe nɔ yɛ ŋwɛi Yerusalem Hee lɛ mli lɛ kɛ “tooi krokomɛi” lɛ anine miishɛ toiŋjɔlɛ ni Nyɔŋmɔ kɛha lɛ nɔ bianɛ. Ni toiŋjɔlɛ ni tamɔ nɛkɛ lɛ mli baakpã kɛyabote Paradeiso diɛŋtsɛ lɛ mli, beni ‘Nyɔŋmɔ suɔmɔnaa nii yaa nɔ yɛ shikpɔŋ lɛ fɛɛ nɔ taakɛ eyaa nɔ yɛ ŋwɛi lɛ.’ (Mateo 6:10) Hɛɛ, Nyɔŋmɔ anunyam ŋwɛi maŋtiase lɛ baaye egbɛi Yerusalem lɛ anɔkwa akɛ ‘Toiŋjɔlɛ Shishitoo ni Bɔ He Enyɔ’ ni ma shi shiŋŋ. Ebaadamɔ shi akɛ naanɔ yijiemɔ nii kɛha e-Bɔlɔ Kpeteŋkpele lɛ, Yehowa Nyɔŋmɔ, kɛ e-Maŋtsɛ Ayemforowu, Yesu Kristo.
Ani Okaiɔ?
◻ Mɛni atsu beni Nehemia bua maŋ lɛ naa yɛ Yerusalem lɛ?
◻ Mɛni esa akɛ blema Yudafoi lɛ afee koni amɛkakwa Nyɔŋmɔ we lɛ, ni aabi ni wɔfee mɛni?
◻ “Yerusalem” kɔɔ naanɔ miishɛɛ kɛ toiŋjɔlɛ ni akɛaaba lɛ he yɛ mɛɛ gbɛ nɔ?
[Shikpɔŋ he mfoniri ni yɔɔ baafa 23]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
YERUSALEM AGBÓ
Yibɔ okadii lɛ damɔ shi kɛha ŋmɛnɛŋmɛnɛ beaŋ nɔkwɔlɛ yɛ mitai amli
LOOI AGBÓ
AGBÓ MOMO
EFRAIM AGBÓ
KOŊ AGBÓ
Gbogbo Lɛkɛtɛɛ
Blohuŋ
JƆƆ AGBÓ
MLIJAA EJWƐ NI JI ENYƆ
Mra Kooyigbɛ Gbogbo
DAVID MAŊ
TUMU AGBÓ
Hinom Jɔɔ
Mɔɔ
TOOI AGBÓ
BULƆI AGBÓ
Sɔlemɔwe Maahe
SARAMƆ AGBÓ
OKPƆŊƆI AGBÓ
OFEL
Blohuŋ
NU AGBÓ
Gihon Nuhiŋmɛi
NUBU AGBÓ
Maŋtsɛ Abɔɔ
Rogel
Tyropoeon (Teŋgbɛ) Jɔɔ
Kidron Faa Jɔɔ
740
730
730
750
770
770
750
730
710
690
670
620
640
660
680
700
720
740
730
710
690
670
He ni eeenyɛ efee akɛ Yerusalem gbogbo lɛ yashɛɔ yɛ be mli ni akpata maŋtiase lɛ hiɛ lɛ kɛ be mli ni Nehemia banyiɛ gbogbo lɛ tswaa ekoŋŋ hiɛ lɛ