15. Mɛni ji shishinumɔ titri ni jeɔ kpo yɛ David wiemɔi ni yɔɔ Lala 19:​8-14 lɛ mli?

¹⁵ Eyɛ mli akɛ wɔsumɔɔ Yehowa mla lɛ moŋ, shi bei komɛi lɛ wɔtɔ̃ɔ. Eka shi faŋŋ akɛ enɛ haoɔ wɔ, taakɛ efee David, mɔ ni sumɔɔ Nyɔŋmɔ mlai, ekpɔi, ekitai, kɛ ekojomɔi lɛ babaoo fe shika tsuru po lɛ. Ekɛɛ: “Asaŋ no nɔŋŋ tsɔɔ otsulɔ nii; amɛnɔ yeli lɛ, nyɔmɔwoo kpele yɛ mli. Namɔ aaanyɛ etɔmɔi ana? Ŋɔɔ miteemɔŋ tɔmɔi lɛ ofa mi! Asaŋ buu mihe kɛjɛ hiɛ-kɛ-hekamɔ eshai amli, koni amɛkaye minɔ! No lɛ maye emuu, ni mihe aaaje nɔtɔmɔi wuji amli.” (Lala 19:​8-14) Nyɛhaa wɔsusuɔ wiemɔi nɛɛ ahe wɔkwɛa.

17. Mɛɛ gbɛ nɔ eshai ni akɛteɔ lɛ naa mɔ nɔ hewalɛ yɛ, ni kɛlɛ mɛɛ gbɛ nɔ aaatsɔ ana eshaifaa kɛ heyeli?

¹⁷ Eshai ni akɛteeɔ lɛ hu baanyɛ ekɛ haomɔi aba. Taakɛ Lala 32:​1-5 tsɔɔ lɛ, David bɔ mɔdɛŋ akɛ ekɛ esha ni efee lɛ baato, shi ekɛɛ: “Beni miŋɔtee lɛ, miwui ahe kwa yɛ mimli yɛ midaa hũumɔ hewɔ. Ejaakɛ shwane kɛ nyɔɔŋ fɛɛ lɛ onine tsii yɛ minɔ; mimli nu ŋa tamɔ bɔ ni nii amli nu ŋaa yɛ latsaa be mli lɛ.” Mɔdɛŋ ni David bɔ akɛ eeetsimɔ henilee ni nuɔ fɔyeli he lɛ nɔ lɛ ha etɔ lɛ, ni yeyeeye-feemɔ ha ehewalɛ nɔ gbɔ tamɔ bɔ ni tso mli nu ni haa lɛ wala lɛ taa kwraa yɛ nu hɔmɔ loo yɛ latsaa be mli dɔlɛ mli lɛ. Eka shi faŋŋ akɛ enɛ ha ena amanehulu yɛ jwɛŋmɔŋ kɛ gbɔmɔtsoŋ fɛɛ ni emiishɛɛ laaje yɛ jajemɔ ni ejajeee ehe eshai lɛ hewɔ. Jajemɔ ni eeejaje etsɔɔ Nyɔŋmɔ lɛ pɛ kɛ mɔbɔnalɛ kɛ heyeli baaba. David kɛɛ: “Ajɔɔ mɔ ni aŋɔ enɔtɔmɔ afa lɛ, ni atsimɔ ehe esha nɔ lɛ! . . . Mijaje mihe esha lɛ mitsɔɔo, ni minɔsha lɛ, mikɛteee. Mikɛɛ akɛ: ‘Majaje minɔtɔmɔ matsɔɔ Yehowa!’ Ni bo lɛ okɛ mihe esha nɔsha lɛ fa mi.” Yelikɛbuamɔ ni suɔmɔ yɔɔ mli ni jɛɔ Kristofoi onukpai adɛŋ lɛ baanyɛ aye abua kɛha mumɔŋ hewalɛnamɔ oyayaayai.​—Abɛi 28:​13; Yakobo 5:​13-20.