Ani Nyɔŋmɔ Le Bo Lɛlɛŋ?

“Yehowa, . . . ole migbɛ́i fɛɛ.”​—LALA 139:​1, 3.

 1. Te henumɔ ni mɛi naa akɛ ‘mɛi krokomɛi nuuu yeyeeye-feemɔi, naagbai, kɛ nɔnyɛɛi ni wɔkɛkpeɔ lɛ ashishi’ lɛ egbɛ eshwa eha tɛŋŋ?

ANI mɔ ko nuɔ yeyeeye-feemɔi, nɔnyɛɛi, kɛ naagbai ni okɛkpeɔ lɛ ashishi diɛŋtsɛ? Gbɔmɛi akpekpei abɔ yɛ je lɛŋ fɛɛ, gbekɛbii kɛ onukpai fɛɛ, ni amɛbɛ weku aloo wekumɛi ni susuɔ nɔ ni baa amɛnɔ lɛ he. Yɛ wekui amli po lɛ, ŋamɛi pii​—hɛɛ, kɛ wumɛi hu​—nuɔ he akɛ amɛgbalashihilɛ mli hefatalɔi lɛ nuuu nɔnyɛɛi ni jwere amɛnɔ lɛ shishi. Bei komɛi lɛ, amɛkɛ nijiaŋwujee wieɔ akɛ: “Shi bo lɛ onuuu shishi!” Ni obalaŋtai babaoo hu muɔ sane naa akɛ mɔ ko mɔ ko nuuu amɛ hu shishi. Shi kɛlɛ, mɛi komɛi yɛ mɛi ni taoɔ ni mɛi krokomɛi anu amɛ shishi babaoo lɛ ateŋ ni sɛɛ mli lɛ amɛshihilɛ ebatsɔ nɔ ni shishinumɔ babaoo yɔɔ mli. Mɛɛ gbɛ nɔ etsɔɔ ebaa lɛ nakai?

 2. Mɛni baanyɛ aye abua Yehowa jalɔi ni amɛshihilɛ afee nɔ ni haa mɔ tsui nyɔɔ emli waa?

² Nɔ hewɔ ji akɛ, ekɔɔɔ he eko akɛ amɛnanemɛi adesai nuɔ amɛhenumɔi ashishi aloo amɛnuuu shishi, amɛyɛ hekɛnɔfɔɔ akɛ Nyɔŋmɔ nuɔ nibii ni baa amɛnɔ lɛ shishi, ni ákɛ etsuji lɛ, esaaa akɛ amɛkome pɛ amɛkpeeɔ amɛnaagbai lɛ anaa. (Lala 46:⁠2) Kɛfata he lɛ, Nyɔŋmɔ Wiemɔ lɛ kɛ yelikɛbuamɔ ni jɛɔ Kristofoi onukpai ni kpaa nii ashi lɛ aŋɔɔ lɛ yeɔ ebuaa amɛ ni amɛkwɛɔ nii kɛtekeɔ amɛ diɛŋtsɛ amɛnaagbai lɛ. Ŋmalɛi lɛ yeɔ ebuaa amɛ ni amɛnaa akɛ amɛ anɔkwa sɔɔmɔ lɛ jara wa waa yɛ Nyɔŋmɔ hiɛ, ni ákɛ wɔsɛɛ be ko ni yɔɔ shweshweeshwe yɛ kɛha mɛi ni kɛ amɛhiɛnɔkamɔ woɔ emli, kɛ gbɛjianɔ ni eto kɛtsɔ Yesu Kristo nɔ lɛ hu mli lɛ.​—Abɛi 27:​11; 2 Korintobii 4:​17, 18.

 3, 4. (a) Mɛɛ gbɛ nɔ kpɛlɛmɔ ni wɔɔkpɛlɛ anɔkwale nɛɛ nɔ akɛ “Yehowa lɛ, lɛ ji Nyɔŋmɔ” ni lɛ “efee wɔ” lɛ baanyɛ aye abuɔ wɔ ni wɔna miishɛɛ yɛ esɔɔmɔ mli? (b) Mɛni hewɔ wɔyɔɔ hekɛnɔfɔɔ kwraa, yɛ Yehowa kwɛmɔ ni suɔmɔ yɔɔ mli lɛ mli lɛ.

³ Ekolɛ ole Lala 100:2 lɛ jogbaŋŋ, he ni kɛɔ akɛ: “Nyɛsɔmɔa Yehowa kɛ miishɛɛ, nyɛbaa ehiɛ kɛ nyamɔ lala!” Mɛi enyiɛ kɛ jamɔ haa Yehowa yɛ nakai gbɛ nɔ lɛlɛŋ? Ahaa wɔ yiŋtoi kpakpai ni wɔɔdamɔ nɔ wɔfee nakai yɛ kuku 3, he ni kaiɔ wɔ akɛ: “Nyɛnaa nyɛlea akɛ Yehowa lɛ, lɛ ji Nyɔŋmɔ. Lɛ efee wɔ, ni lɛ enii ji wɔ, emaŋ kɛ elɛɛhe lɛ tooi ji wɔ.” Yɛ Hebri niŋmaa lɛ mli lɛ, awieɔ ehe loo atsɛɔ lɛ yɛ jɛmɛ akɛ ‘Elo·him’ ni atsɔɔ nakai gbɛ nɔ atsɔɔ bɔ ni eje agbo eha yɛ anunyam, woo, kɛ enɔwomɔ mli. Lɛ ji anɔkwa Nyɔŋmɔ koome lɛ. (5 Mose 4:​39; 7:9; Yohane 17:⁠3) Etsuji baleɔ e-Nyɔŋmɔyeli lɛ, jeee ákɛ anɔkwa sane ko ni atsɔɔ amɛ kɛkɛ, shi moŋ akɛ nɔ ko ni amɛnaa mli niiashikpamɔ, ni amɛyeɔ he odase hu kɛtsɔɔ toiboo, hekɛnɔfɔɔ, kɛ hetuu-kɛhamɔ nɔ.​—1 Kronika 28:9; Romabii 1:⁠20.

⁴ Akɛni Yehowa ji Nyɔŋmɔ hiɛkalɔ lɛ, ni enyɛɔ enaa wɔtsui hewɔ lɛ, akɛ nɔ ko eteee lɛ ni enaaa. Ele nibii ni yaa nɔ yɛ wɔshihilɛi amli lɛ jogbaŋŋ. Ele nibii ni kɛ naagbai ni wɔkɛkpeɔ lɛ baa, kɛ agbɛnɛ jwɛŋmɔŋ kɛ henumɔŋ haomɔi ni jɛɔ nɛkɛ naagbai nɛɛ amli baa. Akɛ Bɔlɔ lɛ, ele wɔ jogbaŋŋ fe bɔ ni wɔ diɛŋtsɛ wɔle wɔhe. Ele bɔ ni eeefee eye ebua wɔ hu ni wɔkpee wɔshihilɛ lɛ naa, kɛ bɔ ni eeefee eha wɔ heyeli ni hiɔ shi daa. Ebaajɛ suɔmɔ mli eye ebua wɔ​—tamɔ tookwɛlɔ hiɛɔ toobi yɛ ekpɔkɔiaŋ lɛ​—beni wɔkɛ wɔhe fɔɔ enɔ kɛ wɔtsui fɛɛ lɛ. (Abɛi 3:​5, 6; Yesaia 40:​10, 11) Lala 139 hesusumɔ baanyɛ afee babaoo kɛwo nakai hekɛnɔfɔɔ lɛ mli hewalɛ.

Mɔ ni Naa Wɔgbɛi Fɛɛ Lɛ

 5. Mɛni ‘wɔmli ni Yehowa taoɔ’ lɛ tsɔɔ, ni mɛni hewɔ wɔnaa nakai feemɔ he miishɛɛ lɛ?

⁵ Lalatsɛ David kɛ hiɛsɔɔ ni mli kwɔ ŋma akɛ: “Yehowa, otaoɔ mimli, ni ole mi.” (Lala 139:⁠1) David yɛ hekɛnɔfɔɔ akɛ bɔ ni Yehowa le lɛ eha lɛ jeee hiɛaŋhiɛaŋ nɔ̃ kɛkɛ. Nyɔŋmɔ enaaa David tamɔ bɔ ni ekolɛ adesai naa lɛ amɛhaa, ni amɛyooɔ ekwɔlɛ yɛ gbɔmɔtsoŋ, nyɛmɔi ni eyɔɔ yɛ wiemɔ mli, aloo bɔ ni ele saŋkutswaa jogbaŋŋ lɛ. (1 Samuel 16:​7, 18) Yehowa ‘etao’ David mligbɛ gbɔmɔ lɛ ‘mli’ jogbaŋŋ, ni efee nakai yɛ suɔmɔ mli ni ejɛɔ esusuɔ emumɔŋ hilɛ-kɛhamɔ he lɛ mli. Kɛji Yehowa tsuji ni etuu amɛhe amɛha lɛ lɛ ateŋ mɔ ko ji bo lɛ, no lɛ ele bo jogbaŋŋ tamɔ bɔ ni ele David lɛ pɛpɛɛpɛ. Ani enɛ kanyaaa hiɛsɔɔ kɛ bulɛ henumɔi yɛ omli?

 6. Mɛɛ gbɛ nɔ Lala 139:​2, 3 tsɔɔ yɛ akɛ Yehowa le nɔ fɛɛ nɔ ni wɔfeɔ, kɛ wɔsusumɔi po?

⁶ Yehowa naa nibii ni David feɔ lɛ fɛɛ faŋŋ, ni David le enɛ. Lalatsɛ lɛ ŋma akɛ: “Ole mishitamɔ kɛ mishitee mli fɛɛ; oyooɔ miyiŋtoo yɛ shɔŋŋ beebe. Otaoɔ minyiɛmɔ kɛ mishikamɔ fɛɛ mli; ni ole migbɛ́i fɛɛ.” (Lala 139:​2, 3) Anɔkwale ni eji akɛ Yehowa yɛ ŋwɛi, ni ekɛ shikpɔŋ lɛ teŋ jɛkɛ waa lɛ etsiii enaa ni ekale nɔ ni David feɔ aloo nɔ ni esusuɔ he. ‘Etao,’ aloo eje gbɛ epɛi David nifeemɔi fɛɛ amli jogbaŋŋ, shwane kɛ nyɔɔŋ fɛɛ, bɔni afee ni ele bɔ ni amɛji.

 7. (a) Okɛ nibii ni ba yɛ David shihilɛ mli lɛ afee nɔdaamɔ nɔ ni okɛwie wɔshihilɛ mli nibii komɛi ni Nyɔŋmɔ le lɛ ahe. (b) Te esa akɛ le ni wɔle enɛ lɛ asa wɔhe aha tɛŋŋ?

⁷ Beni suɔmɔ ni eyɔɔ kɛha Nyɔŋmɔ kɛ hekɛnɔfɔɔ ni eyɔɔ yɛ E-kpɔmɔ hewalɛ lɛ mli lɛ tsirɛ David akɛ obalanyo, koni ekɛ ehe aha ni ekɛ Filistinyo obalaŋ Goliat ayanɔ lɛ, Yehowa le enɛ. (1 Samuel 17:​32-37, 45-47) Yɛ sɛɛ mli, beni nyɛɛ ni jɛ adesai aŋɔɔ ha David tsui ye awerɛho babaoo, ní nɔnyɛɛ lɛ naa wa aahu akɛ ehaa efoɔ nyɔɔŋ nyɔɔŋ fɛɛ lɛ, le ni ena ele akɛ Yehowa ebo efaikpamɔi atoi lɛ shɛje emii. (Lala 6:​7, 10; 55:​3-6, 23) Nakai nɔŋŋ hu beni tsui ni eyi obɔ kɛ shidaa ha David jwɛŋ Yehowa he beni enyɛɛɛ ewɔ nyɔɔŋ lɛ, Yehowa le enɛ jogbaŋŋ. (Lala 68:7; okɛto Filipibii 4:​8, 9 he.) Gbi ko gbɛkɛ beni David kwɛ enaanyo ko ŋa ni miiju ehe lɛ, Yehowa le enɛ hu, ni ena nɔ ni ba, beni yɛ be kukuoo po sɛɛ lɛ, David ŋmɛ eshafeemɔ akɔnɔ gbɛ ni ejie Nyɔŋmɔ kwraa kɛjɛ esusumɔi amli lɛ. (2 Samuel 11:​2-4) Sɛɛ mli, beni atsu gbalɔ Natan koni eya David ŋɔɔ ni eyakɛɛ lɛ bɔ ni esha ni efee lɛ mli wa ha lɛ, jeee nu kɛkɛ Yehowa nu wiemɔi ni je kpo kɛjɛ David daaŋ lɛ, shi moŋ eyoo tsui ni eshwa ehe ni amɛje kpo kɛjɛ mli lɛ hu. (2 Samuel 12:​1-14; Lala 51:​3, 19) Ani esaaa ni enɛ haa wɔsusuɔ hei ni wɔyaa, nibii ni wɔfeɔ, kɛ nibii ni yɔɔ wɔtsui mli lɛ he jogbaŋŋ?

 8. (a) Mɛɛ gbɛ nɔ ‘wiemɔi ni yɔɔ wɔlilɛi nɔ’ lɛ naa wɔshidaamɔ yɛ Nyɔŋmɔ hiɛ lɛ nɔ hewalɛ yɛ? (b) Mɛɛ gbɛ nɔ abaanyɛ aye lilɛi lɛ kɛ nitsumɔ mli gbɔjɔmɔi anɔ yɛ? (Mateo 15:​18; Luka 6:⁠45)

⁸ Akɛni Nyɔŋmɔ le nɔ fɛɛ nɔ ni wɔfeɔ hewɔ lɛ, esaaa akɛ efeɔ wɔ naakpɛɛ akɛ ele bɔ ni wɔkɛ wɔgbɔmɔtso lɛ he nɔ ko bibioo tamɔ lilɛi lɛ po tsuɔ nii wɔhaa. Maŋtsɛ David yoo enɛ, ni eŋma akɛ: “Ejaakɛ wiemɔ ko wiemɔ ko bɛ mililɛi nɔ ni bo, Yehowa, oleee fɛɛ.” (Lala 139:⁠4) David le jogbaŋŋ akɛ mɛi ni abaahere amɛ hiɛmɛɛ akɛ gbɔi yɛ Yehowa buu lɛ mli lɛ baafee gbɔmɛi ni yeee mɛi krokomɛi ahe osheku kɛ mɛi ni kɛ amɛlilɛi tsuuu nii ni amɛkɛaagbɛ osheku wiemɔi ni awo he kɛ ŋɔɔmɔ ni kɛ heguɔgbee baaba amɛnaanyo ko ni bɛŋkɛɔ amɛ kpaakpa nɔ lɛ amɛshwã lɛ. Mɛi ni Yehowa baaduro amɛ lɛ baafee gbɔmɛi ni jɛɔ amɛtsui mli po tɔ̃ɔ amɛwieɔ anɔkwale. (Lala 15:​1-3; Abɛi 6:​16-19) Wɔteŋ mɔ ko kwraa bɛ ni nyɛɔ ekudɔɔ elilɛi jogbaŋŋ kɛmɔɔ shi, shi David kɛ gbɔjɔmɔ emuuu sane naa akɛ nɔ ko kwraa bɛ ni ebaanyɛ efee ni ekɛha eshihilɛ aya hiɛ. Ekɛ be babaoo tsu nii ni ekɛfolɔ yijiemɔ lalai ni ela eha Yehowa. Ejɛ esuɔmɔ mli hu ekpɛlɛ bɔ ni yelikɛbuamɔ he ehia lɛ lɛ nɔ ni esɔle eha Nyɔŋmɔ kɛha enɛ. (Lala 19:​13-15) Ani ehe miihia ni wɔtsɔ sɔlemɔ nɔ wɔsusu bɔ ni wɔkɛ wɔlilɛi tsuɔ nii wɔhaa lɛ he?

 9. (a) Nɔ ni awie yɛ Lala 139:5 lɛ tsɔɔ mɛni yɛ bɔ ni Nyɔŋmɔ le wɔshihilɛ jogbaŋŋ ha lɛ he? (b) Enɛ haa wɔnaa hekɛnɔfɔɔ yɛ mɛni he?

⁹ Jeee gbɛ bibioo pɛ nɔ Yehowa naa wɔ loo shihilɛ ni wɔyɔɔ mli lɛ yɛ. Enyɛɔ enaa wɔ jogbaŋŋ kɛmɔɔ shi, kɛjɛɔ he fɛɛ he. Beni ekɛ maŋ ni awo he ka feɔ he nɔkwɛmɔ nɔ lɛ, David ŋma akɛ: “Osá miyi yɛ sɛɛ kɛ hiɛ fɛɛ.” Yɛ David gbɛfaŋ lɛ, Nyɔŋmɔ jeee henyɛlɔ ni bawoɔ mɔ he ka; shi moŋ, eji kwɛlɔ ni buɔ mɔ he. David kɛfata he akɛ: “Okɛ onine efɔ minɔ,” ni ekɛtsɔɔ Nyɔŋmɔ nɔkwɛmɔ kɛ ehebuu ni ejieɔ lɛ kpo kɛhaa mɛi ni sumɔɔ lɛ lɛ anaanɔ sɛɛnamɔ. David kpɛlɛ nɔ akɛ: “Nɛkɛ nilee nɛɛ miifee mi naakpɛɛ tsɔ, ekwɔ tsɔ, mishɛɛɛ he.” (Lala 139:​5, 6) Bɔ ni Nyɔŋmɔ le etsuji lɛ jogbaŋŋ kwraa ha aahu lɛ haŋ wɔnyɛ wɔnu shishi kɛmɔ shi. Shi wɔle nibii saŋŋ ni baanyɛ aha wɔna hekɛnɔfɔɔ akɛ Yehowa nuɔ wɔ shishi lɛlɛŋ, ni yelikɛbuamɔ hu ni ekɛhaa wɔ lɛ ji ekpakpa fe fɛɛ ni wɔɔná.​—Yesaia 48: 17, 18.

He Fɛɛ He ni Wɔyɔɔ lɛ, Nyɔŋmɔ Baanyɛ Aye Abua Wɔ

10. Mɛɛ anɔkwale ko ni woɔ mɔ hewalɛ yɔɔ sane mlitsɔɔmɔ fitsofitso ni yɔɔ Lala 139:​7-12 lɛ mli?

¹⁰ Beni esusuɔ Yehowa suɔmɔ kwɛmɔ lɛ he yɛ gbɛ kroko nɔ lɛ, lalatsɛ lɛ tee nɔ akɛ: “Nɛgbɛ maje omumɔ lɛ hiɛ kɛaatee, ni nɛgbɛ majo foi kɛaajɛ ohiɛ kɛaatee?” Ebɛ he suɔmɔ akɛ eeebɔ mɔdɛŋ etsi ehe kɛjɛ Yehowa he; shi moŋ, ele akɛ he fɛɛ he ni eeehi lɛ, Yehowa baale, ni ebaanyɛ etsɔ emumɔ krɔŋkrɔŋ lɛ nɔ eye ebua lɛ. Etee nɔ akɛ: “Kɛ́ mikwɔ kɛtee ŋwɛi lɛ, oyɛ jɛi, ni kɛ miyaŋmɛ misaa yɛ gbohiiaje hu, naa bo! Kɛji miŋɔ leebi fiji ni miyahi ŋshɔ sɛɛ shɔŋŋ lɛ, jɛi tete lɛ onine aaawa mi, ni oninejurɔ aaamɔ mimli tswɛ. Ní kɛ mikɛɛ: ‘Duŋ sɔŋŋ abaha minɔ,’ ni la ni bɔle mihe lɛ atsɔ duŋ lɛ, no lɛ duŋ hu wooo duŋ yɛ ohiɛ, ni nyɔɔŋ tseɔ heŋŋ tamɔ shwane nɔŋŋ; duŋ jio, la jio, fɛɛ lɛ ekome ni yɛ ohiɛ!” (Lala 139:7-12) He ko kwraa bɛ ni wɔbaanyɛ wɔya, ní shihilɛ ko hu bɛ ni wɔkɛbaakpe ni haŋ Yehowa anyɛ ana wɔ aloo ni emumɔ lɛ nyɛŋ ashɛ jɛmɛ ni eye ebua wɔ.

11, 12. (a) Eyɛ mli akɛ Yona hiɛ kpa nɔ yɛ be ko mli moŋ, shi afee bɔ ni Yehowa nyɛɔ enaa ni eyeɔ ebuaa hu lɛ he nɔkwɛmɔ nɔ yɛ Yona sane lɛ mli yɛ mɛɛ gbɛ nɔ? (b) Mɛɛ gbɛ nɔ esa akɛ Yona niiashikpamɔ lɛ he aba sɛɛnamɔ aha wɔ yɛ?

¹¹ Eshɛ be ko ni gbalɔ Yona hiɛ kpa enɛ nɔ kwraa. Yehowa kɛ nitsumɔ ewo edɛŋ akɛ eya ni eyashiɛ etsɔɔ gbɔmɛi ni yɔɔ Ninive lɛ. Yɛ yiŋtoo ko hewɔ lɛ, enu he akɛ enyɛŋ etsu nakai nitsumɔ lɛ he nii. Ekolɛ yɛ gbɛi gbonyo ni Ashurbii lɛ ena akɛ yiwalɔi lɛ hewɔ lɛ, Ninive ni Yona yaasɔmɔ yɛ lɛ he susumɔ wo ehe gbeyei. No hewɔ lɛ eka akɛ ebaaya eyatee ehe. Beni etee lɛlɛ daamɔhe lɛ yɛ Yopa lɛ, enine yashɛ wolo nɔ ní ekɛkwɔ lɛlɛ ko ni miiya Tarshish (ni afɔɔ wiemɔ akɛ eyɔɔ Spania lɛ, fe shitoi 2,200 yɛ Ninive anaigbɛ). Shi kɛlɛ, Yehowa na akɛ ekwɔ lɛlɛ lɛ ni etee eyakã shi ewɔ yɛ lɛlɛ lɛ shishi. Nyɔŋmɔ le he ni Yona yɔɔ hu beni yɛ sɛɛ mli lɛ ashɛ lɛ afɔ ŋshɔ lɛ mli lɛ, ni Yehowa nu Yona he beni ejɛ ŋshɔŋ loo agbo lɛ musuŋ ewo shi akɛ ebaaye eshiwooi lɛ anɔ lɛ. Beni abajie lɛ afɔ shikpɔŋ gbiŋ nɔ ekoŋŋ lɛ, aha Yona hegbɛ ekoŋŋ koni ekɛyatsu nitsumɔ ni aha lɛ lɛ.​—Yona 1:3; 2:1; 3:⁠4.

¹² Kwɛ bɔ ni kulɛ ebaahi jogbaŋŋ eha Yona kɛjɛ shishijee akɛ ekɛ ehe afɔ Yehowa mumɔ lɛ nɔ ni eye ebua lɛ ni etsu nitsumɔ ni aha lɛ lɛ! Shi, sɛɛ mli lɛ, Yona kɛ heshibaa ŋma eniiashikpamɔ nɛɛ, ni nakai nii ni eŋma efɔ shi lɛ eye ebua mɛi pii kɛjɛ nakai beaŋ kɛbaa ni amɛjie Yehowa mli hekɛnɔfɔɔ ni ewa waa kɛha Yona akɛ eeena lɛ kpo.​—Romabii 15:⁠4.

13. (a) Mɛɛ nitsumɔi Elia kɛ anɔkwayeli etsu momo dani ejo foi kɛjɛ Maŋnyɛ Yezebel hiɛ lɛ? (b) Mɛɛ gbɛ nɔ Yehowa ye ebua Elia yɛ, beni etao po ni eyatee ehe yɛ he ko ni bɛ Israel shikpɔŋ nɔ lɛ?

¹³ Elia niiashikpamɔ lɛ yɛ sɔrɔto fioo yɛ enɛ he. Ekɛ anɔkwayeli ejaje akpɔ ni Yehowa ewo akɛ nu hɔmɔ baaba Israel akɛ toigbalamɔ yɛ amɛhe eshai lɛ ahewɔ lɛ etsɔɔ amɛ. (1 Maŋtsɛmɛi 16:​30-33; 17:⁠1) Ekɛ ekaa efi anɔkwa jamɔ sɛɛ yɛ mpleshii ko ni ba Yehowa kɛ Baal teŋ yɛ Karmel Gɔŋ lɛ nɔ lɛ mli. Ni etee nɔ egbe Baal gbalɔi 450 hu yɛ Kishon jɔɔ lɛ mli. Shi beni Maŋnyɛ Yezebel kɛ mlifu kã kita akɛ ebaaha agbe Elia lɛ, Elia jo foi kɛshi nakai maŋ lɛ mli. (1 Maŋtsɛmɛi 18:​18-40; 19:​1-4) Ani Yehowa yɛ jɛmɛ ni ebaaye ebua lɛ yɛ nakai jaramɔ be lɛ mli? Hɛɛ, eyɛ. Eji Elia kwɔ gɔŋ ko ni nɔ kwɔ, tamɔ nɔ ni etee ŋwɛi; eji eyatee ehe yɛ tɛkplo ko mli yɛ shikpɔŋ lɛ mli, tamɔ nɔ ni etee gbohiiaje; eji ejo foi kɛtee ŋshɔkpɔ ko nɔ yɛ he ko banee tamɔ jetsɛremɔ la kpɛmɔ gbɛɔ shwaa shikpɔŋ lɛ nɔ lɛ kulɛ​—Yehowa nine baahi jɛmɛ ni ewo lɛ hewalɛ ni enyiɛ ehiɛ. (Okɛto Romabii 8:​38, 39 he.) Ni Yehowa wo Elia hewalɛ hu, jeee kɛ niyenii ni ekɛbaafa gbɛ lɛ kɛkɛ, shi moŋ kɛ E-nitsumɔ hewalɛ lɛ kpojiemɔi ni yɔɔ naakpɛɛ hu. Akɛni awaje lɛ nɛkɛ hewɔ lɛ, Elia tee nɔ etsu egbalɛ nitsumɔ ni tsa nɔ lɛ.​—1 Maŋtsɛmɛi 19:​5-18.

14. (a) Mɛni hewɔ ejaaa akɛ aaamu sane naa akɛ Nyɔŋmɔ yɛ he fɛɛ he lɛ? (b) Mɛɛ shihilɛi amli nɛkɛ Yehowa ejɛ suɔmɔ mli ewaje etsuji yɛ ŋmɛnɛŋmɛnɛ beaŋ? (d) Mɛɛ gbɛ nɔ ebaalɛ yɛ akɛ kɛ wɔyɛ gbohiiaje po, Nyɔŋmɔ baahi jɛmɛ?

¹⁴ Gbalɛ wiemɔi ni yɔɔ Lala 139:​7-12 lɛ etsɔɔɔ akɛ Nyɔŋmɔ yɛ he fɛɛ he, ni tsɔɔ akɛ lɛ diɛŋtsɛ eyɛ hei fɛɛ yɛ bei fɛɛ mli. Ŋmalɛi lɛ tsɔɔ faŋŋ akɛ jeee nakai kwraa eji. (5 Mose 26:​15; Hebribii 9:24) Ni kɛlɛ, etsuji anine shɛɔ enɔ be fɛɛ be. Enɛ ji anɔkwale yɛ mɛi ni amɛ teokrase nitsumɔi kɛ amɛ etee maŋsɛɛ hei ni yɔɔ shɔŋŋ lɛ ahe. Enɛ ba mli lɛlɛŋ yɛ Odasefoi anɔkwafoi lɛ ahe yɛ Nazi gbokɛlɛfoi aŋsaraiaŋ yɛ Jeŋ Ta II mli, ni eba mli hu yɛ maŋsɛɛ sanekpakpa shiɛlɔi ni atsi amɛnaa yɛ tsuŋwoo mli yɛ China yɛ 1950 afii lɛ naagbee gbɛ kɛ 1960 afii lɛ shishijee gbɛ lɛ hu agbɛfaŋ. Eji anɔkwale hu yɛ wɔsuɔmɔ nyɛmimɛi hii kɛ yei ni jɛ Afrika Teŋgbɛ maŋ ko nɔ, ni ebalɛ akɛ esa akɛ amɛjo foi shii abɔ kɛshi amɛ akrowai, aloo kɛshi maŋ lɛ mli po lɛ ahe. Kɛ ehe miihia lɛ, Yehowa nine baashɛ Sheol, kwamaŋ gbonyo bu lɛ mli tɔ̃ɔ, ni ekɛ anɔkwafoi lɛ baaba ekoŋŋ kɛtsɔ gbohiiashitee nɔ.​—Hiob 14:​13-15; Luka 20:​37, 38.

Mɔ ni Nuɔ Wɔ Shishi Lɛlɛŋ Lɛ

15. (a) Kɛjɛ mɛɛ mra be mli Yehowa nyɛ ena nibii ni kɔɔ wɔhe lɛ fɛɛ afeemɔ yɛ? (b) Sabai ni lalatsɛ lɛ tsĩ ta lɛ tsɔɔ bɔ ni Nyɔŋmɔ le wɔ jogbaŋŋ eha lɛ mli yɛ mɛɛ gbɛ nɔ?

¹⁵ Yɛ mumɔ tsirɛmɔ naa lɛ, lalatsɛ lɛ gbalaa jwɛŋmɔ kɛyaa anɔkwale ni eji akɛ le ni Nyɔŋmɔ le wɔ lɛ tsɔɔ be mli ni afɔ wɔ lɛ po hiɛ lɛ nɔ, ni ekɛɛ: “Ejaakɛ bo ofee misabai lɛ, bo oshɔ̃ mi yɛ minyɛ musuŋ. Miidao shi, ejaakɛ bɔ ni atsɔ afee mi lɛ yɛ gbeyei kɛ naakpɛɛ; onitsumɔi lɛ yɛ naakpɛɛ, ni misusuma le enɛ krɛdɛɛ.” (Lala 139:​13, 14) Wala yibii amli hewalɛ ni jɛɔ wɔtsɛ kɛ wɔnyɛ mli ni tsaa yɛ be mli ni aŋɔɔ wɔ hɔ lɛ feɔ sui ni baana wɔgbɔmɔtsoŋ kɛ wɔjwɛŋmɔŋ nyɛmɔi anɔ hewalɛ waa lɛ yɛ wɔmli. Nyɔŋmɔ nuɔ nakai nyɛmɔ lɛ shishi. Atsĩɔ sabai lɛ atã yɛ gbɛ krɛdɛɛ nɔ yɛ nɛkɛ lala nɛɛ mli, ni akɛfɔɔ nitsumɔ yɛ Ŋmalɛi lɛ amli ni akɛdamɔɔ shi ahaa adesa su lɛ mligbɛ nibii fe fɛɛ lɛ.a (Lala 7:​10; Yeremia 17:10) Yehowa ena ele nɛkɛ nibii ni kɔɔ wɔhe nɛɛ fɛɛ dani afɔɔ wɔ. Lɛ nɔŋŋ ji mɔ ni jɛ suɔmɔ kɛ wɔhesusumɔ mli efee adesa gbɔmɔtso lɛ bɔni afee ni wala yibii ni eŋɔ nuu hewalɛ yɛ nyɛ lɛ fɔmɔ kotoku mli lɛ afee hebuu nɔ ko, koni ‘efo’ hɔ lɛ he, ni ebu he hu beni edaa lɛ.

16. (a) Lala 139:​15, 16 maa bɔ ni Nyɔŋmɔ ninaa yaa shɔŋŋ ha lɛ nɔ mi yɛ mɛɛ gbɛ nɔ? (b) Mɛni hewɔ esa akɛ enɛ afee hewalɛwoo kɛha wɔ lɛ?

¹⁶ No sɛɛ lɛ, beni emaa Nyɔŋmɔ ninaa hewalɛ ni yaa shɔŋŋ lɛ nɔ mi lɛ, lalatsɛ lɛ kɛfata he akɛ: “Aŋɔɔɔ miwui lɛ ateeeo, beni afee mi yɛ teemɔ mli, beni ashɔ̃ mi yɛ shikpɔŋ lɛ shishi tɔ̃ɔ lɛ [eka shi faŋŋ akɛ eji enyɛ fɔmɔ kotoku lɛ he wiemɔ yɛ lalafoo wiemɔ mli, shi eetsɔɔ bɔ ni abɔ Adam kɛjɛ shikpɔŋ sũ mli lɛ]. Beni miji la kukuli kɛkɛ lɛ, ohiŋmɛii na; ni gbii ni atotoi [gbɔmɔtso lɛ henii lɛ] ni amɛteŋ ekome folo shɛko lɛ, aŋma fɛɛ yɛ owolo lɛ mli.” (Lala 139:​15, 16) Ŋwanejee ko kwraa bɛ he​—kɛji wɔnanemɛi adesai nuɔ wɔ shishi jio, amɛnuuu wɔ shishi jio, Yehowa nuɔ wɔ shishi. Te esa akɛ enɛ asa wɔhe eha tɛŋŋ?

17. Kɛ wɔna Nyɔŋmɔ nitsumɔi lɛ akɛ amɛyɛ naakpɛɛ lɛ, mɛni enɛ tsirɛɔ wɔ ni wɔfee?

¹⁷ Mɔ ni ŋma Lala 139 lɛ kpɛlɛ nɔ akɛ Nyɔŋmɔ nitsumɔi ni eŋmalaa he sane lɛ yɛ naakpɛɛ. Ani bo hu onuɔ he nakai? Nɔ ko ni yɔɔ naakpɛɛ haa mɔ jwɛŋɔ kɛyaa shɔŋŋ aloo ehaa ejwɛŋmɔ hiɔ nii lɛ nɔ waa. Ekolɛ nakai ofeɔ onii yɛ Yehowa nitsumɔi ni ji jeŋ ni ebɔ nɛɛ he. (Okɛto Lala 8:​4, 5, 10 he.) Ani osusuɔ nɔ ni efee ni ji Mesia Maŋtsɛyeli ni eto shishi, kɛ nɔ ni efeɔ, ni ji sanekpakpa lɛ ni ehaa ashiɛɔ yɛ shikpɔŋ lɛ nɔ fɛɛ, kɛ gbɛ ni e-Wiemɔ lɛ tsɔɔ nɔ etsakeɔ adesai asubaŋi lɛ he nakai nɔŋŋ?​—Okɛto 1 Petro 1:​10-12 he.

18. Kɛ wɔna akɛ Nyɔŋmɔ nitsumɔi lɛ yɛ gbeyei lɛ, te ebaasa wɔhe eha tɛŋŋ?

¹⁸ Ani eji oniiashikpamɔ nakai nɔŋŋ akɛ Nyɔŋmɔ nitsumɔ lɛ hesusumɔ yɛ gbeyei kɛha bo, ni ehaa gbeyeishemɔ kpakpa henumɔ ko baa omli, nɔ ni kanyaa mɔ kɛ hewalɛ kpele, nɔ ni naa hewalɛ ni mli wa yɛ osu kɛ baŋ kɛ bɔ ni okɛ owala tsuɔ nii ohaa lɛ nɔ? (Okɛto Lala 66:5 he.) Kɛ nakai lɛ, otsui baatsirɛ bo ni okãfo Yehowa, ni ojie eyi, ni otao hegbɛi ni okɛwie eyiŋtoo kɛ naakpɛɛ nibii ni eto eha mɛi ni sumɔɔ lɛ lɛ ahe otsɔɔ mɛi krokomɛi.​—Lala 145:​1-3.

[Shishigbɛ niŋmai]

Mɛni Ji Ohetoo?

◻ Le ni wɔle akɛ “Yehowa lɛ, lɛ ji Nyɔŋmɔ” lɛ yeɔ ebuaa wɔ ni wɔsɔmɔ lɛ kɛ miishɛɛ yɛ mɛɛ gbɛ nɔ?

◻ Mɛɛ gbɛ nɔ esa akɛ le ni Nyɔŋmɔ le nɔ fɛɛ nɔ ni wɔfeɔ lɛ asa wɔshihilɛ he yɛ?

◻ Mɛni hewɔ anɔkwale ni eji akɛ Nyɔŋmɔ miina wɔ be fɛɛ be lɛ woɔ wɔ hewalɛ lɛ?

◻ Mɛni hewɔ Nyɔŋmɔ nyɛɔ enuɔ wɔ shishi yɛ gbɛi ni adesa ko nyɛŋ anu wɔ shishi lɛ nɔ lɛ?

◻ Mɛni hewɔ nikasemɔ ni tamɔ nɛkɛ haa, wɔsumɔɔ ni wɔjie Yehowa yi lɛ?