Gbɛjianɔtoo Hee Ko Nyɔŋmɔ Lɛ Kaimɔi Kɛ Akpɔi
Miye okpɔi kɛ okaimɔi lɛ anɔ, ejaakɛ migbɛ̀i fɛɛ jwere ohiɛ.—LALA 119:168, NW
1. Mɛɛ gbɛi anɔ nɛkɛ kaimɔi haa Yehowa webii naa miishɛɛ yɛ?
1 NYƆŊMƆ jalɛ gbɛjianɔtoo hee lɛ ebɛŋkɛ! Ehe miihia ni Yehowa Odasefoi ni sumɔɔ ejalɛ mla lɛ ana kaimɔi ni jɛ e-Wiemɔ lɛ mli kɛtsɔ egbɛjianɔtoo lɛ nɔ yɛ bei ni he hiaa amli. Akɛni amɛyeɔ kaimɔi ni jɛ ŋwɛi nɛɛ anɔ hewɔ lɛ, amɛyɛ miishɛɛ. Nɛkɛ kaimɔi nɛɛ tsirɛɔ amɛ ni amɛtao esɛɛgbɛ, ni miishɛɛ jɛɔ mli baa. Ŋleshi wiemɔ ni akɛtsɔɔ Hebri wiemɔ edoth shishi akɛ “kaimɔi” fe “odasei” (martyria, taakɛ Hela Septuagint Version lɛ tsɔɔ lɛ) mli wa ni etsɔɔ nɔ ko pɔtɛɛ. Etsɔɔ akɛ Yehowa haa wɔkaiɔ emlai, ekpɔi, egbɛnaa nii, ekitai kɛ famɔi yɛ be kɛ bei amli. No hewɔ lɛ ehaaa wɔhiɛ akpa enɛɛmɛi anɔ kwraa. Kɛ wɔmli fuuu yɛ nɛkɛ kaimɔi nɛɛ ahewɔ lɛ, wɔnaa miishɛɛ yɛ amɛ nɔ yeli mli.
2. Mɛni nɔ Lala 119 ŋmalɔ lɛ damɔ ni ema kaimɔi babaoo nɔ mi nakai lɛ?
2 Kɛji akɛ kɛ hoo lɛ eŋma yɛ afii ohai enumɔ dani wɔ Ŋmɛnɛŋmɛnɛ Be nɛɛ shɛ lɛ, belɛ lalatsɛ lɛ baaná Hebri Ŋmalɛi lɛ fɛɛ, kɛjɛ 1 Mose kɛyashi Maleaki yɛ emasɛi. Atsɛɔ wolo ni ji enumɔ lɛ akɛ Deuteronomy (Hela Septuagint Version, taakɛ wɔnaa yɛ mfoniri ni yɔɔ yiteŋgbɛ nɛɛ mli lɛ) , ni nakai gbɛi lɛ shishi ji “Mla ni ji Enyɔ.” Eka shi faŋŋ akɛ abuɔ nɔ ni yɔɔ wolo nɛɛ mli lɛ titri akɛ Mla (kpaŋmɔ) ni Yehowa kɛ Israel fee kɛtsɔ teŋdamɔlɔ ni ji gbalɔ Mose nɔ lɛ mlitsɔɔmɔ. No hewɔ lɛ nɔ ni esa akɛ ahi Deuteronomy loo 5 Mose mli ji kaimɔi, ni Nyɔŋmɔ kaimɔi kɛha wɔ hu yɛ Biblia mli woji lɛ fɛɛ mli.
3. (a) Wiemɔi ni atsɛ kɛjɛ Hebri Ŋmalɛi lɛ amli lɛ kaiɔ wɔ mɛni? (b) Wɔmiishɛɛ baanyɛ afa fe nɔ ni lalatsɛ lɛ na mli ŋɔɔmɔ lɛ yɛ mɛɛ gbɛ nɔ?
3 Jeee akɛ Hebri Ŋmalɛi lɛ mli wiemɔi ohai abɔ ni atsɛ sɛɛ yɛ Kristofoi a-Hela Ŋmalɛi lɛ amli lɛ tsuɔ nii akɛ kaimɔi kɛha nɔ ni Yehowa tsɔɔ ewebii lɛ yɛ Mla lɛ shishi lɛ kɛkɛ, shi moŋ eyiŋtooi wuji ni kɔɔ Kristofoi asafo lɛ kɛ adesai ni akpɔ̃ amɛ lɛ hu he. Yesu Kristo, Mose Kpeteŋkpele lɛ kaselɔi ni yɔɔ ŋmɛnɛ lɛ yɛ kaimɔi babaoo ni jɛ Yehowa Nyɔŋmɔ ŋɔɔ fe nɔ ni lalatsɛ lɛ ná lɛ, ni kɛ amɛkɛ anɔkwayeli ye nɔ lɛ, amɛbaaná miishɛɛ babaoo fe nɔ ni lalatsɛ lɛ na lɛ. Yɛ be mli ni amɛtaoɔ E-kaimɔi amli kɛtsɔɔ Biblia lɛ kasemɔ nɔ lɛ, belɛ amɛkɛ amɛtsui muu lɛ fɛɛ miitao Yehowa.
4. Ni Nyɔŋmɔ kaimɔ aaawo wɔmli la loo mlifu moŋ lɛ, mɛni ji su kpakpa ni esa akɛ wɔna yɛ lalatsɛ lɛ kasemɔ mli?
4 Esa akɛ wɔhiɛ asɔ nɔ fɛɛ nɔ ni haa wɔ ŋaawoo kpakpa ni etsiɔ wɔ gbɛ koni nɔ ni baa mɔ fɔŋ lɛ nɔ lɛ akaba wɔ nɔ lɛ. Lalatsɛ lɛ nu he nakai yɛ Nyɔŋmɔ kaimɔi lɛ ahe. (Lala 119:24, 119, 167) Yehowa Odasefoi ni yɔɔ ŋmɛnɛ lɛ hu ji mɛi ni amɛmli wooo la akɛni Yehowa ena akɛ ehi akɛ ekɛ emlai lɛ he nibii aaakai amɛ, ekolɛ kɛtsɔ amɛ Biblia lɛ kasemɔ loo kɛtsɔ egbɛjianɔtoo lɛ nɔ. Amɛjɛɔ anɔkwayeli mli amɛhalaa akɛ amɛkɛ amɛhe aaakpɛtɛ ekaimɔi ahe. “Mikpɛtɛ okaimɔi lɛ ahe gbagbalii. Oo Yehowa, kaawo mi hiɛgbele!”—Lala 119:31, NW.
5. (a) Kaimɔi ni jɛ Nyɔŋmɔ Wiemɔ lɛ mli kɛ egbɛjianɔtoo lɛ ŋɔɔ lɛ tsuɔ mɛɛ yiŋtoo he nii? (b) Te wɔɔfee tɛŋŋ ni wɔ diɛŋtsɛ lɛ wɔɔtsɔɔ akɛ wɔyɛ bulɛ waa kɛha Yehowa kaimɔi tamɔ lalatsɛ lɛ?
5 Nyɔŋmɔ kɛ ekaimɔi lɛ haaa koni ekɛwo e-Dasefoi lɛ ahiɛgbele, shi moŋ etsɔɔ nɔ ebuɔ amɛhe kɛjɛɔ hiɛgbejianifeemɔ he. Amɛmiisumɔ ni amɛsuɔmɔ jɛɛhe lɛ adɔ kɛya nibii ni sɛɛnamɔ diɛŋtsɛ yɔɔ he yɛ be fɛɛ ni baaba lɛ mli lɛ anɔ; no hewɔ lɛ, amɛfataa lalatsɛ lɛ he kɛkɛɔ akɛ: “Dɔɔ mitsui kɛya okaimɔi lɛ ahe, shi jeee hiɛkɔɔ he.” (Lala 119:36, NW) Belɛ ebɛ naakpɛɛ mɔ akɛ wɔsumɔɔɔ ni wɔŋmɛɛɔ nibii ni emli sɛɛnamɔi hiɔ shi kɛyaa naanɔ nɛɛ ahe kɛtsɔ Biblia lɛ kasemɔ ni wɔɔŋmɛɛ he aloo Yehowa webii ni amɛjɔɔ amɛhe nɔ lɛ kɛkpee daa ni wɔɔŋmɛɛ he lɛ nɔ. (Lala 119:111) Amɛ-Nyɔŋmɔ lɛ suɔmɔ kɛ amɛsusuma muu lɛ fɛɛ tsirɛɔ amɛ kɛtsɔɔ gbɛ nɛɛ nɔ. Eyɛ mli akɛ ekolɛ eeefee tsɔsemɔ babaoo kɛha amɛ moŋ, shi Yehowa Odasefoi amli filiɔ amɛ akɛ Yehowa miinyiɛ amɛhiɛ yɛ ekaimɔi lɛ amli, koni ekaha amɛmiigba afã ni amɛlaaje kwraa: “Mimli filiɔ mi yɛ okaimɔi lɛ agbɛ lɛ nɔ, taakɛ mifeɔ yɛ nibii ni jara wawai fɛɛ he lɛ.”—Lala 119:14, NW.
6. Yehowa Odasefoi ebɔ mɔdɛŋ akɛ amɛaaye anɔkwale yɛ Nyɔŋmɔ hiɛ yɛ mɛɛ gbɛ nɔ?
6 Eyɛ mli akɛ awie ashi amɛ waa ni mɛi pii ekwa amɛ akɛni amɛtɔ hewɔ moŋ, shi Yehowa Odasefoi eye amɛhe anɔkwale yɛ amɛ-Nyɔŋmɔ lɛ hiɛ. Amɛmiisumɔ ni amɛtsɔ gbɛ ni ekaimɔi awolo lɛ tsɔɔ kɛhaa amɛ lɛ nɔ. Amɛ ŋmɛnɛŋmɛnɛ beaŋ yinɔsane tsɔɔ akɛ amɛfee amɛnii tamɔ bɔ pɛ ni blema lalatsɛ lɛ fee lɛ: “Mijwɛŋ migbɛ́i lɛ ahe, ni mitsɔmɔ minaji kɛtee okaimɔi lɛ ahe.” (Lala 119:59, NW) Nɛkɛ feemɔ pɛ nɔ amɛbaatsɔ ni amɛnyɛ amɛsɔle amɛha Nyɔŋmɔ ni eha amɛhi wala mli, ni amɛya nɔ amɛtsu nitsumɔ ni ekɛwo amɛdɛŋ lɛ yɛ amɛhenyɛlɔi ni amɛlá he kumai yeɔ amɛ lɛ fɛɛ sɛɛ. (Lala 119:88) Akɛni amɛjajeɔ akɛ amɛji Nyɔŋmɔ tsuji yɛ amɛhe nɔ ni amɛjɔɔ amɛha lɛ kɛtsɔ Kristo nɔ, ni ákɛ ehe miihia ni amɛnu nɔ ni eŋma efɔ shi yɛ e-Wiemɔ ni aŋma lɛ mli lɛ shishi diɛŋtsɛ hewɔ lɛ, amɛkɛɔ akɛ: “Otsulɔ ji mi. Ha mi sɛɛyoomɔ, koni male okaimɔi lɛ.”—Lala 119:125, NW.
7. Mɛni ji yiŋtooi ahewɔ ni amɛdaa shi lɛ, ni amɛsɔle amɛbi mɛni?
7 Nibii ni Nyɔŋmɔ ejie lɛ kpo kɛtsɔ e-Wiemɔ lɛ mli kɛjɛ Jeŋ Ta I yɛ 1918 lɛ naagbee lɛ efee amɛ naakpɛɛ, no hewɔ lɛ amɛmiisumɔ ni amɛtsu nɔ ni nibii ni ajie lɛ kpo atsɔɔ amɛ nɛɛ kɛɔ amɛ akɛ amɛfee lɛ. (Lala 119:129) Ábu Yehowa jalɔ kwraa yɛ ekaimɔi ni egbala wɔjwɛŋmɔ kɛba nɔ, ni ekɛfɔ wɔ nɔ tamɔ kitai lɛ hewɔ. Wɔyɛ miishɛɛ akɛ wɔkɛ sɔlemɔ aaakpɛlɛ enɛ nɔ taakɛ lalatsɛ lɛ wie lɛ: “Owo okaimɔi lɛ ahe kita yɛ jalɛ kɛ anɔkwayeli sɔŋŋ mli.” (Lala 119:138, NW) Wɔmiida shi yɛ Nyɔŋmɔ anɔkwafo ni tamɔ nɛkɛ hewɔ!
8. Naanɔ wala damɔ Nyɔŋmɔ kaimɔi lɛ ahe shishinumɔ kɛ amɛ nɔ yeli nɔ yɛ mɛɛ gbɛ nɔ?
8 Ŋmɛnɛ, Yehowa Odasefoi nuɔ shishi jogbaŋŋ akɛ naanɔ wala yɛ Nyɔŋmɔ jalɛ nibii agbɛjianɔtoo hee lɛ mli ni amɛaana lɛ damɔ nɔ ni egbalaa amɛjwɛŋmɔ kɛbaa nɔ lɛ he shishinumɔ ni amɛaaná kɛ nilee mli ni amɛaajɛ amɛbo toi lɛ nɔ. (Lala 119:144) Ehe ebahia ni amɛsɔle amɛha ŋwɛi sɔlemɔ Toibolɔ lɛ koni ehere amɛyiwala yɛ je ni nyɛɛɔ amɛ nɛɛ mli, yɛ shihilɛi ni woɔ amɛhe gbeyei waa lɛ mli, titri lɛ yɛ nɛkɛ gbii nɛɛ ni aabua jeŋmaji fɛɛ anaa kɛha “Nyɔŋmɔ ofe lɛ gbi wulu lɛ nɔ ta” yɛ Harmagedon lɛ mli, (Kpojiemɔ 16:13-16) Ni nɔ ni sa jogbaŋŋ ji nɛkɛ sɔlemɔ nɛɛ: “Mibolɔ mitsɛo. Heremɔ miyiwala! Ni maye okaimɔi lɛ anɔ.”—Lala 119:146, NW.
9. Mɛɛ nɔmimaa wɔyɔɔ akɛ wɔnine baaya nɔ ashɛ ŋwɛi kaimɔi anɔ?
9 Eyɛ mli akɛ agbe Yehowa Nyɔŋmɔ kaimɔi ni aŋmala ashwie shi lɛ fɛɛ naa afii 1,900 ni eho nɛ, yɛ be mli ni agbe Biblia ni feɔ woji 66 lɛ naa lɛ moŋ, shi amɛyɛ ŋmɛnɛ, ni amɛ baaya nɔ amɛfee woji ni onine baashɛ nɔ kɛya wɔsɛɛ be ni aleee lɛ fɛɛ mli. Lala 119:152 ni awie Nyɔŋmɔ he yɛ mli lɛ haa enɛ baa mli anɔkwale: “Mile kɛjɛ jeeŋmɔ akɛ oto okaimɔi lɛ ashishi kɛmiiya naanɔ.” Yɛ Yehowa kaimɔi lɛ ahe nilee hewɔ lɛ, aje shishi akala wolo tɛtrɛɛ, Zion’s Watch Tower and Herald of Christ’s Presence lɛ yɛ July, 1979. Ŋmɛnɛ, yɛ afii 105, ni átee nɔ afee wolo nɛɛ sɛɛ lɛ, nɛkɛ wolo tɛtrɛɛ nɛɛ ka he eji wolo ni aaja lolo, yɛ jeŋ fɛɛ, yɛ wiemɔi 102 mli. Kɛji akɛ abaaŋmɛ Yehowa Odasefoi lɛ ahenyɛlɔi agbɛ ni amɛha akpa woji tɛtrɛbii lɛ afeemɔ po lɛ, amɛnyɛŋ amɛtsi Ŋmalɛ Krɔŋkrɔŋ lɛ ni Yehowa kaimɔi yɔɔ mli ni damɔ naanɔ shishitooi anɔ lɛ naa.
Mɔ Ni Kwɔ Fe Wɔ Lɛ Akpɔi Lɛ Ahe Nitsumɔ
10. Mɛɛ hehiamɔ Lala 119 kɛha Nyɔŋmɔ “akpɔi” lɛ?
10 Yɛ be mli ni lalatsɛ Iɛ ejie mɛi ni nyiɛɔ Yehowa mla lɛ mli ni amɛyeɔ ekaimɔi lɛ anɔ lɛ ayi yɛ ewiemɔ lɛ shishijee kukuji lɛ amli lɛ sɛɛ lɛ, etee nɔ ekɛɛ akɛ: “Asaŋ amɛfeee nɔ ni ejaaa, shi egbɛ̀i lɛ anɔ amɛnyiɛɔ. Ewo akpɔi Iɛ ahe kita akɛ wɔye nɔ pɛpɛɛpɛ.” (Lala 119:3, 4) Mɔ ni fo lala nɛɛ lɛ kɛ wiemɔ “akpɔi” tsu nii shii 21, koni eha amɛka ejwɛŋmɔ mli.
11. (a) Mɛni hewɔ lalatsɛ lɛ kwɛ ejeŋba loo esubaŋ jogbaŋŋ taakɛ Lala 119:168 tsɔɔ lɛ. (b) Mɛni ji hewalɛ ni yɔɔ wiemɔ “akpɔi” lɛ sɛɛ?
11 Lalatsɛ lɛ kɛɔ wɔ bɔ ni enu nakai ŋwɛi “akpɔi” lɛ ahe eha kɛ nɔ ni efee yɛ he. Etsu nii yɛ nɛkɛ gbɛ nɔ akɛ nɔkwɛmɔ nɔ ni anyɛɔ akɛ he fɔɔ enɔ kɛha wɔ ŋmɛnɛ. Eyoo akɛ Nyɔŋmɔ miikwɛ shihilɛ gbɛ ni tamɔ nɛkɛ ni ákɛ esa akɛ ekwɛ bɔ ni ebaa ejeŋ yɛ Yehowa Mla kpaŋmɔ lɛ he ehaa lɛ jogbaŋŋ. No hewɔ lɛ yiŋtoo kpakpa ji nɔ ni ha ekɛɛ akɛ: “Miye okpɔi kɛ okaimɔi lɛ anɔ, ejaakɛ migbɛ́i lɛ fɛɛ jwere ohiɛ,” (Lala 119:168, NW) Kaimɔi kanyaa jwɛŋmɔ lɛ, shi akpɔi ji gbɛtsɔɔmɔi ni mɔ ni kwɔ lɛ kɛhaa mɔ ni yɔɔ eshishi lɛ. Amɛtsɔɔ nɔ ni esa akɛ tsulɔ, nyɔ̃ŋ, nitsulɔ loo asraafonyo lɛ afee kɛ gbɛ ni esa akɛ amɛtsɔ nɔ amɛtsu nii ni akɛwo amɛdɛŋ lɛ he nii. Akpɔi ji saji ni mli wawai fe shishitoo mlai; ni Hebri wiemɔi ni atsɔɔ shishi nakai, ni ji, piqudim, lɛ tsɔɔ “halamɔi loo nitsumɔ ni atuɔ awoɔ mɔ dɛ; famɔi.” Ani nɛkɛ ŋwɛi akpɔi nɛɛ tamɔ jatsu loo nɔ ko ni eŋɔɔɔ kɛha lalatsɛ lɛ, titri lɛ, kɛji akɛ ehaa afolɔɔ mɔ ni yeɔ nɔ lɛ naa yɛ apasa gbɛ nɔ aloo agbeɔ mɔ lɛ he guɔ? Nyɛhaa wɔboɔ lɛ toi: “Naa, misumɔɔ okpɔi lɛ. Yehowa, ha miyi ana wala yɛ omlihilɛ lɛ naa.”—Lala 119:159, 169.
12, 13. (a) Yɛ mɛɛ gbɛ nɔ tɛi ni afolɔ ashwie shi ni lalatsɛ lɛ kɛmamɔ shi lɛ ye bua Nyɔŋmɔ tsuji ni amɛnyɛ amɛŋmɛ amɛtsui shi yɛ kaai amli lɛ Jeŋ Ta I mli kɛ esɛɛ fɛɛ? (b) Eyɛ mli akɛ afolɔ apasa saji ashwie ‘amɛnɔ’ moŋ, shi namɔ akpɔi shwɛɛnii lɛ bo toi?
12 Mɛɛ tɛi kpakpai ni afolɔ ashwie shi lalatsɛ lɛ kɛmamɔ shi eha anɔkwale Kristofoi ni kɛ amɛhe ebɔ gbɛjianɔtoo ni anaa yɛ je ni yeee mla nɔ, ni bɛ suɔmɔ lɛ he lɛ nɛkɛ! Bɔni wɔhiɔ shi yɛ naa wɔhaa lɛ kɛ nyɔmɔwoo eba. Akɛni amɛ-Nyɔŋmɔ lɛ henyɛlɔi ateŋ amɛhiɔ hewɔ lɛ, amɛnuɔ he tamɔ bɔ pɛ ni lalatsɛ lɛ nu he lɛ, tamɔ “gbɔ.” (Lala 119:19, 54) Shi kɛlɛ, amɛnuɔ he akɛ nɔ ko nɔ ko bɛ ni tamɔ Nyɔŋmɔ—gbɛnaai kɛha shihilɛ kpakpa lɛ. Shwɛ sharao kulɛ amɛhiɛ kpata yɛ Jeŋ Ta I ni ba yɛ 1914-18 lɛ mli. Henyɛlɔi lɛ shɛ shɔŋŋ kɛbote mɛi ni tsuɔ nii yɛ Yehowa gbɛjianɔtoo ni anaa lɛ mli lɛ ateŋ yɛ nakai afii ni tawuu eye mɛi sɛkɛ yɛ mli lɛ amli, koni amɛkɛ oyaiyeli akpata ewebii lɛ ahiɛ, ni amɛfee enɛ po kɛyashɛ he ni amɛha awo nɔkwɛlɔ lɛ kɛ onukpai ni tsuɔ nii yɛ Buu Mɔɔ Asafo lɛ yitso lɛ tsuŋ yɛ gbɛ ni ejaaa nɔ. Niiashikpamɔ nɛɛ tamɔ nɔ ni Lala 119:69 tsɔɔ mli lɛ: “Hewolɔi folɔɔ apasa saji shwieɔ minɔ; shi mi lɛ, mikɛ mitsui muu lɛ fɛɛ yeɔ okpɔi lɛ anɔ.” Esa akɛ amɛbo Ŋwɛi Flooflo Nyɔŋmɔ ni Nɔ Kwɔ fe amɛ lɛ moŋ toi fe ni aaabo gbɔmɛi ni yɔɔ biɛ, yɛ Nyɔŋmɔ naneshi maaŋoo nɛɛ nɔ lɛ toi.
13 Hɛɛ, beni Jeŋ Ta I mli bawa fe fɛɛ, ni henyɛlɔi lɛ susu akɛ amɛmiihe amɛye omanye yɛ ta ni amɛwuɔ amɛshiɔ mɛi ni yeɔ Nyɔŋmɔ akpɔi lɛ anɔ lɛ, eha amɛnu he akɛ amɛmiihe amɛkpata ewebii ni amɛjɔɔ amɛhe nɔ amɛha lɛ ni boɔ lɛ toi lɛ ahiɛ kwraa. No hewɔ lɛ amɛbaanyɛ amɛkɛɛ akɛ: “Shwɛ fioo ni amɛplenee mi yɛ shikpɔŋ lɛ nɔ; shi mi lɛ mikwako okpɔi lɛ.” (Lala 119:87) Mɔ ni Kwɔ Fe Fɛɛ yɛ je muu fɛɛ lɛ fite amɛyi nɔ ni henyɛlɔi hewolɔi nɛɛ ekpaŋ yɛ gbɛ ni ehiii nɔ lɛ.
14. Shwɛɛnii lɛ baanyɛ awie wiemɔi ni yɔɔ Lala 119:45 lɛ yɛ mɛɛ shishinumɔ mli?
14 Beni ahere amɛyiwala yɛ ta lɛ sɛɛ lɛ, amɛnu he akɛ ehe miihia ni amɛtao Nyɔŋmɔ akpɔi lɛ fe be fɛɛ, bɔni afee ni amɛkase ni amɛle nɔ ni eto eyiŋ kɛha amɛ akɛ esa akɛ amɛfee yɛ toiŋjɔlɛ be ni amɛkpaaa gbɛ lɛ mli. Amɛbaanyɛ amɛjaje wiemɔi ni yɔɔ Lala 119:45 lɛ: “Manyiɛ yɛ he ni lɛɛ; ejaakɛ okpɔi lɛ asɛɛgbɛ mitaoɔ.”
Amrɔ Nɛɛ Kɛ Agbɛnɛ Kɛmiiya Wɔsɛɛ Be
15. (a) Mɛɛ Jwɛŋmɔ ni atsɔɔ yɛ Lala 119 Nyɔŋmɔ webii lɛ kɛfee amɛ diɛŋtsɛ amɛnɔ̃? (b) Mɛni he nii amɛtsuɔ titri kɛjɛ 1919?
15 Akɛni amɛ Maŋtsɛyeli nitsumɔ lɛ mli elɛɛ kɛyashɛ shikpɔŋ lɛ naagbee hei hewɔ lɛ, amɛhenyɛlɔi lɛ ayifalɛ eku ebɔ he. Shi enɛ wooo amɛhe gbeyei ni amɛjie Nyɔŋmɔ famɔi lɛ kɛjɛ amɛjwɛŋmɔ mli. Amɛkɛ faishitswaa yaa nɔ. (Lala 119:93, 94) Akɛni amɛjeee Nyɔŋmɔ Wiemɔ lɛ, ni ekpɔi kpakpai lɛ fata he lɛ toibolɔi ni hiɛ kpaa nɔ, shi moŋ amɛji mɛi ni yeɔ wiemɔ lɛ nɔ, ni amɛtsuɔ he nii hewɔ lɛ, mɛni amɛbaanyɛ amɛkɛɛ bianɛ ni fuufeemɔ bɛ mli, ni amɛkɛ yijiemɔ lɛ aha Yehowa? Enɛ: “Miyooɔ sane sɛɛ fe onukpai po, ejaakɛ miyeɔ okpɔi lɛ nɔ.” (Lala 119:100, 104) No hewɔ lɛ kɛjɛ ta lɛ sɛɛ afi ni ji 1919 kɛbaa lɛ, amɛkɛ amɛhe woko jeŋmaji lɛ aŋaai kɛ gbɛjianɔtooi ahesusumɔ mli. Amɛtee nɔ amɛjaje Nyɔŋmɔ Maŋtsɛyeli kɛtsɔ Kristo nɔ lɛ akɛ adesai ahiɛnɔkamɔ kome pɛ ni yɔɔ, shi jeee Jeŋmaji Akpaŋmɔ lɛ kɛ esɛɛyelɔ, Jeŋmaji Ekomefeemɔ lɛ, ni amɛfee nakai ni amɛgbaaa afa. Mɛɛ ‘sanesɛɛyoomɔ’ po nɛ!
16. Eyɛ mli akɛ anyɛɔ wɔnɔ ni wɔfee efɔŋ moŋ, shi mɛni wɔheɔ wɔyeɔ akɛ eji anɔkwale?
16 Kɛji akɛ Nyɔŋmɔ Wiemɔ lɛ kɛɛ wɔ mɛi ni wɔyɔɔ be ni Jeŋmaji Ekomefeemɔ lɛ yɔɔ shihilɛ mli nɛɛ mli lɛ akɛ wɔkasumɔ je lɛ mli nibii lɛ, belɛ eekɛɛ wɔ nɔ ni ji ŋwɛi akpɔi kɛha wɔ. Esa akɛ wɔsusu he akɛ nii ni ja; ni nakai amɛji hu! Wɔkɛ lala 119:128 kpaa gbee: “No hewɔ lɛ mibuɔ okpɔi lɛ fɛɛ akɛ amɛja yɛ nɔ fɛɛ nɔ gbɛfaŋ; shi minyɛ̃ɛɔ kutumpɔo gbɛ̀i fɛɛ.” Akɛni wɔŋmɛɛɛ saji ahe ni wɔkɛsaa hewɔ lɛ, je lɛŋ bii lɛ ebuŋ wɔ, shi bɔ ni Nyɔŋmɔ buɔ wɔ lɛ ji nɔ ni he hiaa. No hewɔ lɛ wɔsumɔɔɔ ni egbɛtsɔɔmɔi lɛ aje wɔjwɛŋmɔ mli.—Lala 119:141.
17. Mɛɛ gbɛkpamɔi jwere wɔhiɛ, ni te wɔɔfee tɛŋŋ wɔna ŋwɛi hebuu yɛ be mli ni shitee-kɛ-wolɔi tutuaa Yehowa webii lɛ?
17 Yɛ bɔ ni Nyɔŋmɔ Maŋtsɛyeli kɛtsɔ Kristo nɔ lɛ he shiɛmɔ lɛ mli ewa akɛ no pɛ ji adesai aje lɛ hiɛnɔkamɔ yɛ nɔ ni fe afii 60 nɛ lɛ fɛɛ sɛɛ lɛ, mɛi ni tsɔ̃ɔ jeŋ saji ahe ŋaa ni amɛtoɔ he gbɛjianɔ lɛ booo toi. Amrɔ nɛɛ adesa weku lɛ fɛɛ ni aaatsɔ nuklea tawuu nɔ akpata amɛhiɛ lɛ miiwo amɛhe gbeyei. Jeee enɛ kɛkɛ, shi mɛi ni ena jamɔ he mlifu ni amɛteɔ shi amɛwoɔ amɛ lɛ ayi efa babaoo. Yɛ be mli ni akpata apasa jamɔi sɔrɔtoi fɛɛ ahiɛ lɛ, Nyɔŋmɔ henyɛlɔi lɛ kɛ Yehowa Odasefoi baakpe agbɛnɛ. Kɛji akɛ mɛi ni teɔ shi woɔ Nyɔŋmɔ Maŋtsɛyeli lɛ ni leee Nyɔŋmɔ lɛ fa akɛ amɛaatutua Yehowa odasefoi ni amɛje mli lɛ, yelikɛbuamɔ ni fe adesa hewalɛ he baahia amɛ fe be fɛɛ. Ehe baahia ni akɛ nine wulu ko, Nyɔŋmɔ nine afɔ amɛnɔ, ni amɛhi eyibaamɔ hɔɔŋ lɛ shishi. Amɛyɛ nɔ ni amɛbaadamɔ nɔ ni amɛbi ni nakai ŋwɛi nine lɛ abaye abua amɛ, tamɔ bɔ pɛ ni atsɔɔ mli yɛ Lala 119:173 lɛ: “Too onine, ni okɛye ebua mi; ejaakɛ mihala okpɔi lɛ.” Yehowa nine efeŋ nɔ ni efo kuku ni enyɛɛɛ efee nɔ ko, ni yɛ no hewɔ lɛ enyɛɛɛ ehere mɛi ni sheɔ Nyɔŋmɔ gbeyei ni yeɔ ekpɔi lɛ anɔ lɛ yiwala yɛ shihilɛi ni mli wa fe fɛɛ lɛ amli.—Yesaia 50:2.
18. (a) Mɛni hewɔ ni aaana mɔ ko akɛ efata kuu ni ja lɛ he lɛ tsɔɔ nibii agbɛjianɔtoo nɛɛ naagbee lɛ mli ni eeeje? (b) Akɛni wɔle nɔ ni baajɛ mli aba aha mɛi ni sheɔ gbeyei lɛ hewɔ lɛ, mɛni he wɔbaajwɛŋ yɛ be fɛɛ mli.
18 Yɛ be mli ni wɔbɛŋkɛɔ nibii agbɛjianɔtoo ni yeee mla nɔ ni bɛ suɔmɔ lɛ naagbee ni yɔɔ gbeyei kwraa lɛ he, kɛ jeŋmaji lɛ amligbalamɔ, tamɔ bɔ ni tookwɛlɔ gbalaa gwantɛŋi kɛjɛɔ abotia ateŋ lɛ he nɛɛ, namɛi akuu mli wɔbaasumɔ ni ana wɔ yɛ? Yɛ mɛi ni tamɔ abotiai ni abaafolɔ amɛ kɛjɛ shihilɛ mli kwraa lɛ akuu mli, aloo gbɔmɛi ni tamɔ gwantɛŋi ni sumɔɔ Nyɔŋmɔ lɛ akuu mli? (Mateo 25:31-46) Ákɛ aaahala kuu ni ja lɛ jeee nɔ ni áfee nakai mra tsɔ. Enɛ ji be ni esa akɛ akɛhala nɔ ni lalatsɛ lɛ hala lɛ, mɔ ni kɛɛ nɛkɛ yɛ Je Muu Fɛɛ Nɔyelɔ ni Hiɛ Ka lɛ he lɛ: “Mɛi ni sheɔo gbeyei lɛ fɛɛ kɛ mɛi ni yeɔ okpɔi lɛ anɔ lɛ anaanyo ji mi.” (Lala 119:63) Wɔle nɔ ni baafee mɛi ni sheɔ Yehowa Nyɔŋmɔ gbeyei lɛ agbɛfaŋnɔ lɛ, ni wɔmiisumɔ ni wɔkɛ amɛ ana nɔ ni haa susuma tsui nyɔɔ emli lɛ mli gbɛfaŋnɔ, koni Yehowa tsui anya. Akɛni wɔsumɔɔ lɛ hewɔ lɛ, nɔ ni wɔjwɛŋɔ he waa yɛ be fɛɛ mli ji ehiɛ ni wɔɔsa kɛtsɔ nɔ ni etaoɔ yɛ wɔdɛŋ lɛ ni wɔɔfee nɔ. Lalatsɛ lɛ tsɔɔ bɔ ni wɔtswa wɔfai shi wɔha lɛ mli jogbaŋŋ akɛ: “Okpɔi lɛ ahe mijwɛŋɔ, ni mihiɛ ka ogbɛ́i lɛ ahe.”—Lala 119:15.
19. Mɛɛ naakpɛɛ nitsumɔ ko yaa nɔ bianɛ?
19 Kɛjɛ be mli ni jeŋ ta lɛ ni ji klɛŋklɛŋ nɔ̃ lɛ ba naagbee yɛ 1918 nɛɛ, Ŋwɛi Flooflo Nyɔŋmɔ lɛ etsu naakpɛɛ nitsumɔ ko yɛ je ni teɔ shi woɔ lɛ lɛ teŋ. Eji “maŋtsɛyeli lɛ he sanekpakpa nɛɛ” ni ashiɛɔ “atsɔɔ je nɛŋ fɛɛ, ni akɛye jeŋmaji lɛ fɛɛ odase,” yɛ nibii agbɛjianɔtoo momo nɛɛ ni eye afii akpei abɔ lɛ “naagbee” ni bɛŋkɛɔ lɛ hewɔ. (Mateo 24:14) Wɔmiisumɔ ni wɔkɛ lɛ ana gbɛfaŋnɔ yɛ enitsumɔi lɛ amli. Wɔmiisumɔ ni wɔfee esuɔmɔnaa nii. Wɔ sɔlemɔ ni jɛ wɔtsuiŋ tɔ̃ɔ lɛ ka he etamɔ nɔ ni yɔɔ Lala 119:27 lɛ: “Ha manu okpɔi lɛ agbɛ lɛ shishi, koni majwɛŋ onaakpɛɛ nitsumɔi lɛ ahe.”
20. Mɛɛ Nyɔŋmɔ naakpɛɛ nitsumɔi ni fe fɛɛ lɛ ateŋ ekome eshwɛ lolo ni ebaatsu he nii, ni mɛni mɛi ni abaa amɛyi lɛ baajaje yɛ Nyɔŋmɔ akpɔi lɛ ahe?
20 Nyɔŋmɔ nitsumɔi ni yɔɔ naakpɛɛ fe fɛɛ lɛ ateŋ ekome, ni kpaako ebaafee ji edasefoi anɔkwafoi kɛ anɔkwayelɔi lɛ ni eeebaa amɛyi kɛtsɔ nibii agbɛjianɔtoo nɛɛ naagbee ni baa lɛ mli kɛyabote Gbɛjianɔtoo Hee lɛ mli lɛ. (2 Petro 3:13) Ebaafee jalɛ yɛ egbɛfaŋ akɛ eeebaa amɛyi kɛtsɔ nibii agbɛjianɔtoo ni he yeɔ nɛɛ gbele lɛ mli. Ebaatsu sɔlemɔ ni jɛ mumɔŋ nɛɛ he nii eha amɛ: “Naa, miishwe okpɔi lɛ; ha miyi ana wala yɛ ojalɛ lɛ mli.” (Lala 119:40) Ha enɛ afee osɔlemɔ. Kɛkɛ lɛ, yɛ be mli ni amanehulu kpeteŋkpele ni fe fɛɛ yɛ jeŋ yinɔsane mli lɛ eho ni oyashɛ jalɛ nibii agbɛjianɔtoo hee lɛ agboi anaa lɛ, enɛ aaatsirɛ bo ni okɛ anɔkwayeli ajaje akɛ: “Mihiɛ kpaŋ okpɔi lɛ anɔ gbi ko gbi ko, ejaakɛ nomɛi anɔ otsɔ oha miyi na wala.”—Lala 119:93.a
[Shishigbɛ niŋmai]
a Ajie kɛjɛ June 15, 1984 Watchtower lɛ mli.
Kaimɔ Nii
◻ Mɛɛ “kaimɔi” ni jɛ Nyɔŋmɔ ŋɔɔ yɔɔ bianɛ kɛha bo?
◻ Te ooofee tɛŋŋ ni Nyɔŋmɔ kaimɔi Iɛ ahe aaaba sɛɛnamɔ aha bo?
◻ Mɛni ji Yehowa “akpɔi” lɛ?
◻ Mɛni hewɔ esa akɛ osumɔ akɛ oooye nɔ?
[Mfoniri ni yɔɔ baafa 25]
Nyɔŋmɔ tsuji ni yɔɔ ŋmɛnɛ lɛ yɛ “kaimɔi” babaoo ni he baaba sɛɛnamɔ aha amɛ
[Mfoniri ni yɔɔ baafa 28]
Ani ohala akɛ ooofee “gwantɛŋi” ni ‘yeɔ Nyɔŋmɔ akpɔi anɔ lɛ ahefatalɔ’?