Efã Nyɔŋmɔ Webii Ahe

1-3. (a) Mɛni hewɔ beni Ester yaana ewu lɛ ekolɛ eshe gbeyei lɛ? (b) Mɛɛ sanebimɔi ni kɔɔ Ester he wɔbaasusu he?

ESTER bɔ mɔdɛŋ akɛ ebaamɔ etsui mli beni ebɛŋkɛɔ maŋtsɛwe ni yɔɔ Shushan kpo lɛ teŋ lɛ. Enáaa lɛ mlɛo kwraa. Afee nakai mɔɔ lɛ he nɔ fɛɛ nɔ bɔ ni baaha mɛi anaa akpɛ amɛhe ni amɛshe gbeyei—akɛ ntayai fee tsinai ni eje fiji, gãitsɛ̃lɔi, kɛ jatai awo gbogboi lɛ ahe, ni akɛ pɛnte kɔlai srɔtoi sha he bɔ ni haa ekpɛlɛɔ kaŋkaŋ; ni atswa egbogboi lɛ kɛ emagai ni akɛmamɔ ŋwɛi he ko kpataa ni bɛŋkɛ Zagros Gɔji ni nɔ kwɔlɔ lɛ anɔ, he ni kɛ́ adamɔ lɛ anaa Choaspes faa kɛ emli nui krɔŋŋ lɛ. Aje gbɛ afee fɛɛ koni mɔ fɛɛ mɔ ni baaba jɛmɛ saramɔ lɛ, ana hewalɛ kple ni nuu ni Ester miiya eyana lɛ lɛ yɔɔ, nuu ni tsɛ ehe akɛ “maŋtsɛ kpele lɛ.” Nuu nɛɛ ji Ester wu hu.

² Ester wu lo! Kwɛ bɔ ni Ahashwerosh su yɔɔ srɔto kwraa kɛ́ akɛ lɛ to nuu ni Yuda yei anɔkwafoi lɛ ateŋ mɔ fɛɛ mɔ baasumɔ ni ekɛ lɛ ahi shi akɛ ewu lɛ he!a Ekaseee hii tamɔ Abraham, mɔ ni kɛ heshibaa kpɛlɛ Nyɔŋmɔ gbɛtsɔɔmɔ nɔ akɛ ebo eŋa Sara toi lɛ anɔkwɛmɔnii lɛ. (1 Mose 21:12) Kɛ́ maŋtsɛ lɛ le Ester Nyɔŋmɔ ni ji Yehowa lɛ loo Yehowa Mla lɛ he nɔ ko aahu po lɛ, belɛ nɔ ko fioo ko kɛkɛ ele. Shi Ahashwerosh le Persiabii amla, ní mla ko ni guɔ nɔ tuuntu ni Ester miiya eyafee lɛ hu fata he lɛ. Mɛni ji no? Ojogbaŋŋ, mla lɛ kɛɔ akɛ mɔ fɛɛ mɔ ni baaba Persia maŋtsɛ lɛ hiɛ be mli ni maŋtsɛ lɛ diɛŋtsɛ tsɛko lɛ lɛ, abaagbe lɛ. Atsɛko Ester, shi fɛɛ sɛɛ lɛ eeya koni eyana maŋtsɛ lɛ. Beni ebɛŋkɛɔ mligbɛ kpo lɛ nɔ, he ni kɛ́ maŋtsɛ lɛ ta esɛi lɛ nɔ lɛ ebaana lɛ lɛ, ekolɛ Ester nu he akɛ eeya eyagbo ji no.—Nyɛkanea Ester 4:11; 5:1.

³ Mɛni hewɔ Ester kɛ ehe wo nakai oshara lɛ mli lɛ? Ni mɛni wɔbaanyɛ wɔkase yɛ yoo ni nɔ bɛ nɛɛ hemɔkɛyeli lɛ mli? Klɛŋklɛŋ lɛ, ha wɔkwɛ bɔ ni fee ni Ester ná hegbɛ ni ekaaa akɛ maŋnyɛ yɛ Persia lɛ.

 4. Mɛni ole yɛ Ester weku lɛ he, ni te fee tɛŋŋ ni etsɛkwɛ̃ binuu Mordekai ŋɔ lɛ kɛba eshĩa lɛ?

⁴ No mli lɛ Ester ji awusa. Wɔleee efɔlɔi ni wo lɛ gbɛ́i akɛ Hadasa lɛ he nɔ ko tsɔ; Hadasa ji Hebri wiemɔ kɛha “fɔfɔi” henɔ yɛŋ ko. Beni Ester fɔlɔi gboi lɛ, ewekunyo mlihilɔ ko ni atsɛɔ lɛ Mordekai lɛ ŋɔ fɔ̃ enɔ akɛ ebaakwɛ gbekɛ lɛ tsiabo. Mordekai tsɛkwɛ̃ biyoo ji Ester, shi eye Ester onukpa kwraa yɛ afiiaŋ. Ekɛ Ester ba eshĩa, ni eŋɔ lɛ efee lɛ diɛŋtsɛ ebiyoo.—Ester 2:5-7, 15.

5, 6. (a) Mɛɛ tsɔsemɔ Mordekai kɛha Ester? (b) Te Ester kɛ Mordekai ba amɛjeŋ yɛ Shushan amɛha tɛŋŋ?

⁵ Mordekai kɛ Ester fɛɛ hi shi akɛ Yudafoi ni aŋɔ amɛ nom kɛba Persia maŋtiase lɛ mli, he ni ekolɛ asumɔɔɔ amɛsane yɛ amɛjamɔ kɛ Nyɔŋmɔ Mla ni amɛbɔ mɔdɛŋ akɛ amɛbaaye nɔ lɛ hewɔ lɛ. Shi ekã shi faŋŋ akɛ, beni Mordekai tsɔɔ Ester Yehowa, Nyɔŋmɔ ni naa mɔbɔ ni bu ewebii lɛ ahe yɛ haomɔ beaŋ—ni ebaafee nakai ekoŋŋ lɛ he nii lɛ, Ester basumɔ Mordekai sane waa naakpa. (3 Mose 26:44, 45) Ŋwanejee ko bɛ he akɛ, suɔmɔ kɛ anɔkwayeli kpɛ Ester kɛ Mordekai, ni efee amɛ ekome.

⁶ Etamɔ nɔ ni Mordekai tsu nii akɛ piafonyo yɛ Shushan mɔɔ lɛ mli, ni ekɛ piafoi loo tsuji krokomɛi lɛ fɔɔ maŋtsɛ lɛ koi lɛ ashi tamɔ. (Ester 2:19, 21; 3:3) Biblia lɛ etsɔɔɔ bɔ ni Ester hi shi eha beni edaa lɛ. Kɛlɛ ekolɛ, wɔbaanyɛ wɔkɛɛ akɛ ekwɛ Mordekai kɛ Mordekai shĩa lɛ jogbaŋŋ, ni ekolɛ amɛhi shi yɛ ohiafoi ni yɔɔ nakai maŋtiase lɛ mli lɛ ateŋ. Eeenyɛ efee akɛ enya jarayelihe ni yɔɔ Shushan ni shikaŋaalɔi, jwiɛtɛiŋaalɔi, kɛ jarayelɔi krokomɛi lɛ woɔ jara yɛ lɛ yaa he waa. Ekolɛ, Ester eyasusuuu akɛ wɔsɛɛ ko lɛ, ebaaná nibii nɛɛ fɛɛ eko aahu tsɔ; no mli lɛ, eleee bɔ ni eshihilɛ baaji wɔsɛɛ.

 7. Mɛni hewɔ akpa Vashti maŋnyɛyeli lɛ, ni mɛni jɛ mli kɛba?

⁷ Gbi ko lɛ, Shushan maŋ lɛ mli bafee hoo kɛ oshekuyeli ni kɔɔ naagba ni te shi yɛ maŋtsɛwe lɛ he lɛ he. Maŋtsɛ Ahashwerosh ŋmɛ okpɔlɔ wulu gbi ko, ni ekɛ niyenii kɛ dãai ni jara wala waa ŋmɛ ebladei lɛ okpɔlɔ kɛmiijie amɛhiɛtserɛ, kɛkɛ ni efã koni ayaŋɔ Vashti, emaŋnyɛ ni he yɔɔ fɛo, ni lɛ hu ekɛ eblayei lɛ ebua amɛhe naa yɛ he kroko lɛ kɛba. Shi Vashti eyaaa tsɛmɔ lɛ. Enɛ ha maŋtsɛ lɛ mli fu naakpa, ni emli wo la, kɛkɛ ni ebi eŋaawolɔi lɛ nɔ̃ toigbalamɔ ni sa akɛ akɛha Vashti. Ole nɔ ni jɛ mli ba? Akpa Vashti maŋnyɛyeli. Maŋtsɛ lɛ tsuji lɛ bɔi oblayei froi ní he yɔɔ fɛo lɛ ataomɔ yɛ shikpɔŋ lɛ nɔ fɛɛ; maŋtsɛ lɛ baahala oblayei nɛɛ ateŋ mɔ kome kɛye Vashti najiaŋ akɛ maŋnyɛ.—Ester 1:1–2:4.

 8. (a) Mɛni hewɔ beni Ester daa lɛ, ekolɛ Mordekai baajwɛŋ ehe lɛ? (b) Mɛɛ gbɛ nɔ osusuɔ akɛ wɔbaanyɛ wɔkɛ pɛpɛɛpɛ ni Biblia lɛ ŋmɛɔ yɛ gbɔmɔtsoŋ hefɛo he lɛ atsu nii? (Kwɛmɔ Abɛi 31:30 lɛ hu.)

⁸ Ekolɛ, wɔbaanyɛ wɔfee Mordekai he mfoniri ni yɛ be kɛ beaŋ lɛ, ekɛ miishɛɛ miikwɛ Ester; eŋɔɔ enaa akɛ oblayoo ni eŋɔ lɛ efee ebi lɛ miida, ni ehe efee fɛo pam—ejwɛŋɔ oblayoo nɛɛ wɔsɛɛ he waa diɛŋtsɛ. Wɔkaneɔ akɛ: “Ni oblayoo lɛ he yɛ fɛo, ni ehiɛ hu yɛ fɛo.” (Ester 2:7) Biblia lɛ ŋmɛɔ pɛpɛɛpɛ yɛ gbɔmɔtsoŋ hefɛo he—kɛ́ mɔ ko he yɛ fɛo lɛ, eji miishɛɛ sane, shi esa akɛ ekɛ nilee kɛ heshibaa aba ejeŋ. Kɛ́ jeee nakai lɛ, hefɛo lɛ baaha etsɔ hewolɔ, henɔwolɔ, ni ebaajie sui gbohii krokomɛi hu akpo. (Nyɛkanea Abɛi 11:22.) Ani ona pɛŋ akɛ sane nɛɛ ji anɔkwale? Yɛ Ester gbɛfaŋ lɛ, mɛni hefɛo baaha ená—jɔɔmɔ loo loomɔ? Be baatsɔɔ.

 9. (a) Mɛni ba beni maŋtsɛ lɛ tsuji lɛ na Ester lɛ, ni mɛni hewɔ Ester kɛ Mordekai fɛɛ náaa lɛ mlɛo akɛ amɛbaashi amɛhe lɛ? (b) Mɛni hewɔ Mordekai ŋmɛ Ester gbɛ koni ekɛ mɔ ko ni jáaa Yehowa shi ejáa wɔŋ ahi shi lɛ? (Okɛ akrabatsa lɛ afata he.)

⁹ Maŋtsɛ lɛ tsuji lɛ na Ester. Amɛŋɔ lɛ yɛ Mordekai dɛŋ kɛfata oblayei krokomɛi lɛ ahe kɛtee maŋtsɛwe ni yɔɔ faa lɛ sɛɛ lɛ. (Ester 2:8) Ekolɛ, Ester kɛ Mordekai fɛɛ náaa lɛ mlɛo akɛ amɛbaashi amɛhe, ejaakɛ amɛhi shi tamɔ tsɛ kɛ bi. Ekolɛ, Mordekai eyasumɔɔɔ akɛ ebiyoo nɛɛ kɛ mɔ ko ni jaaa Yehowa ahi shi, kɛ́ mɔ lɛ ji maŋtsɛ tete po, shi no mli lɛ ebɛ shihilɛ lɛ nɔ hewalɛ ko kwraa.b Kwɛ bɔ ni Ester baasumɔ waa akɛ ebo ŋaa ni Mordekai baawo lɛ lɛ toi dani akɛ lɛ aya! Beni akɛ lɛ yaa Shushan mɔɔ lɛ mli lɛ, sanebimɔi babaoo yi ejwɛŋmɔŋ. Mɛɛ shihilɛ mli Ester baayaje?

10, 11. (a) Mɛɛ gbɛ nɔ ewaaa kwraa akɛ kulɛ shihilɛ hee ni Ester yaje mli lɛ baaná enɔ hewalɛ lɛ? (b) Mɛni Mordekai fee kɛtsɔɔ akɛ esusuɔ Ester he?

¹⁰ Ester yaje shihilɛ hee ko ni ha eshihilɛ tsake kwraa lɛ mli. Efata “oblayei pii” ni abua amɛnaa kɛjɛ maji fɛɛ ni yɔɔ Persia Nɔyeli lɛ shishi lɛ amli kɛba lɛ ahe. Ekã shi faŋŋ akɛ, ebaasoro oblayei nɛɛ akusumii, amɛwiemɔi, kɛ amɛsui kwraa. Atuu oblayei nɛɛ awo piafonyo ni atsɛɔ lɛ Hegai lɛ dɛŋ bɔni afee ni ekɛ tsofai kɛ-ŋma srɔtoi akpakpaa amɛhe koni amɛhe afee fɛo; eji nifeemɔ ni heɔ afi sɔŋŋ ni biɔ ni akɛ mui ni jeɔ ŋma hu agbɔle amɛ. (Ester 2:8, 12) Ewaaa kwraa akɛ he ni oblayei nɛɛ eyaje kɛ shihilɛ mli ni amɛyaje nɛɛ baaha amɛkɛ amɛjwɛŋmɔ ama gbɔmɔtsoŋ hefɛo nɔ bɔ ni esaaa koni amɛkɛ amɛhe ashi akaŋ. Te shihilɛ nɛɛ ná Ester nɔ hewalɛ eha tɛŋŋ?

¹¹ No beaŋ lɛ, mɔ ko kwraa bɛ shikpɔŋ lɛ nɔ ni Ester he jwɛŋmɔ baakã etsui nɔ waa fe Mordekai. Wɔkaneɔ akɛ, daa nɛɛ Mordekai yasharaa shi kɛbɛŋkɛɔ he ni yei lɛ yɔɔ lɛ koni ekwɛ akɛ Ester yɛ jogbaŋŋ lo. (Ester 2:11) Beni ekolɛ tsuji ni yɔɔ mɔɔ lɛ mli lɛ haa enuɔ Ester he saji komɛi ni tsɔɔ akɛ eyɛ jogbaŋŋ lɛ, ekã shi faŋŋ akɛ, emii baashɛ ehe waa. Mɛni hewɔ?

12, 13. (a) Te Ester nifeemɔ ha mɛi ni yɔɔ emasɛi lɛ na lɛ amɛha tɛŋŋ? (b) Mɛni hewɔ ekolɛ Mordekai mii baashɛ ehe waa kɛ́ ená ele akɛ Ester ejieko ehe shi akɛ Yudanyo lɛ?

¹² Ester sa Hegai hiɛ aahu akɛ Hegai kɛ lɛ ye yɛ mlihilɛ naa waa diɛŋtsɛ, ni ehala oblayei kpawo akɛ maawai eha Ester, ni ekɛ amɛ yato yei awe lɛ he ni hi fe fɛɛ lɛ. Amaniɛbɔɔ lɛ kɛɛ po akɛ: “Shi Ester hiɛ [tee nɔ] ba nyam yɛ mɛi fɛɛ ní naa lɛ lɛ ahiɛ.” (Ester 2:9, 15) Ani hefɛo pɛ ji nɔ ni ha mɔ fɛɛ mɔ sumɔ esane lɛ? Dabi, jeee ehe fɛo kɛkɛ hewɔ mɛi sumɔ esane waa nakai lɛ.

¹³ Ákɛ nɔkwɛmɔnɔ lɛ, wɔkaneɔ akɛ: “Ester náko atsɔɔ emaŋ kɛ eweku; ejaakɛ Mordekai ewo lɛ kita akɛ ekatsɔɔ.” (Ester 2:10) Mordekai ekɛɛ oblayoo lɛ akɛ, ekajie ehe shi akɛ Yudanyo ji lɛ; Mordekai le akɛ Persia odehei lɛ sumɔɔɔ Yudafoi lɛ asane kwraa. Kwɛ bɔ ni Mordekai baaná miishɛɛ waa kɛ́ ená ele akɛ, Ester kã he ekɛ enifeemɔ miitsɔɔ akɛ ehiɛ kã shi, ni eboɔ ŋaawoo toi, tsɛ ebɛ emasɛi moŋ!

14. Te oblahii kɛ oblayei ni yɔɔ ŋmɛnɛ lɛ baafee tɛŋŋ amɛkase Ester?

¹⁴ Nakai nɔŋŋ oblahii kɛ oblayei ni yɔɔ ŋmɛnɛ lɛ baanyɛ aha amɛfɔlɔi loo mɛi ni eŋɔ amɛ akɛ amɛbii lɛ aná miishɛɛ. Kɛ́ amɛbɛ amɛfɔlɔi amasɛi—ni mɛi ateŋ ni amɛyaje lɛ ji yiŋfɛlɛfɛlɛtsɛmɛi, amɛjeŋba ekpɔtɔ, loo amɛyitseiaŋ wala—po lɛ, amɛbaanyɛ amɛkpoo sui gbohii ni amɛkpɛtɛ sui kpakpai ni atsɔɔ amɛ lɛ ahe. Kɛ́ amɛfee nakai lɛ, amɛhaa amɛ-Tsɛ ni yɔɔ ŋwɛi lɛ tsui nyaa taakɛ eba lɛ yɛ Ester gbɛfaŋ lɛ.—Nyɛkanea Abɛi 27:11.

15, 16. (a) Mɛni ha maŋtsɛ lɛ sumɔ Ester waa lɛ? (b) Mɛni hewɔ ekolɛ Ester naŋ tsakemɔi ni ba eshihilɛ mli lɛ mlɛo lɛ?

¹⁵ Beni ebashɛ be ni akɛ Ester baaya ayatsɔɔ maŋtsɛ lɛ, aha lɛ hegbɛ koni ehala nibii fɛɛ ni esusuɔ akɛ ehe baahia lɛ lɛ, ekolɛ koni ekɛsaa ehe ni ehe afee fɛo waa kwraa fe tsutsu lɛ. Shi akɛni Ester baa ehe shi hewɔ lɛ, ebiii nɔ ko kwraa fe nɔ ni Hegai tsĩ tã etsɔɔ lɛ lɛ. (Ester 2:15) Ekolɛ Ester yɔse akɛ, jeee hefɛo pɛ baaha maŋtsɛ lɛ tsui amɔ lɛ; heshibaa kɛ bulɛ ji nɔ ni he hiaa titri yɛ maŋtsɛwe lɛ. Ani esane ja?

¹⁶ Amaniɛbɔɔ lɛ haa hetoo akɛ: “Maŋtsɛ lɛ sumɔ Ester fe oblayei krokomɛi lɛ fɛɛ. Ester hiɛ ba nyam jogbaŋŋ yɛ maŋtsɛ lɛ hiɛ fe yei fɛɛ; ni ená ehe miishɛɛ fe oblayei lɛ fɛɛ, ni no ha ekɛ maŋnyɛyeli akekre lɛ fi Ester yitso, kɛkɛ ni ewo lɛ maŋnyɛ yɛ Vashti najiaŋ.” (Ester 2:17, Ga Biblia hee) Ekolɛ, oblayoo Yudanyo nɛɛ eyanáaa lɛ mlɛo akɛ ebaatsake ehe ewo shihilɛ hee nɛɛ mli, ejaakɛ ebatsɔ maŋnyɛ hee, maŋtsɛ ni yɔɔ hewalɛ fe fɛɛ yɛ shikpɔŋ lɛ nɔ nakai beaŋ lɛ ŋa! Ani gbɛnaa hee nɛɛ ha eyitso fuu, ni ewo ehe nɔ? Dabida!

17. (a) Mɛɛ gbɛi anɔ Ester tsɔ etsɔɔ akɛ eboɔ Mordekai ni ŋɔ lɛ akɛ ebi lɛ toi? (b) Mɛni hewɔ Ester nɔkwɛmɔnɔ lɛ he hiaa wɔ waa ŋmɛnɛ lɛ?

¹⁷ Ester tee nɔ ebo Mordekai, mɔ ni ŋɔ lɛ fee ebi lɛ toi. Ester tee nɔ ekɛ Yudanyo ni eji lɛ wo eboŋ. Agbɛnɛ hu, beni Mordekai ná le akɛ atsɔ ŋaa akɛ abaagbe Ahashwerosh lɛ, Ester bo nɔ ni Mordekai kɛɛ lɛ lɛ toi, ni eyawo maŋtsɛ lɛ toi nɔ yɛ enɛ he, ni no haaa mɛi lɛ anyɛ atsu amɛyiŋ sha lɛ he nii. (Ester 2:20-23) Ester tee nɔ ejie heshibaa kɛ toiboo su kpo kɛtsɔɔ akɛ eyɛ hemɔkɛyeli yɛ e-Nyɔŋmɔ lɛ mli. Kwɛ bɔ ni Ester nɔkwɛmɔnɔ lɛ he hiaa wɔ waa ŋmɛnɛ; wɔbe nɛɛ amli lɛ, abuuu toiboo akɛ ehe hiaa tsɔ, moŋ lɛ toigbele kɛ atuatsemɔ ebatsɔ shihilɛ lɛ fã! Shi mɛi ni yɔɔ hemɔkɛyeli krɔŋŋ lɛ naa toiboo akɛ nɔ ko ni he hiaa waa diɛŋtsɛ taakɛ Ester fee lɛ.

18. (a) Mɛni ekolɛ no ha Mordekai kpoo akɛ ebaakoto Haman lɛ? (Kwɛmɔ shishigbɛ niŋmaa lɛ hu.) (b) Te hii kɛ yei ni yɔɔ hemɔkɛyeli lɛ feɔ tɛŋŋ amɛkaseɔ Mordekai nɔkwɛmɔnɔ lɛ?

¹⁸ Aha nuu ko ni atsɛɔ lɛ Haman lɛ gbɛhe wulu ko yɛ Ahashwerosh maŋtsɛwe lɛ. Maŋtsɛ lɛ wo Haman akɛ maŋsɔɔlɔ nukpa ni fe fɛɛ, ni no ha etsɔ maŋtsɛ lɛ ŋaawolɔ nukpa kɛ maŋtsɛ lɛ sɛɛyelɔ yɛ maŋtsɛyeli lɛ mli. Maŋtsɛ lɛ wo akpɔ po akɛ, mɔ fɛɛ mɔ ni baana maŋsɔɔlɔ nukpa Haman lɛ, ekoto shi eha lɛ. (Ester 3:1-4) Akpɔ nɛɛ bafee naagba kɛha Mordekai. Eheɔ eyeɔ akɛ esa akɛ aye maŋtsɛ lɛ wiemɔ nɔ, shi jeee kɛ́ no feemɔ baatsɔɔ bulɛ ni abɛ kɛha Nyɔŋmɔ. Ole nɔ ko? Agagnyo ji Haman. Ni no tsɔɔ faŋŋ akɛ Agag, Amalekbii amaŋtsɛ ni Nyɔŋmɔ gbalɔ Samuel gbe lɛ lɛ seshinyo ji lɛ. (1 Sam. 15:33) Amalekbii lɛ ayitseiaŋ wala aahu akɛ amɛtsɔmɔ amɛhe Yehowa kɛ Israel fɛɛ henyɛlɔi. Ákɛ kuu lɛ, Nyɔŋmɔ fã koni abule Amalekbii lɛ ashishi kwraa.c (5 Mose 25:19) Belɛ, te feɔ tɛŋŋ ni Yudanyo anɔkwafo ko kotoɔ Amaleknyo lɛ? Mordekai kotooo Haman. Efee shiŋŋ yɛ enɛ mli. Kɛbashi ŋmɛnɛ lɛ, hii kɛ yei ni yɔɔ hemɔkɛyeli lɛ kɛ amɛwala ewo oshara mli kɛye shishitoo mla nɛɛ nɔ akɛ: “Esa akɛ aboɔ Nyɔŋmɔ moŋ toi fe gbɔmɛi.”—Bɔf. 5:29.

19. Mɛni Haman to eyiŋ akɛ ebaafee, ni mɛɛ gbɛ nɔ etsɔ ekɔne maŋtsɛ lɛ yiŋ?

¹⁹ Haman mli fu naakpa. Eto akɛ ekpãtaŋ Mordekai kome kɛkɛ hiɛ. Moŋ lɛ, ekɛ Mordekai he nu baaju Yudafoi fɛɛ ni yɔɔ maŋtsɛyeli lɛ shikpɔji lɛ anɔ lɛ ahe, no ji ebaakpãta amɛhiɛ kwraa! Haman wo maŋtsɛ lɛ yiŋ, ni eha ená Yudafoi lɛ ahe jwɛŋmɔ ni ejaaa. Etsĩii amɛgbɛ́i atã, shi bɔ ni ewie lɛ tsɔɔ akɛ gbɔmɛi lɛ ahe bɛ sɛɛnamɔ ko kwraa kɛha maŋtsɛ lɛ, amɛji gbɔmɛi ni ‘agbɛ amɛ ashwã majimaji anɔ yɛ maŋtsɛyeli shikpɔji lɛ fɛɛ nɔ.’ Nɔ ni fiteɔ sane lɛ kwraa ji akɛ, ekɛɛ akɛ amɛyeee maŋtsɛ lɛ mlai lɛ anɔ; no hewɔ lɛ atuatselɔi ni he yɔɔ oshara waa ji amɛ. Ewo shi akɛ ekɛ shika babaoo ko baawo maŋtsɛ fotro lɛ mli kɛwo Yudafoi fɛɛ ni abaagbe amɛ yɛ maŋtsɛyeli lɛ shishi lɛ ahe nyɔmɔ.d Ahashwerosh jie ewolonaasɔomɔ waoga lɛ eha Haman koni akɛsɔo Haman yiŋkpɛɛ nɛɛ naa akɛ akpɔ.—Ester 3:5-10.

20, 21. (a) Te sane ni Haman ha ajaje lɛ sa Yudafoi ni yɔɔ Persia Nɔyeli shikpɔji lɛ anɔ kɛ Mordekai diɛŋtsɛ hu he eha tɛŋŋ? (b) Mɛni Mordekai kpa Ester fai koni eyafee?

²⁰ Etsɛɛɛ kɛkɛ ni atsu okpɔŋɔnɔtaralɔi, ni amɛshi kɛfoi kɛtee maŋtsɛyeli lɛŋ shikpɔji lɛ fɛɛ anɔ koni amɛkɛ Yudafoi lɛ ahiɛkpãtamɔ he akpɔ nɛɛ ayaha mɛi ni yɔɔ jɛmɛ lɛ. Bo lɛ kwɛmɔ bɔ ni sane ni ajaje kɛtee shɔŋŋ kɛyashɛ Yerusalem tɔ̃ɔ lɛ baaná mɛi anɔ hewalɛ aha; no mli lɛ, Yudafoi babaoo ni eku amɛsɛɛ kɛjɛ Babilon nomŋɔɔ mli lɛ miigbo deŋme koni amɛtswa Yerusalem gbogboi lɛ amɛma shi, ni amɛbu he. Ekolɛ, beni Mordekai nu yiŋ sha nɛɛ he lɛ, esusu mɛi nɛɛ kɛ enanemɛi kɛ ewekumɛi ni yɔɔ Shushan lɛ ahe. Mordekai kɛ awerɛhoyeli gbala etadei lɛ, ekɔ kpekpe ebu, eloo lamlu ewo eyiteŋ, kɛkɛ ni eje kpo ebote maŋ lɛ mli kɛ yaafo gegeege. No mli lɛ, Haman kɛ maŋtsɛ lɛ ta shi amɛmiinu dãa, ni yara ni eha Yudafoi babaoo kɛ amɛnanemɛi ni yɔɔ Shushan lɛ ewo lɛ shiii lɛ kpu po.—Nyɛkanea Ester 3:12–4:1.

²¹ Mordekai le akɛ esa akɛ efee nɔ ko kɛbaa Yudafoi lɛ ayi. Shi mɛni po ebaafee? Ester nu Mordekai ŋkɔmɔyeli lɛ he, ni etsu akɛ atadei tee yaha Mordekai, shi Mordekai ekpɛlɛɛɛ kpãtamɔ. Ekolɛ, ekɛ be babaoo eshwie eyiŋ akɛ, ‘Yehowa, mi-Nyɔŋmɔ, mɛni hewɔ kwraa oŋmɛ gbɛ ni aŋɔ Ester ni kã mitsui nɔ nɛɛ kɛje mihe, ni afee lɛ maŋnyɛ aha nɔyelɔ wɔŋjalɔ nɛɛ?’ Amrɔ nɛɛ, etamɔ nɔ ni eena nibii anaa fiofio. Mordekai tsu akɛ shɛɛ yaha maŋnyɛ lɛ koni eya maŋtsɛ lɛ ŋɔɔ eyakpa lɛ fai, koni “ewie eha emaŋbii lɛ.”—Ester 4:4-8.

22. Mɛni hewɔ Ester she gbeyei akɛ ebaaya eyapue yɛ ewu, maŋtsɛ lɛ hiɛ lɛ? (Kwɛmɔ shishigbɛ niŋmaa lɛ hu.)

²² Ekã shi faŋŋ akɛ, beni Ester nu sane nɛɛ he lɛ, etsui baafo wii yɛ emli. Enɛ fee ehemɔkɛyeli lɛ he kaa ni fe fɛɛ. Hetoo ni ekɛtsu akɛyaha Mordekai lɛ tsɔɔ akɛ, eshe gbeyei waa. Etĩ maŋtsɛ akpɔ lɛ mli etsɔɔ Mordekai. Kɛ́ mɔ ko yapue yɛ maŋtsɛ lɛ hiɛ beni maŋtsɛ lɛ tsɛko mɔ lɛ, egbele ji no. Ja maŋtsɛ lɛ ewo eshika tsi lɛ nɔ dani mɔ lɛ yeɔ ehe. Ani no mli lɛ, Ester yɛ yiŋtoo ko hewɔ ni esusuɔ akɛ abaaha eye ehe, titri lɛ yɛ nɔ ni ba Vashti nɔ beni ekpoo maŋtsɛ lɛ famɔ akɛ eyapue yɛ ehiɛ lɛ hewɔ lɛ? Ester kɛɛ Mordekai akɛ gbii 30 sɔŋŋ nɛ ni maŋtsɛ lɛ tsuko koni atsɛ lɛ aha lɛ! Jɛ enɛ hewɔ lɛ, Ester hao waa ni enu he akɛ ekolɛ, maŋtsɛ ni etsɛɛɛ kɛkɛ lɛ ejwɛŋmɔ etsake nɛɛ ejie ejwɛŋmɔ yɛ enɔ, ni esumɔɔɔ lɛ dɔŋŋ.e—Ester 4:9-11.

23. (a) Mɛni Mordekai wie kɛwo Ester hemɔkɛyeli mli hewalɛ? (b) Mɛni hewɔ Mordekai ji mɔ ko ni esa akɛ akase lɛ lɛ?

²³ Mordekai hu kɛ kɔkɔbɔɔ wiemɔi tsu akɛyaha Ester koni no awaje Ester hemɔkɛyeli lɛ. Eha Ester ná nɔmimaa akɛ kɛ́ emua enaa tete po lɛ, yiwalaheremɔ baajɛ he kroko aba aha Yudafoi lɛ. Shi mɛni hewɔ esa akɛ Ester akpa gbɛ akɛ kɛ́ yiwaa lɛ mli wo wu lɛ, ebaaye ehe? Yɛ enɛ mli lɛ, Mordekai tsɔɔ akɛ eyɛ hekɛnɔfɔ̃ɔ kwraa yɛ Yehowa, mɔ ni haŋ akpãta mɛi ni jáa lɛ lɛ ahiɛ kɔkɔɔkɔ, ni eyeɔ eshiwoi hu anɔ lɛ mli. (Yosh. 23:14) Kɛkɛ ni Mordekai bi Ester akɛ: “Shi nɛkɛ be nɛɛ hewɔ nɔŋŋ onine shɛ maŋnyɛyeli lɛ nɔ jiŋŋ, namɔ le?” (Ester 4:12-14) Ani Mordekai jeee mɔ ko ni sa akɛ wɔkase lɛ? Ekɛ ehe fɔ̃ Yehowa, e-Nyɔŋmɔ lɛ nɔ kwraa. Ani wɔfeɔ nakai?—Abɛi 3:5, 6.

24. Mɛni Ester fee kɛtsɔɔ akɛ eyɛ hemɔkɛyeli kɛ ekãa?

²⁴ Be bashɛ kɛha Ester akɛ ekpɛ yiŋ. Etsu ni ayakɛɛ Mordekai koni ebua emaŋbii lɛ anaa koni amɛfata ehe kɛhi ŋmaa gbii etɛ, ni ekɛ wiemɔi ni ejije afii ohai abɔ ni tsɔɔ ehemɔkɛyeli kɛ ekãa nɛɛ mu naa akɛ: “Kɛji miyagbo yɛ no hewɔ po jiŋŋ efeee nɔ ko.” (Ester 4:15-17, Ga Biblia hee) Ekolɛ, Ester sɔle waa yɛ nakai gbii etɛ lɛ mli fe sɔlemɔi fɛɛ ni esɔle ewala be fɛɛ. Kɛlɛ, naagbee lɛ, be lɛ bashɛ. Ewo emaŋnyɛ atade ni yɔɔ fɛo fe fɛɛ lɛ, ni efee nɔ fɛɛ nɔ ni ebaanyɛ koni esa maŋtsɛ lɛ hiɛ. Kɛkɛ ni paa, eyi mli etee.

25. Tsɔɔmɔ bɔ ni nibii tee lɛ ha beni Ester yaapue yɛ ewu hiɛ lɛ.

²⁵ Taakɛ atsɔɔ mli yɛ yitso nɛɛ shishijee lɛ, Ester tee maŋtsɛwe lɛ kpo lɛ nɔ. Bo lɛ kwɛmɔ susumɔi ni baaba eyitsoŋ kɛ sɔlemɔi ni ebaasɔle shii abɔ yɛ etsuiŋ. Ebote maŋtsɛwe lɛ mligbɛ kpo lɛ nɔ, he ni ebaanyɛ ena Ahashwerosh ta emaŋtsɛsɛi lɛ nɔ yɛ lɛ. Ekolɛ, ebɔ mɔdɛŋ ekwɛ Ahashwerosh hiɛ koni ena nɔ ni yaa nɔ yɛ ejwɛŋmɔŋ—ele maŋtsɛ lɛ hiɛsu jogbaŋŋ. Kɛ́ ebalɛ akɛ Ester amɛ fioo lɛ, no lɛ ebaanu he akɛ shihilɛ lɛ nako aba naagbee kwraa. Shi be lɛ baho—ewu lɛ na lɛ. Ekã shi faŋŋ akɛ, maŋtsɛ lɛ naa kpɛ ehe waa, shi ehiɛsu tsɔɔ akɛ emli fuko. Ewo eshika tsĩ lɛ nɔ!—Ester 5:1, 2.

26. Mɛni hewɔ esa akɛ aná ekãa ni tamɔ Ester nɔ lɛ eko lɛ, ni mɛni hewɔ nɔ ni efee lɛ ji enitsumɔ lɛ shishijee kwraa kɛkɛ lɛ?

²⁶ Maŋtsɛ lɛ sumɔ koni ebo Ester toi. Ester ye Nyɔŋmɔ anɔkwa ni ekɛ ewala wo oshara mli koni ekɛbu emaŋbii lɛ ahe, ni ekɛfee hemɔkɛyeli he nɔkwɛmɔnɔ kpakpa eha Nyɔŋmɔ tsuji fɛɛ aahu kɛbashi ŋmɛnɛ. Eji anɔkwale akɛ Kristofoi ni yɔɔ ŋmɛnɛ lɛ nyaa nɔkwɛmɔnii ni tamɔ nɛkɛ lɛ ahe waa. Yesu kɛɛ akɛ suɔmɔ ni tsɔɔ hekɛafɔleshãa ji nɔ ni baakadi esɛɛnyiɛlɔi anɔkwafoi lɛ. (Nyɛkanea Yohane 13:34, 35.) Bei pii lɛ, ebiɔ Ester ekãa lɛ eko dani anyɛ ajie suɔmɔ ni tamɔ nakai kpo. Shi nɔ ni Ester yafee nakai gbi lɛ kɛdamɔ mli eha Nyɔŋmɔ webii lɛ ji enitsumɔ lɛ shishijee kwraa kɛkɛ. Te ebaafee tɛŋŋ ekɔne maŋtsɛ lɛ yiŋ akɛ Haman, maŋtsɛ lɛ ŋaawolɔ ni eshwɛɛɛ ehe lɛ etsɔ̃ ŋaa sha lɛ? Mɛɛ gbɛ nɔ Ester baatsɔ eye ebua kɛkpɔ̃ ewebii lɛ? Wɔbaasusu sanebimɔi nɛɛ ahe yɛ yitso ni nyiɛ sɛɛ lɛ mli.