“Yesu Kristo Ji Nuŋtsɔ”—Yɛ Mɛɛ Gbɛ Nɔ ni Mɛɛ Be?

“NUŊTSƆ lɛ kɛɛ mi-Nuŋtsɔ lɛ akɛ, Ta mininejurɔ nɔ, kɛyashi beyinɔ ni mafee ohenyɛlɔi lɛ onaneshi maaŋoo.” Nɛkɛ ji Lala 110:1 shishitsɔɔmɔ yɛ King James Version Biblia lɛ mli. Namɔ ji “NUŊTSƆ lɛ” ni yɔɔ biɛ lɛ, ni namɔ ekɛwieɔ lɛ?

Hebri niŋmaa lɛ shishitsɔɔmɔ ni ja jogbaŋŋ nyɛɔ ehaa klɛŋklɛŋ sanebimɔ lɛ hetoo oya. “Wiemɔ ni Yehowa kɛ mi-Nuŋtsɔ lɛ wie ji akɛ: . . . ” Enɛ hewɔ lɛ, “NUŊTSƆ” ni akɛ niŋmaa okadii wuji eŋmala lɛ tsɔɔ Nyɔŋmɔ ofe lɛ, Yehowa diɛŋtsɛ. Eyɛ mli akɛ King James Version lɛ kpɛlɛɔ Nyɔŋmɔ gbɛi nɛɛ nɔ kɛtsɔ “NUŊTSƆ” kɛ akɛto “Nuŋtsɔ” he ni ekɛtsuɔ nii lɛ nɔ moŋ, shi jeee no ji klɛŋklɛŋ nɔ ni futuɔ nɛkɛ sabalai nɛɛ, ejaakɛ blema Hela Septuagint, ni atsɔɔ shishi kɛjɛ Hebri mli lɛ kɛ “Nuŋtsɔ” tsuɔ nii yɛ emli sɛɛ mli nɔ lɛ amli. Mɛni hewɔ? Ejaakɛ akɛ sabala ni ji “Nuŋtsɔ” lɛ ye Nyɔŋmɔ gbɛi, ni ji Tetragrammaton, (יהוה) lɛ najiaŋ. Nilelɔ A. E. Garvie kɛɔ akɛ: “Ekolɛ atsɔɔ sabala Nuŋtsɔ [kyʹri·os] ni akɛtsuɔ nii lɛ shishi yɛ gbɛ ni waaa kwraa nɔ kɛjɛɔ sabala nɛɛ ni akɛtsuɔ nii yɛ Yudafoi lɛ akpee he lɛ, yɛ kpaŋmɔ gbɛi ni ji Yahveh [Yehowa] najiaŋ, beni akaneɔ Ŋmalɛi lɛ mli.”

Biblia lɛ wieɔ Yehowa he akɛ “Nuŋtsɔ.” (1 Mose 15:2, 8; Bɔfoi lɛ Asaji 4:24; Kpojiemɔ 6:10) Atsɛɔ lɛ hu akɛ “[anɔkwa] Nuŋtsɔ” kɛ “shikpɔŋ lɛ fɛɛ Nuŋtsɔ.” (2 Mose 23:17; Yoshua 3:13; Kpojiemɔ 11:4) Belɛ, namɔ ji “Nuŋtsɔ” ni Lala 110:1 wieɔ ehe lɛ, ni te ebalɛ tɛŋŋ ni Yehowa kpɛlɛ enɔ akɛ “Nuŋtsɔ”?

Yesu Kristo akɛ “Nuŋtsɔ”

Atsɛɔ Yesu akɛ “Nuŋtsɔ” yɛ Sanekpakpai ejwɛ lɛ amli, bei pii lɛ yɛ Luka kɛ Yohane. Yɛ Ŋ.B. klɛŋklɛŋ afii oha lɛ mli lɛ, sabala lɛ tsɔɔ nɔ ni woo kɛ bulɛ yɔɔ he, tamɔ “Owula” pɛpɛɛpɛ. (Yohane 12:21; 20:15, Kingdom Interlinear) Yɛ Marko Sanekpakpa lɛ mli lɛ, akɛ wiemɔ “Tsɔɔlɔ,” aloo Rab·boʹni lɛ fɔɔ nitsumɔ waa kɛji aawie Yesu he. (Okɛ Marko 10:51 ato Luka 18:41 he.) Saul sane ni ebi yɛ Damasko gbɛ lɛ nɔ akɛ, “Bo namɔŋ, Nuŋtsɔ?” lɛ po hiɛ nɛkɛ shishinumɔ ni tsɔɔ nibimɔ ni bulɛ yɔɔ mli nɛɛ. (Bɔfoi lɛ Asaji 9:5) Shi beni Yesu sɛɛnyiɛlɔi lɛ bale amɛ-Nuŋtsɔ lɛ jogbaŋŋ lɛ, ebafee faŋŋ akɛ sabala “Nuŋtsɔ” ni amɛkɛtsu nii lɛ tsɔɔ babaoo fe bulɛ kɛkɛ ni amɛkɛhaa lɛ.

Yɛ egbele kɛ eshitee lɛ sɛɛ, dani ebaakwɔ kɛaaya ŋwɛi lɛ, Yesu jie ehe kpo etsɔɔ ekaselɔi lɛ ni ewie nɛkɛ wiemɔ ni hɛleɔ mɔ shi nɛɛ akɛ: “Aŋɔ hegbɛ fɛɛ aha mi yɛ ŋwɛi kɛ shikpɔŋ nɔ.” (Mateo 28:18) Kɛkɛ ni, yɛ Pentekoste gbi lɛ nɔ, yɛ mumɔ krɔŋkrɔŋ ni afɔse ashwie shi lɛ hewalɛ shishi lɛ, Petro wie Lala 110:1 he, ni ekɛɛ: “No hewɔ lɛ ha ni Israel we lɛ fɛɛ ale krɛdɛɛ akɛ Nyɔŋmɔ eŋɔ nɛkɛ Yesu ni nyɛsɛŋ lɛ nɛɛ efee Nuŋtsɔ kɛ Kristo fɛɛ.” (Bɔfoi lɛ Asaji 2:34-36) Yɛ anɔkwa ni eye aahu kɛyashi hiɛshishwiemɔ gbele mli yɛ sɛŋmɔtso nɔ lɛ hewɔ lɛ, atee Yesu shi ni aha lɛ nyɔmɔwoo ni nɔ kwɔ fe fɛɛ. Kɛkɛ ni ebote enuŋtsɔyeli lɛ mli yɛ ŋwɛi.

Bɔfo Paulo ma Petro wiemɔi lɛ anɔ mi beni eŋma akɛ Nyɔŋmɔ “kɛ [Yesu] ta eninejurɔ nɔ yɛ ŋwɛiniiaŋ, yɛ onukpayeli kɛ hegbɛ kɛ hewalɛ kɛ nɔyeli fɛɛ kɛ gbɛi fɛɛ gbɛi ni awo, jeee benɛ be nɛɛ mli kɛkɛ, shi be ni baaba lɛ mli hu lɛ anɔ.” (Efesobii 1:20, 21) Yesu Kristo nuŋtsɔyeli lɛ nɔ kwɔ fe nuŋtsɔyelii krokomɛi fɛɛ, ni ebaatsa nɔ kɛyabote jeŋ hee lɛ mli tɔ̃ɔ. (1 Timoteo 6:15) Awo enɔ “gojoo,” ni aha lɛ “gbɛi ni ta gbɛi fɛɛ gbɛi nɔ” bɔni afee ni mɔ fɛɛ mɔ akpɛlɛ nɔ “akɛ Yesu Kristo ji Nuŋtsɔ kɛwo Tsɛ Nyɔŋmɔ lɛ hiɛ nyam.” (Filipibii 2:9-11) Enɛ hewɔ lɛ Lala 110:1 klɛŋklɛŋ fã lɛ ba mli, ni akɛ “ŋwɛi bɔfoi kɛ hegbɛi kɛ hewalɛi” wo Yesu nuŋtsɔyeli lɛ shishi.—1 Petro 3:22; Hebribii 8:1.

Yɛ Hebri Ŋmalɛi lɛ amli lɛ, wiemɔ ni ji “nuŋtsɔmɛi a-Nuŋtsɔ” lɛ kɔɔ Yehowa pɛ he. (5 Mose 10:17; Lala 136:2, 3) Shi Petro jɛ mumɔŋ ewie Kristo Yesu he akɛ: “Mɔ nɛ ji mɛi krokomɛi fɛɛ a-Nuŋtsɔ [loo, “wɔ fɛɛ wɔ-Nuŋtsɔ,” Goodspeed].” (Bɔfoi lɛ Asaji 10:36) Lɛlɛŋ, eji “gbohii kɛ hiɛkalɔi fɛɛ a-Nuŋtsɔ.” (Romabii 14:8, 9) Kristofoi kɛ oyaiyeli kpɛlɛɔ Yesu Kristo nɔ akɛ amɛ-Nuŋtsɔ kɛ Nɔtsɛ, ni amɛjɛɔ amɛsuɔmɔ mli amɛfeɔ toiboo amɛhaa lɛ akɛ etsuji ni ekɛ ela ni jara wa waa lɛ he amɛ. Ni Yesu Kristo eye esafo lɛ nɔ akɛ maŋtsɛmɛi a-Maŋtsɛ kɛ nuŋtsɔmɛi a-Nuŋtsɔ kɛjɛ Pentekoste, afi 33 Ŋ.B. kɛbaa. Shi amrɔ nɛɛ, kɛjɛ 1914 kɛbaa nɛɛ, aha lɛ maŋtsɛyeli hegbɛ koni eye maŋtsɛ yɛ nakai gbɛhe lɛ mli, ni akɛ ehenyɛlɔi fɛɛ efee ‘enajiashi maaŋoo.’ Be eshɛ kɛha lɛ agbɛnɛ akɛ eya koni ‘eyaye lumɔ yɛ amɛteŋ,’ fɛɛ lɛ, koni eha Lala 110:1, 2 aba mli.—Hebribii 2:5-8; Kpojiemɔ 17:14; 19:16.

Belɛ, te esa akɛ anu Yesu wiemɔi ni ji “mi-Tsɛ etuu nii fɛɛ ewo midɛŋ,” ni ewie dani egbo ni atee lɛ shi lɛ shishi aha tɛŋŋ? (Mateo 11:25-27; Luka 10:21, 22) Ejeee wiemɔ ni mli lɛɛ ni kɔɔ nɔ fɛɛ nɔ he tamɔ nɔ ni wɔsusu he momo lɛ. Yɛ Mateo kɛ Luka woji lɛ fɛɛ mli lɛ, emli sane lɛ jieɔ lɛ kpo akɛ Yesu miiwie nii ni aŋɔtee mɛi ni ji nilelɔi yɛ je lɛŋ lɛ, shi ajie lɛ kpo kɛtsɔ enɔ akɛni ‘ele Tsɛ lɛ jogbaŋŋ’ lɛ hewɔ lɛ he. Beni abaptisi lɛ yɛ nu mli ni afɔ lɛ akɛ Nyɔŋmɔ mumɔŋ Bi lɛ, Yesu nyɛ ekai shihilɛ ni eyɔɔ mli yɛ ŋwɛi dani ebatsɔ gbɔmɔ adesa lɛ, kɛ nilee fɛɛ ni fata he lɛ hu, shi esoro enɛ kwraa yɛ nuŋtsɔ ni ebatsɔ yɛ sɛɛ mli lɛ he.—Yohane 3:34, 35.

Nɔ ni Jieɔ Yesu Kristo Kpo akɛ Nuŋtsɔ

Bɔ ni átsɔɔ hei komɛi ashishi aha yɛ Kristofoi a-Hela Ŋmalɛi lɛ amli lɛ kɛ naagba baa kɛji aatsɔɔ wiemɔi komɛi ni atsɛ yisɛɛ kɛjɛ Hebri Ŋmalɛi lɛ amli, ni wieɔ “NUŊTSƆ,” Yehowa Nyɔŋmɔ he lɛ shishi. Akɛ nɔkwɛmɔ nɔ lɛ, okɛ Luka 4:19 ato Yesaia 61:2 he yɛ King James Version loo The New Jerusalem Bible lɛ mli okwɛ. Mɛi komɛi kɛɔ akɛ Yesu hé sabala ni ji “Nuŋtsɔ” lɛ kɛjɛ Yehowa dɛŋ, ni ákɛ, Yesu ni yɔɔ heloo mli lɛ ji Yehowa diɛŋtsɛ, shi naataomɔ ni bɛ Ŋmalɛ mli sɛɛfimɔ ko kwraa nɛ. Be fɛɛ be lɛ, ahaa anaa Yehowa Nyɔŋmɔ kɛ e-Bi, Yesu Kristo akɛ mɛi enyɔ ni esoro mɔ nɛ kwraa yɛ mɔ nɛ he yɛ Ŋmalɛi lɛ amli. Yesu ha ale e-Tsɛ gbɛi, ni edamɔ shi kɛha lɛ.—Yohane 5:36, 37.

Kadimɔ wiemɔi ni atsɛ yisɛɛ kɛjɛ Hebri Ŋmalɛi lɛ amli, taakɛ amɛjeɔ kpo yɛ Hela Ŋmalɛi lɛ amli lɛ yɛ nɔkwɛmɔ nii ni nyiɛ sɛɛ nɛɛ amli. Atsĩ Yehowa Nyɔŋmɔ kɛ e-Mɔ ni Efɔ lɛ Mu, loo Mesia lɛ fɛɛ tã yɛ Bɔfoi lɛ Asaji 4:24-27, ni tsɛɔ wiemɔ lɛ sɛɛ kɛjɛɔ Lala 2:1, 2 lɛ. Eka shi faŋŋ akɛ Romabii 11:33, 34 mli sane lɛ miiwie Nyɔŋmɔ, mɔ ni ji ŋaa kɛ nilee fɛɛ Jɛɛhe lɛ he, kɛ wiemɔ ni etsɛ yisɛɛ kɛjɛ Yesaia 40:13, 14. Beni eŋmaa wolo eyaha Korinto asafo lɛ, Paulo saa etĩ nakai wiemɔ ni etsɛ yisɛɛ lɛ mli akɛ, “Namɔ ena ele Yehowa jwɛŋmɔ?” kɛkɛ ni ekɛfata he akɛ: “Shi wɔ lɛ wɔhiɛ Kristo jwɛŋmɔ.” Nuŋtsɔ Yesu jie Yehowa jwɛŋmɔ yɛ saji ni he hiaa waa lɛ ahe lɛ babaoo kpo etsɔɔ esɛɛnyiɛlɔi lɛ.—1 Korintobii 2:16.

Bei komɛi lɛ, ŋmalɛ ko ni yɔɔ Hebri Ŋmalɛi lɛ amli lɛ kɔɔ Yehowa he, shi yɛ hewalɛ kɛ hegbɛ ni E-kɛhaa mɔ kroko lɛ hewɔ lɛ, ebaa mli yɛ Yesu Kristo mli. Akɛ nɔkwɛmɔ nɔ lɛ, Lala 34:8 fɔ̃ɔ wɔ nine ni ‘wɔsa wɔnaa wɔkwɛ, ni wɔɔna akɛ Yehowa hi.’ Shi Petro wie enɛ kɛkɔ Nuŋtsɔ Yesu Kristo he beni ekɛɛ akɛ: “Kɛji nyɛsa nyɛnaa akɛ Nuŋtsɔ lɛ mli hi lɛ.” (1 Petro 2:3) Petro kɔ shishitoo mla ko, ni etsɔɔ bɔ ni eji anɔkwale yɛ Yesu Kristo hu he. Kristofoi baanyɛ ana jɔɔmɔi babaoo amli ŋɔɔmɔ kɛjɛ Tsɛ lɛ kɛ e-Bi lɛ fɛɛ dɛŋ kɛtsɔ Yehowa Nyɔŋmɔ kɛ Yesu Kristo fɛɛ he nilee ni amɛaaná ni amɛtsu he nii lɛ nɔ. (Yohane 17:3) Bɔ ni Petro kɛtsu nii eha nɛɛ haaa Nuŋtsɔ Maŋtsɛ Yehowa kɛ Nuŋtsɔ Yesu Kristo fɛɛ afee mɔ koome lɛ nɔŋŋ.—Kwɛmɔ 1 Petro 2:3, NW, shishigbɛ niŋmaa lɛ.

Bɔfo Paulo ha wekukpaa ni ka gbɛhei ni Yehowa Nyɔŋmɔ kɛ e-Bi, Yesu Kristo hiɛ lɛ teŋ lɛ fee faŋŋ beni ekɛɛ akɛ: “Wɔ lɛ, Nyɔŋmɔ kome pɛ wɔyɔɔ, Tsɛ lɛ, mɔ mli ni nibii fɛɛ jɛ ni wɔyɔɔ wɔha lɛ lɛ, kɛ Nuŋtsɔ kome hu ni ji Yesu Kristo lɛ, mɔ nɔ ni nibii fɛɛ tsɔ kɛba, ni wɔ hu wɔtsɔ enɔ lɛ.” (1 Korintobii 8:6; 12:5, 6) Beni eŋmaa wolo eyaha Kristofoi asafo ni yɔɔ Efeso lɛ, Paulo tsɔɔ mɔ ni ji “Nuŋtsɔ kome,” Yesu Kristo lɛ, akɛ esoro lɛ kwraa yɛ “Nyɔŋmɔ kɛ mɛi fɛɛ a-Tsɛ kome” lɛ he.—Efesobii 4:5, 6.

Yehowa Nɔ Kwɔ fe Mɔ Fɛɛ Mɔ

Kɛjɛ 1914 kɛbaa nɛɛ, wiemɔi ni yɔɔ Kpojiemɔ 11:15 eba mli anɔkwale akɛ: “Je nɛŋ maŋtsɛyeli lɛ etsɔ wɔ-Nuŋtsɔ [Yehowa Nyɔŋmɔ] kɛ e-Kristo (mɔ ni efɔ lɛ mu) lɛ nɔ, ni eeeye maŋtsɛ kɛaatee naanɔi anaanɔ.” The New International Dictionary of New Testament Theology (Volume 2, baafa 514) kɛɔ akɛ: “Beni Kristo eye hewalɛ fɛɛ nɔ kunim sɛɛ lɛ (1 Kor. 15:25), ebaaba ehe shi ewo Nyɔŋmɔ ni ji Tsɛ lɛ shishi. Yɛ nɛkɛ gbɛ nɔ lɛ, Yesu nuŋtsɔyeli lɛ baatsu oti ni ma ehiɛ lɛ he nii, ni Nyɔŋmɔ baafee nibii fɛɛ yitso (1 Kor. 15:28).” Yɛ e-Afii Akpe Nɔyeli lɛ naagbee lɛ, Kristo Yesu kɛ hewalɛ kɛ hegbɛ ni akɛwo edɛŋ be ko ni eho lɛ baaha e-Tsɛ, ni ji Nyɔŋmɔ Ofe lɛ ekoŋŋ. No hewɔ lɛ, akɛ anunyam kɛ jamɔ fɛɛ baaha Yehowa, “wɔ-Nuŋtsɔ Yesu Kristo Nyɔŋmɔ” lɛ, yɛ gbɛ ni ja nɔ.—Efesobii 1:17.

Eyɛ mli akɛ Yesu ji nuŋtsɔmɛi a-Nuŋtsɔ amrɔ nɛɛ moŋ, shi atsɛɛɛ lɛ nyɔŋmɔi a-Nyɔŋmɔ kɔkɔɔkɔ. Yehowa kã he enɔ kwɔ fe mɔ fɛɛ mɔ. Yɛ nɛkɛ gbɛ nɔ lɛ, Yehowa baafee “nibii fɛɛ ayitso.” (1 Korintobii 15:28) Yesu nuŋtsɔyeli lɛ haa lɛ gbɛhe ni sa lɛ akɛ Kristofoi asafo lɛ Yitso. Eyɛ mli akɛ ekolɛ wɔɔna “nuŋtsɔmɛi” ni yɔɔ gbɛhei ni nɔ kwɔlɔ mli yɛ je nɛŋ moŋ, shi wɔyaa nɔ wɔkɛ wɔhe fɔɔ mɔ ni ji nuŋtsɔmɛi a-Nuŋtsɔ lɛ nɔ. Ni kɛlɛ, Yesu Kristo yaa nɔ ebaa ehe shi ehaa e-Tsɛ lɛ lolo, yɛ egbɛhe ni nɔ kwɔ ni awo nɔ lɛ mli, “koni Nyɔŋmɔ aye mɔ fɛɛ mɔ nɔ.” (1 Korintobii 15:28, The Translator’s New Testament) Mɛɛ heshibaa he nɔkwɛmɔ nɔ fɛfɛo Yesu efee efɔ shi eha ekaselɔi lɛ nɛkɛ koni amɛnyiɛ sɛɛ, beni amɛkpɛlɛɔ enɔ akɛ amɛ-Nuŋtsɔ po lɛ!

[Akrabatsa ni yɔɔ baafa 30]

“Kɛ mɛi ni ŋma Kpaŋmɔ Hee lɛ miiwie Nyɔŋmɔ he lɛ, amɛmiitsɔɔ wɔ-Nuŋtsɔ Yesu Kristo Nyɔŋmɔ kɛ Tsɛ lɛ. Kɛ amɛmiiwie Yesu Kristo he lɛ, amɛwieee ehe akɛ Nyɔŋmɔ, ni amɛsusuuu ehe nakai hu. Eji Nyɔŋmɔ Kristo lɛ, Nyɔŋmɔ Bi, Nyɔŋmɔ Nilee, Nyɔŋmɔ Wiemɔ lɛ. Esa akɛ akane Bf. Yohane sane lɛ Hiɛkpamɔ Wiemɔ, ni bɛŋkɛɔ Nikaea Tsɔɔmɔ lɛ he lɛ yɛ shishinumɔ ni ajaje faŋŋ yɛ Sanekpakpai lɛ amli ni tsɔɔ akɛ ebaa shi fe Tsɛ lɛ kɛ gbeekpamɔ naa; ni Hiɛkpamɔ Wiemɔ lɛ mli bɛ faŋŋ yɛ Hela wiemɔ mli kɛ [the·osʹ] ni bɛ wiemɔ ni tsɔɔ nɔ pɔtɛɛ lɛ, tamɔ bɔ ni ejeɔ kpo yɛ Blɔfo mli lɛ.” —“The Divinity of Jesus Christ,” ni John Martin Creed ŋma.