Hiob Emuuyeli Lɛ​—Mɛni Hewɔ Eyɔɔ Sɔrɔto Nɛkɛ?

“Miŋmɛŋ mimuuyeli Iɛ he kɛyashi be mli ni magbo!”​—HIOB 27:​5, NW.

 1. Namɔ ji Hiob, ni te wɔfeɔ tɛŋŋ wɔleɔ akɛ eji gbɔmɔ ni hi shi diɛŋtsɛ?

HIOB ji nuu sɔrɔto ko yɛ yinɔsane mli. Jeee akɛ eyɛ heloo gbɛfaŋ nibii babaoo kɛkɛ, shi eji kojolɔ kɛ hiɛnyiɛlɔ ni abuɔ lɛ ni yɔɔ mɔbɔnalɛ hu. Biblia lɛ wieɔ ehe akɛ, “nɛkɛ nuu nɛɛ ji gbɔmɔ agbo fe Bokagbɛ bii lɛ fɛɛ.” (Hiob 1:3; 9:​12-25) Ale lɛ akɛ nuu ni ji jalɔ diɛŋtsɛ kɛfata Noa kɛ Daniel he. (Ezekiel 14:​14, 20) Biblia la jieɔ Hiob kpo akɛ nɔkwɛmɔ nɔ ni esa akɛ Kristofoi anyiɛ sɛɛ, ni ekɛ enɛ tsɔɔ akɛ eji gbɔmɔ diɛŋtsɛ ni hi shi yɛ yinɔsane mli.​—Yakobo 5:⁠11.

 2. Te wɔɔfee tɛŋŋ wɔle be mli ni Satan kɛ kaa nɛɛ ba Hiob nɔ?

² Hiob hi Uz shikpɔŋ lɛ nɔ, yɛ he ni ale bianɛ akɛ Arabia lɛ. Eyɛ mli akɛ ejeee Israelnyo moŋ, shi Hiob ji Yehowa jálɔ, nɔ ko ni Yehowa gbala Satan jwɛŋmɔ kɛba nɔ. Nyɔŋmɔ wiemɔ akɛ “mɔ ko mɔ ko bɛ ni tamɔ lɛ yɛ shikpɔŋ lɛ nɔ, eji nuu ni kpa ko bɛ ehe ni eja” lɛ jieɔ lɛ kpo akɛ Nyɔŋmɔ tsulɔ ko ni ekaaa bɛ shihilɛ mli yɛ nakai be lɛ mli ni tamɔ lɛ. (Hiob 1:⁠8) No hewɔ lɛ ka ni Satan ka Hiob lɛ baanyɛ aba yɛ be mli ni ewekumɛi Israelbii lɛ ni ekɛ amɛ teŋ wekukpaa lɛ jekɛ lɛ yɔɔ Mizraim nyɔŋyeli mli lɛ​—aaafee be ko yɛ emuuyeli mli hiɛlɔ ni ekaaa, Yosef, gbele sɛɛ, yɛ afi 1657 D.Ŋ.B., kɛ agbɛnɛ dani Mose je emuuyeli mli hiɛmɔ lɛ shishi lɛ.

 3. Namɔ ŋma Hiob wolo lɛ, ni mɛni ye bua lɛ ni no ha enine shɛ saji lɛ fɛɛ nɔ?

³ Eka shi faŋŋ akɛ Mose ji mɔ ni ŋma Hiob wolo lɛ. Ebaanyɛ ekase Hiob kaa lɛ he nii yɛ be mli ni anyɛ enɔ ni ejo foi kɛjɛ Mizraim yɛ afi 1553 D.Ŋ.B., ni eyahi Midia, ni kɛ Uz shikpɔŋ lɛ jɛkɛɛɛ tsɔ lɛ nɔ lɛ. (2 Mose 2:​15-25; Bɔfoi lɛ Asaji 7:​28-30) No mli lɛ Hiob miiná enaagbee shihilɛ be afii 140 ni Yehowa kɛjɔɔ lɛ lɛ mli ŋɔɔmɔ. (Hiob 42:16) Yɛ sɛɛ mli lɛ, yɛ be mli ni Israelbii lɛ ebɛŋkɛ Uz yɛ amɛŋa lɛ nɔ gbɛfaa lɛ naagbee mli lɛ, Mose baanyɛ anu Hiob naagbee afii lɛ kɛ egbele he.

Hiob Nilee Ni Faaa Lɛ

 4. (a) Mɛni ji nɔ ni eka shi faŋŋ akɛ, no ji Yehowa he nilee ni Hiob yɔɔ lɛ jɛɛhe, ni mɛni hewɔ ŋwanejee ko bɛ he akɛ ebaanyɛ ekɛ Abraham kɛ Isak seshibii agba sane lɛ? (b) Te fee tɛŋŋ ni Hiob batsɔ nuu ni emuuyeli mli ni ehiɛ lɛ yɔɔ sɔrɔto lɛ?

⁴ Beni aka Hiob akwɛ lɛ, no mli lɛ nilee ni eyɔɔ yɛ Nyɔŋmɔ kɛ eyiŋtoo he lɛ faaa, ni no mli lɛ aŋmako Biblia lɛ fã ko kwraa. Shi kɛlɛ, Hiob baanyɛ ale nɔ ko yɛ bɔ ni Yehowa kɛ Abraham, Isak, Yakob kɛ Yosef ye ha lɛ he. Nakai enɛ ji ejaakɛ eka shi faŋŋ akɛ Hiob ji Abraham nyɛminuu Nahor, kɛtsɔ Nahor kromɔbi ni ji Uz nɔ lɛ wekunyo. Agbɛnɛ hu Uz nyɛmi ji Betuel, Isak ŋa Rebeka tsɛ kɛ Yosef nanakansowa lɛ. (1 Mose 22:​20-23) Ŋwanejee ko bɛ he akɛ Hiob bu nilee fɛɛ nilee ni ena yɛ bɔ ni Yehowa kɛ Abraham kɛ eseshibii lɛ ye ha lɛ akɛ jwetri ko, ni eesumɔ kɛkɛ ni esa Yehowa hiɛ. No hewɔ lɛ Hiob bafee nuu ni hiɛɔ emuuyeli mli yɛ gbɛ ni ekaaa nɔ, nuu ni kpa ko bɛ ehe ni etu ehe eha Yehowa kwraa.

 5. Mɛni titri baa Hiob emuuyeli mli hiɛmɔ lɛ bafeɔ no ni ekaaa kwraa eloo eyɔɔ sɔrɔto lɛ?

⁵ Yosef gbele yɛ Mizraim lɛ sɛɛ etsɛɛɛ kɛkɛ ni Hiob emuuyeli mli hiɛmɔ lɛ bafee sane ni tee béi shi yɛ Yehowa Nyɔŋmɔ kɛ Satan teŋ yɛ ŋwɛi ni anaaa jɛmɛ lɛ. Shi kɛlɛ Hiob bɛ nɛkɛ béi ni kɔɔ emuuyeli mli ni ehiɛ lɛ he nilee ko kwraa. Ni titri lɛ, nɔ hewɔ ni enaa amanehulu lɛ he nɔ ko kwraa ni eleee lɛ ji nɔ ni ha emuuyeli ni anyɛɛɛ afite lɛ ni Hiob hiɛ mli lɛ bafeɔ nɔ ko ni yɔɔ sɔrɔto kwraa lɛ. No hewɔ lɛ bɔni afee ni ehe aba sɛɛnamɔ aha Nyɔŋmɔ tsuji fɛɛ yɛ enɛ sɛɛ lɛ, Yehowa ha Mose ŋmala nibii ni kɔɔ Hiob emuuyeli mli hiɛmɔ he lɛ efɔ shi.

Hiob Emuuyeli Mli Hiɛmɔ He Sane Lɛ

 6. (a) Te fee tɛŋŋ ni kpee ko ni afee yɛ ŋwɛi jie sane ko ni kã Nyɔŋmɔ kɛ Satan teŋ lɛ kpo? (b) Mɛɛ be mli nɛkɛ sane lɛ je shishi, ni mɛni fata he?

⁶ Hiob wolo lɛ jieɔ muhɔɔ ni haaa ana nɔ ni esa akɛ ana lɛ ni ahã wɔna ŋwɛi bɔfoi akpee ni tee nɔ yɛ Yehowa Nyɔŋmɔ hiɛ lɛ. Jɛmɛ ji he ni Yehowa kai Satan ni no mli lɛ eyɔɔ jɛmɛ lɛ, akɛ “mɔ ko mɔ ko bɛ ni tamɔ lɛ (Hiob) yɛ shikpɔŋ lɛ nɔ, eji nuu ni kpa ko bɛ ehe ni eja ni esheɔ Nyɔŋmɔ gbeyei, ni etsiɔ ehe yɛ efɔŋ he.” (Hiob 1:⁠8) Eka shi faŋŋ akɛ sane ko yɛ ni kɔɔ Hiob emuuyeli he. Ejeee nɔ ko hee. Atee sane lɛ shi yɛ be mli ni Satan shwie Adam kɛ Hawa kɛjɛ Nyɔŋmɔ he, ni yɛ nakai feemɔ mli lɛ, ekɛɛ akɛ: ‘Bo lɛ hami hegbɛ lɛ ni matsi mɔ fɛɛ mɔ kɛaajɛ sɔɔmɔ ni akɛaaha bo lɛ he.’​—1 Mose 3:​1-6.

 7. Mɛni ha Satan wie saji ni ewie yɛ emuuyeli mli ni Hiob hiɛ lɛ he lɛ, ni mɛɛ mpoa etswa Nyɔŋmɔ?

⁷ Agbɛnɛ akɛni eyɔɔ nɛkɛ kpee ni tee nɔ yɛ ŋwɛi nɛɛ shishi hewɔ lɛ, anyɛ Satan nɔ ni ekɛ naajiemɔi ha Hiob emuuyeli lɛ. Ebi Nyɔŋmɔ akɛ: “Ani yaka Hiob sheɔ Nyɔŋmɔ gbeyei lɛ? Ani jeee afabaŋ ofo owo ekɛ ewe kɛ nɔ fɛɛ nɔ ni eyɔɔ lɛ he kɛkpe? . . . ” Kɛkɛ ni Satan tswa mpoa akɛ, “Shi agbɛnɛ kpa onine mli ni ota enii ni eyɔɔ lɛ fɛɛ he. Akɛ elomɔŋ bo yɛ ohiɛ lo.”​—Hiob 1:​9-11, NW.

 8. (a) Te Yehowa here Satan mpoatswaa lɛ nɔ eha tɛŋŋ? (b) Mɛɛ saji ni mli wawai Satan kɛba Hiob nɔ?

⁸ Yehowa kpɛlɛ Satan mpoatswaa lɛ nɔ. Eheɔ Hiob emuuyeli lɛ eyeɔ kwraa, eha Satan hetoo akɛ, “Naa, nɔ fɛɛ nɔ ni eyɔɔ lɛ eyɛ odɛŋ, lɛ diɛŋtsɛ kɛkɛ ni onine akata ehe!” (Hiob 1:12) 12) Amrɔ nɔŋŋ kɛkɛ ni Satan bɔi Hiob he nitsumɔ. Sheba nihalɔi baloo Hiob tsinai 1,000 kɛ tejiyei 500 ni amɛgbe etsuji ni kwɛɔ amɛ lɛ fɛɛ ja mɔ kome pɛ. Nɔ ni nyiɛ sɛɛ lɛ, Satan ha la jɛ ŋwɛi ni ebasha Hiob tooi 7,000 kɛ tsuji ni kwɛɔ tooi lɛ fɛɛ, mɔ kome too pɛ ji mɔ ni je mli. No sɛɛ lɛ, Kaldeabii ni ji nibalɔi akui etɛ baloo Hiob yomai 3,000 kɛtee ni amɛgbe tsuji lɛ fɛɛ ja mɔ kome pɛ shwɛ. Yɛ naagbee lɛ, Satan ha ahum kpeteŋkpele ko tswa ni ebatswa shia ni Hiob bii nyɔŋma lɛ eŋmɛ okpɔlɔ yɛ mli ni amɛyeɔ nii lɛ, ni amɛ fɛɛ amɛgboi. Yɛ no sɛɛ lɛ, mɛi komekomei ni je osharai nɛɛ amli lɛ hiɛ foi ni amɛbabɔ Hiob osharai kpeteŋkpelei ni tamɔ nɛkɛ he amaniɛ.​—Hiob 1:​13-19.

 9. Mɛni ha Hiob amanehulu lɛ bafee nɔ ni wa waa akɛ aaanyɛ adamɔ naa, ni kɛlɛ, te Hiob here enɛɛmɛi anɔ eha tɛŋŋ?

⁹ Mɛɛ amanehului nɔŋŋ nɛ! Kɛji akɛ Hiob le mɔ ni haa ebaa lɛ po lɛ, ebaawa kɛha Iɛ akɛ eeetere jatsu ni tamɔ nɛkɛ. Shi, eleee! Eleee akɛ lɛ ji mɔ ni bei eba yɛ ehe yɛ ŋwɛi lɛ ni ákɛ Yehowa kɛ lɛ miitsu nii koni ekɛtsɔɔ akɛ gbɔmɛi yɛ ni baahiɛ amɛ emuuyeli mli yɛ piŋmɔi ni esaaa ni Satan kɛaaba amɛnɔ lɛ fɛɛ sɛɛ. Shi yɛ awerɛho ni eyeɔ lɛ fɛɛ ni esusuɔ po akɛ benɛ Nyɔŋmɔ ji mɔ ni kɛ nibii nɛɛ baa enɔ lɛ fɛɛ sɛɛ lɛ, Hiob bo akɛ: “Yehowa ŋɔ ha, ni Yehowa ebaŋɔ kɛtee; aaajie Yehowa gbɛi lɛ yi kɛ!” Hɛɛ, “enɛ fɛɛ sɛɛ lɛ, Hiob efeee esha ko, asaŋ ekɛ sane gbonyo ko haaa Nyɔŋmɔ.”​—Hiob 1:​20-23.

10. (a) Mɛni hu Satan bi yɛ Hiob he, ni mɛni hewɔ Yehowa sumɔɔ akɛ eeeŋmɛ enɛ gbɛ lɛ? (b) Shihilɛ ni ehiii kwraa mli ni Hiob baje lɛ kɛ mɛni ba enɔ?

¹⁰ Kwɛ hiɛshishwiemɔ ni enɛ ji kɛha Satan, yɛ be mli ni eyapue yɛ ŋwɛi bɔfoi akpee kroko shishi ni Yehowa kai lɛ sane nɛɛ yɛ Hiob he lɛ: “Asaŋ ehiɛ enɔkwayeli lɛ mli kpɛŋŋ Iolo”! Shi Satan nijiaŋ ejeee wui. Etswa mpoa akɛ kɛji akɛ aha Iɛ hegbɛ ni ekɛ enine sa Hiob gbɔmɔtso he lɛ, Hiob baalomɔ Nyɔŋmɔ kɛyashi ehiɛ. Akɛni Yehowa kɛ ehe efɔ emuuyeli mli ni Hiob hiɛ kɛbashi nɛkɛ be nɛɛ nɔ hewɔ lɛ, Yehowa ŋmɛ gbɛ, ni ebɔ Satan kɔkɔ akɛ ekɛ enine akata Hiob wala he. Kɛkɛ ni Satan ha ‘asanei ni waa mɔ he waa tsɛ̃rɛ Hiob kɛjɛ enaneshi aaahu kɛyashi eyiteŋ pampam.’ (Hiob 2:​1-8) Bɔ ni Hiob tsɔ nɔ̃ ko ni anyaŋeɔ kɛ mɔ ni nii yɔɔ mɔbɔ ha hewɔ lɛ, enɛ ha ewekumɛi kɛ enanemɛi tsi amɛhe kɛjɛ ehe, etsutsu shieŋtsɛmɛi lɛ po ye ehe fɛo.​—Hiob 12:4; 17:6; 19:​13-19; 30:​1, 10-12.

11. Mɛɛ naagba kroko Hiob ŋmɛ etsui shi yɛ mli, ni mɛni ha emuuyeli mli ni ehiɛ yɛ nɛkɛ naagbai nɛɛ fɛɛ mli lɛ feɔ nɔ ni yɔɔ sɔrɔto aloo ekaaa lɛ?

¹¹ Naa nɔ kroko ni akɛte shi awo lɛ! Hiob ŋa lɛ hemɔkɛyeli gbɔjɔ. Ekɛɛ lɛ akɛ: “Ani ohiɛ emuuyeli nɛɛ mli kpɛŋŋ lolo? Loomɔ Nyɔŋmɔ koni ogbo!” Shi, Hiob kɛɛ lɛ akɛ: “Owieɔ tamɔ yei buului lɛ eko wieɔ. Ei, nɔkpakpa lɛ wɔhe yɛ Nyɔŋmɔ dɛŋ, shi nɔfɔŋ lɛ, no lɛ wɔkahe lo?” Taakɛ sane lɛ tee nɔ ekɛɛ lɛ, ‘Enɛ fɛɛ mli lɛ, Hiob kɛ enaabu efeee esha ko.’ (Hiob 2:​9, 10) Ni kɛji akɛ okai ákɛ akɛ nɔ̃ hewɔ ni Hiob naa amanehulu lɛ etee lɛ lɛ, onaa bɔ ni emuuyeli mli ni ehiɛ lɛ ji nɔ ni yɔɔ sɔrɔto ha lɛ!

Tutuamɔ Kroko

12. (a) Namɛi ji hii ni ba koni amɛbashɛje Hiob mii lɛ? (b) Yɛ mɛɛ gbɛ nɔ Satan kɛ nɛkɛ hii nɛɛ tsu nii koni amɛka Hiob lolo?

¹² Shi Satan egbeko naa. Etee hii etɛ ni asusuɔ akɛ amɛji nilelɔi ni le Hiob diɛŋtsɛ, aloo amɛnu gbɛ́i ni ehe akɛ “gbɔmɔ agbo fe bokagbɛ bii lɛ fɛɛ” lɛ he. Eka shi faŋŋ akɛ, abuɔ amɛ akɛ mɛi ni edara yɛ afii amli fe Hiob. (Hiob 1:3; 15:​10; 32:⁠6) Amɛteŋ mɛi enyɔ ji ewekumɛi ni ekɛ amɛ wekukpaa lɛ teŋ jɛkɛ. Elifaz Temanyo lɛ ji Abraham seshinyo kɛtsɔ Teman ni ji Esau nabi lɛ nɔ kɛ Bildad, Shuhinyo lɛ ni lɛ hu eji Abraham bi Shua seshinyo. (Hiob 2:​11; 1 Mose 36:​15; 25:⁠2) Aleee Zofar seshi lɛ mli jogbaŋŋ. Eka shi faŋŋ akɛ nɛkɛ hii etɛ nɛɛ ba koni amɛbashɛje Hiob mii, shi Satan kɛ amɛ tsu nii koni eha amɛfite emuuyeli mli ni Hiob hiɛ lɛ. Tamɔ bɔ ni maŋkwralɔi ni pɛiɔ mɛi asaji amli feɔ amɛhe nanemɛi ni fiteɔ gboklɛfoi pii anɔkwayeli ni amɛha amɛte shi amɛwo amɛ diɛŋtsɛ amɛnɔyelii lɛ, Satan hu hiɛ ka nɔ akɛ “emiishɛjelɔi” lɛ, baaha Hiob ate shi awo e-Nyɔŋmɔ lɛ.​—Hiob 16:​2, 3.

13. (a) Mɛni ji nɔ ni Hiob saralɔi lɛ fee beni amɛshɛ shi lɛ? (b) Wiemɔi lɛ tsɔ mɛɛ gbɛi anɔ beni aje shishi lɛ?

¹³ Beni amɛba lɛ, nɛkɛ gbɔi etɛ nɛɛ kɛ gbii kpawo nyɔɔŋ-nyɔɔŋ kɛ shwane-shwane ta shi diŋŋ amɛkwɛ Hiob piŋmɔ ni naa wa lɛ kɛ bɔ ni aba lɛ shi aha la. (Hiob 2:​12, 13) Elifaz, ni eka shi faŋŋ akɛ lɛ ji mɔ ni eda fe fɛɛ yɛ amɛteŋ lɛ tsɔ hiɛ yɛ wiemɔ mli, lɛ ji mɔ ni kpa sane lɛ hiɛ ni ejie saneyitso ni amɛbaaje he ŋwane shii etɛ lɛ shi. Nɔ ni yɔɔ Elifaz wiemɔ lɛ kɛ enanemɛi enyɔ ni nyiɛ sɛɛ lɛ awiemɔi lɛ amli titri ji naafolɔmɔi. Kɛ́ enaafolɔlɔi nɛɛ ateŋ mɔ fɛɛ mɔ wie lɛ, Hiob hu haa hetoo, ejieɔ enaa akɛ amɛnaafolɔmɔi lɛ bɛ mli. Zofar kɛ ehe wooo ŋwanejee ni ji etɛ lɛ mli, eka shi faŋŋ akɛ enuɔ he akɛ nɔ ko bɛ ni ebaanyɛ ekɛfata he. No hewɔ lɛ, Zofar wie wiemɔi enyɔ, yɛ be mli ni Elifaz kɛ Bildad wie etɛ.

14. Mɛɛ naafolɔmɔi aloo ŋwanejeei mɛi etɛ lɛ kɛte shi wo Hiob, ni yɛ mɛɛ gbɛ nɔ Satan kɛ ŋaatsɔɔ ni tamɔ nakai nɔŋŋ tsu nii beni ekɛ Yesu kpe lɛ?

¹⁴ Elifaz wiemɔi lɛ kɛlɛ, ni ewiemɔi komekomei lɛ amli waaa tsɔ. Shi Bildad wiemɔ gbuɔ mɔ, ni Zofar nɔ lɛ fa. Amɛje gbɛ amɛkɛ ŋaa to amɛnaafolɔmɔi aloo ŋwanejee lɛ ahe koni amɛkɛtsu Satan yiŋtoo akɛ eeefite Hiob emuuyeli lɛ he nii. Yɛ be babaoo mli lɛ, amɛwieɔ saji ni etee nɔ diɛŋtsɛ ni ji anɔkwale he, ni gbɛ ni amɛtsɔɔ nɔ amɛwieɔ lɛ kɛ nii ahe ni amɛkɛtoɔ lɛ ejaaa. Satan kɛ nakai ŋaa lɛ nɔŋŋ tsu nii ekɛshi Yesu. Etsɛ Ŋmalɛ ko ni tsɔɔ akɛ Nyɔŋmɔ bɔfoi baanyɛ abu etsuji ahe kɛjɛ efɔŋ ni aaaba amɛnɔ lɛ ahe, no hewɔ lɛ, Satan fɔ nine etsɛ Yesu akɛ kɛji akɛ eji Nyɔŋmɔ bi lɛlɛŋ lɛ, etũ kɛjɛ sɔlemɔwe lɛ nɔ kɛbagbee shi. (Mateo 4:​5-7; Lala 91:​11, 12) Hiob hu kpee Satan susumɔi ni tamɔ nɛkɛ lɛ naa yɛ be kakadaŋŋ mli.

15. Mɛni ji nɔ ni Elifaz tsɔɔ akɛ no kɛ Hiob naagbai lɛ ba?

¹⁵ Beni Elifaz je enaafolɔmɔ lɛ shishi lɛ, etsɔɔ akɛ Hiob he eshai lɛ ahewɔ ni Nyɔŋmɔ kɛ nakai haomɔi lɛ ba enɔ lɛ. Ebi lɛ akɛ: “Namɔ efeko efɔŋ ko ni ehiɛ ekpata pɛŋ? . . . Bɔ pɛ ni mina nɛ; mɛi ni huɔ nɔsha ni amɛduɔ haomɔ lɛ, no nɔŋŋ amɛkpaa.” (Hiob 4:​7, 8) Yɛ be mli ni eyaa nɔ lɛ, Elifaz kɛɛ akɛ Nyɔŋmɔ heee etsuji lɛ eyeee. Elifaz kɛɛ: “Naa,etsuji lɛ tete ekɛ ehe efɔɔɔ amɛnɔ, ni ebɔfoi lɛ hu, enaa tɔmɔi yɛ amɛhe; mbasoroo mɛi ni hiɔ sũ tsũi amli.”​—Hiob 4:​18, 19.

16. Bildad nyiɛ Elifaz tutuamɔ lɛ sɛɛ yɛ mɛɛ gbɛ nɔ, ni mɛɛ nɔkwɛmɔ nɔ ni esaaa kwraa ekɛtsu nii?

¹⁶ Bildad tsa jɛmɔ ni amɛkɛtutuaa lɛ lɛ nɔ. Ekɛɛ: “Kɛ́ ohe tse ni oja lɛ, no lɛ ehiɛ aaatse ahao kɛ, ni eeeha ojalɛ shihilɛ he lɛ ashwere.” Bildad wie akɛ adaa kɛ galai gbiɔ ni amɛgboiɔ kɛ́ nu bɛ, ni emu sane naa yɛ anɔkwale mli akɛ: “nakai mɛi fɛɛ ni hiɛ kpaa Mawu nɔ lɛ agbɛi lɛ yɔɔ.” Shi kwɛ bɔ ni ejaaa kwraa akɛ ekɛ nɔkwɛmɔ nɔ nɛɛ aaato Hiob he, ni ekɛfata he akɛ, “Mɔ fɔŋ hiɛnɔkamɔ lɛ aaafite.”​—Hiob 8:​6, 11-13.

17. Mɛɛ wiemɔi ni ehiii kwraa Zofar wie?

¹⁷ Shi Zofar wiemɔi Iɛ moŋ ehiii kwraa. Eetsɔɔ akɛ: ‘Oo eji Nyɔŋmɔ aaawie ni ekɛɛ, bo nɔ ni esusuɔ! Nyɔŋmɔ lɛ nɔ ni ofee. Jeee toigbalamɔ ni sa bo lɛ kwraa ekɛhaa bo nɛɛ. Jiemɔ ohe eshai lɛ kɛ onifɔjianii lɛ fɛɛ kɛjɛ ohe oshwie, no baaha abaa oyi ni ona nanemɛi babaoo.’​—Hiob 11:​4-6, 14-20.

18. Mɛi etɛ lɛ tee nɔ amɛtutua Hiob yɛ mɛɛ gbɛ nɔ yɛ ŋwanejee loo naafolɔmɔ ni ji enyɔ lɛ mli?

¹⁸ Elifaz tee nɔ etutua emuuyeli mli ni Hiob hiɛ lɛ yɛ eŋwanejee ni ji enyɔ lɛ mli. ‘Ani ole nɔ ko, Nyɔŋmɔ kɛ ehe efɔɔɔ ŋwɛibɔfoi anɔ po, ni mbasoroo mɔ ko ni tamɔ bo! Mɔfɔŋ ni yɔɔ haomɔ mli daa nɛɛ.’ (Hiob 15:​14-16, 20) Akɛni Bildad mli fu bɔ ni Hiob damɔ shi shiŋŋ eshiɔ amɛnaafolɔmɔi kɛ ŋwanejee lɛ hewɔ lɛ, ekɛɛ akɛ: ‘Abaagbe okane lɛ. Ohe kaimɔi fɛɛ baalaaje. Nakai ji bɔ ni ebaa mɛi fɛɛ ni hiɛ kpaa Nyɔŋmɔ nɔ lɛ anɔ.’ (Hiob 18:​5, 12, 13, 17-21) Zofar gbala jwɛŋmɔ kɛtee Hiob tsutsu shihilɛ fɛfɛo lɛ nɔ ni ebi akɛ: ‘Ani oleee akɛ efɔŋfeelɔi anyamɔ sɛɛ etsɛɛɛ, ni mɔfɔŋ miishɛɛ lɛ hiŋmɛitswaa kɛkɛ ehiɔ shi? Ŋwɛi jieɔ mɔfɔŋ lɛ nɔsha lɛ kpo etsɔɔ.’​—Hiob 20:​4, 5, 16-29.

19. (a) Taakɛ Elifaz tsɔɔ lɛ, te Nyɔŋmɔ susuɔ emuuyeli mli ni gbɔmɔ hiɛɔ lɛ he ehaa tɛŋŋ? (b Te Bildad gbe ejɛmɔ loo tutuamɔ lɛ ni ekɛba Hiob nɔ lɛ naa eha tɛŋŋ?

¹⁹ Yɛ be mli ni egbeleɔ naafolɔmɔ ni ji etɛ lɛ naa lɛ, Elifaz bi akɛ: ‘Ani adesa ko he yɛ sɛɛnamɔ kɛha Nyɔŋmɔi Ni kɛ jalɔ jio po lɛ, ani Nyɔŋmɔ naa ohe sɛɛ?’ Kɛkɛ ni ekɛɛ akɛ: ‘Kuu osɛɛ kɛya Nyɔŋmɔ ŋɔɔ ni ojaje oshihilɛ. Koni asaa bo ekoŋŋ.’ (Hiob 22:​2, 3, 21-23) Bildad kɛ ejɛmɔ lɛ ba naagbee. Ebi akɛ: ‘Namɔ yɔɔ shikpɔŋ nɛɛ nɔ ni ebaanyɛ epupuu ehe akɛ ehe tse? Nyɔŋmɔ anunyam fa aaahu akɛ nyɔŋtsere kɛ ŋulamii tete kpɛɛɛ tamɔ lɛ. Mbasoroo adesa ni ji gɔgɔmi yɛ ehiɛ nɛɛ!’​—Hiob 25:​2-6.

Hiob Hefamɔ Kɛ Ejajemɔ

20. (a) Mɛɛ gbɛ nɔ Hiob tsɔ eha naafolɔmɔ akɛ piŋmɔ ji toigbalamɔ ni Nyɔŋmɔ kɛbaa yɛ eshai ahewɔ lɛ hetoo?(b) Mɛni ji Hiob faishitswaa ni te wɔfeɔ tɛŋŋ wɔleɔ akɛ emuuyeli mli ni ehiɛ lɛ kɔɔ Nyɔŋmɔ he diɛŋtsɛ?

²⁰ Yɛ epiŋmɔ babaoo lɛ fɛɛ sɛɛ Iɛ, Hiob eŋmɛɛɛ ehe ehaaa mɛi ni haoɔ lɛ lɛ aŋwanejee lɛ. Ejaakɛ kɛji akɛ piŋmɔ ji toigbalamɔ ni jɛ Nyɔŋmɔ ŋɔɔ yɛ mɔ ko he eshai ahewɔ lɛ: “Mɛni hewɔ mɛi fɔji ayi naa wala, ni amɛgbɔlɔɔ, ni amɛjeɔ agbo kɛ ninamɔ babaoo?” (Hiob 21:​7-13) Ni nɔ ni kɛ Hiob naafolɔlɔi lɛ awiemɔi lɛ kpaaa gbee lɛ, Yehowa yɛ bulɛ ni ehiɛ sɔɔ mɛi ni hiɛɔ amɛ emuuyeli mli ni tsɔɔ no nɔ amɛnaa hetoo amɛhaa Satan mpoatswaa akɛ ebaanyɛ etsi mɔ fɛɛ mɔ kɛje Nyɔŋmɔ sɔɔmɔ he lɛ. (Abɛi 27:​11; Lala 41:12) Hiob yɛ hekɛnɔfɔɔ yɛ emuuyeli mli ni lɛ diɛŋtsɛ ehiɛ lɛ mli, ni enɛ ha ebo akɛ: “Miŋmɛŋ mimuuyeli lɛ he kɛyashi be mli ni magbo!” (Hiob 27:​5, NW) Dabi, efeko nɔ ko ni aaaha nɔ ni baa enɔ lɛ aba enɔ.

21. Mɛni ji nɔ ni Elihu kɛɛ Hiob apasa miishɛjelɔi lɛ, ni mɛɛ jajemɔ ni he hiaa ekɛha Hiob?

²¹ No mli lɛ obalanyo Elihu miibo nɛkɛ ŋwanejee kakadaŋŋ nɛɛ mli wiemɔi lɛ fɛɛ toi. Kɛkɛ ni ebɔi wiemɔ ni ekɛɛ Hiob apasa miishɛjelɔi lɛ akɛ nɔ ko nɔ ko bɛ nɔ ni amɛwie lɛ mli ni tsɔɔ akɛ Hiob ji eshafeelɔ. (Hiob 32:​11, 12) Kɛkɛ ni Elihu tsɔ ehiɛ eha Hiob ni ekɛɛ: “Minu owiemɔi lɛ agbee akɛ, ‘mihe tse, ni nɔtɔmɔ ko bɛ mihe. Naa! Eetao bei sane ko yɛ mihe, ebuɔ mi akɛ ehenyɛlɔ’ . . . enɛ mli lɛ osane lɛ ejaaa.” (Hiob 33:​8-13; 6:​29; 13:​24, 27; 19:​6-8) Hɛɛ, Hiob hao babaoo yɛ emuuyeli mli ni ehiɛ lɛ ni etaoɔ etsɔ nɔ ekɛbu ehe bem lɛ mli. Ni kɛlɛ, yɛ nakai beaŋ nɔŋŋ lɛ, ewieee eshiii Nyɔŋmɔ aloo ni eeelaaje hekɛnɔfɔɔ akɛ Nyɔŋmɔ bafee nɔ ni ja lɛ.

22. (a) Yɛ be mli ni ebo Yehowa toi lɛ, mɛni Hiob kɛɛ? (b) Mɛni ji nɔ ni Nyɔŋmɔ bi yɛ Hiob apasa miishɛjelɔi lɛ agbɛfaŋ, ni mɛni jɛ mli ba ha Hiob yɛ naagbee?

²² Kɛkɛ ni ahum ko bɔi tswaa beni Elihu gbeɔ ewiemɔ lɛ naa lɛ, kɛkɛ ni Yehowa diɛŋtsɛ wie kɛjɛ ahum lɛ mli akɛ: “Namɔ ji mɔ ni haa ŋaawoo woɔ duŋ kɛ wiemɔi ni nilee bɛ mli nɛɛ? Agbɛnɛ miamɔ ohe tamɔ nuu; koni mabio, koni otsɔɔ mi!” Beni ébo Yehowa toi sɛɛ lɛ, Hiob kpɛlɛ nɔ akɛ ewie kpalakpala tsɔ, ni ebɛ sane lɛ he nilee, no hewɔ lɛ eeshwa ehe “yɛ su kɛ lamlu mli.” Kɛkɛ ni Yehowa wie eshi Elifaz kɛ enanemɛi enyɔ lɛ ni efa ni Hiob akpa fai aha amɛ. Yɛ no sɛɛ lɛ, asaa Hiob ekoŋŋ, ni aha efɔ bihii kpawo kɛ biyei fɛfɛji etɛ kɛ kooloi babaoo ni bɔ nɔ ni eyɔɔ tsutsu lɛ he toi enyɔ. Ehi shi afii 140 kɛfata ewala shihilɛ he he, ni “Hiob gbo beni egbɔ ni eye gbii pii lɛ.”​—Hiob 38:​1-4; 42:​1-17.

23. Te esa akɛ emuuyeli mli ni Hiob hiɛ lɛ asa wɔhe aloo ana wɔnɔ hewalɛ aha tɛŋŋ?

²³ Yɛ anɔkwale mli lɛ Hiob ji emuuyeli mli hiɛlɔ ko ni yɔɔ sɔrɔto! Ehe gbɛ ni eeetsɔ nɔ ele akɛ lɛ ji mɔ ni Satan kɛ efɔŋ tutuaa lɛ kɛ mpoatswaa lɛ. Ni enɛ maa emuuyeli mli ni ehiɛ lɛ nɔ mi babaoo, ejaakɛ eyɛ mli akɛ eheɔ eyeɔ akɛ epiŋmɔ lɛ fɛɛ jɛ Nyɔŋmɔ ŋɔɔ moŋ, shi ekwaŋ Nyɔŋmɔ aloo ni eeelomɔ lɛ. Mɛɛ nikasemɔ enɛ ji kɛha wɔ, akɛni wɔ lɛ wɔle wɔ emuuyeli mli hiɛmɔ he kaai lɛ ajɛɛhe hewɔ! Lɛlɛŋ esa akɛ enɛ atsirɛ wɔ ni wɔkase Hiob nɔkwɛmɔ nɔ lɛ ni wɔya wɔhiɛ yɛ Yehowa nitsumɔ lɛ mli ni nɔ fɛɛ nɔ ni Nyɔŋmɔ Henyɛlɔ lɛ kɛaaba wɔ nɔ lɛ kɔɔɔ he eko.a

Hiob Emuuyeli Lɛ​—Namɔ Baanyɛ Akase?

“Eeeŋmɛ mi yɛ jalɛ nsɛni mli ni Nyɔŋmɔ aaana mimuuyeli lɛ.”​—Hiob 31:​6, NW.

 1. Mɛni hewɔ ehi akɛ wɔɔsusu Hiob nɔkwɛmɔ nɔ he lɛ, ni mɛɛ sanebimɔi ateɔ amɛ shi?

HIOB yɛ hekɛnɔfɔɔ yɛ emuuyeli mli ni ehiɛ lɛ mli, no hewɔ lɛ, ekpɛlɛ nɔ akɛ Nyɔŋmɔ apɛi emli ekwɛ. Enɔkwɛmɔ nɔ lɛ baafee hewalɛwoo kpele aha wɔ ŋmɛnɛ, titiri lɛ yɛ be mli ni Satan Abonsam miibɔ mɔdɛŋ waa ni efite emuuyeli mli ni mɛi fɛɛ ni sɔmɔɔ Nyɔŋmɔ lɛ hiɛ lɛ. (1 Petro 5:⁠8) Akɛni kaselɔ Yakobo yoo enɛ hewɔ lɛ, ekɛɛ akɛ: “Nyɛŋɔɔ gbelɔi ni wie yɛ Nuŋtsɔ lɛ gbɛi amli lɛ nyɛfea amanehulu kɛ tsuishiŋmɛɛ he okadi,” titri lɛ yɛ Hiob nɔ lɛ mli. (Yakobo 5:​10, 11) Shi namɛi baanyɛ ekase Hiob emuuyeli lɛ? Ani wɔbaanyɛ? Mɛɛ gbɛi anɔ Hiob to emuuyeli mli hiɛmɔ he okadi efɔ shi kɛha wɔ yɛ?

 2. (a) Mɛni ji Hiob gbɛi lɛ shishi? (b) Mɛni ji nɔ ni Hiob emuuyeli mli hiɛmɔ gbɛ lɛ tsu?

² Gbɛi Hiob lɛ shishi ji “mɔ ni ateɔ shi awoɔ lɛ,” ni nakai pɛ ebatsɔ. Shi beni Yehowa ŋmɛ Satan nibimɔ lɛ gbɛ ni ejie hebuu afabaŋ ni efo ewo Hiob he lɛ, nɔ ko nɔ ko bɛ ni Satan fee ni no nyɛ ekumɔ emuuyeli mli ni Hiob hiɛ kɛha Nyɔŋmɔ lɛ. (Hiob 1:​1–2:10) No hewɔ lɛ Hiob kɛ hetoo ha Satan mpoatswaa akɛ ebaanyɛ etsɔ mɔ fɛɛ mɔ kɛjɛ Nyɔŋmɔ sɔɔmɔ he lɛ. (Abɛi 27:11) Yɛ Hiob emuuyeli mli hiɛmɔ gbɛ lɛ hewɔ lɛ, ekɛ nakai feemɔ jaje etsɔɔ jeŋ muu fɛɛ akɛ, ‘Satan bo ji amalelɔ ni ehiii kwraa, ejaakɛ Yehowa ji mi-Nyɔŋmɔ, ni mahiɛ mimuuyeli mli maha lɛ ni nɔ ni baaba lɛ kɔɔɔ he eko!’​—Hiob 27:⁠5.

Mɛi Ni Tamɔ Hiob

 3. Tamɔ abu ehe yɛ ŋwɛi lɛ, ni mɛɛ saji abiɔ yɛ ehe?

³ Nɔ ni he hiaa ji akɛ, sane ni ka Yehowa kɛ Satan teŋ lɛ ji jeŋ muu fɛɛ sane, nɔ ni kɔɔ mumɔi ashihilɛ he lɛ he. Mɔ ni yɔɔ ŋwɛi, ni Yehowa kɛ ehebuu efo afabaŋ ewo ehe ji shiwoo “seshi” ni Nyɔŋmɔ baatsɔ enɔ atsu eyiŋtoi wuji lɛ ahe nii lɛ. (1 Mose 3:15) Ni kɛlɛ, kɛ ajie ‘hebuu afabaŋ’ lɛ kɛjɛ ehe lɛ, ani nɛkɛ mɔ nɛɛ baakase Hiob emuuyeli lɛ lɛlɛŋ? Ani ebaanyɛ etsɔɔ akɛ nuu ni yeɔ emuu, taakɛ Adam ji lɛ, baanyɛ ahiɛ emuuyeli mli aha Nyɔŋmɔ ni tɔmɔ ko baŋ he? (1 Korintobii 15:45) Kɛkɛ ni Satan je shishi esaa ehe koni ekɛ kaa ni naa wa fe fɛɛ aba nɛkɛ “seshi” nɛɛ nɔ be fɛɛ be ni eeepue yɛ shikpɔŋ nɔ.

 4. (a) Namɔ bafee mɔ titri ni Satan nyɛɔ Iɛ lɛ, ni te wɔfeɔ tɛŋŋ wɔleɔ akɛ Nyɔŋmɔ jie ehebuu kwɛmɔ lɛ kɛjɛ ehe? (b) Mɛni ji nɔ ni Yesu kɛha Yehowa?

⁴ Yesu Kristo bafee “seshi” ni atsu kɛjɛ ŋwɛi lɛ. Ebafee mɔ ni Satan gbala ejwɛŋmɔ kɛba enɔ, hɛɛ, mɔ ni Satan teɔ shi woɔ Iɛ titri. Yɛ odaseyeli ni tsɔɔ akɛ Yehowa ejie ehebuu afabaŋ lɛ hewɔ ni Kristo bolɔ yɛ be mli ni atsotsoro sɛŋmɔtso lɛ nɔ lɛ akɛ: “Mi-Nyɔŋmɔ mɛɛba okwami” lɛ?(Mateo 27:​46; Lala 22:⁠2) Eyɛ mli akɛ enu he waa akɛ Nyɔŋmɔ ejie ehebuu lɛ moŋ, shi Yesu “efeee esha ko, ni asaŋ ekɛ sane gbonyo ko shwaaa Nyɔŋmɔ” taakɛ Hiob fee lɛ. (Hiob 1:22) Ekase Hiob, eye emuu eha Nyɔŋmɔ ni tɔmɔ ko bɛ he, ni ekɛ enɛ tsɔɔ akɛ ‘mɔ ko mɔ ko bɛ ni tamɔ lɛ yɛ shikpɔŋ nɔ.’ (Hiob 1:⁠8) No hewɔ lɛ, Yesu mli pɛ Yehowa Nyɔŋmɔ na hetoo ni yeɔ emuu ni hiɔ shi kɛyaa naanɔ yɛ eha Satan apasa naafolɔmɔ akɛ Nyɔŋmɔ nyɛŋ ekɛ gbɔmɔ ko ni baahi shi anɔkwafo aha lɛ yɛ kaai ni naa wa fe fɛɛ mli aba shikpɔŋ nɔ lɛ.

 5. (a) Mɛni ji nɔ ni Satan yaa nɔ efeɔ? (b) Mɛni Satan fee beni ashwie lɛ kɛjɛ ŋwɛi lɛ?

⁵ Akɛni eetao hetoo babaoo lolo hewɔ lɛ, Satan yaa nɔ efolɔɔ Yesu mumɔŋ nyɛmimɛi lɛ ni amɛkɛ Yesu feɔ Nyɔŋmɔ gbɛjianɔtoo ni tamɔ yoo lɛ “seshi” lɛ anaa. Yɛ be mli ni etsɔɔ be ni ato maŋtsɛyeli lɛ ama shi yɛ ŋwɛi lɛ mli lɛ, Biblia lɛ wieɔ Satan he akɛ: “Ashɛ wɔnyɛmimɛi lɛ anaafolɔlɔ lɛ ni folɔɔ amɛnaa yɛ wɔ-Nyɔŋmɔ lɛ hiɛ nyɔɔŋ kɛ shwane lɛ afɔ!” Shi, Satan feɔ babaoo fe enaafolɔmɔ lɛ kɛkɛ, ekɛ nyɛɛ tutuaa amɛ! Biblia lɛ tsɔɔ mli akɛ beni ashwie lɛ kɛjɛ ŋwɛi lɛ, “drako [Satan] lɛ mli fu yoo lɛ, ni eyiŋ etee ni ekɛ yoo lɛ seshibii ni eshwɛ ni yeɔ Nyɔŋmɔ kitai lɛ anɔ ni amɛhiɛ Yesu Kristo odasei lɛ ayawu.”​—Kpojiemɔ 12:​7-12, 17.

 6. (a) Namɛi ŋmɛnɛ amɛnyiɛɔ shiɛmɔ nitsumɔ lɛ hiɛ lɛ, ni namɛi kɛ amɛhe ebɔ amɛhe lɛ? (b) Mɛni ji nɔ ni Satan bɔɔ mɔdɛŋ akɛ eeefee mɛnɛɛmɛi fɛɛ?

⁶ “Yoo lɛ seshibii” lɛ ji Odasefoi ni Yehowa efɔ amɛ mu ni eshwɛ yɛ shikpɔŋ nɔ lɛ. Amɛji mɛi ni nyiɛɔ “Yesu Kristo odase” lɛ hiɛ lɛ, ni amɛjajeɔ yɛ jeŋ fɛɛ akɛ awo lɛ Maŋtsɛ ni etsɛŋ ekɛ nibii agbɛjianɔtoo ni ejaaa nɛɛ baaba enaagbee lɛ. (Mateo 24:​14; Daniel 2:44) Shi jeee amɛ pɛ amɛfeɔ enɛ! Amrɔ nɛɛ asafo babaoo ko ni amɛyibɔ fe akpekpei etɛ ebafata amɛhe, ni amɛfee emuuyeli mli hiɛlɔi agbɛjianɔtoo kome yɛ jeŋ fɛɛ. Nɛkɛ emuuyeli mli hiɛlɔi nɛɛ fɛɛ hu ebatsɔmɔ mɛi ni Satan kɛ nyɛɛ teɔ shi woɔ amɛ, ni amɛŋwɛi Tsɛ Yehowa nyaa amɛ emuuyeli lɛ he.​—2 Timoteo 3:​12; Abɛi 27:⁠11.

 7. Mɛni hewɔ wɔbaanyɛ wɔna hekɛnɔfɔɔ yɛ Satan tutuamɔi lɛ fɛɛ sɛɛ?

⁷ Yɛ anɔkwale mli lɛ, eji hiɛdɔɔ sane akɛ wɔɔyoo akɛ taakɛ ekɛba Hiob nɔ lɛ, Satan egbala enyɛɛ lɛ kɛha wɔ ni wɔbɔɔ mɔdɛŋ akɛ wɔɔhiɛ emuuyeli mli wɔha Nyɔŋmɔ lɛ anɔ. Shi, esaaa akɛ wɔhaoɔ. Mɛni hewɔ? Ejaakɛ “Yehowa yɛ mlitsɔlɛ babaoo, ni emli jɔ hu.” Ni “eshiŋo esaa ekwaŋo!” (Yakobo 5:​11; 5 Mose 31:⁠6) Hɛɛ, Yehowa baafi wɔsɛɛ. Biblia lɛ kɛɔ akɛ: “Tsɛ̃ŋ hu ji lɛ ha mɛi ni nyiɛɔ yɛ emuuyeli mli lɛ.” (Abɛi 2:​7, NW) Enɛ hu etsɔɔɔ akɛ Yehowa eŋmɛŋ gbɛ koni aka wɔ. Ebaanyɛ eŋmɛ gbɛ, taakɛ efee yɛ Hiob he lɛ. “Shi anɔkwafo ji Nyɔŋmɔ,” taakɛ bɔfo Paulo kadi lɛ, “mɔ ni haŋ akanyɛ fe bɔ ni nyeaanyɛ, shi moŋ, ekɛ kaa Iɛ nɔŋŋ aaaje gbɛ ahanyɛ ni nyɛje mli hu, koni nyɛnyɛ mli nyɛmɔ.”​—1 Korintobii 10:⁠13.

Kɛ Aaka Wɔ Lɛ

 8. Hiob nɔkwɛmɔ nɔ lɛ he baanyɛ aba sɛɛnamɔ aha wɔ ŋmɛnɛ yɛ mɛɛ gbɛ nɔ?

⁸ Hiob emuuyeli he nɔkwɛmɔ nɔ lɛ he baanyɛ aba sɛɛnamɔ aha wɔ titri yɛ be mli ni wɔkɛ kaai ni mli wawai miikpe lɛ. Hiob na amanehului babaoo akɛ, eyasumɔ akɛ eeegbo ni akɛ lɛ atee yɛ sheol, adesai akwamaŋ gbonyobu lɛ mli. (Hiob 14:13) Mɛi pii enu he nakai ŋmɛnɛ hu, amɛkɛɔ akɛ amɛkɛ Hiob kpaa gbee yɛ be mli ni amɛnaa amanehulu babaoo lɛ. Ekolɛ bo hu onu he nakai be ko. Yɛ anɔkwale mli lɛ, epiŋmɔi lɛ ahe sane ni wɔɔkane lɛ baanyɛ atsɔ tamɔ hewalɛwoo ni wɔnine shɛɔ nɔ kɛjɛɔ naanyo ko ni etsɔ kaai ni mli wawai fe wɔ nɔ lɛ po mli. Akɛni wɔle akɛ mɔ ko hu eŋmɛ etsui shi yɛ amanehulu mli nakai ni enuɔ wɔ shishi lɛ, enɛ yeɔ ebuaa wɔ ni wɔŋmɛɔ wɔtsui shi.

 9. Mɛi krokomɛi ni hiɛɔ amɛ emuuyeli mli lɛ he baa sɛɛnamɔ kɛhaa wɔ yɛ mɛɛ gbɛ nɔ?

⁹ Akɛni Yehowa le nɔ ni he hiaa wɔ hewɔ lɛ, eha aŋma Hiob wolo lɛ afɔ shi koni ekɛye ebua wɔ ni wɔhiɛ emuuyeli mli taakɛ Hiob fee lɛ. (Romabii 15:4; Yakobo 5:​10, 11) Nyɔŋmɔ le akɛ, taakɛ gbɔmɔtso lɛ fa ko kɛ ehe fɔɔ ekroko nɔ lɛ, nakai nɔŋŋ etsuji anɔkwafoi lɛ hiaa amɛhe-amɛhe. (1 Korintobii 12:​20, 26) Kaimɔ nyɛsɛɛ “Emuuyeli Mli Hiɛlɔi” akpee ni mɛi akpekpei abɔ ni kaneɔ wolo tɛtrɛɛ nɛɛ fee lɛ. Mɛi ni ba jɛmɛ lɛ baakai bɔ ni amɛnu he akɛ ehi akɛ amɛaahi mɛi babaoo ni nɔ ni he hiaa amɛ fe fɛɛ yɛ shihilɛ mli ji ni amɛhiɛ emuuyeli mli amɛha amɛ-Nyɔŋmɔ lɛ ateŋ lɛ. Mɛɛ hewalɛwoo ko ni akɛaahiɛ emuuyeli mli enɛ ji kɛha mɛi ni tee kpee nɛɛ shishi lɛ akɛ amɛaale akɛ akpei abɔ ni ebɔle amɛ​—yɛ amɛnitsumɔ hei aloo yɛ skul kɛ hei ni amɛyɔɔ lɛ hu​—miihiɛ emuuyeli mli yɛ kaai ni mli wawai ashishi lɛ!​—1 Petro 5:⁠9.

10. (a) Mɛni baanyɛ aba ni haŋ mɔ ko anyɛ akwɛ nibii yɛ gbɛ ni ja nɔ? (b) Mɛni ji nɔ ni Hiob je shishi ebi sane yɛ he?

¹⁰ Shi jeee be fɛɛ be wɔbaana shihilɛi komɛi amli jogbaŋŋ, taakɛ Hiob hu nyɛɛɛ ana lɛ. Gbɔmɔ ni naa amanehulu babaoo ni agbɛnɛ ejwɛŋmɔ efutu lɛ baanyɛ akɛɛ akɛ, ‘Oo, mɛni hewɔ Nyɔŋmɔ feɔ mi enɛ? Mɛni hewɔ Nyɔŋmɔ ŋmɛɔ gbɛ ni enɛ baa minɔ?’ Ebaanyɛ eshɛ he ni ebaawie po akɛ, ‘Mɛɛ sɛɛnamɔ yɔɔ Nyɔŋmɔ ni misɔmɔɔ lɛ he?’ Akɛni Hiob leee emanehulu lɛ jɛɛhe hewɔ lɛ, ebi sɛɛnamɔ ni yɔɔ jalɔ ni ekɛɛ eji lɛ he, ejaakɛ mɛi ni ja lɛ naa nɔ ni yɛ be babaoo mli lɛ, babaoo po fe mɛi ni ejaaa lɛ. (Hiob 9:22) Taakɛ Elihu tsɔɔ mli lɛ, Hiob kɛɛ: “Mɛɛ sɛɛnamɔ minaa? Mɛni mana yɛ he fe kɛ́ mifee esha?” (Hiob 35:​3, An American Translation) Shi wɔnyɛŋ wɔŋmɛ gbɛ ni wɔkɛ wɔhe awo wɔ diɛŋtsɛ wɔnaagbai amli babaoo akɛ no haaa wɔna nibii amli jogbaŋŋ ni agbɛnɛ wɔbi sɛɛnamɔ ni yɔɔ Nyɔŋmɔ sɔɔmɔ he.

11. Mɛɛ jajemɔ aloo kãmɔ kpakpa ko Elihu kɛha Hiob?

¹¹ Elihu kɛ jajemɔ ni he hiaa ha Hiob, ejaje saji lɛ jogbaŋŋ kɛtsɔ bɔ ni etsɔɔ akɛ awo Yehowa nɔ gojoo kwraa fe Hiob lɛ nɔ. (Hiob 35:​4, 5) Etsɔɔ akɛ, yɛ nɔ fɛɛ nɔ ni aaaba lɛ sɛɛ lɛ, esaaa akɛ wɔmuɔ sane naa akɛ Nyɔŋmɔ kwɛɛɛ nɔ ni yaa nɔ ni wɔsusuɔ akɛ belɛ, wɔbaanyɛ wɔku wɔhiɛ wɔshwie enɔ, akɛni wɔsusuɔ akɛ eyeee jalɛsane hewɔ. Elihu bi Hiob akɛ, “Kɛji ofee esha lɛ mɛni ona oshi lɛ? Ni kɛ omlatɔmɔi fa lɛ, mɛni no baafee lɛ?” (Hiob 35:⁠6) Hɛɛ, kɛji akɛ obɔ mɔdɛŋ ni oku ohiɛ oshwie Nyɔŋmɔ nɔ kɛtsɔ egbɛ̀i aloo esɔɔmɔ ni oooshi lɛ nɔ lɛ, ohe awui kɛkɛ oyeɔ, shi jeee Nyɔŋmɔ.

12. Wɔ emuuyeli mli hiɛmɔ lɛ saa Nyɔŋmɔ he yɛ mɛɛ gbɛ nɔ?

¹² Yɛ gbɛ kroko nɔ lɛ, Elihu tsɔɔ akɛ kɛji akɛ wɔfee nɔ ni ja hu lɛ, ehe baaa sɛɛnamɔ ko kɛhaaa Yehowa Nyɔŋmɔ diɛŋtsɛ. Shi Nyɔŋmɔ naa miishɛɛ kɛji akɛ wɔhiɛ emuuyeli mli ni kɛlɛ, yɛ nakai beaŋ nɔŋŋ lɛ, ekɛ ehe efɔɔɔ wɔnyɛmɔ nɔ, taakɛ ejeɔ kpo yɛ nɔ ni Elihu bi Hiob lɛ mli lɛ: “Kɛji oji jalɔ lɛ, mɛni ohaa lɛ? Aloo mɛni enaa yɛ odɛŋ?” (Hiob 35:⁠7) Nyɔŋmɔ ji mɔ ni ha wɔ wala, ni lɛ ehewɔ wɔmuɔ ni wɔyaa wɔbaa ni wɔyɔɔ shihilɛ mli. Enii ji nibii fɛɛ! (Bɔfoi lɛ Asaji 17:​25; 1 Kronika 29:14) No hewɔ lɛ, efɔŋ ni wɔɔfee aloo wɔjalɛ nyɛŋ asa Nyɔŋmɔ he diɛŋtsɛ yɛ gbɛ ko nɔ.​—Hiob 35:⁠8.

Beni Ajaje Lɛ Aloo Aka Lɛ Lɛ

13. (a) Te Hiob fee enii yɛ jajemɔ loo kamɔ ni akɛha lɛ lɛ he eha tɛŋŋ? (b) Mɛɛ naagba ko ji nɔ ni wɔ fɛɛ wɔyɔɔ ni Kristofoi ni amɛhe gbɛi tamɔ Petro po fata he?

¹³ Te Hiob fee enii eha tɛŋŋ yɛ be mli ni klɛŋklɛŋ lɛ, Elihu kɛ agbɛnɛ Yehowa diɛŋtsɛ jaje lɛ aloo amɛka lɛ lɛ? Ekpɛlɛ nɔ, etsake “yɛ su kɛ lamlu mli.” (Hiob 42:⁠6) Hɛɛ, Hiob ba ehe shi, ekpɛlɛ etɔmɔ lɛ nɔ. Ani heshibaa ni tamɔ nɛkɛ efeee wɔ fɛo? Shi ani wɔ hu? Eyɛ mli akɛ wɔbaanyɛ wɔfee emuuyeli mli hiɛlɔi ni he wa tamɔ Hiob moŋ, shi wɔ fɛɛ wɔbaanyɛ wɔtɔ ni wɔŋmɛŋ pɛpɛɛpɛ yɛ gbɛ kome aloo ekroko nɔ. (Yakobo 3:2; Galatabii 2:​11-14) Mɛni ji nɔ ni wɔbaanyɛ wɔfee kɛ́ agbala wɔjwɛŋmɔ kɛba wɔtɔmɔi aloo emuu ni wɔyeee lɛ anɔ, kɛ́ mɔ bibioo po ni tamɔ Elihu fee enɛ?​—Hiob 32:⁠4.

14. (a) Mɛni ji su ni jeɔ kpo yɛ adesa he kɛ́ aajaje lɛ aloo aaka lɛ? (b) Mɛni baanyɛ ekɛ tɔmɔi loo sanenaamuu ni ejaaa aba, ni mɛni hewɔ ni tɔmɔi ni aaakpɛlɛ nɔ he hiaa yɛ be babaoo mli lɛ?

¹⁴ Ebɛ mlɛo akɛ wɔɔkpɛlɛ kamɔ aloo jajemɔ nɔ yɛ be fɛɛ mli. (Hebribii 12:​11; Abɛi 3:​11, 12) Subaŋ ni wɔhiɛ ji ni wɔbɔ mɔdɛŋ wɔbu wɔhe bem. Taakɛ Hiob fee lɛ, ekolɛ wɔjeko gbɛ wɔkɛko loo wɔfeko nɔ ko ni ejaaa. Ekolɛ jwɛŋmɔ ni wɔhiɛ lɛ hi. Shi wɔkɛɛ nɔ ko ni wɔnuuu shishi jogbaŋŋ, yɛ nilee aloo jwɛŋmɔ ni wɔbɛ hewɔ. Ekolɛ wɔdaaŋ wiemɔ tsɔɔ akɛ maŋ nɔ ni wɔjɛ loo weku mli ni wɔjɛ nɔ kwɔ fe mɔ kroko nɔ aloo wɔbaanyɛ wɔfee keketee yɛ sane ko ni Ŋmalɛ lɛ fiii sɛɛ lɛ mli. Abaagbala wɔjwɛŋmɔ kɛba nɔ akɛ nɔ ni wɔfee lɛ tsɔɔ wɔ diɛŋtsɛ wɔsusumɔi ni akɛ eeeye mɛi krokomɛi awui kɛyashɛ he ni ekɛ amɛmumɔŋ shihilɛ aaawo oshara mli. Kɛ́ aajaje wɔ aloo aakã wɔ lɛ, ani wɔbaafee tamɔ Hiob ni wɔkpɛlɛ nɔ akɛ ‘wɔwie ni wɔnuuu sane lɛ shishi’ ni ‘wɔmiigbala sɛɛ aloo wɔmiishwa wɔhe’?​—Hiob 42:​3, 6.

Wɔhe Ni Wɔkɛaafɔ Nyɔŋmɔ Nɔ, Jeee Ninamɔ Nɔ

15. Te wɔfeɔ tɛŋŋ wɔleɔ akɛ Hiob kɛ ehe efɔɔɔ eninamɔ nɔ?

¹⁵ Bildad bi sane yɛ Hiob hekɛnɔfɔɔ lɛ jɛɛhe lɛ he, ni etsɔɔ akɛ ehiɛ ekpa Nyɔŋmɔ nɔ ni akɛ ekɛ ehe eyafɔ nɔ kroko nɔ. (Hiob 8:​13, 14) Ni kɛlɛ eyɛ mli ákɛ akɛ heloo gbɛfaŋ nibii babaoo ejɔɔ Hiob moŋ, shi ekɛ ehiɛ efɔɔɔ enɛɛmɛi anɔ. Be mli ni elaaje enibii fɛɛ ni eyɔɔ lɛ, enɛ hosooo emuuyeli mli ni ehiɛ lɛ bibioo kwraa. (Hiob 1:21) Yɛ be mli ni efaa ehe yɛ naagbee lɛ, Hiob kɛɛ: “Kɛji miŋɔ shika mifee mibobaa nɔ, ni mitsɛ shika krɔŋŋ akɛ mihiɛnɔkamɔ lɛ, kɛji minya akɛ minii ni mina lɛ fa, ni minine eshɛ nii babaoo nɔ lɛ, . . . no hu ji nɔsha ni sa akɛ kojolɔi awo he nyɔmɔ; ejaakɛ kulɛ mikwa Mawu ni yɔɔ ŋwɛi lɛ.”​—Hiob 31:​24-28.

16. (a) Esa akɛ wɔpɛi wɔ diɛŋtsɛ wɔmli wɔkwɛ yɛ mɛni hewɔ? (b) Mɛɛ shiwoi Yehowa kɛhaa mɛi ni kɛ amɛhiɛ fɔɔ enɔ lɛ?

¹⁶ Shi wɔ hu? Wɔkɛ wɔhiɛ efɔ mɛni nɔ​—Yehowa nɔ aloo heloo gbɛfaŋ nibii anɔ? Kɛ aŋmɛ wɔ diɛŋtsɛ yɛ nsɛni ni ja mli lɛ, taakɛ Hiob yasumɔ ni afee lɛ, ani Nyɔŋmɔ baale emuuyeli mli ni wɔhiɛ yɛ sane nɛɛ mli lɛ? Ani nɔ ni he hiaa wɔ yɛ shihilɛ mli diɛŋtsɛ ji ni wɔha Yehowa ana emuuyeli mli hiɛmɔ nifeemɔ ko ni eeetsɔ nɔ ekɛha Satan mpoatwaa lɛ hetoo? Aloo nɔ ni he hiaa wɔ titri ji ni wɔtsu wɔ akɔnɔi aloo hiɛtserɛjiemɔ mli henumɔi kɛ heloo gbɛfaŋ nibii ahe nii? Kwɛ bɔ ni eeefee nɔ ni hi jogbaŋŋ akɛ wɔɔtamɔ Hiob ni wɔha Yehowa tsui anya kɛtsɔ wɔhe ni wɔkɛaafɔ enɔ lɛ nɔ, koni wɔkasusu akɛ wɔhe miihia tsɔ ko aloo wɔkɛ wɔhe akafɔ heloo gbɛfaŋ nibii ni wɔyɔɔ lɛ anɔ! Kɛ́ wɔkɛ wɔhe fɔ Yehowa nɔ, ni wɔkɛ enibii ye klɛŋklɛŋ gbɛhe lɛ, ewoɔ shi akɛ eshiŋ wɔ ni asaŋ ekwaŋ wɔ.​—Mateo 6:​31-33; Hebribii 13:​5, 6.

Bɔlɛnamɔ He Jeŋba Kpakpa

17. Mɛɛ jwɛŋmɔ ni ejaaa Hiob “miishɛjelɔi” lɛ hiɛ, ni mɛni ji nɔ ni Hiob wie yɛ jeŋba kpakpa ni eyɔɔ lɛ he?

¹⁷ Hiob apasa miishɛjelɔi lɛ ejeee gbɛ amɛfolɔɔɔ enaa kɛ bɔlɛnamɔ he jeŋba gbonyo ko, shi amɛtsɔɔ yɛ be kɛ bei amli akɛ efee efɔŋ ko etee ni no hewɔ ni Nyɔŋmɔ gbalaa etoi lɛ. Ákɛ nuu ni yɔɔ nii babaoo, ni yɛ anɔkwale mli lɛ eji “gbɔmɔ agbo fe bokagbɛbii Iɛ fɛɛ” lɛ, yɛ anɔkwale mli lɛ, Hiob na hegbɛi ni eeenyɛ etsɔ mli ekɛ ehe awo bɔlɛnamɔ mli yɛ egbalashihilɛ lɛ sɛɛ. (Hiob 1:3; 24:15) Nyɔŋmɔ tsuji krokomɛi ni tsɔ Hiob gbele hiɛ kɛ mɛi ni nyiɛ esɛɛ lɛ ateŋ mɛi pii gbee shi yɛ bɔlɛnamɔ he kaa sɔrɔtoi lɛ amli. (1 Mose 38:​15-23; 2 Samuel 11:​1-5) Shi, Hiob fa ehe kɛjɛ jwɛŋmɔ ko ni aaana akɛ eba ejeŋ yɛ gbɛ fɔŋ nɔ lɛ he, akɛ: “Kpaŋmɔ mikɛ mihiŋmɛi kpaŋ, belɛ te aaafee tɛŋŋ ni makwɛ obalayei hu? . . . Kɛji mitsui emɔ yoo ko pɛŋ ni miyawo ka yɛ minaanyo shinaa shi lɛ . . . no lɛ hiɛgbeji asane ni, ni eji nɔsha ni sa akɛ kojolɔi awo he nyɔmɔ.”​—Hiob 31:​1, 9-11.

18. Mɛni hewɔ ewa waa akɛ aaahiɛ bɔlɛnamɔ he jeŋba kpakpa mli lɛ, ni kɛlɛ mɛni hewɔ wɔɔnyɛ wɔna miishɛɛ kɛ wɔmɔ enɛ mli lɛ?

¹⁸ Ekolɛ nɔ kroko bɛ ni Satan etsɔ nɔ eye omanye yɛ emuuyeli ni Nyɔŋmɔ tsuji hiɛɔ mli lɛ fitemɔ mli tamɔ lakamɔ ni elaka amɛ koni amɛbɔ ajwamaŋ lɛ. (4 Mose, yitso 25) Ani obaanyɛ okase Hiob emuuyeli lɛ, kɛtsɔ shi ni ooote owo lakamɔi fɛɛ ni baaha oye bɔlɛnamɔ he jeŋba gbonyo he fɔ lɛ nɔ? Yɛ anɔkwale mli lɛ eji kaa, titri lɛ, yɛ jeŋ ni eye bɔlɛnamɔ he sɛkɛ ni jeŋba shara egbɛ eshwa nɛɛ mli. Shi susumɔ bɔ ni eeenyɛ efee nɔ ni hi jogbaŋŋ akɛ aaatsɛo ni abio sane, ni onyɛ owie kɛ hekɛnɔfɔɔ taakɛ Hiob fee lɛ: “Nyɔŋmɔ . . . ena akɛ kpa ko bɛ mihe”!​—Hiob 31:⁠6.

Nɔ Ni Baanyɛ Aye Abua Wɔ

19. Mɛni he hiaa ni baanyɛ aye abua wɔ ni wɔhiɛ wɔ emuuyeli mli?

¹⁹ Hiob emuuyeli lɛ kasemɔ bɛ mlɛo, ejaakɛ Satan miibɔ mɔdɛŋ waa ŋmɛnɛ ni efite wɔ emuuyeli taakɛ eka akɛ eeefite Hiob nɔ lɛ. No hewɔ lɛ, ehe miihia ni wɔwo Nyɔŋmɔ tawuu nii lɛ fɛɛ. (Efesobii 6:​10-18) Enɛ biɔ ni wɔjwɛŋ Nyɔŋmɔ he yɛ be fɛɛ mli, taakɛ Hiob fee lɛ, ni wɔhiɛ ahi wɔhe nɔ akɛ wɔɔsa E-hiɛ yɛ be fɛɛ mli yɛ nɔ fɛɛ nɔ ni wɔ aloo wɔ wekui lɛ feɔ mli. (Hiob 1:⁠5) No hewɔ lɛ, Biblia lɛ kasemɔ, kpee ni wɔkɛ wɔnanemɛi heyelilɔi aaakpe daa, kɛ wɔhemɔkɛyeli lɛ jajemɔ yɛ maŋ he miihia.​—2 Timoteo 2:​15; Hebribii 10:​25; Romabii 10:⁠10.

20. (a) Mɛɛ hiɛnɔkamɔ baanyɛ awaje wɔ yɛ kaai amli? (b) Mɛɛ nyɔmɔwoo kɛha emuuyeli mli hiɛmɔ ni lalatsɛ Iɛ tsi tã wɔnine baanyɛ ashɛ nɔ?

²⁰ Shi nɔ ni baanyɛ awaje wɔ titri yɛ kaa be mli lɛ nɔŋŋ ji nɔ ni waje Hiob lɛ, ehekɛnɔfɔɔ akɛ jeee nɔ ni yɔɔ shihilɛ mli fɛɛ nɛ lɛ. Hiob bi akɛ: “Kɛji gbɔmɔ gbo lɛ, ani ehiɛ aaaka ekoŋŋ?” Ni yɛ hetoohamɔ mli lɛ, ekɛɛ: “Obaatsɛ, ni mi diɛŋtsɛ mahereo nɔ.” (Hiob 14:​13-15) Kɛ wɔna nakai hekɛnɔfɔɔ ni ma shi shiŋŋ lɛ akɛ Yehowa baatee etsuji anɔkwafoi lɛ ashi lɛ, enɛ hu baanyɛ aye abua wɔ ni wɔnyɛ wɔdamɔ kaa fɛɛ kaa ni Satan kɛaaba wɔ nɔ lɛ naa. (Hebribii 6:10) Jeeŋmɔ beebe ni Biblia mli lalatsɛ lɛ ŋma akɛ: “Shi mi lɛ, ohiɛ mimli yɛ mimuuyeli lɛ hewɔ, ni okɛ mi aaadamɔ ohiɛ kɛaatee naanɔ.” (Lala 41:​13, NW) Eba akɛ enɛ aaafee wɔteŋ mɔ fɛɛ mɔ wɔsɛɛ be ni yɔɔ miishɛɛ​—wɔha Yehowa ahiɛ wɔmli ni ebaa wɔyi kɛya naanɔ akɛni wɔji etsuji ni ehiɛ amɛ emuuyeli mli lɛ hewɔ!a