Ani Oodi Jeŋba Kpakpa Sɛɛ?
“Kɛ jeŋba kpakpa ko yɛ, kɛ yijiemɔ ko hu yɛ lɛ, enɛɛmɛi anɔ nyɛjwɛŋa!”—FILIPIBII 4:8.
1. Mɛni ji efɔŋ, ni mɛni hewɔ efiteko Yehowa jamɔ lɛ?
EFƆŊ ji jeŋba fitemɔ loo kpɔtɔmɔ. Egbɛ eshwã jeŋ ni wɔyɔɔ mli lɛ fɛɛ mli. (Efesobii 2:1-3) Shi kɛlɛ, Yehowa Nyɔŋmɔ eŋmɛŋ gbɛ ni afite ejamɔ krɔŋŋ lɛ. Kristofoi awoji, kpeei, kpeei bibii, kɛ kpeei wuji bɔɔ wɔ kɔkɔ yɛ jeŋba ni he tseee he yɛ ebe naa pɛpɛɛpɛ. Wɔnine shɛɔ Ŋmalɛ naa yelikɛbuamɔ kpakpa nɔ koni ‘wɔkɛ wɔhe akpɛtɛ nɔ ni ji ekpakpa he’ yɛ Nyɔŋmɔ hiɛ. (Romabii 12:9) No hewɔ lɛ, ákɛ gbɛjianɔtoo lɛ, Yehowa Odasefoi miibɔ mɔdɛŋ ni amɛhe atse, amɛhiɛ jeŋba kpakpa. Shi, wɔ aŋkroaŋkroi lɛ hu? Yɛ anɔkwale mli lɛ, ani oodi jeŋba kpakpa sɛɛ?
2. Mɛni ji jeŋba kpakpa, ni mɛni hewɔ mɔdɛŋbɔɔ he hiaa koni ahi shi akɛ mɔ ni yɔɔ jeŋba kpakpa lɛ?
2 Jeŋba kpakpa ji subaŋ ni hi fe fɛɛ, ejurɔfeemɔ, nifeemɔ kɛ susumɔ ni ja. Ejeee su ni tsuuu nɔ ko, shi nɔ ni tsuɔ nii ni yɔɔ ekãa. Jeŋba kpakpa kɔɔ babaoo he fe esha ni aaakwa; etsɔɔ ekpakpa sɛɛ ni aaadi. (1 Timoteo 6:11) Bɔfo Petro wo nanemɛi Kristofoi aŋaa akɛ: “Nyɛkɛ jeŋba kpakpa afataa nyɛ hemɔkɛyeli he.” Yɛ mɛɛ gbɛ nɔ? “Nyɛkɛ mɔdɛŋbɔɔ yɛ anɔkwayeli mli fɛɛ afataa [Nyɔŋmɔ shiwoi ni jara wawai lɛ] he.” (2 Petro 1:5, NW) Yɛ wɔbɔɔ su ni esha yɔɔ mli lɛ hewɔ lɛ, ebiɔ mɔdɛŋbɔɔ diɛŋtsɛ dani ahi shi akɛ mɛi ni yɔɔ jeŋba kpakpa. Ni kɛlɛ, aŋkroaŋkroi ni sheɔ Nyɔŋmɔ gbeyei ni hi shi yɛ blema lɛ fee nakai yɛ gbɛtsii nii ni dara po sɛɛ.
Edi Jeŋba Kpakpa Sɛɛ
3. Mɛɛ yiwalɛ nifeemɔi Maŋtsɛ Ahaz ye he fɔ?
3 Mɛi ni di jeŋba kpakpa sɛɛ lɛ ahe saji babaoo yɛ Ŋmalɛi lɛ amli. Akɛ nɔkwɛmɔ nɔ lɛ, susumɔ Hezekia ni yɔɔ jeŋba kpakpa lɛ he okwɛ. Eka shi faŋŋ akɛ etsɛ, Maŋtsɛ Ahaz ni jɛ Yuda lɛ já Molek. “Ahaz eye afii nyɔŋmai enyɔ, beni ebabɔi maŋtsɛyeli lɛ, ni eye maŋtsɛ afii nyɔŋma kɛ ekpaa yɛ Yerusalem. Ni efeee nɔ ni ja yɛ Yehowa, e-Nyɔŋmɔ lɛ hiɛ, tamɔ bɔ ni etsɛ David fee lɛ. Shi enyiɛ Israel maŋtsɛmɛi lɛ agbɛ lɛ nɔ; ni eha ebinuu tete tsɔ̃ la mli tamɔ jeŋmaji ni Yehowa shwie yɛ Israelbii lɛ ahiɛ lɛ anihii nii lɛ. Ni eshãshãa afɔlei kɛ tsofa-kɛ-ŋmai yɛ hei grɔŋŋi lɛ kɛ gɔŋkpɔi lɛ anɔ kɛ tso-fɛɛ-tso ni ebu kusuu shishi.” (2 Maŋtsɛmɛi 16:2-4) Mɛi komɛi kɛɔ akɛ ‘la mli ni atsɔɔ’ lɛ tsɔɔ hetsuumɔ kusum nifeemɔ ko, shi jeee gbɔmɔ ni akɛ lɛ shãa afɔle. Shi, wolo ko ni atsɛɔ lɛ Molech—A God of Human Sacrifice in the Old Testament, ni John Day ŋma lɛ kɛɛ akɛ: “Odaseyeli yɛ blema woji kɛ Punic [Carthaginian] woji amli, kɛ agbɛnɛ shitsaa mli nibii ni yeɔ gbɔmɔ ni akɛshãa afɔle lɛ he odase . . . yɛ Kanaanbii aje lɛ mli, no hewɔ lɛ nɔ ko bɛ ni aaadamɔ nɔ aje nɔ ni Kpaŋmɔ Momo lɛ wieɔ yɛ [gbɔmɔ ni akɛ lɛ shãa afɔle] lɛ he ŋwane.” Agbɛnɛ hu, 2 Kronika 28:3 kɛɔ diɛŋtsɛ akɛ, Ahaz “shã ebii yɛ la mli.” (Okɛto 5 Mose 12:31; Lala 106:37, 38 he.) Mɛɛ yiwalɛ nifeemɔi nɛ!
4. Te Hezekia ba ejeŋ eha tɛŋŋ yɛ shihilɛ ni efɔŋ eyi mli obɔ mli lɛ?
4 Te Hezekia hi shi yɛ jeŋ ni efɔŋ eyi mli nɛɛ mli eha tɛŋŋ? Wɔyɛ Lala 119 lɛ he miishɛɛ, ejaakɛ mɛi komɛi heɔ yeɔ akɛ Hezekia ji mɔ ni ŋma, ni efee enɛ yɛ be mli ni ekã he eji lumɔ lɛ. (Lala 119:46, 99, 100) No hewɔ lɛ, ekolɛ wiemɔi nɛɛ baanyɛ atsɔɔ shihilɛ mli ni eyɔɔ lɛ mli: “Lumɛi tete taraa shi wieɔ mihe; shi otsulɔ lɛ, ogbɛnaai lɛ ahe ejwɛŋɔ. Misusuma miifo kɛ awerɛho sɔŋŋ.” (Lala 119:23, 28) Akɛni mɛi ni diɔ apasa jamɔ sɛɛ lɛ ebɔle lɛ hewɔ lɛ, ekolɛ Hezekia bafee mɔ ni maŋtsɛmɛi awe lɛ mli bii yeɔ ehe fɛo aahu akɛ ewa kɛha lɛ akɛ eeewɔ. Ni kɛlɛ, edi jeŋba kpakpa sɛɛ, ni yɛ be ni sa mli lɛ ebatsɔ maŋtsɛ, ni “efee nɔ ni ja yɛ Yehowa hiɛ . . . Eŋɔ ehiɛ efɔ Yehowa, Israel Nyɔŋmɔ lɛ nɔ.”—2 Maŋtsɛmɛi 18:1-5.
Amɛtee nɔ Amɛhi Shi akɛ Mɛi ni Yɔɔ Jeŋba Kpakpa
5. Mɛɛ kaai Daniel kɛ enanemɛi etɛ lɛ kɛkpe?
5 Mɛi ni yɔɔ jeŋba kpakpa ni ekaaa hu ji Daniel kɛ enanemɛi Hebribii etɛ, ni atsɛɔ amɛ Hanania, Mishael, kɛ Azaria lɛ. Anyɛ amɛnɔ ni ajie amɛ kɛjɛ amɛmaŋ ni atswa amɛ naneshi tu kɛtee Babilon. Akɛ Babilon gbɛi wo obalahii ejwɛ lɛ—Belteshazar, Shadrak, Meshak, kɛ Abednego. Akɛ ‘maŋtsɛ lɛ diɛŋtsɛ niyenii’ hã amɛ akɛ amɛye, kɛ niyenii komɛi ni Nyɔŋmɔ Mla egu akɛ akaye lɛ eko. Agbɛnɛ hu, anyɛ amɛnɔ koni amɛkase “Kaldeamɛi awoloŋ kɛ wiemɔ” afii etɛ. Enɛ kɔɔ nibii babaoo he fe wiemɔ kroko kasemɔ kɛkɛ, ejaakɛ eeenyɛ eba akɛ wiemɔi ni ji “Kaldeamɛi” ni yɔɔ biɛ lɛ tsɔɔ nilelɔi akuu. No hewɔ lɛ, nɛkɛ Hebri obalahii bibii nɛɛ baje Babilonia tsɔ̃ɔmɔi ni ekpɔtɔ lɛ mli.—Daniel 1:1-7.
6. Mɛni hewɔ wɔbaanyɛ wɔkɛɛ akɛ Daniel di jeŋba kpakpa sɛɛ lɛ?
6 Yɛ nɔnyɛɛ babaoo ni akɛba amɛnɔ koni akɛtsake amɛ lɛ fɛɛ sɛɛ lɛ, Daniel kɛ enanemɛi etɛ lɛ hala jeŋba kpakpa fe efɔŋ. Daniel 1:21 kɛɔ akɛ: “Ni Daniel hi jeŋ kɛyashi maŋtsɛ Koresh klɛŋklɛŋ afi lɛ nɔ.” Hɛɛ, Daniel “hi jeŋ” akɛ Yehowa tsulɔ ni yɔɔ jeŋba kpakpa fe afii 80—kɛtsɔ maŋtsɛmɛi babaoo ni yɔɔ hewalɛ lɛ ashitee kɛ shigbeemɔ mli. Etee nɔ eye Nyɔŋmɔ anɔkwa yɛ nɔyeli lɛ mli onukpai ni amɛkpɔtɔ lɛ aŋaatsɔ̃ɔi kɛ kpaŋmɔi, kɛ bɔlɛnamɔ mli jeŋba fɔŋ ni egbɛ eshwã Babilon jamɔ mli lɛ fɛɛ sɛɛ. Daniel tee nɔ edi jeŋba kpakpa sɛɛ.
7. Mɛni abaanyɛ akase kɛjɛ gbɛ ni Daniel kɛ enanemɛi etɛ lɛ nyiɛ sɛɛ lɛ mli?
7 Wɔbaanyɛ wɔkase nii babaoo kɛjɛ Daniel kɛ enanemɛi ni sheɔ Nyɔŋmɔ gbeyei lɛ aŋɔɔ. Amɛdi jeŋba kpakpa sɛɛ ni amɛkpoo akɛ amɛkɛ amɛhe aaawo Babilonia hiŋmɛigbelemɔ mli. Eyɛ mli akɛ aha amɛ Babilonia gbɛii moŋ, shi amɛshɛɛɛ Yehowa tsuji ni amɛji lɛ amɛfɔ̃ɔɔ. Ejaakɛ aaafee afii 70 sɛɛ lɛ, Babilonia maŋtsɛ lɛ kɛ Daniel Hebri gbɛi lɛ tsɛ lɛ! (Daniel 5:13) Daniel eŋmɛɛɛ saji ahe ni ekɛsaa yɛ saji bibii po mli yɛ ewala sɛɛkɛlɛ kakadaŋŋ lɛ mli. Akɛ obalanyo fioo lɛ, ‘ekpɛ mli yɛ etsui mli akɛ ekɛ maŋtsɛ lɛ niyenii kɛ ewein ni enuɔ lɛ buleŋ ehe.’ (Daniel 1:8) Ŋwanejee ko bɛ he akɛ, nɛkɛ saji ahe ni aŋmɛɛɛ ni akɛsaa ni Daniel kɛ enanemɛi etɛ lɛ kɔ lɛ wo amɛ hewalɛ ni amɛje wala kɛ gbele kaai ni amɛkɛkpe yɛ sɛɛ mli lɛ mli.—Daniel, yitsei 3 kɛ 6.
Jeŋba Kpakpa Sɛɛdii Ŋmɛnɛ
8. Te Kristofoi obalahii kɛ obalayei bibii aaafee tɛŋŋ ni amɛte shi amɛwo Satan je lɛ ni aaagbala amɛ awo mli lɛ?
8 Taakɛ Daniel kɛ enanemɛi etɛ lɛ ji lɛ, Nyɔŋmɔ webii ni yɔɔ ŋmɛnɛ lɛ teɔ shi woɔ Satan yiwalɛ je lɛ ni aaagbala amɛ awo mli lɛ. (1 Yohane 5:19) Kɛ oji Kristofonyo obalanyo fioo lɛ, ekolɛ okɛ nɔnyɛɛ ni naa wa ni jɛ otipɛŋfoi aŋɔɔ lɛ miikpe koni okase bɔ ni amɛfeɔ nii kɛtekeɔ nɔ yɛ atadewoo, hesaamɔ, kɛ lalai amli lɛ. Yɛ nɔ najiaŋ ni ooonyiɛ atade fɛɛ atade kɛ bɔ ni akpɛɔ lɛ ahãa ni aaaba ehee ni awoɔ lɛ sɛɛ lɛ, bo lɛ daamɔ shi shiŋŋ, ni kaaŋmɛ gbɛ ni ‘ojeŋba miitamɔ nibii agbɛjianɔtoo nɛɛ nɔ̃ lɛ.’ (Romabii 12:2) “Wɔkwa nɔshafeemɔ kɛ je nɛŋ akɔnɔi lɛ, ni wɔkɛ jwɛŋmɔ kpakpa kɛ jalɛ kɛ Nyɔŋmɔ gbeyeishemɔ ahi shi.” (Tito 2:11, 12) Nɔ ni he hiaa ji Yehowa nɔkpɛlɛmɔ, shi jeee otipɛŋfoi anɔ̃.—Abɛi 12:2.
9. Mɛɛ nɔnyɛɛi Kristofoi ni yɔɔ jarayeli je lɛ mli baanyɛ amɛkɛkpe, ni te esa akɛ amɛba amɛjeŋ amɛha tɛŋŋ?
9 Kristofoi ni edara hu kɛ nɔnyɛɛi kpeɔ, ni esa akɛ amɛfee mɛi ni yɔɔ jeŋba kpakpa. Ekolɛ abaaka nitsumɔtsɛmɛi ni ji Kristofoi lɛ ni amɛkɛ nitsumɔ mli nifeemɔi ni ejaaa atsu nii, aloo ni amɛku amɛhiɛ amɛshwie nɔyeli lɛ akpɔi kɛ toowoo he mlai anɔ. Shi, bɔ fɛɛ bɔ ni nitsumɔ mli akaŋshilɔi loo nanemɛi nitsulɔi aaaba amɛjeŋ amɛhã lɛ fɛɛ sɛɛ lɛ, “wɔmiitao akɛ wɔba wɔjeŋ fɛfɛo yɛ nii fɛɛ mli.” (Hebribii 13:18) Ŋmalɛ lɛ biɔ ni wɔye nitsumɔtsɛmɛi, nitsulɔi, nihelɔi, kɛ jeŋ nɔyelii anɔkwa ni wɔkɛ amɛ ahi shi fɛfɛo. (5 Mose 25:13-16; Mateo 5:37; Romabii 13:1; 1 Timoteo 5:18; Tito 2:9, 10) Nyɛhãa wɔ hu wɔbɔa mɔdɛŋ ni wɔto wɔ nitsumɔ mli nibii ahe gbɛjianɔ yɛ gbɛ kpakpa nɔ. Kɛ wɔkɛ nibii ahe saji ni ja to, ni wɔŋmala gbeekpamɔi wɔwo woji amli pɛpɛɛpɛ lɛ, ebaaha wɔnyɛ wɔtsĩ gbeekpamɔi ni yabaŋ lɛ anaa yɛ bei pii amli.
Yaa nɔ Okwɛ Ohe nɔ Jogbaŋŋ!
10. Mɛni hewɔ ehe hiaa diɛŋtsɛ ni ‘akwɛ he nɔ jogbaŋŋ’ kɛ eba lalai ni wɔsumɔɔ he lɛ?
10 Lala 119:9 maa jeŋba kpakpa mli ni wɔɔhiɛ yɛ Nyɔŋmɔ hiɛ lɛ fã kroko nɔ mi. Lalatsɛ lɛ la akɛ: “Te obalanyo aaafee tɛŋŋ ni eeeha egbɛ lɛ he atseŋ? No ji akɛ ekwɛ ehe nɔ jogbaŋŋ yɛ owiemɔ lɛ naa.” Satan tawuu nii ni naa wa waa lɛ ateŋ ekome ji lala, ni yɔɔ hewalɛ ni ekɛaakanya henumɔi lɛ. Mɔbɔ sane ji akɛ, Kristofoi komɛi kwɛɛɛ ‘amɛhe nɔ jogbaŋŋ’ yɛ lalai agbɛfaŋ, ni amɛnaa ni agbala amɛ kɛtee shɔŋŋ yɛ emli nɔ ni yɔɔ keketee lɛ mli, tamɔ rap kɛ lalai ni atswaa lɛ waa lɛ nɛkɛ mli. Mɛi komɛi baaje ŋwane akɛ lalai ni tamɔ nɛkɛ yeee amɛ awui, aloo akɛ amɛbooo emli wiemɔi lɛ atoi. Mɛi krokomɛi kɛɔ akɛ amɛnyãa bɔ ni egbɛɛɔ lɛ loo amɛnyãa kpãa saŋkui lɛ he kɛkɛ. Shi, kɛha Kristofoi lɛ, sane oti lɛ jeee akɛ anyãa nɔ ko he. Nɔ ni amɛjwɛŋɔ he lɛ ji kɛji akɛ “esa Nuntsɔ lɛ hiɛ.” (Efesobii 5:10; wɔma efã ko nɔ mi.) Yɛ fɛɛ sɛɛ lɛ, lalai ni atswaa lɛ waa kɛ rap lalai lɛ hãa efɔŋfeemɔi tamɔ yakayaka wiemɔ, ajwamaŋbɔɔ, kɛ Satan jamɔ po shwereɔ—nibii ni bɛ gbɛhe ko kwraa yɛ Nyɔŋmɔ webii ateŋ.a (Efesobii 5:3) Wɔteŋ mɔ fɛɛ mɔ, onukpa loo gbekɛ, baafee jogbaŋŋ akɛ eeesusu nɛkɛ sanebimɔ nɛɛ he, Ani miidi jeŋba kpakpa loo jeŋba fɔŋ sɛɛ kɛtsɔ lala ni misumɔɔ ni midiɔ sɛɛ lɛ nɔ?
11. Te Kristofonyo aaafee tɛŋŋ ‘akwɛ ehe nɔ jogbaŋŋ’ yɛ tɛlivishin nɔ nibii, vidioi, kɛ sinii ahe?
11 Tɛlivishin nɔ nibii, vidioi, kɛ sinii pii hãa efɔŋfeemɔ shwereɔ. Taakɛ jwɛŋmɔŋ hela he nilelɔ ko ni ehe gbɛi lɛ kɛɛ lɛ, ‘akɔnɔ pɛ sɛɛ ni adiɔ, bɔlɛnamɔ, awuiyeli, hiɛjoomɔ, kɛ pɛsɛmkunya’ jeɔ kpo titri yɛ sinii babaoo ni afeɔ ŋmɛnɛ lɛ amli. No hewɔ lɛ, ni wɔɔhala nibii ni wɔsumɔɔ ni wɔkwɛ lɛ amli lɛ fata wɔhe nɔ ni wɔɔkwɛ jogbaŋŋ lɛ he. Lalatsɛ lɛ sɔle akɛ: “Jiemɔ mihiɛ kɛjɛ yakayakanii anɔ.” (Lala 119:37) Kristofonyo obalanyo fioo ko ni atsɛɔ lɛ Joseph kɛ shishitoo mla nɛɛ tsu nii. Beni abɔ̃i sini ko ni tsɔ̃ɔ bɔlɛnamɔ kɛ awuiyeli jiemɔ lɛ, ete shi eshi nikwɛmɔhe lɛ. Ani ehiɛ gbo akɛ efee nakai? Joseph kɛɛ: “Dabi, dabi kwraa. Misusu Yehowa ni masa ehiɛ lɛ he klɛŋklɛŋ.”
Nɔ ni Nikasemɔ kɛ Sane Nɔjwɛŋmɔ Tsũɔ
12. Mɛni hewɔ teemɔŋ nikasemɔ kɛ sane nɔjwɛŋmɔ he hiaa koni anyɛ adi jeŋba kpakpa sɛɛ lɛ?
12 Efaaa kɛkɛ akɛ wɔɔkpoo nibii ni ehiii. Jeŋba kpakpa sɛɛdii hu kɔɔ nikasemɔ kɛ nibii kpakpai ni aŋmala yɛ Nyɔŋmɔ Wiemɔ lɛ mli lɛ ni wɔɔjwɛŋ nɔ lɛ he, bɔni afee ni anyɛ akɛ ejalɛ shishitoo mlai lɛ atsu nii. Lalatsɛ lɛ bolɔ akɛ: “Misumɔɔ omla lɛ akɛ nɔ ko! Jenamɔ fɛɛ lɛ no he mijwɛŋɔ.” (Lala 119:97) Ani Biblia lɛ kɛ Kristofoi awoji lɛ kasemɔ yɛ teemɔŋ fata odaa otsi be he gbɛjianɔtoo lɛ he? Eji anɔkwale akɛ, be ni aaato aha Nyɔŋmɔ Wiemɔ lɛ kasemɔ kɛ hiɛdɔɔ kɛ enɔjwɛŋmɔ kɛtsɔ sɔlemɔ nɔ lɛ baanyɛ afee nɔ ni kaa mɔ waa. Shi, yɛ bei pii amli lɛ, anyɛɔ aheɔ be kɛjɛɔ nifeemɔi krokomɛi amli. (Efesobii 5:15, 16) Ekolɛ maŋkɛ̃ mrã ŋmɛlɛtswai lɛ baanyɛ ahi aha bo ákɛ sɔlemɔ, nikasemɔ, kɛ sane nɔjwɛŋmɔ be.—Okɛto Lala 119:147 he.
13, 14. (a) Mɛni hewɔ sane nɔjwɛŋmɔ he hiaa waa lɛ? (b) Mɛɛ ŋmalɛi anɔjwɛŋmɔ baanyɛ aye abua wɔ ni wɔkpoo bɔlɛnamɔ mli jeŋba shara?
13 Sane nɔjwɛŋmɔ he yɛ sɛɛnamɔ babaoo, ejaakɛ eyeɔ ebuaa wɔ ni wɔkaiɔ nɔ ni wɔkaseɔ lɛ. Nɔ ni he hiaa fe fɛɛ lɛ, ebaanyɛ eye ebua ni susumɔi ni Nyɔŋmɔ gbeyeishemɔ yɔɔ mli ashwere. Akɛ nɔkwɛmɔ nɔ lɛ: Eji nɔ kome akɛ aaale akɛ Nyɔŋmɔ egu ajwamaŋbɔɔ, shi eji nɔ kroko kwraa akɛ ‘aaahi efɔŋ ni akpɛtɛ ekpakpa he.’ (Romabii 12:9) Wɔbaanyɛ wɔnu bɔ ni Yehowa nuɔ bɔlɛnamɔ jeŋba shara he ehãa lɛ he kɛtsɔ Biblia mli ŋmalɛi otii lɛ anɔjwɛŋmɔ nɔ, tamɔ Kolosebii 3:5, ni woɔ hewalɛ akɛ: “Nyɛgbea nyɛhe nii ni yɔɔ shikpɔŋ lɛ nɔ lɛ: ajwamaŋbɔɔ, nyaŋemɔ nitsumɔ, mlila, akɔnɔ fɔŋ, kɛ hiɛjoomɔ ni ji wɔŋjamɔ lɛ.” Bi ohe akɛ: ‘Mɛɛ bɔlɛnamɔ mli akɔnɔ esa akɛ magbe lɛ? Mɛni ni baatee akɔnɔi ni he tseee shi esa akɛ makwa? Ani tsakemɔi komɛi yɛ ni esa akɛ mafee yɛ bɔ ni mikɛ yei loo hii yeɔ hãa lɛ mli?’—Okɛto 1 Timoteo 5:1, 2 he.
14 Paulo woɔ Kristofoi ahewalɛ ni amɛtsi amɛhe kɛjɛ ajwamaŋbɔɔ he, ni amɛna henɔyeli koni “mɔ ko akaye enyɛmi amim ni eshishiu lɛ yɛ sane ko mli.” (1 Tesalonikabii 4:3-7) Bi ohe akɛ: ‘Mɛni hewɔ ajwamaŋbɔɔ yeɔ mɔ awui lɛ? Mɛɛ awui maye mi diɛŋtsɛ mihe loo mɔ kroko kɛ mifee esha yɛ enɛ mli? Te ebaasa mihe yɛ mumɔŋ, henumɔŋ, kɛ gbɔmɔtsoŋ eha tɛŋŋ? Ni aŋkroaŋkroi ni yɔɔ asafo lɛ mli ni ámɛtɔ̃ Nyɔŋmɔ mla nɔ ni amɛtsakeee amɛtsui lɛ hu? Te nibii yɔɔ tɛŋŋ yɛ amɛgbɛfaŋ?’ Nɔ ni Ŋmalɛi lɛ kɛɔ yɛ subaŋi ni tamɔ nɛkɛ he ni wɔɔkpɛlɛ nɔ lɛ baaha bɔ ni wɔnyɛ̃ɛɔ nɔ ni ehiii yɛ Nyɔŋmɔ hiɛ lɛ mli akwɔ. (2 Mose 20:14; 1 Korintobii 5:11-13; 6:9, 10; Galatabii 5:19-21; Kpojiemɔ 21:8) Paulo kɛɔ akɛ ajwamaŋbɔlɔ lɛ, “jeee gbɔmɔ ko ekwaa, shi moŋ Nyɔŋmɔ.” (1 Tesalonikabii 4:8) Mɛɛ anɔkwa Kristofonyo baakwa eŋwɛi Tsɛ lɛ?
Jeŋba Kpakpa kɛ Naanyobɔɔ
15. Naanyobɔɔ tsuɔ mɛni yɛ jeŋba kpakpa sɛɛ ni wɔdiɔ lɛ mli?
15 Yelikɛbuamɔ nɔ̃ kroko ni haa ahiɔ shi akɛ mɔ ni yɔɔ jeŋba kpakpa ji naanyobɔɔ kpakpa. Lalatsɛ lɛ la akɛ: “Mɛi ni sheɔo [Yehowa] gbeyei lɛ fɛɛ kɛ mɛi ni yeɔ okpɔi lɛ anɔ lɛ anaanyo ji mi.” (Lala 119:63) Naanyobɔɔ kpakpa ni akɛhaa yɛ Kristofoi akpeei ashishi lɛ he miihia wɔ. (Hebribii 10:24, 25) Kɛ wɔtse wɔhe lɛ, wɔbaatsɔmɔ mɛi ni susuɔ amɛ pɛ amɛhe, ni efɔŋ baanyɛ anina wɔ oya. (Abɛi 18:1) Shi, Kristofoi anaanyobɔɔ ni miishɛɛ yɔɔ mli baanyɛ awaje wɔfaishitswaa akɛ wɔɔhi shi akɛ mɛi ni yɔɔ jeŋba kpakpa. Shi kɛlɛ, esa akɛ wɔkwɛ wɔhe nɔ jogbaŋŋ yɛ naanyobɔɔ fɔŋ he. Wɔbaanyɛ wɔjɛ wɔtsuiŋ wɔkɛ akutseiaŋbii, nanemɛi nitsulɔi, kɛ nanemɛi skulbii ahi shi fɛfɛo. Shi kɛji akɛ wɔkɛ nilee nyiɛɔ diɛŋtsɛ lɛ, wɔbaakwa mɛi ni ediii Kristofoi ajeŋba sɛɛ lɛ ni wɔɔbɛŋkɛ amɛ kpaakpa lɛ.—Okɛto Kolosebii 4:5 he.
16. Klɛŋklɛŋ Korintobii 15:33 kɛ nitsumɔ baanyɛ aye abua wɔ ni wɔdi jeŋba kpakpa sɛɛ ŋmɛnɛ yɛ mɛɛ gbɛ nɔ?
16 Paulo ŋma akɛ: “Naanyobɔɔ fɔŋ fiteɔ jeŋba kpakpa.” Ekɛ nɔ ni ewie nɛɛ miibɔ heyelilɔi kɔkɔ akɛ, amɛbaanyɛ amɛlaaje amɛhemɔkɛyeli kɛtsɔ mɛi ni kɛɔ akɛ Kristofoi ji amɛ ni kpooɔ Ŋmalɛ mli tsɔ̃ɔmɔi ni kɔɔ gbohiiashitee lɛ he lɛ ni amɛkɛ amɛ aaabɔ lɛ nɔ. Shishitoo mla ni yɔɔ Paulo kɔkɔbɔɔ lɛ sɛɛ lɛ kɔɔ mɛi ni wɔkɛ amɛ bɔɔ yɛ asafo lɛ sɛɛ kɛ emligbɛ fɛɛ lɛ ahe. (1 Korintobii 15:12, 33) Shi wɔsumɔɔɔ ni wɔtsi wɔhe kɛjɛ wɔmumɔŋ nyɛmimɛi hii kɛ yei lɛ ahe, akɛni amɛkɛ wɔ kpaaa gbee yɛ susumɔ ko ni kɔɔ teemɔŋ sane ko ni wɔhiɛ lɛ he lɛ hewɔ. (Mateo 7:4, 5; Romabii 14:1-12) Ni kɛlɛ, kɔkɔbɔɔ he miihia kɛji akɛ asafo lɛ mli bii lɛ ateŋ mɛi komɛi kɛ amɛhe woɔ jeŋba ni sanebimɔ yɔɔ he lɛ mli, aloo amɛjieɔ mlifu loo huhuuhuwiemɔ mumɔ kpo lɛ. (2 Timoteo 2:20-22) Nilee yɛ mli akɛ wɔɔbɛŋkɛ mɛi ni wɔɔnyɛ ni wɔkɛ amɛ aná ‘hewalɛ ni awoɔ he’ lɛ mli ŋɔɔmɔ lɛ ahe kpaakpa. (Romabii 1:11, 12) Enɛ baaye abua wɔ ni wɔdi jeŋba kpakpa sɛɛ ni wɔhi “wala gbɛ lɛ” nɔ.—Lala 16:11.
Yaa nɔ Odi Jeŋba Kpakpa Sɛɛ
17. Taakɛ 4 Mose yitso 25 tsɔɔ lɛ, mɛɛ oshara ba Israelbii lɛ anɔ, ni mɛɛ nikasemɔ enɛ kɛhãa wɔ?
17 Beni eshwɛ fioo ni Israelbii lɛ nine aaashɛ Shiwoo Shikpɔŋ lɛ nɔ lɛ, amɛteŋ mɛi akpei abɔ hala akɛ amɛaadi jeŋba fɔŋ sɛɛ—ni oshara ba amɛnɔ. (4 Mose, yitso 25) Ŋmɛnɛ, Yehowa webii damɔ jalɛ jeŋ hee lɛ agbo lɛ naa. Emlibotemɔ lɛ baafee hegbɛ ni jɔɔmɔ yɔɔ mli aha mɛi ni yaa nɔ amɛkpoɔ je nɛŋ jeŋbai fɔji lɛ. Akɛ gbɔmɛi ni yeee emuu lɛ, ekolɛ wɔyɛ sui komɛi ni ejaaa, shi Nyɔŋmɔ baanyɛ aye abua wɔ ni wɔnyiɛ emumɔ krɔŋkrɔŋ lɛ hiɛnyiɛmɔ ni ja lɛ sɛɛ. (Galatabii 5:16; 1 Tesalonikabii 4:3, 4) Belɛ nyɛhãa wɔboa Yoshua kɔkɔbɔɔ ni ekɛha Israel lɛ toi: “Nyɛshea Yehowa gbeyei, ni nyɛjie nyɛyitsoŋ nyɛsɔmɔ lɛ yɛ anɔkwale mli.” (Yoshua 24:14) Woo ni gbeyeishemɔ akɛ wɔfeŋ nɔ ko ni esaŋ Yehowa hiɛ yɔɔ mli lɛ baaye abua wɔ ni wɔdi jeŋba kpakpa gbɛ lɛ sɛɛ.
18. Mɛni esa akɛ efee Kristofoi fɛɛ afaishitswaa yɛ jeŋba fɔŋ kɛ jeŋba kpakpa he?
18 Kɛ eji nɔ ni otsui shweɔ akɛ ooosa Nyɔŋmɔ hiɛ lɛ, belɛ tswaa ofai shi akɛ ooobo Paulo ŋaawoo nɛɛ toi: “Nii abɔ ni ji anɔkwa, nii ni sa woo, nii ni ja, nii ni he tse, nii ni adɔɔ he, nii ni yɔɔ gbɛi kpakpa lɛ fɛɛ, kɛ jeŋba kpakpa ko yɛ, kɛ yijiemɔ ko hu yɛ lɛ, enɛɛmɛi anɔ nyɛjwɛŋa!” Kɛ ofee enɛ lɛ, mɛni baajɛ mli aba? Paulo kɛɛ: “Nomɛi nɔŋŋ nyɛfea, ni hejɔlɛ Nyɔŋmɔ lɛ kɛ nyɛ ahi shi.” (Filipibii 4:8, 9) Hɛɛ, obaanyɛ okpoo jeŋba fɔŋ ni odi jeŋba kpakpa sɛɛ yɛ Yehowa yelikɛbuamɔ naa.
[Shishigbɛ niŋmai]
a Kwɛmɔ Buu-Mɔɔ, April 15, 1993, baafai 19-24, kɛ nɔ ni aŋma atsara nɔ, “Young People Ask . . . ” ni yɔɔ February 8, February 22, kɛ March 22, 1993, kɛ November 22, 1996 Awake! lɛ mli lɛ.
Saji Otii Kɛha Emlitii
◻ Mɛni ebiɔ koni adi jeŋba kpakpa sɛɛ?
◻ Mɛɛ shihilɛi ashishi Hezekia, Daniel, kɛ Hebribii etɛ lɛ hi shi akɛ mɛi ni yɔɔ jeŋba kpakpa yɛ?
◻ Te wɔɔfee tɛŋŋ wɔtamɔ Daniel yɛ Satan ŋaatsɔɔi lɛ anaa ni wɔɔdamɔ lɛ mli?
◻ Mɛni hewɔ esa akɛ Kristofoi akwɛ amɛhe nɔ jogbaŋŋ yɛ hiɛtserɛjiemɔ he lɛ?
◻ Mɛni nikasemɔ, sane nɔjwɛŋmɔ, kɛ naanyobɔɔ tsuɔ yɛ jeŋba kpakpa sɛɛdii mli?
[Mfoniri ni yɔɔ baafa 15]
Obalanyo fioo Hezekia di jeŋba kpakpa sɛɛ, eyɛ mli akɛ Molek jalɔi ebɔle lɛ kɛkpe
[Mfoniri ni yɔɔ baafa 17]
Esa akɛ Kristofoi aya nɔ akwɛ amɛhe nɔ jogbaŋŋ kɛ aajie hiɛtserɛ