Namɔ Aaajie Maŋtsɛ Lɛ Yi

“Makafoo, mi Nyɔŋmɔ, maŋtsɛ, mi majie ogbɛi lɛ yi daa kɛaatee naanɔ! Majie oyi gbi fɛɛ gbi,ni mala majie ogbɛi Iɛ yi daa kɛaatee naanɔ.”​—Lala. 145:​1, 2.

 1. Mɛni Maŋtsɛ David kɛɛ yɛ Yehowa he akɛ e-Maŋtsɛ, ni mɛni hewɔ?

¹ MAŊTSƐ DAVID ŋma yijiemɔ wiemɔi eha eŋwɛi Maŋtsɛ, Yehowa Nyɔŋmɔ. Yɛ mɛikomɛi agbɛfaŋ lɛ obaafee nɔ ni ekaaa akɛ shikpɔŋ nɔ maŋtsɛ ko aaawie kɛ hewalɛ nɛkɛ ni ekɛjie mɔ kroko yi akɛ Maŋtsɛ ni kwɔ fe lɛ.Shi David yɛ yiŋtoo kpakpa hewɔ ni ekɛfeɔ nakai. Ewiemɔi lɛ tsoɔ hiɛsɔɔ ni eyɔɔ kɛha nakai Maŋtsɛ lɛ, ni ji Yehowa. David jie kpoofeemɔ ni hi tamɔ nilee mumɔ kpo yɛ nɛkɛ Maŋtsɛ nɛɛ hiɛ. (Yak. 3:13) David ji Yehowa jalɔ anɔkwafo ni ekɛ nɛkɛ “maŋtsɛmɛi a-Nuntsɔ” nɛɛ na wekukpaa ko ni mliwa.​—Dan. 2:⁠47.

 2, 3. (a) Mɛni ji David wiemɔi ni kɔɔ bɔni ehiɛ esɔ Yehowa eha lɛ he nɔkwɛmɔ nii ni yɔɔ Lalai lɛ amli lɛ ekomɛi? (b) Mɛɛ saji otii David jaje yɛ 1 Kronika ni kɔɔ Yehowa kɛ emaŋtsɛyeli Iɛ he?

² David wiemɔi babaoo ni yɔɔ Ŋmalɛ lɛ mli lɛ haa wɔnaa no ni ha ehiɛ sɔ e-Maŋtsɛ, Yehowa Nyɔŋmɔ babaoo nakai lɛ. Lala 19 tsɔɔ bɔni David hiɛ sɔɔ Yehowa akɛ Bɔlɔ, Mlahalɔ kɛ Kpɔlɔ. Lala 24 jaje akɛ Yehowa ji shikpɔŋ lɛ Nɔtsɛ, anunyam Maŋtsɛ kɛ Hewalɔ. Yɛ Lala 103:19 lɛ David tsɔɔ hiɛsɔɔ kɛha Yehowa nɔyeli akɛ: “Yehowa lɛ, eŋɔ emaŋtsɛsɛi lɛ ema shi yɛ ŋwɛi, ni emaŋtsɛyeli lɛ yeɔ nii fɛɛ nɔ.” Kɛkɛ ni David tsɛ bɔfoi kɛ gbɔmɛi ni amɛjɔɔ ni amɛjie Yehowa yi. David shidaa lala ni aŋma yɛ 1 Kronika 16:​8-36 lɛ maa bɔni David hiɛ sɔɔ Yehowa lɛ nɔ mi.

³ Kɛmiiba David nɔyeli lɛ naagbee lɛ ejie henumɔi ni eyɔɔ yɛ eshihilɛ be fɛɛ mli lɛ kpo yɛ ewebii lɛ ahiɛ akɛ: “Aaajie Yehowa, wɔ tsɛ Israel Nyɔŋmɔ lɛ yi, kɛjɛ naanɔ kɛyashi naanɔ! Bo, Yehowa, onɔ ji dalɛ kɛ hewalɛ kɛ anunyam kɛ kunimyeli kɛ agbojee; ejaakɛ nɔ fɛɛ nɔ ni yɔɔ ŋwɛi kɛ shikpɔŋ lɛ nɔ lɛ, onɔ̃ ni. Bo, Yehowa, onɔ ji maŋtsɛyeli lɛ, ni bo ji mɔ ni ta nii fɛɛ nɔ akɛ yitso! Ní ninamɔ kɛ anunyam fɛɛ jɛ odɛŋ, ni bo nɔŋŋ oyeɔ nii fɛɛ nɔ, ni odɛŋ hu hewalɛ kɛ nyɛmɔ yɔɔ, ni odɛŋ sane nɔŋŋ ji mɔ fɛɛ mɔ dalɛ kɛ hewalɛnamɔ! No hewɔ lɛ, agbɛnɛ, wɔ Nyɔŋmɔ, wɔmiidao shi ni wɔmiijie ohiɛnyam gbɛi lɛ yi.”​—1 Kron. 29:​10-13.

Maŋtsɛyeli He Sane Ni Ka Shi Lɛ

 4. Mɛni ba yɛ Samuel gbii lɛ amli ni ha Israel baná adesa maŋtsɛ, ni mɛɛ gbɛ nɔ jeŋmaji ni ebɔle Israel lɛ batsɔ tsɔne ko ni duɔ mɔ kɛha amɛ?

⁴ Yehowa maŋtsɛyeli lɛ he ba sane yɛ Israel, be fioo ko dani abafɔ David. Enɛ ji be ko kɛmiiba Samuel kojomɔ be lɛ naagbee, taakɛ anaa yɛ 1 Samuel 8:​4-20 lɛ. Shi mɛni ji nɔ ni tsirɛ Yehowa webii ni ekɛ amɛ yɔɔ kpaŋmɔ mli lɛ ni amɛbi maŋtsɛ ni eye amɛnɔ ni amɛkɛ nakai feemɔ akpoo Yehowa? Amɛkɛɛ Samuel akɛ amɛmiisumɔ ni amɛtsɔ tamɔ jeŋmaji krokomɛi lɛ. Yehowa tsɔ Samuel nɔ ebɔ amɛ kɔkɔ yɛ eshara ni baajɛ enɛ mli aba aha amɛ yɛ jeŋmaji lɛ ni amɛtaoɔ akɛ amɛtamɔ amɛ ni amɛna adesa maŋtsɛ ni eye amɛnɔ lɛ hewɔ. Yɛ anɔkwale mli lɛ, Yehowa ni ji Maŋtsɛ yɛ amɛnɔ lɛ hi ha amɛ kwraa.​—Kwɛmɔ 5 Mose 4:7 hu.

 5. Te fee tɛɛŋ ni maŋtsɛyeli batsɔ sane oti ko ni ka shi yɛ Gideon gbii lɛ amli?

⁵ Sane nɛɛ ete shi pɛŋ yɛ Israel maŋ lɛ mli yɛ be mli ni Yehowa kɛ kunimyeli ha gbɔmɛi ni yɔɔ Gideon famɔ shishi ni eha amɛye Midianbii lɛ anɔ lɛ. “Kɛkɛ ni Israelbii lɛ kɛɛ Gideon akɛ: Ye wɔ nɔ, bo kɛ obi kɛ onabi fɛɛ; ejaakɛ ohere wɔyiwala kɛjɛ Midian dɛŋ. Ní Gideon kɛɛ amɛ akɛ: Miyeŋ nyɛ nɔ, ni mibi hu yeŋ nyɛ nɔ, Yehowa aaaye nyɛ nɔ.” (Koj. 8:​22, 23) Gideon kɛ anɔkwayeli kpoo Israelbii lɛ anibimɔ lɛ ni ema Yehowa ni ji maŋtsɛ yɛ amɛ nɔ lɛ nɔ mi. Shi Gideon gbele sɛɛ be fioo lɛ, ebii lɛ ateŋ mɔ kome ni atsɛɔ lɛ Abimelek gbe enyɛmimɛi lɛ ateŋ mɛi pii ni ewo ehe maŋtsɛ, shi enɔyeli lɛ sɛɛ etsɛɛɛ ni oshara ji nɔ ni ba enɔ yɛ naagbee. (Koj. yitso 9) Ale yinɔsane nɛɛ jogbaŋŋ yɛ Israel. Etsɔɔ bɔni sane eba Yehowa maŋtsɛyeli lɛ he kɛtsɔ afii ohai abɔ lɛ amli. Agbɛnɛ hu hegbɛ lɛ ba yɛ nɛkɛ be nɛɛ fɛɛ mli koni mɔ fɛɛ mɔ atsɔɔ anɔkwa ni eyeɔ Yehowa akɛ Maŋtsɛ lɛ.

 6. Mɛni ji nɔ ni mra be mli yinɔsane tsɔɔ yɛ maŋtsɛyeli he, ni mɛni Ji nɔ ni Yehowa egba efɔ shi ni kɔɔ bɔni saji baatsɔ aba he?

⁶ Nyɔŋmɔ Wiemɔ lɛ tsɔɔ akɛ jeŋmaji lɛ ná maŋtsɛmɛi ni yeɔ amɛ nɔ kɛjɛ mra be mli tɔɔ. Nu Afua lɛ sɛɛ etsɛɛɛ kwraa ni ato adesai amaŋtsɛyelii ni teɔ shi woɔ Yehowa Nyɔŋmɔ lɛ ahe gbɛjianɔ, taakɛ atsɔɔ yɛ 1 Mose 10:​8-12 lɛ. Enɛ ba yɛ Satan Abonsam ni ji klɛŋklɛŋ mɔ ni tse hegbɛ ni Yehowa yɔɔ akɛ eyeɔ nɔ lɛ hiɛ atua kɛtsɔ atua ni etse eshi Yehowa kɛ mɔdɛŋ ni ebɔ akɛ eeegbala bɔɔnii krokomɛi kɛjɛ Yehowa jamɔ he lɛ nɔ lɛ hewalɛ shishi. Yehowa eŋmɛ mɔ fɔŋ lɛ gbɛ koni eha mpoa ni etswa lɛ aba mli. Ni etsɔɔ nɔ ni baajɛ sane lɛ mli aba hu.​—1 Mose 3:⁠15.

Yehowa Agbojee Biɔ Yijiemɔ

 7. (a) Mɛɛ gbɛfaŋ nɔ Yehowa mumɔ lɛ na yɛ David shihilɛ mli? (b) Lala 145 ji lala ko ni ekaaa yɛ mɛɛ gbɛi sɔrɔtoi anɔ?

⁷ Samuel ji mɔ ni fɔ David mũ yɛ Yehowa gbɛtsɔɔmɔ shishi. “Ni Yehowa mumɔ yi David nɔ kɛjɛ nɛkɛ gbi nɛɛ nɔ kɛyaa nɛɛ fɛɛ.” (1 Sam. 16:​12, 13) David ji nɔkwɛmɔ nɔ kpakpa yɛ bɔni Yehowa mumɔ lɛ tsuɔ nii yɛ etsuji anɔkwafoi lɛ anɔ lɛ. Yehowa mumɔ lɛ ji nɔ ni tsirɛ David ni ha eŋmala lalai babaoo ni ejieɔ Yehowa yi yɛ mli lɛ. (2 Sam. 23:⁠2) Eyijiemɔ wiemɔi ni ŋɔɔ fe fɛɛ Iɛ ateŋ ekome ji Lala 145. Nɛkɛ lala nɛɛ jɔɔ Yehowa, ejieɔ eyi, ekafɔɔ lɛ, ni ejieɔ Yehowa mlihilɛ, egbojee, ehewalɛ, ejalɛ, enaanɔ shihilɛ, bɔni etsakeee kɛ emɔbɔnalɛ lɛ kpo. Nɔ ni tsɔɔ bɔni nilelɔi ni ji Yudafoi buɔ nɛkɛ lala nɛɛ jogbaŋŋ ha lɛ ji anɔkwale ni eji akɛ epueɔ shii etɛ yɛ amɛ daa gbi sɔlemɔi amli. Atsɛɔ Lala lɛ yɛ Hebri wiemɔ mli akɛ Tehillim ni eshishi ji “Yijiemɔi.” Lala 145 pɛ ji lala ni hiɛ yiteŋgbɛ niŋmaa akɛ “Yijiemɔ Lala,” yɛ ekomefeemɔ wiemɔ mli.

 8. Mɛni ji nɔ ni ka shi faŋŋ yɛ faishi ni atswa akɛ aaajie Yehowa gbɛi lɛ yi kɛya naanɔ lɛ mli?

⁸ Wiemɔi ni jeɔ nɛkɛ lala nɛɛ klɛŋklɛŋ kukuji lɛ ashishi lɛ mli eyi obɔ kɛ nyamɔ kɛ Hiɛsɔɔ:

“Makafoo, mi Nyɔŋmɔ maŋtsɛ, ni majie ogbɛi lɛ yi daa kɛaatee naanɔ! Majie oyi gbi fɛɛ gbi, ni mala majie ogbɛi lɛ yi daa kɛaatee naanɔ.” (Lala. 145:​1, 2)

Mɛi ni wieɔ Biblia mli wiemɔi ahe lɛ tsɔɔ David fai shi ni etswa akɛ ebaajie Nyɔŋmɔ gbɛi lɛ yi “daa kɛaatee naanɔ” lɛ shishi akɛ etsɔɔ akɛ, yɛ bei abɔ ni David yɔɔ wala mli. Shi ani shishinumɔ kroko ni ŋwanejee ko kwraa bɛ he bɛ David faishitswaa lɛ mli? Dani mɔ ko aaajie Nyɔŋmɔ gbɛi lɛ yi kɛya naanɔ lɛ ‘biɔ ni mɔ lɛ ahi shi kɛya naanɔ. Ani David bɛ naanɔ wala he hiɛnɔkamɔ yɛ wɔsɛɛ? Eka shi faŋŋ akɛ, ŋmɛnɛ, “asafo babaoo” ni jɛ “tooi krokomɛi” lɛ ateŋ akɛ kuu lɛ yɛ nakai hiɛnɔkamɔ lɛ diɛŋtsɛ, akɛ amɛbaanyɛ amɛjɔɔ ni amɛjie Yehowa gbɛi lɛ yi kɛya naanɔ akɛni amɛgboiŋ kɛjɛŋ shikpɔŋ lɛ nɔ lɛ hewɔ.​—Zef. 2:3; Yoh. 11:​26; Kpoj. 7:​14-17; 21:⁠4.

 9. Mɛni abaanyɛ akɛɛ yɛ Yehowa nitsumɔi ni aaanu fɛɛ shishi jogbaŋŋ lɛ he?

⁹ David yijiemɔ lala lɛ tee nɔ akɛ:

“Yehowa da ni esa yijiemɔ babaoo, ni edalɛ lɛ anyɛɛɛ shishi ana.” (Lala 145:⁠3)

Yehowa dalɛ lɛ he odase lɛ ehi shi kɛjɛ nibɔɔ be mli kɛha adesai fɛɛ koni amɛna. (Rom. 1: 20) Shi kɛ akɛto he lɛ gbɔmɛi fioo ko pɛ ejie Yehowa yi yɛ anɔkwale mli, yɛ edalɛ kɛ enibɔɔ nitsumɔi ni amɛnaa he sɛɛ lɛ fɛɛ sɛɛ. Yɛ anɔkwale mli lɛ, kɛbashi ŋmɛnɛ lɛ, kpaako adesai eje shishi amɛnu nibii ni ebɔ lɛ ateŋ fioo ko shishi yɛ bɔni Yehowa kɛ enii ni etsu lɛ dara ha lɛ hewɔ. Blematsɛ Hiob yɛ hiɛsɔɔ tamɔ David ejaakɛ ewie Nyɔŋmɔ he akɛ “mɔ ni feɔ nibii wuji ni anaaa naa, kɛ naakpɛɛ nibii hu ni aleee amɛyibɔ lɛ.” (Hiob 5:9; 9: 10; 26:14) Ni be mli ni bɔfo Paulo egba Nyɔŋmɔ yiŋtooi ni yɔɔ nyam lɛ ahe sane lɛ, enu he akɛ nɔ ko miitsirɛ lɛ, ni ebo akɛ: “Oo, bɔni Nyɔŋmɔ ‘nifalɛ kɛ ŋaa kɛ nilee mli kwɔ ha nɛɛ! Ekojomɔi lɛ anyɛɛɛ shishi ana, ni egbɛi lɛ hu anyɛɛɛ sɛɛ mo aja!”​—Rom. 11:​33, 34.

10. Yɛ mɛɛ gbɛ nɔ “yinɔ” kome egba Yehowa hewalɛ nitsumɔi lɛ etsɔɔ “yinɔ” kroko?

¹⁰ “Yinɔ kome aaakafo onitsumɔi lɛ atsɔɔ yinɔ kroko, ni amaaajaje ohewalɛ nitsumɔi lɛ amɛtsɔɔ.” (Lala 145:⁠4)

Hɛɛ, yinɔi eba, ni yinɔi etee, ni amɛteŋ mɛi komɛi egba Yehowa hewalɛ lɛ he sane ámɛtsɔɔ. Shi ani anyɛŋ akɛɛ hu akɛ shwɛɛnii lɛ ni afɔ amɛ mu ‘lɛ hu feɔ “yinɔ” kome, ni amɛkafo Yehowa nitsumɔi lɛ amɛtsɔɔ “yinɔ” kroko ni ji “asafo babaoo” lɛ ni jɛ “tooi krokomɛi” lɛ ateŋ lɛ, ni no hewɔ lɛ mɛnɛɛmɛi hu baanyɛ aya nɔ ni amɛgba Yehowa hewalɛ nifeemɔi lɛ amɛtsɔɔ mɛi krokomɛi lolo? Nakai ni! Kɛji akɛ wɔsusu Nyɔŋmɔ Wiemɔ lɛ he jogbaŋŋ lɛ, wɔ, kɛji akɛ wɔji “yinɔ” ni jɛ mumɔŋ lɛ jio, aloo wɔji shikpɔŋ nɔ yinɔ lɛ jio, wɔbale Yehowa nitsumɔi wuji kɛ hewalɛ nifeemɔi nɛɛ. Mɛɛ hegbɛ po enɛ ji akɛ wɔɔɔgba nibii nɛɛ wɔtsɔɔ mɛi krokomɛi! (Kwɛmɔ David nɔkwɛmɔ nɔ lɛ ni kɔɔ Yehowa hewalɛ nitsumɔi lɛ ahe wiemɔi ni yɔɔ Lala 68 lɛ.)

11. Wɔsusuɔ Yehowa agbojee kɛ enitsumɔi lɛ ahe yɛ mɛɛ gbɛ nɔ?

¹¹ “Majwɛŋ onunyam lɛ dalɛ kɛ agbojee kɛ enaakpɛɛ nitsumɔi lɛ ahe.” (Lala 145:⁠5)

Kɛji akɛ wɔbaajie wɔ-Bɔlɔ lɛ yi yɛ gbɛ ni ja nɔ lɛ, belɛ esa akɛ wɔsusu ni wɔjwɛŋ anunyam gbɔmɔ nɛɛ kɛ enaakpɛɛ nitsumɔi lɛ ahe. (Mat. 12:34) Mɛɛ gbɛ nɔ otsɔɔ ojwɛŋɔ enɛɛmɛi ahe? Ani oŋɔɔ be koni bo diɛŋtsɛ okase nɔ ni Nyɔŋmɔ ekɛɛ bo yɛ e-Wiemɔ lɛ mli lɛ? Yɛ be mli ni ofeɔ nakai lɛ, ani ojwɛŋɔ ni ohaa eshishinumɔ lɛ boteɔ omli koni eka otsuiŋ kwraa? Mɛɛ gbɛ nɔ wɔɔɔtsɔ wɔwie Yehowa Nyɔŋmɔ he jogbaŋŋ ni wɔjɔɔ lɛ ákɛ ja wɔheɔ Yehowa wɔyeɔ diɛŋtsɛ yɛ wɔmli ni wɔsumɔɔ lɛ? Yehowa anunyam kɛ egbojee lɛ ni wɔhiɛ aaasɔ lɛ baaaye abua wɔ ni wɔkɛ miishɛɛ, faishitswaa kɛ nɔmimaa awiɛ Maŋtsɛ kpeteŋkpele lɛ he.

12. Mɛni hewɔ ehi akɛ wɔɔɔjwɛŋ ni wɔwie Yehowa nitsumɔi ni yɔɔ gbeyei lɛ ahe lɛ?

¹² “Ni mɛi aaagba onitsumɔi ni yɔɔ gbeyei lɛ ahewalɛ lɛ he sane, ni majaje odalɛ lɛ matsɔɔ.” (Lala 145:⁠6)

Aa, hɛɛ, baboo yɛ kɛha wɔ ni wɔbaagba. Ajieɔ nibii ni yɔɔ gbeyei ni tsɔɔ bɔni Yehowa jieɔ ehewalɛ lɛ kpo yɛ etsuji anɔkwafoi lɛ agbɛfaŋ ekɛ-shiɔ mɛi ni feɔ amɛhe Nyɔŋmɔ henyɛlɔi lɛ akpo yɛ Ŋmalɛi lɛ baafai fɛɛ amli. Nakai blema hewalɛ nitsumɔi lɛ babaoo tsu nii akɛ gbalɛ mli mfonirii ni amɛji ŋaawoo ni esa akɛ nɛkɛ adesai ayinɔ nɛɛ amɔ mli. Hɛɛ, “nibii abɔ ni aŋma ato momo lɛ, wɔdiɛŋtsɛ wɔhe nitsɔɔmɔ hewɔ aŋma ato lɛ, koni wɔkɛ tsuishiŋmɛɛ kɛ ŋmalɛi lɛ amli miishɛjemɔ lɛ ana hiɛnɔkamɔ.” (Rom. 15:⁠4) Nakai nibii lɛ ni wɔɔɔgba mli wɔjaje wɔtsɔɔ yɛ gbɔmɛi ateŋ lɛ ji sɔɔmɔ kɛ suɔmɔ nitsumɔi kɛha mɛi krokomɛi. Etsuɔ nii akɛ nɔ ko ni bɔɔ amɛ Yehowa yiŋtooi kɛha gbii ni jwere wɔhiɛ lɛ ahe kɔkɔ. Mɛi ni gbaa enɛ lɛ hu naa he sɛɛ amɛdiɛŋtsɛ taakɛ bɔni eji yɛ bulɔ ni atsɔɔ mli yɛ Ezekiel 3:​17-19 lɛ gbɛfaŋ lɛ. “Amanehulu kpeteŋkpele” lɛ ni baa lɛ hu baaajie Yehowa agbojee lɛ kpo lolo atsɔɔ yɛ eyiŋtoo ni ejaje ni ebaatsu he nii lɛ mli. No hewɔ Iɛ nyɛhaa wɔyaa nɔ wɔjajea wɔtsɔɔa yɛ bei abɔ ni Yehowa egbele gbɛ lolo yɛ nɛkɛ nibii agbɛjianɔtoo nɛɛ mli lɛ. Wɔbaanyɛ wɔkase gbɛ ni Yesu Kristo tsɔ nɔ ejaje Nyɔŋmɔ kojomɔi lɛ ahe kɔkɔbɔɔ lɛ.​—Mat. 10:​28-30; Luka 19:​41-44.

13, 14. (a) Mɛni hewɔ esa akɛ atsi Yehowa mlihilɛ lɛ ta lɛ? (b) Mɛni nɔ wɔdamɔɔ ni wɔboɔ kɛ nyamɔ Iɛ?

¹³ “Amɛaawie emlihilɛ kpeteŋkpele lɛ kaimɔ lɛ he, amɛaala ojalɛ lɛ he Iala.” (Lala 145:⁠7)

Jeee Yehowa hewalɛ kpeteŋkpele lɛ pɛ esa akɛ wɔkɛɛ je lɛ, shi moŋ emlihilɛ kɛ ejalɛ lɛ hu. Yehowa Nyɔŋmɔ ejie mlihilɛ kpo etsɔɔ etsuji yɛ yinɔi fɛɛ mli. Be fɛɛ be ni amɛaaja lɛ yɛ anɔkwayeli mli lɛ, amɛnine shɛɔ jɔɔmɔi babaoo nɔ. Mlihilɛ ni Yehowa jieɔ lɛ kpo etsɔɔ mɛi ni sumɔɔ lɛ lɛ efee nɔ ni ekaaa aahu kɛbashi nɛkɛ be nɛɛ mli diɛŋtsɛ, ni enɛ tsirɛɔ amɛ ni amɛbatsɔmɔɔ tamɔ nuhiŋmɛi kpeteŋkpele ko ni hiɛsɔɔ ni tamɔ nu fɔseɔ kɛjɛɔ mli. Ŋwanejee ko kwraa bɛ he akɛ nɛkɛ yijiemɔ wiemɔi nɛɛ baagbala mɛi krokomɛi ni amɛhu amɛbaná Yehowa mlihilɛ babaoo lɛ eko. Nibii ni asusuɔ he be fɛɛ be lɛ kaa jwɛŋmɔ mli. Enɛ ji jɔɔmɔ diɛŋtsɛ, ni eyeɔ ebuaa wɔ beni afee ni wɔkaku wɔhiɛ wɔshwie hiɛsɔɔ ni wɔɔɔna wɔha gbɛ ni Yehowa etsɔ nɔ ekɛ ewebii eye eha lɛ nɔ. Sɛɛnamɔ babaoo yɛ Yehowa mlihilɛ ni ejie lɛ kpo otsɔɔ wɔ lɛ mli ni wɔɔtĩ wɔtsɔɔ lɛ he.

¹⁴ Ani wɔbɛ nɔ ni wɔɔɔdamɔ nɔ wɔbo kɛ nyamɔ bianɛ? Kɛtsɔ, Adam nɔ lɛ wɔfɛɛ wɔbatsɔmɔ eshafeelɔi ni abu wɔ gbele fɔ. (Rom. 5:12) Shi yɛ ejalɛ kɛ ejalɛsaneyeli hewɔ lɛ Yehowa jie suɔmɔ kpele kpo etsɔɔ beni afee ni agba gbɛ ni akɛjeɔ adesai anaagbai nɛɛ amli. Enɛ ji nɔ ni efee kɛtsɔ Yesu Kristo akɛ kpɔmɔ afɔle lɛ nɔ. Wɔtsɔ Yehowa wiemɔi ni aŋmala lɛ anɔ wɔbale ejalɛ gbɛi lɛ kɛ bɔni ekɛ shikpɔŋ lɛ nɔ bii yeɔ haa. Eji miishɛɛ akɛ wɔɔɔna enɛɛmɛi kɛ nɔ ni wɔbaadamɔ nɔ hu ni wɔbo kɛ nyamɔ yɛ Yehowa hewɔ. Wɔyɛ yiŋtoo kpakpa ko ni wɔɔɔdamɔ nɔ wɔnyiɛ Maŋtsɛ David nɔkwɛmɔ nɔ lɛ sɛɛ, ejaakɛ ebo akɛ: “Shi mi lɛ, emɔbɔnalɛ nɔ mihiɛ ka; mitsui nyaa yɛ eyiwalaheremɔ lɛ mli. Mala maha Yehowa, ejaakɛ efee mi ejurɔ.”​—Lala 13:​5, 6.

15. Mɛɛ Yehowa mɔbɔnalɛ, tsuishitoo kɛ suɔmɔ he nɔkwɛmɔ nii wɔyɔɔ?

¹⁵ “Durolɔ kɛ mɔbɔnalɔ ji Yehowa, emli fuuu mra emɔbɔnalɛ fa.Yehowa hi ha mɛi fɛɛ, ni emusuŋ tsɔɔ lɛ yɛ enitsumɔi lɛ fɛɛ he.” (Lala 145:​8, 9)

Kɛjɛ adesa yinɔsane be mra mli ni ajieɔ Yehowa sui ni yɔɔ naakpɛɛ lɛ kpo atsɔɔ adesa weku lɛ yɛ be mli ni etsuɔ eyiŋtoo he nii koni ehere adesai ateŋ mɛi komɛi ayiwala lɛ. Ajie Yehowa gbɛ lɛ kpo yɛ Nu Afua be lɛ mli. (1 Pet. 3:20) Eka shi faŋŋ akɛ David nine shɛ Yehowa mɔbɔnalɛ nɔ ni eyɛ nɔ ni ebaadamɔ nɔ ejie Yehowa yi. Kwɛ bɔni Yesu kaiɔ wɔ Yehowa suɔmɔ lɛ jogbaŋŋ ha taakɛ wɔnaa kɛtsɔɔ ewiemɔi ni aŋma afɔ shi yɛ Yohane 3:​16, 17 lɛ mli lɛ! Esa akɛ hiɛsɔɔ ni wɔɔɔna wɔha enɛ lɛ aha wɔwie ni wɔkɛjie Yehowa yi, ni no atsirɛ wɔ ni wɔsumɔ mɛi krokomɛi Bɔfo Yohane susu he yɛ nɛkɛ gbɛ nɔ: “Enɛ mli Nyɔŋmɔ suɔmɔ ni ekɛ-sumɔɔ wɔ lɛ je kpo yɛ, ákɛ, Nyɔŋmɔ tsu lɛ diɛŋtsɛ ebi koome lɛ kɛba je Iɛŋ, koni wɔtsɔ enɔ wɔna wala. Enɛ mli suɔmɔ lɛ yɔɔ: Jeee akɛ wɔ ni wɔsumɔɔ Nyɔŋmɔ, shi moŋ akɛ lɛ ni esumɔ wɔ, ni otsu ebi lɛ akɛ ebafee wɔhe eshai lɛ ahe kpatamɔ nɔ. Suɔmɔmɛi, kɛ Nyɔŋmɔ sumɔ wɔ nɛkɛ lɛ, esa akɛ wɔhu wɔsumɔsumɔɔ wɔhe.”​—1 Yoh. 4:​9-11.

16-18. (a) Mɛɛ gbɛ awoɔ mɔ fɛɛ mɔ hewalɛ ni etsɔ nɔ yɛ be mli ni be yɔɔ lolo nɛɛ? (b) Mɛni ji nɔ ni Yehowa mɔbɔnalɛ lɛ tsɔɔ kɛhaa wɔ? (d) Mɛɛ henumɔi ni Paulo na ni hiɛsɔɔ yɔɔ mli wɔhu wɔɔɔfee jogbaŋŋ kɛ wɔjie no kpo wɔtsɔɔ?

¹⁶ Kɛ wɔkwɛ bɔni ŋmɛnɛŋmɛnɛ adesai ayinɔ nɛɛ feɔ enii yɛ Yehowa he ehaa, ni kɛ wɔkane gbɔmɛi eyiwalɛ kɛ awuyeli kɛtsɔ afii ohai abɔ lɛ amli lɛ ahe sane lɛ, wɔbaanyɛ wɔkɛɛ yɛ anɔkwale mli akɛ Yehowa mli fuuu mra. Kwɛ bɔni wɔɔɔnyɛ wɔda shi akɛ wɔnyɛ wɔbashɛ nɛkɛ be nɛɛ mli yɛ be mli ni Yehowa tsuishitoo lɛ miitsu nii lolo! Esa akɛ hiɛsɔɔ ni yɔɔ Petro wiemɔi ni yɔɔ 2 Petro 3:9 kɛ 15 lɛ mli lɛ atsirɛ wɔ ni wɔsusu Yehowa mɔbɔnalɛ kɛ emlihilɛ lɛ he jogbaŋŋ: “Yehowa . . . etsui shi etoɔ kɛhaa wɔ, ejaakɛ esumɔɔɔ akɛ mɛi komɛi alaaje, shi moŋ akɛ mɛi fɛɛ atsake amɛtsui. Ni nyɛbua wɔ-Nuntsɔ lɛ tsuishitoo lɛ akɛ yiwalaheremɔ ni.”

¹⁷ Wɔle akɛ abu nibii agbɛjianɔtoo nɛɛ ni yɔɔ Satan shishi lɛ fɔ aha hiɛkpatamɔ, no hewɔ lɛ wɔmiisumɔ ni wɔwo mɛi fɛɛ hewalɛ ni amɛkɛ hiɛdɔɔ asusu Nyɔŋmɔ tsuishitoo lɛ he koni amɛto gbɛjianɔ kɛha yiwalaheremɔ dani efee akɛ ekpe sɛɛ tsɔ. (Zef. 2:3; Kpoj. 18:⁠4) Kwɛ miishɛɛ ni wɔna akɛ wɔto yiwalaheremɔ he gbɛjianɔ nɛɛ! Ni kɛlɛ, ákɛ Adam seshibii ni yɔɔ heloo mli lɛ, wɔyɛ heloo lɛ gbɔjɔmɔi ashishi lolo, ni wɔtɔɔ po, taakɛ David kɛ mɛi krokomɛi fee lɛ. Akɛni nakai enɛ ji lɛ, Yesu tsɔɔ akɛ wɔsɔle akɛ: “Ni okɛ wɔnyɔji lɛ akewɔ, taakɛ bɔni wɔhu wɔkɛkeɔ mɛi ni hiɛɔ wɔ nyɔji lɛ; ni okɛ wɔ akaya kaa lɛ mli; shi jiemɔ wɔ kɛjɛ efɔŋ lɛ mli.”​—Mat. 6:​12, 13.

¹⁸ Gbɛjianɔ ni Yehowa eto kɛtsɔ Yesu Kristo nɔ lɛ tsɔɔ babaoo kɛha wɔfɛɛ. Eba akɛ wɔhiɛ aaasɔ Yehowa mlihilɛ kɛ emɔbɔnalɛ kɛ nibii fɛɛ ni ofee eha wɔ lɛ yɛ be fɛɛ mli. Bɔfo Paulo yɛ nɛkɛ hiɛsɔɔ nɛɛ ejaakɛ ekɛɛ akɛ: “Miida wɔ-Nuntsɔ Kristo Yesu ni wo mi hewalɛ lɛ shi, akɛ ebu mi anɔkwafo ni eŋɔ nii ewo sɔɔmɔ lɛ mli, . . . Eji anɔkwa wiemɔi ni esa akɛ amɔ mIi kwraa, ákɛ Kristo Yesu ba je nɛŋ eba eshafeelɔi ayiwalaheremɔ, mɛi ateŋ ni miji otu lɛ; shi kɛlɛ enɛ hewɔ ni ana mi mɔbɔ lɛ, koni mi tsutsu mimli ni Yesu Kristo ajie etsuishitoo lɛ fɛɛ kpo yɛ, ni aŋɔto Okadi aha mɛi ni baahe enɔ aye, ni amɛna naanɔ wala Iɛ. Shi naanɔi amaŋtsɛ lɛ, mɔ ni gbooo, mɔ ni anaaa, mɔ ni ji Nyɔŋmɔ kome lɛ, aŋɔ woo kɛ anunyam aha lɛ kɛyashi naanɔi anaanɔ lɛ! Amen.” (1 Tim. 1:​12, 15-17) Esa, akɛ wɔ shidaa lɛ atsirɛ wɔ ni wɔjie Yehowa yi babaoo, yɛ be mli ni wɔyaa nɔ wɔwieɔ emaŋtsɛyeli lɛ he lɛa.

[Shishigbɛ niŋmai]