Nɔ Ni Wɔkaseɔ Kɛjɛɔ Sɔlemɔ Ko Ni Sa Mli

 1. Mɛɛ Nyɔŋmɔ webii lɛ ahenaabuamɔ ko he wɔbaasusu, ni mɛɛ sanebimɔi esa akɛ wɔsusu he?

“NYƐTEA SHI ní nyɛjiea Yehowa, nyɛ-Nyɔŋmɔ lɛ, yi, kɛjɛ naanɔ kɛyashi naanɔ!” Levibii lɛ kɛ wiemɔi ni kanyaa mɔ nɛɛ fɔ̃ Nyɔŋmɔ webii lɛ nine koni amɛbabua amɛhe naa kɛsɔle amɛha Yehowa, ni sɔlemɔ nɛɛ ji sɔlemɔi ni sɛɛ kɛlɛ yɛ Biblia lɛ mli lɛ ateŋ ekome. (Neh. 9:4, 5) Henaabuamɔ nɛɛ tee nɔ yɛ Yerusalem yɛ Yudafoi anyɔɔŋ ni ji kpawo ni atsɛɔ lɛ Tishri lɛ nɔ gbi 24, afi 455 D.Ŋ.B. Beni wɔsusuɔ nakai henaabuamɔ lɛ he lɛ, bi ohe akɛ: ‘Mɛni Levibii lɛ fee ni ha nɔ fɛɛ nɔ tee nɔ jogbaŋŋ yɛ nakai henaabuamɔ lɛ shishi? Mɛni manyɛ makase kɛjɛ sɔlemɔ ni sa jogbaŋŋ ni Levibii lɛ sɔle lɛ mli?’—Lala 141:2.

 2. Mɛɛ nɔkwɛmɔnɔ kpakpa Israelbii lɛ fee kɛha wɔ ŋmɛnɛ?

² Beni Yudafoi lɛ tswa Yerusalem gbogboi lɛ amɛgbe naa lɛ sɛɛ nyɔɔŋ kome ni amɛfee henaabuamɔ ni wɔtsĩ tã nɛɛ. (Neh. 6:15) Nyɔŋmɔ webii lɛ gbe nitsumɔ lɛ naa yɛ gbii 52 pɛ mli, kɛkɛ ni amɛkɛ amɛjwɛŋmɔ ma amɛmumɔŋ hiamɔ nii anɔ. No hewɔ lɛ, yɛ nyɔɔŋ ni nyiɛ sɛɛ ni ji Tishri lɛ klɛŋklɛŋ gbi lɛ nɔ lɛ, amɛbua amɛhe naa yɛ blohu lɛ mli koni amɛbo Ezra kɛ Levibii krokomɛi lɛ atoi, beni amɛkaneɔ Nyɔŋmɔ Mla lɛ ni amɛtsɔɔ shishi lɛ. Wekui fɛɛ, ni “mɛi fɛɛ ní kɛ́ amɛnu ní amɛaanu shishi” lɛ fata he lɛ, damɔ shi ni amɛbo toi “kɛjɛ leebi kɛyashi shwane fintĩi.” Enɛ ji nɔkwɛmɔnɔ kpakpa kɛha wɔ mɛi ni ŋmɛnɛ lɛ, wɔyadamɔɔɔ shi kɛ́ wɔtee Maŋtsɛyeli Asai anɔ, shi moŋ wɔyataraa sɛ̃ii anɔ lɛ! Kɛlɛ, kɛ́ wɔtee jɛmɛ lɛ, ani wɔjwɛŋmɔ kpaa shi ni wɔsusuɔ nibii krokomɛi ahe beni kpeei lɛ miiya nɔ? Kɛ́ nakai lɛ, susumɔ nɔkwɛmɔnɔ kroko ni Israelbii ni hi shi yɛ blema lɛ fee lɛ he okwɛ. Jeee sane lɛ toi kɛkɛ amɛbo, shi amɛjwɛŋ nɔ ni amɛnu lɛ nɔ aahu akɛ amɛbɔi yaafo ejaakɛ amɛyeko Nyɔŋmɔ Mla lɛ nɔ.—Neh. 8:1-9.

 3. Mɛɛ gbɛtsɔɔmɔ Israelbii lɛ bo toi?

³ Shi be ni akɛjajeɔ he eshai lɛ shɛko. Eji gbijurɔyeli be, no hewɔ lɛ Yehowa miikpa gbɛ akɛ ewebii lɛ kɛ miishɛɛ baajá lɛ. (4 Mose 29:1) No hewɔ lɛ, Nehemia kɛɛ amɛ akɛ: “Nyɛyaa ní nyɛyayea nii ní ewo fɔ, ní nyɛnua nii ní ŋɔɔ dɔkɔdɔkɔ, ní nyɛkɛ eko amajea mɛi ní afeko nɔ ko atoko amɛ lɛ; ejaakɛ ŋmɛnɛ gbi nɛɛ yɛ krɔŋkrɔŋ ha wɔ-Nuŋtsɔ lɛ, hewɔ lɛ nyɛwerɛ akahoa nyɛhe; ejaakɛ Yehowa he nyamɔ lɛ ji nyɛhewalɛ!” Miishɛɛ sane ji akɛ, maŋbii lɛ bo toi, ni “amɛná miishɛɛ babaoo” nakai gbi lɛ.—Neh. 8:10-12.

 4. Mɛni Israel weku yitsei lɛ fee, ni mɛni amɛyɔse yɛ Asesei Agbi Jurɔ nɛɛ he ni sa kadimɔ?

⁴ Enɔ jetsɛremɔ lɛ, weku yitsei lɛ fɛɛ bua amɛhe naa koni amɛkwɛ bɔ ni maŋ lɛ aaafee abo Nyɔŋmɔ Mla lɛ toi jogbaŋŋ fe tsutsu lɛ. Beni amɛkaseɔ Mla lɛ, amɛbayɔse akɛ esa akɛ aye Asesei Agbi Jurɔ lɛ yɛ nyɔɔŋ ni ji kpawo lɛ nɔŋŋ nɔ, ni amu naa kɛ kpee krɔŋkrɔŋ, kɛjɛ Tishri 15 kɛyashi 22 lɛ nɔ, no hewɔ lɛ, amɛbɔi amɛhe saamɔ. Enɛ bafee Asesei Agbi Jurɔ ni fe fɛɛ ni aye kɛjɛ Yoshua gbii lɛ amli kɛbaa, ni “amɛmii shɛ amɛhe naakpa.” Nɔ ko ni he hiaa waa ni afee yɛ gbijurɔyeli nɛɛ shishi ji Nyɔŋmɔ Mla lɛ ni akane gbi fɛɛ gbi, “kɛjɛ klɛŋklɛŋ gbi lɛ nɔ aahu kɛyashi naagbee gbi lɛ nɔ” lɛ.—Neh. 8:13-18.

 5. Mɛni Nyɔŋmɔ webii lɛ fee dani Levibii lɛ sɔle amɛha amɛ lɛ?

⁵ Gbijurɔyeli lɛ sɛɛ gbii enyɔ, ni ji Tishri gbi 24 lɛ nɔ lɛ, Israelbii lɛ bajaje amɛhe eshai yɛ Nyɔŋmɔ Mla lɛ ni amɛyeko nɔ lɛ hewɔ. Gbi nɛɛ jeee niyeli kɛ mlifilimɔ gbi. Shi moŋ, eji gbi ni Nyɔŋmɔ webii lɛ kɛhiɔ ŋmaa ni amɛkɛbumɔɔ kpekpe kɛtsɔɔ akɛ amɛmiiye awerɛho. Shi kome ekoŋŋ lɛ, nakai gbi lɛ leebi lɛ, akɛ nɔ ni miihe ashɛ ŋmɛlɛtswai etɛ sɔŋŋ kane Nyɔŋmɔ Mla lɛ aha maŋ lɛ. Beni shɛ shwane lɛ, maŋbii lɛ “jaje amɛhe eshai ni amɛjá Yehowa, amɛ-Nyɔŋmɔ lɛ.” Kɛkɛ ni Levibii lɛ sɔle sɔlemɔ ko ni sa jogbaŋŋ amɛha maŋ lɛ. ​—Neh. 9:1-4.

 6. Mɛni ye ebua Levibii lɛ ni amɛnyɛ amɛsɔle jogbaŋŋ lɛ, ni mɛni wɔkaseɔ yɛ enɛ mli?

⁶ Ŋwanejee ko bɛ he akɛ, Nyɔŋmɔ Mla lɛ ni Levibii lɛ kaneɔ daa lɛ ji nɔ ni ye ebua amɛ ni amɛsɔle sɔlemɔ ni sa jogbaŋŋ nɛɛ. Sɔlemɔ lɛ klɛŋklɛŋ fã lɛ kɔɔ Yehowa nitsumɔi kɛ esui lɛ ahe. Yɛ sɔlemɔ lɛ fã ni eshwɛ mli lɛ, amɛwie Nyɔŋmɔ ‘mɔbɔnalɛ babaoo’ lɛ he shii abɔ, ni amɛfee lɛ faŋŋ akɛ mɔbɔnalɛ nɛɛ esaaa Israelbii lɛ. (Neh. 9:19, 27, 28, 31) Mɛni wɔkaseɔ kɛjɛɔ Levibii lɛ adɛŋ? No ji akɛ, esa akɛ wɔkane Nyɔŋmɔ Wiemɔ lɛ daa gbi ni wɔjwɛŋ nɔ, ejaakɛ no tsɔɔ akɛ wɔmiiha Yehowa kɛwɔ miiwie. Ni no sɛɛ lɛ, wɔbaaná nibii babaoo ni wɔbaanyɛ wɔwie he yɛ sɔlemɔ mli.—Lala 1:1, 2.

 7. Mɛni Levibii lɛ bi Nyɔŋmɔ, ni mɛni wɔkaseɔ kɛjɛɔ mli?

⁷ Nɔ kome pɛ Levibii lɛ bi yɛ sɔlemɔ nɛɛ mli. Ejeɔ kpo yɛ sɔlemɔ lɛ naagbee gbɛ yɛ kuku 32 lɛ mli, ni ekɛɔ akɛ: “Agbɛnɛ, wɔ-Nyɔŋmɔ, Mawu kpeteŋkpele ní he wa ní he yɔɔ gbeyei ní toɔ kpaŋmɔ kɛ mɔbɔnalɛ! kaaha amanehulu fɛɛ ní eba wɔ kɛ wɔmaŋtsɛmɛi kɛ wɔnukpai kɛ wɔsɔfoi kɛ wɔgbalɔi kɛ wɔtsɛmɛi lɛ kɛ omaŋ lɛ fɛɛ nɔ, kɛjɛ Ashur maŋtsɛmɛi lɛ ayinɔ kɛbashi ŋmɛnɛ lɛ, miifee bibioo yɛ ohiɛ!” Levibii lɛ fee nɔkwɛmɔnɔ kpakpa amɛha wɔ akɛ, kɛ́ wɔmiisɔle lɛ, esa akɛ wɔjie Yehowa yi ni wɔda lɛ shi dani wɔbi nibii ni he hiaa wɔ lɛ.

8, 9. (a) Mɛɛ gbɛ nɔ Levibii lɛ je amɛsɔlemɔ lɛ shishi? (b) Mɛɛ ŋwɛi asafoi enyɔ Levibii lɛ wie he yɛ amɛsɔlemɔ lɛ mli?

⁸ Eyɛ mli akɛ Levibii lɛ asɔlemɔ lɛ sa jogbaŋŋ moŋ, shi amɛnu he akɛ amɛnyɛɛɛ amɛjie Yehowa yi bɔ ni amɛtaoɔ amɛfee lɛ. Enɛ hewɔ lɛ, amɛje sɔlemɔ lɛ shishi kɛ fai ni amɛkpa amɛha Nyɔŋmɔ webii lɛ akɛ: ‘Ha amɛjie onunyam gbɛ́i lɛ ní kwɔ fe yijiemɔ kɛ kafomɔ fɛɛ lɛ yi.’—Neh. 9:5.

⁹ Amɛtsa sɔlemɔ lɛ nɔ akɛ: “Bo okome too ji Yehowa; bo ofee ŋwɛi kɛ ŋwɛii amli ŋwɛi lɛ kɛ amɛsafo lɛ fɛɛ, shikpɔŋ kɛ nɔ fɛɛ nɔ ní yɔɔ nɔ, ŋshɔi kɛ nɔ fɛɛ nɔ ní yɔɔ amɛmli, ni bo nɔŋŋ ohaa amɛ fɛɛ kwa amɛyi náa wala, ni ŋwɛi asafo lɛ, bo nɔŋŋ amɛjáa!” (Neh. 9:6) Hɛɛ, Yehowa Nyɔŋmɔ ji mɔ ni bɔ jeŋ muu lɛ, kɛ emli ŋulamii kushai abɔ lɛ fɛɛ. Lɛ nɔŋŋ ebɔ nɔ fɛɛ nɔ ni yɔɔ wɔshikpɔŋ fɛfɛo lɛ nɔ, ni eto gbɛjianɔ koni gbɔmɛi kɛ kooloi babaoo ni yɔɔ nɔ lɛ afɔ amɛhenɔi. Nyɔŋmɔ bɔfoi krɔŋkrɔŋi lɛ ni awie amɛ hu amɛhe akɛ “ŋwɛi ta [loo asafo]” lɛ, na nibii fɛɛ ni Yehowa bɔ lɛ. (1 Maŋ. 22:19; Hiob 38:4, 7) Kɛfata he lɛ, bɔfoi lɛ jɛɔ heshibaa mli amɛfeɔ Nyɔŋmɔ suɔmɔnaa nii kɛtsɔ sɔɔmɔ ni amɛsɔmɔɔ adesai ni yeee emuu ni “baatsɔmɔ yiwalaheremɔ lɛ yelɔi lɛ” nɔ. (Heb. 1:14) Esa akɛ wɔkase nɔkwɛmɔnɔ ni ŋwɛibɔfoi nɛɛ feɔ amɛhaa wɔ lɛ, ni wɔjɛ heshibaa mli wɔfee ekome kɛsɔmɔ Yehowa akɛ asafoku.—1 Kor. 14:33, 40.

10. Mɛni wɔkaseɔ kɛjɛɔ bɔ ni Nyɔŋmɔ kɛ Abraham ye ha lɛ mli?

¹⁰ No sɛɛ lɛ, Levibii lɛ wie bɔ ni Nyɔŋmɔ kɛ Abram, mɔ ni beni enaa afii 99 lɛ ekɛ eŋa Sarai, ni ji kene lɛ fɔko bi kome po lɛ ye eha lɛ he. Nakai beaŋ Yehowa tsake egbɛ́i lɛ ni etsɛ lɛ Abraham, ni eshishi ji “jeŋmaji asafo yuu atsɛ.” (1 Mose 17:1-6, 15, 16) Nyɔŋmɔ wo Abraham shi hu akɛ eseshibii lɛ baaŋɔ Kanaan shikpɔŋ lɛ. Bei pii kɛ́ gbɔmɛi wo shi lɛ, amɛhiɛ jeɔ amɛhe nɔ; shi Yehowa bɛ nakai. Levibii lɛ wie yɛ amɛsɔlemɔ lɛ mli akɛ: “Bo ji Yehowa Nyɔŋmɔ lɛ, ní ohala Abram ní ojie lɛ kɛjɛ Ur yɛ Kaldea, ní oŋɔ gbɛ́i Abraham lɛ owo lɛ lɛ. Ni ona akɛ etsui yɛ anɔkwa yɛ ohiɛ, ni okɛ lɛ kpãŋ akɛ okɛ Kanaanbii lɛ . . . ashikpɔŋ lɛ aaaha eseshibii lɛ; ni oye owiemɔ lɛ nɔ, ejaakɛ jalɔ jio.” (Neh. 9:7, 8) Nyɛhaa wɔ hu wɔyea wɔwiemɔ nɔ be fɛɛ be ni wɔkɛkase wɔ-Nyɔŋmɔ ni ji jalɔ lɛ.—Mat. 5:37.

11, 12. Mɛni ji gbɛ́i Yehowa lɛ shishi, ni mɛni Yehowa fee eha Abraham seshibii lɛ ni tsɔɔ akɛ nakai gbɛ́i lɛ sa lɛ?

¹¹ Gbɛ́i Yehowa lɛ shishi ji, “Ehaa Ebaa Mli,” ni tsɔɔ akɛ Nyɔŋmɔ yaa nɔ etsuɔ saji ahe nii kɛyashiɔ eshiwoi baa mli. Anaa enɛ he nɔkwɛmɔnɔ yɛ bɔ ni ekɛ Abraham seshibii ni yatsɔmɔ nyɔji yɛ Mizraim lɛ ye eha lɛ mli. Beni amɛji nyɔji yɛ Mizraim lɛ, nɔ ko kwraa bɛ ni tsɔɔ akɛ maŋ muu lɛ fɛɛ baaye amɛhe ni amɛya Shiwoo Shikpɔŋ lɛ nɔ. Shi Nyɔŋmɔ tee nɔ etsu saji ahe nii ni eha shi ni ewo lɛ ba mli, eha ana akɛ gbɛ́i Yehowa lɛ sa lɛ lɛɛlɛŋ.

¹² Beni Levibii lɛ sɔleɔ lɛ, amɛwie nibii komɛi yɛ Yehowa he akɛ: “Ona amanehulu ní wɔtsɛmɛi lɛ naa yɛ Mizraim lɛ, ni obo amɛbolɔmɔ lɛ toi yɛ Ŋshɔ Tsuru lɛ naa. Ni ofee okadii kɛ naakpɛɛ nii yɛ Farao kɛ etsuji lɛ fɛɛ kɛ eshikpɔŋ lɛ nɔ bii lɛ fɛɛ nɔ; ejaakɛ ole akɛ amɛtsɔ kpá yɛ amɛnɔ; ni okɛhere gbɛ́i oha ohe, tamɔ bɔ ni yɔɔ ŋmɛnɛ nɛɛ. Ni ogbá ŋshɔ lɛ mli yɛ amɛhiɛ, ni amɛnyiɛ shikpɔŋ gbiŋ nɔ kɛtsɔ ŋshɔ lɛ teŋ; shi mɛi ní tiuɔ amɛ lɛ oshɛrɛ amɛ oshwie bu kwɔŋkwɔŋ lɛ mli tamɔ tɛ yɛ nu ní he wa lɛ mli.” No sɛɛ lɛ, amɛwie nɔ kroko ni Yehowa fee eha ewebii lɛ he akɛ: “Oba shikpɔŋ lɛ nɔ bii ni ji Kanaanbii lɛ ashi yɛ amɛhiɛ . . . Ni amɛŋɔ maji ní atswa gbogboi awo he kɛ shikpɔŋ ní ewo fɔ, ni amɛná shĩai ní mli eyimɔ obɔ̃bɔ̃ kɛ nibii kpakpai fɛɛ, nubui ní atsatsai, weintromi kɛ mutromi kɛ yelitsei babaoo; kɛkɛ ni amɛye, ni amɛtɔrɔ ni amɛshwishwii, ni amɛná tsuijurɔ yɛ omlihilɛ kpeteŋkpele lɛ hewɔ.”—Neh. 9:9-11, 24, 25.

13. Beni Israelbii lɛ shi Mizraim lɛ sɛɛ nɔŋŋ lɛ, mɛni Yehowa fee eha amɛ, shi te amɛfee amɛnii amɛha tɛŋŋ?

¹³ Yehowa fee nibii krokomɛi hu koni ekɛha eshiwoi aba mli. Akɛ nɔkwɛmɔnɔ lɛ, beni Israelbii lɛ shi Mizraim lɛ sɛɛ nɔŋŋ lɛ, Yehowa ha amɛ mlai, ni etsɔɔ amɛ bɔ ni amɛjá lɛ amɛha. Levibii lɛ wie yɛ amɛsɔlemɔ lɛ mli akɛ: “Okpeleke shi kɛba Sinai gɔŋ lɛ nɔ, ni ojɛ ŋwɛi okɛ amɛ wie, ni oha amɛ kojomɔi ní ja kɛ anɔkwa mlai kɛ akpɔi kɛ kitai kpakpai.” (Neh. 9:13) Akɛni Yehowa ehala Israelbii lɛ akɛ ewebii ni ekɛ Shiwoo Shikpɔŋ lɛ baaha amɛ hewɔ lɛ, etsɔɔ amɛ nɔ ni esa akɛ amɛfee koni amɛtsɔmɔ mɛi ni sa akɛ egbɛ́i lɛ akã amɛnɔ, shi amɛkɛ nibii kpakpai ni etsɔɔ amɛ lɛ tsuuu nii.—Nyɛkanea Nehemia 9:16-18.

14, 15. (a) Mɛɛ gbɛ nɔ Yehowa na ewebii lɛ mɔbɔ beni amɛfee esha lɛ? (b) Mɛni wɔkaseɔ kɛjɛɔ bɔ ni Nyɔŋmɔ kɛ maŋ ni ehala lɛ ye eha lɛ mli?

¹⁴ Levibii lɛ wie eshai enyɔ komɛi ni Israelbii lɛ fee beni amɛwo shi akɛ amɛbaaye Nyɔŋmɔ Mla lɛ nɔ yɛ Sinai Gɔŋ lɛ nɔ sɛɛ lɛ he. Enɛ hewɔ lɛ, kulɛ esa jogbaŋŋ akɛ ashi amɛ ni amɛgboi yɛ ŋa lɛ nɔ. Shi Levibii lɛ jie Yehowa yi yɛ sɔlemɔ lɛ mli akɛ: “Omɔbɔnalɛ babaoo lɛ naa lɛ okwaaa amɛ yɛ ŋa lɛ nɔ. . . . Okwɛ amɛ afii nyɔŋmai ejwɛ sɔŋŋ. . . . Nɔ ko nɔ ko ehiaaa amɛ: amɛtadei suuu, ni amɛnaji hu efũuu.” (Neh. 9:19, 21) Ŋmɛnɛ lɛ, Yehowa kɛ nibii ni he hiaa wɔ koni wɔnyɛ wɔya nɔ wɔye lɛ anɔkwa lɛ fɛɛ haa wɔ. Esaaa akɛ wɔfeɔ wɔnii tamɔ Israelbii lɛ ateŋ mɛi akpei abɔ ni eyabooo Yehowa toi ni no ha amɛgboi yɛ ŋa lɛ nɔ lɛ. Anɔkwa, aŋma amɛhe saji nɛɛ ni “aŋɔbɔ wɔ kɔkɔ, wɔ mɛi ni je lɛ naagbee lɛ enina wɔ lɛ.”—1 Kor. 10:1-11.

¹⁵ Dɔlɛ sane ji akɛ, beni Israelbii lɛ yashɛ Shiwoo Shikpɔŋ lɛ nɔ sɛɛ lɛ, amɛbɔi Kanaanbii lɛ anyɔŋmɔi lɛ jamɔ, ni jeŋba sha kɛ bii ni akɛshãa afɔle fata jamɔ nɛɛ he. Enɛ hewɔ lɛ, Yehowa ha maji ni bɔle Israelbii lɛ ye amɛnɔ. Shi beni amɛshwa amɛhe lɛ, Yehowa na amɛ mɔbɔ ni ekɛ amɛhe eshai lɛ fa amɛ, ni ejie amɛ kɛjɛ amɛhenyɛlɔi lɛ adɛŋ. Enɛ tee nɔ “shii abɔ.” (Nyɛkanea Nehemia 9:26-28, 31.) Levibii lɛ kɛɛ akɛ: “Oto otsui shi oha amɛ afii pii, ni otsɔ ogbalɔi lɛ anɔ okɛ omumɔ lɛ ye odase oshi amɛ; shi amɛbooo toi. No hewɔ lɛ otu amɛ owo shikpɔji lɛ anɔ bii lɛ adɛŋ.”—Neh. 9:30.

16, 17. (a) Beni Israelbii lɛ gbo Yehowa nɔ toi ekoŋŋ lɛ, mɛni jɛ mli kɛba? (b) Mɛɛ eshai Israelbii lɛ jaje, ni mɛɛ shi amɛwo?

¹⁶ Beni Israelbii lɛ ku amɛsɛɛ kɛjɛ nomŋɔɔ mli po lɛ, amɛtee nɔ amɛgbo toi. Ani amɛshihilɛ tsake? Levibii lɛ tsa amɛsɔlemɔ lɛ nɔ akɛ: “Naa, wɔ lɛ ŋmɛnɛ wɔtsɔmɔ tsuji, ni shikpɔŋ lɛ ní oŋɔha wɔtsɛmɛi lɛ akɛ amɛye enɔ yibii kɛ enɔ nii kpakpai lɛ, naa, wɔtsɔmɔ tsuji yɛ nɔ! Ni ebaa nii babaoo ehaa maŋtsɛmɛi ní oŋɔto wɔnɔ yɛ wɔhe eshai lɛ ahewɔ lɛ; . . . ni wɔyɛ haomɔ kpeteŋkpele mli!”—Neh. 9:36, 37.

¹⁷ Ani Levibii lɛ miitao amɛtsɔɔ akɛ Nyɔŋmɔ kɛ ewebii lɛ eyayeee jogbaŋŋ yɛ haomɔ nɛɛ hewɔ? Dabi kwraa! Amɛkɛɛ akɛ: “Bo lɛ, saji ní eba wɔnɔ lɛ fɛɛ mli lɛ onɔ̃ ja; ejaakɛ oye anɔkwa, shi wɔ lɛ wɔfee efɔŋ.” (Neh. 9:33) No sɛɛ lɛ, amɛwo shi akɛ amɛbaaye Nyɔŋmɔ Mla lɛ nɔ, ni amɛkɛ no mu amɛsɔlemɔ ni tsɔɔ akɛ amɛfooo amɛ pɛ amɛnɔ mli lɛ naa. (Nyɛkanea Nehemia 10:1; 10:30) Enɛ hewɔ lɛ, Yudafoi lɛ ahiɛnyiɛlɔi 84 kɛ amɛnine wo wolo shishi kɛsɔo nakai shiwoo lɛ naa.—Neh. 10:2-28.

18, 19. (a) Mɛni esa akɛ wɔfee koni wɔhi Nyɔŋmɔ jeŋ hee lɛ mli? (b) Mɛni esa akɛ wɔya nɔ wɔsɔle yɛ he, ni mɛni hewɔ?

¹⁸ Wɔ hu kɛ́ wɔmiisumɔ ni wɔhi Yehowa jalɛ jeŋ hee ni baa lɛ mli lɛ, esa akɛ wɔha Yehowa atsɔse wɔ. Bɔfo Paulo bi akɛ: “Mɛɛ bi yɔɔ ni etsɛ tsɔseee lɛ?” (Heb. 12:7) Kɛ́ wɔmia wɔhiɛ yɛ Yehowa sɔɔmɔ lɛ mli, ni wɔha etsɔse wɔ lɛ, no baatsɔɔ akɛ wɔkpɛlɛɔ Nyɔŋmɔ gbɛtsɔɔmɔ nɔ. Ni kɛ́ wɔfee esha ni yɔɔ hiɛdɔɔ lɛ, wɔbaanyɛ wɔná nɔmimaa akɛ Yehowa kɛbaafa wɔ kɛji wɔjɛ wɔtsui mli wɔshwa wɔhe ni wɔkpɛlɛ ni etsɔse wɔ.

¹⁹ Etsɛŋ, Yehowa baafee gbɛ́i kpele eha ehe fe bɔ ni efee beni ejie Israelbii lɛ kɛje Mizraim lɛ. (Ezek. 38:23) Ni taakɛ ewebii ni hi shi yɛ blema lɛ bote Shiwoo Shikpɔŋ lɛ nɔ lɛ, Kristofoi fɛɛ ni miaa amɛhiɛ akɛ enɔkwa jálɔi lɛ anine baashɛ Nyɔŋmɔ jalɛ jeŋ hee lɛ nɔ. (2 Pet. 3:13) Gbɛkpamɔi nɛɛ ahewɔ lɛ, nyɛhaa wɔyaa nɔ wɔsɔlea koni atse Nyɔŋmɔ gbɛ́i ni yɔɔ nyam lɛ he. Wɔbaasusu sɔlemɔ kroko ni baaha wɔna nɔ ni esa akɛ wɔfee koni Nyɔŋmɔ ajɔɔ wɔ ŋmɛnɛ kɛ daa lɛ he yɛ nikasemɔ ni nyiɛ sɛɛ lɛ mli.