FÃ 9
Anɔkwa Jamɔ He Baanyɛ Aba Sɛɛnamɔ Kɛha Bo Kɛya Naanɔ!
1. Kɛ́ ‘wɔtsi wɔbɛŋkɛ Nyɔŋmɔ’ lɛ, mɛni baaba?
YEHOWA sumɔɔ mɛi ni sɔmɔɔ lɛ lɛ asane. Kɛ́ ojáa Yehowa lɛ, ebaajɔɔ bo amrɔ nɛɛ kɛ wɔsɛɛ be mli hu. Biblia lɛ kɛɔ akɛ: “Nyɛtsia nyɛbɛŋkɛa Nyɔŋmɔ, ni eeetsi eeebɛŋkɛ nyɛ.”—Yakobo 4:8.
2. Te wɔɔfee tɛŋŋ wɔtsi wɔbɛŋkɛ Nyɔŋmɔ, ni enɛ baasa wɔsɔlemɔi ahe yɛ mɛɛ gbɛ nɔ?
2 Dani oootsi obɛŋkɛ Nyɔŋmɔ lɛ, esa akɛ okase e-Wiemɔ lɛ ní okɛtsu nii. Kɛ́ osɔle yɛ Yehowa suɔmɔnaa nii kɛ gbeekpãmɔ naa lɛ, ebaabo osɔlemɔi lɛ atoi ni ebaaha hetoo. Kristofonyo bɔfo Yohane ŋma akɛ: “Enɛ ji ekãa ni wɔyɔɔ yɛ [Nyɔŋmɔ hiɛ] lɛ, akɛ, kɛji wɔba nɔ ko yɛ esuɔmɔ naa lɛ, eboɔ wɔ toi. Ni kɛji wɔle akɛ nɔ fɛɛ nɔ ni wɔbaa lɛ lɛ eboɔ wɔ toi lɛ, belɛ wɔle akɛ nii ni wɔba lɛ lɛ, wɔnine eshɛ nɔ.”—1 Yohane 5:14, 15.
3-7. Mɛɛ gbɛ nɔ wɔɔtsɔ wɔná nilee ni jɛ Nyɔŋmɔ ŋɔɔ, ni ebaanyɛ eye ebua wɔ yɛ mɛɛ gbɛ nɔ?
3 Kɛfata he lɛ, beni otsiɔ obɛŋkɛɔ Nyɔŋmɔ lɛ, ebaaha bo nilee koni onyɛ okɛtsu daa gbi shihilɛ mli saji ni baa lɛ ahe nii. Biblia lɛ kɛɔ akɛ: “Kɛ́ nilee eshwɛ nyɛteŋ mɔ ko lɛ, ékpa Nyɔŋmɔ . . . fai.”—Yakobo 1:5.
4 Nilee ni jɛ Nyɔŋmɔ ŋɔɔ lɛ baanyɛ aye abua bo yɛ mɛɛ gbɛ nɔ? Gbɛ kome ji akɛ, ebaanyɛ eye ebua bo ni onyɛ ole nibii ni esaaa Yehowa hiɛ. Obaanyɛ ole nɔ hewɔ ni nibii nɛɛ ji tɔmɔi lɛ, kɛ nɔ ni obaanyɛ ofee ni okɛ ohe akawo mli. Nilee ni tamɔ nɛkɛ baanyɛ abu ohe kɛjɛ naagbai ni haoɔ adesai ateŋ mɛi babaoo lɛ ahe. Ákɛ nɔkwɛmɔnɔ lɛ, toiboo ni afeɔ ahaa Nyɔŋmɔ ŋaawoo ni biɔ ni he atse yɛ jeŋba gbɛfaŋ lɛ yeɔ ebuaa kɛbuɔ Nyɔŋmɔ webii ahe kɛjɛɔ hɔŋɔɔ ní asumɔɔɔ, bɔlɛnamɔ mli helai, kɛ gbalashihilɛi ni miishɛɛ bɛ mli loo amɛmli tseɔ lɛ ahe.
5 Mɛni hu nilee ni jɛɔ Nyɔŋmɔ ŋɔɔ lɛ baanyɛ afee kɛha bo? Ebaanyɛ eye ebua ni oná oshihilɛ he sɛɛ yɛ gbɛ ni hi fe fɛɛ nɔ. Ebaanyɛ eye ebua bo ni ofee yiŋkpɛi ni nilee yɔɔ mli yɛ saji ni anyɛɔ atsuɔ he nii diɛŋtsɛ, tamɔ bɔ ni ooofee okwɛ oshika nɔ jogbaŋŋ nɛkɛ lɛ mli. Obaanyɛ otiu otii kpakpai asɛɛ ní okwa otii ni sɛɛnamɔ kpakpa ko jɛɛɛ mli kɛbaaa lɛ.
6 Nilee ni jɛɔ Nyɔŋmɔ ŋɔɔ lɛ baanyɛ aye abua bo yɛ okɛ mɛi krokomɛi ateŋ wekukpaa hu mli. Obaanyɛ oná weku shihilɛ ni yɔɔ miishɛɛ. Obaanyɛ otswa okɛ mɛi krokomɛi ateŋ anɔkwa naanyobɔɔ ni sɛɛ tsɛɔ oma shi, ni obaanyɛ oná bulɛ kɛha ohe, kɛjɛ mɛi ni sɔmɔɔɔ Nyɔŋmɔ lɛ po aŋɔɔ.
7 Kɛfata he lɛ, nilee ni jɛɔ Nyɔŋmɔ ŋɔɔ ní oooná lɛ baaha bɔ ni osusuɔ shihilɛ he ohaa lɛ aya hiɛ. Ebaaye ebua bo koni onyɛ okpee shihilɛ mli naagbai kɛ nijiaŋwujei anaa. Agbɛnɛ hu, obaaná wɔsɛɛ be he susumɔ kpakpa ní ŋmɛɔ pɛpɛɛpɛ. Ni susumɔ kpakpa ni oooná nɛɛ hu baaye abua ni oná jwɛŋmɔŋ kɛ gbɔmɔtsoŋ hewalɛ kpakpa.—Abɛi 14:30; Yesaia 48:17.
8. Kɛji osɔmɔɔ Nyɔŋmɔ lɛ, mɛɛ nibii nɛkɛ osheŋ amɛ gbeyei?
8 Kɛji osɔmɔɔ anɔkwa Nyɔŋmɔ lɛ, obaaye ohe kɛjɛ gbeyeishemɔi ni haoɔ mɛi ni sɔmɔɔɔ lɛ lɛ amli. Akɛni ole akɛ wala ko bɛ gbohii lɛ amli yɛ gbonyobu lɛ mli hewɔ lɛ, osheŋ mɛi ni egboi lɛ agbeyei. Akɛni oyɛ hekɛnɔfɔɔ yɛ Nyɔŋmɔ shiwoo ni ekɛha akɛ ebaatee gbohii ashi lɛ mli hewɔ lɛ, osheŋ gbele gbeyei. Ni akɛni ole akɛ Nyɔŋmɔ yɛ hewalɛ fe mɔ fɛɛ mɔ hewɔ lɛ, osheŋ ayɛi loo ŋkunyaayelɔi agbeyei.—Yohane 8:32.
Jalɔi lɛ, Shikpɔŋ lɛ Aaatsɔ Amɛnɔ̃
9-11. Namɛi baahi Paradeiso lɛ mli, ni namɛi ehiŋ mli?
9 Kɛ́ otsi obɛŋkɛ Nyɔŋmɔ lɛ, osheŋ wɔsɛɛ be gbeyei. Taakɛ bɔ ni wɔna lɛ, Biblia lɛ egba naagbai ni wɔnaa yɛ shikpɔŋ lɛ nɔ ŋmɛnɛ lɛ amli babaoo efɔ̃ shi. Yehowa ekɛɛ wɔ akɛ nɛkɛ nibii nɛɛ baahi shi yɛ be kukuoo mli kɛkɛ; etsɛŋ ni Nyɔŋmɔ Maŋtsɛyeli lɛ baaha shikpɔŋ nɛɛ atsɔ paradeiso.—Luka 21:10, 11, 31; 23:43.
10 Mɛi ni tsiɔ amɛbɛŋkɛɔ Yehowa, ní amɛsɔmɔɔ lɛ lɛ pɛ baahi Paradeiso lɛ mli. Biblia lɛ kɛɔ akɛ: “Eshwɛ fioo kɛkɛ ni mɔ fɔŋ lɛ bɛ dɔŋŋ, ni kɛ́ okwɛ eshihilɛhe lɛ, ebɛ jɛi. Shi mɛi ni he jɔ lɛ, shikpɔŋ lɛ aaatsɔ̃ amɛnɔ̃, ni amɛmii aaashɛ amɛhe yɛ hejɔlɛ babaoo mli.”—Lala 37:10, 11.
11 Mɛi ni kɛ kuɛŋtimɔ kpooɔ akɛ amɛaabo Nyɔŋmɔ jalɛ mlai lɛ atoi lɛ awala baaŋmɛɛ amɛ kɛya naanɔ. (2 Tesalonikabii 1:8, 9) Amɛhiŋ shi dɔŋŋ. Amɛbaafata Satan kɛ edaimonioi lɛ ahe yɛ naanɔ gbele mli. (Kpojiemɔ 20:10, 14) Shi mɛi ni baleɔ Yehowa he nii ní amɛsɔmɔɔ lɛ lɛ baaná miishɛɛ waa yɛ Paradeiso mli yɛ shikpɔŋ lɛ nɔ.
Wɔsɛɛ Be ni Yɔɔ Miishɛɛ!
12. Mɛni Biblia lɛ kɛɔ yɛ wɔsɛɛ be shihilɛ he?
12 Yehowa esaa nibii ni yɔɔ naakpɛɛ eto kɛha mɛi ni sumɔɔ lɛ lɛ! Bo diɛŋtsɛ susumɔ nɔ ni e-Wiemɔ lɛ kɛɔ yɛ Paradeiso shikpɔŋ lɛ nɔ shihilɛ he lɛ he okwɛ:
Abaaná niyenii babaoo aye: “Shikpɔŋ lɛ nɔ aaaba abele [loo niyenii] babaoo kɛyashwie gɔji lɛ ayiteaŋ.”—Lala 72:16.
Wɔɔhe tsũi kpakpai: “Amɛaamamɔ tsũi, ni amɛaahi mli.”—Yesaia 65:21.
Nitsumɔ ni haa mɔ náa miishɛɛ: “Mɛi ni mihala lɛ aaaye amɛnine naa nitsumɔ lɛ mli nii aahu po. Amɛgboŋ deŋme yakatswaa.”—Yesaia 65:22, 23.
Hela bɛ dɔŋŋ: “Maŋbii lɛ ateŋ mɔ ko ekɛɛŋ akɛ: Migbɔjɔ!”—Yesaia 33:24.
Gbɔmɔtsoŋ fatɔɔ ko bɛ dɔŋŋ: “No mli lɛ aaagbele shwilafoi ahiŋmɛii, ni aaagbele toimulɔi atoii. No mli lɛ obubuafoi aaatumɔ akɛ ofrote [adowa nuu], ni mumui lilɛi hu aaalá kɛ nyamɔ.”—Yesaia 35:5, 6.
Piŋmɔ, awerɛho, gbele bɛ dɔŋŋ: “Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.”—Kpojiemɔ 21:4.
Ta bɛ dɔŋŋ: “[Nyɔŋmɔ hãa] tai asɛɛ foɔ kɛyaa shikpɔŋ lɛ naagbeehei lɛ.”—Lala 46:10.
Naanɔ wala: “Jalɔi lɛ, shikpɔŋ lɛ aaatsɔ amɛnɔ̃ ni amɛaahi nɔ daa.”—Lala 37:29.
13. Namɔ pɛ baanyɛ afee shikpɔŋ nɛɛ paradeiso, ni mɛni hewɔ?
13 Adesai nyɛŋ amɛha nibii ni tamɔ enɛɛmɛi aba kɔkɔɔkɔ, shi Yehowa yɛ hewalɛ ni ekɛaafee nɔ fɛɛ nɔ ni ekɛɛ akɛ ebaafee lɛ. Nɔ ko nɔ ko nyɛŋ atsĩ enaa ni ekafee nɔ ni etaoɔ akɛ efee lɛ. Biblia lɛ kɛɔ akɛ: “Nɔ ko nɔ ko bɛ ni Nyɔŋmɔ nyɛŋ afee.”—Luka 1:37.
14. Te ooofee tɛŋŋ obanyiɛ gbɛ ni yaa wala mli lɛ nɔ?
14 Yehowa miitsɔ e-Dasefoi lɛ anɔ eeha gbɔmɛi ni yɔɔ he fɛɛ he lɛ hegbɛ koni ‘amɛbote agbó fintɔ̃ɔ lɛ mli,’ ní amɛnyiɛ gbɛ ni kɛ mɔ yaa naanɔ wala mli lɛ nɔ. Eba akɛ ooofata gbɔmɛi ni yɔɔ miishɛɛ ni kpɛlɛɔ nakai ninefɔɔ lɛ nɔ lɛ ahe. Eba akɛ okɛ ohe aaabɔ anɔkwa jamɔ he koni oná Yehowa jɔɔmɔi amli ŋɔɔmɔ kɛya naanɔ!—Mateo 7:13, 14.