Ani Oji Nyɔŋmɔ Maŋtsɛyeli Lɛ Jajelɔ Anɔkwafo?

Yehowa, onitsumɔi lɛ fɛɛ aaadao shi, ni omɛi krɔŋkrɔŋi lɛ aaajie oyi! Amɛaawie omaŋtsɛyeli Iɛ anuyam lɛ he, ni amɛaagba ohewalɛ lɛ he sane.”​—Lala. 145:​10, 11.

 1. Yesu jaje Nyɔŋmɔ maŋtsɛyeli lɛ he sane lɛ kɛyashɛ nɛgbɛ?

¹ YEHOWA Nyɔŋmɔ ena tsuji anɔkwafoi yɛ shikpɔŋ nɔ yɛ be fɛɛ mli kɛjɛ Habel be lɛ mli koni amɛjie eyi. Nɛkɛ Yehowa anɔkwafoi nɛɛ ateŋ mɔ ni esoro lɛ kwraa, e-Bi koome, Yesu Kristo tsɔ hiɛ yɛ Yehowa hewalɛ kɛ emaŋtsɛyeli lɛ ni ehe baaba sɛɛnamɔ aha adesai fɛɛ lɛ he wiemɔ mli. Yesu ba akɛ Mɔ ni Atsu lɛ lɛ, Yishai kɛ David seshinyo lɛ, Maŋtsɛ ni ahala lɛ lɛ, ni ekɛ Nyɔŋmɔ maŋtsɛyeli lɛ fee enitsɔɔmɔ lɛ mli tsɔɔmɔ titri. (Yes. 11:​1, 10; Mat. 21:​1-17) Lɛ ekɛ Maŋtsɛyeli lɛ he sanekpakpa lɛ ba. Akɛni ebahi gbɔmɛi lɛ ateŋ diɛŋtsɛ hewɔ lɛ, enyɛ ekɛɛ amɛ bɔni Maŋtsɛyeli lɛ ni edamɔ shi kɛha no, ákɛ Maŋtsɛ ni ahala lɛ lɛ ebɛŋkɛ eha, ni etsɔɔ ekaselɔi lɛ ni amɛtao Maŋtsɛyeli lɛ tsutsu. (Luka. 17:​20, 21) Beni etsɔɔ ekaselɔi lɛ gbɛ ni amɛaatsɔ nɔ amɛsɔle lɛ, ema Maŋtsɛyeli ni baa lɛ nɔ mi, ákɛ, no ji nɔ ni baatse Nyɔŋmɔ gbɛi lɛ he, ni no baaha afee Nyɔŋmɔ suɔmɔnaanii yɛ shikpɔŋ nɔ taakɛ afeɔ yɛ ŋwɛi lɛ.​—Mat. 4:​23; 6:​9, 10, 33

 2. Mɛɛ gbɛ nɔ ekanya mɛi ni amɛkɛ amɛhe awo Yehowa maŋtsɛyeli he sane ni ka shi lɛ mli?

² Yesu fɔ nine etsɛ mɛi krokomɛi ni amɛbafata ehe ni amɛshiɛ Maŋtsɛyeli ni baa lɛ he sanekpakpa amɛtsɔɔ mɛi. (Luka 9:​1-6; 10:​1-12) Yesu kaselɔi lɛ nu shishi akɛ beni eba akɛ maŋtsɛ lɛ ji nɔ ko ni baaba yɛ wɔsɛɛ be mli, taakɛ wɔnaa kɛtsɔɔ sane ni amɛbi ni yɔɔ Mateo 24:3 (NW) lɛ nɔ lɛ: “Kɛɛmɔ wɔ, mɛɛ be mli nibii nɛɛ baaba, ni mɛni ji beni oba [aloo, parousia, Hela] lɛ kɛ nibii agbɛjianɔtoo nɛɛ naagbee lɛ he okadi?” Kɛkɛ ni Yesu tee nɔ etsɔɔ be ni eba lɛ akɛ be krɛdɛɛ ko ni akɛ aawie Maŋtsɛyeli lɛ he, etsɔɔ akɛ abaafee enɛ yɛ shikpɔŋ nɔ jeŋmaji fɛɛ mli ni akɛye amɛ odase. Wɔle akɛ ba ni Yesu eba akɛ maŋtsɛ kɛ hewalɛ ni eeye nɔ yɛ ehenyɛlɔi ateŋ lɛ efee anɔkwale kɛjɛ 1914, ejaakɛ wɔna “okadi” lɛ.​—Lala 110:1; Heb. 10:​12, 13; Mat. 24:⁠14.

 3. Mɛɛ gbɛ nɔ Paulo na gbɛfaŋ nɔ yɛ Nyɔŋmɔ maŋtsɛyeli lɛ he sane lɛ jajemɔ mli?

³ “Koni amɛha gbɔmɛi abii ale ehewalɛ nitsumɔi lɛ, kɛ emaŋtsɛyeli lɛ nyam kɛ agbojee lɛ. Omaŋtsɛyeli lɛ, naanɔ maŋtsɛyeli ni, ni elumɔyeli lɛ hiɔ shi kɛyaa yinɔi fɛɛ nɔ.” (Lala, 145:​12, 13)

Yesu kaselɔi lɛ tsu nii waa yɛ Nyɔŋmɔ maŋtsɛyeli lɛ ni baatsɔ Yesu Kristo nɔ aba lɛ ni amɛgbala gbɔmɛi ajwɛŋmɔ kɛba nɔ lɛ hewɔ. Enɛ he nɔkwɛmɔ nɔ fɛfɛo ni aŋma afɔ shi lɛ yɛ Bɔfoi lɛ Asaji 28:​23, 30, 31, ni gbaa bɔni Paulo shiɛ Maŋtsɛyeli lɛ yɛ be mli ni eji gboklɛfonyo yɛ Roma lɛ. No mli lɛ etsɔ hiɛ eŋma Korintobii lɛ akɛ Kristofoi lɛ ji “bɔfoi yɛ Kristo najiaŋ,” ni akɛ amɛmiiwa gbɔmɛi lɛ ni ‘akpata amɛ kɛ Nyɔŋmɔ teŋ.’ (2 Kor. 5:20) Ákɛ bɔfo lɛ akpa Paulo gbɛ akɛ ebaawie eha Maŋtsɛyeli lɛ kɛ Maŋtsɛ lɛ ní edamɔ shi kɛha amɛ lɛ, ni efee nakai. Ani okɛ ohe ewo anɔkwa sɔɔmɔ ni tamɔ nɛkɛ mli? Kɛji nakai ni lɛ, belɛ ani oyaa nɔ owieɔ ohaa Maŋtsɛ lɛ kɛ Maŋtsɛyeli lɛ?

 4. Mɛni ji nibii ni Paulo kɛ Yohane,kɛɛ ni amɛŋmala ni wɔhu wɔbaanyɛ wɔha ale bianɛ akɛ Yehowa Nyɔŋmɔ jalɔi anɔkwafoi?

⁴ Yɛ be mli ni Paulo tsɔɔ Maŋtsɛyeli lɛ he tsɔɔmɔi lɛ amli lɛ, etsɔɔ wekukpaa ni ka Yesu Kristo kɛ Yehowa Nyɔŋmɔ teŋ yɛ Maŋtsɛyeli gbɛjianɔtoo lɛ mli lɛ mli akɛ Yehowa ji jeŋ muu fɛɛ Maŋtsɛ kpeteŋkpele lɛ. “Ni Kristo yitso ji Nyɔŋmɔ.” (1 Kor. 11:⁠3) Paulo tsɔɔ nɔ ni baa mli yɛ Kristo nɔyeli afii 1,000 lɛ naagbee. (1 Kor. 15:​24-28) Kɛmiiba Ŋ.B. afii oha lɛ naagbee lɛ bɔfo Yohane anɔkwafo lɛ hu ŋma wiemɔi ni tsɔɔ Yehowa nifeemɔi wuji ni baaba yɛ wɔsɛɛ be mli, ni tsɔɔ emaŋtsɛyeli lɛ anunyam efɔ shi.(Kwɛmɔ Kpojiemɔ 12:​9, 10; 19:6; 20:​10, 14; 21:​3, 4, 22-24.) Enɛɛmɛi ji nibii ni wɔ, akɛ Yehowa jalɔi anɔkwafoi ni yɔɔ ŋmɛnɛ lɛ, wɔbaanyɛ wɔha gbɔmɛi abii ale ni wɔma bɔni Nyɔŋmɔ maŋtsɛyeli lɛ he hiaa lɛ nɔ mi kɛ nɔ ni ebaafee kɛha adesai fɛɛ kɛha Yehowa yijiemɔ. Esa akɛ atsɔɔ nɔ ni Maŋtsɛyeli lɛ ji, ni atsɔɔ mli aha gbɔmɛi abii, ni aha amɛle akɛ Nyɔŋmɔ maŋtsɛyeli lɛ pɛ ji amɛ hiɛnɔkamɔ kome. Ebaabi shi kɛya naanɔ yɛ yinɔi ni baaba lɛ fɛɛ mli.a

 5. (a) Mɛni ji nɔ ni Yehowa tsuji kɛkpeɔ yɛ bei kɛ bei amli? (b Yɛ shitee-kɛ-woo ni ba yɛ Jeŋ Ta I lɛ mli lɛ fɛɛ sɛɛ lɛ, mɛni ji nɔ ni Yehowa webii enyɛ amɛfee kɛjɛ nakai be lɛ mli?

⁵ Lala 145:14 tee nɔ ekɛɛ yɛ Hebri alfabɛta samekh ni ji 15 nɔ̃ lɛ shishi akɛ: “Yehowa sɔoɔ mɛi fɛɛ ni gbeɔ shi lɛ, ni eholeɔ mɛi fɛɛ ni edɔrɔ kɔmɔɔ lɛ anɔ.”

Mɛi ni jaa Yehowa yɛ anɔkwale mli, ni amɛjajeɔ emaŋtsɛyeli lɛ amɛtsɔɔ lɛ kɛ shiteekɛwoo kɛ naagbai kpeɔ yɛ bei kɛ bei amli yɛ anɔkwa ni amɛyeɔ Yehowa lɛ hewɔ. (1 Mose 3:15) Shi odaseyelii ni eho lɛ tsɔɔ bɔni Yehowa, sɔoɔ, ni eyeɔ ebuaa mɛi ni ji ejalɔi ni eholeɔ amɛ nɔ yɛ be mli ni amɛba nɔnyɛɛ shishi lɛ ni ekɛyeɔ eshiwooi lɛ anɔkwale (1 Mose yitso 15; agbɛnɛ kwɛmɔ nɔkwɛmɔ nii babaoo ni yɔɔ Kojolɔi awolo lɛ mli lɛ.) Yɛ wɔ afii ohai 20 nɛɛ mli kɛbashi afi 1980 naagbee lɛ, wɔna bɔni Yehowa jie shwɛɛnii lɛ ni afɔ amɛ mu lɛ kɛ “tooi krokomɛi” lɛ kɛjɛ Babilon nɔnyɛɛ shishi. Nɔnyɛɛ kpele ba shwɛɛnii ni afɔ amɛ mu lɛ anɔ yɛ Jeŋ Ta I lɛ mli. Shi Yehowa hole amɛ nɔ kɛtsɔ emumɔ kɛ enɔkwa wiemɔ lɛ nɔ. Yɛ no sɛɛ etsɛɛɛ kwraa, yɛ amɛ kpee ni amɛfee yɛ Cedar Point, Ohio, yɛ afi 1922 lɛ shishi lɛ, amɛkɛ anɔkwayeli tswa amɛfai shi akɛ amɛbaaya nɔ ni amɛtswa Maŋtsɛ lɛ kɛ Maŋtsɛyeli lɛ he adafi. Kɛje nakai be lɛ nɔ kɛbaa nɛɛ Yehowa etee nɔ ekudɔ amɛ, ni enɛ eha ále egbɛi lɛ kɛ emaŋtsɛyeli lɛ yɛ jeŋ fɛɛ.

 6. Mɛɛ niyenii he gbɛjianɔ Yehowa eto kɛha ewebii?

⁶ “Bo gbɛ hiŋmɛii fɛɛ kwɛɔ, ni bo ohaa amɛ amɛniyenii yɛ be ni sa mli.” (Lala 145:15) Yehowa jalɔi anɔkwafoi lɛ amumɔŋ niyenii lɛ he miihia amɛ titri yɛ nɛkɛ gbii nɛɛ amli. Amɛle akɛ “amɛmumɔŋ nibii ahe lilaa amɛ.” (Mat. 5:​3, NW) Amɛkɛ hiɛnɔkamɔ ekwɛ Yehowa gbɛjianɔtoo lɛ gbɛ akɛ ebaaha amɛ mumɔŋ niyenii babaoo bɔni sa. (Mat. 24:45-47) Nyɔŋmɔ tsuji ahiɛnɔkamɔ yɛ enɛ gbɛfaŋ lɛ eba mli anɔkwale, ni amɛyɛ hiɛnɔkamɔ akɛ Yehowa baaya nɔ ni eha amɛ mumɔŋ ni yenii ni he hiaa amɛ lɛ yɛ be fɛɛ mli “yɛ be ni sa mli.

 7. Yehowa ji Nihalɔ titri lɛ yɛ jamɔ sane lɛ he yɛ mɛɛ gbɛ nɔ?

⁷ Yɛ enɛ kɛ gbeekpamɔ mli lɛ, Lala 145:16 tee nɔ ekɛɛ akɛ: “Ogbɛɔ odɛŋ, ni ohaa nɔ fɛɛ nɔ ni hiɛ ka tɔɔ kɛ nii ni etaoɔ.”

Yehowa Nyɔŋmɔ pɛ ji mɔ ni yɔɔ jeŋ muu fɛɛ, ni ákɛ Nihalɔ lɛ, ehaa nii ni etaaa. Lɛ ji ŋwɛi Tsɛ lɛ, kɛ Wala-Halɔ. Anaa emlihilɛ kɛ ejurɔfeemɔ lɛ yɛ enibɔɔ nitsumɔi lɛ fɛɛ mli, kɛ agbɛnɛ yɛ gbɛjianɔ kpakpa ni eto kɛha gbɔmɔ kɛ bɔɔnii fɛɛ ni yɔɔ shikpɔŋ nɔ lɛ mli. Akɛni ekɛ jamɔ henumɔ ko ewo wɔmli hewɔ lɛ, Yehowa kɛ mlihilɛ ejie ehe kɛ eyiŋtooi akpo etsɔɔ adesa, ni mɛi ni jɔɔ amɛhe nɔ amɛhaa Yehowa Nyɔŋmɔ, ni amɛkɛ amɛhe woɔ ejamɔ kɛ esɔɔmɔ mli lɛ ena bɔni Yehowa gbɛɔ edɛŋ ni eduroɔ mɔ nii babaoo. Nɛkɛ niiashikpamɔi nɛɛ fɛɛ woɔ mɔ hewalɛ ni wɔbaanyɛ wɔna hekɛnɔfɔɔ akɛ Yehowa baaya nɔ ekɛ emumɔ lɛ aha etsuji ni ekpaŋ amɛ kaimɔ, gbɛtsɔɔmɔ kɛ mumɔŋ yelikɛbuamɔ yɛ naagbee gbii ni mliwawai nɛɛ amli.​—Lala. 119:129.

 8. Yehowa jieɔ anɔkwayeli kpo etsɔɔ yɛ mɛɛ gbɛ nɔ?

⁸ Akɛni wɔyeɔ Yehowa anɔkwa hewɔ lɛ, lɛ hu eyeɔ wɔ anɔkwa. No hewɔ lɛ, “Yehowa ja yɛ egbɛi fiaa mli, ni durolɔ ji lɛ yɛ enitsumɔi fiaa mli.” (Lala 145:⁠17)

Akɛni wɔbatsɔmɔ Yehowa tsuji ni wɔjɔɔ wɔhe nɔ wɔha lɛ kɛ anɔkwafoi ni fiɔ emaŋtsɛyeli lɛ sɛɛ ni wɔji hewɔ lɛ, wɔbaanyɛ wɔkɛ wɔhe afɔ Nyɔŋmɔ nɔ yɛ be fɛɛ mli. Ekɛ etsuji yeɔ yɛ jalɛ kɛ duromɔ naa yɛ be fɛɛ mli, Enaakpɛɛ sui lɛ tsakeee. No hewɔ lɛ kɛji akɛ wɔkɛ wɔhe wo Yehowa jamɔ kɛ esɔɔmɔ mli pɛ lɛ, wɔnaa nɔmimaa akɛ eshiŋ wɔ gbi ko gbi ko. “Durolɔ ji lɛ yɛ enitsumɔi fiaa​—mli” lɛlɛŋ. No hewɔ lɛ, wɔyɛ yiŋtoo kpakpa kroko hu yɛ biɛ akɛ wɔgba mɛi krokomɛi nibii ni kɔɔ Yehowa kɛ enaakpɛɛ sui sɔrɔtoi lɛ ahe sane ni wɔfɔ nine wɔtsɛ amɛ ni amɛbafata wɔhe yɛ wala ni ajɔɔ nɔ ni akɛjieɔ Yehowa yi yɛ anɔkwale mli lɛ mli,​—Okɛto Lala 107 he.

 9. Mɛɛ gbɛfaŋ nɔ hemɔkɛyeli naa yɛ Yehowa ni atsɛɔ lɛ lɛ mli, ni te esa akɛ afee Yehowa ni atsɛɔ nɛɛ aha tɛɛŋ?

⁹ No hewɔ lɛ, wɔbaanyɛ wɔjaje nɛkɛ wiemɔi nɛɛ ni wɔkɛjie eyi: “Yehowa bɛŋkɛɔ mɛi fɛɛ ni tsɛɔ lɛ lɛ, mɛi fɛɛ ni tsɛɔ lɛ yɛ anɔkwale mli lɛ.” (Lala 145:18)

Yehowa ni wɔɔɔtsɛ lɛ lɛ he miihia. Esa akɛ afee nakai yɛ anɔkwa hemɔkɛyeli mli, (Rom. 10:​10-15) Lalatsɛ lɛ ŋma bɔni Yehowa bɛŋkɛɔ mɛi fɛɛ ni tsɛɔ lɛ yɛ gbɛ ni ja nɔ lɛ, ni nɔ ni fata he hu ji hemɔkɛyeli ni wɔɔɔ na lɛ. (Heb. 11:⁠6) Ni Yehowa ni wɔtsɛɔ lɛ nɛɛ jeee nɔ ko ni yɔɔ teemɔŋ, shi moŋ eji nɔ ko ni ajajeɔ yɛ gbɔmɛi ahiɛ akɛ wɔyɛ hemɔkɛyeli yɛ Yehowa mli ni wɔkɛ wɔhe fɔɔ enɔ. Paulo ma bɔni ehe hiaa akɛ ajaje nibii kpakpai lɛ ahe “sanekpakpa!” lɛ atsɔɔ ni ashiɛ koni ehe aba sɛɛnamɔ aha mɛi krokomɛi lɛ nɔ mi. Mɛi ni jieɔ Yehowa yi kɛtsɔɔ tsɛmɔ ni amɛtsɛɔ lɛ lɛ ayi miifa babaoo ejaakɛ “sanekpakpa” lɛ he shiɛlɔi anɔkwafoi lɛ ateŋ mɛi babaoo miiya nɔ amɛmiiwie Yehowa he amɛmiitsɔɔ mɛi krokomɛi Akɛni amɛhaa amɛleɔ Yehowa kɛ enunyam lɛ kɛ egbojee, kɛ agbɛnɛ emaŋtsɛyeli lɛ hewɔ lɛ, yijielɔi nɛɛ haa nɛkɛ gbɔmɛi nɛɛ naa hemɔkɛyeli beni afee ni amɛhu amɛbafata he ni atsɛ Yehowa gbɛi lɛ ni amɛbɛŋkɛ lɛ. Yiwalaheremɔ gbɛ lɛ naa ka kɛha mɛi fɛɛ ni sumɔɔ akɛ amɛaatsɔ mli, ejaakɛ ajieee mli, yɛ maŋ nɔ ni mɔ ko jɛ, ehewolɔ nɔ su aloo ewiemɔ hewɔ, ni mɛi ni kɛ amɛ hemɔkɛyeli woɔ Yehowa mli amɛtsɛɔ lɛ yɛ anɔkwayeli mli lɛ ahiɛnɔkamɔ efeee yaka. Kwɛ bɔni eji sanekpakpa akɛ Yehowa aaaŋmɛ wɔ gbɛ ni wɔkɛ lɛ ana wekukpaa ni wɔbɛŋkɛ lɛ! Nakai enɛ ji titri lɛ yɛ naagbee be ni mliwa nɛɛ mli, beni ebafee faŋŋ akɛ ehe miihia fe be fɛɛ akɛ wɔkɛ wɔhe aaafɔ Yehowa Nyɔŋmɔ nɔ kwraa kɛha yiwalaheremɔ lɛ.

10. Mɛni hewɔ Yehowa baafee nɔ ni mɛi ni sheɔ Iɛ gbeyei lɛ taoɔ lɛ aha amɛ lɛ?

¹⁰ “Mɛi ni sheɔ Iɛ gbeyei lɛ, efeɔ nɔ ni amɛtaoɔ ehaa amɛ, eboɔ amɛbolɔmɔ toi, ni ehereɔ amɛyiwala.” (Lala. 145:⁠19)

Mɛi ni sheɔ Yehowa gbeyei yɛ anɔkwale mli lɛ jɔɔ amɛhe nɔ amɛhaa lɛ, ni nɔ ni amɛsumɔɔ ji ni amɛfee esuɔmɔnaanii. Wɔyɛ nɔ ni wɔɔdamɔ nɔ ni wɔkɛ wɔhe afɔ Yehowa nɔ akɛ wɔyelikɛbuamɔ kɛ yiwalaheremɔ jɛɛhé, yɛ be mli ni wɔbɔɔ mɔdɛŋ akɛ wɔɔɔfee esuɔmɔnaanii lɛ. “Ni enɛ ji ekaa ni wɔyɔɔ yɛ ehiɛ lɛ, akɛ, kɛji wɔba nɔ ko yɛ esuɔmɔ naa lɛ, eboɔ wɔ toi. Ni kɛji wɔle akɛ nɔ fɛɛ nɔ ni wɔbaa lɛ lɛ eboɔ wɔ toi lɛ, belɛ wɔle akɛ nii ni wɔbaa lɛ lɛ wɔnine eshɛ nɔ.” (1 Yoh. 5:​14, 15) Wɔle akɛ, yɛ nɛkɛ gbii nɛɛ amli lɛ, eji Yehowa suɔmɔnaanii akɛ wɔjaje Maŋtsɛyeli lɛ he sanekpakpa lɛ ni wɔba esɔɔmɔ krɔŋŋ lɛ ashwere. Esa akɛ efee nɔ ni wɔsumɔɔ akɛ wɔɔɔha gbɔmɛi lɛ ale sane kpeteŋkpele ni ka shi ni kɔɔ Yehowa jeŋ muu fɛɛ maŋtsɛyeli he lɛ, eyɛ mli akɛ ateɔ shi awoɔ wɔ waa yɛ nakai feemɔ mli moŋ. No hewɔ lɛ hegbɛ lɛ yɛ kɛha gbɔmɛi sɔrɔtoi fɛɛ ni amɛkpɛlɛ Yehowa sane lɛ nɔ ni amɛná emli hemɔkɛyeli, amɛkase etsui shi ni eto eha adesa weku lɛ he nii kɛ agbɛnɛ bɔni esumɔɔ akɛ adesai fɛɛ atsake ni ahere amɛyiwala lɛ he nii.

11. Mɛɛ gbɛ nɔ Yehowa tsɔɔ ehaa etsuji ni bolɔɔ tseɔ lɛ kɛha yelikɛbuamɔ lɛ hetoo?

¹¹ No hewɔ lɛ nɔ ni wɔshweɔ titri ji ni wɔtsu nɛkɛ Maŋtsɛyeli nɛɛ he nii wɔgbe naa. Jeee wɔ pɛ wɔtsuɔ nitsumɔ nɛɛ. Yehowa tsuji ji wɔ ni wɔkɛ lɛ fɛɛ tsuɔ. Esa akɛ wɔtsɛ wɔtsɛ Iɛ yɛ nɛkɛ “naagbee gbii” ni mliwa nɛɛ amli kɛha yelikɛbuamɔ, ni kɛji akɛ wɔshɛ sane ni ka shi lɛ naagbee ni “gog ni jɛ magog” lɛ je etutuamɔ lɛ shishi, taakɛ agba afɔ shi yɛ Ezekiel 38 kɛ 39 lɛ, ehe baahia ni wɔkɛ wɔhe afɔ Yehowa nɔ ni wɔtsɛ lɛ beni afee ni ebaa wɔyi ni ehere wɔyiwala. Ahere Maŋtsɛ David yiwala yɛ gbɛi sɔrɔtoi ni ekaaa nɔ yɛ be mli ni ehenyɛlɔi lɛ tiuɔ lɛ lɛ. Ehe bahia ni Kristo Yesu kɛ ewala aha yɛ Yehowa yiŋtoo hewɔ, shi enine shɛ gbohiiashitee nɔ kɛtsɔ Yehowa nɔ. No hewɔ lɛ Yehowa nyɛɔ eyeɔ nɔnyɛɛ loo shitee-kɛ-woo ni anɔkwale lɛ he henyɛlɔi lɛ kɛbaaba lɛ anɔ, ni eboɔ etsuji ni bolɔɔ tsɛɔ lɛ kɛha yelikɛbuamɔ ni ekolɛ amɛbaagboi ni ehe baahia ni ehere amɛyiwala kɛtsɔ gbohiiashitee nɔ lɛ abolɔmɔ lɛ toi.

12. Mɛni hewɔ esaaa akɛ wɔsheɔ gbeyei yɛ be mli ni ekpataa efɔŋfeelɔi lɛ ahiɛ lɛ?

¹² No hewɔ lɛ, eka he eji anɔkwale, akɛ “Yehowa baa mɛi fɛɛ ni sumɔɔ lɛ lɛ ayi; Shi mɛi fɔji lɛ, eeekpata amɛfɛɛ amɛhiɛ.” (Lala 145:⁠20)

Akɛni wɔshɛ heni efɔŋfeemɔ eda fe fɛɛ ni “amanehulu kpeteŋkpele” lɛ ka wɔhiɛ nɔŋŋ hewɔ lɛ, eji miishɛɛ kɛ jɔɔmɔ ákɛ akɛ wiemɔ nɛɛ aaama nɔ mi aha wɔ akɛ Yehowa baa mɛi fɛɛ ni sumɔɔ lɛ lɛ ayi. (Mat. 24:21) Be eshɛ kɛha nɛkɛ gbɔmɛi fɔji nɛɛ ahiɛkpatamɔ, ni esa akɛ abɔ amɛ kɔkɔ. Shi Yehowa tsuji, ákɛ kuu lɛ, amɛbaatsɔ “amanehulu kpeteŋkpele” ni akɛbaa efɔŋfeelɔi lɛ anɔ lɛ mli, ni nɛkɛ gbɛ nɔ amɛbaatsɔ ni amɛna Yehowa yiwalaheremɔ ni yɔɔ amɛgbɛfaŋ lɛ. Yehowa sumɔɔ mɛi ni yeɔ lɛ anɔkwale lɛlɛŋ, ni ehiɛ kpaŋ amɛnɔ yɛ emlifu kpeteŋkpele ni ekɛbaate shi ashi efɔŋfeelɔi lɛ mli. Yehowa hewalɛ nitsumɔi ni kɔɔ bɔni ebaa ewebii ayi ni ejieɔ amɛ yɛ be kometoo lɛ nɔŋŋ ni ekɛ hiɛkpatamɔ kɛ toigbalamɔ baa efɔŋfeelɔi anɔ lɛ he nɔkwɛmɔ nii fa babaoo yɛ Ŋmalɛi lɛ amli. Yɛ anɔkwale mli lɛ, wɔkɛ tsuiyeli miimɛ be mli ni efɔŋfeelɔi lɛ kɛ mɛi ni teɔ shi woɔ Yehowa maŋtsɛyeli lɛ ahiɛkpatamɔ lɛ baaba ni ajie amɛ kwraa kɛjɛ shihilɛ mli lɛ.

13. (a) Mɛɛ gbɛ nɔ Yehowa etsɔ ebaa eŋmɛnɛŋmɛnɛ beaŋ tsuji lɛ ayi? (b) Mɛni ji nɔ ni Yehowa esaa eto kɛha mɛi ni sumɔɔ lɛ lɛ?

¹³ Yɛ nɛkɛ “naagbee gbii” nɛɛ fɛɛ mli lɛ, Yehowa tsuji etee nɔ amɛtsɛ lɛ kɛha yelikɛbuamɔ ni ámɛjie suɔmɔ ni amɛyɔɔ kɛha lɛ lɛ kpo. Yehowa etee nɔ ebaa amɛyi ni ekwɛ etsuji nɛɛ anɔ kɛtsɔ shihilɛi ni mliwawai amli, titri lɛ yɛ Jeŋ Ta II be lɛ mli, yɛ be mli ni agu amɛnitsumɔ lɛ yɛ je lɛŋ hei sɔrɔtoi babaoo ni akɛ akpei babaoo wo yiwalɛ nsraŋ kɛ gboklɛfoi atsui amli lɛ. Gbɔmɛi asafoi yuu kɛ gidigidifeemɔ te shi wo amɛ yɛ shikpɔŋ lɛ nɔ hei sɔrɔtoi pii. Shi Maŋtsɛyeli lɛ he sanekpakpa lɛ jajemɔ lɛ tee nɔ ni Yehowa jie mlihilɛ kpo etsɔɔ etsuji, eha amɛyi fa, eshɛje amɛ mii kɛtsɔ amɛyi ni eha efa yɛ je lɛŋ he fɛɛ he lɛ nɔ. Eji Yehowa yiŋtoo akɛ Maŋtsɛyeli lɛ nɔyeli kɛtsɔ Kristo nɔ lɛ mli aaalɛɛ kɛya shikpɔŋ lɛ nɔ he fɛɛ he. Nakai maŋtsɛyeli lɛ shishibii baahi shikpɔŋ nɛɛ nɔ akɛ “asafo babaoo” ni jɛ “tooi krokomɛi” lɛ ateŋ, yɛ be mli ni amɛtsɔɔ amanehulu lɛ mli ni mɛi babaoo ni abaatee amɛ shi kɛjɛ amɛ gbohii abui amli kɛtsɔ shitee nɔ lɛ hu aaabafata amɛhe lɛ. No hewɔ lɛ efɔŋfeelɔi lɛ ahiɛkpatamɔ etsɔŋ oshara kɛhaŋ Yehowa tsuji, shi moŋ, Yehowa baatsu suɔmɔ ni etsuji lɛ jie lɛ kpo amɛtsɔɔ lɛ lɛ he nii, ni ebaabaa amɛyi ni ejie esuɔmɔ, emɔbɔnalɛ kɛ emlihilɛ kpo etsɔɔ amɛ. Ni yɛ esuɔmɔ nɛɛ hewɔ lɛ, ésaa shikpɔŋ nɔ paradeiso ko ni yɔɔ naakpɛɛ ni abaana naanɔ wala yɛ nɔ eto eha ‘etooi krokomɛi’ lɛ. (Luka 23:43) Nɔ ni Yehowa jeŋ muu fɛɛ maŋtsɛyeli he sane kpeteŋkpele ni ka shi lɛ ni aaana naa loo aha eba naagbee lɛ baafee pɛ ji jɔɔmɔ ni eeetsɔ eha mɛi ni sumɔɔ Yehowa lɛ, ni amɛbaana hegbɛ ni amɛhiɛ asɔ Yehowa babaoo yɛ be mli ni afii lɛ hoɔ yaa lɛ. Kwɛ miishɛɛ ni eeeji akɛ mɔ ko aaahi shi yɛ be mli ni Lala 150 lɛ naagbee kuku lɛ aaaba mli, yɛ be mli ni “nɔ fɛɛ nɔ ni muɔ” lɛ aaajie Yehowa yi ni efɔŋfeelɔi etee kɛmiiya naanɔ lɛ!​—Kk. 6.

14. Mɛɛ Yehowa jɔɔmɔi wɔbaanyɛ wɔwie he?

¹⁴ Kwɛmɔ osɛɛ kɛ oosumɔ, ni ebaana jɔɔmɔi babaoo ni Yehowa efɔse eshwie wɔ nɔ lɛ. Kwɛmɔ bɔni eha wɔtɔrɔ kɛ mumɔŋ niyenii kpakpai. Kwɛmɔ hegbɛ ni yɔɔ naakpɛɛ ni ekɛha wɔ akɛ wɔtsɔmɔ etsuji lɛ po bianɛ, kɛ naakpɛɛ gbɛkpamɔi ni jwere wɔhiɛ yɛ wɔsɛɛ be mli lɛ fɛɛ lɛ. Akɛni hegbɛ yɛ akɛ wɔbaatsɔmɔ mɛi ni baaje Harmagedon mli hewɔ lɛ, okɛ nyamɔ akpa gbohiiashitee be lɛ kɛ miishɛɛ nitsumɔ ni yɔɔ naakpɛɛ ni ji tsɔsemɔ ni wɔkɛ aaaha mɛi fɛɛ ni baajɛ gbohii abui amli aba lɛ gbɛ. Amɛteŋ mɛi pii baakase Maŋtsɛ kpeteŋkpele Yehowa he nii yɛ klɛŋklɛŋ be mli kwraa. Esa akɛ amɛle mɔ ni wala mli ni amɛba lɛ jɛ lɛ lɛ shikome ekoŋŋ. Namɔ baakɛɛ amɛ? Ani wɔteŋ mɔ fɛɛ mɔ naŋ miishɛɛ akɛ eeefee nakai? Hɛɛ, wɔmiikpa gbɛ akɛ wɔɔɔjie Yehowa yi kɛya naanɔ.

15. Mɛɛ hegbɛi ni kɔɔ Nyɔŋmɔ maŋtsɛyeli lɛ he lɛ ji wɔ nɔ?

¹⁵ Shi amrɔ nɛɛ hu? Mɛni ji nɔ ni ofeɔ yɛ sane kpele ni ka shi ni kɔɔ Yehowa maŋtsɛyeli he lɛ he? Ani ofata anɔkwafoi ni kɛ amɛhe fɔɔ Yehowa nɔ ni wieɔ emaŋtsɛyeli lɛ anunyam lɛ he daa gbi lɛ ahe? Eba akɛ wɔteŋ mɔ fɛɛ aaafee Yehowa maŋtsɛyeli kɛtsɔ e-Bi Kristo Yesu, David kpeteŋkpele lɛ ni ewo lɛ maŋtsɛ lɛ nɔ lɛ sɛɛfilɔ anɔkwafo, ni eba akɛ wɔɔɔjɛ wɔtsui muu lɛ fɛɛ mli wɔtswa wɔfai shi akɛ wɔɔɔjie Yehowa yi yɛ faŋŋ mli taakɛ Maŋtsɛ David fee lɛ, mɔ ni kɛɛ akɛ: “Minaabu aaagba Yehowa yijiemɔ, ni miheloo fɛɛ aajie egbɛi krɔŋkrɔŋ lɛ yi daa kɛaatee naanɔ” Iɛ.​—Lala 145:⁠21b.

[Shishigbɛ niŋmai]

[Mfonirii ni yɔɔ baafa 14]

Anɔkwafoi wieɔ Yehowa maŋtsɛyeli lɛ anunyam lɛ he