Beni Weku Lɛ Mli Nyo Ko He Miiye

 1, 2. Satan kɛ amanehulu kɛ hela tsu nii ni ekɛbɔ mɔdɛŋ ni eku Hiob emuuyeli mli yɛ mɛɛ gbɛ nɔ?

EKA shi faŋŋ akɛ Hiob fata mɛi ni ná weku shihilɛ ni yɔɔ miishɛɛ mli ŋɔɔmɔ lɛ ahe. Biblia lɛ tsɛɔ lɛ “gbɔmɔ agbo fe Bokagbɛ bii lɛ fɛɛ.” Efɔ bihii kpawo kɛ biyei etɛ, ni ji bii nyɔŋma. Eyɛ nii babaoo hu bɔ ni ebaanyɛ ekɛkwɛ eweku lɛ jogbaŋŋ. Ni nɔ ni he hiaa fe fɛɛ ji akɛ, enyiɛɔ hiɛ yɛ mumɔŋ nibii ahe nitsumɔ mli, ni esusuɔ ebii lɛ ashidaamɔ yɛ Yehowa hiɛ lɛ he waa. Nɔ ni enɛɛmɛi fɛɛ kɛba ji miishɛɛ weku ni bɛŋkɛ amɛhe kpaakpa.—Hiob 1:1-5.

² Satan, ni ji Yehowa Nyɔŋmɔ henyɛlɔ kpele fe fɛɛ lɛ, na shihilɛ ni Hiob yɔɔ mli nɛɛ. Satan, ní be fɛɛ be nɛɛ eetao gbɛ ni eeetsɔ nɔ eku Nyɔŋmɔ tsuji emuuyeli mlihiɛmɔ mli lɛ, tutua Hiob kɛtsɔ eweku ni yɔɔ miishɛɛ nɛɛ hiɛkpatamɔ nɔ. Kɛkɛ ni no sɛɛ lɛ, “eha asanei ni jaraa tsɛ̃rɛ̃ Hiob kɛjɛ enaneshi aahu kɛyashi eyiteŋ pampam.” Enɛ hewɔ lɛ, Satan hiɛ kã nɔ akɛ ekɛ amanehulu kɛ hela baatsu nii ni ekɛku Hiob emuuyeli mli.—Hiob 2:6, 7.

 3. Mɛni ji Hiob hela lɛ he okadii ni ana?

³ Biblia lɛ etsɔɔɔ tsofafeemɔ mli gbɛi ni akɛtsɛɔ hela ni mɔ Hiob lɛ. Shi kɛlɛ, ekɛɔ wɔ ehe okadii komɛi. Ehewolo wo gɔgɔmi, ni nu bɔi ehewolo nɔ jee ni ebɔi kpɔtɔmɔ. Hiob mumɔ je fu, ni ehe sha gbɛŋŋ. Enu piŋmɔ he jogbaŋŋ diɛŋtsɛ. (Hiob 7:5; 19:17; 30:17, 30) Hiob kɛ hejaramɔ taa lamulu mli ni ekɛ ŋɛsukó wamɔɔ ehe. (Hiob 2:8) Eshihilɛ fee mɔbɔ waa diɛŋtsɛ!

 4. Mɛɛ niiashikpamɔ weku fɛɛ weku naa yɛ be kɛ bei amli?

⁴ Eji bo hela ni mli wa waa tamɔ nɛkɛ mɔ kulɛ, te obaafee onii oha tɛŋŋ? Ŋmɛnɛ, Satan kɛ helai etswaaa Nyɔŋmɔ tsuji tamɔ bɔ ni efee Hiob lɛ. Shi kɛlɛ, yɛ emuu ni wɔyeee akɛ adesai, kɛ daa gbi shihilɛ mli nɔnyɛɛi, kɛ shihilɛ ni ebɔle wɔ kɛkpe ni yaa nɔ efiteɔ daa lɛ hewɔ lɛ, eji nɔ ko ni esa akɛ wɔkpa gbɛ akɛ yɛ be kɛ bei amli lɛ, helai baanyɛ amɔ weku lɛ mli bii. Yɛ nibii ni wɔfeɔ ni wɔkɛtsĩ helai anaa lɛ fɛɛ sɛɛ lɛ, helai mɔmɔɔ wɔteŋ mɔ fɛɛ mɔ, eyɛ mli akɛ wɔteŋ mɛi fioo pɛ ekolɛ wɔɔna amanehulu kɛyashɛ he ni Hiob nɔ lɛ yashɛ lɛ. Kɛ hela batutua wɔweku lɛ, ebaanyɛ efee kaa diɛŋtsɛ kɛha amɛ. No hewɔ lɛ nyɛhaa wɔkwɛa bɔ ni Biblia lɛ yeɔ ebuaa wɔ ni wɔkpee nɛkɛ adesai ahenyɛlɔ ni hiɔ shi be fɛɛ be nɛɛ naa.—Jajelɔ 9:11; 2 Timoteo 3:16.

 5. Bei pii lɛ, te weku mli bii feɔ amɛnii yɛ be kukuoo mli hela he amɛhaa tɛŋŋ?

⁵ Be fɛɛ be ni naagba ko aaafite daa gbi shihilɛ fioo lɛ, ehaa shihilɛ lɛ mli waa, ní nɔ̃ naagba ni ji lɛ kɔɔɔ he eko, ni enɛ feɔ anɔkwale, titri lɛ kɛji hela ko ni sɛɛ etsɛ waa ji nɔ ni kɛ enɛ ba. Be kukuoo mli hela po biɔ ni afee tsakemɔi, ni aŋmɛɛ nibii komɛi ahe, ni akɛ nibii komɛi hu ashã afɔle. Ekolɛ ehe baahia ni weku lɛ mli bii ni yɔɔ hewalɛ lɛ afee dioo koni eha helatsɛ lɛ anyɛ awɔ. Ekolɛ ehe baahia ni amɛfo nifeemɔi komɛi amli. Ni kɛlɛ, yɛ wekui pii amli lɛ, gbekɛbii po nuɔ musuŋtsɔlɛ he amɛhaa amɛnyɛmi loo fɔlɔ ni bɛ hewalɛ lɛ, eyɛ mli akɛ bei komɛi lɛ, ehe hiaa ni akai amɛ ni amɛsusu mɔ lɛ he. (Kolosebii 3:12) Yɛ be kukuoo mli hela gbɛfaŋ lɛ, bei pii lɛ, weku lɛ feɔ klalo akɛ amɛaafee nɔ ni he hiaa. Kɛfata he lɛ, weku lɛ mli bii lɛ ateŋ mɔ fɛɛ mɔ baakpa gbɛ akɛ abaajie mɔ hesusumɔ ni tamɔ nakai kpo atsɔɔ lɛ, kɛji eba lɛ akɛ hela emɔ lɛ.—Mateo 7:12.

 6. Mɛɛ nifeemɔi bei komɛi lɛ anaa kɛji hela ni mli wa, ni sɛɛ tsɛɔ mɔ weku lɛ mli nyo ko?

⁶ Shi, kɛji hela lɛ mli wa waa, ni naagbai ni ekɛba lɛ mli wa ni esɛɛ etsɛ babaoo hu? Akɛ nɔkwɛmɔ nɔ lɛ, kɛji weku lɛ mli nyo ko gbɔmɔtso fã egbo yɛ kuumɔ hela hewɔ, aloo hela ni fiteɔ mɔ jwɛŋmɔ kɛ henumɔi, loo hela kroko ni fiteɔ mɔ tamɔ nakai emɔ lɛ hu? Aloo kɛji jwɛŋmɔŋ hela ko, tamɔ sɛkɛ loo jwɛŋmɔ ni bɔiɔ fitemɔ, mɔ weku lɛ mli nyo ko hu? Nɔ ni afɔɔ feemɔ klɛŋklɛŋ ji musuŋshãa kɛha mɔ lɛ—dɔlɛ akɛ suɔlɔ ko miina amanehulu babaoo nakai. Shi kɛlɛ, nifeemɔi krokomɛi nyiɛɔ musuŋshãa lɛ sɛɛ. Beni weku lɛ mli bii naa akɛ hela ni emɔ mɔ kome lɛ miisa amɛhe waa, ni eeba heyeli ni amɛyɔɔ lɛ shi lɛ, ekolɛ amɛbasumɔŋ lɛ nakai. Ekolɛ amɛbaasusu akɛ: “Mɛni hewɔ esa akɛ nɔ ko ni tamɔ nɛkɛ aba minɔ?”

 7. Te Hiob ŋa fee enii yɛ ehela lɛ he eha tɛŋŋ, ni eka shi faŋŋ akɛ ehiɛ kpa mɛni nɔ?

⁷ Etamɔ nɔ ni nɔ ko tamɔ nɛkɛ ba Hiob ŋa lɛ jwɛŋmɔ mli. Kaimɔ akɛ, no mli lɛ ena ebii lɛ fɛɛ ahiɛkpatamɔ momo. Beni nakai amanehului lɛ tsaraa nɔ kɛbaa lɛ, ŋwanejee ko bɛ he akɛ eha etee nɔ ehao waa yɛ ejwɛŋmɔŋ. Yɛ naagbee lɛ, beni ena lɛ diɛŋtsɛ ewu ni be ko lɛ eyɔɔ hewalɛ waa kɛ ekaa lɛ ní hela ni yɔɔ nyaŋemɔ, ni waa mɔ he hu lɛ emɔ lɛ lɛ, efee tamɔ nɔ ni ehiɛ ekpa sane titri ni fe fɛɛ ni etsimɔ nɛkɛ amanehului nɛɛ anɔ—ni ji wekukpaa ni kã ekɛ ewu fɛɛ kɛ Nyɔŋmɔ teŋ lɛ nɔ kwraa. Biblia lɛ kɛɔ akɛ: “Kɛkɛ ni [Hiob] ŋa kɛɛ lɛ akɛ: ‘Ohiɛ onɔkwayeli lɛ mli kpɛŋŋ lolo lo? Kwa Nyɔŋmɔ ni ogbo!’ ”—Hiob 2:9.

 8. Kɛ weku lɛ mli nyo ko he miiye waa lɛ, mɛɛ ŋmalɛ baaye abua weku lɛ mli bii krokomɛi ni amɛhiɛ jwɛŋmɔ kpakpa?

⁸ Mɛi pii nuɔ nijiaŋwujee, kɛ mlifu po he, kɛji mɔ kroko hela ha amɛshihilɛ tsake kwraa. Shi kɛlɛ, esa akɛ Kristofonyo ni susuɔ shihilɛ ni eba lɛ he lɛ ayoo yɛ naagbee akɛ enɛ haa enaa hegbɛ ni ekɛaatsɔɔ bɔ ni suɔmɔ ni eyɔɔ lɛ ji anɔkwa suɔmɔ ha. Anɔkwa suɔmɔ “toɔ etsui shi, emli hi; . . . [ni] epeleee lɛ diɛŋtsɛ enɔ . . . Emiɔ ŋɔɔ yɛ nii fɛɛ mli, eheɔ nii fɛɛ eyeɔ, ehiɛ kãa nii fɛɛ nɔ, etoɔ etsui shi yɛ nii fɛɛ mli.” (1 Korintobii 13:4-7) No hewɔ lɛ, yɛ nɔ najiaŋ ni wɔɔŋmɛ gbɛ ni henumɔi fɔji aye wɔnɔ lɛ, ehe miihia waa akɛ wɔfee bɔ fɛɛ bɔ ni wɔɔnyɛ ni wɔkɛye nɔ.—Abɛi 3:21.

 9. Mɛɛ nɔmimaa wiemɔi baanyɛ aye abua weku lɛ yɛ mumɔŋ kɛ henumɔŋ kɛji weku lɛ mli nyo ko he miiye waa?

⁹ Mɛni abaanyɛ afee ni akɛbu weku lɛ mumɔŋ kɛ henumɔŋ hilɛ-kɛhamɔ he kɛji weku lɛ mli bii ateŋ mɔ kome he miiye waa? Yɛ anɔkwale mli lɛ, hela fɛɛ hela yɛ kwɛmɔ kɛ tsofafeemɔ ni he hiaa ni akɛtsuɔ he nii, ni efeŋ nɔ ni sa yɛ wolo nɛɛ mli akɛ wɔɔtsɔɔ tsofafeemɔ gbɛi loo helatsɛ ni akwɛɔ lɛ yɛ eshia lɛ he nifeemɔi pɔtɛɛ komɛi ni sa akɛ akɛtsu nii. Shi kɛlɛ, yɛ mumɔŋ shishinumɔ naa lɛ, Yehowa “holeɔ mɛi fɛɛ ni edɔrɔ kɔmɔɔ lɛ anɔ.” (Lala 145:14) Maŋtsɛ David ŋma akɛ: “Ajɔɔ mɔ ni jwɛŋɔ ohiafo nɔ! Gbi fɔŋ nɔ lɛ Yehowa aaajie lɛ. Yehowa aaabaa eyi ni eeeha eyi ana wala, . . . Yehowa aaatsɔmɔ lɛ yɛ hela saa nɔ.” (Lala 41:2-4) Yehowa baa etsuji ayi yɛ mumɔŋ shishinumɔ naa, yɛ be mli ni ekolɛ akaa amɛ yɛ henumɔ gbɛfaŋ fe bɔ ni amɛhewalɛ baanyɛ lɛ. (2 Korintobii 4:7) Weku mli bii pii ni kɛ helai ni mli wa waa miikpe yɛ amɛshiabii ateŋ lɛ etĩ lalatsɛ lɛ wiemɔi nɛɛ amli, akɛ: “Mina nɔ babaoo; Yehowa, ha miyi ana wala yɛ owiemɔ lɛ naa.”—Lala 119:107.

10, 11. (a) Kɛji weku baanyɛ akpee hela naa kɛ omanyeyeli lɛ, mɛni he hiaa? (b) Yoo ko nyɛ ekpee hela ni mɔ ewu lɛ naa yɛ mɛɛ gbɛ nɔ?

¹⁰ “Gbɔmɔ mli ekãa tereɔ ehela haa lɛ,” taakɛ Biblia mli abɛbua ko kɛɔ lɛ, “shi ŋkɔmɔyeli mumɔ lɛ, namɔ aaanyɛ mli ahiɛ?” (Abɛi 18:14) Henumɔŋ nɔnyɛɛ baanyɛ agba weku lɛ mumɔ kɛ “gbɔmɔ mli ekãa” fɛɛ naa waa. Ni kɛlɛ, “tsui ni mli jɔ lɛ, gbɔmɔtso lɛ yiwala ni.” (Abɛi 14:30) Kɛji weku ko baanyɛ akpee hela ni mli wa waa naa kɛ omanyeyeli jio, enyɛŋ naa ekpee jio, yɛ bei babaoo mli lɛ, enɛ damɔ su, loo mumɔ ni emli bii hiɛ lɛ nɔ.—Okɛto Abɛi 17:22 he.

¹¹ Ehe bahia ni Kristofonyo yoo ko aŋmɛ etsui shi kɛkwɛ ewu ni hela ni gbeɔ gbɔmɔtso lɛ fã lɛ eko fee lɛ lɛ aahu, beni amɛbote gbalashihilɛ mli lɛ sɛɛ afii ekpaa pɛ. “Hela lɛ basa miwu wiemɔ he kwraa ni ehiii, ni ebashɛ he ni agbɛnɛ ehiii lɛ kɛ sanegbaa jogbaŋŋ dɔŋŋ,” taakɛ ekaiɔ lɛ. “Jwɛŋmɔŋ haomɔ ni mináa kɛji miibɔ mɔdɛŋ ni manu nɔ ni epeleɔ ehe ni ekɛɛ lɛ shishi lɛ, da waa.” Agbɛnɛ hu, feemɔ hejaramɔ kɛ nijiaŋwujee ni wu lɛ diɛŋtsɛ hu nuɔ he lɛ he mfoniri okwɛ. Mɛni hefatalɔi nɛɛ fee? Eyɛ mli akɛ he ni amɛyɔɔ lɛ kɛ Kristofoi asafo lɛ teŋ jɛkɛ waa moŋ, shi nyɛmi yoo lɛ fee bɔ fɛɛ bɔ ni eeenyɛ koni eya nɔ ehe awa yɛ mumɔŋ, kɛtsɔ asafo gbɛjianɔtoo he saji heei fɛɛ ni etee nɔ ekɛnyiɛ pɛpɛɛpɛ, kɛ mumɔŋ niyenii ni akɛhaa be fɛɛ be yɛ Buu-Mɔɔ kɛ Awake! woji tɛtrɛbii lɛ amli lɛ kɛ nitsumɔ nɔ. Enɛ ha nyɛmi yoo lɛ na mumɔŋ hewalɛ ni ekɛkwɛ ewu ni esumɔɔ lɛ lɛ aahu kɛyashi be mli ni egbo, yɛ afii ejwɛ sɛɛ.

12. Taakɛ wɔnaa yɛ Hiob sane lɛ mli lɛ, mɛɛ yelikɛbuamɔ bei komɛi lɛ helatsɛ lɛ kɛhaa?

¹² Yɛ Hiob sane lɛ mli lɛ, lɛ mɔ ni enaa amanehulu lɛ ji mɔ ni ehe wa kɛtee nɔ aahu. Ebi eŋa akɛ: “Ei, nɔ kpakpa lɛ wɔhe yɛ Nyɔŋmɔ dɛŋ, shi nɔ fɔŋ lɛ, no lɛ wɔkahe lo?” (Hiob 2:10) Ebɛ naakpɛɛ akɛ sɛɛ mli lɛ kaselɔ Yakobo tsĩ Hiob tã akɛ tsuishitoo kɛ henɔyeli he nɔkwɛmɔ nɔ ni sa kadimɔ waa! Wɔkaneɔ yɛ Yakobo 5:11 akɛ: “Nyɛnu Hiob tsuishiŋmɛɛ lɛ he, ni nyɛna Nuntsɔ [Yehowa, NW] naagbee lɛ, akɛ Nuntsɔ [Yehowa, NW] mli tsɔɔ lɛ babaoo, ni emli jɔ hu.” Nakai nɔŋŋ ŋmɛnɛ, yɛ shihilɛi babaoo mli lɛ, ekaafeemɔ su ni weku lɛ mli nyo ni he yeɔ lɛ jieɔ lɛ kpo lɛ eye ebua mɛi krokomɛi yɛ weku lɛ mli, ni amɛnyɛ amɛhiɛ jwɛŋmɔ kpakpa mli.

13. Mɛɛ shihilɛ esaaa ni weku ni hela ni mli wa emɔ emli nyo ko lɛ kɛtoɔ amɛhe?

¹³ Mɛi ni ehe bahia ni amɛtsu weku lɛ mli hela he nii lɛ ateŋ mɛi pii kpɛlɛɔ nɔ akɛ kɛjɛ shishijee lɛ, efɔɔ kaa akɛ weku lɛ mli bii kɛ jaramɔ shihilɛ ni mli wa kpeɔ yɛ shihilɛ diɛŋtsɛ ni ebakã shi lɛ gbɛfaŋ. Amɛmaa nɔ mi hu akɛ bɔ ni mɔ ko kwɛɔ shihilɛ lɛ ehaa lɛ hu he miihia waa diɛŋtsɛ. Ekolɛ tsakemɔi afeemɔ kɛ nibii ajajemɔ yɛ weku lɛ daa gbi shihilɛ mli baawa fioo yɛ shishijee mli. Shi kɛji mɔ lɛ bɔ efeemɔ he mɔdɛŋ lɛlɛŋ lɛ, ebaanyɛ etsake ehe ewo shihilɛ hee ni eba lɛ mli. Yɛ nakai feemɔ mli lɛ, ehe miihia ni wɔkɛ wɔ shihilɛ akato mɛi krokomɛi ni mɔ ko he yeee yɛ amɛweku mli lɛ anɔ̃ he, ni no ha wɔsusu akɛ amɛna shihilɛ ni yɔɔ ogbɔjɔ, ni no hewɔ lɛ ‘wɔ lɛ wɔnaaa shihilɛ kpakpa!’ Yɛ anɔkwale mli lɛ, wɔteŋ mɔ ko bɛ ni le nɔ̃ jatsui ni mɛi krokomɛi tere. Kristofoi fɛɛ naa miishɛjemɔ kɛjɛɔ Yesu wiemɔi nɛɛ amli, akɛ: “Nyɛbaa miŋɔɔ, nyɛ mɛi fɛɛ ni etɔ nyɛ ni nyɛjatsui fe nyɛ lɛ, ni maha nyɛ hejɔɔmɔ.”—Mateo 11:28.

14. Abaanyɛ ato nibii ni he hiaa titri lɛ ahe gbɛjianɔ yɛ mɛɛ gbɛ nɔ?

¹⁴ Kɛ mɔ ko he miiye waa lɛ, ehe baaba sɛɛnamɔ jogbaŋŋ kɛji weku lɛ kai nɛkɛ wiemɔi ni jɛ mumɔŋ nɛɛ, akɛ: “Kɛ ŋaawolɔi pii yɛ lɛ, amɛdamɔɔ shi shiŋŋ.” (Abɛi 15:22) Ani weku lɛ mli bii baanyɛ afee ekome kɛsusu shihilɛ ni hela lɛ kɛba lɛ he? Eka shi faŋŋ akɛ ebaafee nɔ ni ja jogbaŋŋ akɛ aaatsɔ sɔlemɔ nɔ afee enɛ, ni aya Nyɔŋmɔ Wiemɔ lɛ mli kɛha gbɛtsɔɔmɔ. (Lala 25:4) Mɛni esa akɛ asusu he yɛ sanegbaa ni tamɔ nɛkɛ mli? Ojogbaŋŋ, tsofafeemɔ, shika, kɛ weku yiŋkpɛi yɛ ni esa akɛ afee. Namɔ ji mɔ titri ni baakwɛ lɛ? Weku lɛ baanyɛ afee ekome ni amɛkɛfi nakai kwɛmɔ lɛ sɛɛ yɛ mɛɛ gbɛ nɔ? Te gbɛjianɔ ni ato lɛ baasa weku lɛ mli bii ateŋ mɔ fɛɛ mɔ he eha tɛŋŋ? Te aaafee tɛŋŋ atsu mɔ titri ni kwɛɔ lɛ lɛ mumɔŋ kɛ hiamɔ nii krokomɛi ahe nii?

15. Mɛɛ sɛɛfimɔ Yehowa kɛhaa wekui ni kɛ hela ni mli wa waa miikpe lɛ?

¹⁵ Mɔdɛŋbɔɔ ni akɛaasɔle abi Yehowa gbɛtsɔɔmɔ, kɛ e-Wiemɔ lɛ nɔ jwɛŋmɔ, kɛ ekaa ni akɛaanyiɛ gbɛ ni Biblia lɛ etsɔɔ lɛ nɔ lɛ kɛ jɔɔmɔi babaoo ni wɔkpaaa gbɛ baa yɛ be babaoo mli. Jeee be fɛɛ be ekolɛ hela ni emɔ weku lɛ mli nyo ko lɛ baa shi saŋŋ bɔ ni sa. Shi Yehowa ni akɛ he aaafɔ̃ enɔ lɛ kɛ nɔ kpakpa fe fɛɛ baa yɛ shihilɛ fɛɛ shihilɛ mli, be fɛɛ be. (Lala 55:23) Lalatsɛ lɛ ŋma akɛ: “Yehowa, omɔbɔnalɛ lɛ hiɛ mimli. Kɛ ŋkɔmɔyeli fa babaoo yɛ mimli lɛ, omiishɛjemɔi lɛ haa misusuma mii shɛɔ ehe.”—Lala 94:18, 19; kwɛmɔ Lala 63:7-9 hu.

16, 17. Mɛɛ otii abaanyɛ aha eje kpo beni akɛ gbekɛbii bibii wieɔ hela ni emɔ amɛ nyɛmi ko he lɛ?

¹⁶ Hela ni mli wa waa baanyɛ ekɛ naagbai abaha gbekɛbii ni yɔɔ weku lɛ mli lɛ. Ehe miihia ni fɔlɔi lɛ aye abua gbekɛbii lɛ ni amɛnu hiamɔ ni eba, kɛ nɔ ni ekolɛ amɛbaanyɛ amɛfee ni amɛkɛye amɛbua lɛ shishi. Kɛ gbekɛ ji mɔ ni hela emɔ lɛ lɛ, esa akɛ aye abua enyɛmimɛi lɛ ni amɛnu shishi akɛ kwɛmɔ kɛ hesusumɔ babaoo ni mɔ ni he yeɔ lɛ náa lɛ etsɔɔɔ akɛ asumɔɔɔ bii krokomɛi ni eshwɛ lɛ asane jogbaŋŋ dɔŋŋ. Yɛ nɔ najiaŋ ni aaaŋmɛ gbɛ ni mlifu loo awuŋayeli ate shi lɛ, fɔlɔi lɛ baanyɛ aye abua bii krokomɛi lɛ ni amɛná amɛteŋ wekukpaa ni bɛŋkɛ kpaakpa, kɛ anɔkwa suɔmɔ hu, beni amɛfeɔ ekome kɛtsuɔ shihilɛ ni hela lɛ kɛba lɛ he nii lɛ.

¹⁷ Bei pii lɛ, gbekɛbii bibii baatsu amɛ henumɔi ni fɔlɔi aaakanya lɛ he nii oya moŋ fe tsofafeemɔ mli shihilɛi ahe wiemɔ ni sɛɛ kɛ loo ni eshishinumɔ wa. No hewɔ lɛ, abaanyɛ aha amɛle nɔ̃ shihilɛ ni weku lɛ mli nyo ni he yeɔ lɛ yɔɔ mli lɛ he saji fioo ko. Kɛ bii ni yɔɔ hewalɛ lɛ na bɔ ni hela lɛ tsĩɔ mɔ ni bɛ hewalɛ lɛ naa, yɛ nibii babaoo ni amɛ diɛŋtsɛ amɛbuuu akɛ ehe hiaa waa lɛ afeemɔ mli lɛ, no lɛ ekolɛ eeeha amɛna ‘nyɛmimɛi ahedɔɔ’ babaoo, ni ‘amɛmli ajɔ aha amɛhe.’—1 Petro 3:8.

18. Abaanyɛ aye abua gbekɛbii ni edara saŋŋ lɛ ni amɛnu naagbai ni hela lɛ kɛba lɛ shishi yɛ mɛɛ gbɛ nɔ, ni mɛɛ gbɛ nɔ enɛ he aaaba sɛɛnamɔ kɛha amɛ yɛ?

¹⁸ Esa akɛ aye abua gbekɛbii ni edara saŋŋ lɛ ni amɛna akɛ jaramɔ shihilɛ ko yɛ, ni ebiɔ afɔleshaa yɛ weku lɛ mli bii ateŋ mɔ fɛɛ mɔ gbɛfaŋ. Akɛni helatsamɔ hé yaa kɛ tsofai ahemɔ he nyɔmɔ yɛ ni abaawo hewɔ lɛ, ekolɛ fɔlɔi lɛ nyɛŋ aha gbekɛbii krokomɛi lɛ nibii bɔ ni kulɛ amɛbaasumɔ ni amɛha amɛ. Ani gbekɛbii lɛ amli baafu yɛ enɛ he, ni amɛnu he akɛ aje gbɛ ahaaa amɛ nibii ni amɛtaoɔ? Aloo ani amɛbaanu shihilɛ ni yɔɔ lɛ shishi, ni amɛjɛ amɛsuɔmɔ mli amɛshã afɔlei ni he hiaa lɛ? Fɛɛ damɔ bɔ ni asusuɔ sane lɛ he ahaa kɛ mumɔ ni awoɔ he hewalɛ yɛ weku lɛ mli lɛ nɔ. Lɛlɛŋ, yɛ wekui pii agbɛfaŋ lɛ, hela ni emɔ weku lɛ mli nyo ko lɛ eye ebua gbekɛbii atsɔsemɔ, koni amɛnyiɛ Paulo ŋaawoo nɛɛ sɛɛ, akɛ: “Nyɛkaŋmɛa mligbalamɔi loo yaka anunyam taomɔ gbɛ, shi moŋ nyɛkɛ heshibaa jwɛŋmɔ abubua nyɛnanemɛi fe nyɛ diɛŋtsɛ nyɛhe; nyɛteŋ mɔ fɛɛ mɔ akafó enɔ mli, shi efó enaanyo nɔ mli.”—Filipibii 2:3, 4.

19, 20. (a) Mɛɛ gbɛnaa nii kãa weku yitsei anɔ kɛji weku lɛ mli nyo ko he miiye? (b) Eyɛ mli akɛ ejeee tsofafeemɔ he nikasemɔ wolo moŋ, shi Biblia lɛ kɛ gbɛtsɔɔmɔ haa yɛ helai ahe nitsumɔ gbɛfaŋ yɛ mɛɛ gbɛ nɔ?

¹⁹ Kristofoi ni ŋmɛɔ pɛpɛɛpɛ eteee shi wooo tsofafeemɔ, bei abɔ ni ekuuu Nyɔŋmɔ mla mli lɛ. Kɛ hela mɔ amɛweku lɛ mli nyo ko lɛ, amɛbɔɔ mɔdɛŋ waa akɛ amɛaatao yelikɛbuamɔ, koni amɛkɛjie mɔ ni he yeɔ lɛ piŋmɔ lɛ kɛjɛ enɔ. Shi kɛlɛ, ekolɛ tsofafeemɔ mli susumɔi komɛi yɛ ni kɛ amɛhe kpaaa gbee, ni esa akɛ ajwɛŋ he jogbaŋŋ. Kɛfata he lɛ, helai kɛ naagbai heei komɛi etetee shi yɛ nyɛsɛɛ afii fioo nɛɛ amli, ni yɛ amɛmli babaoo gbɛfaŋ lɛ, abɛ gbɛ pɔtɛɛ ko ni atsɔɔ nɔ atsaa helai nɛɛ, ni akpɛlɛɔ nɔ yɛ he fɛɛ he. Bei komɛi po lɛ, anyɛɛɛ ana nɔ̃ hela ni eji jogbaŋŋ kɛmɔ shi. Belɛ, mɛni esa akɛ Kristofonyo afee?

²⁰ Eyɛ mli akɛ Biblia ŋmalɔi lɛ ateŋ mɔ kome lɛ, tsofafeelɔ ni, ni bɔfo Paulo hu kɛ tsofafeemɔ mli ŋaawoo ni yeɔ buaa ha enaanyo Timoteo moŋ, shi Ŋmalɛi lɛ ji jeŋba kɛ mumɔŋ gbɛtsɔɔmɔ nɔ, shi jeee tsofafeemɔ he nikasemɔ wolo. (Kolosebii 4:14; 1 Timoteo 5:23) Enɛ hewɔ lɛ, yɛ tsofafeemɔ mli saji agbɛfaŋ lɛ, esa akɛ Kristofoi aweku yitsei diɛŋtsɛ akpɛ amɛyiŋ yɛ gbɛ ni ŋmɛɔ pɛpɛɛpɛ nɔ. Ekolɛ amɛbaanu he akɛ ehe miihia ni amɛna tsofafeelɔi ni fe mɔ kome pɛ jwɛŋmɔ yɛ sane lɛ he. (Okɛto Abɛi 18:17 he.) Eka shi faŋŋ akɛ amɛbaasumɔ ni amɛná yelikɛbuamɔ ni hi fe fɛɛ ni yɔɔ amɛha amɛweku lɛ mli nyo ni he yeɔ lɛ, ni mɛi pii taoɔ enɛ kɛjɛɔ datrɛfoi ni ale amɛ lɛ aŋɔɔ. Mɛi krokomɛi hu sumɔɔ tsofafeemɔ gbɛi krokomɛi ni yɔɔ lɛ moŋ waa. Enɛ hu, mɔ diɛŋtsɛ kpɛɔ eyiŋ yɛ he. Shi kɛlɛ, kɛ aatsu hewalɛnamɔ mli naagbai ahe nii lɛ, Kristofoi yaa nɔ amɛhaa ‘Nyɔŋmɔ wiemɔ lɛ feɔ kane kɛhaa amɛnane, kɛ la hu yɛ amɛ tempɔŋ nɔ.’ (Lala 119:105) Amɛyaa nɔ amɛnyiɛɔ gbɛtsɔɔmɔi ni akɛha yɛ Biblia lɛ mli lɛ asɛɛ. (Yesaia 55:8, 9) Enɛ hewɔ lɛ, amɛkpooɔ hela-taomɔ he ŋaa gbɛi ni mumɔi atsɛmɔ nifeemɔi yɔɔ mli, ni amɛtsiɔ amɛhe kɛjɛɔ helatsamɔi ni kuɔ Biblia shishitoo mlai amli lɛ ahe.—Lala 36:10; Bɔfoi lɛ Asaji 15:28, 29; Kpojiemɔ 21:8.

21, 22. Te Asia yoo ko susu Biblia shishitoo mla ko he eha tɛŋŋ, ni eyiŋ ni ekpɛ lɛ bafee nɔ ni ja jogbaŋŋ yɛ eshihilɛ lɛ mli yɛ mɛɛ gbɛ nɔ?

²¹ Susumɔ Asia obalayoo ko shihilɛ nɛɛ he okwɛ. Beni ebɔi Biblia lɛ kasemɔ, kɛtsɔ Yehowa Odasefoi kɛ nikasemɔ nɔ lɛ sɛɛ be fioo mli lɛ, efɔ biyoo ni tsiimɔ ji ŋsɛnii tɛi etɛ kɛ mlijaa ejwɛ mli ekome pɛ, beni eshɛko abifao lɛ fɔmɔ be kwraa. Beni datrɛfonyo lɛ kɛɛ yoo lɛ akɛ abifao ni efɔ nɛɛ jwɛŋmɔ naa baaba shi kwraa ni enyɛŋ enyiɛ kɔkɔɔkɔ lɛ, eha yoo lɛ tsui kumɔ kwraa. Ewo yoo lɛ ŋaa akɛ eyashi abifao lɛ yɛ he ni akwɛɔ nakai gbekɛbii yɛ lɛ kwraa. Ewu yiŋ fee lɛ kɔshikɔshi yɛ sane lɛ he. Namɔ ŋɔɔ esa akɛ etsɔ ehe kɛya?

²² Ewie akɛ: “Mikaiɔ akɛ mikase kɛjɛ Biblia lɛ mli akɛ ‘Yehowa gboshinii ni ehaa ji bii, ni nikeenii ji musuŋbii.’ ” (Lala 127:3) Ekpɛ eyiŋ akɛ ekɛ “gboshinii” nɛɛ baaya shia ni eyakwɛ lɛ. Nibii amli wa waa kɛjɛ shishijee, shi kɛtsɔ enanemɛi Kristofoi ni yɔɔ Yehowa Odasefoi asafo ni yɔɔ jɛmɛ lɛ mli lɛ ayelikɛbuamɔ nɔ lɛ, yoo lɛ nyɛ ebɔ he mɔdɛŋ, ni ekɛ kwɛmɔ krɛdɛɛ ni he hiaa gbekɛ lɛ ha lɛ. Afii nyɔŋma-kɛ-enyɔ sɛɛ lɛ, gbekɛ lɛ yaa kpeei yɛ Maŋtsɛyeli Asa lɛ nɔ, ni enaa gbekɛbii krokomɛi ni yɔɔ jɛmɛ lɛ kɛ naanyobɔɔ mli ŋɔɔmɔ. Emami wie akɛ: “Miida shi waa akɛ Biblia shishitoo mlai tsirɛ mi ni mifee nɔ ni ja. Biblia lɛ ye ebua mi ni mihiɛ henilee ni mli tse mli yɛ Yehowa Nyɔŋmɔ hiɛ, koni mikashwa mihe bɔ ni kulɛ mafee yɛ miwala bei abɔ fɛɛ mli lɛ.”

23. Mɛɛ miishɛjemɔ Biblia lɛ kɛhaa mɛi ni he yeɔ kɛ mɛi ni kwɛɔ amɛ lɛ fɛɛ?

²³ Hela kɛ wɔ ehiŋ shi aahu kɛyaŋ naanɔ. Gbalɔ Yesaia gbala jwɛŋmɔ kɛtee wɔsɛɛ be ko nɔ, beni “maŋbii lɛ ateŋ mɔ ko ekɛɛŋ akɛ: ‘Migbɔjɔ!’ ” (Yesaia 33:24) Nakai shiwoo lɛ baaba mli yɛ jeŋ hee ni bɛŋkɛɔ oyayaayai lɛ mli. Shi, kɛyashi nakai be lɛ baashɛ lɛ, wɔbaaya nɔ wɔkɛ hela kɛ gbele ahi shi lolo. Miishɛɛ sane ji akɛ, Nyɔŋmɔ Wiemɔ lɛ haa wɔ gbɛtsɔɔmɔ kɛ yelikɛbuamɔ. Jeŋba he shishitoo mlai ni Biblia lɛ kɛhaa lɛ hiɔ shi daa, ni amɛnɔ kwɔlɔ kwraa fe adesai ni yeee emuu asusumɔi ni tsakeɔ be fɛɛ be lɛ. Enɛ hewɔ lɛ, mɔ ni ji nilelɔ lɛ kɛ lalatsɛ ni ŋma nɛkɛ lɛ kpaa gbee, akɛ: “Yehowa mla lɛ hi kɛwula shi, ehaa susuma tsui nyɔɔ emli; Yehowa odase lɛ ma shi shiŋŋ, ehaa kwashia leɔ nii. . . . Yehowa kojomɔi lɛ anɔkwale ni, ni fɛɛ ja kwraa. . . . Amɛ nɔyeli lɛ, nyɔmɔwoo kpele yɛ mli.”—Lala 19:8, 10, 12.