Shɛ Ojatsu lɛ Ofɔ̃ Yehowa Nɔ Be Fɛɛ Be
MƐI pii nuɔ he ŋmɛnɛ akɛ jatsui jwere amɛnɔ. Shika gbɛfaŋ jaramɔ shihilɛi, weku mli naagbai ni haoɔ mɔ, gbɔmɔtsoŋ hewalɛnamɔ mli naagbai, piŋmɔ kɛ amanehulu ni jɛɔ nɔnyɛɛ kɛ yiwalɛ hewɔ, kɛ haomɔi krokomɛi babaoo tsotsoro amɛkuɛ tamɔ wiɛ. Yɛ nɔnyɛɛi ni jɛɔ sɛɛ kɛbaa nɛɛ asɛɛ lɛ, mɛi komɛi hu nuɔ he akɛ amɛ diɛŋtsɛ amɛhenumɔi ni amɛnáa akɛ amɛsaaa, kɛ amɛnine ni nyɛɔ shi yɛ emuu ni amɛyeee hewɔ lɛ hu nyɛɔ amɛnɔ waa. Enɛ kaa mɛi pii ni amɛnuɔ he akɛ esa akɛ amɛŋmɛɛ shihilɛ lɛ he kwraa. Kɛ jatsui lɛ fee tamɔ nɔ ni onyɛɛɛ dɔŋŋ lɛ, te ooofee tɛŋŋ ni onyɛ okpee naa?
Be ko lɛ, Israel Maŋtsɛ David nu he akɛ enyɛɛɛ edamɔ nɔnyɛɛ ni kã enɔ lɛ naa dɔŋŋ. Taakɛ Lala 55 lɛ tsɔɔ lɛ, yeyeeye feemɔ lɛ tsirɛ lɛ ewo haomɔ shihilɛ mli, yɛ nɔnyɛɛi kɛ hetsɛ ni jɛ ehenyɛlɔi aŋɔɔ lɛ hewɔ. Enu tsui kuumɔ kɛ gbeyeishemɔ ni naa wa waa he. Nɔ pɛ ni enyɛ efee ji ehao kɛ awerɛhoyeli. (Lala 55:3, 6, 18) Shi, yɛ ehaomɔ lɛ fɛɛ sɛɛ lɛ, ena gbɛ ni eeetsɔ nɔ ekpee naa. Yɛ mɛɛ gbɛ nɔ? Ekɛ ehiɛ fɔ̃ e-Nyɔŋmɔ lɛ nɔ kɛha sɛɛfimɔ. Ŋaawoo ni ekɛhaa mɛi ni ekolɛ amɛnuɔ he tamɔ bɔ ni enu he lɛ ji akɛ: “Shɛ ojatsu lɛ ofɔ̃ Yehowa nɔ.”—Lala 55:23.
Mɛni wiemɔ ni ewie akɛ “shɛ ojatsu lɛ ofɔ̃ Yehowa nɔ” lɛ tsɔɔ? Ani no tsɔɔ Yehowa ŋɔɔ ni wɔɔya yɛ sɔlemɔ mli, ni wɔjie wɔ yeyeeye feemɔi akpo kɛkɛ? Aloo ani wɔ diɛŋtsɛ wɔbaanyɛ wɔfee nɔ ko ni wɔkɛjie shihilɛ lɛ kɛjɛ jɛmɛ? Shi kɛji wɔnuɔ he akɛ wɔsaaa kwraa akɛ wɔbɛŋkɛɔ Yehowa hu? Wɔbaanyɛ wɔtao nɔ ni David tsɔɔ lɛ kɛtsɔ niiashikpamɔi komɛi ni ekolɛ ekaiɔ jogbaŋŋ beni eŋmala nakai wiemɔ lɛ, ni wɔɔkwɛ lɛ nɔ.
Feemɔ Onii yɛ Yehowa Hewalɛ Mli
Ani okaiɔ bɔ ni Goliat dũ gbeyeishemɔ ewo Israel hii tabilɔi lɛ atsuii amli lɛ? Nɛkɛ nuu obalaŋ, ni ekwɔlɛ fe ninetalɔ nɛɛhu nɛɛ, wo amɛhe gbeyei waa diɛŋtsɛ. (1 Samuel 17:4-11, 24) Shi David sheee gbeyei. Mɛni hewɔ? Ejaakɛ ekaaa akɛ ekɛ Goliat baakpe yɛ lɛ diɛŋtsɛ ehewalɛ mli. Kɛjɛ be mli ni afɔ lɛ mu akɛ mɔ ni baaye Israel nɔ maŋtsɛ wɔsɛɛ lɛ kɛbaa fɛɛ lɛ, eŋmɛ Nyɔŋmɔ mumɔ lɛ gbɛ koni ekudɔ lɛ ni ewo lɛ hewalɛ yɛ nibii fɛɛ ni efeɔ lɛ mli. (1 Samuel 16:13) No hewɔ lɛ ekɛɛ Goliat akɛ: “Mi lɛ miiba oŋɔɔ yɛ Yehowa Zebaot ni ji Israel tai ni obɔɔ amɛ ahora lɛ a-Nyɔŋmɔ lɛ gbɛi amli! Ŋmɛnɛ gbi nɛɛ Yehowa aaajieo awo midɛŋ.” (1 Samuel 17:45, 46) David he esa waa kɛ akromia fɔ̃ɔ, shi wɔbaanyɛ wɔna nɔmimaa akɛ Yehowa mumɔ krɔŋkrɔŋ lɛ kudɔ akromia tɛ ni efɔ̃ etswa Goliat lɛ ni eha etsɔ tɛ ni gbeɔ mɔ.—1 Samuel 17:48-51.
David kpee nɛkɛ kaa kpeteŋkpele nɛɛ naa ni eye mli kunim kɛtsɔ hekɛnɔfɔɔ ni ena akɛ Nyɔŋmɔ baafi esɛɛ ni ebaawaje lɛ hu lɛ nɔ. Ena ekɛ Nyɔŋmɔ teŋ wekukpaa kpakpa, ni hekɛnɔfɔɔ yɔɔ mli. Ŋwanejee ko bɛ he akɛ gbɛ ni Yehowa tsɔ nɔ ejie lɛ yɛ be ni tsɔ hiɛ lɛ mli lɛ wo enɛ mli hewalɛ. (1 Samuel 17:34-37) Taakɛ David ji lɛ, bo hu obaanyɛ ohiɛ okɛ Yehowa teŋ wekukpaa ni mli wa waa mli be fɛɛ be, ni ona hekɛnɔfɔɔ kwraa yɛ nyɛmɔ kɛ suɔmɔ ni eyɔɔ akɛ eeewo bo hewalɛ ni ewaje bo yɛ shihilɛi fɛɛ mli lɛ mli.—Lala 34:8, 9.
Feemɔ Nɔ ni Obaanyɛ ni Okɛna Naagba lɛ Naa
Shi kɛlɛ, enɛ etsɔɔɔ akɛ belɛ piŋmɔ ni naa wa waa, yeyeeye feemɔ, kɛ gbeyeishemɔ be ko baŋ dɔŋŋ, taakɛ Lala 55 tsɔɔ yɛ faŋŋ mli lɛ. Akɛ nɔkwɛmɔ nɔ lɛ, yɛ afii komɛi asɛɛ, yɛ nɛkɛ Yehowa mli hekɛnɔfɔɔ ni gbeyeishemɔ bɛ mli nɛɛ kpojiemɔ lɛ sɛɛ lɛ, David na gbeyeishemɔ kpele kɛha ehenyɛlɔi lɛ. Maŋtsɛ Saul naaa ehe miishɛɛ dɔŋŋ, ni enɛ ha ehe bahia ni ejo foi kɛhere eyiwala. Bɔɔ mɔdɛŋ ni ofee jwɛŋmɔŋ haomɔ ni enɛ kɛbaafɔ̃ David nɔ, kɛ sanebimɔi ni ebaaha ete shi yɛ ejwɛŋmɔ mli yɛ Yehowa yiŋtoi ahe nitsumɔ gbɛfaŋ lɛ he mfoniri yɛ ojwɛŋmɔ mli okwɛ. Ejaakɛ yɛ fɛɛ sɛɛ lɛ, afɔ lɛ mu akɛ mɔ ni baaye Israel nɔ maŋtsɛ wɔsɛɛ, ni kɛlɛ, naa lɛ ni esa akɛ ejo foi ni eyahi jwɛi amli koni ekɛbaa ewala yi, ni aagbɔbi lɛ tamɔ jwɛiaŋ kooloo. Beni eka akɛ eyaatao abobaa he yɛ Gat maŋtiase, ni ji maŋ ni Goliat jɛ mli lɛ mli lɛ, akpa lɛ shi. Ni mɛni jɛ mli ba? Nɔ ni aŋma afɔ̃ shi lɛ kɛɔ akɛ “eshe . . . gbeyei naakpa.”—1 Samuel 21:11-13.
Shi eŋmɛɛɛ gbɛ ni egbeyeishemɔ kɛ yeyeeye feemɔ ni mli wa nɛɛ atsĩ enaa ni ekɛ ehiɛ akafɔ̃ Yehowa nɔ kɛha yelikɛbuamɔ. Taakɛ Lala 34 (ni aŋma yɛ nɔ ni jɛ niiashikpamɔ nɛɛ mli ba lɛ hewɔ lɛ) tsɔɔ lɛ, David kɛɛ: “Mitao Yehowa sɛɛ gbɛ, ni ehere mi nɔ, ni ejie mi kɛjɛ migbeyeishemɔi fɛɛ mli. Nɔnalɔ nɛɛ bolɔ ni Yehowa bo toi, ni ehere lɛ kɛjɛ efimɔi fɛɛ mli.”—Lala 34:5, 7.
Kɛlɛ, Yehowa fi esɛɛ. Ni kɛlɛ, kadimɔ akɛ David taaa shi efolo ni eemɛ Yehowa ni ebajie loo ebakpɔ̃ lɛ. Eyoo bɔ ni ehe hiaa ni efee nɔ fɛɛ nɔ ni eeenyɛ yɛ shihilɛi ni eyɔɔ mli lɛ mli koni ekɛjie ehe kɛjɛ jaramɔ shihilɛ ni eyaje mli lɛ mli. Ekpɛlɛ nɔ akɛ Yehowa nine yɛ kpɔmɔ ni ena lɛ mli, shi lɛ diɛŋtsɛ hu efee he nɔ ko, ni ekwa efee ehe sɛkɛyelɔ, no hewɔ lɛ Gat maŋtsɛ lɛ egbeee lɛ. (1 Samuel 21:14–22:1) Wɔ hu ehe miihia ni wɔfee nɔ fɛɛ nɔ ni wɔɔnyɛ ni wɔkpee jatsui anaa, moŋ fe ni wɔɔmɛ Yehowa kɛkɛ ni ebakpɔ̃ wɔ.—Yakobo 1:5, 6; 2:26.
Okɛ Jatsui Babaoo Akafata Nɔ ni Otere Momo lɛ He
David kase nɔ kroko hu, nɔ ni yɔɔ dɔlɛ waa, sɛɛ mli yɛ ewala mli. Mɛni ji no? No ji akɛ, bei komɛi lɛ, wɔkɛ jatsui krokomɛi fataa nɔ ni wɔtere momo lɛ ahe. Yɛ Filistibii lɛ anɔ kunimyeli lɛ sɛɛ lɛ, nibii eyaaa nɔ jogbaŋŋ kɛhaaa David beni ekpɛ eyiŋ akɛ ekɛ kpaŋmɔ adeka lɛ baaku sɛɛ kɛya Yerusalem lɛ. Yinɔsane mli nii ni aŋma afɔ̃ shi lɛ kɛɔ wɔ akɛ: “Ni David te shi ni ekɛ mɛi ni fata ehe lɛ fɛɛ yiŋ kɛtee Baale-Yuda, ni amɛyawo Nyɔŋmɔ adeka lɛ . . . kɛba. Ni amɛwo Nyɔŋmɔ adeka lɛ amɛma shwiili hee ko nɔ . . . ni Uza kɛ Ahio, Abinadab bihii lɛ, kudɔɔ shwiili hee lɛ.”—2 Samuel 6:2, 3.
Shwiili ni akɛtsu nii kɛgbala Adeka lɛ kuɔ ehe famɔi fɛɛ ni Yehowa kɛha lɛ mli. Aje gbɛ ajaje faŋŋ akɛ esa akɛ mɛi pɛ ni akɛ nitsumɔ ewo amɛdɛŋ akɛ eterelɔi, ni ji Kahat Levibii lɛ, atere Adeka lɛ yɛ amɛ kɔɔji anɔ, ni amɛkɛ tsei kakadaji ahɔlɔ Adeka lɛ he gai, ni aje gbɛ afee kɛha enɛ lɛ amli ni amɛkɛtere. (2 Mose 25:13, 14; 4 Mose 4:15, 19; 7:7-9) Hiɛ ni akũ ashwie nɛkɛ famɔi nɛɛ anɔ lɛ kɛ amanehulu ba. Beni shwɛ sharao ni tsinai ni gbalaa shwiili lɛ aha adeka lɛ agbee shi lɛ, Uza, ni ekolɛ eji Levinyo, shi eka shi faŋŋ akɛ ejeee osɔfo lɛ, kpã enine mli ni emɔ Adeka lɛ mli koni ekagbee shi, kɛkɛ ni Yehowa tswa lɛ nɔ yɛ bulɛ ni ebɛ nɛɛ hewɔ.—2 Samuel 6:6, 7.
Akɛ maŋtsɛ lɛ, esa akɛ David atere enɛ he sɔ̃ lɛ eko. Enifeemɔ tsɔɔ akɛ, bei komɛi lɛ, mɛi ni yɔɔ amɛkɛ Yehowa teŋ wekukpaa kpakpa lɛ po baanyɛ afee amɛnii yɛ gbɛ fɔŋ nɔ kɛ amɛkɛ shihilɛi ni kaa mɔ kpe. Klɛŋklɛŋ lɛ, David mli fu. Kɛkɛ ni no sɛɛ lɛ eshe gbeyei. (2 Samuel 6:8, 9) Aka hekɛnɔfɔɔ wekukpaa ni yɔɔ ekɛ Yehowa teŋ lɛ waa akwɛ. Naa shihilɛ ni etamɔ nɔ ni eshɛɛɛ ejatsu lɛ efɔ̃ɔɔ Yehowa nɔ, beni enyiɛɛɛ ekitai ni ewo lɛ asɛɛ lɛ. Ani no baanyɛ afee shihilɛ ni wɔyajeɔ mli bei komɛi lɛ? Ani bei komɛi lɛ wɔshwaa Yehowa yɛ naagbai ni baa, kɛji wɔkpoo egbɛtsɔɔmɔi lɛ ahewɔ?—Abɛi 19:3.
Jatsu ni Ji Fɔyeli Naa ni Wɔɔdamɔ
Sɛɛ mli lɛ, David kɛ fɔyeli he jatsu kpele ko bafɔ̃ lɛ diɛŋtsɛ enɔ kɛtsɔ esha kpele ni efee eshi Yehowa jeŋba he tɛi ni efolɔ eshwie shi lɛ nɔ. Yɛ enɛ mli lɛ, David kwa sɔ̃ ni kã enɔ akɛ enyiɛ etabilɔi lɛ ahiɛ yɛ ta mli lɛ. Ehi Yerusalem beni amɛtee amɛmiiwuu ta. Enɛ ha eyabote naagba ni yɔɔ hiɛdɔɔ mli.—2 Samuel 11:1.
Maŋtsɛ David na Batsheba ni he yɔɔ fɛo lɛ ni eeju ehe. Ekɛ lɛ bote bɔlɛnamɔ fɔŋ mli, ni yoo lɛ na musu. (2 Samuel 11:2-5) Bɔni afee ni ekɛtsimɔ ejeŋba fɔŋ nɛɛ nɔ lɛ, eto gbɛjianɔ akɛ aha yoo lɛ wu, Uria, aku esɛɛ kɛjɛ ta ŋa lɛ nɔ kɛba Yerusalem. Uria ekpɛlɛɛɛ ni ekɛ eŋa lɛ naa gbalashihilɛ mli nifeemɔ yɛ be mli ni Israel miiwuu ta lolo lɛ. (2 Samuel 11:6-11) Agbɛnɛ David batsɔ yiwalɛ kɛ ŋaa gbɛ fɔŋ diɛŋtsɛ nɔ koni ekɛtsimɔ esha ni efee lɛ nɔ. Eto gbɛjianɔ koni Uria hefatalɔi asraafoi lɛ ashi Uria yɛ he ni ehiii kwraa yɛ ta lɛ mli, koni agbe lɛ. Yitsoŋwalɛ, esha kpele diɛŋtsɛ nɛ!—2 Samuel 11:12-17.
Shi, yɛ naagbee lɛ, aha David bu esha ni efee nɛɛ he akɔntaa, ni akpa ehe mama. (2 Samuel 12:7-12) Bɔɔ mɔdɛŋ ni ofee awerɛho kɛ fɔyeli ni David nu he lɛ tsiimɔ yɛ enɔ, beni eyoo bɔ ni esha ni efee, yɛ akɔnɔ ni ena eha yoo lɛ hewɔ lɛ da ha lɛ he mfoniri yɛ ojwɛŋmɔ mli okwɛ. Kulɛ nijiaŋwujee henumɔ ni lɛ diɛŋtsɛ enu he lɛ baanyɛ aye enɔ kwraa, titri akɛni ekolɛ eji nuu ni nuɔ nii ahe waa lɛ hewɔ. Ekolɛ enu he po akɛ eji mɔ ko ni esaaa kwraa!
Shi kɛlɛ, David kpɛlɛ etɔmɔ lɛ nɔ oya nɔŋŋ, ni ekɛɛ gbalɔ Natan akɛ: “Mifee Yehowa shishi esha.” (2 Samuel 12:13) Lala 51 lɛ kɛɔ wɔ bɔ ni enu he eha kɛ bɔ ni ekpa Yehowa Nyɔŋmɔ fai koni etsuu ehe ni ekɛ ehe ake lɛ. Esɔle akɛ: “Ju mihe kwraa kɛjɛ minɔsha lɛ mli, ni otsuu mihe kɛjɛ mihe esha lɛ mli! Ejaakɛ minɔtɔmɔi lɛ, mi diɛŋtsɛ mile, ni mihe esha lɛ yɛ mihiɛ daa.” (Lala 51:4, 5) Akɛni etsake etsui lɛlɛŋ hewɔ lɛ, enyɛ esaa etswa ekɛ Yehowa teŋ wekukpaa ni mli wa, ni bɛŋkɛ kpaakpa ema shi ekoŋŋ. David haaa fɔyeli henumɔ kɛ bɔ ni enuɔ he akɛ esaaa lɛ aye ejwɛŋmɔ nɔ be fɛɛ be. Eshɛ ejatsu lɛ efɔ̃ Yehowa nɔ kɛtsɔ heshibaa ni ekɛkpɛlɛ efɔyeli lɛ nɔ, ní ejie anɔkwa tsuitsakemɔ kpo, ní esɔle waa kɛha Yehowa dɛŋ eshaifaa lɛ nɔ. Enɛ ha esaa ena Nyɔŋmɔ hiɛ duromɔ ekoŋŋ.—Lala 51:9-14, 17-21.
Sɛɛgbɛtsɔɔmɔ Naa ni Wɔɔdamɔ
Enɛ kɛ wɔ baa nifeemɔ ni tsirɛ David ni eha eŋma Lala 55 lɛ nɔ. No mli lɛ eyɛ henumɔ mli nɔnyɛɛ kpele shishi. “Mitsui he hiaa lɛ yɛ mimli,” taakɛ eŋma lɛ, “ni gbele he ŋmiŋmi emɔ mi.” (Lala 55:5) Mɛni kɛ piŋmɔ nɛɛ ba? Absalom, David binuu lɛ, eto ŋaa fɔŋ akɛ ebaaju maŋtsɛyeli lɛ kɛjɛ David dɛŋ. (2 Samuel 15:1-6) Nɛkɛ esɛɛ gbɛ ni lɛ diɛŋtsɛ ebinuu eje nɛɛ naadaamɔ wa waa, shi nɔ ni fite sane lɛ kwraa ji akɛ, David ŋaawolɔ ni eheɔ lɛ eyeɔ fe fɛɛ, nuu ko ni atsɛɔ lɛ Ahitofel, yafata mɛi ni tee David yinɔ apam lɛ ahe. Ahitofel ji mɔ ni David wieɔ ehe yɛ Lala 55:13-15 lɛ. Eyi nɔ apam ni amɛtee kɛ esɛɛ ni amɛkpa yɛ nɛɛ hewɔ lɛ, ehe bahia ni David ajo foi kɛshi Yerusalem. (2 Samuel 15:13, 14) Kwɛ hejaramɔ ni enɛ kɛaaba enɔ!
Shi kɛlɛ, eŋmɛɛɛ gbɛ ni ehenumɔ ni mli wa waa kɛ ewerɛhoyeli nɛɛ agbɔjɔ hekɛnɔfɔɔ kɛ hiɛnɔkamɔ ni eyɔɔ yɛ Yehowa mli lɛ. Esɔle ekpa Yehowa fai ni efite mɛi ni etee eyinɔ apam nɛɛ ayiŋtoi lɛ. (2 Samuel 15:30, 31) Shikome ekoŋŋ lɛ, wɔnaa akɛ David taaa shi kɛkɛ ni eemɛ ni Yehowa atsu nitsumɔ nɛɛ fɛɛ eha lɛ. Beni hegbɛ lɛ ba nɔŋŋ pɛ lɛ, efee nɔ ni ebaanyɛ ni ekɛkpee ŋaa fɔŋ ni atoɔ ashiɔ lɛ nɛɛ naa. Etsu eŋaawolɔi lɛ ateŋ mɔ kroko, Hushai kɛku sɛɛ kɛtee Yerusalem ekoŋŋ, ni ekwa efee tamɔ nɔ ni efata ŋaatsɔlɔi lɛ ahe, eyɛ mli akɛ, yɛ anɔkwale mli lɛ, fitemɔ moŋ etaoɔ efite amɛŋaa lɛ. (2 Samuel 15:32-34) Ŋaa nɛɛ ye omanye, kɛtsɔ Yehowa sɛɛfimɔ nɔ. Hushai tsĩ amɛnaa aahu ni eha David na be saŋŋ ni ekɛbua emɛi lɛ anaa ni ekɛsaa ehe jogbaŋŋ bɔni afee ni enyɛ efa ehe.—2 Samuel 17:14.
Kwɛ bɔ ni David hiɛ baasɔ Yehowa kwɛmɔ ni hebuu yɔɔ mli, kɛ etsuishitoo kɛ bɔ ni esumɔɔ ni ekɛ sane ake lɛ, yɛ ewala be fɛɛ mli! (Lala 34:19, 20; 51:19) Nɛkɛ saji ni ba enɔ nɛɛ nɔ David damɔ ni ekɛ hekɛnɔfɔɔ woɔ wɔ hewalɛ yɛ wɔ haomɔ bei amli ni wɔya Yehowa ŋɔɔ kɛha yelikɛbuamɔ lɛ, ni ‘wɔshɛ wɔjatsu lɛ wɔfɔ̃ Yehowa nɔ.’—Okɛto 1 Petro 5:6, 7 he.
Tswaa Okɛ Yehowa Teŋ Wekukpaa ni Mli Wa, ni Hekɛnɔfɔɔ Yɔɔ Mli Oma Shi, ni Oha Ehi Shi Daa
Te wɔɔfee tɛŋŋ wɔna wɔkɛ Yehowa teŋ wekukpaa ni tamɔ nɔ ni David na, ni ji wekukpaa ni waje lɛ yɛ kaa kɛ amanehulu bei ni mli wa waa mli lɛ eko? Wɔtswaa nakai wekukpaa lɛ wɔmaa shi kɛtsɔɔ Nyɔŋmɔ Wiemɔ, Biblia lɛ ni wɔkɛ ekaa kaseɔ lɛ nɔ. Wɔhaa ekɛ emlai, kɛ ekpɔi, kɛ esu lɛ he gbɛtsɔɔmɔi haa wɔ. (Lala 19:8-12) Beni wɔjwɛŋɔ Nyɔŋmɔ Wiemɔ lɛ nɔ lɛ, ehaa wɔbɛŋkɛɔ lɛ kpaakpa ni wɔkaseɔ bɔ ni wɔkɛ wɔhe fɔ̃ɔ enɔ kwraa. (Lala 143:1-5) Wɔhaa nakai wekukpaa lɛ mli waa ni wɔwajeɔ lɛ beni wɔfataa nanemɛi jálɔi ahe koni Yehowa aya nɔ atsɔɔ wɔ nii babaoo lɛ. (Lala 122:1-4) Ni wɔhaa wɔkɛ Yehowa teŋ wekukpaa lɛ mli waa kɛtsɔɔ sɔlemɔ ni jɛ wɔtsui mli nɔ.—Lala 55:2.
Eji anɔkwale akɛ, taakɛ wɔji lɛ, David hu ná enɔnyɛɛ shihilɛi beni ekɛ Yehowa teŋ wekukpaa lɛ mli waaa jogbaŋŋ tamɔ bɔ ni kulɛ esa akɛ efee lɛ. Nɔnyɛɛ baanyɛ aha wɔ hu ‘wɔye sɛkɛ.’ (Jajelɔ 7:7) Shi Yehowa naa nɔ ni yaa nɔ lɛ, ni ele nɔ ni yɔɔ wɔtsui mli. (Jajelɔ 4:1; 5:8) Esa akɛ wɔmia wɔhiɛ waa ni wɔha wɔkɛ Yehowa teŋ wekukpaa lɛ mli awa be fɛɛ be. Ni no lɛ, nɔ jatsu fɛɛ jatsu ni wɔtere lɛ, wɔbaanyɛ wɔkɛ wɔhe afɔ̃ Yehowa nɔ ni ejie nɔnyɛɛ lɛ kɛjɛ wɔnɔ, loo ni eha wɔ hewalɛ ni wɔkɛkpee wɔ shihilɛ lɛ naa. (Filipibii 4:6, 7, 13) Nɔ ni he hiaa ji bɛŋkɛmɔ ni wɔɔbɛŋkɛ Yehowa kpaakpa. Beni David fee enɛ lɛ, enu he akɛ eyɛ shweshweeshwe kɛmɔ shi.
No hewɔ lɛ, bɔ fɛɛ bɔ ni oshihilɛ ji lɛ, David kɛɛ, shɛ ojatsu lɛ ofɔ̃ Yehowa nɔ be fɛɛ be. Ni no lɛ, wɔbaana anɔkwale ni yɔɔ shiwoo nɛɛ mli, akɛ: “Lɛ eeehiɛ omli; eŋmɛŋ gbɛ gbi ko gbi ko ni jalɔ adidãa.”—Lala 55:23.