Miishɛɛ Yɛ, Yɛ Je Ni Leee Mla Nɔ Ni Suɔmɔ Bɛ Mli Lɛ Fɛɛ Sɛɛ
“Mishɛɛ ji mɛi ni eye emuu yɛ amɛgbɛ nɔ, mɛi ni nyiɛɔ yɛ Yehowa mla lɛ mli lɛ.”—LALA 119:1, NW.
1, 2. (a) Miishɛɛ diɛŋtsɛ baa kɛjɛɔ namɔ ŋɔɔ, ni enɛ baanyɛ ahi shi kɛyashi mɛɛ be? (b) Ni eeefee “Jɔɔmɔi” moŋ lɛ, mɛni esa akɛ atsɛ Gɔŋ nɔ Shiɛmɔ lɛ shishijee wiemɔi lɛ, ni mɛni hewɔ?
1 MIISHƐƐ baa kɛjɛɔ gbɔmɔ Bɔlɔ lɛ ŋɔɔ. Lɛ ji “miishɛɛ Nyɔŋmɔ” ni hiɛ sanekpakpa kɛha wɔ. (1 Timoteo 1:11, NW) Eto naanɔ miishɛɛ efɔ shi eha ebɔɔ nii ni ji adesai ni yɔɔ shikpɔŋ nɛɛ nɔ lɛ. Amɛbaanyɛ amɛbote mli amrɔ nɛɛ po kɛtsɔ egbɛnaai lɛ ni amɛaanyiɛ sɛɛ lɛ nɔ.—Lala 119:26, 33.
2 Afii ohai nyɔŋma kɛ nɛɛhu ni eho nɛ ni Yesu Kristo, “miishɛɛ Nyɔŋmɔ” lɛ Bi lɛ ha maŋshiɛmɔ ko ni atsɛɔ lɛ akɛ Gɔŋ nɔ Shiɛmɔ lɛ. Taakɛ Mateo 5:1-12 tsɔɔ lɛ, nɛkɛ shiɛmɔ nɛɛ je shishi kɛ nɔ ni atsɛɔ lɛ akɛ “Beatitudes,” ni eshishi ji “Jɔɔmɔi” lɛ. Shi, taakɛ Hela wiemɔ ni atsɔɔ kaselɔ Mateo sane ni kɔɔ Yesu Kristo shihilɛ yɛ shikpɔŋ nɔ lɛ he lɛ shishi kɛtee mli lɛ tsɔɔ lɛ, esa akɛ atsɛ lɛ “Miishɛɛi” moŋ. Ejaakɛ Mateo sane lɛ ni yɔɔ Hebri wiemɔ mli lɛ kɛ Hebri wiemɔ ni eshishi ji “miishɛɛ” tsu nii.
3. (a) Ani Lala 119 ŋmalɔ lɛ bafee mɔ ni Ia akɛ enaa miishɛɛi krɛdɛɛi ni Yesu Kristo kɛmamɔ shi lɛ mli ŋɔɔmɔ? Tsɔɔmɔ mli. (b) Tsɔɔmɔ bɔ ni lalatsɛ lɛ nuɔ Mla kpaŋmɔ ni Mose damɔ mli lɛ he ehaa lɛ mli.
3 Nuu ko ni bafee mɔ ni sa yɛ blema akɛ enaa miishɛɛi sɔrɔtoi ni Yudanyo Mesia, Yesu Kristo kɛmamɔ shi nɛɛ mli ŋɔɔmɔ ji Yudanyo niŋmalɔ ni mumɔ yɔɔ enɔ ni ŋma Lala 119, Biblia mli lala ni kɛ fe fɛɛ lɛ. Yɛ yiŋtooi ni haa mɔ naa miishɛɛ ni Yesu Kristo tsɔɔ lɛ naa lɛ, lalatsɛ lɛ hiɛ yɛ emumɔŋ hiamɔ nii anɔ, Agbɛnɛ eji mɔ ni yeɔ ŋkɔmɔ, mɔ ni he jɔ, mɔ ni jalɛ he hɔmɔ kɛ kumai ye lɛ, eji mɔ ni naa mɔbɔ, eji mɔ ni ajɛ lɛ ni awa lɛ yi ni amale awie ehe efɔŋ fɛɛ efɔŋ. Eŋma nakai lala lɛ afii ohai babaoo dani wɔ Ŋmɛnɛŋmɛnɛ Be nɛɛ shɛ, yɛ be mli ni Israel maŋ lɛ yɔɔ Mla kpaŋmɔ ni gbalɔ Mose damɔ mli eha Yehowa Nyɔŋmɔ kɛ maŋ lɛ yɛ afi 1513 D.Ŋ.B. yɛ Sinai Gɔŋ lɛ he lɛ shishi lolo lɛ. Lalatsɛ lɛ enaŋ tɔmɔ ko yɛ Mla kpaŋmɔ lɛ he, ejaakɛ Nyɔŋmɔ ji mɔ ni kɛha. Ele jogbaŋŋ akɛ jeŋmaji ni jaa wɔji ni ebɔle Israel shikpɔŋ lɛ he lɛ bɛ nɔ ko ni abaanyɛ akɛto nakai Mla ni jɛ ŋwɛi lɛ he. Ekwɛ nakai mla lɛ akɛ nɔ ni haa mɔ leɔ nii, ni ekɛɛ yɛ kukuji 105 kɛ 130 akɛ: “Owiemɔ lɛ ji kane ha minane kɛ la hu yɛ mitempɔŋ lɛ nɔ. Owiemɔi lɛ anaagbelemɔ haa la, ehaa kwashiai leɔ nii.”
4. (a) Te ato Lala 119 naa aha tɛŋŋ, ni mɛni hewɔ enɛ yeɔ buaa lɛ? (b) Akɛni ewie “lalai awolo lɛ he hewɔ lɛ, Yesu kɛ nɔkwɛmɔ nɔ fɔ shi ha namɛi?
4 Bɔni afee ni etsu nii akɛ kaimɔ nii lɛ, lalatsɛ lɛ fee lala nɛɛ alfabɛt lala, koni lala mlijaai loo kui 22 ni Hebri wiemɔi kukuji 8 yɔɔ eko fɛɛ eko mli lɛ kɛ Hebri niŋmaa okadi aje shishi, yɛ bɔ ni ato alfabɛt naa aha lɛ, naa. No hewɔ lɛ klɛŋklɛŋ mlijaa loo ku lɛ mli kuku fɛɛ kuku ni yɔɔ klɛŋklɛŋ Hebri niŋmaa okadi Aleph shishi lɛ kɛ nakai klɛŋklɛŋ niŋmaa okadi, Aleph, lɛ jeɔ shishi. Kuku fɛɛ kuku ni yɔɔ lala mlijaa loo ku ni ji enyɔ lɛ mli lɛ kɛ Hebri niŋmaa okadi ni ji enyɔ, Beth jeɔ shishi. Nakai nɔŋŋ eyaa nɔ kɛtsɔɔ lala mlijaai loo kui 22 ni feɔ lala muu lɛ fɛɛ mli, koni ekɛ Hebri alfabɛt loo niŋmaa okaadii 22 lɛ akpa gbee. Akɛni Hebri wiemɔi kukuji 8 yɔɔ lala mlijaai loo kui 22 lɛ fɛɛ mli hewɔ lɛ, lala lɛ fɛɛ bafeɔ kukuji 176. Yesu Kristo diɛŋtsɛ wie “lalai awolo” lɛ he yɛ enitsɔɔmɔ lɛ mli. (Luka 20:42; 24:44) Efee nɔkwɛmɔ nɔ eha ekaselɔi lɛ yɛ enɛ mli.’—Bɔfoi lɛ Asaji 1:20; 13:33; 1 Korintobii 14:26; Efesobii 5:19; Kolosebii 3:16; Hebribii 4:7; Yakobo 5:13.
5. Namɔ niiashikpamɔi eeefee akɛ eyɔɔ niŋmalɔ lɛ jwɛŋmɔ mli yɛ be mli ni ejeɔ Lala 119 shishi lɛ?
5 Ŋwanejee ko bɛ he akɛ lalatsɛ lɛ ŋma kɛjɛ lɛ diɛŋtsɛ eniiashikpamɔ mli beni eje Lala 119 shishi kɛ nɛkɛ wiemɔi nɛɛ lɛ: “‘Miishɛɛ ji mɛi ni eye emuu yɛ amɛgbɛ nɔ, mɛi ni nyiɛɔ Yehowa mla lɛ mli lɛ. Miishɛɛ ji mɛi ni yeɔ edasei lɛ anɔ, . . . ni egbɛ̀i lɛ anɔ amɛnyiɛɔ. Owo akpɔi lɛ ahe kita akɛ wɔye nɔ pɛpɛɛpɛ. Mina ni ajaje migbɛ̀i lɛ, koni maye ogbɛnaai lɛ anɔ! Kɛ mihiɛ ka okitai Iɛ fɛɛ he lɛ, mihiɛ gboŋ. Mikɛ tsui ni ja aaadao shi, kɛ mikase ojalɛ tempɔŋi lɛ. Maye ogbɛnaai lɛ anɔ: kaakwa mi kwrakwra!”—Lala 119:1-8, NW.
6. (a) Mɛɛ gbɛ nɔ atsɔ aha lala lɛ mli saji otii lɛ je kpo faŋŋ yɛ? (b) Lalatsɛ lɛ ji mɛni kaselɔ, ni aye enɛ he odase yɛ mɛɛ gbɛ nɔ?
6 Wɔkadiɔ wiemɔi otii komɛi yɛ klɛŋklɛŋ lala mlijaai ni feɔ Hebri wiemɔi kukuji 8 lɛ mli tamɔ, mla, odasei, akpɔi kitai, gbɛnaai kɛ kojomɔi. Lalatsɛ lɛ maa nɛkɛ wiemɔi nɛɛ anɔ mi yɛ Hebri wiemɔi kukuji 176 lɛ fɛɛ mli. Akɛ nɔkwɛmɔ nɔ lɛ, ekɛ wiemɔ “mla” tsuɔ nii shii 25, “odasei” [kaimɔi] shii 22, “akpɔi” shii 21, “kitai” shii 21, “gbɛnaai” shii 20, “kojomɔi” shii 21, kɛ wiemɔ ni ji “kita” ni fata he ni akɛtsu nii shii enyɔ yɛ lala lɛ mli. Yɛ bɔ ni lalatsɛ lɛ kɛ nɛkɛ wiemɔi nɛɛ tsu nii shii abɔ ni baaha etamɔ mla mli wiemɔi lɛ fɛɛ sɛɛ lɛ, odaseyeli ko bɛ he ko ni tsɔɔ akɛ eji mlalelɔ looi kojolɔ. Nɔ ni eji titri ji Yehowa Wiemɔ ni aŋma afɔ shi lɛ kaselɔ, ni wiemɔ ni ji “owiemɔ” ni pueɔ shii 15 lɛ yeɔ he odase. Kɛ eji Israel maŋ lɛ nɔ maŋtsɛ lɛ, belɛ eyɛ ŋwɛi famɔ shishi akɛ lɛ diɛŋtsɛ lɛ eŋma Yehowa Mla kpaŋmɔ ni ekɛ Israel fee lɛ eko eha lɛ diɛŋtsɛ ehe ni ekase ni ekɛtsu nii. (5 Mose 17:14-18) Lalatsɛ lɛ nuuu he akɛ Yehowa “wiemɔ” lɛ kasemɔ diɛŋtsɛ, ní nɛkɛ wiemɔi nɛɛ yɔɔ ejwɛŋmɔ mli lɛ tamɔ nɔ ko ni haa etɔɔ mɔ, ejeɔ mɔ tsine. Eeshwe moŋ ni enine ashɛ nɔ ni baaye abua lɛ ni efee mɔ ni boɔ mla toi lɛ nɔ. (Lala 119:40, 131, 174) Ani wɔtamɔ lɛ lo?
7. (a) Nyɔŋmɔ mla lɛ lee kɛ ekɛ nyiɛmɔ he baa sɛɛnamɔ kɛhaa wɔ yɛ mɛɛ gbɛ nɔ? (b) “Tora” lɛ ji mɛni, shi mɛɛ gbɛjianɔtoo Kristofoi naa amɛhe yɛ shishi?
7 Kɛ wɔkɛ jeŋmaji lɛ ni yɔɔ “malemɔtsɛ,” Satan Abonsam, ni anaaa lɛ lɛ hewalɛ shishi lɛ amajimaji ateŋ mlai kɛ maŋ mlai lɛ to Yehowa mla he lɛ, wɔbaanyɛ wɔfata lalatsɛ lɛ he ni wɔkɛɛ akɛ: “Omla lɛ, anɔkwale ni. Shi bo, Yehowa, obɛŋkɛ, ni ekitai lɛ fɛɛ lɛ anɔkwale ni.” (Yohane 8:44; Lala 119:142, 151) No hewɔ lɛ, “kɛ wɔnyiɛ yɛ Yehowa mla lɛ mli” lɛ, abaabu wɔhe, tamɔ lalatsɛ lɛ, kɛjɛ tɔmɔ gbɛ ni wɔɔnyiɛ nɔ yɛ je lɛŋ ni baaye wɔ awui yɛ gbɔmɔtsoŋ kɛ mumɔŋ lɛ he. Enɛ kɛ miishɛɛ bahaa wɔ. (Lala 119:1, NW) Ehaa wɔnine shɛɔ ŋwɛi jɔɔmɔ kɛ nɔkpɛlɛmɔ nɔ. Esaa wɔtsuii ahe, tamɔ bɔ ni Lala 119:97, 126, 127 tsɔɔ lɛ. Lalatsɛ lɛ yɛ Mose Mla kpaŋmɔ lɛ ni “Tora” ni ji ŋwɛi mla ni mlai komekomei ohai abɔ yɔɔ mli lɛ shishi. Yehowa odasefoi ni afɔ amɛ mu ni yɔɔ shihilɛ mli ŋmɛnɛ lɛ yɛ kpaŋmɔ hee (ni Yesu Kristo ji Teŋdamɔlɔ) lɛ ni yɔɔ “mla” ni taakɛ eji lɛ áŋma yɛ “amɛtsui nɔ” lɛ shishi: (Yeremia 31:31-34) Kristofoi a-Hela Ŋmalɛi lɛ kasemɔ haa amɛleɔ kpaŋmɔ hee lɛ “mla” lɛ kɛ ekitai lɛ.
8. (a) Ani gbɛkpamɔ kpakpa ko yɛ kɛha je ni yeee mla nɔ nɛɛ? (b) Lalatsɛ lɛ kɛ yaafonui tsɔɔ bɔ ni esusuɔ Yudafoi lɛ ni nyɛɛɛ aye Nyɔŋmɔ Mla nɔ lɛ he lɛ mli yɛ mɛɛ gbɛ nɔ (d) Yesu gbalɛ ni kɔɔ Yerusalem ni yeee anɔkwale lɛ he lɛ ba mli yɛ mɛɛ gbɛ nɔ, ni mɛni ji nɔ ni enɛ tsɔɔ kɛha Kristendom?
8 Be ni Mlahalɔ diɛŋtsɛ lɛ, Yehowa, kɛbaafee nii ni ete shi ewo je ni yeee mla nɔ nɛɛ miibɛŋkɛ. Gbɛkpamɔi ni kɛ yaafonui baaba jwere wɔhiɛ. Lalatsɛ lɛ ni eji mɔ ni sumɔɔ Yehowa mla lɛ fo yɛ shihilɛ nɛɛ hewɔ yɛ lɛ diɛŋtsɛ egbii lɛ amli. (Lala 119:136) Beni eshwɛ gbii fioo ko ni Yesu Kristo baagbo yiwalɛ gbele akɛ lá odasefonyo lɛ, Yesu Kristo fo eshwie Yerusalem, maŋ ni diɔ blema saji asɛɛ shi amɛkuɔ mla mli lɛ nɔ. (Luka 19:41) Yɛ afii nyɔŋmai etɛ kɛ kpawo sɛɛ, yɛ be mli ni Yudafoi lɛ emua amɛ mlakwamɔ lɛ naa kɛtsɔ Yesu Kristo, Mesia lɛ ni efɔŋ ko bɛ ehe lɛ ni amɛgbe lɛ yɛ Jeŋmajiaŋbii adɛŋ lɛ nɔ lɛ, Yehowa tsu nɔ ko yɛ he. (Lala 119:126) Awerɛho nibii ni Yesu Kristo tsɔ hiɛ ena lɛ ba maŋ lɛ nɔ yɛ afi 70 Ŋ.B. Ŋmɛnɛ, nɔ ni akɛfee Yerusalem kɛ Yudafoi lɛ ni eye amɛnɔ lɛ he mfoniri lɛ kɔɔ nɔ̃ ko ni da waa he. Kristendom, eŋmɛnɛŋmɛnɛ beaŋ fa ni kuɔ mla mli lɛ da kwraa fe blema Yerusalem kɛ Israel maŋ lɛ Yehowa diɛŋtsɛ kɛ sane baawo je nɛŋ maŋkwramɔŋ gbɛjianɔtooi lɛ atsuii amli yɛ lɛ diɛŋtsɛ egbɛ nɔ, koni amɛte shi amɛwo je lɛŋ jamɔi fɛɛ, ni Kristendom, apasa Kristo Maŋtsɛyeli lɛ fata he.—Kpojiemɔ, yitso 17.
9. (a) Okɛ Kristendom lashishwiemɔ gbɛ lɛ ato Yehowa Odasefoi asubaŋ kɛ jeŋba he ni akwɛ. (b) Wɔgbɛ lɛ kɛ mɛɛ nɔkwɛmɔ nɔ kaa gbee? (d) Mɛɛ yiŋtooi ahewɔ Kristo kpooɔ Kristendom ŋmɛnɛ lɛ?
9 Ani jeŋ tai enyɔ fɛɛɛ yɛ Kristendom teŋ, ni esɔfoi lɛ miifi tai ni shwieɔ lá shi nɛɛ asɛɛ? Yɛ mɛi ni esoro amɛ kwraa yɛ mɛi ni kuɔ Nyɔŋmɔ mla kpaŋmɔ hee lɛ ni biɔ ni asumɔ nyɛmimɛi lɛ ahe lɛ, lalatsɛ lɛ wie sane ko ni fee nɔkwɛmɔ nɔ kɛha Yehowa Odasefoi ni yɔɔ ŋmɛnɛ lɛ: “Minyɛɔ apasa, ni mihiɔ; shi omla lɛ moŋ misumɔɔ.” (Lala 119:163) Eeshwe ni etsui aye emuu yɛ emla nɔ yeli mli. Etsɔɔ bɔ ni esumɔɔɔ jwɛŋmɔi enyɔnyɔ, kɛ mifee loo mikafeee su lɛ, akɛ: “Jwɛŋmɔi enyɔnyɔ-tsɛmɛi lɛ, minyɛɔ amɛ, shi omla lɛ misumɔɔ.” (Lala 119:113) Nɛkɛ ji bɔ ni Yesu Kristo nuɔ he yɛ Kristendom he ŋmɛnɛ, ejaakɛ etamɔ blema Laodikea asafo lɛ. Ebaanyɛ ekɛɛ Kristendom yɛ gbɛ ni ja nɔ akɛ: “Akɛni kulɔkulɔ oyɔɔ ni obɛ ŋanii ni obɛ kalakala hu hewɔ lɛ, mibashweo yɛ midaaŋ mashwie.” (Kpojiemɔ 3:16) Wɔnyɛŋ wɔsumɔ je ni yeee mla nɔ ni ebɛ suɔmɔ hu lɛ, ni yɛ nakai beaŋ nɔŋŋ lɛ wɔsumɔ Kristo. Wɔnyɛŋ wɔtara afabaŋ nɔ. Suɔmɔ ni mli wa ji nɔ ni esa akɛ efee hewalɛ ni yɔɔ toiboo ni wɔfeɔ wɔhaa Nyɔŋmɔ lɛ sɛɛ. Yehowa nyɛŋ ni ekɛ emumɔ lɛ atsirɛ etsulɔ ko ni etsui eye emuu yɛ ehe ni ekɛɛ nɔ ko ni hewalɛ ni yɔɔ mli lɛ shɛɛɛ enɛ: “Okitai lɛ ahe mimii shɛɔ, ejaakɛ nomɛi misumɔɔ.”—Lala 119:47.
10. (a) Mɛni wɔyɔɔ ni wɔmii baanyɛ ashɛ he taakɛ la atsɛ Lɛ hu ji lɛ? (b) Ato ni kulɛ lalatsɛ lɛ amanehulu lɛ kɛ mɛni aba, shi mɛni moŋ emɔ mli, ni mɛni jɛɔ mli baa haa wɔ?
10 Wɔmii ni aaashɛ Yehowa mla he lɛ kɛwɔ baaya yiwalaheremɔ mli. Lalatsɛ lɛ kpɛlɛ enɛ nɔ beni ekɛɛ akɛ: “Kɛ jeee omla lɛ he mimii shɛɔ lɛ, kulɛ benɛ mihiɛ ekpata momo yɛ mimanehulu lɛ mli.” (Lala 119:92) Emanehulu lɛ jeee hela ko ni kɛ gbele baa. Emanehulu lɛ ba kɛjɛ gbɔmɛi ni wóɔ amɛhe nɔ (amɛshiɔ Nyɔŋmɔ) , ni nyɛɔ lɛ ni waa eyi lɛ ŋɔɔ. Kulɛ yɛ nɔnyɛɛ nɛɛ hewɔ lɛ ebaanyɛ eŋmɛɛ he eha nɔ ni Israelbii lɛ taoɔ akɛ efee lɛ ni efee nɔ ni kɛ Yehowa suɔmɔnaa nii kpaaa gbee, eji jeee akɛ esumɔɔ Nyɔŋmɔ mla lɛ babaoo kulɛ. Belɛ mɛɛ nɔkwɛmɔ nɔ kpakpa lalatsɛ lɛ ji kɛha wɔ mɛi ni ŋmɛnɛ wɔyɔɔ nɔnyɛɛ ni jɛ je ni yeee mla nɔ kwraa aahu po akɛ eha gbɔmɛi babaoo asuɔmɔ lɛ he ejɔ yɛ nibii agbɛjianɔtoo nɛɛ naagbee nɛɛ mli lɛ shishilɛ nɛkɛ!—Mateo 24:3, 12.
11. Wɔyiwalaheremɔ jɛ mɛni mli, no hewɔ lɛ te esa akɛ wɔsusu adesai aŋaatsɔɔ loo gbɛjianɔtooi ahe wɔha tɛŋŋ?
11 Nyɔŋmɔ mla lɛ nɔ yeli pɛ nɔ wɔɔdamɔ ni wɔkpa gbɛ akɛ abaahere wɔyiwala kɛya naanɔ. Wɔmiishwe ni ahere wɔyiwala kɛya Nyɔŋmɔ gbɛjianɔtoo hee ni ji ŋwɛi hee kɛ shikpɔŋ hee lɛ mli. Lala 119, kuku 174 ni bɛŋkɛ lala lɛ naagbee lɛ tsɔɔ mli nɛkɛ kɛhaa wɔ akɛ: “Yehowa, mishwe oyiwalaheremɔ lɛ, ni omla lɛ he mimii shɛɔ.” No hewɔ lɛ, wɔkpooɔ adesa susumɔi kɛ gbɛjianɔtooi kɛha je ni yeee mlaa nɔ ni bɛ suɔmɔ nɛɛ yiwalaheremɔ lɛ.
Mla Nɔ Yeli Yiwaa Shishi
12. (a) Namɔ tsirɛɔ mɛi ni awaa “yoo” lɛ kɛ ‘eseshi lɛ ayi lɛ, ni mɛni hewɔ? (b) Ákã yiwalɔi lɛ yɛ mɛɛ gbɛ nɔ?
12 Agba Yehowa Odasefoi ayiwaa yɛ jeŋ fɛɛ yɛ nibii agbɛjianɔtoo momo ni gboɔ nɛɛ naagbee gbii nɛɛ amli yɛ okadi drako, Satan Abonsam nɔyeli ni eŋmɛɛɛ he nɛɛ shishi lɛ he sane afɔ shi. Kpojiemɔ 12:17 tsɔɔ mɛi ni ekɛ ehiɛdɔɔ baa amɛnɔ lɛ, akɛ: “Ni drako lɛ mli fu yoo lɛ, [Yehowa asafo ni tamɔ ŋa lɛ], ni eyiŋ etee ni ekɛ yoo lɛ seshibii ni eshwɛ [mɛi ni esoro amɛ yɛ Maŋtsɛyeli ni afɔ lɛ ehee lɛ he lɛ] ni yeɔ Nyɔŋmɔ kitai lɛ anɔ ni amɛhiɛ Yesu Kristo odase lɛ ayawuu.” Yiwaa lɛ baa, titri lɛ kɛjɛɔ mɛi ni jeɔ gbɛ amɛtsiɔ amɛhe kɛjɛɔ nɔ ni Nyɔŋmɔ efa akɛ atsu yɛ drako lɛ nibii agbɛjianɔtoo ni anaa ni yɔɔ shikpɔŋ nɔ lɛ naagbee gbii nɛɛ amli lɛ he lɛ adɛŋ. Yehowa ekã gbɔmɛi ni alomɔ amɛ nɛɛ ahiɛ kɛtsɔ Maŋtsɛyeli lɛ sane lɛ ni Yehowa Odasefoi jajeɔ yɛ jeŋ fɛɛ lɛ nɔ, tamɔ bɔ ni Lala 119:21 kɛɔ lɛ: “Okãa hewolɔi, ni mɛi ni duɔ gbɛ kɛjɛɔ okitai lɛ ahe lɛ; alomɔ amɛ.” Nɔ ni yɔɔ sɔrɔto kwraa ji anɔkwafoi lɛ ni nɛkɛ hewolɔi nɛɛ waa amɛyi ni amɛbɔɔ amɛ ahora ni amɛjɛɔ amɛ lɛ asane lɛ, taakɛ eji yɛ lalatsɛ lɛ sane lɛ mli lɛ: “Hewolɔi eye mihe fɛo babaoo; kɛ̃lɛ, mijeko omla lɛ sɛɛ.”—Lala 119:51.
13. (a) Nyɔŋmɔ mla lɛ nɔ yeli kɛ mɛni baa yɛ yiwalɔi lɛ aŋaatsɔɔ fɔŋ lɛ fɛɛ sɛɛ? (b) Áfee enɛ he nɔkwɛmɔ nɔ yɛ ŋmɛnɛŋmɛnɛ beaŋ yɛ mɛɛ gbɛ nɔ?
13 Akɛni amɛmiina akɛ Yehowa Odasefoi miiya nɔ amɛmiitsu nii yɛ Yehowa mla kɛha be nɛɛ mli lɛ kɛ gbeekpamɔ naa hewɔ lɛ, henɔwolɔi ni waa amɛyi lɛ bɔɔ mɔdɛŋ ni amɛkɛ Odasefoi ni yeɔ mla nɔ lɛ ashigbeemɔ aba, tamɔ bɔ ni afee he nɔkwɛmɔ nɔ yɛ lalatsɛ lɛ ni wie nɛkɛ lɛ sane lɛ mli lɛ: “Hewolɔi ni enyiɛɛɛ omla lɛ naa lɛ etsatsaa bui eha mi.” (Lala 119:85) Nɛkɛ hewolɔi ŋaatsɔlɔi nɛɛ ni aaaha amɛhiɛ agboi lɛ baaa kɛtsɔɔɔ amɛlakamɔ gbɛ̀i lɛ ahe mama ni aaakpa kɛkɛ nɔ, shi moŋ titri lɛ, kɛtsɔ Yehowa akɛ anɔkwa Nyɔŋmɔ lɛ bembuu nɔ. No hewɔ lɛ lalatsɛ lɛ baanyɛ asɔle ni mlijoomɔ ko kwraa bɛ mli akɛ: “Ha hewolɔi lɛ ahiɛ agboi, ejaakɛ kutumpɔo naa amɛba mi shi; shi mi lɛ, mijwɛŋɔ okpoi lɛ ahe.” (Lala 119:78) Yehowa kwɛɔ koni nɔkpakpa ajɛ yiwaa nɛɛ mli aba koni yiwalɔi lɛ akaná nɔ ko diɛŋtsɛ kɛmiitsɔ shishiumɔ nɔ. Ehaa sɔlemɔ ni yɔɔ Lala 119:122 lɛ hetoo: “Daamɔ mli oha otsulɔ lɛ, ni ahi aha lɛ; kaaha hewolɔi lɛ miiwa mi yi.” Gbele ni aaaba Yehowa Odasefoi fɛɛ nɔ yɛ Benito Mussolini kɛ Adolf Hitler yiwalɛ nɔyelii lɛ ashishi lɛ miiwo amɛhe gbeyei, shi akɛni amɛhiɛ kpaaa amɛnyɔŋmɔ lɛ mlai kɛ ekitai anɔ hewɔ lɛ, amɛdamɔ shi shiŋŋ, ni amɛteŋ mɛi pii je mli. Mɛi ni je mli lɛ baanyɛ awiɛ yɛ wiemɔi ni yɔɔ Lala 119:60, 61 lɛ naa: “Mifee oya ni maye okitai lɛ anɔ, ni mishashaooo shi. Mɛi fɔji akpaai lɛ efimɔ mi; shi mihiɛ kpako omla lɛ nɔ.” Nyɔŋmɔ Ofe lɛ nyɛɔ efolɔɔ kpãai ni e-Dasefoi lɛ ahenyɛlɔi kɛfimɔ amɛ he lɛ amli eshwieɔ, koni eha etsuji lɛ aye amɛhe yɛ ebe ni sa mli kɛha nitsumɔ ni ekɛwo amɛdɛŋ akɛ amɛtsu yɛ nibii agbɛjianɔtoo nɛɛ naagbee lɛ mli lɛ.
14. (a.) Mɛni efee Yehowa Odasefoi aniiashikpamɔ, tamɔ lalatsɛ lɛ nɔ̃, ni mɛni ejɛ mɔdɛŋ ni amɛhenyɛlɔi lɛ bɔ lɛ mli eba? (b) Namɛi nyaa loo amɛmli filiɔ amɛ yɛ amɛ amanehului amli, ni mɛni hewɔ?
14 Taakɛ ewiemɔi ni yɔɔ Lala 119:84, 86, 161 lɛ tsɔɔ lɛ, lalatsɛ lɛ tsɔ yiwaai babaoo mli yɛ lɛ diɛŋtsɛ emaŋbii adɛŋ. Yehowa Odasefoi ena nɔ̃ pii yɛ Kristendom mli kɛ esɛɛ fɛɛ yɛ hei ni agu amɛnitsumɔ lɛ yɛ bianɛ lɛ. Shi kɛlɛ, henyɛlɔ lɛ nine enyɛ shi yɛ eyiŋtoo fɔŋ ni ejaaa ni ekɛwaa amɛyi nɛɛ mli! Henyɛlɔ lɛ hiɛ feɔ lɛ yaa, ejaakɛ Odasefoi lɛ ni “nyiɛ Yehowa mla lɛ mli lɛ” ni “amɛyeɔ ekitai anɔ lɛ” amli filiɔ amɛ yɛ amanehului ni amɛnaa yɛ Yehowa Nyɔŋmɔ kɛ Kristo hewɔ lɛ mli. Akaiɔ amɛ nɔ ni Yesu Kristo wie yɛ miishɛɛ sɔrɔtoi ni eto naa lɛ mli lɛ: “Miishɛɛ ji nyɛ, ohiafoi lɛ, ejaakɛ nyɛnɔ̃ ji Nyɔŋmɔ maŋtsɛyeli lɛ. Miishɛɛ ji nyɛ, kɛji mɛi aaanyɛnyɛ ni amɛkɛnyɛ aaatsɛrɛ mli ni amɛaajɛ nyɛ, ni amɛaagbe nyɛgbɛ́i akɛ gbɛ́i fɔŋ ‘yɛ gbɔmɔ Bi lɛ hewɔ lɛ, nyɛnyaa yɛ nakai gbi lɛ nɔ ni nyɛtumɔa; ejaakɛ naa, nyɛnyɔmɔwoo fa yɛ ŋwɛi; ejaakɛ nakai nɔŋŋ amɛtsɛmɛi lɛ fee gbalɔi [ni lalatsɛ lɛ fata he] lɛ.” (Lala 119:1, 2; Luka 6:20, 22, 23) Akɛni amɛnaa nɔ ni Yehowa sumɔɔ lɛ mli gbɛfaŋnɔ hewɔ lɛ, Odasefoi ni awaa amɛyi lɛ yaa nɔ amɛhaa “mla lɛ daa agbo ni amɛwoɔ hiɛ nyam.”—Yesaia 42:21, NW.
[Shishigbɛ niŋmai]
a Ajie kɛjɛ June 15, 1984 Watchtower lɛ mli.
Lala 119 Mli Sɛɛnamɔi
◻ Te ato Lala 119 he gbɛjianɔ aha tɛŋŋ, ni mɛni hewɔ?
◻ Mɛɛ wiemɔi krɛdɛɛ lalatsɛ lɛ kɛtsu nii shii abɔ?
◻ Akɛni wɔtamɔɔɔ Kristendom hewɔ lɛ, te wɔnuɔ Nyɔŋmɔ mla lɛ he wɔhaa tɛŋŋ?
◻ Mɛni esa akɛ wɔsumɔ, yɛ Kristofoi ayi ni awaa lɛ fɛɛ sɛɛ?
[Mfoniri ni yɔɔ baafa 20]
Lalatsɛ lɛ le jogbaŋŋ akɛ Nyɔŋmɔ Wiemɔ lɛ lee kɛ ehe nitsumɔ baanyɛ ekɛ miishɛɛ aba
[Mfoniri ni yɔɔ baafa 22]
Yehowa Odasefoi lɛ ateŋ mɛi pii damɔ shi shiŋŋ ni amɛje Nazi yiwaa lɛ mli. Amɛbaanyɛ amɛkɛ miishɛɛ akɛɛ akɛ: “Mihiɛ kpaaa omla lɛ nɔ”