“Yehowa Ji Mi-Kwɛlɔ”
“Yehowa ji mi-Kwɛlɔ, nɔ ko nɔ ko ehiaŋ mi.”—LALA 23:1.
1, 2. Mɛni ji nibii komɛi ni David tsu, ni lalai enyiɛ eŋmala?
BO LƐ susumɔ shihilɛ nɛɛ he: Filisti asraafoi kɛ Israel asraafoi miikpe. Goliat, Filistinyo obalaŋ lɛ ebuuu nɔ ko nɔ ko. Obalanyo fioo ko ni akromia kɛ tɛi pɛ ehiɛ jo foi koni ekɛ lɛ akpe. Akromia tɛ ni afɔ lɛ jogbaŋŋ tswa obalaŋ lɛ hiɛnaa ni egbe lɛ amrɔ nɔŋŋ. Namɔ ji nakai obalanyo lɛ? David, tookwɛlɔ ni ye kunim ni yɔɔ naakpɛɛ nɛɛ yɛ Yehowa yeli-kɛ-buamɔ naa lɛ ni.—1 Samuel yitso 17.
2 Yɛ be ni sa mli lɛ, obalanyo nɛɛ batsɔ Israel maŋtsɛ, ni eye maŋtsɛ afii 40. Eji kpaa saŋkutswalɔ ni he esa waa ni eŋmala ni eto lalai ahe gbɛjianɔ yɛ Nyɔŋmɔ mumɔ lɛ tsirɛmɔ naa. Agbɛnɛ David ŋmala lalai ni ŋɔɔ fe 70 ni eji hewalɛwoo kɛ gbɛtsɔɔmɔ jɛɛ he kɛha Yehowa webii ni yɔɔ ŋmɛnɛ lɛ. Amɛteŋ nɔ ni ale waa ji Lala 23. Mɛni hewɔ ogbeleee o-Biblia lɛ ni onyiɛ sɛɛ yɛ be mli ni wɔkaseɔ lala nɛɛ kuku fɛɛ kuku he nii lɛ?
Yehowa, Kwɛlɔ ni yɔɔ Suɔmɔ
3. (a) Mɛɛ bei amli nɛkɛ David kɛ ewala fɔ oshara mli koni ekɛbu toi lɛ ahe? (b) Yehowa ji wɔ-Kwɛlɔ, yɛ mɛɛ shishinumɔ naa?
3 “Yehowa ji mi-Kwɛlɔ.” (Lala 23:1) Akɛ tookwɛlɔ ni he esa lɛ, David le bɔ ni anyiɛɔ toi lɛ ahiɛ, alɛɔ amɛ ni abuɔ amɛhe. Akɛ nɔkwɛmɔ nɔ lɛ, ekɛ ekaa fa etoi lɛ ahe kɛjɛ jata ko he yɛ be ko mli kɛ agbɛnɛ kɛjɛ oshishibirishi ko hu he yɛ be kroko mli. (1 Samuel 17:34-36) David toi lɛ kɛ amɛhiɛ fɔɔ amɛkwɛlɔ lɛ nɔ kwraa. Shi kɛ akɛto Yahowa he lɛ, David diɛŋtsɛ lɛ eji too. Akɛni David nu he akɛ eyɛ shweshweeshwe yɛ Yehowa suɔmɔ kwɛmɔ shishi lɛ, eeenyɛ ekɛɛ akɛ: “Yehowa ji mi-Kwɛlɔ.” Ani onuɔ shweshweeshwe shihilɛ ni tamɔ nɛkɛ yɛ tookwɛlɔ kpeteŋkpele, Yehowa Nyɔŋmɔ, shishi lɛ he? Yɛ anɔkwale mli lɛ, enyiɛɔ ejalɔi ni tamɔ toi lɛ ahiɛ, elɛɔ amɛ ni ebuɔ amɛhe ŋmɛnɛ. Agbɛnɛ hu, akɛ onukpai ni ahala amɛ yɛ Yehowa Odasefoi asafoi amli lɛ, tookwɛlɔi bibii ni yeɔ anɔkwale ni yɔɔ suɔmɔ lɛ kɛ ekaa kwɛɔ toi lɛ anɔ.—1 Petro 5:1-4.
4. Yɛ mɛɛ gbɛ nɔ shihilɛ ni wɔyɔɔ mli ŋmɛnɛ lɛ tamɔ Israelbii lɛ anɔ lɛ nɔŋŋ yɛ ŋa lɛ nɔ?
4 “Nɔ ko nɔ ko ehiaŋ mi.” Susumɔ nɛkɛ sane nɛɛ he jogbaŋŋ. Yɛ Yehowa suɔmɔ kwɛmɔ lɛ hewɔ lɛ, ani onaaa henumɔ ko ni haa mɔ he jɔɔ lɛ ni haa mɔ hiɔ shi kpoo kɛ hekɛnɔfɔɔ? Ani okaiɔ nɔ ni ba Israelbii lɛ anɔ yɛ be mli ni amɛnyiɛ ŋa lɛ nɔ afii 40 lɛ? No ji akɛ, Nyɔŋmɔ ha amɛ amɛhiamɔ nibii fɛɛ! Nakai nɔŋŋ eji ŋmɛnɛ. Nɔ ko nɔ ko he ehiaaa Yehowa tsuji anɔkwafoi lɛ. Amɛteŋ mɛi pii baanyɛ awie David mumɔnaa wiemɔi nɛɛ nɔŋŋ: “Sa lɛ gbekɛ ji mi, ni agbɛnɛ mitsɔ nuumo, shi minako jalɔ ko ni akwa lɛ loo ni eseshibii miisisɛ aboloo pɛŋ.” (Lala 37:25) Ŋmɛnɛ, akɛ mumɔŋ niyenii babaoo miiha kɛmiitsɔ “tsulɔ anɔkwafo kɛ nilelɔ” lɛ nɔ. (Mateo 4:4; 24:45-47) Kɛfata kpeei sɔrɔtoi daa otsi lɛ he lɛ, wɔyɛ Biblia lɛ, woji tɛtrɛbii ni ji Buu-Mɔɔ lɛ kɛ Awake! lɛ kɛ woji krokomɛi babaoo. Nine shɛɔ mumɔŋ niyenii anɔ daa nɛɛ yɛ maji ni atsi Yehowa Odasefoi ashiɛmɔ nitsumɔ lɛ naa yɛ jɛmɛ lɛ po mli. Nɔ ko nɔ ko he ehiaaa Yehowa toi lɛ!
5. Mɛni hewɔ Yehowa toi ni yɔɔ ŋmɛnɛ lɛ yɔɔ toiŋjɔlɛ ni nɔ ko nɔ ko gbaaa amɛnaa lɛ, ni mɛni ejɛ mli eba?
5 “Ehaa mibuɔ shi yɛ lɛɛ hei ni yɔɔ frɔfrɔ.” (Lala 23:2) Lɛɛ hei ni yɔɔ frɔfrɔ nɛɛ babaoo yɛ blema Israel maŋtiasei lɛ ahe. Taakɛ bɔ ni tookwɛlɔ ni yɔɔ suɔmɔ nyiɛɔ etoi lɛ ahiɛ kɛyaa lɛɛ hei kpakpai ni yɔɔ shweshweeshwe lɛ, nakai Yehowa kwɛɔ etoi lɛ anɔ ŋmɛnɛ. Lalatsɛ lɛ kɛɛ: “Wɔ . . . ji omaŋ kɛ olɛɛ he lɛ toi.” (Lala 79:13; 95:7) Toi diɛŋtsɛ shwereɔ kɛ amɛye nii amɛtɔrɔ ni amɛnyɛ amɛjɔɔ amɛhe yɛ hulutsoo be mli. Ŋmɛnɛ hu, Yehowa toi lɛ hiɔ shi yɛ toiŋjɔlɛ kɛ hejɔlɛ mli ejaakɛ amɛyɛ hekɛnɔfɔɔ yɛ kwɛlɔi ni amɛdara yɛ mumɔŋ—asafoi kɛ kpokpai anɔkwɛlɔi ni atsɔse amɛ lɛ amli. Nɔ ni ejɛ enɛ mli eba ji akɛ mumɔŋ toi lɛ ayi miifa babaoo. Gbɔmɛi pii ni tsutsu lɛ Babilon Kpeteŋkpele lɛ mli apasa tookwɛlɔi lɛ efee amɛ niseniianii lɛ ena miishɛɛ babaoo bianɛ ni amɛtsui enyɔ amɛmli akɛ Yehowa toi.
6. Yehowa ‘kudɔɔ wɔ kɛyaa nui ni he jɔ lɛ ahe’ yɛ mɛɛ gbɛ nɔ?
6 “Ewaa mi kɛyaa nui ni he jɔ lɛ ahe.” Yɛ Israel lɛ, esa akɛ tookwɛlɔ lɛ anyiɛ etoi lɛ ahiɛ kɛya kpaakpo loo nui ahe koni amɛyanu nu. Shi ewa akɛ aaana nu yɛ aharabata loo hulutsoo be mli. Ŋmɛnɛ, Yehowa ‘nyiɛɔ wɔhiɛ kɛyaa nui ni he jɔ lɛ ahe’ kɛtsɔ anɔkwale nui babaoo ni ekɛha lɛ nɔ. (Okɛto Ezekiel 34:13, 14 he.) Ni gbalɔ Yesaia kɛ nɛkɛ ninefɔɔ ni yɔɔ miishɛɛ nɛɛ haa: “Huui! Nyɛ mɛi fɛɛ ni kumai yeɔ nyɛ lɛ, nyɛbaa nu he!” (Yesaia 55:1) Kɛ toi lɛ nu nɛkɛ mumɔŋ nui nɛɛ lɛ, toi nɛɛ naa hebuu kɛjɛɔ kojomɔi ni naa wa tamɔ la ni baaba mɛi ni “leee Nyɔŋmɔ kɛ mɛi ni booo sanekpakpa lɛ toi” lɛ anɔ lɛ he.—2 Tesalonikabii 1:8; Kpojiemɔ 7:16, 17.
7. Mɛɛ be mli mumɔŋ miishɛjemɔ ni jɛɔ Yehowa ŋɔɔ lɛ bafeɔ nɔ ni yeɔ buaa waa, ni mɛɛ shihilɛi amli nɛkɛ Biblia mli Ŋmalɛi ni akase awo yitsoŋ lɛ baanyɛ afee nɔ ni sɛɛnamɔ yɔɔ he waa lɛ?
7 “Ehaa mitsui nyɔɔ mimli.” (Lala 23:3) Kɛ etɔ wɔ, wɔyɛ haomɔ mli, wɔnijiaŋ eje wui, aloo wɔkɛ shitee-kɛ-woo ko ni naa wa miikpe lɛ, Yehowa shɛjeɔ wɔmii loo ehaa wɔtsui nyɔɔ wɔmli kɛtsɔɔ e-Wiemɔ lɛ nɔ. No hewɔ lɛ, ehi akɛ Kristofoi kɛaafee amɛsubaŋ akɛ amɛaakane Biblia lɛ fa ko daa gbi. Ani ofeɔ enɛ? Mɛi komɛi naa akɛ eyeɔ ebuaa amɛ kɛ amɛkase Ŋmalɛi lɛ ekomɛi amɛwo amɛyitsoŋ, tamɔ 2 Mose 34:6, 7 aloo Abɛi 3:5, 6 nɛkɛ. Mɛni hewɔ sɛɛnamɔ yɔɔ enɛ he? Ojogbaŋŋ, kɛ haomɔ ko aaaba ni obɛ Biblia yɛ omasɛi lɛ, Ŋmalɛi amli miishɛjemɔ wiemɔi ni oookai lɛ baanyɛ awaje bo amrɔ nɔŋŋ. Nyɛmimɛi pii ni awoamɛ tsuŋ loo amɛyɔɔ gboklɛfoi aŋsraiaŋ yɛ jalɛ shishitoo taomɔ nii ni amɛdamɔɔ shi shiŋŋ amɛhaa hewɔ lɛ ena miishɛjemɔ kɛ hewalɛwoo kɛtsɔ kaimɔ ni amɛkaiɔ Ŋmalɛi ni tamɔ nɛkɛ hewɔ. Hɛɛ, Nyɔŋmɔ Wiemɔ lɛ haa “mɔ tsui nyaa” ni ehaa “mɔ hiŋmɛii anɔ tseɔ”!—Lala 19:8-11.
8. Ani eyɛ mlɛo akɛ aaanyiɛ “jalɛ gbɛi anɔ,” shi nakai feemɔ kɛ mɛni baa?
8 “Ekpalaa mi kɛtsɔɔ jalɛ gbɛi anɔ.” Jalɛ gbɛi anɔ nyiɛmɔ wa, shi amɛkɛ mɔ yaa wala mli. Taakɛ Yesu kɛɛ lɛ: “Agbo fintɔŋŋ kɛ gbɛ ni etsa ji nɔ ni kɛ mɔ yaa wala mli lɛ.” (Mateo 7:14) Bɔfo Paulo kɛ susumɔ ko ni tamɔ enɛ nɔŋŋ ha kɛtsɔ nɔ ni ekɛɛ kaselɔi ni yɔɔ Listra, Ikoniom kɛ Antiokia nɛɛ nɔ: “Esa akɛ wɔtsɔɔ amanehului pii amli kɛboteɔ Nyɔŋmɔ maŋtsɛyeli lɛ mli.” Ni eka shi faŋŋ akɛ Paulo le nɔ ni ewieɔ he lɛ. Beni eshwɛ fioo ni eeewie enɛ lɛ, no mli lɛ atswia lɛ tɛi yɛ Listra ni ashi lɛ akɛ mɔ ni egbo loo nɔ enyɔ enɔ!—Bɔfoi lɛ Asaji 14:19-22.
9. (a) Nyɔŋmɔ ‘nyiɛɔ wɔhiɛ yɛ jalɛ gbɛi anɔ’ yɛ mɛɛ gbɛ nɔ? (b) Lala 19:15 baanyɛ aye ebua wɔ yɛ mɛɛ gbɛ nɔ? (d) Mɛɛ ŋmalɛi baanyɛ aye abua wɔ ni wɔkwa bɔlɛnamɔ mli jeŋba shara?
9 Yehowa ‘nyiɛɔ wɔhiɛ yɛ jalɛ gbɛi anɔ’ kɛtsɔ e-Wiemɔ kɛ gbɛjianɔtoo lɛ ni etsɔɔ nɔ ekudɔɔ wɔ ni etsɔɔ wɔ nii lɛ nɔ. Shi mɛi pii nyiɛɔ gbɛ ni da kɛ gbɛ tɛtrɛɛ “ni kɛ mɔ yaa hiɛkpatamɔ mli” lɛ nɔ. (Mateo 7:13) Bɔlɛnamɔ he jeŋba shara ni egbɛ eshwa kɛ AIDS hela ni gbɛɔ shwaa babaoo lɛ maa bɔ ni ehe hiaa akɛ Kristofoi aaakwa naanyobɔɔ fɔŋ lɛ nɔ mi. (1 Korintobii 15:33) Esa akɛ wɔkwɛ jogbaŋŋ hu koni wɔkaŋmɛ gbɛ ni wɔjwɛŋmɔ miikpalaŋ kɛmiiya nibii loo gbɛi ni he tseee lɛ nɔ. (Lala 19:15) Yɛ enɛ hewɔ lɛ, nyɛhaa wɔkɛ ŋaawoo kpakpa ni Nyɔŋmɔ Wiemɔ lɛ kɛhaa wɔ yɛ bɔlɛnamɔ kɛ gbɛ ni wɔɔtsɔ nɔ wɔjo osharai ni yɔɔ nyenyeŋtswibɔɔ mli lɛ naa foi lɛ atsua nii yɛ be fɛɛ mli.—1 Korintobii 7:2-5; Efesobii 5:5; 1 Tesalonikabii 4:3-8.
10. (a) Mɛɛ gbɛnaa nii ka Yehowa Odasefoi anɔ yɛ Nyɔŋmɔ gbɛi lɛ he? (b) Mɛni hewɔ je lɛŋ bii wieɔ shiɔ wɔ yɛ bei babaoo mli lɛ? (d) Yehowa baaye abua wɔ yɛ mɛɛ shihilɛi amli?
10 “Yɛ egbɛi lɛ ahewɔ.” Gbɛnaa nii ni tsii ka Yehowa Odasefoi lɛ anɔ akɛ amɛwo Nyɔŋmɔ gbɛi lɛ hiɛ nyam ni amɛkɛ ahorabɔɔ ko akaba nɔ. (Mateo 6:9; 2 Mose 6:3; Ezekiel 38:23) Jɛ lɛŋ bii pii ahe feɔ oya kɛ Yehowa webii lɛ anaafolɔmɔ. Kɛ amɛfeɔ enɛ yɛ wɔshidaamɔ kɛha Biblia mli shishitoo taomɔ nii tamɔ he ni akɛwooo maŋsaji amli aloo krɔŋkrɔŋ ni la ji he lɛ, wɔhenilee mli tseɔ keŋkeŋ. Shi kɛji akɛ aafee enɛ yɛ efɔŋ ko ni wɔfee hewɔ lɛ, belɛ wɔmiigbe Yehowa gbɛi lɛ he guɔ. (Yesaia 2:4; Bɔfoi lɛ Asaji 15:28, 29; 1 Petro 4:15, 16) No hewɔ lɛ eba akɛ wɔɔnyɛ nɔ ni ehiii. (Lala 97:10) Kɛ eba akɛ wɔɔtsɔ yiwaa mli lɛ, Yehowa baaye abua wɔ ni ebu wɔhe yɛ be fɛɛ mli yɛ egbɛi lɛ hewɔ.
Yehowa Buɔ E-Toi lɛ Ahe
11. Mɛni ji “gbele hɔɔŋ jɔɔ” lɛ shishi, ni mɛni ji nɔ ni enɛ baakai wɔ yɛ Yesu he?
11 “Kɛ minyiɛ hɔɔŋ jɔɔ ni mli kwɔ lɛ mli po lɛ, misheee efɔŋ ko gbeyei.” (Lala 23:4, New World Translation) Isaac Leeser shishitsɔɔmɔ lɛ kaneɔ nɛkɛ: “Hɛɛ, kɛ minyiɛ gbele hɔɔŋ jɔɔ lɛŋ po lɛ, misheŋ efɔŋ ko gbeyei.” Enɛ haa wɔkaiɔ gɔji amli fɔji kɛ jɔɔi wuji ni jeɔ shishi kɛjɛɔ Yudea gɔji lɛ anɔ yɛ Ŋshɔ ni Egbo lɛ anaigbɛ kɛyaa lɛ. Jɔɔ loo gɔji ateŋ fɔji ni kooloi awuiyelɔi teɔ amɛhe yɛ ehɔɔŋi amli yɛ jɛmɛ lɛ ji he ko ni yɔɔ oshara kɛha toi. David tsɔ jɔɔi ni mli yɔɔ gbeyei amli yɛ ewala shihilɛ be mli, ni enaa ni gbele po miihe anina lɛ. Shi akɛni Nyɔŋmɔ nyiɛ ehiɛ hewɔ lɛ, enaa hekɛnɔfɔɔ ni esheee gbeyei tuutu ko. Esa akɛ wɔna Yehowa mli hekɛnɔfɔɔ nakai nɔŋŋ. Wiemɔ ni kɔɔ “hɔɔŋ jɔɔ” he nɛɛ hu baanyɛ akai wɔ Yesaia gbalɛ nɛɛ: “Mɛi ni hi gbele hɔɔŋ (hɔɔŋ jɔɔ) shikpɔŋ lɛ nɔ lɛ, la etso amɛnɔ!” Mateo wie nɛkɛ gbalɛ nɛɛ he ni ekɛto Yesu Kristo he, akɛ: “Maŋ ni tara duŋ mli lɛ ena la kpeteŋkpele, ni mɛi ni tara gbele shikpɔŋ kɛ ehɔɔŋ mli lɛ, la ete shi eha amɛ.” Yɛ mɛɛ gbɛ nɔ? Kɛtsɔ shiɛmɔ he tafaa kpeteŋkpele ni Yesu kudɔ lɛ nɔ.—Yesaia 9:1; Mateo 4:13-16.
12. (a) Yɛ mɛɛ gbɛ nɔ Yehowa tsuji kudɔɔ amɛhe yɛ yiwaa shishi yɛ maji pii amli, ni mɛni ejɛ mli eba? (b) Petro wo mra be mli Kristofoi ni awa amɛyi lɛ hewalɛ yɛ mɛɛ gbɛ nɔ?
12 David ‘sheee efɔŋ ko gbeyei.’ Nakai nɔŋŋ eji anɔkwale yɛ Yehowa tsuji ni yɔɔ ŋmɛnɛ lɛ ahe, eyɛ mli akɛ abuuu amɛ yɛ jeŋ fɔŋ ni Satan yeɔ nɔ nɛɛ mli. (1 Yohane 5:19) Gbɔmɛi pii nyɛɔ amɛ diɛŋtsɛ, ni awaa amɛ yi babaoo yɛ maji komɛi anɔ. Amɛyaa nɔ amɛshiɛɔ Maŋtsɛyeli lɛ he sanekpakpa lɛ yɛ nɛkɛ shikpɔji nɛɛ anɔ, eyɛ mli akɛ jeee yɛ faŋŋ taakɛ amɛbaasumɔ ni amɛfee lɛ. Amɛle akɛ Yehowa kɛ amɛ yɛ ni ebaabu amɛhe. (Lala 27:1) Aatsu nitsumɔ fɛfɛo yɛ maji babaoo ni ebi ni amɛtsu Maŋtsɛyeli nitsumɔ lɛ yɛ teemɔŋ lɛ amli. Yehowa Odasefoi haa lalatsɛ lɛ wiemɔi nɛɛ jijeɔ yɛ nɛkɛ maji nɛɛ amli, akɛ: “Yehowa yɛ misɛɛ, misheee gbeyei; mɛni gbɔmɔ aaanyɛmi afee?” (Lala 118:6) Nɛkɛ Odasefoi nɛɛ yɛ shihilɛ ni tamɔ mra be mli Kristofoi ni bɔfo Petro ŋma amɛ nɛkɛ hewalɛwoo wiemɔi nɛɛ mli: “Shi kɛ jalɛ hewɔ nyɛnaa amanehulu tete lɛ, ajɔɔ nyɛ. Shi nyɛkashea amɛ gbeyei, ni nyɛkahaoa hu.”—1 Petro 3:14.
13. (a) Mɛɛ tsakemɔ ko ni yɔɔ miishɛɛ ba yɛ Lala 23:4, ni mɛni hewɔ? (b) Te Kristofoi aaafee tɛŋŋ aye amɛgbeyeishemɔi anɔ kunim?
13 “Ejaakɛ okɛmi yɛ.” Ofainɛ kadimɔ nɔ ko ni yɔɔ miishɛɛ yɛ nɛkɛ wiemɔ kuku nɛɛ mli lɛ. Lalatsɛ ni mumɔ yɔɔ enɔ lɛ tsake kɛjɛ mɔ ni ji etɛ he wiemɔ mli kɛtee mɔ ni ji enyɔ nɔ. Ni eeewie Yehowa he akɛ “lɛ” moŋ lɛ, David kɛ najiaŋ gbɛi “bo” miitsu nii yɛ biɛ agbɛnɛ. Mɛni hewɔ? Ejaakɛ no bɛŋkɛ kpaakpa. Oshara kɛwɔ bɛŋkɛɔ wɔ-Tsɛ Yehowa ni yɔɔ suɔmɔ lɛ he kpaakpa. Ehaa wɔkɛ lɛ naa wekukpaa ni bɛŋkɛ kpaakpa mli ŋɔɔmɔ. Wɔbaanyɛ wɔtsɛ lɛ koni ebu wɔhe kɛtsɔ sɔlemɔ kɛ faikpamɔ nɔ, koni wɔye wɔgbeyeishemɔi lɛ anɔ kunim.—Okɛto Zefania 3:12 he.
14. (a) Mɛɛ dɛŋdadei tookwɛlɔi yɔɔ yɛ David gbii lɛ amli, ni amɛkɛtsuɔ nii yɛ mɛɛ gbɛ nɔ? (b) Tookwɛlɔi ni ji Kristofoi baanyɛ abu amɛtoi lɛ ahe ŋmɛnɛ yɛ mɛɛ gbɛ nɔ?
14 “Otso kɛ adɛhiɛmɔ tso lɛ nomɛi shɛjeɔ mimli.” Hebri wiemɔ she’vet, ni atsɔɔ shishi akɛ “tso” lɛ baanyɛ adamɔ shi aha tso ni adɔ eyitso kɔtɔŋ ni tookwɛlɔi hiɛɔ. Abaanyɛ akɛ tso kɛ dɛhiɛmɔ tso lɛ fɛɛ atsu nii ni akɛfa he ni akɛdamɔ shi aha nɔyeli hegbɛ. Eka shi faŋŋ akɛ, nɛkɛ nibii nɛɛ he baanyɛ aba sɛɛnamɔ waa ni akɛku kooloi awuiyelɔi tamɔ klaŋ kɛ onufui anaa. Abaanyɛ akɛ tookwɛlɔ tso ni adɔ eyitso kɔtɔŋ lɛ hu atsu nii ni akɛkpala toi kɛya gbɛ ni ja nɔ aloo ni akɛgbala too ni miikpalaŋ loo eebɛŋkɛ he ni ebaanyɛ egbee shi yɛ ni epila ehe lɛ kɛba sɛɛ. Ŋmɛnɛ, Yehowa haa wɔ tookwɛlɔi anɔkwafoi, asafoŋ onukpai, ni buɔ toi lɛ ahe kɛjɛɔ mumɔŋ awuiyelɔi tamɔ hemɔkɛyeli kwalɔi ahe. Aloo ehe baahia ni onukpai lɛ awo mɛi ni efee kpɔkee yɛ kpeei ni ayaa loo amɛjeɔ Kristofoi ajeŋba kpakpa gbɛ lɛ nɔ lɛ ŋaa.
Okpɔlɔŋmɛɛ Kpakpa ko yɛ Henyɛlɔi Ateŋ
15. (a) Mɛɛ tsakemɔ yɛ nɔkwɛmɔ nɔ lɛ mli ba yɛ Lala 23:5? (b) Mɛɛ anɔkwa saji tsɔɔ akɛ akɛ mumɔŋ niyenii lɛɔ Yehowa webii jogbaŋŋ, ni esoro amɛ yɛ namɛi ahe?
15 “Oŋmɛɔ mi okpɔlɔ yɛ mihenyɛlɔi ahiɛ.” (Lala 23:5) Nɔkwɛmɔ nɔ lɛ etsake yɛ biɛ kɛ shishinumɔ, kɛjɛ tookwɛlɔ nɔ kɛtee mɔ ni feɔ mɛi agbɔ lɛ nɔ. Akɛ gbɔfeelɔ ni mli hi diɛŋtsɛ lɛ, Yehowa tsɔɔ “tsulɔ” kuu ni afɔ lɛ mu lɛ nɔ ekɛ mumɔŋ niyenii babaoo haa. (Mateo 24:45) Eyɛ mli akɛ je ni nyɛɔ wɔ mli wɔyɔɔ moŋ, shi wɔyeɔ nii jogbaŋŋ wɔtɔrɔɔ. Akalaa Buu-Mɔɔ lɛ yɛ wiemɔi fe oha mli bɔni afee ni gbɔmɛi ni hiɔ shihilɛ hei ni yɔɔ sɔrɔto tamɔ South Africa, Greenland, Solomon Islands lɛ anɔ kɛ India lɛ ana mumɔŋ niyenii. Kɛfata he lɛ, asafoi aaafee 55,000 ni yɔɔ jeŋ fɛɛ lɛ yɛ maŋshiɛlɔi kɛ tsɔɔlɔi ni atsɔse amɛ jogbaŋŋ kɛ kpee hei kpakpai, ni Maŋtsɛyeli Asai ohai babaoo fata he. Aafee shia Biblia mli nikasemɔi fe 3,000,000 koni akɛye abua gbɔmɛi ni tamɔ gwantɛŋi lɛ. Nɔ ni tamɔɔɔ enɛ lɛ, hɔmɔ yeɔ mɛi ni yɔɔ Babilon Kpeteŋkpele lɛ ni ji apasa jamɔ maŋtsɛyeli lɛ mli lɛ.—Yesaia 65:13.
16. (a) Mɛni ji nɔ ni Farisifonyo ko nyɛɛɛ afee aha Yesu ni yoo ko ni ji eshafeelɔ fee? (b) Mɛɛ mu nɛkɛ Yehowa kɛha etsuji anɔkwafoi lɛ ŋmɛnɛ?
16 “Okɛ mu fɔɔ miyitso.” Yɛ blema Israel lɛ, gbɔfeelɔ ni mli hi lɛ kɛ mu fɔɔ egbɔi lɛ ayitsei ahe. Nɔ ni yɔɔ miishɛɛ ji akɛ, be ko lɛ Yesu yafee gbɔ yɛ Farisifonyo ni kɛ mu efɔɔɔ Yesu yitso he loo ehaaa nu ni ekɛaafɔ enaji ahe lɛ shia. Yɛ nakai be lɛ mli lɛ, yoo ko ni ji eshafeelɔ kɛ eyaafonui fɔ Yesu naji ahe ni ekɛ mu krɛdɛɛ ko ni jeɔ ŋma kpa he. (Luka 7:36-38, 44-46) Shi Yehowa ji gbɔfeelɔ ni mli hi waa! Ekɛ mumɔŋ “mlifilimɔ mu” haa etsuji anɔkwafoi lɛ. (Yesaia 61:1-3) Hɛɛ, eka shi faŋŋ akɛ Yehowa webii lɛ mli efili amɛ ŋmɛnɛ.
17. (a) ‘Kpulu ni eyi kɛteke nɔ’ lɛ tsɔɔ mɛni? (b) Yehowa kɛ ‘kpulu ni eyi kɛmiishwie shi’ eha ewebii ŋmɛnɛ yɛ mɛɛ gbɛ nɔ?
17 “Mikpulu lɛ eyi kɛteke nɔ.” Shishitsɔɔmɔ kroko kɛɛ: “Mikpulu lɛ eyi kɛmiishwie shi.” (Moffatt) Enɛ tsɔɔ mumɔŋ nihii babaoo. Eyɛ mli akɛ jeee daanumɔ ni tekeɔ nɔ atsɔɔ nɛɛ moŋ, shi nɛkɛ wiemɔi nɛɛ tsɔɔ kpulu ni wein kpakpa eyi mli obɔ. Nɛkɛ daa nɛɛ nyɛɔ etsaa helai komɛi, taakɛ anaa yɛ ŋaawoo ni Paulo kɛha Timoteo lɛ mli lɛ: “Kaanu nu sɔŋŋ, shi nuu wein fioo yɛ omusuŋ helai ni yeɔo kpitiokpitio lɛ ahewɔ.” (1 Timoteo 5:23) Yɛ mumɔŋ shishinumɔ naa lɛ, wein hu haa tsui nyaa. (Lala 104:16) Wɔ Ŋwɛi Tsɛ Yehowa, ni yɔɔ suɔmɔ lɛ jɛɔ suɔmɔ mli ekɛ nibii kpakpai babaoo ŋmɛɔ mumɔŋ okpɔlɔ ehaa etsuji anɔkwafoi lɛ ni nyamɔ ‘kpulu ni eyi obɔ’ fata he.
18. (a) Namɛi naa Yehowa ekpakpafeemɔ kɛ duromɔ mli ŋɔɔmɔ bianɛ lɛ, ni yɛ mɛɛ gbɛ nɔ Lala 103:17, 18 tsɔɔ enɛ yɛ? (b) Mɛɛ anunyam gbɛkpamɔ ko ka mɛi ni yeɔ Yehowa anɔkwale lɛ ahiɛ?
18 “Lɛlɛŋ, ekpakpa kɛ mɔbɔnalɛ aaanyiɛ misɛɛ yɛ miwala gbii lɛ fɛɛ mli.” (Lala 23:6) Ekpakpafeemɔ ji Yehowa mumɔ krɔŋkrɔŋ lɛ yibii lɛ eko. (Galatabii 5:22, 23) Mɛi ni nyiɛɔ Nyɔŋmɔ gbɛ lɛ nɔ lɛ naa ekpakpafeemɔ kɛ Nyɔŋmɔ duromɔ lɛ mli ŋɔɔmɔ. (Lala 103:17, 18) Akɛni amɛyɔɔ hemɔkɛyeli ni mli wa yɛ emli hewɔ lɛ, ewebii lɛ baanyɛ akpee kaa fɛɛ kaa ni baa amɛnɔ lɛ naa. Amɛji mɛi ni amɛnine shɛɔ ejɔɔmɔ kɛ suɔmɔ kwɛmɔ nɔ yɛ be fɛɛ mli. Ni anɔkwayeli kɛyashi naagbee lɛ baatsɔ naanɔ wala yɛ jeŋ hee lɛ mli. Mɛɛ gbɛkpamɔ ni yɔɔ naakpɛɛ po nɛ!
19. (a) Akɛ “aaahi shi yɛ Yehowa we lɛ” tsɔɔ mɛni? (b) Mɛni ji nɔ ni Yehowa gbɛjianɔtoo lɛ eto ema shi koni ekɛha anɔkwale jamɔ ashwere, ni mɛni hewɔ gbɔmɛi akpei abɔ ni amɛjɔɔ amɛhe nɔ lɛ buɔ sɔɔmɔ yɛ jɛmɛ akɛ hegbɛ ni amɛna lɛ? (d) Namɛi hu etswa amɛfai shi akɛ amɛaasɔmɔ Nyɔŋmɔ kɛya naanɔ lɛ?
19 “Ni masaa mahi shi yɛ Yehowa we lɛ miwala gbii abɔ fɛɛ.” Yɛ David gbii lɛ amli lɛ, Nyɔŋmɔ we lɛ ji kpeebuu lɛ, ejaakɛ no mli lɛ amako sɔlemɔtsu lɛ lolo. Akɛni lalatsɛ lɛ yɔɔ gbɔfeelɔ ko ni mli hi yɛ ejwɛŋmɔ mli hewɔ lɛ, ‘Yehowa we lɛ hilɛ’ tsɔɔ wekukpaa kpakpa ni aaaka lɛ kɛ Nyɔŋmɔ teŋ akɛ Mɔ ni feɔ lɛ gbɔ. (Lala 15:1-5) Ŋmɛnɛ, abaanyɛ ayoo nakai shia lɛ akɛ Yehowa mumɔŋ sɔlemɔtsu lɛ, egbɛjianɔtoo kɛha jamɔ krɔŋŋ lɛ. Maŋtsɛ Salomo na hegbɛ ema klɛŋklɛŋ heloo naa sɔlemɔtsu lɛ, tsu ni akɛ shika ewula lɛ babaoo ni ama akɛwo Yehowa hiɛ nyam lɛ. Mɛɛ hegbɛ kpele enɛ ji akɛ aaasɔmɔ yɛ jɛmɛ! Eyɛ mli akɛ sɔlemɔtsu ni tamɔ nɛkɛ bɛ dɔŋŋ moŋ, shi Nyɔŋmɔ yɛ gbɛjianɔtoo krɔŋkrɔŋ ko ni woɔ ehiɛ nyam ni haa jamɔ krɔŋŋ shwereɔ. Akɛ gbɛ kome ni etsɔɔ nɔ efeɔ enɛ lɛ, Yehowa gbɛjianɔtoo lɛ eto Betel Shiai yɛ maji babaoo mli. “Betel” shishi ji “Nyɔŋmɔ shia” ni gbɔmɛi akpei abɔ ni amɛjɔɔ amɛhe nɔ sɔmɔɔ yɛ nɛkɛ teokrase nitsumɔ hei nɛɛ amli. Hii kɛ yei nɛɛ ateŋ mɛi komɛi esɔmɔ yɛ nɛkɛ gbɛ nɔ “amɛwala gbii abɔ fɛɛ,” ejaakɛ amɛwala shihilɛ be fa titri ji nɔ ni amɛkɛhi Betel sɔɔmɔ mli. Akpekpei krokomɛi yɛ, ni jeee Betel weku lɛ mli bii, ni amɛ hu amɛtswa amɛfai shi akɛ amɛbaasɔmɔ Yehowa kɛya naanɔ nakai nɔŋŋ.
20. (a) Mɛni hewɔ Lala 23 ji Ŋmalɛi lɛ fa ko ni ekaaa lɛ, ni mɛni ji nɔ ni eyeɔ ebuaa wɔ ni wɔna? (b) Mɛɛ hegbɛi mɛɔ Yehowa tsuji anɔkwafoi lɛ?
20 Lala 23 lɛ tamɔ ojarawa tɛ ko ni hiɛ koji sɔrɔtoi babaoo ni kpɛlɛɔ yɛ la mli. Ewoɔ wɔ-Ŋwɛi Tsɛ, Yehowa, ni yɔɔ suɔmɔ lɛ anunyam gbɛi lɛ nɔ gojoo, ni ejieɔ bɔ ni ekudɔɔ, ebuɔ amɛhe ni ekɛ nii haa etoi lɛ akpo. Nɔ ni ejɛ mli eba ji akɛ, ewebii lɛ yɛ miishɛɛ, amɛtɔrɔ kɛ mumɔŋ nibii, ni amɛyi miifa oyayaayai babaoo, yɛ maji ni ateɔ shi awoɔ amɛ waa lɛ po mli. Lala 23 yeɔ buaa wɔ koni wɔna wɔkɛ wɔ-Bɔlɔ lɛ teŋ ekomefeemɔ ni miishɛɛ yɔɔ mli. Ni kɛji akɛ wɔkwɛ ŋwɛi ni ŋulamii eyimɔ jɛmɛ obɔ lɛ, taakɛ David fɔɔ feemɔ yɛ be mli ni ekwɛɔ etoi lɛ, wɔdaa shi ni wɔhiɛ sɔɔ akɛ jeŋ muu fɛɛ ni yɔɔ naakpɛɛ nɛɛ Bɔlɔ lɛ kwɛɔ wɔ tamɔ Tookwɛlɔ ni yɔɔ suɔmɔ. Ejɛɔ suɔmɔ mli ekɛ naanɔ wala hu haa wɔ yɛ jeŋ hee lɛ mli, kɛji akɛ wɔhiɛ wɔ emuuyeli mli wɔha lɛ. Kwɛ miishɛɛ ni eji akɛ wɔkɛ Nyɔŋmɔ tsuji anɔkwafoi ni aaatee amɛ shi lɛ ateŋ mɔ ko tamɔ David aaakpe! Mɛɛ hegbɛ enɛ ji akɛ wɔɔsɔmɔ Yehowa, Tookwɛlɔ Kpeteŋkpele lɛ, kɛya naanɔi fɛɛ mli!a
[Shishigbɛ niŋmai]
a Ajie kɛjɛ July 1, 1988 Watchtower lɛ mli.
Te Obaaha Hetoo Oha Tɛŋŋ?
◻ Yehowa jieɔ eha kpo akɛ suɔmɔ Tookwɛlɔ yɛ mɛɛ gbɛ nɔ?
◻ Mɛni nɔ Yehowa tsɔɔ enyiɛɔ wɔhiɛ ‘yɛ jalɛ gbɛi anɔ’?
◻ Yehowa buɔ etoi lɛ ahe yɛ mɛɛ gbɛ nɔ?
◻ Yehowa eŋmɛ okpɔlɔ kɛha wɔ yɛ wɔhenyɛlɔi ateŋ yɛ mɛɛ gbɛ nɔ?