Há Yehowa Niji Ni Hiɔ Shi Kɛyaa Naanɔ Lɛ Afee Osɛɛfimɔ Nɔ
“Naanɔ Nyɔŋmɔ lɛ ji oshihilɛ-he, ni naanɔ niji lɛ yɛ shishi gbɛ.”—5 MOSE 33:27, American Standard Version
1, 2. Mɛni hewɔ ni Yehowa webii baanyɛ ana hekɛnɔfɔɔ yɛ esɛɛfimɔ mli lɛ?
YEHOWA susuɔ ewebii ahe. Akɛ nɔkwɛmɔ nɔ lɛ, Israelbii lɛ ahaomɔi lɛ fɛɛ amli lɛ, “lɛ hu ehao”! Ni “ehole amɛ ni ehiɛ amɛ” yɛ suɔmɔ kɛ mɔbɔnalɛ mli. (Yesaia 63:7-9) No hewɔ lɛ, kɛji wɔyeɔ Nyɔŋmɔ anɔkwa lɛ, no lɛ wɔbaanyɛ wɔna hekɛnɔfɔɔ yɛ esɛɛfimɔ mli.
2 Gbalɔ Mose kɛɛ: “Naanɔ Nyɔŋmɔ lɛ ji obobaa he, ni naanɔ niji lɛ yɛ shishi gbɛ.” (5 Mose 33:27) Shishitsɔɔmɔ kroko hu kɛɔ akɛ: “Naanɔ Nyɔŋmɔ lɛ ji oshihilɛ-he, ni naanɔ niji lɛ yɛ shishi gbɛ.” (American Standard Version) Shi mɛɛ gbɛ nɔ Nyɔŋmɔ niji fiɔ etsuji asɛɛ yɛ?
Mɛni Hewɔ Amanehului Efa Babaoo Nɛkɛ?
3. Mɛɛ be adesai toibolɔi lɛ baana “Nyɔŋmɔ bii lɛ anunyam heyeli lɛ” mli miishɛɛ kwraa kɛmɔ shi?
3 Yehowa sɔɔmɔ efooo wɔhe afabaŋ kɛjɛɛɛ amanehului ni adesai ni yeee emuu fɛɛ kɛkpeɔ lɛ ahe. Nyɔŋmɔ tsulɔ Hiob kɛɛ: “Gbɔmɔ ni yoo fɔ lɛ yɔɔ nɛɛ, kukuoo kɛkɛ ji egbii lɛ, ni emli eyi tɔ kɛ haomɔ sɔŋŋ.” (Hiob 14:1) Ni lalatsɛ lɛ wie yɛ “wɔfii amli gbii lɛ” ahe akɛ: “Amɛmli shwaa nii lɛ, tɔlɛ kɛ yakayaka nii ni.” (Lala 90:10) Ni shihilɛ lɛ baahi nakai aahu kɛyashi ‘bɔɔnii lɛ diɛŋtsɛ hu baaye amɛhe kɛjɛ fitemɔ nyɔŋyeli lɛ mli kɛya Nyɔŋmɔ bii lɛ anunyam heyeli lɛ mli.’ (Romabii 8:19-22) Enɛ baaba mli yɛ Kristo Afii Akpe Nɔyeli lɛ mli. Maŋtsɛyeli lɛ shishibii ni ji adesai lɛ baana kpɔmɔ kɛjɛ esha kɛ gbele mli yɛ nakai beaŋ kɛtsɔ Yesu kpɔmɔ afɔleshaa lɛ nɔ. Beni Afii Akpe lɛ baashɛ enaagbee lɛ, no mli lɛ Kristo kɛ ehefatalɔi maŋtsɛmɛi-kɛ-osɔfoi lɛ eye amɛbua adesai toibolɔi lɛ ni amɛshɛ emuuyeli mli, ni abaaŋmala mɛi ni baaye anɔkwa amɛha Nyɔŋmɔ yɛ naagbee kaa ni Satan kɛ edaimonioi lɛ kɛaaba lɛ mli lɛ agbɛi kɛya naanɔ yɛ “wala wolo lɛ” mli. (Kpojiemɔ 20:12-15) No sɛɛ lɛ amɛbaana Nyɔŋmɔ bii lɛ anunyam heyeli lɛ mli ŋɔɔmɔ kwraa kɛmɔ shi.
4. Yɛ nɔ najiaŋ ni wɔɔye wɔshihilɛ he ŋkɔmɔ moŋ lɛ, mɛni esa akɛ wɔfee?
4 Shi dani enɛ aaaba lɛ, yɛ nɔ najiaŋ ni wɔɔye wɔshihilɛ he ŋkɔmɔ moŋ lɛ, nyɛhaa wɔkɛ wɔhiɛ afɔa Yehowa nɔ. (1 Samuel 12:22; Yuda 16) Nyɛhaa wɔdaa shi hu yɛ wɔ Osɔfo Nukpa, Yesu, mɔ ni wɔtsɔɔ enɔ wɔbɛŋkɛɔ Nyɔŋmɔ, “koni wɔnine ashɛ mɔbɔnalɛ nɔ ni wɔna duromɔ ni aaaye abua wɔ yɛ be ni sa mli” lɛ hu he. (Hebribii 4:14-16) Ekaba akɛ wɔɔfee tamɔ Adam kɔkɔɔkɔ. Yɛ naagbee lɛ, efolɔ Yehowa naa yɛ gbɛ ni ejaaa nɔ akɛ eha lɛ ŋa gbonyo, ni ekɛɛ: “Yoo lɛ ni [bo] o-ŋɔfata mihe lɛ, lɛ eha mi tso lɛ yibii lɛ eko, ni miye.” (1 Mose 3:12) Nyɔŋmɔ haa wɔ nibii kpakpai ni ekɛ haomɔi baaa wɔnɔ. (Mateo 5:45; Yakobo 1:17) Bei pii lɛ, amanehului ni baa wɔnɔ lɛ jɛɔ nilee ni wɔ diɛŋtsɛ wɔbɛ aloo mɔ kroko tɔmɔ mli. Ekolɛ eeenyɛ eba wɔnɔ hu ejaakɛ eshafeelɔi ji wɔ, ni wɔyɛ jeŋ ni ka Satan hewalɛ mli lɛ mli. (Abɛi 19:3; 1 Yohane 5:19) Ni kɛlɛ, Yehowa niji ni hiɔ shi kɛyaa naanɔ lɛ fiɔ etsuji anɔkwafoi ni tsɔɔ sɔlemɔ nɔ amɛkɛ amɛhe fɔɔ enɔ ni amɛ diɛŋtsɛ amɛkɛ ŋaawoo ni yɔɔ e-Wiemɔ lɛ mli lɛ tsuɔ nii lɛ asɛɛ.—Lala 37:5; 119:105.
Wajemɔ yɛ Be Mli ni Wɔhe Yeɔ
5. Mɛɛ hewalɛwoo mɛi ni he yeɔ lɛ baanyɛ amɛna yɛ Lala 41:2-4?
5 Bei komɛi lɛ helai haa wɔteŋ mɛi babaoo naa amanehulu. Shi kɛlɛ, David kɛɛ: “Ajɔɔ mɔ ni jwɛŋɔ ohiafo nɔ! Gbi fɔŋ nɔ lɛ Yehowa aaajie lɛ. Yehowa aaabaa eyi ni eeeha eyi ana wala, ni aaajɔo lɛ yɛ shikpɔŋ lɛ nɔ; ni oŋɔŋ lɛ owoŋ ehenyɛlɔi ni taoɔ lɛ lɛ adɛŋ. Yehowa aaatsɔmɔ lɛ yɛ hela saa nɔ; ni kɛ ehe miiye lɛ, oootsake esaa lɛ fɛɛ.”—Lala 41:2-4.
6, 7. Mɛɛ gbɛ nɔ Nyɔŋmɔ ye ebua David beni eka hela saa nɔ lɛ yɛ, ni enɛ baanyɛ awo Yehowa tsuji hewalɛ yɛ mɛɛ gbɛ nɔ?
6 Mɔ ni jwɛŋɔ mɛi krokomɛi ahe lɛ yeɔ ebuaa ohiafoi. “Gbi fɔŋ” lɛ baanyɛ afee amanehulu be fɛɛ be aloo haomɔ be kakadaŋŋ ni haa mɔ aŋkro lɛ gbɔjɔɔ kwraa. Ekɛ ehiɛ fɔɔ Nyɔŋmɔ nɔ ni ebu ehe yɛ gbɔjɔmɔ bei amli, ni mɛi krokomɛi ‘jɔɔ lɛ yɛ shikpɔŋ lɛ nɔ’ kɛtsɔ bɔ ni Yehowa kɛ lɛ yeɔ yɛ mɔbɔnalɛ mli lɛ he adafitswaa nɔ. Nyɔŋmɔ waje David “yɛ hela saa nɔ,” ekolɛ yɛ nɔnyɛɛ bei amli beni David binuu Absalom taoɔ ekɛ ehewalɛ ashɔ̃ Israel maŋtsɛsɛi lɛ ni eta nɔ lɛ.—2 Samuel 15:1-6.
7 Akɛni David susuɔ ohiafoi ahe hewɔ lɛ, enu he akɛ Nyɔŋmɔ baawaje lɛ beni lɛ diɛŋtsɛ enyɛɛɛ ehe nɔ ko efee yɛ hela saa mli lɛ. (Lala 18:24-26) Eyɛ mli akɛ ehe miiye bɔ ni eeenyɛ elaaje ewala moŋ, shi eyɛ hekɛnɔfɔɔ akɛ Nyɔŋmɔ ‘baatsake esaa lɛ,’ jeee kɛtsɔ naakpɛɛ gbɛ ni eeetsɔ nɔ ejie hela lɛ yɛ ehe lɛ nɔ, shi moŋ kɛtsɔ susumɔi ni shɛjeɔ mɔ mii ni ekɛaawo lɛ hewalɛ lɛ nɔ. Ebaafee tamɔ nɔ ni Yehowa miitsake esaa lɛ kɛmiijɛ hela saa mli kɛmiiya hewalɛ namɔ saa mli. Nakai nɔŋŋ hu, kɛji wɔhe miiye akɛ Nyɔŋmɔ tsuji lɛ, Yehowa niji ni hiɔ shi kɛyaa naanɔ lɛ baawaje wɔ.
Miishɛjemɔ Kɛha Mɛi ni Yɔɔ Nɔnyɛɛ Shishi Lɛ
8. Mɛɛ gbɛ nɔ Kristofonyo ko ni he miiye lɛ etsɔɔ bɔ ni ekɛ ehe fɔɔ Nyɔŋmɔ nɔ lɛ yɛ?
8 Hela baanyɛ ekɛ jwɛŋmɔŋ nɔnyɛɛ aba. Kristofonyo ko ni he miiye waa, ni bei komɛi lɛ enaaa hewalɛ ni ekɛaakane nii po lɛ gba akɛ: “Enɛ kɛ mi woɔ nɔnyɛɛ henumɔi amli, ni ehaa minuɔ he po akɛ mihe bɛ sɛɛnamɔ ko, ni mifoɔ tete po.” Akɛni ele jogbaŋŋ akɛ Satan miitao eye enɔ kunim kɛtsɔ nijiaŋwujee nɔ hewɔ lɛ, lɛ hu eewuu eeshi lɛ, kɛ hiɛnɔkamɔ akɛ kɛtsɔ Yehowa yelikɛbuamɔ nɔ, enine enyɛŋ shi kɔkɔɔkɔ. (Yakobo 4:7) Nuu nɛɛ ebafee hewalɛwoo kɛha mɛi krokomɛi ni le akɛ ekɛ ehiɛ fɔɔ Nyɔŋmɔ nɔ lɛ. (Lala 29:11) Kɛji eyakã helatsamɔ he po lɛ, etswaa helatsɛmɛi kɛ mɛi krokomɛi tɛlifon koni ekɛtswa amɛ ema shi yɛ mumɔŋ. Ni lɛ diɛŋtsɛ hu etswaa ehe emaa shi yɛ mumɔŋ kɛtsɔ Maŋtsɛyeli lalai kɛ wolo tɛtrɛɛ nɛɛ kɛ ehefatalɔ wolo tɛtrɛɛ ni ji Awake! lɛ mli saji ni amɔmɔ awo kaset kpaai anɔ ni etswaa eboɔ toi Iɛ kɛ agbɛnɛ kɛtsɔ nanemɛi Kristofoi ni ekɛbɔɔ lɛ nɔ. Nyɛminuu nɛɛ kɛɛ: “Mikɛ Yehowa wieɔ daa yɛ sɔlemɔ mli, ni mibiɔ lɛ ni eha mi hewalɛ, gbɛtsɔɔmɔ, miishɛjemɔ, kɛ yelikɛbuamɔ ni mikɛŋmɛ mitsui shi.” Kɛji oji Kristofonyo ni okɛ hewalɛnamɔ mli naagba ko ni mli wa miikpe lɛ, okɛ ohiɛ afɔ Yehowa nɔ be fɛɛ be, ni oha eniji ni hiɔ shi kɛyaa naanɔ lɛ afee osɛɛfimɔ nɔ.
9. Mɛɛ nɔkwɛmɔ nii komɛi tsɔɔ akɛ bei komɛi lɛ jwɛŋmɔŋ nɔnyɛɛ nyɛɔ egbaa Nyɔŋmɔ webii anaa?
9 Nɔnyɛɛ ji naagba ko ni ehi shi kɛjɛ blema tɔŋŋ. Beni Hiob yɔɔ kaa mli lɛ, ewie tamɔ mɔ ko ni miinu he akɛ Nyɔŋmɔ ekpoo lɛ. (Hiob 29:2-5) Beni Nehemia susuɔ bɔ ni Yerusalem kɛ egbogboi lɛ efee koikoi eha lɛ he lɛ, enaaa miishɛɛ, ni Petro hu hao waa yɛ kpoomɔ ni ekpoo Kristo lɛ hewɔ aahu akɛ efo waa diɛŋtsɛ. (Nehemia 2:1-8; Luka 22:62) Epafrodito hu ye awerɛho akɛni enu he akɛ Kristofoi ni yɔɔ Filipi lɛ ena amɛle akɛ ehe miiye lɛ hewɔ. (Filipibii 2:25, 26) Nɔnyɛɛ he haomɔ gba Kristofoi komɛi anaa yɛ Tesalonika, ejaakɛ Paulo wo nyɛmimɛi ni yɔɔ jɛmɛ lɛ hewalɛ akɛ, “nyɛshɛjea mɛi ni tsui faa lɛ amii.” (1 Tesalonikabii 5:14) No hewɔ lɛ mɛɛ gbɛ nɔ Nyɔŋmɔ tsɔɔ eyeɔ ebuaa mɛi aŋkroaŋkroi nɛɛ yɛ?
10. Mɛni baanyɛ aye ebua yɛ be mli ni abɔɔ mɔdɛŋ akɛ aaakpee jwɛŋmɔŋ nɔnyɛɛ naa lɛ mli?
10 Esa akɛ mɔ lɛ diɛŋtsɛ akpɛ eyiŋ yɛ helatsamɔ gbɛ ni eeehala yɛ nɔnyɛɛ ni naa wa ni eyɔɔ shishi lɛ he.a (Galatabii 6:5) Hejɔɔmɔ ni fa bɔ ni sa kɛ nifeemɔ ni ŋmɛɔ pɛpɛɛpɛ baanyɛ aye abua. Yɛ nɔ najiaŋ ni eeebu enaagbai pii lɛ fɛɛ akɛ naagba wulu kome lɛ, mɔ ni yɔɔ nɔnyɛɛ shihilɛ mli lɛ baana akɛ kɛji eeetsu amɛhe nii ekomekome moŋ lɛ, eeeye ebua lɛ waa. Yelikɛbuamɔ ni shɛjeɔ mɔ mii ni asafoŋ onukpai lɛ kɛaaha lɛ lɛ he aaanyɛ aba sɛɛnamɔ, titri lɛ kɛji nɛkɛ gbɔmɔtsoŋ hewalɛnamɔ he naagba nɛɛ kɛ mumɔŋ naagbai miiba lɛ. (Yakobo 5:13-15) Nɔ ni fe fɛɛ lɛ, ehe miihia ni wɔkɛ wɔhe afɔ Yehowa nɔ, ‘ni wɔŋɔ wɔhaomɔi fɛɛ wɔfɔ enɔ, ejaakɛ lɛ ejwɛŋɔ wɔnɔ.’ Sɔlemɔ ni wɔɔsɔle daa kɛjɛ wɔtsuiŋ lɛ hu baanyɛ aha mɔ lɛ ana ‘Nyɔŋmɔ toiŋjɔlɛ ni aaato wɔtsuii kɛ wɔjwɛŋmɔi yɛ Kristo Yesu mli’ lɛ eko.—1 Petro 5:6-11; Filipibii 4:6, 7.
Yehowa Yeɔ Ebuaa Wɔ ni Wɔŋmɛɔ Wɔtsui Shi yɛ Awerɛhoyeli Mli
11-13. Mɛni baanyɛ aye abua ni akɛkpee awerɛho ni baa yɛ suɔlɔ ko gbele hewɔ lɛ naa?
11 Niiashikpamɔ kroko ni haoɔ mɔ waa ji suɔlɔ ko gbele. Abraham ye eŋa Sara gbele he ŋkɔmɔ ni efo lɛ. (1 Mose 23:2) Beni David binuu Absalom gbo lɛ, eye awerɛho waa. (2 Samuel 18:33) Ni Yesu, nuu ni eye emuu lɛ po “fo” yɛ enaanyo Lazaro gbele hewɔ! (Yohane 11:35) No hewɔ lɛ kɛji gbele baŋɔ wɔsuɔlɔ ko kɛtee lɛ, ekɛ awerɛho baa. Shi mɛni baanyɛ aye abua ni akɛjie nɛkɛ dɔlɛ nɛɛ kɛjɛ jɛmɛ?
12 Nyɔŋmɔ yeɔ ebuaa ewebii lɛ koni amɛnyɛ amɛŋmɛ amɛtsui shi yɛ gbele he awerɛhoyeli mli. E-Wiemɔ Iɛ kɛɔ akɛ gbohiiashitee baaba. No hewɔ lɛ, wɔyeee “ŋkɔmɔ tamɔ mɛi ni eshwɛ lɛ, mɛi ni bɛ nɔhiɛkamɔ ko lɛ.” (1 Tesalonikabii 4:13; Bɔfoi lɛ Asaji 24:15) Yehowa mumɔ lɛ yeɔ ebuaa wɔ ni wɔna toiŋjɔlɛ kɛ hemɔkɛyeli, ni wɔjwɛŋ wɔsɛɛ be ni yɔɔ nyam ni awo shi yɛ he yɛ e-Wiemɔ lɛ mli lɛ he, ni enɛ hewɔ lɛ ehaaa suɔlɔ ko ni egbo lɛ he susumɔi ni yɔɔ awerɛho lɛ aye wɔnɔ. Wɔnaa miishɛjemɔ hu kɛjɛɔ Ŋmalɛi lɛ akanemɔ kɛ sɔlemɔ ni wɔsɔleɔ wɔhaa “miishɛjemɔ fɛɛ Nyɔŋmɔ lɛ” mli.—2 Korintobii 1:3, 4; Lala 68:5-7.
13 Wɔbaanyɛ wɔna miishɛjemɔ kɛjɛ gbohiiashitee he hiɛnɔkamɔ lɛ mli taakɛ Hiob ni sheɔ Nyɔŋmɔ gbeyei lɛ fee lɛ, mɔ ni jaje akɛ: “Mina ni kulɛ [Yehowa] oŋɔ mi otee yɛ [Sheol] gbohiiaje, ni oŋɔ mi ohɔ shi kɛyashi beyinɔ ni omlifu lɛ aaaho, ni oto be oha mi, ni okai mi! Kɛji gbɔmɔ gbo lɛ, ani ehiɛ aaakã ekoŋŋ? Kulɛ mitawuu gbii lɛ amli fɛɛ lɛ makwɛ gbɛ kɛyaashi beyinɔ ni mitsakemɔ lɛ aaaba! Kulɛ oootsɛ, ni mahere bo nɔ; ni oootao oninenaa nitsumɔ lɛ sɛɛ gbɛ.” (Hiob 14:13-16) Efɔɔ kaa akɛ kɛji wɔnaanyo ko ni wɔsumɔɔ esane waa fa gbɛ lɛ, wɔyeee awerɛho babaoo ejaakɛ wɔmiikpa gbɛ akɛ wɔbaana lɛ ekoŋŋ. Kɛji wɔsusuɔ Kristofonyo anɔkwafo ko gbele he yɛ gbɛ ni tamɔ nɛkɛ nɔ lɛ, no lɛ ekolɛ eeeha wɔsuɔlɔ ko gbele he awerɛhoyeli lɛ nɔ agbɔ. Kɛji eyɛ shikpɔŋ nɔ hiɛnɔkamɔ lɛ, no lɛ abaatsiɛ̃ ehiɛ kɛjɛ egbele wɔ lɛ mli yɛ biɛ yɛ shikpɔŋ lɛ nɔ yɛ Kristo Afii Akpe Nɔyeli lɛ mli. (Yohane 5:28, 29; Kpojiemɔ 20:11-13) Ni kɛji wɔyɛ hiɛnɔkamɔ akɛ wɔɔhi shi yɛ shikpɔŋ nɔ kɛya naanɔ lɛ, no lɛ ekolɛ wɔɔhi biɛ ni wɔɔkpa wɔsuɔlɔ ni atee lɛ shi lɛ gbɛ.
14. Mɛɛ gbɛ nɔ Kristofoi yei okulafoi enyɔ komɛi nyɛ amɛkpee amɛwumɛi agbele naa yɛ?
14 Yɛ ewu gbele sɛɛ lɛ, nyɛmiyoo ko yoo akɛ esa akɛ eya nɔ kɛ eshihilɛ mli nitsumɔi lɛ yɛ Nyɔŋmɔ sɔɔmɔ mli. Kɛfata edeka fɛɛ ni ekɛtsuɔ nii kɛtekeɔ nɔ yɛ Nuŋtsɔ lɛ nitsumɔ lɛ mli’ lɛ he lɛ, ekɛ enine kpɛ mamanaai 800 ni ekɛfee saanɔbo. (1 Korintobii 15:58) Nyɛmiyoo nɛɛ kɛɛ: “Enɛ bafee nitsumɔ kpakpa, ejaakɛ be ni mikɛtsuɔ nii lɛ fɛɛ mli lɛ, minyɛɔ miboɔ Maŋtsɛyeli lalai kɛ Biblia mli wiemɔi ni akɛwo kpaai anɔ lɛ atoi, ni nomɛi hé mijwɛŋmɔ fɛɛ.” Nyɛmiyoo lɛ kɛ miishɛɛ kaiɔ saramɔ ko ni onukpa ko ni yɔɔ niiashikpamɔ kɛ eŋa basara lɛ lɛ jogbaŋŋ. Onukpa nɛɛ jɛ Biblia lɛ mli etsɔɔ lɛ akɛ Nyɔŋmɔ susuɔ okulafoi ahe jogbaŋŋ diɛŋtsɛ. (Yakobo 1:27) Kristofonyo yoo kroko ko hu eŋmɛɛɛ ehe ehaaa enii ni eeeha efee mɔbɔ beni ewu gbo lɛ. Ehiɛ sɔ bɔ ni enanemɛi waje lɛ lɛ babaoo ni eha ena mɛi krokomɛi ahe miishɛɛ. Ekɛɛ: “Misɔle yɛ be kɛ bei amli ni eha mibana mikɛ Yehowa teŋ wekukpaa ni bɛŋkɛ kpaakpa.” Ni mɛɛ jɔɔmɔ eji nɛkɛ akɛ wɔɔna Nyɔŋmɔ niji ni hiɔ shi kɛyaa naanɔ lɛ ni efi wɔsɛɛ!
Yelikɛbuamɔ Kɛji Wɔtɔ̃
15. Mɛni ji shishinumɔ titri ni jeɔ kpo yɛ David wiemɔi ni yɔɔ Lala 19:8-14 lɛ mli?
15 Eyɛ mli akɛ wɔsumɔɔ Yehowa mla lɛ moŋ, shi bei komɛi lɛ wɔtɔ̃ɔ. Eka shi faŋŋ akɛ enɛ haoɔ wɔ, taakɛ efee David, mɔ ni sumɔɔ Nyɔŋmɔ mlai, ekpɔi, ekitai, kɛ ekojomɔi lɛ babaoo fe shika tsuru po lɛ. Ekɛɛ: “Asaŋ no nɔŋŋ tsɔɔ otsulɔ nii; amɛnɔ yeli lɛ, nyɔmɔwoo kpele yɛ mli. Namɔ aaanyɛ etɔmɔi ana? Ŋɔɔ miteemɔŋ tɔmɔi lɛ ofa mi! Asaŋ buu mihe kɛjɛ hiɛ-kɛ-hekamɔ eshai amli, koni amɛkaye minɔ! No lɛ maye emuu, ni mihe aaaje nɔtɔmɔi wuji amli.” (Lala 19:8-14) Nyɛhaa wɔsusuɔ wiemɔi nɛɛ ahe wɔkwɛa.
16. Mɛni hewɔ esa akɛ wɔtsi wɔhe kɛjɛ hiɛ-kɛhe-kamɔ nifeemɔ he lɛ?
16 Nifeemɔi ni hiɛ kaa he afeɔ lɛ ji eshai ni hiɛdɔɔ yɔɔ he fe tɔmɔi kɛkɛ. Akpoo Saul akɛ maŋtsɛ, akɛni ehiɛ ka he ni eyasha afɔle ni agbɛnɛ hu eje gbɛ ebaa Amalek maŋtsɛ Agag kɛ haa nii kpakpai lɛ ayi, yɛ be mli ni Nyɔŋmɔ efa akɛ atuu Amalekbii lɛ fɛɛ aha hiɛkpatamɔ lɛ hewɔ. (1 Samuel 13:8-14; 15:8-19) Aha kpiti shwie Maŋtsɛ Uzia he yɛ ehiɛ ni ka he ni ekɛyatsu osɔfoi anitsumɔ lɛ hewɔ. (2 Kronika 26:16-21) Beni akɛ kpaŋmɔ adeka lɛ yaa Yerusalem ni shwɛ fioo ni tsinai ni gbalaa shwiili lɛ aha egbee shi lɛ, Nyɔŋmɔ tswa Uza nɔ ni egbo yɛ bulɛ ni ebɛ kɛha krɔŋkrɔŋ nii ni no hewɔ lɛ eyamɔ Adeka lɛ mli koni ekagbee shi lɛ hewɔ. (2 Samuel 6:6, 7) No hewɔ lɛ kɛji wɔleee nɔ ni sa akɛ wɔfee aloo aha wɔ hegbɛ akɛ wɔfee nɔ ko po lɛ, esa akɛ wɔjie heshibaa kpo koni wɔbi gbɛtsɔɔmɔ kɛjɛ mɛi ni yɔɔ sɛɛyoomɔ lɛ adɛŋ. (Abɛi 11:2; 13:10) Lɛlɛŋ, kɛji wɔkɛ hiɛ-kɛ-hekamɔ efee nɔ ko lɛ, esa akɛ wɔsɔle kɛha eshaifaa ni wɔbi Nyɔŋmɔ ni eye ebua wɔ ni wɔnyɛ wɔkwɛ wɔhe nɔ jogbaŋŋ yɛ wɔhiɛ ni aaaka he wɔfee nɔ kroko yɛ wɔsɛɛ lɛ he.
17. Mɛɛ gbɛ nɔ eshai ni akɛteɔ lɛ naa mɔ nɔ hewalɛ yɛ, ni kɛlɛ mɛɛ gbɛ nɔ aaatsɔ ana eshaifaa kɛ heyeli?
17 Eshai ni akɛteeɔ lɛ hu baanyɛ ekɛ haomɔi aba. Taakɛ Lala 32:1-5 tsɔɔ lɛ, David bɔ mɔdɛŋ akɛ ekɛ esha ni efee lɛ baato, shi ekɛɛ: “Beni miŋɔtee lɛ, miwui ahe kwa yɛ mimli yɛ midaa hũumɔ hewɔ. Ejaakɛ shwane kɛ nyɔɔŋ fɛɛ lɛ onine tsii yɛ minɔ; mimli nu ŋa tamɔ bɔ ni nii amli nu ŋaa yɛ latsaa be mli lɛ.” Mɔdɛŋ ni David bɔ akɛ eeetsimɔ henilee ni nuɔ fɔyeli he lɛ nɔ lɛ ha etɔ lɛ, ni yeyeeye-feemɔ ha ehewalɛ nɔ gbɔ tamɔ bɔ ni tso mli nu ni haa lɛ wala lɛ taa kwraa yɛ nu hɔmɔ loo yɛ latsaa be mli dɔlɛ mli lɛ. Eka shi faŋŋ akɛ enɛ ha ena amanehulu yɛ jwɛŋmɔŋ kɛ gbɔmɔtsoŋ fɛɛ ni emiishɛɛ laaje yɛ jajemɔ ni ejajeee ehe eshai lɛ hewɔ. Jajemɔ ni eeejaje etsɔɔ Nyɔŋmɔ lɛ pɛ kɛ mɔbɔnalɛ kɛ heyeli baaba. David kɛɛ: “Ajɔɔ mɔ ni aŋɔ enɔtɔmɔ afa lɛ, ni atsimɔ ehe esha nɔ lɛ! . . . Mijaje mihe esha lɛ mitsɔɔo, ni minɔsha lɛ, mikɛteee. Mikɛɛ akɛ: ‘Majaje minɔtɔmɔ matsɔɔ Yehowa!’ Ni bo lɛ okɛ mihe esha nɔsha lɛ fa mi.” Yelikɛbuamɔ ni suɔmɔ yɔɔ mli ni jɛɔ Kristofoi onukpai adɛŋ lɛ baanyɛ aye abua kɛha mumɔŋ hewalɛnamɔ oyayaayai.—Abɛi 28:13; Yakobo 5:13-20.
18. Mɛɛ odaseyeli yɔɔ ni tsɔɔ akɛ esha baanyɛ ana hewalɛ ni sɛɛ tsɛɔ yɛ mɔ nɔ, shi mɛni baanyɛ afee miishɛjemɔ jɛɛhe yɛ shihilɛi ni tamɔ nɛkɛ mli?
18 Esha baanyɛ ana hewalɛ ni sɛɛ tsɛɔ yɛ mɔ nɔ. Ebalɛ nakai yɛ David, mɔ ni kɛ Batsheba fite gbala, ni eto gbɛjianɔ ni eha agbe yoo lɛ wu, ni ekɛ okulafo ni ena musu lɛ bote gbalashihilɛ mli lɛ nɔ. (2 Samuel 11:1-27) Eyɛ mli akɛ Nyɔŋmɔ na lɛ mɔbɔ yɛ Maŋtsɛyeli kpaŋmɔ lɛ, David tsuitsakemɔ, kɛ bɔ ni lɛ diɛŋtsɛ ekɛ mɛi krokomɛi ye yɛ mɔbɔnalɛ mli lɛ hewɔ moŋ, shi ‘atee efɔŋ shi awo David yɛ lɛ diɛŋtsɛ ewe lɛ.’ (2 Samuel 12:1-12) Ajwamaŋ bi ni afɔ lɛ gbo. David binuu Amnon to etsɛ biyoo Tamar kaabonaa ni agbe lɛ yɛ obalayoo lɛ nyɛminuu Absalom famɔ naa. (2 Samuel 12:15-23; 13:1-33) Absalom shwie David hiɛ shi kɛtsɔ bɔlɛ ni ekɛ David hemɛi lɛ ekome na lɛ nɔ. Ebɔ mɔdɛŋ ni enine ashɛ maŋtsɛsɛi lɛ hu nɔ, shi agbe lɛ. (2 Samuel 15:1–18:33) Nibii krokomɛi jɛɔ esha lɛ mli baa lolo. Akɛ nɔkwɛmɔ nɔ lɛ, ekolɛ eshafeelɔ ko ni ashwie lɛ kɛjɛ asafo lɛ mli lɛ baatsake etsui ni abaahe lɛ awo asafo lɛ mli ekoŋŋ, shi ebaahe afii babaoo dani abaanyɛ aye heguɔgbee kɛ henumɔi awuiyeli ni jɛ nakai esha lɛ mli ba lɛ nɔ. Yɛ nakai beaŋ fɛɛ lɛ, kwɛ bɔ ni eji miishɛjemɔ akɛ aaana Yehowa dɛŋ eshaifaa kɛ eniji ni hiɔ shi kɛyaa naanɔ lɛ sɛɛfimɔ!
Akpɔ̃ Wɔ Kɛjɛ Nɔnyɛɛi ni Jwere Wɔnɔ lɛ Amli
19. Mɛɛ gbɛ nɔ Nyɔŋmɔ mumɔ lɛ baanyɛ aye abua wɔ yɛ, kɛji wɔyaje kaai ni mli wa shishi?
19 Kɛ aaka wɔ waa lɛ, ekolɛ wɔnaŋ nilee kɛ hewalɛ ni fa bɔ ni sa ni wɔkɛaakpɛ wɔyiŋ ni wɔtsu he nii hu. Yɛ shihilɛ ni tamɔ nɛkɛ mli lɛ, Nyɔŋmɔ mumɔ “lɛ hu yeɔ buaa wɔgbedemɔi lɛ; ejaakɛ nɔ ni wɔɔsɔle wɔbi ni ja lɛ wɔleee; shi moŋ mumɔ lɛ diɛŋtsɛ kɛ ŋtsɔidɔɔmɔ ni anyɛŋ akɛɛ lɛ damɔɔ mli haa wa.” (Romabii 8:26) Kɛji Yehowa ha shihilɛ lɛ tsake lɛ, esa akɛ wɔda lɛ shi babaoo yɛ he. Ni kɛlɛ, enine baanyɛ ahere wɔyiwala yɛ gbɛ kroko hu nɔ. Kɛji wɔsɔle wɔbi nilee lɛ, ekolɛ Yehowa baatsɔ emumɔ lɛ nɔ etsɔɔ wɔ nɔ ni sa akɛ wɔfee, ni ebaaha wɔ hewalɛ ni he hiaa wɔ lɛ koni wɔnyɛ wɔfee. (Yakobo 1:5-8) Kɛji wɔmiiye “ŋkɔmɔ fioo ko yɛ kaai sɔrɔtoi amli lɛ,” wɔbaanyɛ wɔtsɔ eyelikɛbuamɔ nɔ wɔnyɛ wɔŋmɛ wɔtsui shi yɛ mli, koni wɔnyɛ wɔje mli kɛ hemɔkɛyeli ni aka akwɛ ni awo lɛ hewalɛ hu.—1 Petro 1:6-8.
20. Kɛji wɔha Yehowa niji ni hiɔ shi kɛyaa naanɔ lɛ fee wɔsɛɛfimɔ lɛlɛŋ lɛ, mɛni mli miishɛɛ wɔbaana?
20 Nyɛkahaa Nyɔŋmɔ ni wɔɔbɛŋkɛ yɛ sɔlemɔ mli lɛ miijea wɔtsine kɔkɔɔkɔ. David kɛɛ: “Daa nɛɛ mihiŋmɛii jwere Yehowa nɔ, ejaakɛ lɛ ebaajie minaji kɛjɛ yaa mli. Tsɔ ohiɛ oha mi, ni ona mi mɔbɔ; ejaakɛ mɔ kome mɔ ji mi, ni minii yɛ mɔbɔ! Mitsui mli haomɔi lɛ fa; jiemɔ mi kɛjɛ mifimɔi lɛ amli! Kwɛmɔ mimanehulu kɛ mipiŋmɔ lɛ, ni okɛ mihe eshai fɛɛ afa mi!” (Lala 25:15-18) Kɛji wɔha Yehowa niji ni hiɔ shi kɛyaa naanɔ lɛ fee wɔsɛɛfimɔ lɛlɛŋ lɛ, no lɛ wɔbaana ŋwɛi kpɔmɔ, duromɔ, kɛ eshaifaa mli miishɛɛ, taakɛ David na lɛ.
[Shishigbɛ niŋmai]
a Kwɛmɔ saji ni aŋmala yɛ jwɛŋmɔŋ nɔnyɛɛ he yɛ Awake! ni je kpo yɛ October 22, 1987 lɛ, baafai 2-16, kɛ November 8, 1987, baafai 12-16.
Te Obaajie Naa Oha Tɛŋŋ?
◻ Mɛɛ gbɛ nɔ Yehowa yeɔ ebuaa etsuji ni he yeɔ lɛ yɛ?
◻ Mɛni baanyɛ aye abua wɔ yɛ be mli ni wɔbɔɔ mɔdɛŋ ni wɔkpee jwɛŋmɔŋ nɔnyɛɛ naa Iɛ?
◻ Mɛni baanyɛ aye ebua ni wɔkɛjie awerɛho ni baa yɛ suɔlɔ ko gbele he lɛ kɛjɛ jɛmɛ?
◻ Mɛɛ gbɛ nɔ mɛi ni kɛ amɛhe eshai teɔ lɛ baatsɔ amɛna heyeli?
◻ Mɛɛ yelikɛbuamɔ yɔɔ yɛ be mli ni Yehowa webii kɛ kaai ni mli wa kpeɔ Iɛ?
[Mfoniri ni yɔɔ baafa 16, 17]
Wɔbaanyɛ wɔna miishɛjemɔ kɛjɛ gbohiiashitee he hiɛnɔkamɔ lɛ mli, taakɛ Hiob ni sheɔ Nyɔŋmɔ gbeyei Iɛ na lɛ