Ani Osɔlemɔi “Tamɔ Tsofa-Kɛ-Ŋma”?
“Ha mifaikpamɔ abaje tamɔ tsofa-kɛ-ŋma yɛ ohiɛ.”—LALA 141:2.
1, 2. Tsofa-kɛ-ŋma ni ashãa lɛ feɔ mɛni he mfoniri?
YEHOWA NYƆŊMƆ fã egbalɔ Mose akɛ efee tsofa-kɛ-ŋma ko ni yɔɔ krɔŋkrɔŋ koni akɛtsu nii yɛ Israel jamɔ kpeebuu lɛ mli. Bɔ ni ajɛ ŋwɛi atsɔɔ akɛ afee lɛ aha lɛ biɔ tsofai srɔtoi ejwɛ ni jeɔ ŋma ni ákɛfutu. (2 Mose 30:34-38) Eŋmajee lɛ bafee nɔ ni ŋɔɔ diɛŋtsɛ.
2 Mla kpaŋmɔ lɛ ni akɛ Israel maŋ lɛ bote mli lɛ to gbɛjianɔ koni ashã tsofa-kɛ-ŋma daa gbi. (2 Mose 30:7, 8) Ani tsofa-kɛ-ŋma ni akɛtsu nii lɛ tsɔɔ nɔ ko krɛdɛɛ ko? Hɛɛ, ejaakɛ lalatsɛ lɛ la akɛ: “Ha mifaikpamɔ [sɔlemɔ] abaje tamɔ tsofa-kɛ-ŋma yɛ ohiɛ [Yehowa Nyɔŋmɔ], ni miniji anɔholemɔ lɛ afee tamɔ gbɛkɛ afɔle.” (Lala 141:2) Bɔfo Yohane tsɔɔ yɛ Kpojiemɔ wolo lɛ mli akɛ, mɛi ni ebɔle Nyɔŋmɔ ŋwɛi maŋtsɛsɛi lɛ he kɛkpe lɛ hiɛ shika tɔi kɛ amɛmli tsofa-kɛ-ŋmai obɔbɔ. Mumɔ naa wiemɔ lɛ kɛɔ akɛ, ‘ni tsofa-kɛ-ŋma lɛ ji krɔŋkrɔŋbii lɛ asɔlemɔi lɛ.’ (Kpojiemɔ 5:8) No hewɔ lɛ, tsofa-kɛ-ŋma ni ashãa ni eŋma lɛ ŋɔɔ lɛ feɔ sɔlemɔi ni akpɛlɛɔ nɔ ni Yehowa tsuji kɛhaa shwane kɛ nyɔɔŋ fɛɛ lɛ he mfoniri.—1 Tesalonikabii 3:10; Hebribii 5:7.
3. Mɛni esa akɛ eye ebua wɔ koni ‘wɔsaa wɔsɔlemɔi tamɔ tsofa-kɛ-ŋma yɛ Nyɔŋmɔ hiɛ’?
3 Kɛji akɛ wɔsɔlemɔi lɛ aaafee nɔ ni Nyɔŋmɔ baakpɛlɛ nɔ lɛ, no lɛ esa akɛ wɔsɔle wɔha lɛ yɛ Yesu Kristo gbɛi amli. (Yohane 16:23, 24) Shi te wɔɔfee tɛŋŋ ni wɔha wɔsɔlemɔi lɛ hilɛ aya hiɛ? Ojogbaŋŋ, esa akɛ Ŋmalɛ mli nɔkwɛmɔnii komɛi ni wɔɔsusu he lɛ aye abua wɔ ni wɔsaa wɔsɔlemɔi lɛ koni etamɔ tsofa-kɛ-ŋma yɛ Yehowa hiɛ.—Abɛi 15:8.
Sɔlemɔ yɛ Hemɔkɛyeli Mli
4. Hemɔkɛyeli kɔɔ sɔlemɔ ni akpɛlɛɔ nɔ lɛ he yɛ mɛɛ gbɛ nɔ?
4 Kɛji akɛ wɔsɔlemɔi aaakwɔ kɛaaya Nyɔŋmɔ ŋɔɔ akɛ tsofa-kɛ-ŋma ni eŋma ŋɔɔ lɛ, belɛ esa akɛ wɔsɔle yɛ hemɔkɛyeli mli. (Hebribii 11:6) Kɛji akɛ Kristofoi onukpai na mɔ ko ni he miiye yɛ mumɔŋ shi ekpɛlɛɔ amɛ Ŋmalɛ naa yelikɛbuamɔ nɔ lɛ, amɛ “hemɔkɛyeli sɔlemɔ lɛ aaahere helatsɛ lɛ yiwala.” (Yakobo 5:15) Sɔlemɔi ni asɔleɔ yɛ hemɔkɛyeli mli lɛ saa wɔŋwɛi Tsɛ lɛ hiɛ, ni nakai sɔlemɔ ni atsɔɔ nɔ akaseɔ Nyɔŋmɔ Wiemɔ lɛ ji. Lalatsɛ lɛ jie su kpakpa kpo beni ela akɛ: “Mahole miniji anɔ maha okitai lɛ ni misumɔɔ lɛ, ni majwɛŋ ogbɛnaai lɛ ahe. Ha mi yitsoŋ kpakpa kɛ nilee, ejaakɛ mihe okitai lɛ miye.” (Lala 119:48, 66) Nyɛhaa ‘wɔholea wɔniji anɔ’ yɛ heshibaa sɔlemɔ mli ni wɔjie hemɔkɛyeli kpo kɛtsɔ Nyɔŋmɔ kitai lɛ ni wɔɔye nɔ lɛ nɔ.
5. Mɛni esa akɛ wɔfee kɛ wɔbɛ nilee?
5 Ŋɔɔ lɛ akɛ wɔbɛ nilee ni he hiaa ni wɔkɛaatsu kaa ko he nii. Ekolɛ wɔbɛ nɔmimaa akɛ Biblia gbalɛ pɔtɛɛ ko miiba mli bianɛ. Yɛ nɔ najiaŋ ni wɔɔŋmɛ gbɛ ni enɛ aha wɔfee mɛi ni fiii shi shiŋŋ yɛ mumɔŋ lɛ, nyɛhaa wɔsɔleɔ wɔbia nilee. (Galatabii 5:7, 8; Yakobo 1:5-8) Shi, wɔnyɛŋ wɔkpa gbɛ akɛ Nyɔŋmɔ aaaha wɔ hetoo yɛ naakpɛɛ gbɛ ko nɔ. Esa akɛ wɔjie anɔkwale ni wɔsɔlemɔi lɛ ji lɛ kpo kɛtsɔ nɔ ni ekpaa gbɛ akɛ ewebii fɛɛ aaafee lɛ ni wɔɔfee lɛ nɔ. Ehe miihia ni wɔkɛ wɔhe awo Ŋmalɛi lɛ kasemɔ ni tswaa mɔ hemɔkɛyeli emaa shi lɛ mli kɛtsɔ woji ni atsɔɔ “tsulɔ anɔkwafo kɛ nilelɔ lɛ” nɔ akɛhaa lɛ yelikɛbuamɔ nɔ. (Mateo 24:45-47; Yoshua 1:7, 8) Ehe mihia hu ni wɔya wɔhiɛ yɛ nilee mli kɛtsɔ Nyɔŋmɔ webii akpeei ni wɔkɛ wɔhe aaawo mli daa lɛ nɔ.—Hebribii 10:24, 25.
6. (a) Mɛni esa akɛ wɔ fɛɛ wɔyɔse yɛ wɔgbi nɛɛ kɛ Biblia mli gbalɛi amlibaa he? (b) Kɛfata sɔlemɔ ni wɔsɔleɔ koni Yehowa gbɛi lɛ he atse lɛ he lɛ, mɛni esa akɛ wɔfee?
6 Ŋmɛnɛ, Kristofoi komɛi miidi amɛ diɛŋtsɛ amɛnibii kɛ nitsumɔi asɛɛ, ni tsɔɔ akɛ amɛlaaje amɛhiɛ ni aaahi amɛhe nɔ akɛ wɔshɛ shɔŋŋ yɛ “naagbee be” lɛ mli bianɛ lɛ. (Daniel 12:4) Nanemɛi heyelilɔi baanyɛ asɔle koni mɛi ni tamɔ nɛkɛ lɛ awo amɛhemɔkɛyeli ni amɛyɔɔ yɛ Ŋmalɛ mli odaseyeli ni tsɔɔ akɛ ba ni Kristo eba lɛ je shishi yɛ afi 1914 beni Yehowa kɛ lɛ ta maŋtsɛsɛi nɔ akɛ ŋwɛi Maŋtsɛ, ni akɛ eeye lumɔ yɛ ehenyɛlɔi lɛ ateŋ lɛ mli hewalɛ loo ewaje lɛ. (Lala 110:1, 2; Mateo 24:3) Esa akɛ wɔ fɛɛ wɔyoo akɛ saji ni agba afɔ̃ shi tamɔ apasa jamɔ—“Babilon Kpeteŋkpele”lɛ—hiɛkpatamɔ, Satan tutuamɔ ni Gog ni jɛ Magog lɛ kɛbaaba Yehowa webii anɔ, kɛ amɛyiwala ni Nyɔŋmɔ Ofe lɛ baahere yɛ Harmagedon ta lɛ mli lɛ baanyɛ aba trukaa yɛ gbɛ ni heleɔ mɔ shi nɔ, ni fɛɛ baanyɛ aba yɛ be kukuoo mli kɛ akɛto he. (Kpojiemɔ 16:14, 16; 18:1-5; Ezekiel 38:18-23) No hewɔ lɛ, nyɛhaa wɔsɔlea wɔbia Nyɔŋmɔ yelikɛbuamɔ koni wɔshi kpe yɛ mumɔŋ. Eba akɛ wɔ fɛɛ wɔkɛ hiɛdɔɔ aaasɔle kɛha Yehowa gbɛi lɛ he tsemɔ, koni e-Maŋtsɛyeli lɛ aba, ni afee esuɔmɔnaa nii yɛ shikpɔŋ nɔ taakɛ afeɔ yɛ ŋwɛi lɛ. Hɛɛ, eba akɛ wɔɔya nɔ wɔjie hemɔkɛyeli kpo ni wɔtsɔɔ akɛ wɔsɔlemɔi lɛ anɔkwale ni. (Mateo 6:9, 10) Yɛ anɔkwale mli lɛ, eba akɛ mɛi fɛɛ ni sumɔɔ Yehowa lɛ aaatao Maŋtsɛyeli lɛ kɛ ejalɛ lɛ tsutsu, ni amɛná sanekpakpa lɛ shiɛmɔ mli gbɛfaŋnɔ babaoo bɔ ni amɛaanyɛ, dani naagbee lɛ aba.—Mateo 6:33; 24:14.
Jiemɔ Yehowa Yi ni Oda lɛ Shi
7. Mɛni he onyaa yɛ David sɔlemɔ ni aŋma afɔ̃ shi yɛ 1 Kronika 29:10-13 lɛ he?
7 Gbɛ ni he hiaa ni wɔɔtsɔ nɔ ‘wɔsaa wɔsɔlemɔi tamɔ tsofa-kɛ-ŋma’ ji yijiemɔ kɛ shidaa kɛha Nyɔŋmɔ ni jɛ tsuiŋ ni wɔɔjie lɛ kpo. Maŋtsɛ David sɔle yɛ gbɛ ni tamɔ nɛkɛ nɔ beni lɛ kɛ Israelbii lɛ kɛ nikeenii ha kɛha Yehowa sɔlemɔtsu lɛ maa lɛ. David sɔle akɛ: “Aaajie Yehowa, wɔtsɛ Israel Nyɔŋmɔ lɛ yi kɛjɛ naanɔ kɛyashi naanɔ! Bo, Yehowa, onɔ ji dalɛ kɛ hewalɛ kɛ anunyam kɛ kunimyeli kɛ agbojee; ejaakɛ nɔ fɛɛ nɔ ni yɔɔ ŋwɛi kɛ shikpɔŋ lɛ nɔ lɛ onɔ ni. Bo, Yehowa, onɔ ji maŋtsɛyeli lɛ, ni bo ji mɔ ni ta nii fɛɛ nɔ akɛ yitso! Ni ninámɔ kɛ anunyam fɛɛ jɛ odɛŋ, ni bo nɔŋŋ oyeɔ nii fɛɛ nɔ, ni odɛŋ hu hewalɛ kɛ nyɛmɔ yɔɔ, ni odɛŋ sane nɔŋŋ ji mɔ fɛɛ mɔ dalɛ kɛ hewalɛ námɔ! No hewɔ lɛ, agbɛnɛ, wɔ-Nyɔŋmɔ, wɔmiidao shi ni wɔmiijie ohiɛnyam gbɛi lɛ yi!”—1 Kronika 29:10-13.
8. (a) Mɛɛ yijiemɔ wiemɔi ni yɔɔ Lala 148 kɛyashi 150 taa otsuiŋ titri? (b) Kɛji akɛ wɔkɛ henumɔi ni ajie lɛ kpo yɛ Lala 27:4 lɛ kpãa gbee lɛ, mɛni wɔbaafee?
8 Mɛɛ yijiemɔ kɛ shidaa wiemɔi ni ŋɔɔ jogbaŋŋ nɛ! Ekolɛ wɔ sɔlemɔi lɛ nyɛŋ afee nɔ ni naatsemɔ yɔɔ mli, shi amɛbaanyɛ amɛfee nɔ ni jɛ tsuiŋ. Lalai awolo lɛ mli eyi obɔ kɛ shidaa kɛ yijiemɔ sɔlemɔi. Anaa yijiemɔ wiemɔi ni ahala yɛ Lala 148 kɛyashi 150. Ájie shi ni adaa Nyɔŋmɔ lɛ kpo yɛ lalai pii amli. David lá akɛ: “Nɔ koome mibiɔ yɛ Yehowa dɛŋ, no sɛɛgbɛ mitaoɔ: akɛ mahi shi yɛ Yehowa we lɛ miwala gbii abɔ fɛɛ, ni mana Yehowa mlihilɛ lɛ, ni makwɛ esɔlemɔwe lɛ.” (Lala 27:4) Nyɛhaa wɔfea nii yɛ sɔlemɔi ni tamɔ nɛkɛ lɛ kɛ gbeekpamɔ naa kɛtsɔ Yehowa webii agwabɔɔ lɛ nitsumɔi fɛɛ ni wɔkɛ wɔhe aaawo mli yɛ ekãa naa lɛ nɔ. (Lala 26:12) Enɛ ni wɔfeɔ lɛ kɛ Nyɔŋmɔ Wiemɔ lɛ nɔ ni wɔjwɛŋɔ daa gbi lɛ baaha wɔná nibii pii ni wɔɔdamɔ nɔ wɔkɛ yijiemɔ kɛ shidaa ni jɛ tsuiŋ aya Yehowa ŋɔɔ.
Okɛ Heshibaa Atao Yehowa Yelikɛbuamɔ
9. Mɛɛ gbɛ nɔ Maŋtsɛ Asa tsɔ̃ esɔle, ni mɛni jɛ mli ba?
9 Kɛji akɛ wɔmiisɔmɔ Yehowa kɛ wɔtsui fɛɛ akɛ e-Dasefoi lɛ, wɔbaanyɛ wɔná nɔmimaa akɛ eboɔ wɔsɔlemɔi kɛha yelikɛbuamɔ lɛ toi. (Yesaia 43:10-12) Susumɔ Yuda Maŋtsɛ Asa he okwɛ. Toiŋjɔlɛ hi afii 41 ni ekɛye nɔ (977-937 D.Ŋ.B.) lɛ mli klɛŋklɛŋ afii 10 lɛ mli. Kɛkɛ ni asraafoi akpeiakpe ni yɔɔ Zera, Kushnyo lɛ shishi lɛ batutua Yuda. Eyɛ mli akɛ amɛyi fa fe amɛ kwraa moŋ, shi Asa kɛ emɛi lɛ tee koni amɛkɛ mɛi ni tutuaa amɛ lɛ ayakpe. Shi dani ta lɛ aaaje shishi lɛ, Asa jɛ etsuiŋ tɔŋŋ esɔle. Ekpɛlɛ hewalɛ ni Yehowa yɔɔ ni ekɛhereɔ mɔ yiwala lɛ nɔ. Beni ekpaa fai ni aye abua lɛ lɛ, maŋtsɛ lɛ kɛɛ: “Bo nɔŋŋ onɔ wɔhiɛ kã, ni ogbɛi anɔ wɔbaa wɔkɛ asafo babaoo nɛɛ abakpe nɛɛ. Yehowa, bo ji wɔ-Nyɔŋmɔ; kaaha adesa nine miitsɔ onɔ!” Aye amɛnɔ kunim kwraa kɛmɔ shi, ejaakɛ Yehowa here Yuda yiwala yɛ egbɛi kpeteŋkpele lɛ hewɔ. (2 Kronika 14:1-14) Kɛji akɛ Nyɔŋmɔ here wɔyiwala kɛjɛ kaa mli loo ewo wɔ hewalɛ koni wɔŋmɛ wɔtsui shi yɛ mli hu lɛ, ŋwanejee ko bɛ he akɛ enuɔ fai ni wɔkpaa lɛ kɛha eyelikɛbuamɔ lɛ.
10. Mɛɛ gbɛ nɔ Maŋtsɛ Yehoshafat sɔlemɔ lɛ baafee nɔ ni yeɔ buaa kɛji akɛ wɔleee bɔ ni wɔɔfee wɔtsu sane ko ni hiɛdɔɔ yɔɔ mli lɛ he nii?
10 Kɛji akɛ wɔleee bɔ ni wɔɔfee wɔtsu sane ko ni hiɛdɔɔ yɔɔ mli waa he nii lɛ, wɔbaanyɛ wɔná hekɛnɔfɔɔ akɛ Yehowa baanu wɔsɔlemɔi kɛha yelikɛbuamɔ lɛ. Afee enɛ he mfoniri yɛ Yuda Maŋtsɛ Yehoshafat, ni enɔyeli ni he afii 25 lɛ je shishi yɛ afi 936 D.Ŋ.B. lɛ gbii lɛ amli. Beni Moab, Amon, kɛ Seir gɔŋ lɛ nɔ bii lɛ atai ní amɛfee ekome lɛ wo Yuda he gbeyei lɛ, Yehoshafat kpa fai akɛ: “Wɔ-Nyɔŋmɔ! aso okojoŋ amɛ? Ejaakɛ wɔ lɛ, wɔbɛ hewalɛ yɛ nɛkɛ ta babaoo nɛɛ ni baa wɔnɔ nɛɛ hiɛ; ni wɔleee bɔ ni wɔɔfee, shi moŋ bo onɔ wɔhiŋmɛii jwere!” Yehowa ha nakai heshibaa sɔlemɔ lɛ hetoo, ewuu eha Yuda kɛtsɔ henyɛlɔi lɛ ni eha amɛyiŋ futu amɛ ni amɛgbegbee amɛhe lɛ nɔ. Yɛ enɛ hewɔ lɛ, maji ni ebɔle amɛhe lɛ she gbeyei, ni toiŋjɔlɛ hi Yuda. (2 Kronika 20:1-30) Kɛji akɛ wɔbɛ nilee ni he hiaa ni wɔkɛaadamɔ sane ni hiɛdɔɔ yɔɔ mli naa lɛ, wɔbaanyɛ wɔsɔle taakɛ Yehoshafat sɔle lɛ, akɛ: ‘Wɔleee nɔ ni esa akɛ wɔfee, shi wɔhiŋmɛii jwere onɔ, Yehowa.’ Mumɔ krɔŋkrɔŋ lɛ baaha wɔkai Ŋmalɛ mli saji otii ni he hiaa ni baaha wɔná naagba lɛ naa tsabaa, aloo ekolɛ Nyɔŋmɔ baaye abua wɔ yɛ gbɛ ni tekeɔ adesa susumɔ nɔ.—Romabii 8:26, 27.
11. Mɛni wɔbaanyɛ wɔkase yɛ sɔlemɔ he kɛjɛ Nehemia nifeemɔi ni kɔɔ Yerusalem gbogbo lɛ he lɛ mli?
11 Ekolɛ ehe baahia ni wɔkã sɔlemɔ kɛha Nyɔŋmɔ dɛŋ yelikɛbuamɔ lɛ he. Nehemia ye awerɛho, efó, ehi ŋmãa, ni esɔle gbii pii yɛ Yerusalem gbogbo ni ekumɔ lɛ kɛ shihilɛ ni ehiii kwraa ni mɛi ni yɔɔ Yuda lɛ yɔɔ mli lɛ he. (Nehemia 1:1-11) Eka shi faŋŋ akɛ esɔlemɔi lɛ kwɔ kɛtee Nyɔŋmɔ ŋɔɔ tamɔ tsofa-kɛ-ŋma ni eŋma ŋɔɔ. Gbi ko lɛ Persia Maŋtsɛ Artashasta bi Nehemia ni efee ehiɛ mɔbɔmɔbɔ lɛ akɛ: “Mɛni ji nɔ ni otaoɔ?” Nehemia bɔ amaniɛ akɛ: ‘Amrɔ nɔŋŋ ni misɔle miha ŋwɛi Nyɔŋmɔ lɛ.’ Aha nakai sɔlemɔ kuku ni afee lɛ dioo lɛ hetoo, ejaakɛ aŋmɛ Nehemia gbɛ koni etsu nɔ ni etsui taoɔ lɛ he nii kɛtsɔ Yerusalem ni eeeya koni eyasaa etswa gbogbo ni ekumɔ lɛ ekoŋŋ lɛ nɔ.—Nehemia 2:1-8.
Ha Yesu Atsɔɔ Bo Bɔ ni Asɔleɔ
12. Te ooomua saji otii ni yɔɔ Yesu sɔlemɔ nɔkwɛmɔnɔ lɛ mli lɛ anaa oha tɛŋŋ, yɛ bo diɛŋtsɛ owiemɔ mli?
12 Yɛ sɔlemɔi fɛɛ ni aŋmala yɛ Ŋmalɛi lɛ amli lɛ ateŋ lɛ, nɔ ni tsɔɔ mɔ nii krɛdɛɛ ji sɔlemɔ nɔkwɛmɔnɔ ni Yesu Kristo kɛha ni tamɔ tsofa-kɛ-ŋma ni eŋma ŋɔɔ lɛ. Luka Sanekpakpa lɛ kɛɔ akɛ: “[Yesu] kaselɔi lɛ ateŋ mɔ kome kɛɛ lɛ akɛ: ‘Nuntsɔ, tsɔɔmɔ wɔ sɔlemɔ tamɔ bɔ ni Yohane hu tsɔɔ ekaselɔi lɛ.’ Ni ekɛɛ amɛ akɛ: ‘Be fɛɛ be ni nyɛaasɔle lɛ, nyɛkɛa akɛ, “Tsɛ, ha ogbɛi lɛ he atse. Ha omaŋtsɛyeli lɛ aba. Ha wɔ ŋmɛnɛ gbi nɛɛ ŋmãa yɛ gbi lɛ taomɔ nii anaa. Ni okɛ wɔhe eshai ake wɔ, ejaakɛ wɔ diɛŋtsɛ hu wɔkɛkeɔ mɔ fɛɛ mɔ ni hiɛ wɔ nyɔmɔ lɛ; ni okɛ wɔ akaya kaa mli.” ’ ” (Luka 11:1-4; Mateo 6:9-13, NW) Nyɛhaa wɔsusua sɔlemɔ nɛɛ, ni yiŋtoo jeee ni akase awo yitsoŋ kɛkɛ ni akɛɛ, shi yiŋtoo lɛ ji ni efee gbɛtsɔɔlɔ lɛ he.
13. Mɛɛ gbɛ nɔ oootsɔ otsɔɔ nɔ ni wiemɔi ni ji “Tsɛ, ha ogbɛi lɛ he atse” lɛ tsɔɔ lɛ mli?
13 “Tsɛ, ha ogbɛi lɛ he atse.” Yehowa ni akɛ lɛ wieɔ akɛ Tsɛ lɛ ji hegbɛ krɛdɛɛ ni etsuji ni amɛjɔɔ amɛhe nɔ lɛ yɔɔ. Ákɛ bii ni kɛ nɔ fɛɛ nɔ ni he hiaa amɛ lɛ yaa tsɛ ni musuŋ tsɔɔ lɛ ŋɔɔ oya lɛ, esa akɛ wɔkɛ be awo daa sɔlemɔ ni bulɛ kɛ woo yɔɔ mli ni wɔkɛhaa Nyɔŋmɔ lɛ mli. (Lala 103:13, 14) Esa akɛ wɔsɔlemɔi lɛ ajie bɔ ni wɔsusuɔ Yehowa gbɛi lɛ hetsemɔ he wɔhaa lɛ kpo, ejaakɛ wɔmishwe ni wɔna akɛ átse he kɛjɛ ahorabɔɔ fɛɛ ni akɛba nɔ lɛ he. Hɛɛ, wɔmiisumɔ ni atu Yehowa gbɛi lɛ ama afã ni ahiɛ lɛ krɔŋkrɔŋ, loo ehe atse.—Lala 5:11; 63:3, 4; 148:12, 13; Ezekiel 38:23.
14. Ákɛ aaasɔle akɛ, “Ha omaŋtsɛyeli lɛ aba” lɛ tsɔɔ mɛni?
14 “Ha omaŋtsɛyeli lɛ aba.” Maŋtsɛyeli lɛ ji Yehowa nɔyeli ni atsɔɔ ŋwɛi Mesia nɔyeli ni yɔɔ e-Bi lɛ kɛ Yesu hefatalɔi “mɛi krɔŋkrɔŋi” lɛ adɛŋ lɛ nɔ ajieɔ lɛ kpo lɛ. (Daniel 7:13, 14, 18, 27; Kpojiemɔ 20:6) Etsɛŋ ni ‘ebaaba’ ni ebate shi ewo mɛi ni yɔɔ shikpɔŋ nɔ ni teɔ shi woɔ Nyɔŋmɔ nɔyeli lɛ fɛɛ, ni ejie amɛ kɛjɛ shihilɛ mli. (Daniel 2:44) Kɛkɛ lɛ abaafee Yehowa suɔmɔnaa nii yɛ shikpɔŋ nɔ, tamɔ bɔ ni afeɔ yɛ ŋwɛi lɛ. (Mateo 6:10) Mɛɛ miishɛɛ po enɛ kɛbaaba abaha bɔɔnii fɛɛ ni kɛ anɔkwayeli sɔmɔɔ Jeŋ Muu Fɛɛ Maŋtsɛ lɛ nɛkɛ!
15. Ní wɔɔbi Yehowa akɛ “ha wɔ ŋmɛnɛ gbi nɛɛ ŋmãa” lɛ tsɔɔ mɛni?
15 “Ha wɔ ŋmɛnɛ gbi nɛɛ ŋmãa yɛ gbi lɛ taomɔ nii anaa.” Yehowa ni wɔbiɔ lɛ niyenii kɛha “gbi lɛ” tsɔɔ akɛ wɔbiii niyenii babaoo, shi kɛha wɔ daa gbi hiamɔ nii pɛ. Eyɛ mli akɛ wɔkɛ wɔhiɛ fɔ̃ɔ Nyɔŋmɔ nɔ akɛ ekɛbaaha moŋ, shi wɔtsuɔ nii hu, ni wɔkɛ gbɛ fɛɛ gbɛ ni sa ni yɔɔ lɛ tsuɔ nii bɔni afee ni wɔná niyenii kɛ hiamɔ nii krokomɛi. (2 Tesalonikabii 3:7-10) Shi kɛlɛ, esa akɛ wɔda wɔŋwɛi Nihalɔ lɛ shi ejaakɛ esuɔmɔ, enilee, kɛ hewalɛ yɛ nibii ni ekɛhaa nɛɛ asɛɛ.—Bɔfoi lɛ Asaji 14:15-17.
16. Te wɔɔfee tɛŋŋ ni wɔnine ashɛ eshaifaa nɔ kɛjɛ Nyɔŋmɔ dɛŋ?
16 “Okɛ wɔhe eshai ake wɔ, ejaakɛ wɔ diɛŋtsɛ hu wɔkɛkeɔ mɔ fɛɛ mɔ ni hiɛ wɔ nyɔmɔ lɛ.” Akɛni wɔyeee emuu ni wɔfeɔ esha hewɔ lɛ, wɔnyɛŋ wɔshɛ Yehowa tɛi ni yeɔ emuu lɛ ahe kɛmɔ shi. No hewɔ lɛ, ehe miihia ni wɔdamɔ Yesu kpɔmɔ afɔleshaa lɛ nɔ wɔsɔle wɔbi edɛŋ eshaifaa. Shi kɛji akɛ wɔmiisumɔ ni ‘sɔlemɔ Toibolɔ’ lɛ kɛ nakai afɔleshaa lɛ jara lɛ atsu wɔhe eshai ahe nii lɛ, belɛ esa akɛ wɔfee mɛi ni etsake amɛtsui kɛ mɛi ni sumɔɔ akɛ amɛaakpɛlɛ tsɔsemɔ fɛɛ tsɔsemɔ ni ekɛhaa wɔ lɛ nɔ. (Lala 65:3; Romabii 5:8; 6:23; Hebribii 12:4-11) Agbɛnɛ hu, wɔbaanyɛ wɔkpa eshaifaa gbɛ kɛjɛ Nyɔŋmɔ dɛŋ kɛji akɛ wɔkɛ mɛi ni feɔ esha amɛshiɔ wɔ lɛ ‘ahe nyɔmɔ eke amɛ.’—Mateo 6:12, 14, 15.
17. Mɛni ji wiemɔi, “Okɛ wɔ akaya kaa mli” lɛ shishi?
17 “Okɛ wɔ akaya kaa mli.” Biblia lɛ kɛɔ yɛ bei komɛi amli akɛ Yehowa feɔ nibii, beni eŋmɛɔ nakai nibii lɛ agbɛ kɛkɛ. (Rut 1:20, 21) Nyɔŋmɔ ekaaa wɔ koni wɔfee esha. (Yakobo 1:13) Kaai ni haa afeɔ efɔŋ lɛ baa kɛjɛɔ Abonsam, wɔ esha heloo lɛ, kɛ je nɛɛ ŋɔɔ. Satan ji Kaalɔ ni bɔɔ mɔdɛŋ koni ekudɔ wɔ koni wɔfee esha wɔshi Nyɔŋmɔ lɛ. (Mateo 4:3; 1 Tesalonikabii 3:5) Kɛji akɛ wɔkpa fai akɛ, “Okɛ wɔ akaya kaa mli” lɛ, belɛ wɔmiibi ni Nyɔŋmɔ akaŋmɛ wɔ gbɛ ni wɔnine nyɛ shi kɛ aaka wɔ koni wɔkafee toiboo wɔha lɛ. Ebaanyɛ ekudɔ wɔ ni wɔkaŋmɛɛ wɔhe wɔha koni Satan, “mɔ fɔŋ” lɛ, nine akashɛ wɔnɔ.—Mateo 6:13; 1 Korintobii 10:13.
Tsu Nii ni kɛ Osɔlemɔi lɛ Kpãa Gbee
18. Te wɔɔfee tɛŋŋ wɔtsu nii ni ekɛ wɔsɔlemɔi kɛha gbalashihilɛ kɛ weku shihilɛ ni miishɛɛ yɔɔ mli akpã gbee?
18 Yesu sɔlemɔ nɔkwɛmɔnɔ lɛ kɔɔ saji otii ahe, shi wɔbaanyɛ wɔsɔle yɛ sane fɛɛ sane he. Ákɛ nɔkwɛmɔnɔ lɛ, wɔbaanyɛ wɔsɔle yɛ bɔ ni wɔshweɔ ni wɔná gbalashihilɛ ni ŋɔɔ he. Bɔni afee ni wɔhiɛ hetsemɔ mli kɛyashi kpeemɔ gbi nɔ lɛ, ekolɛ wɔbaasɔle kɛha henɔyeli. Shi agbɛnɛ nyɛhaa wɔtsua nii ni kɛ wɔsɔlemɔi lɛ kpãa gbee, kɛtsɔ woji kɛ hiɛtserɛjiemɔi ni fiteɔ jeŋba lɛ ni wɔɔkwa nɔ. Agbɛnɛ hu nyɛhaa wɔtswaa wɔfai shi akɛ ‘wɔbaabote gbalashihilɛ mli yɛ Nuntsɔ lɛ mli pɛ.’ (1 Korintobii 7:39; 5 Mose 7:3, 4) Kɛji akɛ wɔná wɔbote gbalashihilɛ mli pɛ lɛ, ehe baahia ni wɔtsu nii ni kɛ wɔsɔlemɔi lɛ kpãa gbee kɛtsɔ Nyɔŋmɔ ŋaawoo lɛ kɛ nitsumɔ nɔ. Ni kɛji akɛ wɔyɛ bii lɛ, efaaa kɛkɛ akɛ wɔɔsɔle koni amɛfee Yehowa tsuji anɔkwafoi. Esa akɛ wɔfee nɔ fɛɛ nɔ ni wɔɔnyɛ koni wɔtɛo Nyɔŋmɔ anɔkwalei lɛ yɛ amɛjwɛŋmɔi amli kɛtsɔ Biblia mli nikasemɔ kɛ Kristofoi akpeei ni wɔkɛ amɛ aaaya daa nɔ.—5 Mose 6:5-9; 31:12; Abɛi 22:6.
19. Mɛni esa akɛ wɔfee kɛji akɛ wɔmiisɔle yɛ wɔsɔɔmɔ nitsumɔ lɛ he?
19 Ani wɔmiisɔle koni ajɔɔ wɔsɔɔmɔ nitsumɔ lɛ nɔ? Belɛ nyɛhaa wɔfea nii ni kɛ sɔlemɔi ni tamɔ nɛkɛ kpãa gbee, kɛtsɔ Maŋtsɛyeli shiɛmɔ nitsumɔ lɛ mli gbɛfaŋnɔ ni wɔɔná yɛ gbɛ ni mɔɔ shi nɔ. Kɛji akɛ wɔsɔle koni wɔná hegbɛi ni baaha wɔye wɔbua mɛi krokomɛi koni amɛtsɔ gbɛ ni kɛ mɔ yaa naanɔ wala mli lɛ nɔ lɛ, belɛ ehe baahia ni wɔŋmala mɛi ni yɔɔ wiemɔ lɛ he miishɛɛ lɛ ahe saji ni ja wɔshwie shi, koni wɔsumɔ akɛ wɔkɛ shia Biblia mli nikasemɔ feemɔ aaawo wɔgbɛjianɔtoo lɛ mli. Ni kɛji akɛ wɔmiisumɔ ni wɔkɛ wɔhe awo be-fɛɛ shiɛmɔ nitsumɔ lɛ mli akɛ gbɛgbalɔ hu? Belɛ nyɛhaa wɔtoa gbɛjianɔ ni kɛ wɔsɔlemɔi lɛ kpãa gbee kɛtsɔ wɔshiɛmɔ nitsumɔ lɛ ni wɔɔha efá kɛ agbɛnɛ gbɛgbalɔi lɛ ni wɔɔfata amɛhe kɛná sɔɔmɔ nitsumɔ lɛ mli gbɛfaŋnɔ lɛ nɔ. Nifeemɔ gbɛ̀i ni tamɔ nɛkɛ ni wɔɔkɔ lɛ baatsɔɔ akɛ wɔmiitsu nitsumɔi ni kɛ wɔsɔlemɔi lɛ kpãa gbee.
20. Nikasemɔ ni nyiɛ sɛɛ lɛ baasusu mɛni he?
20 Kɛji akɛ wɔmiisɔmɔ Yehowa yɛ anɔkwayeli mli lɛ, wɔbaanyɛ wɔná hekɛnɔfɔɔ akɛ ebaaha wɔsɔlemɔi ni kɛ esuɔmɔnaa nii kpãa gbee lɛ ahetoo. (1 Yohane 5:14, 15) Yɛ anɔkwale mli lɛ, wɔhala saji otii ni sɛɛnamɔ yɔɔ he kɛjɛ sɔlemɔi ni aŋmala yɛ Biblia lɛ mli lɛ ekomɛi amlipɛimɔ mli. Wɔ nikasemɔ ni nyiɛ sɛɛ lɛ baasusu Ŋmalɛ mli gbɛtsɔɔmɔi krokomɛi kɛha mɛi ni sumɔɔ ni ‘amɛsaa amɛsɔlemɔi koni etamɔ tsofa-kɛ-ŋma yɛ Yehowa hiɛ’ lɛ ahe.
Te Obaaha Hetoo Oha Tɛŋŋ?
◻ Mɛni hewɔ esa akɛ wɔsɔle yɛ hemɔkɛyeli mli?
◻ Mɛni esa akɛ yijiemɔ kɛ shidaa atsu yɛ wɔsɔlemɔi amli?
◻ Mɛni hewɔ wɔbaanyɛ ni wɔkɛ hekɛnɔfɔɔ atao Yehowa yelikɛbuamɔ yɛ sɔlemɔ mli lɛ?
◻ Mɛni ji sɔlemɔ nɔkwɛmɔnɔ lɛ mli saji otii lɛ ekomɛi?
◻ Te wɔɔfee tɛŋŋ wɔfee nii ni kɛ wɔsɔlemɔi lɛ kpãa gbee?
[Mfoniri ni yɔɔ baafa 12]
Taakɛ Maŋtsɛ Yehoshafat ji lɛ, ehe baahia ni wɔsɔle yɛ bei komɛi amli akɛ: ‘Wɔleee nɔ ni esa akɛ wɔfee, shi wɔhiŋmɛii jwere onɔ, Yehowa’
[Mfoniri ni yɔɔ baafa 13]
Ani osɔleɔ yɛ Yesu sɔlemɔ nɔkwɛmɔnɔ lɛ kɛ gbeekpamɔ naa?