Wala Sɛɛkɛlɛ ni Wɔtiuɔ Sɛɛ

“Gbɔmɔ ni yoo fɔ́ lɛ yɔɔ nɛɛ, kukuoo kɛkɛ ji egbii lɛ, ni emli eyi tɔ kɛ haomɔ sɔŋŋ; ekwɛ̃ɔ tamɔ fɔfɔi, ni eŋalaa; asaŋ ejoɔ foi tamɔ hɔɔŋ, ni etsɛɛɛ.” ​—Hiob 14:​1, 2.

EYƐ mli akɛ aŋma aaafee afii 3,500 ni eho nɛ moŋ, shi mɛi fioo ji mɛi ni baate shi awo susumɔ ni ahiɛ yɛ wala sɛɛkɛlɛ kukuoo nɛɛ he ŋmɛnɛ. Gbɔmɛi atsuii enyɔɔɔ amɛmli akɛ amɛaasa wala naa be kukuoo ko ni no sɛɛ lɛ, amɛgbɔlɔ ni amɛgboi. No hewɔ lɛ, gbɛ̀i ni atsɔɔ nɔ akɛhaa wala sɛɛ kɛɔ lɛ efa babaoo yɛ yinɔsane mli.

Yɛ Hiob gbii lɛ amli lɛ, Mizraimbii lɛ yeɔ koolooi agbɛɛiaŋ wui yakatswaa kɛbɔɔ mɔdɛŋ ni amɛtsɔmɔ oblahii kɛ oblayei ekoŋŋ.[1] Teŋgbɛ afii lɛ amli tsofa-futumɔ yiŋtoo titrii lɛ ateŋ ekome ji ní akɛfee tsamɔ tsofa ni baanyɛ aha mɔ ko wala sɛɛ akɛ.[2] Mɛi babaoo ni futuɔ tsofai lɛ heɔ yeɔ akɛ, shika tsuru ni gbɔmɔ fee lɛ baanyɛ ekɛ shihilɛ ni gbele bɛ mli aba, ni akɛ, nii ni aaaye yɛ plɛte ni akɛ shika tsuru fee mli lɛ baaha wala sɛɛ akɛ.[3] Blema China Taobii susuɔ akɛ amɛbaanyɛ amɛtsake gbɔmɔtso lɛ mli gbɛjianɔtoo lɛ kɛtsɔ ŋaa gbɛ̀i tamɔ nii anɔ jwɛŋmɔ, bɔ ni amuɔ ahaa lɛ kasemɔ, kɛ niyeli nɔ koni amɛnine ashɛ shihilɛ ni gbele bɛ mli nɔ.[4]

Ale Spainnyo Juan Ponce de León, ni ji shikpɔji ahe nibii ashikpálɔ lɛ waa yɛ he hiamɔ ni ekɛtaoɔ oblahiiaŋ kɛ oblayeiaŋ hewalɛ nuhiŋmɛi lɛ.[5] Afii ohai 18 lɛ mli datrɛfonyo ko jie yi yɛ ewolo ni ji Hermippus Redivivus lɛ mli akɛ, abua oblayei foji anaa awo tsũ bibioo ko mli yɛ hulutsoo bei amli ni abua kɔɔyɔɔ ni amɛmuɔ kɛjeɔ kpo lɛ naa awo tɔi amli ni akɛtsu nii akɛ wala nɔtsamɔ tsofa.[6] Shi, gbɛ̀i nɛɛ ateŋ eko kwraa yeee omanye.

Ŋmɛnɛ, aaafee afii 3,500 yɛ be mli ni Mose ŋma Hiob wiemɔ lɛ sɛɛ nɛɛ, gbɔmɔ eyanyiɛ nyɔɔŋtsere lɛ nɔ, efee tsɔnei kɛ kɔmpiutai, ni epɛi atɔm kɛ wala yibii lɛ amli ekwɛ. Ni kɛlɛ, yɛ hiɛyaa kpele ni eba yɛ tsɔnei ahe nitsumɔ mli nɛɛ fɛɛ sɛɛ lɛ, ‘kukuoo kɛkɛ ji wɔgbii lɛ, ni emli eyi tɔ kɛ haomɔ sɔŋŋ.’ Eji anɔkwale akɛ, yɛ maji ni etee hiɛ lɛ amli lɛ, wala sɛɛkɛlɛ gbɛkpamɔ lɛ etee hiɛ waa yɛ naakpɛɛ gbɛ nɔ yɛ nyɛsɛɛ afii oha lɛ mli. Shi nɔ ni kɛ enɛ eba titri ji gbɔmɔtsoŋ hewalɛnamɔ kpakpa, gbɛ ni atsɔɔ nɔ ahiɛɔ hetsemɔ mli lɛ ni etee hiɛ, kɛ niyenii kpakpa. Ákɛ nɔkwɛmɔnɔ lɛ, kɛjɛ afii ohai 18 lɛ teŋgbɛ kɛyashi afi 1990 afii lɛ shishijee mli lɛ, kɛ aja mli lɛ, yɛ Sweden lɛ wala sɛɛkɛlɛ etee ŋwɛi kɛjɛ afii 40 kɛyashi afii 75 kɛha hii kɛ afii 44 kɛyashi afii 80 kɛha yei.[7] Shi ani enɛ tsɔɔ akɛ atsu adesai ashwelɛ akɛ amɛná wala ni sɛɛ kɛ lɛ he nii?

Dabi, ejaakɛ eyɛ mli akɛ yɛ maji komɛi amli lɛ gbɔmɛi babaoo hiɔ shi ni amɛgbɔlɔɔ moŋ, shi wiemɔi ni Mose ŋma afii komɛi ni eho nɛ lɛ kã he eeetsu nii lolo: “Wɔfii amli gbii lɛ, afii nyɔŋmai kpawo ni, ni kɛ́ efá aahu lɛ, afii nyɔŋmai kpaanyɔ, ni amɛmli shwãa nii lɛ, tɔlɛ kɛ yakayakanii ni; ejaakɛ ehoɔ oyá, ni wɔfilikiɔ kɛyaa.” (Lala 90:​10) Ani wɔbaana tsakemɔ ko yɛ wɔsɛɛ be ni ebɛŋkɛ lɛ mli? Ani gbɔmɔ baanyɛ ahi shi be kakadaŋŋ? Sane ni nyiɛ sɛɛ lɛ baasusu sanebimɔi nɛɛ ahe.